المساعد الشخصي الرقمي

مشاهدة النسخة كاملة : لهجتنا الجميله ( العامية السودانية ) ....... دعوة للمعرفة


الصفحات : 1 [2] 3 4 5 6

شاعر الغبش
03-22-2010, 09:33 AM
الشامه / عندنا إسمها ( الشيمه ) علي وزن ( الخيمة) .. وفي رواية أخري ( اللّواية ) ..وأنا ود خلاء وبحر لأن منطقتنا ( ألتي ) عندنا الحواشات في الناحية الشمالية والنيل الأزرق من الناحية الجنوبية .. وخط الخرطوم مدني ( في النص ) .. و64 كيلو من الخرطوم ( كلو لآمنو ) .. أسعل سااااي ولا يهمك .. بس الشامه دي في النيل إسمها ( الحقّاصه ) .

أما الجنابية / إسمها ( الجنابي ) .. ولا ( الجمباوي ) ..

البردعة / جاوبتها نوارة البركل وما داير أكتب فوق لي كلام اختي نوارة .. قالت مسند خلاص مسند ..
ما البركة الما قالت ليك مسند يختوهو في مجلس الرجال يكون في شكل قلب زهري مطرز بالجمبات ..


لكن إنت بتعرف
( الميجَر ) .. و(البُِودَه) .. و( البُوُغَه ) .. و ( الشُّونه ) .. ( والعوّامَه ) .. و ( اللّتيبه )

جندي
03-22-2010, 10:43 AM
عمنا الباشا يديك العافية
والله الشباب ماقصروا اقصد المخرفين
بس يا عمنا الدانة مافي زول ورانا ليها
وهي الوحيدة ان بقت من الشمالية ما لا قتنا قبل كدي

عمنا المبارك
ما تقول الناس البي يشرحوا ديل كبار
انا اغلب الحاجات دي ما شفتها
ولكن عرفتها من الونسة مع الناس الكبار

خفيف الظل((بوبا))
03-22-2010, 11:48 AM
السبلوقة : ممر المياه في الجدول الكبير الى الساقيه
الانقاية : هى قطعت الارض
التقئ : هي الساحة التي يتم فيها نوريق المحصول
الضريي : وهو فرز التبن عن البذور الفول
التقنت: حواجز الحيضان و الجداول
التقاوي: التيراب جميع انواع الحبوب
البوقة: أول سقية في الزراعة
السعن: من جلد الماعز.....حفظ الموية و اللبن.
والكرديك :
اللبدي: توضع تحت السرج

والسلبة :حبل مفتول من القش

انا آسف لو كانت متكرره
آسف لو كانت شويه عاميه مع رطانه

أمير احمد
03-22-2010, 01:17 PM
استاذي
الباشا




باشا
:SnipeR (69):
ودايما ديوانو عامر
:SnipeR (69)::SnipeR (69):

نوارة البركل
03-22-2010, 04:56 PM
نواره

طلعتى سنجكاويه ميه ميه

غريبه السناجك كلهم خت 100

ويموتوا فى سيدى على

إلا انتو ..... سلكتو خط الحريه وراء الزعيم الأزهرى ... طبعاً ناس راقيه

وبالمناسبه دى عندنا حبوبةً لينا جات الصرايه حقت سيدى على فى الخرطوم

صنقرت عند الباب وقالت ليهم

هو يا جنيات أمشو نادوا لى على ود اخوى قولوا ليه عمتك دايراك

( بالجد قصه حقيقه )

يديك العافيه يا نواره ..... قاموسك ميه ميه

وفعلاً كل الكلمات قاموس جزيره

أها .... المره الجايه عاوزين قاموس سنجكاوى

خلينا نجيب خبر ناس ..... بالى بالك :sniper (101):

الباشا الكبير سلام وتحية كلها احترام
الباشا يخيل لي لو صدق حدسي انك كنت في كريمة أو قرأت بها معلوماتك كلها صحيحة عننا فعلاً نحن لا نؤيد حزب السيد وتلبية لطلبك لك قاموس سنجكاوي شايقي بحت ونشوف ناس بالي بالك يعملوا شنو وكمان نشوف ناس الجزيرة يشاركونا تراثنا
العشرين هم : -
1. الدفيق
2. الكار
3. البسديق
4. النقاع
5. الساسوية
6. الشَكْشَاكة
7. السونيق
8. الدردرة
9. الجسارة
10. زربقو
11. كُشر
12. الزول دا مكجني
13. الطاب
14. القِسّيبة
15. البعو
16. الكَركَتي ( فتح الكافين )
17. الكعرنوف
18. الاشميق
19. العرجون
20. الصارقيل

الباشا
03-22-2010, 11:56 PM
أنا ود خلاء وبحر لأن منطقتنا ( ألتي ) عندنا الحواشات في الناحية الشمالية والنيل الأزرق من الناحية الجنوبية .. وخط الخرطوم مدني ( في النص ) .. و64 كيلو من الخرطوم ( كلو لآمنو ) .. أسعل سااااي ولا يهمك .. بس الشامه دي في النيل إسمها ( الحقّاصه ) .
لكن إنت بتعرف
( الميجَر ) .. و(البُِودَه) .. و( البُوُغَه ) .. و ( الشُّونه ) .. ( والعوّامَه ) .. و ( اللّتيبه )

( ألتي ) عدييييل كدى .... الناس ديل هولنا

طيب تعال على الخاص وتلقى مايسرك

ها زول كان كدى إنت زول بيت طب .....

على كل .. الحال من بعضو .... عمك مولود على النيل الازرق وبيتنا فوق القيفه يعنى ايام الدميره بنلمس المويه بيدينا .... ولو كنت شاااااطر حتعرف بالضبط عمك من وين ؟؟ وبينا وبينكم 20 كيلو بس ... جهة الخرتوم .... حذر فذر تبقى وين ؟؟؟ وليك جائزه

أما الشامه نحن ننطقها بكل هذه اللهجات شامه وشيمه ولوايه بس الحقاصه نحن بنقولها للهواء البيجيك عامل ذى الشيمه واللوايه ( العصار ) يعنى وبنقول عليه واليعاذ بالله ساكنو الشيطان عشان كدا لما نشوفوا بنشكل كفنا اليمين ( ا ا ا5 ) ولو بصيت عليها تقراها ( الله) ونوجهها ناحية العصار ونقول ( أوم حومد معانا ما تغشانا ) تلاته مرات ... .

وبعدين تعال هنا إنت بتخترع واللا شنو


( الميجَر ) .. و(البُِودَه) .. و( البُوُغَه ) .. و ( الشُّونه ) .. ( والعوّامَه ) و ( اللّتيبه )

كلهن عرفتهن علا (البُِودَه) .. ويمكن ( البُوُغَه ) وإن كان حروفها تفسرها بغ بغ بغ بغ :thumbup:

اها عاد ما تقصر

طل علينا كل مره واتحفنا من قاموس البحر والضهرا

فعلاً سودانا غنى بكل شى لاحظوا يا شباب حتى هنالك اختلاف فى اللهجات بين ناس المنطقه الواحده

يديك الفى مرادك يا شاعرنا

الباشا
03-23-2010, 12:09 AM
بس يا عمنا الدانة مافي زول ورانا ليها
وهي الوحيدة ان بقت من الشمالية ما لا قتنا قبل كدي

عمنا المبارك

انا اغلب الحاجات دي ما شفتها




جندى ود جرّ هته واهد كدا

هازول كيفنك ... وين الحى بيك ؟

الدانه هى القرعه والقرعه اناء من نبات القرع المر بعد ننشف القرعه نشقها بحرفنه كدا اللب نعملوا عربات نجرى بيه والجزء الناشف يطلع سلطانيه ... وسلطانيه أيه سلطانيه تستعمل أساساً للسطلى :SnipeR (93): خلى عمك ود ابراهيم يفسر ليك

اها عاد إنت برضو ما تقصر

طل علينا كل مره واتحفنا من قاموس الشماليه سنجك دنقل جعلتى هلفا دقيم كلو عسل

يديك العافيه يا ود جرّ

الباشا
03-23-2010, 12:22 AM
آسف لو كانت شويه عاميه مع رطانه


وبمناسبه الرطانه

لو كنت يا بوبا رطانى يلا أدينا شوية رطانه ما هى كلها لهجات ولازم نتعلمها

السبلوقة : ممر المياه في الجدول الكبير الى الساقيه ..... كضباً كاضب
الانقاية : هى قطعت الارض ..... ( يعنى .... دقت فى العارضه )
التقئ : هي الساحة التي يتم فيها نوريق المحصول .... شد وأركب
الضريي : وهو فرز التبن عن البذور الفول .... شد واركب
التقنت: حواجز الحيضان و الجداول ( برضو .... دقت فى العارضه )
التقاوي: التيراب جميع انواع الحبوب ..... شد واركب
البوقة: أول سقية في الزراعة ..... عمك زول جزيره بس كان اضفت عليها ننون وياء بين القاف والتاء المربوطه تطلع ميه ميه ولازماها دانه

السعن: من جلد الماعز.....حفظ الموية و اللبن. ....شد واركب والكرديك : علمى علمك
اللبدي: توضع تحت السرج صاح

والسلبة :حبل مفتول من القش .... مش بالضروره من القش

ويديك العافية يا خفيف الظل

الباشا
03-23-2010, 12:27 AM
ودايما ديوانو عامر


المايسترو

بالجد مايسترو .... وين الناس ؟ يا حليل الخضراء
قاعد تمشى بى هناك ؟؟؟

الله يعمر ديارك ويطول عمرك بالسعاده والهناء
وين باقى النيلاب ؟؟!! ..... ما شايفهم بى جاى

الباشا
03-23-2010, 01:08 AM
يخيل لي لو صدق حدسي انك كنت في كريمة
فعلاً نحن لا نؤيد حزب السيد
وتلبية لطلبك لك قاموس سنجكاوي شايقي بحت ونشوف ناس بالي بالك يعملوا شنو وكمان نشوف ناس الجزيرة يشاركونا تراثنا
العشرين هم : -


النواره وإنتى نواره

فعلاً زرت كريمه فى أواخر السبعينات حضرت مؤتمر أركويت التاسع ... اكيد ماكنتى مولوده :icon18:
بس فى الحقيقه معرفتى بأنكم خط الحرية وليس خت 100 لانى تشرفت بمعرفة الوالد رحمة الله عليه (الزعيم / عثمان جبريل ) وجالسته مع المرحومين الشريف حسين والشريف زين العابدين الهندى وبرضو عمك الاستاذ / أحمد جبريل الله يرحمه ... وكلنا كنا الشحمه والنار مع الجماعه ديل وإن كان السيد على ... هو فى الحسبه من الجماعه برضو .... الله يرحمهم جميعاً

قاموس السانجك عسل ..... زيهم كدا

حافسر بطريقتى عشان اترك المجال لغيرى للمشاركة والتفسير

الدفيق ...... لها علاقه بالنخيل والتمر
الكار ...... بعرفها
البسديق ..... أول مره اسمع بيها
النقاع ...... بعرفها شديد
الساسوية .... سمعت بيها لكن ناسيها
الشَكْشَاكة ..... بعرفها شديد
السونيق ..... أول مره
الدردرة ..... ما بعرفها
الجسارة ..... أول مره اسمع بيها
زربقو ..... يا ساتر
كُشر ..... أول مقطع من الكشرى حق حبايبنا المصاريه
الزول دا مكجني ...لا دى بعرفها تاااب
الطاب ..... يعنى لها علاقه بلعبه شعبيه
القِسّيبة .... هادى سنجكاويه 1000%
البعو ...... ما بعرفها وحأسأل صاحبى القوس
الكَركَتي ( فتح الكافين ) ... لا بفتح الكاف ولا ضمو ولا حتى كسروا
الكعرنوف ..... قعدت دقيقتين احاول بس انطقها ... حسيت إنى اتحنقت :SnipeR (29):
الاشميق .... سمعت بيها بس ما متذكرها
العرجون ... سمعت بيها فى الغنا ... واظن لها علاقه بالنخيل
الصارقيل ..... دى بقا متأكد منها مليون الميه عشان عمك زول بحر



بصراحه استمتعت بالقاموس السنجكاوى

يلا يا ناس الجزيره ورونا بتعرفوا لغة سنجكاويه ؟

يديك العافيه يا نوارة ويخلى ليك الحلوين عيالك






تعالى هنا .....

إنتى من وين جبت القاموس ده ؟؟؟؟

والعصفوره كشفتك لى ...

مش برضو إنتى مخترعة المقوله الحنكوشيه المشهوره


" البنى آدم دا طاقه ... و متى ماإنتهت طاقتو خخخخخخخخ "

:SnipeR (26)::shiny01::0005:

المبارك ابراهيم
03-23-2010, 10:20 AM
( ألتي ) عدييييل كدى .... الناس ديل هولنا

طيب تعال على الخاص وتلقى مايسرك

ها زول كان كدى إنت زول بيت طب .....

على كل .. الحال من بعضو .... عمك مولود على النيل الازرق وبيتنا فوق القيفه يعنى ايام الدميره بنلمس المويه بيدينا .... ولو كنت شاااااطر حتعرف بالضبط عمك من وين ؟؟ وبينا وبينكم 20 كيلو بس ... جهة الخرتوم .... حذر فذر تبقى وين ؟؟؟ وليك جائزه

أما الشامه نحن ننطقها بكل هذه اللهجات شامه وشيمه ولوايه بس الحقاصه نحن بنقولها للهواء البيجيك عامل ذى الشيمه واللوايه ( العصار ) يعنى وبنقول عليه واليعاذ بالله ساكنو الشيطان عشان كدا لما نشوفوا بنشكل كفنا اليمين ( ا ا ا5 ) ولو بصيت عليها تقراها ( الله) ونوجهها ناحية العصار ونقول ( أوم حومد معانا ما تغشانا ) تلاته مرات ... .

وبعدين تعال هنا إنت بتخترع واللا شنو


( الميجَر ) .. و(البُِودَه) .. و( البُوُغَه ) .. و ( الشُّونه ) .. ( والعوّامَه ) و ( اللّتيبه )

كلهن عرفتهن علا (البُِودَه) .. ويمكن ( البُوُغَه ) وإن كان حروفها تفسرها بغ بغ بغ بغ :thumbup:

اها عاد ما تقصر

طل علينا كل مره واتحفنا من قاموس البحر والضهرا

فعلاً سودانا غنى بكل شى لاحظوا يا شباب حتى هنالك اختلاف فى اللهجات بين ناس المنطقه الواحده

يديك الفى مرادك يا شاعرنا

البُودة ياريس ( هي نبات ينمو وسط الذرة أو العيش له زهرة بنفسجية وهي قاتلة أي مكان تقوم فيهو
كل الزرع الذي حولها يموت ولن تقوم له قائمة أبدا وأهلنا في الجزيرة يقولوا ليك ( والله آزول السنة دي عيشي لمت فيهو بودة كتلوا مرة واحدة)
عودا حميدا أخي القوس شكرا شاعر المنتدي شكرا للجميع علي إثراء هذا التراث.

شاعر الغبش
03-23-2010, 02:25 PM
( ألتي ) عدييييل كدى .... الناس ديل هولنا

طيب تعال على الخاص وتلقى مايسرك

ها زول كان كدى إنت زول بيت طب .....

على كل .. الحال من بعضو .... عمك مولود على النيل الازرق وبيتنا فوق القيفه يعنى ايام الدميره بنلمس المويه بيدينا .... ولو كنت شاااااطر حتعرف بالضبط عمك من وين ؟؟ وبينا وبينكم 20 كيلو بس ... جهة الخرتوم .... حذر فذر تبقى وين ؟؟؟ وليك جائزه

أما الشامه نحن ننطقها بكل هذه اللهجات شامه وشيمه ولوايه بس الحقاصه نحن بنقولها للهواء البيجيك عامل ذى الشيمه واللوايه ( العصار ) يعنى وبنقول عليه واليعاذ بالله ساكنو الشيطان عشان كدا لما نشوفوا بنشكل كفنا اليمين ( ا ا ا5 ) ولو بصيت عليها تقراها ( الله) ونوجهها ناحية العصار ونقول ( أوم حومد معانا ما تغشانا ) تلاته مرات ... .

وبعدين تعال هنا إنت بتخترع واللا شنو


( الميجَر ) .. و(البُِودَه) .. و( البُوُغَه ) .. و ( الشُّونه ) .. ( والعوّامَه ) و ( اللّتيبه )

كلهن عرفتهن علا (البُِودَه) .. ويمكن ( البُوُغَه ) وإن كان حروفها تفسرها بغ بغ بغ بغ :thumbup:

اها عاد ما تقصر

طل علينا كل مره واتحفنا من قاموس البحر والضهرا

فعلاً سودانا غنى بكل شى لاحظوا يا شباب حتى هنالك اختلاف فى اللهجات بين ناس المنطقه الواحده

يديك الفى مرادك يا شاعرنا


عمي الباشا سلااااام ..

الميجر / و الترعة الرئسيه الطالعة من الخزان ( ترعة الجزيرة وترعة المناقل )

البوده / نوع من القش تأكله الحيونات وهو ضار بالمحصول ( البوده خرابة المسور )

البوغه / هي أول موية في الحواشة ( السقيه الأولي )

الشونه / هو كوم القصب المرصوص رصه معينه ( اللوري مشوّن يعني ملان تب لمن عامل خُنُْفسْ )

العوامه / دي القصبة الأطول من أخواتها في الحواشة ( زي الأستاذ في طابور المدرسة )

اللتيبه / طور من أطوار العيش .. سبيبه وشوكة وأضان فار وسواسيو وفراريج وصقار وحمله ولتيبه ولبنه وشراية وفريك وقندول ( بالمناسبة سمعت بالكيك اللكل بلاد أمو فريك )


ما داير أقول ليك إنت من وين لكن ( النوبة المسعودية الجدائد ) علي كل حال كلم أهلي .. أما النوبة فمنها جدي ( والد والدتي ) الأستاذ إبراهيم العبيد إسماعيل (ود العمده ).. خريج كلية غردون 1937 م

وأقول ليك سر يا عمنا الباشا ..

والد الوالد / محسي من العيلفون
والد الوالده/ جعلي من النوبة ( أصلا من الجزيرة إسلانج )
والدة الوالده / كاهلية من كترانج
والده الوالد / رفاعية من ألتي

وكل واحد من ديل مدفون في بلدو الأصلي .. شفت جنس الشربكة دي .. اسع أنا أقول أنا من وين ؟

نوارة البركل
03-23-2010, 03:35 PM
النواره وإنتى نواره

فعلاً زرت كريمه فى أواخر السبعينات حضرت مؤتمر أركويت التاسع ... اكيد ماكنتى مولوده :icon18:
بس فى الحقيقه معرفتى بأنكم خط الحرية وليس خت 100 لانى تشرفت بمعرفة الوالد رحمة الله عليه (الزعيم / عثمان جبريل ) وجالسته مع المرحومين الشريف حسين والشريف زين العابدين الهندى وبرضو عمك الاستاذ / أحمد جبريل الله يرحمه ... وكلنا كنا الشحمه والنار مع الجماعه ديل وإن كان السيد على ... هو فى الحسبه من الجماعه برضو .... الله يرحمهم جميعاً

قاموس السانجك عسل ..... زيهم كدا

بصراحه استمتعت بالقاموس السنجكاوى

يلا يا ناس الجزيره ورونا بتعرفوا لغة سنجكاويه ؟

يديك العافيه يا نوارة ويخلى ليك الحلوين عيالك

تعالى هنا .....

إنتى من وين جبت القاموس ده ؟؟؟؟

والعصفوره كشفتك لى ...

مش برضو إنتى مخترعة المقوله الحنكوشيه المشهوره


" البنى آدم دا طاقه ... و متى ماإنتهت طاقتو خخخخخخخخ "

:sniper (26)::shiny01::0005:



شرفتنا زيارتك لي كريمي يالباشا الكبير وحدسي طلع مظبوط
ومعرفة الوالد لك شرف عظيم لكل أفراد الاسرة
انا بتذكر زيارة مبارك زروق ومحمد احمد المرضي
لأنوا كانوا معمول ليهم عزومة في البيت
شكراً لك على هذه الذكريات الجميلة
لكن عصفورتك دي بتنقل ليك أدق التفاصيل
فعلاً يالباشا زمان أخواتي بيقعدوا للغسيل ويختوا ليا طشت
فلما اصل مرحلة معينة ما أقدر اواصل اوقف
بيقولوا ليا ليه نحن مواصلين
اقول ليهم كل زول عندوا طاقة معينة متى ما استنفذت
هو حيوقف وانا عندى طاقة معينة بعرفها براي
لك خالص تحياتي وتحيات عائلة الجبارين
قول لي عصفورتك شوقي ليك فات حد المعقول

شاعر الغبش
03-23-2010, 04:14 PM
الباشا الكبير سلام وتحية كلها احترام
الباشا يخيل لي لو صدق حدسي انك كنت في كريمة أو قرأت بها معلوماتك كلها صحيحة عننا فعلاً نحن لا نؤيد حزب السيد وتلبية لطلبك لك قاموس سنجكاوي شايقي بحت ونشوف ناس بالي بالك يعملوا شنو وكمان نشوف ناس الجزيرة يشاركونا تراثنا
العشرين هم : -
الكار
النقاع
الشَكْشَاكة
الزول دا مكجني
الصارقيل


الكار / لعبة تلعبها الفتيات بالحصي الصغيره وذلك بحفر حفرة صغيرة ووضع الحصي فيها .. ورمي حصاة أكبر حجما ( تسمي الضراب ) في الهواء وإخراج كمية من الحصي من الحفرة عندما يكون الضراب في الهواء وإرجاعة بنفس الطريقة وترك واحده خارج الحفرة .. وإعادة اللعبة وترك إتنين ثم ثلاثه وهكذا ( لحدي ما تخرت الكار كلو ) لكن مل عارف كار ناس الشمالية ( كار تاني ) ولا نحن أولاد كار واحد .. ولا كار بمعني سيارة

النقاع / هو الماء الذي ينزل من تحت الزير ( وسمح النقاع في الشاي أب نعناع )


الشكشاكة / هي المطرة البسيطة ومتواصله .. تضرب من بليل حدي الصباح

الزول ده مكنجني / يعني يشوف العمي ما يشوفني

الصارقيل / ديدان حمراء اللون تميل للون الزهري أحيانا وللبني أحيانا اخري ..تعيش في التربة الطينية وعندنا في الجزيرة بنشرك بيها للسمك .. والسمكة البجيبها الصارقيل .. ولاّ عشت البيت .. ولاّ قطعت الخيت

ديل القدرت عليهن من قاموس السناجكه .. والباقيات ديل في الحلم ما لاقني

جندي
03-23-2010, 05:13 PM
الباشا الكبير سلام وتحية كلها احترام
الباشا يخيل لي لو صدق حدسي انك كنت في كريمة أو قرأت بها معلوماتك كلها صحيحة عننا فعلاً نحن لا نؤيد حزب السيد وتلبية لطلبك لك قاموس سنجكاوي شايقي بحت ونشوف ناس بالي بالك يعملوا شنو وكمان نشوف ناس الجزيرة يشاركونا تراثنا
العشرين هم : -
1

نوارة هاكي الشرح
. الدفيق :مرحلة من مراحل ثمار التمر(البلح) ويكون لونو اخدر
2. الكار : سامع بيهو لكن ناسيهو
3. البسديق زي ما قال الباشا اول مرة اسمع بيها
4. النقاع: شرحه الشاعر
5. الساسوية: قطعة من القزاز
6. الشَكْشَاكة: شرحها الشاعر
7. السونيق: اول مرة اسمع بيهو
8. الدردرة : اعوذ بالله من الدردرة والدردرة هي الشقاوة والتعب والجري الكتير (ان شاء الله تكون وضحت)
9. الجسارة: حسب فهمي للكلمة : للزول الجاسر هو الزول الشقي وما بيخلي حقه
10. زربقو : ربنا يبعدنا من الزربيق وهو زنق الانسان كان بي الاسئلة او بالسيطان او غيرها من وسائل الزنق
11. كُشر: هو كالون باب الحراز (باب الحراز هو باب مصنوع من خشب الحراز)
12. الزول دا مكجني :شراحها الشاعر
13. الطاب : هي لعبة تتكون من اربعة طابات (الواح طولها حوالي 10 سم وعرضها حوالي 1سم ويكون لها وجهين مختلفين في اللون وتصنع من جريد التمر او العرجون او غيرها ) والعقاب للزول المهزوم جلد الفلقة (الجلد في بطن الرجل)
14. القِسّيبة : زير قديم يوضع به التمر او اي نوع من المحاصيل
15. البعو : ما سمعت بيه
16. الكَركَتي: ( فتح الكافين ) طين البحر الناشف التلقاهو مشقق لي قطع صغار
17. الكعرنوف: اول مرة اسمع بيهو اوعي يكون الكعنكول
18. الاشميق : من التمر هو الشئ الموجود خلف الكروق(الجزء الاسفل من الجريدة الملصق مع الساق ) ومنه تصنع الحبال(كان زمان)
19. العرجون : هو سبيط التمر (الشي الشايل البلح )
20. الصارقيل: شرحه الشاعر

الباشا
03-23-2010, 11:06 PM
البُودة ياريس ( هي نبات ينمو وسط الذرة أو العيش له زهرة بنفسجية وهي قاتلة .
ود إبراهيم ..... تومى

سبحان الله .... أخوك زول جزيره من ناحية الأب وزول بحر من ناحية الأم ... ولأنى زول كان جرحته يطلع عدس ... يعنى تربية داخليات إبتدائى وسطى ثانوى جامعه ... كمعظم ابناء جيلى من الجزيره ... عشان كدا قاموس الزراعه ده ما متعمق فيه ... والبوده دى يا ما قطفنا زهرتها لكن يوم واحد ما سمعت بالاسم ده ... فعلاً غريبه ... منكم نستفيد

غيبتى كانت بسبب النت ... واهو غايتو عملت اشتراك جديد واتمنى ما يخذلنى تانى

وبعدين تعال هنا ياخوى ايه النشاط ده ماشاء الله دخلت الألفيه التانيه مع انك سجلت ورانا بكتير ... ما شاء الله وما تخاف عينى بااااااااارده .... نمسك الكى بورد :thumbup:

يديك ويخليك ويطرح البركه فيك

الباشا
03-23-2010, 11:20 PM
..
ما داير أقول ليك إنت من وين لكن ( النوبة المسعودية الجدائد ) علي كل حال كلم أهلي .. أما النوبة فمنها جدي ( والد والدتي ) الأستاذ إبراهيم العبيد إسماعيل (ود العمده ).. خريج كلية غردون 1937 م

وأقول ليك سر يا عمنا الباشا ..

والد الوالد / محسي من العيلفون
والد الوالده/ جعلي من النوبة ( أصلا من الجزيرة إسلانج )
والدة الوالده / كاهلية من كترانج
والده الوالد / رفاعية من ألتي

وكل واحد من ديل مدفون في بلدو الأصلي .. شفت جنس الشربكة دي .. اسع أنا أقول أنا من وين ؟

الشاعر

كان كدى إنت ما بتعرف طبيعة منطقتنا كويس

النوبه ما على البحر على طول .... المسعوديه بعيده جداً من القيفه ... والجدايد كلها بعيده ماعدا الجديد العوامره هى الاقرب للبحر .... غريبه انك ذكرت كل مناطقنا وفطيت الشقله عوج الدرب ... وهى القرية الوحيده الملاصقه للبحر ( النيل الازرق) وعمك مولود فيها ....

وايه حكاية محسى من العيلفون دى ورفاعه والعمده ود العبيد

إنت بتتكلم جد ؟؟!!!

لاتطلع ود اخوى وانا ما جايب خبرك

والدتى نصها محسى من ناس العيلفون والدبيه ونصها التانى معاليه من الموته قرب ود الفضل
أما الوالد رفاعى عسيلاوى ع السكين والعمده ود العبيد من معارفنا ومن أصدقاء والدى و أعمامى كلهم خاصة عمى محمد يكنى بود البوشى ( الله يرحمه ) العمده السابق للسديرات وعمى العمده عبدالرحمن يكنى بمهله العمده الحالى ربنا يديه الصحه ويطول عمره

ولك منى كل التحايا ولقبائلك كلها

الباشا
03-23-2010, 11:38 PM
وحدسي طلع مظبوط
ومعرفة الوالد لك شرف عظيم لكل أفراد الاسرة
انا بتذكر زيارة مبارك زروق ومحمد احمد المرضي
لأنوا كانوا معمول ليهم عزومة في البيت
شكراً لك على هذه الذكريات الجميلة
لكن عصفورتك دي بتنقل ليك أدق التفاصيل
فعلاً يالباشا زمان أخواتي بيقعدوا للغسيل ويختوا ليا طشت
فلما اصل مرحلة معينة ما أقدر اواصل اوقف
بيقولوا ليا ليه نحن مواصلين
اقول ليهم كل زول عندوا طاقة معينة متى ما استنفذت
هو حيوقف وانا عندى طاقة معينة بعرفها براي
لك خالص تحياتي وتحيات عائلة الجبارين
قول لي عصفورتك شوقي ليك فات حد المعقول

الشرف لى بمعرفة أقطاب من اقطاب السياسيين ومناضلين سودانيين أصيلين شاركوا فى النضال ضد الاستعمار مثل الوالد والعم الله يرحمهم جميعاً

عصفورتى طلعت ميه ميه .... وانتى طلعتى حنكوشه مافى منك ... بس عاوز اعرف قاموس الشوايقه العاتى ده جبتيه من وين ؟؟ .... شايفه كم واحد حاول فيه وما قدروا يفسروه ... اكيد لقيتيه فى جيب صاحبى عمر جبريل لما كنتى بتغسلى ليه قميصوا الأزرق الكاروهات بتاع القشرات :d

فى انتظار التفسير والمجموعه التانيه من قاموس السناجك

وإنتى بتقولى فيها ؟؟ ... العصفوره كان سمعت شوقك ده .... بتسيب اى شى واحتمال يومين وتستقبلوها فى مطار كريمى ...

الله يخليكم لبعض كلكم

وينك يا صاحبى ؟؟ يا ود الزعيم ( عمر جبريل )

الباشا
03-23-2010, 11:45 PM
[b][center][size="5"][color="magenta"]ديل القدرت عليهن من قاموس السناجكه .. والباقيات ديل في الحلم ما لاقني


نوارة هاكي الشرح
.2. الكار : سامع بيهو لكن ناسيهو
3. البسديق زي ما قال الباشا اول مرة اسمع بيها
7. السونيق: اول مرة اسمع بيهو
15. البعو : ما سمعت بيه
17. الكعرنوف: اول مرة اسمع بيهو اوعي يكون الكعنكول


الشاعر

جندى ود جرّ
محاولات لابأس بها ... بس واضح أنه شلوخكم مطارق ومدقاق وسلم

إنتظروا تفسير السنجكاويه نوارة البركل

||النادرهـ ~
03-24-2010, 10:41 AM
أكييييد قاصدك يا النادرة عدييييل كدا

بس انتى عارفه مين الحيمتحنك ؟؟

وبالمناسبه الدرجات حتكون من ضمن درجات التخرج
.
.
.





.
.
.
.
.
.

عزّ الله رٌحتْى وطى ههههههههههههههههههه


هههههههههههههههههه

حتى هذي بعد تعرفها :D


:

ماشآء الله لما أثريَ البوست حسيت بصعوبة الكلمات

<~ تلمح إنها ما تبي امتحان :zip:

شاعر الغبش
03-24-2010, 02:46 PM
الشاعر

كان كدى إنت ما بتعرف طبيعة منطقتنا كويس

النوبه ما على البحر على طول .... المسعوديه بعيده جداً من القيفه ... والجدايد كلها بعيده ماعدا الجديد العوامره هى الاقرب للبحر .... غريبه انك ذكرت كل مناطقنا وفطيت الشقله عوج الدرب ... وهى القرية الوحيده الملاصقه للبحر ( النيل الازرق) وعمك مولود فيها ....

وايه حكاية محسى من العيلفون دى ورفاعه والعمده ود العبيد

إنت بتتكلم جد ؟؟!!!

لاتطلع ود اخوى وانا ما جايب خبرك

والدتى نصها محسى من ناس العيلفون والدبيه ونصها التانى معاليه من الموته قرب ود الفضل
أما الوالد رفاعى عسيلاوى ع السكين والعمده ود العبيد من معارفنا ومن أصدقاء والدى و أعمامى كلهم خاصة عمى محمد يكنى بود البوشى ( الله يرحمه ) العمده السابق للسديرات وعمى العمده عبدالرحمن يكنى بمهله العمده الحالى ربنا يديه الصحه ويطول عمره

ولك منى كل التحايا ولقبائلك كلها



عمي الباشا أنت هولنا تب ... والشيخ العوج الدرب جدنا .. والعسيلات ذااتن غرقانين فينا لي نصهم ..
ومن ناحية أخري ( حبوباتي من الشقله ) .. بتول وعشه بنات الصديق ود النذير ..( الله يرحمن ) نسوان بي وزن رجال ليهن خلوة وتكية.. ديل خالات الوالدة ( حبوبتي أم أمي بت الصديق ود النذير (كترانج) .. أما عن نسبي أنا ( محس ود الأرباب )
أحمد الحبر الشيخ إدريس عبد القادر زين العابدين محمد عبد الرحمن محمد بركات مضوي بركات حمد الشيخ إدريس محمد الأرباب ( طبعا الأسامي دي في الشقله بالكوم )
أما الدبيبه دي عقابنا كلو فيها ( ناس احمد المصطفي وسيد خليفة وخلف الله حمد وجدي الجاغريو ( أحمد محمد الشيخ )ذاتو مولود فيها..وأنا البلد ديك كلها مشيتا في كثير من المناسبات .. الحويلة والدلتية والقويز والدومه والحسناب والضقلباب .. والباقير الوراني والقدامي والشرقي .. أما العيلفون دي .. قريت فيها الثانوي وأعمامي وأجدادي هناك .. ( شوفت الشربكة ؟؟!!)

الباشا
03-25-2010, 12:48 AM
هههههههههههههههههه
ماشآء الله لما أثريَ البوست حسيت بصعوبة الكلمات

<~ تلمح إنها ما تبي امتحان :zip:

طيب يا النادره عشان خاطرك

حنديك القاموس ده ..... وهو قاموس قريب جداً من قاموس اللهجة السودانيه

والمره دى الغلطه فيه بتكلفك كتير

وأعملى حسابك ... التصحيح والنتيجه حنرسلها بالبريد الممتاز لأملج

ويا ويلك لو رسبتى .....


بلكن
أقيس
دحين
مصرفدة
دولا أو دُولْ
أمزع رقبتك
داير مدار
دغري
امصع أدنك
مخمج
جغمه
وي
الدحديرة
ناوني
أزقف
ازهميلي
زنبيل
منضره
يواد
الصمرقع
مكارنه
اترينو
وخرلو
سجره
اشبك
سكر المحل
بسط المحل
معلقه
سيبوا
أندر
أفرشك فرش
خوتني
افتر
علين
زي الرصدة
توايق

يلا يا شباب ... السؤال أولاً هو قاموس ياتو بلد ؟؟

تانياً ما معنى هذه الكلمات

تالتاً ماهى الكلمات المطابقة للهجة السودانيه تماماً

||النادرهـ ~
03-25-2010, 07:45 AM
وأعملى حسابك ... التصحيح والنتيجه حنرسلها بالبريد الممتاز لأملج

ويا ويلك لو رسبتى .....


أجل الله يستر ..

لا تجيب لي طاري الرسوب .. من يومين أخذت لي قرصة بإذني :oo5o.com (7):
<~ وإذا تبي تعرف قصدي إسأل العصفورة :D



يلا يا شباب ... السؤال أولاً هو قاموس ياتو بلد ؟؟




بسم الله ..

إذا بتكلم عن السعودية .. في بعض الكلمات نسمعها دآئماً من أهل جدهـ ومكه ..


تانياً ما معنى هذه الكلمات



بلكن
يمكن

أقيس
أعتقد إنه بمعنى القياس ..
دحين
الآن أو الحين
مصرفدة
لآ أعلم
دولا أو دُولْ
بمعنى هذي أو ذي
أمزع رقبتك
ههههههههههه يعني أنزع رقبتك <~ يا ساتر يارب
داير مدار
هذي عاد دايماً أسمعها من أمي .. وهي بمعنى دآئري أو حول شيء ما
وبالمناسبة هذي الكلمة يقولونها أهل الأردن .. الوالده صحيح سعودية لكن تربت بالاردن ..

دغري
يعني على طول
امصع أدنك
ههههههههههههه يعني أقرص إذنك <~ وياما أخذت منها وأنا صغيره
مخمج
هي كلمة سودانية لكن ما أعرف معناها ..
جغمه
الله أعلم
وي
الله أعلم
الدحديرة
وهذي بعد كلمة أردنية .. وهي بمعنى المنحدر <~ لست متأكده
ناوني
الله أعلم
أزقف
الله أعلم
ازهميلي
يعني ناديلي
زنبيل
الله أعلم
منضره
وهي بعد كلمة أردنية وهي بمعنى المرآة
يواد
يعني : يا ولد
الصمرقع
ههههههههه تضحكني هذي الكمة كثير .. أذكر وحنا صغار لما كانت أمي تزعل مننا
كانت تهاوشنا وتحط يدها على راسها وتقول جبتوا لي الصمرقع وهي بمعنى : عوار الراس أو صداع الراس
مكارنه
الله أعلم
اترينو
الله أعلم
وخرلو
الله أعلم
سجره
الله أعلم
اشبك
بمعنى : ايش فيك ؟ أو ماذا دهاك :D
سكر المحل
الله أعلم
بسط المحل
الله أعلم

معلقه
هي نفسها الملعقة اللي ناكل بيها
سيبوا
يعني اتركه أو فكه
أندر
الله أعلم

أفرشك فرش
ههههههههههههه وهي بمعنى أضربك ضرباً مبرحا
خوتني
الله أعلم
افتر
اعتقد إنه بمعنى ألف لف
علين
الله أعلم
زي الرصدة
الله أعلم

توايق
هههههههههههه هذي عاد من الكلام البدوي اللي نقوله
وهي بمعنى تطل أو تنظر لمكان بعيد

تعبت وأنا أحل الامتحان :oo5o.com (17):


تالتاً ماهى الكلمات المطابقة للهجة السودانيه تماماً


أقيس
مصرفدة
دولا أو دُولْ
مخمج
جغمه
يواد
مكارنه
اترينو
وخرلو
سجره
اشبك
سكر المحل
بسط المحل
معلقه
سيبوا
أندر
خوتني
افتر
علين
زي الرصدة


إن شآء الله تكون الحلول صحيحة .. وعساني مبيضه الوجه :shiny01:

نوارة البركل
03-25-2010, 10:54 AM
الكار / لعبة تلعبها الفتيات بالحصي الصغيره وذلك بحفر حفرة صغيرة ووضع الحصي فيها .. ورمي حصاة أكبر حجما ( تسمي الضراب ) في الهواء وإخراج كمية من الحصي من الحفرة عندما يكون الضراب في الهواء وإرجاعة بنفس الطريقة وترك واحده خارج الحفرة .. وإعادة اللعبة وترك إتنين ثم ثلاثه وهكذا ( لحدي ما تخرت الكار كلو ) لكن مل عارف كار ناس الشمالية ( كار تاني ) ولا نحن أولاد كار واحد .. ولا كار بمعني سيارة

النقاع / هو الماء الذي ينزل من تحت الزير ( وسمح النقاع في الشاي أب نعناع )


الشكشاكة / هي المطرة البسيطة ومتواصله .. تضرب من بليل حدي الصباح

الزول ده مكنجني / يعني يشوف العمي ما يشوفني

الصارقيل / ديدان حمراء اللون تميل للون الزهري أحيانا وللبني أحيانا اخري ..تعيش في التربة الطينية وعندنا في الجزيرة بنشرك بيها للسمك .. والسمكة البجيبها الصارقيل .. ولاّ عشت البيت .. ولاّ قطعت الخيت

ديل القدرت عليهن من قاموس السناجكه .. والباقيات ديل في الحلم ما لاقني

الشاعر يا زول يا ظريف يا شفيف
انت صاح 100% بس الكار جاوبتها اجابتين نحن عندنا معناها ناس كار واحد
أو معناها الزول دا ماسك كار جدودوا يعني لو جدو نجار هو كمان يطلع نجار
لو مزارع هو كمان لو بقى مزارع يقولوا مسك كار جدودوا
الشاعر انت قربت تقول عندك حبوبة من الشايقية
اما الفي الحلم ديل ما لاقنك تعال اسمعبهن بعد شوية وكمل ثقافة عامية

نوارة البركل
03-25-2010, 11:23 AM
نوارة هاكي الشرح
. الدفيق :مرحلة من مراحل ثمار التمر(البلح) ويكون لونو اخدر
2. الكار : سامع بيهو لكن ناسيهو
3. البسديق زي ما قال الباشا اول مرة اسمع بيها
4. النقاع: شرحه الشاعر
5. الساسوية: قطعة من القزاز
6. الشَكْشَاكة: شرحها الشاعر
7. السونيق: اول مرة اسمع بيهو
8. الدردرة : اعوذ بالله من الدردرة والدردرة هي الشقاوة والتعب والجري الكتير (ان شاء الله تكون وضحت)
9. الجسارة: حسب فهمي للكلمة : للزول الجاسر هو الزول الشقي وما بيخلي حقه
10. زربقو : ربنا يبعدنا من الزربيق وهو زنق الانسان كان بي الاسئلة او بالسيطان او غيرها من وسائل الزنق
11. كُشر: هو كالون باب الحراز (باب الحراز هو باب مصنوع من خشب الحراز)
12. الزول دا مكجني :شراحها الشاعر
13. الطاب : هي لعبة تتكون من اربعة طابات (الواح طولها حوالي 10 سم وعرضها حوالي 1سم ويكون لها وجهين مختلفين في اللون وتصنع من جريد التمر او العرجون او غيرها ) والعقاب للزول المهزوم جلد الفلقة (الجلد في بطن الرجل)
14. القِسّيبة : زير قديم يوضع به التمر او اي نوع من المحاصيل
15. البعو : ما سمعت بيه
16. الكَركَتي: ( فتح الكافين ) طين البحر الناشف التلقاهو مشقق لي قطع صغار
17. الكعرنوف: اول مرة اسمع بيهو اوعي يكون الكعنكول
18. الاشميق : من التمر هو الشئ الموجود خلف الكروق(الجزء الاسفل من الجريدة الملصق مع الساق ) ومنه تصنع الحبال(كان زمان)
19. العرجون : هو سبيط التمر (الشي الشايل البلح )
20. الصارقيل: شرحه الشاعر

جندي ود جرا والله شوقنا ليك فات حد المعقول ما ليهو حد ما ليهو قيف
وين يازول تغيب عل كيفك وترجع على كيفك بعد دا بكون فيها جزاءات
يعني ضربات جزاء ... ياخ ما انت شمالى ولا العاصمة محت كل شئ
اجاباتك والله ما بطالة ..
جبت 50% شد حيلك وحسن من هذا المستوى ..
أخلاقه حميدة... ينقل الى المستوى التاني ...

نوارة البركل
03-25-2010, 11:39 AM
الشرف لى بمعرفة أقطاب من اقطاب السياسيين ومناضلين سودانيين أصيلين شاركوا فى النضال ضد الاستعمار مثل الوالد والعم الله يرحمهم جميعاً

عصفورتى طلعت ميه ميه .... وانتى طلعتى حنكوشه مافى منك ... بس عاوز اعرف قاموس الشوايقه العاتى ده جبتيه من وين ؟؟ .... شايفه كم واحد حاول فيه وما قدروا يفسروه ... اكيد لقيتيه فى جيب صاحبى عمر جبريل لما كنتى بتغسلى ليه قميصوا الأزرق الكاروهات بتاع القشرات :d

فى انتظار التفسير والمجموعه التانيه من قاموس السناجك

وإنتى بتقولى فيها ؟؟ ... العصفوره كان سمعت شوقك ده .... بتسيب اى شى واحتمال يومين وتستقبلوها فى مطار كريمى ...

الله يخليكم لبعض كلكم

وينك يا صاحبى ؟؟ يا ود الزعيم ( عمر جبريل )

والله انت يا الباشا الكبير انت والعصفورة حيرتوني ،،
انتوا معانا في الخرطوم ولا في السعودية
حمامكم الزاجل دا كل صغيرة وكبيرة في الخرطوم ناقلها ليكم ..
تصدق يالباشا فعلاً ود الزعيم كان في الخرطوم حضر لزواج ود اختنا
وطبعاً هو الأيام دي في ضيفة وعيشة لطيفة ..
قلت ليهو يا عمر عايزة أعجز ناس الجزيرة ديل وأطلعهم ما عندهم ثقافة سنجكاوية
ومنهم الباشا والشاعر
قال لي عاد اصبري ليا فيهم وجاني بالخبر اليقين وهذه العشرين
وقال ليا كل يوم حيصلك من قلب السناجكة عشرين بالايميل
يعني عصفورتكم شادة حيلة الله يديم المحبة بيننا ..

أبو إيثار
03-25-2010, 12:30 PM
ياعمي كل شي تجيبوا مامستغرب منو
ودايماً غيباتك وإنت راجع فيها الدسم
والله أول يوم أخش هنا وإنبسطت بسطة
ولقيت ليك جنس مخرّفين وناس كنت قايلهم
حناكيش بقو رواكيب عديييييييييييييييل ...

لكن والله كلام زي الألغاز شيتاً تقعد تبارهو
لمن تطش وحاجة تقرّب تعرفها إلا تجلي ..

والله عظمة في عظمة ياعظمة إنتا ,,,,

همسة :
عمي شاعر المنتدي وينك انت ( طاشي شبكة ولاشنو )
نوارة البركل والله ياأختي عافي منك دنيا وأخري ,,,
||النادرهـ ~والله باين عليك في الصيفية حتمشي السودان مع العصفورة

نوارة البركل
03-25-2010, 12:36 PM
الشاعر

جندى ود جرّ
محاولات لابأس بها ... بس واضح أنه شلوخكم مطارق ومدقاق وسلم

إنتظروا تفسير السنجكاويه نوارة البركل

الباشا الكبير
شاعر المنتدى
جندى ود جرا
أتت جهينة بالخبر اليقين
العشرين السنجكاويات هم : -

1.
الدفيق : هي فعلاً مرحلة من مراحل نضوج البلح والدفيق يؤكل وله طعم لذيذ ولم يكو نضيج يسمى الهرود ..
2. الكار : هو عمل الأباء مثل الزراعة مثلاُ ولما تكون عمل واحد من الابناء يقولوا عليهو شال كار جدودوا ..
3. البسديق : قطعة من القماش يمسح بها صاج العواسة.
4. النقاع : فعلاً هو الماء الذى يتساقط من الزير ما نقي وصافي جد
اً ويستعمل لعمل الشاي السادة ويقولوا ليك الشاي دا دم دكاترة ..
5. الساسوية : هو قطع صغيرة جداً وحادة تنتج عن تحطم الزجاج ..
6. الشَكْشَاكة : فعلاً هي المطرة المتواصلة مدة طويلة وبتكون خفيفة وظريفة ..
7. السونيق : كلمة يستعملها الناس البيصطادوا السمك بالجبادة وعملية سحب الجبادة من البحر بتسمى السونيق ..
8. الدردرة : فعلاً هي الشقاوة والتعب والجري الكتير
9. الجسارة : فعلاً هي الزول الجاسر هو الزول الشقي والما بيخلي حقه لازم يجيبو
10. زربقو : يعني زرزروهوا ودى زاتها يعني ماخلوهو الا بعد ما قال الحقيقة ..
11. كُشر : فعلاً مفتاح من الخشب الى باب من الخشب ..
12. الزول دا مكجني : فعلاً الزو دا بيكرهني كراهيى التحريم ..
13. الطاب : ذي ما قال أخوي جندي ود جرا هي لعبة تتكون من اربعة طابات (الواح طولها حوالي 10 سم وعرضها حوالي 1سم ويكون لها وجهين مختلفين في اللون وتصنع من جريد التمر او العرجون او غيرها ) والعقاب للزول المهزوم جلد الفلقة (الجلد في بطن الرجل) ..
14. القِسّيبة : دي شكلها دائرى تبنى من الطين وطولها حوالى مترين وعرضها متر وشوية يحفظ فيها البلح لمدة طويلة بحالة جيدة وتقفل من السطح ويعمل لها فتحة صغيرة من الجنبة لكي لايدخل الهواء ولتستعمل لاستخراج ما يحتاجونه من بلح .. بضو متل الزير ياجندي عندما يقفل خشمه ..
15. البعو : هي نواة الدومة وزمان كان الناس بيلعبوبو (طق الدومة )....بعد ماتكُد الدومة ...تقوم تكسرها وتجد بداخلها البعو وكمان هذه البعوية بتجوف من الداخل وبتستعمل مكلة يضع بها الكحل الحجرى .
16.الكَركَتي ( فتح الكافين ) : طين البحر الناشف التلقاهو مشقق لي قطع صغار
17. الكعرنوف : نهاية الجريدة بعد ماتقطع الجرية يبقى في النخلة جزء ويسمى الكعرنوفة ..
18. الاشميق : هو الشئ الموجود خلف الكروق ( والكروق دي زاتها يا جندي هي الكعرنوف ) يوجد بين الجريد وساق النخلة ومنه تصنع الحبال لنساجة العناقريب والعنقريب المصنوع من الحبل بيكون بارد وفي رمضان بيرشوهو بالموية ويرقدو عليه يعني دا مكيف زمان زي عنقريب قوس قزح بتاع الداخلية (كان زمان) فعلاً !!
19. العرجون : هو سبيط التمر (الشي الشايل البلح )
20. الصارقيل : فعلاً دودة حمرا صغيرة توجد داخل الأرض وبتستعمل طُعم للسمك ..

الباشا
03-25-2010, 12:39 PM
( شوفت الشربكة ؟؟!!)

شكراً المرافى

الشاعر طلع من الاسره فعلاً يعنى مش قرابه إنما من أهلى مع إنى لم التقى به إلا هنا فى المرافى ودى فرصه للتواصل إن شاء الله

وهذا سر إبداعتكم يا ناس المرافى

نسبه يلتقى مع نسب الوالده فى جدتها عشه بت زين العابدين محمد عبدالرحمن وجدها الشيخ إدريس ود الأرباب ولى الله المدفون فى العليفون وجد المحس

هو أيضاً جد المرحوم بإذن الله الأستاذ الفنان أحمد المصطفى من ناحية والدته الحاجه زينب بت صباحى ود زين العابدين

اكرر شكرى يا ناس المرافى

الباشا
03-25-2010, 12:47 PM
أجل الله يستر ..

إن شآء الله تكون الحلول صحيحة .. وعساني مبيضه الوجه :shiny01:

عز الله رحتى وطى .....................

أولاً عاوز عنوان البريد الممتاز فى أملج

ثانياً عنوان الأماره للتكرم بسحب الجنسيه ..... ومنحك الجنسيه السودانيه فقط لاغير

معقول 15 من 36 يعنى 41.6 % يعنى النص ما وصلناهو ..... مافيش فايده

خليك مع الشوايقه أفيد لك ..... وخدى كت كات :d

نوارة البركل
03-25-2010, 12:50 PM
أها يا الباشا والشاعر والجندي والله نفسي لامن انقطع بالكتابة
شكراً لتواجدكم
شكراً لتداخلكم
شكراً لمعرفتكم
شكراً لخوتكم
شكراً على كل شئ

الباشا
03-25-2010, 01:02 PM
تصدق يالباشا فعلاً ود الزعيم كان في الخرطوم حضر لزواج ود اختنا

قلت ليهو يا عمر عايزة أعجز ناس الجزيرة ديل وأطلعهم ما عندهم ثقافة سنجكاوية
ومنهم الباشا والشاعر
قال لي عاد اصبري ليا فيهم وجاني بالخبر اليقين وهذه العشرين
وقال ليا كل يوم حيصلك من قلب السناجكة عشرين بالايميل
يعني عصفورتكم شادة حيلة الله يديم المحبة بيننا ..

صدقينى يا نواره ماعندى أى فكره أنه عمر فى الخرطوم

ولا العصفوره جابت خبر .... بس قالوا الفى قلبو حرقص ......

والحنكوش يظل طول عمره حنكوش حتى لو دخلوه مدرسة كوش ( هى كوش دى مش فى بلاد الشايقيه ؟؟؟)

بصراحه .... كنت حاسى أنه القاموس السنجكاوى العاتى ده مصدره شايقى معتق وثقافتو عاليه بعلو وقامة جبل البركل ....

ما قصرتى ..... لكى أجر المناوله وشدى حيلك هاتى لينا العشرين التانيه

وسلمى لى على ود الزعيم

و قولى ليه ماينسى قفة البركاوى وكرتونة المنجه ( عاوزها دبش ):thumbup:

نوارة البركل
03-25-2010, 01:03 PM
ياعمي كل شي تجيبوا مامستغرب منو
ودايماً غيباتك وإنت راجع فيها الدسم
والله أول يوم أخش هنا وإنبسطت بسطة
ولقيت ليك جنس مخرّفين وناس كنت قايلهم
حناكيش بقو رواكيب عديييييييييييييييل ...

لكن والله كلام زي الألغاز شيتاً تقعد تبارهو
لمن تطش وحاجة تقرّب تعرفها إلا تجلي ..

والله عظمة في عظمة ياعظمة إنتا ,,,,

همسة :
عمي شاعر المنتدي وينك انت ( طاشي شبكة ولاشنو )
نوارة البركل والله ياأختي عافي منك دنيا وأخري ,,,
||النادرهـ ~والله باين عليك في الصيفية حتمشي السودان مع العصفورة



ابو ايثار والله الشوق شوقاً كتير ابداً ما ليه حد
الله يخليك يا ابو ايثار تابع هذا البوست عمك الباشا دا
موسوعة عالمية
حتى الرطانة حنتعلمها ..
لك ودي واحترامي

الباشا
03-25-2010, 01:38 PM
[color="sienna"]همسة :

||النادرهـ ~والله باين عليك في الصيفية حتمشي السودان مع العصفورة



باللأول نديها الشهاده

وبعدين نشترى ليها توب من باب شريف ..... أبو قجيجه مثلاً

ونقطع ليها تظكره على سودانييير .... عشان تحرم تركب طيارات :SnipeR (101):

والزيارة التانيه نشحنها على سواكن فى المرسيدس الخدراء :SnipeR (26):

اصلوا بعد اجوبتها على قاموس مكه .... قررنا منحها الجنسيه السودانيه

الباشا
03-25-2010, 01:56 PM
أها ....... والله نفسي لامن انقطع بالكتابة


حتى فى الكتابه ههههههههههههههههههه ..... خخخخخخ

الله المستعان

هاتى من عمر العشرين التانيه

طبعاً قبل إجابتك دى كان لى تلفون مع القوس

وهو بالتأكييييد استاذ .... يشرح ويضحك ويضحك وانا مستغرب الزول ده بيضحك مالو فاكرنى شيقى حنكوش ؟؟ .... بس هو عارف أنه شلخى حرف T مش = وتحتهم خط ( فتشت الكى بورد كله عشان أجيبو ماعرفتش :SnipeR (86): ) .....
وبينى وبينك كان شاااااكى انه القاموس ده عاوز واحد معتق ذى ود الزعيم .... وطبعاً العصفوره لقطت طرف الخيط وفرطت السبحه وإنكشفتى

صدقونى قاموسكم بقدر ماهو صعب ... بقدر ماهو غنى بالمعانى والحنيه خاصه فى الشعر
( الله يرحمك يا سوماعين ود حسن ) أثرى اللهجه السودانيه بشعره

نوارة البركل
03-25-2010, 02:35 PM
صدقينى يا نواره ماعندى أى فكره أنه عمر فى الخرطوم

ولا العصفوره جابت خبر .... بس قالوا الفى قلبو حرقص ......

والحنكوش يظل طول عمره حنكوش حتى لو دخلوه مدرسة كوش ( هى كوش دى مش فى بلاد الشايقيه ؟؟؟)

بصراحه .... كنت حاسى أنه القاموس السنجكاوى العاتى ده مصدره شايقى معتق وثقافتو عاليه بعلو وقامة جبل البركل ....

ما قصرتى ..... لكى أجر المناوله وشدى حيلك هاتى لينا العشرين التانيه

وسلمى لى على ود الزعيم

و قولى ليه ماينسى قفة البركاوى وكرتونة المنجه ( عاوزها دبش ):thumbup:

الباشا يا كبير نحن بنقول ( الفي بطنو حرقص يصفق ويرقص )
كمان كوش دي ما زاتة من تراث الشمالية
كوش يعني كرمة سميت المدينة بمدينة كوش
نسبة لجد الكوشيين كوش بن كنعان بن حام بن نوح
قفة البركاو وكرتونة المنجة علينا انشاء الله
بس صاحبك شايفاهو متردد في الرجوع للمملكة

الباشا
03-26-2010, 05:06 PM
على بال ما صاحبى عمر يحضر ال 20 سنجكاوى معتق

أديكم شويه من الجزيره والبحر

الكضيم

الجرم

البتاب

الحنبك

البرم

الخريم

المقا

الكاسكنه

أم تكشو

البصاره

أم شعيفه

السخينه

الدمعه

اللدايه

الدوكه

أب خرس

التكل

المرق

السداب

السفايه

||النادرهـ ~
03-26-2010, 11:38 PM
الباشا / راح تتعدل لهجتي بعد لما أروح السودان .. انت أكيد تدري
إن من عاشر القوم أربعين يوما صار منهم أو كما قيل ..


أبو إيثار / ايش رأيك تتوسط لي عند الباشا ويعطيني تذكرة علشان أروح مع العصفورة للسودان ..؟

المبارك ابراهيم
03-27-2010, 11:06 AM
على بال ما صاحبى عمر يحضر ال 20 سنجكاوى معتق

أديكم شويه من الجزيره والبحر

الكضيم

الجرم

البتاب

الحنبك

البرم

الخريم

المقا

الكاسكنه

أم تكشو

البصاره

أم شعيفه

السخينه

الدمعه

اللدايه

الدوكه

أب خرس

التكل

المرق

السداب

السفايه

الباشا أخوي والله الكتبتوا ده ناس الجزيرة ما إقدروا عليهو خلي ناس النوارة والقوس ولكن أحاول في بعضها :
# الكضيم هل هو القضيم الذي أصبح من المشروبات المحبذه في السودان.
# الجرم أعتقد هو حب البطيخ أو الحبحب بلغة النادرة.
# البتاب باقي قندول الذرة بعد ما إدقوهو ويستخرج منه الحب ( إدقوهوا دي يا جيل3 مش جلد.
# الحنبك أعتقد هي ثمرة شجرت النيم
# البرم دي مرت علي في مسرحية بامسيكا( إنت زي عتيد البرم إن باعوهو في السوق ما بزيل صرم
وإن ضبحوهوا في البيت ما بزيل قرم)
# المقا هي عبارة عن مزرعة أو جنينة
# أم تكشو هي الملوخية التي يتم تجفيفها وتحول لبدرة وتطبخ ويمكن أكلها بدون طبخها إضافتها لماء بار وفي هذه الحالة تسمي ( أمبارد) وهذه للمستعجل .
# أم شعيفة هي أخف من أم رقيقة بيعملوها بي ويكة خفيييييييييفة.
# السخينة بصلة محمرة يطفوها بي موية وتعمل في شكل رشوشة طبعا بدون لحمة ياسلام يا الباشا.
# الدمعة بصلة محمرة تطفيها بي موية تضع اللحمة تزيد الموية تستوي اللحمة تضع البهارات والثوم
والصلصة بدووووووون لايوق.
# اللداية سبق ذكرها يا مخرف؟؟؟؟؟؟
# الدوكة تصنع من الطين وتحرق ثم تعتق بالزيت تسنخدم لصنع الكسرة الرهيفة وعواسة الآبري.
# أب خرس ده القدح الكبير فيهو خرسين لأن حمله ثقيل دلالة علي الكرم توضع فيه العصيدة وجردل الملاح جمبو الله عليك يا الباااااااااااااشا.
# التكل سبق ذكره يا مخرف.
# المِرِق ولا المًرًق إذا المِرِق هو مكان الكمرا الآن لعرش البيوت وإذا المًرًق هي شوربة اللحمة.
الباقي الله أعلم خليتوا لي شاعر المنتدي وود المنابر.

شاعر الغبش
03-27-2010, 12:05 PM
الباقي الله أعلم خليتوا لي شاعر المنتدي وود المنابر.



حلات لِقْلِقْ..
علي الجزيمة .. أنا غير الجاوبتهن إنت ما أقدر أزيد ليك غير السفاية .. وهي التراب النااااعم ولمن تجي الكتاحه وأنت تكون راقد برا في الحوش تصحي وتلقي السفاية مكندكه ليك راسك وعيونك .. ونحن زمان جمب المدرسه أكنا بنلعب في السفاية وهي بمستوي شباك الفصل لكن بعد شجروها وعملو السور السفاية رحلت السوق .

أما البرم .. أنا زمان كسرت سنوني بالقوة عشان يدخلوني المدرسه .. أخواني أكانو بقولو لي ( اب هرم عنز البرم ) .. وأكنت أزعل وأدردق بالواطه .. أمي قالت لي البرم يعني الدهب يا مغفل ديل ذاتن ما عارفين .. ومن ديك ولحدي الليله البرم هو الدهب .. طبعا كبرت وعرفتو ما الدهب لكن عامل فيها ما عارف .

لكن البصاره دي .. ياها اللكلكه والهبيش .. لمن الباب ما ينفتح بي أخوي وأخوك ينادي ليك زول يقول تعال باصر لينا الباب أكان ينفتح ليك


لكن الكاسنكه دي لو النادره عرفتها أنا ما أظن أعرفها :SnipeR (64):

المبارك ابراهيم
03-27-2010, 12:20 PM
حلات لِقْلِقْ..
علي الجزيمة .. أنا غير الجاوبتهن إنت ما أقدر أزيد ليك غير السفاية .. وهي التراب النااااعم ولمن تجي الكتاحه وأنت تكون راقد برا في الحوش تصحي وتلقي السفاية مكندكه ليك راسك وعيونك .. ونحن زمان جمب المدرسه أكنا بنلعب في السفاية وهي بمستوي شباك الفصل لكن بعد شجروها وعملو السور السفاية رحلت السوق .

أما البرم .. أنا زمان كسرت سنوني بالقوة عشان يدخلوني المدرسه .. أخواني أكانو بقولو لي ( اب هرم عنز البرم ) .. وأكنت أزعل وأدردق بالواطه .. أمي قالت لي البرم يعني الدهب يا مغفل ديل ذاتن ما عارفين .. ومن ديك ولحدي الليله البرم هو الدهب .. طبعا كبرت وعرفتو ما الدهب لكن عامل فيها ما عارف .

لكن البصاره دي .. ياها اللكلكه والهبيش .. لمن الباب ما ينفتح بي أخوي وأخوك ينادي ليك زول يقول تعال باصر لينا الباب أكان ينفتح ليك


لكن الكاسنكه دي لو النادره عرفتها أنا ما أظن أعرفها :sniper (64):

أنا عارفك نجيض وما بتقصر لكن والله السفاية دي أنا نسيتها نسية بس !!!!!!!
يعني إنت من قمت مشاغب؟؟؟ تكسر سنونك براك وتضرب رأسك بالحيطة يا النبي منك!!!
الله يدينا خيرك.قلت لي الكاسنكة لو عرفتها النادرة ما بتعرفها أنا والله ذاتي ماعارف الباشا بجيب النصايب دي من وين؟؟؟؟

||النادرهـ ~
03-27-2010, 04:23 PM
لكن الكاسنكه دي لو النادره عرفتها أنا ما أظن أعرفها


الله يدينا خيرك.قلت لي الكاسنكة لو عرفتها النادرة ما بتعرفها أنا والله ذاتي ماعارف الباشا بجيب النصايب دي من وين؟؟؟؟


الله يستر :SnipeR (31):

على كذا " الباشا " ما بيعطيني التذكرة للسودان الا بعد عشر سنين قدام خخخخخخخ

أبو إيثار
03-27-2010, 04:34 PM
/

أبو إيثار / ايش رأيك تتوسط لي عند الباشا ويعطيني تذكرة علشان أروح مع العصفورة للسودان ..؟



والله يالنادرة الموضوع شكلو ماعايز واسطة :SnipeR (85):
عايز شيرنق ومافي مشكلة طالما أبونا القوس موجود:ss70012:
والوساطة مع الناس المخرفة دي مشكلة :SnipeR (31):
يعني تكلموا اليوم تخاف بكرة ينساك :harhar1:

المبارك ابراهيم
03-27-2010, 04:43 PM
والله يالنادرة الموضوع شكلو ماعايز واسطة :sniper (85):
عايز شيرنق ومافي مشكلة طالما أبونا القوس موجود:ss70012:
والوساطة مع الناس المخرفة دي مشكلة :sniper (31):
يعني تكلموا اليوم تخاف بكرة ينساك :harhar1:

الواسطة مع الناس المخرفة ما بتنفع دي حقيقة ويش تعشينا أمس ماندري!!!!!!!!
تحياتنا للغالي أبو إيثار وتذكرة النادرة مع العصفورة علي أنا بس الله يستر ما بكرة أقول لكم النادرة قالت بترسل لي تذكرة عشان أمشي لي أولادي!!!!

جندي
03-27-2010, 04:53 PM
ود ابراهيم والشاعر ما قصروا

والشي الماعرفوه انا ذاتي ما عارفه
بس الخريم سمعت بيهو وما متزكره
والسداب انا شاكي تكون ناقصة حرف ويكون المقصود السيداب
وهو رصة من الجوالات لاحد الماحاصيل الزراعية مثل (القمح ‘ الزرة ‘ التمر ....الخ)
ويمكن ان تكون الجوالات على الارض مباشرة او على عيدان بتاعة اشجار مرفوعة فوق حجار او غيرها من الاشياء الصلبة
اما ان كانت الكلمة المكتوبة (السداب )صحيحة لا اعرف معناها

الباشا
03-29-2010, 11:00 PM
الباشا أخوي والله الكتبتوا ده ناس الجزيرة ما إقدروا عليهو خلي ناس النوارة والقوس
# الكضيم هل هو القضيم الذي أصبح من المشروبات المحبذه في السودان.
# الجرم أعتقد هو حب البطيخ أو الحبحب بلغة النادرة.
# الحنبك أعتقد هي ثمرة شجرت النيم
# البرم دي مرت علي في مسرحية بامسيكا( عتيد البرم )

# اللداية / التكل سبق ذكرها يا مخرف؟؟؟؟؟؟

الباقي الله أعلم خليتوا لي شاعر المنتدي وود المنابر.

المبارك أخوى

كان كدى إنت ماك لاحق النادرة

ووجب سحب البطاقة الصادرة من الجزيره وفوراً

قلت لى الحنبك من شجر النيم .... أومال الزونيه تطلع من شدر شنو ؟؟؟

والبرم سمعتوا فى مسرحية بامسيكه ؟

والله دى ما كانت المحرية فيكا .....

يمسكك ود المنابير ومن الكسبتو يخرت إيديكا

أفو .... يا ود إبراهيم أمانه ما حنكشت :shiny01:

الباشا
03-29-2010, 11:20 PM
حلات لِقْلِقْ..
( اب هرم عنز البرم )
.. أمي قالت لي البرم يعني الدهب يا مغفل ديل ذاتن ما عارفين .. ومن ديك ولحدي الليله البرم هو الدهب .. طبعا كبرت وعرفتو ما الدهب لكن عامل فيها ما عارف .
لكن البصاره دي .. ياها اللكلكه والهبيش .. لمن الباب ما ينفتح بي أخوي وأخوك ينادي ليك زول يقول تعال باصر لينا الباب أكان ينفتح ليك
لكن الكاسنكه دي لو النادره عرفتها أنا ما أظن أعرفها :SnipeR (64):

حلات لِقْلِقْ

ما تتخيل حلات لقلق دى كيفتنى كيف ؟؟ يا الشاعر

أتاريك قدييييييم من زمن الكسره .... بس والله حنيكيش جزيره مافى منك

أب هرم عنز البرم ههههههههههههههه

قلت لى قالوا ليك البرم هو الدهب بس والله الحاجه شوتتها دقت فى العارضه لانه فعلاً البرم بلون الذهب وهو يا ساده يا كرام يا حناكيش الجزيره البرم هو زهرة شجر الطلح شكلها دائرى وفى عويد صغنبوتى ( شكل حلاوه حربه المدوره ) وبتزل من فروع الطلح بكميات كتيره ولأنها طعمها حلو العتان والسخلان والمعيز بتموت فيها وبتفرمها صاح ...

أما البصاره فهو ملاح الحيره .... لما يكون مطبخ منال العالم مأشف .... حلوه منال العالم دى مش كدا ؟؟ لما تكون الحكايه مقرطه والحاجه حيرانه تعمل ملاح شنو تقوم تجيب اللوبا العفن هههههه ايوه يا النادره اسمو كدا ( ايش نسويلو ؟ ) وتجيب ملوخية شرط ملوخية خلا .... وتروح خالطهم مع بعض طبعاً بدون مولينكس ..... أها ده ملاح البصاره ..... أما حناكيش بجد :oo5o.com (39):

اولاً انا قلت الكاسكنه مش الكاسنكه ذى ما كلكم كتبتوها ..... وكيتاً فيكم مش حأفسرها ..... وحاخلى النادره تفسرها عشان نحضر ليها التذكره والفيزا ... ايوه لازم فيزا ومافيش حد أحسن من حد .....

الباشا
03-29-2010, 11:26 PM
الله يستر :sniper (31):
على كذا " الباشا " ما بيعطيني التذكرة للسودان الا بعد عشر سنين قدام خخخخخخخ

ولا يهمك إنتى بس شوفى البريد حقك

والتذكره والفيزا جاهزين

وأقرب أجازه .... بإذن الله تركبى الخط ( تبوك - جده - سواكن - أتبره - كريمى )

الباشا
03-29-2010, 11:32 PM
والله يالنادرة الموضوع شكلو ماعايز واسطة :SnipeR (85):
عايز شيرنق ومافي مشكلة طالما أبونا القوس موجود:ss70012:
والوساطة مع الناس المخرفة دي مشكلة :SnipeR (31):
يعني تكلموا اليوم تخاف بكرة ينساك :harhar1:

المره دى نسيان ماكو

والواسطات تمتنع .... دى إمتحانات ودرجاتها مضمنه

تجيب الكاسكنه صاح .... تركب المرسيدس الما خمج ... وتذاكر الكل مقطوعه جاهزه درجه اولى ممتاز .... وكريمى تتشرف بزيارة الاصيلين ....

مش كدا برضو يا استاذه ؟؟؟ :thumbup:

الباشا
03-29-2010, 11:38 PM
بس الله يستر ما بكرة أقول لكم
النادرة قالت بترسل لي تذكرة عشان أمشي لي أولادي!!!!

دا الخرف ذااااااتو

ايه يا ود المبارك عاوز تحرجنا مع اللجانب مالك ؟؟؟

إنت ذاتك تعال المرسيدس بتشيل اربعه بالراحه :SnipeR (69): ....

الباشا
03-29-2010, 11:47 PM
ود ابراهيم والشاعر ما قصروا

بس الخريم سمعت بيهو وما متزكره
والسداب انا شاكي تكون ناقصة حرف ويكون المقصود السيداب
وهو رصة من الجوالات لاحد الماحاصيل الزراعية مثل (القمح ‘ الزرة ‘ التمر ....الخ)
ويمكن ان تكون الجوالات على الارض مباشرة او على عيدان بتاعة اشجار مرفوعة فوق حجار او غيرها من الاشياء الصلبة
اما ان كانت الكلمة المكتوبة (السداب )صحيحة لا اعرف معناها

الخريم يا جندى هو ثمرة شجر الحراز لونه أحمر وشكلو ذى شنو ؟ ذى شنو ؟ أيوه شكل البسكويت البيعملوهو فى البيوت للعيد بس طبعاً لهدوم يعنى مش مرتب ... وده بقا الغذاء الرسمى للبقر لانه قوى وكبار لكن فى غير زمن البرم المعيز مجبوره تفرموا برضو

السداب هو السداب يعنى لافيه يا ولا تاء

عندنا لما نوسر العنقريب بالحبال شكل الوساره بيبقى زى بعض ما عدا المنطقه البين الشناط والوساره بتبقى مزخرفه باشكال بنسميها السداب ... مش عارف حناكيش التى وناس جوه الجزيره بيقولوا عليها شنو ؟

||النادرهـ ~
03-30-2010, 12:38 AM
اولاً انا قلت الكاسكنه مش الكاسنكه ذى ما كلكم كتبتوها ..... وكيتاً فيكم مش حأفسرها ..... وحاخلى النادره تفسرها عشان نحضر ليها التذكره والفيزا ... ايوه لازم فيزا ومافيش حد أحسن من حد .....



:SnipeR (68):


ممكن أستعين بصديق ..؟

المبارك ابراهيم
03-30-2010, 10:45 AM
دا الخرف ذااااااتو

ايه يا ود المبارك عاوز تحرجنا مع اللجانب مالك ؟؟؟

إنت ذاتك تعال المرسيدس بتشيل اربعه بالراحه :sniper (69): ....

والله ياليت أسافر الليلة قبل بكرة الفراق حااااااار يا الباشا أخوي طيب العفش بشيلوهو وين؟؟ إنت عارف أنا كراكيبي كتيرة حتي علب النيدو الفاضية شايلها معاي هههههاههها.

المبارك ابراهيم
03-30-2010, 10:47 AM
:sniper (68):


ممكن أستعين بصديق ..؟

صديق مافي قولي صديقة وأتصلي علي زولتك.

||النادرهـ ~
03-30-2010, 10:52 AM
^
^

صباحك خير وبركة :SnipeR (69):



صديق مافي قولي صديقة وأتصلي علي زولتك.


وهوَ كذلك :D

المبارك ابراهيم
03-30-2010, 10:53 AM
حلات لِقْلِقْ

ما تتخيل حلات لقلق دى كيفتنى كيف ؟؟ يا الشاعر

أتاريك قدييييييم من زمن الكسره .... بس والله حنيكيش جزيره مافى منك

أب هرم عنز البرم ههههههههههههههه

قلت لى قالوا ليك البرم هو الدهب بس والله الحاجه شوتتها دقت فى العارضه لانه فعلاً البرم بلون الذهب وهو يا ساده يا كرام يا حناكيش الجزيره البرم هو زهرة شجر الطلح شكلها دائرى وفى عويد صغنبوتى ( شكل حلاوه حربه المدوره ) وبتزل من فروع الطلح بكميات كتيره ولأنها طعمها حلو العتان والسخلان والمعيز بتموت فيها وبتفرمها صاح ...

أما البصاره فهو ملاح الحيره .... لما يكون مطبخ منال العالم مأشف .... حلوه منال العالم دى مش كدا ؟؟ لما تكون الحكايه مقرطه والحاجه حيرانه تعمل ملاح شنو تقوم تجيب اللوبا العفن هههههه ايوه يا النادره اسمو كدا ( ايش نسويلو ؟ ) وتجيب ملوخية شرط ملوخية خلا .... وتروح خالطهم مع بعض طبعاً بدون مولينكس ..... أها ده ملاح البصاره ..... أما حناكيش بجد :oo5o.com (39):

اولاً انا قلت الكاسكنه مش الكاسنكه ذى ما كلكم كتبتوها ..... وكيتاً فيكم مش حأفسرها ..... وحاخلى النادره تفسرها عشان نحضر ليها التذكره والفيزا ... ايوه لازم فيزا ومافيش حد أحسن من حد .....

إنت كمان يا الباشا أخوي ما تقرضها مرة واحدة ما فرقت كتير البرم من الطلح والنيم كلو شدر ما الحمد لله الما قلنا ليك البرم ده آيس كريم بالشكولاته. ههههههاههههييي.

المبارك ابراهيم
03-30-2010, 10:55 AM
^
^

صباحك خير وبركة :SnipeR (69):






وهوَ كذلك :D

صباح الفل والياسمين

المبارك ابراهيم
03-30-2010, 10:59 AM
المبارك أخوى

كان كدى إنت ماك لاحق النادرة

ووجب سحب البطاقة الصادرة من الجزيره وفوراً

قلت لى الحنبك من شجر النيم .... أومال الزونيه تطلع من شدر شنو ؟؟؟

والبرم سمعتوا فى مسرحية بامسيكه ؟

والله دى ما كانت المحرية فيكا .....

يمسكك ود المنابير ومن الكسبتو يخرت إيديكا

أفو .... يا ود إبراهيم أمانه ما حنكشت :shiny01:

النيم ده ما بننساهو عشان كانوا بجلدونا بيهو عشان كنا مشاغبين غلطة وآآآآآحدة بس تطلعونا حناكيش!!
الباشا أرجو تصحح زي الناس بي حنكشتي دي مافي زول حل قدري أرجوك صحح زي الناس وطلع التذكرة.

الباشا
03-31-2010, 01:30 AM
:sniper (68):
ممكن أستعين بصديق ..؟

إجابه صااااح ميه ميه

والتذكره جااااااااااااااازه

والمرسيدس جااااهزه

والفيزا كمان ..... لانى كنت فى القنصليه اليوم فى زيارة نكد

والله يا جماعة ناسنا بتاعين السفارات والقنصليات وحتى وزارة الخارجيه المفروض نجيبهم ونسحلهم وبعد داك نولع فيهم بزيت راجع معفن وقديم

تم نقل جزء من هذا البوست والخاص بالمعاناة مع القنصليه لبوست اخر للمزيد من النقاش وترك هذا البوست للهجتنا الجميله ... لهجتنا التى لاتشبه صفاراتهم وقنصلياتهم

شاعر الغبش
03-31-2010, 10:17 AM
إجابه صااااح ميه ميه

والتذكره جااااااااااااااازه

والمرسيدس جااااهزه

والفيزا كمان ..... لانى كنت فى القنصليه اليوم فى زيارة نكد

والله يا جماعة ناسنا بتاعين السفارات والقنصليات وحتى وزارة الخارجيه المفروض نجيبهم ونسحلهم وبعد داك نولع فيهم بزيت راجع معفن وقديم


تصدقوا الناس ديل لحدى اليوم ما عندهم قاعدة بيانات ....

ياجماعة ناس نيكاراقوا وتشاد و الصومال واليمن معاملتهم ما تاخد 10 دقائق

عمكم من الساعه تسعه لحدى الساعه اتنين ونص قاعد فى السفاره عشان اجدد جواز
والسبب انه عمكم دافع كل الضرائب والخدمات وقروش النصب اللقف البيسموها الزكاة وترعة البجا ودمغة الفطيس وتبرع جمعيات الكيزان الخيريه وغير الخيريه ومعاى برنت عاوز ليه مكبر عشان تشوف المكتوب فيه شنو وده كلو ما نفع إلا اجيب الإيصالات ..... قال أيه لازم لازم تثبت إنك دافع .... طيب يا اولاد الكلب مين المفروض يثبت انى دفعت واللا اتنيلت على عينى وواكلت قروش الحكومه .... المصيبه أنه الما دافع أموره تمشى بمجرد انه مركب دفينه ..... اقسم بجلال الله سفاراتنا وقنصلياتنا بيجيوبى ليها أردأ البشريه الموجوده فى السودان وكلهم اولاد لذينه بى قنصلهم .... عالم اعوذ بالله زباله

المصيبه إنى رجعت البيت وفتشت لإيصال ما لقيتو عملت عسرمية تلفون للسودان ( ميته وخراب ديار ) وبرضو مافى فايده ..... تصوروا فى النهاية جيت راجع القنصليه ووقفت فى شباك غير الأولانى ولما وصلت لحدى عنده شال الورق ختم عليه ولا سألنى من ايصال ولا يحزنون .... واستلمت الجواز مجدد بعد ساعتين .... يعنى فوضه فوضه ما ليها حدود .... كا واحد فيهم شغال بكيفو

بالله عليكم افتونى ...... ده يقولوا عليها شنو ؟؟؟؟؟؟؟؟؟؟؟؟؟؟



بالرغم من إنو البوست بتاع لهجتنا الجميلة .. لكن من حقك تـنْـفـَشْ ..

مرة قالوا واحد مشي يوثق ليهو شهادة وفاة عشان ميراث وكده .. قالوا ليهو إلا يجي الميت شخصيا ويوقع ويقول أنا مُـتّـه .

لكن أظن التذكرة شجعتك علي السفر .. كدي النشوفها أول شي حقت منو ؟

المبارك ابراهيم
03-31-2010, 10:57 AM
إجابه صااااح ميه ميه

والتذكره جااااااااااااااازه

والمرسيدس جااااهزه

والفيزا كمان ..... لانى كنت فى القنصليه اليوم فى زيارة نكد

والله يا جماعة ناسنا بتاعين السفارات والقنصليات وحتى وزارة الخارجيه المفروض نجيبهم ونسحلهم وبعد داك نولع فيهم بزيت راجع معفن وقديم


تصدقوا الناس ديل لحدى اليوم ما عندهم قاعدة بيانات ....

ياجماعة ناس نيكاراقوا وتشاد و الصومال واليمن معاملتهم ما تاخد 10 دقائق

عمكم من الساعه تسعه لحدى الساعه اتنين ونص قاعد فى السفاره عشان اجدد جواز
والسبب انه عمكم دافع كل الضرائب والخدمات وقروش النصب اللقف البيسموها الزكاة وترعة البجا ودمغة الفطيس وتبرع جمعيات الكيزان الخيريه وغير الخيريه ومعاى برنت عاوز ليه مكبر عشان تشوف المكتوب فيه شنو وده كلو ما نفع إلا اجيب الإيصالات ..... قال أيه لازم لازم تثبت إنك دافع .... طيب يا اولاد الكلب مين المفروض يثبت انى دفعت واللا اتنيلت على عينى وواكلت قروش الحكومه .... المصيبه أنه الما دافع أموره تمشى بمجرد انه مركب دفينه ..... اقسم بجلال الله سفاراتنا وقنصلياتنا بيجيوبى ليها أردأ البشريه الموجوده فى السودان وكلهم اولاد لذينه بى قنصلهم .... عالم اعوذ بالله زباله

المصيبه إنى رجعت البيت وفتشت لإيصال ما لقيتو عملت عسرمية تلفون للسودان ( ميته وخراب ديار ) وبرضو مافى فايده ..... تصوروا فى النهاية جيت راجع القنصليه ووقفت فى شباك غير الأولانى ولما وصلت لحدى عنده شال الورق ختم عليه ولا سألنى من ايصال ولا يحزنون .... واستلمت الجواز مجدد بعد ساعتين .... يعنى فوضه فوضه ما ليها حدود .... كا واحد فيهم شغال بكيفو

بالله عليكم افتونى ...... ده يقولوا عليها شنو ؟؟؟؟؟؟؟؟؟؟؟؟؟؟

هذا زمانك يا مهازل فأمرحي

الباشا
03-31-2010, 10:45 PM
تم نقل معاناتى مع قنصلية جده إلى :

http://www.marafi-alebda.com/vb/newreply.php?do=newreply&noquote=1&p=34213

الباشا
03-31-2010, 11:10 PM
نطلع من موضوع القنصليات وخلينا فى موضوعنا

لهجتنا الجميله ( العامية السودانيه )

وإليكم العشرين التاليه

الكونيه

العنبجه

البرجوب

الورده ( بكسر الواو )

الجضماره

الشنكل

القيروانه

الدلقان

الضقل ( بضم الضاض)

الدنقل

الشّتم

المطرق ( بضم الميم )

الطايوقه

النفاج

القاطوع

التبروقه

الركوه

اللقاى

المزيره

عمرابى
04-01-2010, 12:03 AM
الباشا أسمح لى أولاً أن أعتذر عن تأخيرى فى الحضور لهذا البوست
وخلينى ابدا على خفيف كدى

الوِردة معناه الحمى وفى بعض الاحيان اسمها السهراجة
عشان بتساهر بالزول




الشنـْكـَل ده البعلقو فيهو المروحة صح؟


الدُلقان أو الدِلـِق عبارة قطعة صغير من القماش
الشّتم ده كان بتعمل زمان للنسوان زمان كنوع من الزينة


الطايوقه ده مخ البهيمة بيستعملوا فى نضيف الصاجة

النفاج عبارة عن باب صغير يكون دايما بين الجيران
حليل الزمن داك

القاطوع عبار عن حيطة بتتبنى دايما فى الحوش غالبا لتفصل بين الرجال والنساء

التبروقه المصلاية


المزيره مكان وضع الأزيار

البعد الخامس
04-01-2010, 12:21 AM
الشنكل : عمرابى انت بتعرف الشنكل البعلقو فيهو المروحه بس

ما بتعرف الشنكل بتاع عريش الكارو البيسبت بيهو السرج

المطرق : عصا من الحناء او النيم وغيرها مخصصه للدق

ويا حليل زمن المطارق الدنيا كانت بى خيرا والمدارس كانت

بى خيرا .

اللقاى : إناء يوضع تحت الزير ( جركانه .. جردل صغير وغيرها )

يا حليل موية اللقاى .

الباشا
04-01-2010, 01:13 PM
الشنـْكـَل ده البعلقو فيهو المروحة صح؟
الشّتم ده كان بتعمل زمان للنسوان زمان كنوع من الزينة

القاطوع عبار عن حيطة بتتبنى دايما فى الحوش غالبا لتفصل بين الرجال والنساء


سلام يا عمرابى .... وين الحى بيك ؟

حمداً لله على سلامتك

صاح بيعلقوا فوقه المروحه الخروف لما ينضبح وكل شى عاوز تعليق
بس فى الجزيره عندنا شنكل مهم للغايه وهو " ميزان القطن "

ما عارف حكاية زينة النسوان دى ..... الله أعلم
بس الشتم القاصدو هو فردة طبله صغيره يتم العزف عليهما مع نغمات الدلوكه

أيه حكاية النسوان المعلقه معاك دى يا عمرابى ؟؟؟:bleh::SnipeR (29):

القاطوع عندنا فى الجزيره غرفه فى نهاية البيت لها مدخل صغير وومنخفض لا فيها شباك ولا حتى منفذ تستخدم زمان للتخزين واهم محتوياتها السحاره

مدثر
04-01-2010, 01:29 PM
السلام عليكم ورحمة الله وبركاته
تحياتى وامنياتى وشكرا على الاهتمام بلهجتنا العامية وكلامنا الجميل الى قرب يتنسى واستمتعت جدا بموضوعك ومزيدا من المفردات المندثرة

الباشا
04-01-2010, 01:35 PM
المطرق : عصا من الحناء او النيم وغيرها مخصصه للدق

ويا حليل زمن المطارق الدنيا كانت بى خيرا والمدارس كانت

بى خيرا .



ود عمى البعد الخامس
معقوله بس ؟؟؟ ياخوى وينك

باين عليك كنت شقى فى صغرتك وأكلت بالمطرق لما ....... إنهردن :SnipeR (77): ههههههههه

كنا فى المعيلق الإبتدائيه وكان عندنا مدرس حساب صعب صعب شديد من عديد ابوعشر " الله يمسيه بالخير "
المدرسه محاطه بالعوير وفراشنا اسمه " أحمد " المدرس ده لما يجيب كراسات المسائل اليوميه مع الصباح ويديه فاضيه نحمد ربنا .... لانه على طول يخت الكراسات بى هنا ويكورك باعلى حسة .... " يا أحمد حول جدول العوير " وما تشوف الا كووووم ... حزمه من مطارق العوير داخله الفصل ... وعينك ما تشوف إلا النور الحصه كلها طبااااخخخخ طباااااخ طبااااخ خبط جد

ده كلو هين ...... لما يجى شايل الكراسات حقت الاختبار الاسبوعى بيرسل لى فصل رابعه (أ) لولد معين ابوه شغال غفير فى القنطره ... والقنطره دى فيها شجر السيسبان ( ايوه السيسبان الروكه ) الشجره دى فيها جنس مطارق ... ماتقول لعدوك عليها .... المطرق إن دقوا بيها الفصل كلو تزيد حلاوة .... أها اليوم داك البيجى لابس 7 لباسات والبيجى خاتى مخده ( ايوه مخده ) وفضائح ياما وجرسه .... مرقتنا من الفصل وعلى الجنا ود الهرمه ود الغفير نخلص فيه حقنا ... بغتاته طبعاً .... عشان بنخاف يشكينا لمدرس الحساب

ايام حلوه لن تعوض


الله يديك العافيه

المبارك ابراهيم
04-03-2010, 02:00 PM
ود عمى البعد الخامس
معقوله بس ؟؟؟ ياخوى وينك

باين عليك كنت شقى فى صغرتك وأكلت بالمطرق لما ....... إنهردن :sniper (77): ههههههههه

كنا فى المعيلق الإبتدائيه وكان عندنا مدرس حساب صعب صعب شديد من عديد ابوعسر " الله يمسيه بالخير "
المدرسه محاطه بالعوير وفراشنا اسمه " أحمد " المدرس ده لما يجيب كراسات المسائل اليوميه مع الصباح ويديه فاضيه نحمد ربنا .... لانه على طول يخت الكراسات بى هنا ويكورك باعلى حسة .... " يا أحمد حول جدول العوير " وما تشوف الا كووووم ... حزمه من مطارق العوير داخله الفصل ... وعينك ما تشوف إلا النور الحصه كلها طبااااخخخخ طباااااخ طبااااخ خبط جد

ده كلو هين ...... لما يجى شايل الكراسات حقت الاختبار الاسبوعى بيرسل لى فصل رابعه (أ) لولد معين ابوه شغال غفير فى القنطره ... والقنطره دى فيها شجر السيسبان ( ايوه السيسبان الروكه ) الشجره دى فيها جنس مطارق ... ماتقول لعدوك عليها .... المطرق إن دقوا بيها الفصل كلو تزيد حلاوة .... أها اليوم داك البيجى لابس 7 لباسات والبيجى خاتى مخده ( ايوه مخده ) وفضائح ياما وجرسه .... مرقتنا من الفصل وعلى الجنا ود الهرمه ود الغفير نخلص فيه حقنا ... بغتاته طبعاً .... عشان بنخاف يشكينا لمدرس الحساب

ايام حلوه لن تعوض


الله يديك العافيه

ده كان سنة كم آالباشا أخوي؟؟؟؟؟؟
من زمن العوير في المدارس؟؟؟
يا حليل العوير أبو زهرة بنفسجية.
بالفعل أيام لا تنسي.

نكشة صلح ( عديد أبو عشر ) دي ولا خلينا نوديك دقسات المرافيْ!!!!!!

الباشا
04-03-2010, 08:22 PM
نكشة صلح ( عديد أبو عشر ) دي ولا خلينا نوديك دقسات المرافيْ!!!!!!

نكشتين


يا ود إبراهيم

أها وبعد ما صلحناها .....

إت جارى وين ؟؟؟

عشرين كلمه كلها من الجزيره والمناقل

واللا عاوزنا نقول عليك ود خرتوم

وإنت ود النعمه قال : لمن جيت المسلميه أول مره قعدت تسأل من قبرالجندىالمجهول :clap::clap::SnipeR (29):

الواد عامل فيها فتك .... هههه

المبارك ابراهيم
04-03-2010, 10:11 PM
نطلع من موضوع القنصليات وخلينا فى موضوعنا

لهجتنا الجميله ( العامية السودانيه )

وإليكم العشرين التاليه

الكونيه

العنبجه

البرجوب

الورده ( بكسر الواو )

الجضماره

الشنكل

القيروانه

الدلقان

الضقل ( بضم الضاض)

الدنقل

الشّتم

المطرق ( بضم الميم )

الطايوقه

النفاج

القاطوع

التبروقه

الركوه

اللقاى

المزيره

أسوي شنو جيتك راجع.
,,,,,,,,,,,,,,,,,,,,,,,
# البرجوب / طين البحر اللٌك الطين الخموج.
# الوِردة/ الحمي ( يا أبو ريا من أم قِضية)
# الشنكل هو الميزان البوزنوا بيهو قفاف القطن.
# القيروانة هي الصفيحة التنكة بلغة الخليج وفي رواية القيربانة.
# الدلقان هو باقي توب قديم أو جلابية أو غيره وفي رواية (دير)
#الضٌقل : هو الوتد عود يدق في الأرض تربط فيه الغنماية والسخيلات
# الدنقل / سمعت أمي زمان بتقول للواحدة ( تلدي النقل والفأر ينقل) لكن ما عارفو شنو؟؟؟
# الشتم شبه دلوكة صغيرة تمسك باليد واليد الثانية فيها مطرق صغيرة للضرب علي الشتم.
# الطايوقة هي النخاع الشوكي حق البهيمة مع المعراكة تستخدم لتسيير الصاج أو الدوكة.
# المطرق هي فرع صغير رخو طايع من الشجر نيم أو لعوت أوغيره
# النفاج تعلمناه من الفأر عندما نصب له ماء في الجحر الرئيسي نلقاهو طلع بجحر أخر
(exit door) للطواريء
# التبروقة هي تعمل عمل المصلاية والفروة لكنها دائرية من السعف.\
# الركوة إبريق من الفخار والركوة عرفها الكبارووردت في قصة الشيخ فرح مع إبنته.
# المزيرة رويكبة صغيرة بي شوالات للأزيار هسة إطورت بنوها وظبتوها زينة ساي.

الباشا
04-03-2010, 10:42 PM
أسوي شنو جيتك راجع.
,,,,,,,,,,,,,,,,,,,,,,,
# البرجوب / طين البحر اللٌك الطين الخموج.

#الضٌقل : هو الوتد عود يدق في الأرض تربط فيه الغنماية والسخيلات

# الدنقل / سمعت أمي زمان بتقول للواحدة ( تلدي النقل والفأر ينقل) لكن ما عارفو شنو؟؟؟
.

17 من عشرين

أخير منك النادره مع إنها سعوديه

إلا بالمناسبه دى يا أستاذه محاسن .... وين النادره ؟

أومال عامل فيها زول جزيره على شنو ؟؟؟

حتى الضقل ما بتعرفوا ؟؟؟ آل .... وتد ..... آل


الله يديك العافيه يا النبارك

وبرضو يا جماعه شايف العمده كابى الزوغه

مع أنه المفروض يكون أول الممولين ليه

وبعدين يا ود إبراهيم عقوبة ليك للرسوب

العشرين كلمه الجايه عليك


يلا هات .... خلينا نشوف

المبارك ابراهيم
04-04-2010, 08:43 PM
17 من عشرين

أخير منك النادره مع إنها سعوديه

إلا بالمناسبه دى يا أستاذه محاسن .... وين النادره ؟

أومال عامل فيها زول جزيره على شنو ؟؟؟

حتى الضقل ما بتعرفوا ؟؟؟ آل .... وتد ..... آل


الله يديك العافيه يا النبارك

وبرضو يا جماعه شايف العمده كابى الزوغه

مع أنه المفروض يكون أول الممولين ليه

وبعدين يا ود إبراهيم عقوبة ليك للرسوب

العشرين كلمه الجايه عليك


يلا هات .... خلينا نشوف

الإخوة والأخوات حسب التكليف من المدير العام للبوست وهو زول دفعة وأنا ما بقدر أرد ليهو طلب إليكم العشرين كلمة والله يعينكم.

# الكاو

# القِدْ

# القرمبع

# الصُرار

#الصًرِيمة

# الخُرتاية

# الوكًاي

# الرتيلة

# الضٍريسة

# الجابية

# التقنت

# التًقاء

# المُرواد

# الكِشكة

# الرًسنْ

# اللًباب

# الزُمام

# الــوِقاية

#الدِبليبة

# الجقاجق.

الباشا
04-05-2010, 08:33 PM
الله يديك العافيه

يا المبارك
عشرين عااااتيه

مافيها كلام


يلا يا جنيات الزمن


تخريمه

افتح بريدك الخاص

المبارك ابراهيم
04-07-2010, 06:59 PM
الله يديك العافيه

يا المبارك
عشرين عااااتيه

مافيها كلام


يلا يا جنيات الزمن


تخريمه

افتح بريدك الخاص





الباشا أخوي الحكاية شنو؟؟؟ الجنيات ديل أبو المكشن بلا بصلة ده ولا شنو؟؟؟؟
كلماتي ديل فيهن ( جقس) مالهن بكحن. فيهن أبنيني. علي الله شوف الجنيات ديل!!!!

الباشا
04-07-2010, 09:23 PM
الجنيات ديل أبو المكشن بلا بصلة ده ولا شنو؟؟؟؟
كلماتي ديل فيهن ( جقس) مالهن بكحن. فيهن أبنيني. عليك الله شوف الجنيات ديل!!!!

لا بكحن لافيهن جقس ولا ضاربن أبنينى

علا الجنيات ضنيتهم مشغولين فى اللنتخابات

يمكن دايرين يفوزوا ياسر عرمان

عليك الله يا ود ابراهيم فى زول عاقل يسمى ولدو عرمان

الباشا
04-09-2010, 11:29 PM
مع أنهم كلمات منطقه .....

علا فى كم كلمه كدا الله يعينى عليهم ... يا صاحبى

# الكاو

عندنا يمكن بنقول ليها الكاويه ... أو الكوايه وهى حديد بنسخنها فى النار نوسم بيها البهائم عشان الراعى وكت يجيبهم المغربيه يعرف يفرذن ويدى كل ذى حق حقه .... ( على الله اكون اتوفقت يا فرده )

# القِدْ

هو سيور من جلد وزمان اهلنا كانو بيوسرو بيها العناقريب ... وعنقريب القد ده ليه محل ثابت فى صدر البيت يعنى إلا تجيب ونش عشان تحركو

# القرمبع

الشى المهلهل .. الما نافع والبيعمل صوت ( قربعه على قول اهل الخليج ) وخاصة العربات ... يقول ليك ده سيارته قرمبعه

# الصُرار

قطع دلاقين بيعطنوها فى روث البهائم ويشدوها على ضراع الغنماية واللا النعجه عشان جنياتها ما يرضعوها ويصبحوا الشفغ بلا عشاء واللا شاى اللبن حق الصباح

#الصًرِيمة

الصريمه دى بنقول عليها الشكامة برضو وهى عود يربطوهو على طرفى حبل دباره أو اى حبل صغير ويدخلوهو فى خشم السخيل عشان ما يرضع أمه وبرضو خوفاً من بيات الجهال بلا عشا


# الخُرتاية

كيس من القماش يدخلوا فيه ضرعات البهيمه عشان برضو اللبن ما يروح هدراً وذكرتنى بنكته
زمااان كان الوليدات بيدخلوهم المدارس والولد أمه تخيط ليه باقى هدمه قديمه تسويها ليه شنيطه للمدرسه ... وكان اللبو عند شى يسويها ليه عند الترزى ... أها الوليد جابو ابوه من السرحه ودخلوا المدرسه .... اول مطيره نزلت جا اللبو وقال للوليد ارحك الزراعه بدت ... اها الوليد ما كضب خبر جاء للناظر وقال ليه : فندى أنا قنع هاك خرتايتك ...

# الوكًاي

الوكاى ده أظنو الحبل البيربطوا بيه البقره لما يجو يحلبوها ... عشان ما ترفس اللبن ويندفق ... هنا بقا البيت كلو يبت بلا عشاء والفطيره بتبقى مسيخه بلا لبن

# الرتيلة

والله عاد دى الله يسترنى معاها ... وقفت فيها كتير ... بس إتذكرت أنه عندنا حاجه قريبه منها الفرق بينها وبين كلمتك دى حرف " النون " يعنى بنقول الرتينه .... وهى مصباح كبير فيه قماشه من نوع خاص يكبوا فيها السبيرتو وكمان ليها تنك صغير يملوهو بالجاز ويشكوها ... ويولعوا فى الخيط ... وبق تبق ويطلع منها نور ..... فشر لمبات النايلون حقات اليومين دى

# الضٍريسة

نبات فيه بذرة مليانه شوك ... وبتقوم فى الخلا ... وكت تنشف أمانه ما بتعذب الوليدات ... طبعاً مطلوقين حفايا سااااااى والضريسه التقول مسلطه على الشفع .... دخلتنا البيوت الواحد يتشنقل على قفاهو ويمد كريعاتو لامه ... تجيب اللبره وتقعد تمرق ليه فى الضريسه ... ( بدون بنج طبعاً هههههههههه ) وهاك يا جرسه ...

# الجابية

الجابيه دى حفره تنحفر بين الشادوف والبحر تتملى مويه والناس تغرف منها بالشادوف وتسقى الزرع

# التقنت

ديل السرابات البين أب سته ومحروتات بالعرض عكس حراتة باقى الحواشه وغالباً بينزرعوا لوبا حلو عشان يغطى على الزرع وكمان فيه لوبا يا حلات بليلتو فى رمضان

# التًقاء

مكان نضيييف بيلموا فيه قناديل العيش ويدقوها يطلعوا منها الحب ... وممكن القمح برضو ... ويمكن مكان لم القطن كمان

# المُرواد

ده بقا حديده فى شكل مسمار يدخل فى المكحله ويطلع على طرفوا الكحل ... والنسوان يدخلوه بين الرموش و تمريره شمال وأخرى يمين وبصه فى المرايه ... وحلاتك يا كحيل العين ...

# الكِشكة

الكشكه دى ليها استعمالين .... واحده خاصه بالمريسه ودى بالجد معلوماتى فيها ميييح ... والتانيه الوسخ المتراكم فى كرعين العيال نقول على الشافع المهملاهو امو الجنا أب كشكشه ده كنايه على الوسخ

# الرًسنْ

سيور من الجلد مشبك بطريقه هندسيه ويدخل فى راس الجمل والركب يمسك اطرافه لتوجيه الجمل وبالنسبه للحصين والحمير نقول عليه اللجام


# اللًباب

سير من الجلد لتثبيت السرج على ظهر الحمار ويمكن يكون حبل برضو

# الزُمام

الزمام حليه من الذهب فى شكل دائرى ذى الدبله يلبسوهو الحريم فى نخريهن ... دلاله على العز والجاه ... والراجل المريش هو البيجيب لمرتو الزمام والرشم والحمد لله .... والدوبيت مليان بالغزل فى الزمام ....

# الــوِقاية

الوقايه دى بقا يمكن تكون مصنعه ومزركشه بالسكسك فى شكل دائرى يختو عليها الجبنه حقت الفخار أو الحديد ... والوقايه برضو ممكن تكون حته قماشه تلف بشكل دائرى وتوضع على الراس عشان يشيلوا فوقها صفيحة المويه أو أى ماعون يتخت على الراس

#الدِبليبة

هى الكسره اللقمه البارده ... بس لازم تكون كتيره ... وكمان تستخدم ايام المناسبات ويملحوها فى صحن كبير ويتحاوطوها الجماعه وهاك يا لقف

# الجقاجق.

هى السقط بلغة اهل الخليج أو الكمونيه بلغة السودانيين ... وهى خلطة المصارين والكرشه ويمكن الكبده والكلاوى وتتعمل ملاح ولا أحلى ... وبالمناسبه الكمونيه لو ما لقت مرا ايدا طااااااعمة وفنانه ما بتتأكل ولا بتنطاق ... يعنى الست اللهى بيقسيوها بطبخة الجقاجق ....


أهااا يا صاحبى كم من عشره ؟؟؟

الطيب النعمة علي
04-10-2010, 08:49 PM
شكرا لهذا الوست الخفيف والظريف
مشى كتير وأنا جيت متأخر وما قدرت أكملو
يا ليت لو بوبت الكلمات والتعريفات في صفحة واحدة أو جدول
وبعد ما أكمل حا أرجع أشارك وهاكم الصورة دي
المشلعيب
http://dc04.arabsh.com/i/00365/i2g0c3frstpo.JPG

الباشا
04-10-2010, 11:54 PM
يا ليت لو بوبت الكلمات والتعريفات في صفحة واحدة أو جدول

http://dc04.arabsh.com/i/00365/i2g0c3frstpo.jpg


المشلعيب ده يا ود النعمه

lg واللا كلفينيتور ؟؟؟

المشعليب ده أحلى تلاجه ....

لا تكلف كهرباء ولا عاوزه ليها أسطى يصلحها

ولا عاوزه فريون

وبعدين حكاية تبويب الكلمات صعبه علينا .... نحن اعمامك الكبار ديل

يا دوبك نشغل لوحة التحكم نلقى مشاركاتنا ونرد عليها

إنت كان بتقدر تسويها .... ينوبك ثواب


وفى إنتظار مشاركتك بعشرين كلمه من جهة المناقل

المبارك ابراهيم
04-11-2010, 12:04 AM
مع أنهم كلمات منطقه .....

علا فى كم كلمه كدا الله يعينى عليهم ... يا صاحبى

# الكاو

عندنا يمكن بنقول ليها الكاويه ... أو الكوايه وهى حديد بنسخنها فى النار نوسم بيها البهائم عشان الراعى وكت يجيبهم المغربيه يعرف يفرذن ويدى كل ذى حق حقه .... ( على الله اكون اتوفقت يا فرده )

# القِدْ

هو سيور من جلد وزمان اهلنا كانو بيوسرو بيها العناقريب ... وعنقريب القد ده ليه محل ثابت فى صدر البيت يعنى إلا تجيب ونش عشان تحركو

# القرمبع

الشى المهلهل .. الما نافع والبيعمل صوت ( قربعه على قول اهل الخليج ) وخاصة العربات ... يقول ليك ده سيارته قرمبعه

# الصُرار

قطع دلاقين بيعطنوها فى روث البهائم ويشدوها على ضراع الغنماية واللا النعجه عشان جنياتها ما يرضعوها ويصبحوا الشفغ بلا عشاء واللا شاى اللبن حق الصباح

#الصًرِيمة

الصريمه دى بنقول عليها الشكامة برضو وهى عود يربطوهو على طرفى حبل دباره أو اى حبل صغير ويدخلوهو فى خشم السخيل عشان ما يرضع أمه وبرضو خوفاً من بيات الجهال بلا عشا


# الخُرتاية

كيس من القماش يدخلوا فيه ضرعات البهيمه عشان برضو اللبن ما يروح هدراً وذكرتنى بنكته
زمااان كان الوليدات بيدخلوهم المدارس والولد أمه تخيط ليه باقى هدمه قديمه تسويها ليه شنيطه للمدرسه ... وكان اللبو عند شى يسويها ليه عند الترزى ... أها الوليد جابو ابوه من السرحه ودخلوا المدرسه .... اول مطيره نزلت جا اللبو وقال للوليد ارحك الزراعه بدت ... اها الوليد ما كضب خبر جاء للناظر وقال ليه : فندى أنا قنع هاك خرتايتك ...

# الوكًاي

الوكاى ده أظنو الحبل البيربطوا بيه البقره لما يجو يحلبوها ... عشان ما ترفس اللبن ويندفق ... هنا بقا البيت كلو يبت بلا عشاء والفطيره بتبقى مسيخه بلا لبن

# الرتيلة

والله عاد دى الله يسترنى معاها ... وقفت فيها كتير ... بس إتذكرت أنه عندنا حاجه قريبه منها الفرق بينها وبين كلمتك دى حرف " النون " يعنى بنقول الرتينه .... وهى مصباح كبير فيه قماشه من نوع خاص يكبوا فيها السبيرتو وكمان ليها تنك صغير يملوهو بالجاز ويشكوها ... ويولعوا فى الخيط ... وبق تبق ويطلع منها نور ..... فشر لمبات النايلون حقات اليومين دى

# الضٍريسة

نبات فيه بذرة مليانه شوك ... وبتقوم فى الخلا ... وكت تنشف أمانه ما بتعذب الوليدات ... طبعاً مطلوقين حفايا سااااااى والضريسه التقول مسلطه على الشفع .... دخلتنا البيوت الواحد يتشنقل على قفاهو ويمد كريعاتو لامه ... تجيب اللبره وتقعد تمرق ليه فى الضريسه ... ( بدون بنج طبعاً هههههههههه ) وهاك يا جرسه ...

# الجابية

الجابيه دى حفره تنحفر بين الشادوف والبحر تتملى مويه والناس تغرف منها بالشادوف وتسقى الزرع

# التقنت

ديل السرابات البين أب سته ومحروتات بالعرض عكس حراتة باقى الحواشه وغالباً بينزرعوا لوبا حلو عشان يغطى على الزرع وكمان فيه لوبا يا حلات بليلتو فى رمضان

# التًقاء

مكان نضيييف بيلموا فيه قناديل العيش ويدقوها يطلعوا منها الحب ... وممكن القمح برضو ... ويمكن مكان لم القطن كمان

# المُرواد

ده بقا حديده فى شكل مسمار يدخل فى المكحله ويطلع على طرفوا الكحل ... والنسوان يدخلوه بين الرموش و تمريره شمال وأخرى يمين وبصه فى المرايه ... وحلاتك يا كحيل العين ...

# الكِشكة

الكشكه دى ليها استعمالين .... واحده خاصه بالمريسه ودى بالجد معلوماتى فيها ميييح ... والتانيه الوسخ المتراكم فى كرعين العيال نقول على الشافع المهملاهو امو الجنا أب كشكشه ده كنايه على الوسخ

# الرًسنْ

سيور من الجلد مشبك بطريقه هندسيه ويدخل فى راس الجمل والركب يمسك اطرافه لتوجيه الجمل وبالنسبه للحصين والحمير نقول عليه اللجام


# اللًباب

سير من الجلد لتثبيت السرج على ظهر الحمار ويمكن يكون حبل برضو

# الزُمام

الزمام حليه من الذهب فى شكل دائرى ذى الدبله يلبسوهو الحريم فى نخريهن ... دلاله على العز والجاه ... والراجل المريش هو البيجيب لمرتو الزمام والرشم والحمد لله .... والدوبيت مليان بالغزل فى الزمام ....

# الــوِقاية

الوقايه دى بقا يمكن تكون مصنعه ومزركشه بالسكسك فى شكل دائرى يختو عليها الجبنه حقت الفخار أو الحديد ... والوقايه برضو ممكن تكون حته قماشه تلف بشكل دائرى وتوضع على الراس عشان يشيلوا فوقها صفيحة المويه أو أى ماعون يتخت على الراس

#الدِبليبة

هى الكسره اللقمه البارده ... بس لازم تكون كتيره ... وكمان تستخدم ايام المناسبات ويملحوها فى صحن كبير ويتحاوطوها الجماعه وهاك يا لقف

# الجقاجق.

هى السقط بلغة اهل الخليج أو الكمونيه بلغة السودانيين ... وهى خلطة المصارين والكرشه ويمكن الكبده والكلاوى وتتعمل ملاح ولا أحلى ... وبالمناسبه الكمونيه لو ما لقت مرا ايدا طااااااعمة وفنانه ما بتتأكل ولا بتنطاق ... يعنى الست اللهى بيقسيوها بطبخة الجقاجق ....


أهااا يا صاحبى كم من عشره ؟؟؟


والله يا الباشا أخوي ما قصرت لكن في حاجات طلعت فيها هيثومة!!!!

# ياحبيبنا الباشا ( الكاو) هو تيراب البصل,
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,
# الوكاي ( هو الحبل الذي يربط به خشم القربة) بتاع البقرة إسمه ( المحويت)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,
# الرتيلة وكنت خايف منها فعلا( هي النملة السوداء قرصتها حاااارة بتعض الأطفال البحبو يادوب
ودائما تلقاها مع الليان بتاع الموية.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,

ممتاز يا الباشا .
17 من عشرين وإنت الزيك مين. الباقي كله صاااااااااااااح.
والقرمبع وأم قرمبع هي الصرصور ( الككورش) ياناس الألفية التالتة.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,

المبارك ابراهيم
04-11-2010, 10:36 AM
ورح آ نجيض يلا كمان عشرين جديدة من الباشا تنعش الشباب في إنتظارك يابطل الفلم.

الباشا
04-12-2010, 12:15 AM
في حاجات طلعت فيها هيثومة!!!!

( الكاو) هو تيراب البصل,
الوكاي ( هو الحبل الذي يربط به خشم القربة)
الرتيلة ( هي النملة السوداء قرصتها حاااارة بتعض الأطفال البحبو
والقرمبع وأم قرمبع هي الصرصور ( الككورش) .


الكاو بنقول عليه مسيمس
الوكاى دى مابعرفها لانه عندنا ترامس وتلاجات :SnipeR (63):
الرتيله بنقول عليها الشحموطه
القرمببيه هى الصرصور عندنا


ولا يهمك العشرين تحت الإعداد .... بس راجى ود النعمه

وعدنى بعشرين عاتية .... وكان جرد بى بنزل عشرينى

وتسلم يا غالى

المبارك ابراهيم
04-13-2010, 11:28 AM
شكرا لهذا الوست الخفيف والظريف
مشى كتير وأنا جيت متأخر وما قدرت أكملو
يا ليت لو بوبت الكلمات والتعريفات في صفحة واحدة أو جدول
وبعد ما أكمل حا أرجع أشارك وهاكم الصورة دي
المشلعيب
http://dc04.arabsh.com/i/00365/i2g0c3frstpo.jpg


ونحن في إنتظارك يا بتاع المشلعيب وأكتب معاهو الكابدلو والحُقْ والسويبا. هسه خليت ليك في العشرين شنو؟؟؟؟

المبارك ابراهيم
04-13-2010, 11:32 AM
الكاو بنقول عليه مسيمس

الوكاى دى مابعرفها لانه عندنا ترامس وتلاجات :sniper (63):
الرتيله بنقول عليها الشحموطه
القرمببيه هى الصرصور عندنا


ولا يهمك العشرين تحت الإعداد .... بس راجى ود النعمه

وعدنى بعشرين عاتية .... وكان جرد بى بنزل عشرينى


وتسلم يا غالى


بعد إجتماع اللجنة وتوضيح الكلمات من قبلكم وقعت اللجنة علي منحكم النمرة الكاملة وقالت أن هذا الطالب حسن السيرة والسلوك وينقل للصف الرابع تفتح المدرسة بعد نتيجة الإنتخابات.
رائد الصف / الباشا.

الباشا
04-14-2010, 01:23 AM
ينقل للصف الرابع
تفتح المدرسة بعد نتيجة الإنتخابات.


طيب وكان البشير ما شال البرنجيه

أها الوسطى دى أمشى ليها كيفن

الباشا
04-14-2010, 01:30 AM
وبعد ما أكمل حا أرجع أشارك


ود النعمة

ها زول حكايتك شنو

علقتنا فوق مشلعيبك ده

وضربت الزوغه سااااى

دحين نحن راجينك

وعمك المبروك

أداك تلاته أربعه كلمات

إت باقى عليك تجيب السبعطاشر الباقيين

أها قصرنا معاك :0005:

عبد الرحمن الجعلي
04-14-2010, 10:34 AM
أستاذنا الباشا
حضور وإستزادة وإستمتاع..
كلام بلدي ما أروعك..
سلمت أيها الجميل
تحية التقدير

الباشا
04-14-2010, 08:53 PM
حضور وإستزادة وإستمتاع..
كلام بلدي ما أروعه..



اهلاً بود القبايل

إنت عارف يا عبدالرحمن

أهلنا الجعليين ديل أصحاب موروث ثقافى وحضارى مافى بتلو

دحين ياخوى نشحدك تجيب لينا عشرين خمسطاشر إن شاء الله عشر كلمات

من بيت الكلاوى ... يعنى من أقدم احياء شندى

وخلينا نقارن .....

وأهو إنت شايف ناس الجزيره يختلفوا فى لهجتهم

بين البحر والضهرا

فى انتظارك يا غالى




ود النعمه

عمك مو عاتقك طب

الباشا
04-16-2010, 08:43 PM
طيب ما دام الناس الطلبنا منهم كلمات ما عبرونا

نتوكل على الحى الدائم و نشحذ الذاكره

ونخش فى العاب زمان

واليكم عشرين من لهجتنا الجميله

أرحكاكم .... نلعب

ولالك ...... ولالك

شليل

شدت

قادو شن قاسك

كمبلت

السيجه

الكار

الطاب

دسوسيه

المنقله

التيوه

العيتنوبه

الدقل

الشخيط

الميس

البلى

الضراب

الفرده

البرنجى







*******


ود النعمه


عمك مو عاتقك طب

المبارك ابراهيم
04-17-2010, 12:25 PM
الباشا أخوي
أسعد الله صباحك.

إنتخابات وإنتهت
الناس دي مشت وين؟؟؟؟؟؟؟؟؟

المبارك ابراهيم
04-17-2010, 12:54 PM
طيب ما دام الناس الطلبنا منهم كلمات ما عبرونا


نتوكل على الحى الدائم و نشحذ الذاكره

ونخش فى العاب زمان

واليكم عشرين من لهجتنا الجميله

أرحكاكم .... نلعب

ولالك ...... ولالك

شليل
شليل لعبة تتم ليلا وخاصة في الأيام المقمرة


شدت
لعبة تخص الصبية دون البنات تقسم علي مجموعتين يعين فرد عروس تحمية مجموعته للوصول للميس.

قادو شن قاسك
الله أعلم

كمبلت
كمبليت أو كومبليت تعني كامل

السيجه
لعبة بالحجارة أو البلي أو نواة التمر لها جدول مربعات عادة يلعبها كبار السن زيك كده

الكار
لعبة عادة للبنات تلعب بطور الجمال الجاف قبل أن تتطور للحجارة والبلي

الطاب
خشب رفيع لتجبير الكسور يربط بشاش علي الكسر
والله أعلم

دسوسيه
لعبة للجنسين نسميها عسكر وحرامية يختبي تيم والتيم الآخر يبحث عنه

المنقله
لعبة عادة لكبار السن وهي قريبة من السيجة نفس المواد مع فارق اللونية والقوانين

التيوه
لعبة قريبة من اللعبة المشهورة الكريكت والتيوه تصنع من القماش والحبال في شكل كرة صغيرة قوية تضرب بالعصا لمسافات بعيده ليصل الفريق للميس

العيتنوبه
الصقرية صراع الصبيان

الدقل
عود يدق في الأرض لربط المواشي الصغيرة

الشخيط
خط يعمل للتحدي بين الصبية خط أحمر للتحدي ومن يتخطاه يجد التصدي والصراع أو قيام مشكلة

الميس
التاية مكان يحدد ليصل إليه لاعب التيوة

البلى
كرات صغيرة من الزجاج يلعب بها الصبية

الضراب
هو الحجم الكبير من البلي الذي يستخدمه اللآعب

الفرده
هو فردتك لتقسيم اللآعبين لفرقتين سميك

البرنجى
نوع من أنواع السجاير
والله أعلم







*******


ود النعمه



عمك مو عاتقك طب

هذا ما قدرنا عليه أخي الباشا أتمني أن أكون توصلت لبعض الإجابات الصحيحة.

الباشا
04-17-2010, 08:29 PM
[/color][/size]
هذا ما قدرنا عليه أخي الباشا أتمني أن أكون توصلت لبعض الإجابات الصحيحة.

المبارك أخوى

إنت قريت فى المسلمية

واللا كمبونى الخرطوم :SnipeR (46):

ولا حتى حق المرور المره دى ما جبتو

الحكاية شنو .؟

صعبه المره دى ؟؟!!

على كدا خلينى أنتظر شوية

المبارك ابراهيم
04-17-2010, 08:51 PM
المبارك أخوى


إنت قريت فى المسلمية

واللا كمبونى الخرطوم :sniper (46):

ولا حتى حق المرور المره دى ما جبتو

الحكاية شنو .؟

صعبه المره دى ؟؟!!


على كدا خلينى أنتظر شوية


في كمبوني يا حبيب إنت قايلني زيك إنت والقوس
كمبوني ياحبيب ونص الفصل بنات!!!!!!
تقول لي التيوة والكار نحنا في عهد أجدادنا القدماء .
كل سنة وإنت طيب ووين الغياب يا حبيب.

عبد الواحد محمد
04-18-2010, 02:07 AM
لا حول الله ..
او ماي قود ...
بالله جنس كبر واحد وقدم ما بعدو قدم ..
الناس دي من قدماء السودانيين ..
نحن في سستر اسكول ماكان عندنا لعب خشن وتيريبل وهوريبل بالشكل دا.

الباشا
04-19-2010, 09:35 PM
في كمبوني يا حبيب إنت قايلني زيك إنت والقوس

كل سنة وإنت طيب ووين الغياب يا حبيب.

موجووووود

يا دفعه

وكل يوم بدخل

بس بحاول اسجل فى حزب " girifna"

لقيتم فى اليو تيوب

بس مش عارف هم فى ياتو شارع !!!

وبعدين يا خوى القوس ده ما قرا كمبونى

علا فى فرع لليونتى unity فى كريمى

يعنى الحضانه والتمهيدى والروضه كلهن بداهن فى اليونتى

وأسعلو قول ليه زميلاتك ناس ستيلا و ماريا و كرستينا لوحن وصل وين ؟

ويديك العافيه

الباشا
04-19-2010, 09:41 PM
لا حول الله ..
او ماي قود ...
بالله جنس كبر واحد وقدم ما بعدو قدم ..


عبدالواحد

عليك الله كان اسمك " تامر " واللا " هيثم "

كان سويت شنو ؟؟


قلت لى سستر سكول ؟؟؟

وين بالظبط ؟ .... ما تقول لى دى الرواكيب الجنب سوق أم دفسو :SnipeR (63):

الباشا
04-27-2010, 11:48 PM
الباشا أخوي
أسعد الله صباحك.

إنتخابات وإنتهت
الناس دي مشت وين؟؟؟؟؟؟؟؟؟

إنتخابات وخلصت يا المبارك أخوى

أها تانى فى شنو ؟؟

الجنيات ديل عاملين فيها خرتوميين

والبيجى بى جاكى حيتهم بإحدى التهمتين

يا مخرف ذى حالاتنا

يا من أهل العوض

وفى الحالتين نتفخر

واللا إنت رأيك شنو ؟

المبارك ابراهيم
05-04-2010, 01:52 AM
إنتخابات وخلصت يا المبارك أخوى

أها تانى فى شنو ؟؟

الجنيات ديل عاملين فيها خرتوميين

والبيجى بى جاكى حيتهم بإحدى التهمتين

يا مخرف ذى حالاتنا

يا من أهل العوض

وفى الحالتين نتفخر


واللا إنت رأيك شنو ؟


الباشا أخوي والله ليك وحشة.
إنت ماعارف رأي من رأيك.
الخرف ما نا رافعين منو وناس العوض إيانا نحنا
ونحنا الساس ونحنا الرأس.
أظهر يا أخوي سيب النوم .

حلم الأماني
05-06-2010, 07:46 PM
طيب ما دام الناس الطلبنا منهم كلمات ما عبرونا


نتوكل على الحى الدائم و نشحذ الذاكره

ونخش فى العاب زمان

واليكم عشرين من لهجتنا الجميله

أرحكاكم .... نلعب

ولالك ...... ولالك

شليل

شليل وينو اكلو الدودو شليل وين راح اكلو التمساح
شدت

قادو شن قاسك

كمبلت

دي بعرفها تمااااااام ياما لعبناها زمان
بالطوب وكورة الشراب

السيجه

الكار

ياحليل زمن الكار وحفر الكار والحصحاص أو الساسوي

الطاب

دسوسيه

كان اسمها دس دس

المنقله

التيوه

العيتنوبه

الدقل

الشخيط

الميس

البلى

الضراب

الفرده

البرنجى







*******






باقي الحاجات دي ماعرفتها كانو بلعبوها الأولاد :icon27:

الباشا
05-07-2010, 04:34 PM
الباشا أخوي والله ليك وحشة.
أظهر يا أخوي سيب النوم .

إنت الليليك وحشه .... ومشكور يا دفعه


ونقول إن شاء الله

الباشا
05-07-2010, 04:43 PM
باقي الحاجات دي ماعرفتها كانو بلعبوها الأولاد :icon27:


كتر الف خيرك يا حلم الأمانى

كونى تعرفى 4 من 20

برضو إجتهاد

وما قصرتى يديك الف عافيه

وفعلاً معظم الألعاب حقت صبيان .... خناشير وكدا

لعبة الكار عندنا بنوتيه صرفه

أما الدسوسيه فمشتركة ويمكن المنقله لحد ما

وشكراً على محاولتك

نوارة البركل
05-07-2010, 05:48 PM
http://www.m5znk.com/up2/uploads/images/m5znk-8ebcaf6186.gif

الباشا الكبير


http://i32.tinypic.com/14wdqgx.gif

الباشا
05-07-2010, 09:41 PM
http://www.m5znk.com/up2/uploads/images/m5znk-8ebcaf6186.gif




http://i32.tinypic.com/14wdqgx.gif


أهلاً بالنواره " نوارة البركل "

يا ستى عمك موجووووود

بس إنتى المسجله غياب من البوست ده

آخر محاولاتك كانت مع صاحبى " عمر جبريل "

وتانى ما شفناك ولا سمعنا بأخبار حبيبنا ود الزعيم

وينو اليومين دى ؟ .... فى كريمى واللا فى الخرتوم ؟

تحياتى الكتيره ليه والاكتر لعيالك

ويديك الف عافيه

المبارك ابراهيم
05-24-2010, 06:02 PM
يا الباشا أخوي إنت مشيت وين؟؟؟
أخت ليك خترة ولا شنو؟؟؟
الجنيات الكانو بتلبوا زي المتاليب ديل مشوا وين؟؟
كدي أنحت مخك وجيب لينا إن شاء الله عشرة كلمات
في إنتظارك!!!!

الباشا
05-24-2010, 11:51 PM
الجنيات ديل .... مشوا وين؟؟


المبارك أخوى

كيف حالك لعلك طيب ؟

الجنيات عاوزين ليهم قاموس " راندوق " وده اخوك ماليه شغله فيه


وعشان خاطرك أهى عشرة فوق البيعه


الغباشه

الساموطى

البوقنيه

الملاصه

الصمبجوجه

الشيطه

اللبا

الربيت

الودك

الكَدَابه

المبارك ابراهيم
05-25-2010, 01:55 AM
المبارك أخوى


كيف حالك لعلك طيب ؟

الجنيات عاوزين ليهم قاموس " راندوق " وده اخوك ماليه شغله فيه


وعشان خاطرك أهى عشرة فوق البيعه


الغباشه

الساموطى

البوقنيه

الملاصه

الصمبجوجه

الشيطه

اللبا

الربيت

الودك


الكَدَابه


صباح الخير ياباشا
هسة أقوم أحلهن تقول لي أنت قريت في المسلمية ولا كمبوني؟؟
بصراحة في حاجات أنا ما عارفهن لكن بقول ليك العارفو والباقي بخليهو لي شاعر المنتدي وود المنابر وحلم الأماني.

الغباشة:
الروب بعد ما إهزوهو ويطلعو منو الفرصة يزيدوهو موية وحبة سكر تبقي غباشة من النوع أبو كديسة.
الساموطي:
أعتقد الشاي المدنكل البزبط الرأس تمام.
البوقنية:
نوع أو صنف من أصناف المريسة لكنه ما بسكر ليس لها تأثير كبير علي المخيخ.
الملاصة:
ماني متأكد إمكن هي المطالة إمكن دردمة عجينة بغلوها مع السمن إمكن العجينة الزايدة من شيطة الآبري.
الشيطة :
يمكن أن تطلق علي طرقة الكسرة الرهيفة ( القلع) أو الشيطة ما تبقي بالصاج من الكسرة اللقمة ( جافة)
اللبا:
لبن البقرة أو الغنماية أو النعجة أو الناقة الوالدة جديد لبناها في الأيام التي تلي الولادة بيكون مقطع ويتجمد بالحرارة ولذيذ أوي.الله ذكرتني ذكرتني حبيبي ذكرتني.
الربيت:
هو الشحم بتاع البهيمة بختوهو في الحلة لمن يسيح ويبقي زيت بيصبح زي الجبس الله لذيذ بيقرمش والزيت حقو بعد ما يتجمد يصبح إجابة السؤال القادم.
الودك:
هو زيت الربيت المتجمد وكنا نخت الودك في شقاق كرعينا أيام خوادة الترع في الشتاء ونحرقها بي جمرة ( طب) ياولد
الكدابة أو الكديبة:
هي الحشة الثانية لما تبقي من بقايا الحشائش من الحشة الأولي بنسميها المر.
أما الصمبجوجة دي صمبج بيها براك.
أتمني أن أمر في هذا الإمتحان ياباشا إنت ماعندك جوائز؟؟؟؟؟؟؟
ده أستاذ شنو ده المفلس!!!!!

عبد الواحد محمد
05-25-2010, 07:40 AM
الباشا والمبارك ..
مبروكين ان شاء الله وصبحاحاتكم سعيدة ..
قلنا الندخل على جمعية قدماء السودانيين دي ونشوف حاصل شنو ..

الشيطه




الربيت

الودك
كنت ساكن مرة مع طبيب شايقي من قاطني منطقة حوش بالجزيرة وكان شخصا كثير الملاحظات عن اللغات العامية ولما كنت انا كردفاني وهو شايقي فقد كان يسالني كثيرا عن بعض مفردات اهل الشمال ومقابلها عندنا في الغرب الاوسط ..
ذات مرة ذكر الشيط ولم اكن اعرف ماهو الشيط وعندما شرحه ابتسمت عريضا فسالني عن اسمه عندنا فقلت له نحن نسميه (القنقو ) فضحك عاليا وقال لي والله اهو الاسم ولا بلاش والله ابدعتو يا عبدالواحد ورفع ابهامه الى الاعلى تعبيرا عن مطابقة الاسم للمسمى ..
اما الربيت فله قصته المشهورة في كل السودان عن الشخص الذي قهمه الربيت وهي قصة معروفة ولكن يبدو ان اصلها من الشمال ..
ما قصة الودك فهي تحكي عن الرجل الذي كان لا يشبع فتآمر عليه الجماعة بان يطعموه الودك قبل الوجبة حتى لا يأكل لهم طعامهم بشراهته ..
ولكن يبدو أن الرجل لا تنسد له نية عن طعام فكان يأكل الودق ومن ثم ينقلب على الطعام فياكله وكان شيئا لم يحدث ..
يئس اصحابنا من رجلهم وكفوا عن تقديم الودك له فخاطبهم في اليوم التالي قائلا : وين البتاع البيفتح لي نيتي داك )
الحقي زولك دكتورة نادية الزول دا شغلو نفسيات ولا جن ولا اندراوة ؟؟لو الزول مابيشبع بتعملو ليهو شنو ؟؟؟؟
ود المبارك انت البحر حفروهو سنة كم ؟؟
الباشا انت حضرت اعلان الاستقلال من داخل البرلمان ؟؟

الباشا
05-26-2010, 01:49 AM
صباح الخير ياباشا
هسة أقوم أحلهن تقول لي أنت قريت في المسلمية ولا كمبوني؟؟
بصراحة في حاجات أنا ما عارفهن لكن بقول ليك العارفو والباقي بخليهو لي شاعر المنتدي وود المنابر وحلم الأماني.

الغباشة:
الروب بعد ما إهزوهو ويطلعو منو الفرصة يزيدوهو موية وحبة سكر تبقي غباشة من النوع أبو كديسة.
الساموطي:
أعتقد الشاي المدنكل البزبط الرأس تمام.
البوقنية:
نوع أو صنف من أصناف المريسة لكنه ما بسكر ليس لها تأثير كبير علي المخيخ.
الملاصة:
ماني متأكد إمكن هي المطالة إمكن دردمة عجينة بغلوها مع السمن إمكن العجينة الزايدة من شيطة الآبري.
الشيطة :
يمكن أن تطلق علي طرقة الكسرة الرهيفة ( القلع) أو الشيطة ما تبقي بالصاج من الكسرة اللقمة ( جافة)
اللبا:
لبن البقرة أو الغنماية أو النعجة أو الناقة الوالدة جديد لبناها في الأيام التي تلي الولادة بيكون مقطع ويتجمد بالحرارة ولذيذ أوي.الله ذكرتني ذكرتني حبيبي ذكرتني.
الربيت:
هو الشحم بتاع البهيمة بختوهو في الحلة لمن يسيح ويبقي زيت بيصبح زي الجبس الله لذيذ بيقرمش والزيت حقو بعد ما يتجمد يصبح إجابة السؤال القادم.
الودك:
هو زيت الربيت المتجمد وكنا نخت الودك في شقاق كرعينا أيام خوادة الترع في الشتاء ونحرقها بي جمرة ( طب) ياولد
الكدابة أو الكديبة:
هي الحشة الثانية لما تبقي من بقايا الحشائش من الحشة الأولي بنسميها المر.
أما الصمبجوجة دي صمبج بيها براك.
أتمني أن أمر في هذا الإمتحان ياباشا إنت ماعندك جوائز؟؟؟؟؟؟؟
ده أستاذ شنو ده المفلس!!!!!

عفيت منك يا المبارك

زول جزيره أصيييييييييييل


أصحح ليك حاجه بسيطه جداً

الساموطى

إنت صاح بس أزيد عليها أنه ..... شاى اللبن الصرف يعنى مافية قطرة موية وكمان بياخد ليه غليه زياده وكان بقى مقنن ... يا لطيف يا لطيف ..... يسطل عديييل



الملاصه

هى موية العجين بنديها للبهايم تشربها وخاصة بهائم اللبن

الكدابه

دى بقى لهجة ناس البحر .... وهى ماده شمعيه سوداء حالكة السواد توجد على اشجار السنط

يعنى لهجتك ميه إلا كدابه

المبارك ابراهيم
05-26-2010, 02:07 AM
عفيت منك يا المبارك


زول جزيره أصيييييييييييل


أصحح ليك حاجه بسيطه جداً

الساموطى

إنت صاح بس أزيد عليها أنه ..... شاى اللبن الصرف يعنى مافية قطرة موية وكمان بياخد ليه غليه زياده وكان بقى مقنن ... يا لطيف يا لطيف ..... يسطل عديييل



الملاصه

هى موية العجين بنديها للبهايم تشربها وخاصة بهائم اللبن

الكدابه

دى بقى لهجة ناس البحر .... وهى ماده شمعيه سوداء حالكة السواد توجد على اشجار السنط


يعنى لهجتك ميه إلا كدابه


أصيل إنت يا المؤصــل للآصالة
من صباك معــروف بالشطارة
وفي منتدانا بنــيان عالي المنارة
والبعرفك عمرو مابعرف خسارة

الباشا
05-26-2010, 02:13 AM
انا كردفاني وهو شايقي فقد كان يسالني كثيرا عن بعض مفردات اهل الشمال ومقابلها عندنا في الغرب الاوسط ..
ذات مرة ذكر الشيط ولم اكن اعرف ماهو الشيط وعندما شرحه ابتسمت عريضا فسالني عن اسمه عندنا فقلت له نحن نسميه (القنقو ) فضحك عاليا وقال لي والله اهو الاسم ولا بلاش والله ابدعتو يا عبدالواحد ورفع ابهامه الى الاعلى تعبيرا عن مطابقة الاسم للمسمى ..

ود المبارك انت البحر حفروهو سنة كم ؟؟
الباشا انت حضرت اعلان الاستقلال من داخل البرلمان ؟؟

أهلييين بالرائع عبدالواحد


وينك يا راجل .... افتقتك كثيراً

شوف بقا يا عبدالواحد ... إنت جيتنى فى جرح

وهدفى من البوست ده تعلم كافة اللهجات السودانيه يعنى الحكايه ما حكاية جزيره وبس

عشان كدا عاوزك تبدأ معاى من العشره ديل وكان سخيت ورجعت لى وراء أكون شاكر فضلك

عاوزك تمسك الشرح حق عمك النبارك ( كدا نحن بننطق اسمه المبارك أحياناً واللا مش كدا يا عمده ؟ )

وبالمناسبه هو كان عنده قفيفه بيشيل بيها التراب حق حفر البحر .... لكن كان سعلتو بتين

من كترة ما خرف يمكن أقول ليك .... البارح .......

شرح عمك المبارك ده ميه فى الميه للتسعه والكدابه حقت البحر عمك شرحها ليك .... دحين بدورك تمسكهن كلمه كلمه وتجيب لينا المرادف لها من لهجة أهلنا فى كردفان الغرة ..... أحلى لهجه وبموت فيها هى لهجة أغانى الرائعين المبدعين الفنانين عبدالحمن عبدالله وعبدالقادر سالم

وفى إنتظارك يا رائع

هو الاستقلال ده مش كان مطعم فى السوق العربى ؟؟؟

بتذكر أكلت فيه ... جقاجق وحوت :oo5o.com (27):

الباشا
05-26-2010, 02:15 AM
أصيل إنت يا المؤصــل للآصالة
من صباك معــروف بالشطارة
وفي منتدانا بنــيان عالي المنارة
والبعرفك عمرو مابعرف خسارة

إت يا عسل لسه صاحى ؟؟؟

أخوك عنقالى على أم طقوق

إت مالك ؟؟ برضو العيال فاكنك عكس الريح ؟

الله لينا وعيشة السوق نحن .....

المبارك ابراهيم
06-01-2010, 03:13 AM
إت يا عسل لسه صاحى ؟؟؟


أخوك عنقالى على أم طقوق

إت مالك ؟؟ برضو العيال فاكنك عكس الريح ؟


الله لينا وعيشة السوق نحن .....


زول مامعاهو أولادو كيفن بجيهو النوم
مع هموم الغربة من وين يجــيك النوم
العــيون مقزعة حتي لو بلعت الثوم
يا حليل الوالدة اللي الصلاة بتصحي القوم

الباشا
06-02-2010, 10:19 PM
زول مامعاهو أولادو كيفن بجيهو النوم

يا حليل الوالدة اللي الصلاة بتصحي القوم


كلامك صاح يا المبارك اخوى ...

والله عويناتنا طالقات النوم

الله يخلى لينا أمهاتنا ويكيفهن شر المرض والكبر

ويرحم أمهاتنا القابلوا رب كريم ... ويسكنهم فسحات جناته


وينك ليك زمن ... مسجل غياب بى جاى ؟؟؟

تحيلتى للعيال .......... ولو فى الخيال:SnipeR (69):

المبارك ابراهيم
06-26-2010, 12:31 PM
كلامك صاح يا المبارك اخوى ...

والله عويناتنا طالقات النوم

الله يخلى لينا أمهاتنا ويكيفهن شر المرض والكبر

ويرحم أمهاتنا القابلوا رب كريم ... ويسكنهم فسحات جناته


وينك ليك زمن ... مسجل غياب بى جاى ؟؟؟


تحيلتى للعيال .......... ولو فى الخيال:sniper (69):


الحبيب الغالي الديمة شاغل بالي
وأحشني والله وخاصة بعد أن منً الله علينا بي شوفتك ياغالي
أظهر يا أخي رغم أنني أعلم أن ظروف العمل شاغلاك فقط أدينا طلة يا حلو!!!!!!

بركلاويه
06-27-2010, 11:36 AM
السلام عليكم

أولادنا ناس الشهادة العربية
كتير من المرات بتلقوا كلام وما بتفهموه
ومرات ما بتلقوا زول تسعلوه
وكان شفتوا عمكم فدياس سمى حجوته حجوة أم ضبيبينه
السعال هنا أم ضبيبينه دي شنو؟ ولا تلقاكم الحجوه زاااااته ما سمعتوا بيها ولا عارفين معناته شنو

أها عايزين هنا نوريكم كلام أعمامكم ديل ناس عمكم فدياس
وناس عمكم الباشا وعمكم القوس وعمكم ود المنابير وعمكم أبوإيثار وعمكم أبوسيده
وغيرهم من أعمامكم الحلوين ديل وأي سعال في كلام حبوباتنا ولا جدودنا الذكرنا أساميهم ديل
تجوا تسعلوا منو هنا

يلا نقول بسم الله ونبدأ بي حجوه معناها شنو


محسنكو ازيك وصباحاتك صباحات الهنا
بالمناسبة تعال راجع طولت الغيبة
وحجوة ام ضبيبينة انتهت زمان
يبقى العودة واجب منتدى

تحياتي

حنونة الدلوعة
06-30-2010, 12:17 AM
[CENTER]بسم الله الرحمن الرحيم
الصلاة والسلام علي خير المرسلين
من ما خشيت لي كم زمن كدا
ما خليت لي ركن في المرافئ ما دخلت قريت لي موضوع موضوعين كدا
والله محل ما تقبل تلقى حاجات روعة وابداع ما فيش كلام
بس لاقتني كلمة كدا غلبتني عدييييييييييل كدا
[COLOR="Red"][SIZE="7"]نفاج
يا ربي الكلمة دي شنو
معناها شنو
قاصدين بيها شنو
طبعا بعد ما قريتا في كم حتة كدا
فهمت المعني قاصدين بيهو شنو
بس كان نفسي اعرف الكلمة دي بالظبط جات من وين
قمت طوالي جري على ماما
يا حجة والله دايرة اسالك من كلمة كدا
اها يا بتي قولي
صاحبتكم ما عرفت تقرا الكلمة
قلت ليها غايتو هي ن فا ج
لكن بقروها كيف ما عارفة بالضمة بالفتحة ما بعرف
طيب يابتي قول لي الكلام المعاها شنو
طبعا ما قدرت اشرح ليها منتدى وكلام زي دا
قلت غايتو حاجة كدا زي كلام سر - بيني وبينك - كلام كدا بالجمبة طبعا دا حسب فهمي بعد روحي طلعت وعرفت القاصدين بيها شنو
قامت قالت لي نَفَّاج بالشدة يعني فتحة زي شباك صغير بين بيتين في البيوت الكانت زمان (يا حليل زمان) الكلام دا طبعا كلام الحجة وغالبا كانت بتكون في المطبخ واحدة دايرة ليها حبة شطة ملح ويكة الخ الخ دا غير طبعا الونسة وشمارات الحلة
المهم الخلاصة
بالجد حزنت على حالي يعني كلمات زي دي ما عارفاها _ ما تقولو دايرة تعمل روحا بت صغيرة وما عارفة حاجة _ ابدا والله كبيرة وبي وليداتي بس للاسف شهادة عربية وحاجات كتيرة كدا في الثقافة السودانية فايتة علي دا غير الامثال والحكم وحاجات تانية حامياني
واكيد انا ما براي في ناس كتير زينا بالذات ناس الخرطوم ديل والناس العايشين برة السودان الا من رحم الله، قمت قلت في نفسي يا ريت لو نقوم نعمل لينا بوست كدا فيهو الكلمات الحلوة دي القربت خلاص تروح والامثال القديمة الناس ما عارفينا ونقوم نكتبا هنا
رايكم شنو؟؟؟؟ انا ببدا ليكم لو الموضوع لقى صدى
نفااااااااااااااج
طبعا بقوم جارية لأمي – قال شهادة عربية قال - :oo5o.com (31):

عمار حبة
06-30-2010, 10:37 AM
حنونه الدلوعه
لك كل كلمات قواميس الترحاب ومعاجم الفرحة بتفاعلك ونشاطك..
من حقنا على تلك الظروف أن نسعى لمعرفة مافاتنا..
أؤيد فكرتك بالرغم من أن مثلها قد أتى مسبقاً ولكنها كانت بشكل معمم
أو بشكل مختلف ومايميز فكرتك حسب ما أذكر أن اطارها محدد..
وياريت لو أتيتى بمفردة ليستفيض الآخرون فى تفسيرها..


نفاج,,,,
فى هنا عمك كبييير كدا اسمو ابو ايثار وواحد صغيروووونى اسمو العاقب
ديل عارفين اى نفاج اقصد كلمة طايره بس خليهم يجو هنا,,,,


حنونه
كل ورود الصباح ونجوم الأماسى الحالمة مهداة لك

البعد الخامس
06-30-2010, 12:27 PM
مرحبا بك حنونه

كدى اول حاجه ورينا شهاده عربيه من وين ؟

ما تقومى تطلعى لينا شهاده عربيه من تمبول

قال شهاده عربيه عمرك كلو عديتيهو اكل شيط

اها شيط دى كيف معاك ؟

عيون المها (انامل انثى)
06-30-2010, 03:57 PM
[center][color=blue]

طبعا بقوم جارية لأمي – قال شهادة عربية قال - :oo5o.com (31):
[center][/center

]



حنونه الدلوعه
اها اااااااااااااااااااااااااااااااااااااااااا
دى ذاتو البجيب لينا الكلام
وشاهد شاهد من اهله
ناس الشهاده العربيه مالهم
غايتو انا شهاده عربيه بس بعيد عنك ميد ان جوه
بعرف ومولوده بسنوني


حنونه العسل
حبابك والله وفكره جميله
سيري ونحن وراءك

حنونة الدلوعة
06-30-2010, 11:28 PM
حنونه الدلوعه
لك كل كلمات قواميس الترحاب ومعاجم الفرحة بتفاعلك ونشاطك..
من حقنا على تلك الظروف أن نسعى لمعرفة مافاتنا..
أؤيد فكرتك بالرغم من أن مثلها قد أتى مسبقاً ولكنها كانت بشكل معمم
أو بشكل مختلف ومايميز فكرتك حسب ما أذكر أن اطارها محدد..
وياريت لو أتيتى بمفردة ليستفيض الآخرون فى تفسيرها..


نفاج,,,,
فى هنا عمك كبييير كدا اسمو ابو ايثار وواحد صغيروووونى اسمو العاقب
ديل عارفين اى نفاج اقصد كلمة طايره بس خليهم يجو هنا,,,,


حنونه
كل ورود الصباح ونجوم الأماسى الحالمة مهداة لك

عمار حبة

شكرا على المرور الجميل والتشجيع :thumbup:

وانشا الله ننفذ اقتراحك ونفيد ونسفيد

من خلال البوست دا بوجه دعوة خاصة للاعزاء أبو إيثار و العاقب للمشاركة معنا

كل التحايا العطرة لك

حنونة الدلوعة
06-30-2010, 11:36 PM
مرحبا بك حنونه

كدى اول حاجه ورينا شهاده عربيه من وين ؟

ما تقومى تطلعى لينا شهاده عربيه من تمبول

قال شهاده عربيه عمرك كلو عديتيهو اكل شيط

اها شيط دى كيف معاك ؟

البعد الخامس

يا ريتني كنت شهادة عربية من تمبول :stop:

ما كنا دخلنا في جنس المحن دي

والشيط ما بكذب عليك اكلنا اكل

ياربي شيط دي شنو

كدي يا جماعة يدكم معانا نشوف الكلمة دي

شكرا لك على المرور

لك كل الود والتقدير

حنونة الدلوعة
07-01-2010, 01:47 PM
حنونه الدلوعه
اها اااااااااااااااااااااااااااااااااااااااااا
دى ذاتو البجيب لينا الكلام
وشاهد شاهد من اهله
ناس الشهاده العربيه مالهم
غايتو انا شهاده عربيه بس بعيد عنك ميد ان جوه
بعرف ومولوده بسنوني


حنونه العسل
حبابك والله وفكره جميله
سيري ونحن وراءك
عيون المها

يسعد مقيلك

اسا انا فرحت قلت لقيت لي فردة تساعدني وتشد من ازري

تجي تقول لي بسنوني

طيب هاك يا ام سنون ورينا شيط دي شنو

يا مقرمة:0005:

شكرا ليك كتير على المرور
خالص التحايا والتقدير

بركلاويه
07-02-2010, 09:53 AM
حنونة الانيقة
لكي التحية وكل الاحترام

ولعمنا الباشا على هذا الحضور المفيد والثقافة الرائعو بكل الوانها

وتحياتي لكما وخالص ودي

بركلاويه
07-02-2010, 10:41 AM
عمرابي يا جميل

والله الذي لا غيره
اني اسمتعت جدا بهذا البوست ...
وصدقني كثير من هذه المفردات ضائع على وتمنيت ان تكون هذه القصيدة معلقة حتى
اتناول مفرداتها معك
انت انسان راقي جدا
واظنك لو ما مساعدة المبدع كنت طفشت جزاهو الله خير
ولكني جد سعيدة بحضورك المميز جدا
ولعلني طلبت مساعدة من الدمام ابو ايمن
ولكن مرجعي في المفردات هذه عندو امتحانات

لك شكري اخي

والتعب والعذاب ده كلو:SnipeR (79):
والشباريق تطلع الفتحات الكانت بتكون فى البرندات زمان بدون شبابيك:SnipeR (15):

قايتو أهلنا ديل ناس بعقدو الامور بشكل
اسع مالا الشبابيك سوت شنو؟؟

عمرابي
شكرا على اثراء معلوماتي
وشكرا على طولت بالك
واذهب وانت حر



أي نسيت مافي حاجة زي دي تاني



عمرابي ..... اخي ابو ايمن اين انتم
من هذا الابداع

جمعة مباركة عليكم:oo5o.com (25)::oo5o.com (25)::oo5o.com (25):

نوارة البركل
07-02-2010, 11:39 AM
نحن هنا فقط لطرح الأسئلة ...


وشايفاك انت ونوارة عمرابي الحنكوش ماشاء الله عليكم

وتسلم يا أبوي ايمن اخوي
وما عدمناك
سؤال ليك
ممكن يوم تجي كلمة يغلبك تفسرا

تحت تحت كده يا نوارة الناس ديل قشرتي بيهم عفيت منك ...:SnipeR (64):

نجي للأسئلة
يقول ليك
موت الضان ...
وأدب المائح ...
وأخوي الكبير كان بقول للشفع بأدبكم

أدب الكلاب في تونس


بركلاوية الله يطراك بالخير
بالجد ابو أيمن وين والباشا وعمرابي
وشلة الحناكيش والمخرفين
البوست دا جميل ولازم يستمر للتوثيق
وما زلنا بصدد تعريف هذه المصطلحات ..
ألحقنا يا أخوي عبد الواحد الجماعة زاقوا من البوست دا
همتك معانا ..
موت الضان .......
ادب الكلاب في تونس .....
أدب المدائح ...
بركلاوية معليش انتي قلت ما فيها يا أختاه
:SnipeR (45)::icon29: دقسة حلوة مع جمعة مباركة

البعد الخامس
07-02-2010, 12:29 PM
محسنكو تر بضم التاء لا جاى

القريشابي
07-03-2010, 08:55 PM
تحياتي للجميع

ولاعمامنا الغالين الباشا والمبارك ابراهيم
وحقيق البوست عجبني جدا وحضرت لي ورقة وقلم ... مليت الصفحة زُت كلمات قلت اجي اتجدع بيهن علي الجماعة تربية الرياض والبندر
علا لقيتكم يا الباشا والمبارك عليكم جنس قُدم هههههههههه
غايتو بفتش ليكم كم واحدة كدا قالوا القحة ولا صمة الخشم
طبعاً المسميات قد تختلف من منطقة لأخري ... ونحن عندنا الكثير من المسميات في مناطق الجعلين وقد تكون معروفة في مناطق اخري باسماء أُخر


اها هاكم ديل ونشوف عرفتكم

الكُنُش
الكنتوش
الخُمارة
القلابة
النجامة
الكجامة
المسلة
الفازقية
التاية
الشاية
الاربل
الكوديق
الكشمبير
اللداية
الجاغوص
الباطوس
الدير
المُطالة
الكُلّيقة
الكرنق
الكدمبس
الكَرَب
الكاويقة
السندقيقة


اها بعد ترجوني الحلول
بجيكم راجع

المبارك ابراهيم
07-03-2010, 10:40 PM
تحياتي للجميع


ولاعمامنا الغالين الباشا والمبارك ابراهيم
وحقيق البوست عجبني جدا وحضرت لي ورقة وقلم ... مليت الصفحة زُت كلمات قلت اجي اتجدع بيهن علي الجماعة تربية الرياض والبندر
علا لقيتكم يا الباشا والمبارك عليكم جنس قُدم هههههههههه
غايتو بفتش ليكم كم واحدة كدا قالوا القحة ولا صمة الخشم
طبعاً المسميات قد تختلف من منطقة لأخري ... ونحن عندنا الكثير من المسميات في مناطق الجعلين وقد تكون معروفة في مناطق اخري باسماء أُخر


اها هاكم ديل ونشوف عرفتكم

الكُنُش : المفراكة الكبيرة البعوسو بيها العصيدة
الكنتوش: من الفخار بغلوا فيهو اللبن
الخُمارة: حبة عجين خميرة بكبوها فوق العجين الفطير
القلابة: في قلابة شرك للطير وفي قلابة للكانون الجمر
النجامة: النجامه تستخدم في زراعة البصل
الكجامة: بقلعوا بيها حطب القطن
المسلة: بخيطوا بيه الشوالآت
الفازقية: الله أعلم
التاية: مكان يرجع ليهو ناس المشاريع زي سكنهم ( ميس)
الشاية: البرمندي أو المرمندي أو الوتد تربط فيه الشاه وغيرها.
الاربل: الله أعلم
الكوديق: الله أعلم أعرف الكوريق
الكشمبير: الله أعلم
اللداية: حجار أو طوب توضع للنار للطهي
الجاغوص : الله أعلم
الباطوس: الله أعلم
الدير: حبل من توب أو ملاية
المُطالة: حاجة كده ليها علاقة بالآبري وتغلي في السمن
الكُلّيقة: حزمة القصب
الكرنق: بيت أو غرفة من القش
الكدمبس: الله أعلم
الكَرَب: الله أعلم
الكاويقة: بامية جافة لاتصلح للطبخ تجفف لكي تحول إلي بدرة.
السندقيقة: الله أعلم


اها بعد ترجوني الحلول

بجيكم راجع


القريشابي إنت وكت بتعرف ده كله ( إنت عمي وعم الباشا يا أخوي)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,
ويا أخوي أنا بقول ليك البقدر عليهو والباقي بخليهو لي أخوي الباشا.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,
آها قصرت معاك يا قريشابي؟؟؟؟؟

عمرابى
07-04-2010, 01:23 PM
ما زلنا فى انتظار من يفتينا فى
كلام الطير فى الباقير
أدب المدائح
أدب الكلام فى تونس

فيها جايزة رايكم شنو؟؟

القريشابي
07-04-2010, 03:55 PM
القريشابي إنت وكت بتعرف ده كله ( إنت عمي وعم الباشا يا أخوي)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,
ويا أخوي أنا بقول ليك البقدر عليهو والباقي بخليهو لي أخوي الباشا.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,
آها قصرت معاك يا قريشابي؟؟؟؟؟

ما قصرت تب يا المبارك ان شاء الله تتبارك
يعني ممكن نقول عليك جبت 10 من 20
بس في حاجات انا بقصد بيها شي تاني وقد يكون اختلاف الامكنة عمل اختلاف
يعني قد يكون الاسم واحد لكن المقصود مختلف
اها منتظرين الباشا يجي يجيب باقي الحاجات وبعدها نشوف الحاصل شنو

المبارك ابراهيم
07-04-2010, 08:12 PM
ما قصرت تب يا المبارك ان شاء الله تتبارك

يعني ممكن نقول عليك جبت 10 من 20
بس في حاجات انا بقصد بيها شي تاني وقد يكون اختلاف الامكنة عمل اختلاف
يعني قد يكون الاسم واحد لكن المقصود مختلف

اها منتظرين الباشا يجي يجيب باقي الحاجات وبعدها نشوف الحاصل شنو


الحمد لله المرور أخير من الإسم الفسل!!!!
بركة الما قدينا شهادة.
المهم بنات أعمي ما يقولن المبارك سقط
شكرا علي إبداعك ومنتظرين حاج الباشا!!!!

المبارك ابراهيم
07-07-2010, 11:42 AM
القريشابي وصاحب الدار
يا أحباب طـــــال الإنتظار.
,,,,,,,,,,,,,,,,,,,,,,,,,,
ألف تحية لكم أظهروا وبانوا ياشباب.

عمرابى
07-07-2010, 01:01 PM
ود ابراهيم قلنا نجى نساعدك شوية شايف الباشا غائب
الاربل: حاجة اكبر من الطورية يستخدموها فى رفع الجداول
الكوديق: جدول بحفروا ويوصلوا من البحر مباشرة عشان البوابير تسحب منو الموية
الكشمبير: البعلقوا فيه السعن

المبارك ابراهيم
10-01-2010, 08:01 PM
ياأخوي الباشا أووووووووووووووووك حسي إنقرش سامعني ؟؟؟؟؟؟؟؟؟؟؟؟؟؟
كل سنة وإنت طيب مشتاقين يا أخوي أظهر وبان عليك الأمان.
إشتقنا ليك ولكلماتك نتمني عودتك بالسلامة.
وإذا جيت الرياض جيب لي معاك ( نعلات وكرباج من باب شريف والمرا قالت دايره ليها كتوش وحُقْ جيبهم معاك)

عمرابى
12-26-2010, 01:07 PM
وهاكم دي مقشرة منقولة من شبكة حضرموت العربية :


يسلم لي خال فاطنة
ليكم بلالي،البدرج العاطلة

الناظمة اسمهاام فاطنة(فاطمة تنطق بالنون مكان الميم في الريف السوداني) وهي تدعو الله ان يحفظ اخوها ذخرا لهاو لأبنتها فاطنه.
ليكم بلالي: جملة إعتراضية تكثر في الشعر الشعبي السوداني، كناية عن ان الممدوح يرفع المعاناة عن الآخرين، وترتبط المعاناة في كثير من صور الشعر الشعبي السوداني بالجفاف و العطش. بلالي: لعلها من بل الريق. العاطلة: البهيمة المكسورة الرجل وعندما يحصل ذلك فإن صاحبها يوثق الرجل المكسورة بجبيرة ويساعد البهيمة في رفق على المشي وقد انتقل هذا التشبية من عالم الحيوان إلى عالم الانسان و يعني ان خال فاطنة الذي يرفع المعاناة عن البهيمة المصابة يشد ايضا من ازر من لا ولي له ولا يملك وسيلة يكسب بها قوتة.

اب كريق في اللجج
سدر حبس الفجج
عشميق حبل الوجج
انا اخوي مقلام الحجج

اب كريق:التمساح، اللجج:مفردها لجة وتعني الماء العميق. سدر:صدر،اي نهض بصدره كناية عن تصدر مواجهة الخطر اي ليس هناك من يواجه الخطر قبله. حبس:منع. الفجج:الأمكنة كناية عن كل الجهات مهما بعدت المسافه. العشميق: المادة النسيجية التي تغلف ساق النخلة وتصنع منها الحبال في السودان. حبل الوجج: الذي يضفر ضفرا من هذه المادة. مقلام الحجج:من يبطل اي حجة او ذريعة مدعاه.

ياخريف الرتوع
اب شقة قمر السبوع
فوق بيته بسند الجوع
ويا قشاش الدموع

خريف الرتوع: الكثير المطر بحيث ترتع في حشائشه البهائم. اب شقة قمر السبوع:القمر يكمل يومه السابع ويشق السحاب ليطل من بينها، يسند الجوع: اي ان الجائع يجد سندا لسد رمقه في بيت خال فاطنة وهو كناية عن الكرم. قشاش الدموع: الذي يهون على المنكوبين و يمسح دموعهم.

يسلم لي خال فاطنه.......
Alhysser--------------------------------------------------------------------------------

تخريمة لبركلاوية والقوس :
يبدو أني لدي مشكلة في الرسائل الصادرة فقد رديت على رسالتين للقوس يبدو انها لم تصل لأني لم أجد لها اثراً في الرسائل الصادرة :
رقم جوالي الجديد بعد سرقة الأول :

0556845567

الأخوة الكرام الليلة عرفت ليكم (خال فاطنة )ده منو وقلت ما أنوم بالمعلومة براى نوريكم ليها
تدفعوا حاجة بالله.
المعلومة كما هى مأخوذة من عمنا بابكر أمين نقد الله
فى بارا المدينة المشهورة استوطن عدد كبير من أهلنا البديرية والركابية والجوابرة
الذين ذهبوا إليها من أرض الشمال وهذه صلة معروفة وموثقة ، قبل معركة شيكان
بعدة أعوام غارت مجموعة من الأفراد على ( أسحف ) عاصمة الجوابرة بقصد السرقة
والتهب وكانت تتبع إداريا لبارا ، وقد قام الأمير النور عنقرة قائد حامية بارا وفرسانه
بالتصدى لهم , وقد رأى النور ضرورة إرسال النساء والأطفال إلى بارا تأمينا لحياتهم ،
وكانت المسافة مشيا على الأقدام تستغرق ضحوة كاملـة ، واسندت هذه العملية للفارس
نقدالله ود عمر الركابى فقاد الفوج متحملا المسئولية وكانت النساء من المترفات لا يستطعن
السير إلا بمشقة فصبر عليهن ولم يستعجلهن حتى أوصلهن لمدينة بارا سالمات ، فصار مضرب
المثل فى الشجاعة والصمود والثبات .
تغنت له أم كثوم بت جابر محمد عبدالرازق ( من الجوابرة ) وأرخت له بذكر ابنة أخته الصغيرة
فاطمة , وسيف هذا الفارس لا يزال عند أسرته موجود إلى الآن .

تحياتى

نوارة البركل
12-26-2010, 05:26 PM
الأخوة الكرام الليلة عرفت ليكم (خال فاطنة )ده منو وقلت ما أنوم بالمعلومة براى نوريكم ليها
تدفعوا حاجة بالله.
المعلومة كما هى مأخوذة من عمنا بابكر أمين نقد الله
فى بارا المدينة المشهورة استوطن عدد كبير من أهلنا البديرية والركابية والجوابرة
الذين ذهبوا إليها من أرض الشمال وهذه صلة معروفة وموثقة ، قبل معركة شيكان
بعدة أعوام غارت مجموعة من الأفراد على ( أسحف ) عاصمة الجوابرة بقصد السرقة
والتهب وكانت تتبع إداريا لبارا ، وقد قام الأمير النور عنقرة قائد حامية بارا وفرسانه
بالتصدى لهم , وقد رأى النور ضرورة إرسال النساء والأطفال إلى بارا تأمينا لحياتهم ،
وكانت المسافة مشيا على الأقدام تستغرق ضحوة كاملـة ، واسندت هذه العملية للفارس
نقدالله ود عمر الركابى فقاد الفوج متحملا المسئولية وكانت النساء من المترفات لا يستطعن
السير إلا بمشقة فصبر عليهن ولم يستعجلهن حتى أوصلهن لمدينة بارا سالمات ، فصار مضرب
المثل فى الشجاعة والصمود والثبات .
تغنت له أم كثوم بت جابر محمد عبدالرازق ( من الجوابرة ) وأرخت له بذكر ابنة أخته الصغيرة
فاطمة , وسيف هذا الفارس لا يزال عند أسرته موجود إلى الآن .

تحياتى

عمرابي

http://www.souforum.com/vb2/mwaextraedit5/extra/97.gif

على خال فاطمة

عبد الواحد محمد
12-26-2010, 06:28 PM
بركلاوية الله يطراك بالخير
بالجد ابو أيمن وين والباشا وعمرابي
وشلة الحناكيش والمخرفين
البوست دا جميل ولازم يستمر للتوثيق
وما زلنا بصدد تعريف هذه المصطلحات ..
ألحقنا يا أخوي عبد الواحد الجماعة زاقوا من البوست دا
همتك معانا ..
موت الضان .......
ادب الكلاب في تونس .....
أدب المدائح ...
بركلاوية معليش انتي قلت ما فيها يا أختاه
:sniper (45)::icon29: دقسة حلوة مع جمعة مباركة



انه العقوق بعينه
هو انا كنت وين لمن امنا بتنادي وانا مطنش
خلي بالك يا نوارة تكون دي واحدة من زوغاتي المرات مرات
بتحصل لي غصبا عني وكدا
معذرة امي العزيزة
والله لم ار هذه المداخلة الا اليوم
والله يا نوارة انا ذاتي بسمع في العبارات دي
لكن يوم واحد مافكرت في معانيها بتروي كدا
كدي النشوف العمدة والشاعر ابراهيم المبارك
سلمك الله لنا يا نوارة مع انضر التحايا

بركلاويه
12-26-2010, 07:11 PM
بركلاوية الله يطراك بالخير

بالجد ابو أيمن وين والباشا وعمرابي
وشلة الحناكيش والمخرفين
البوست دا جميل ولازم يستمر للتوثيق
وما زلنا بصدد تعريف هذه المصطلحات ..
ألحقنا يا أخوي عبد الواحد الجماعة زاقوا من البوست دا
همتك معانا ..
موت الضان .......
ادب الكلاب في تونس .....
أدب المدائح ...
بركلاوية معليش انتي قلت ما فيها يا أختاه

:SnipeR (45)::icon29: دقسة حلوة مع جمعة مباركة



موت الضان .......

للشيخ بابكر بدرى (ماتو موت الضان)

الماعز اذا لحقة ضرر يرفع صوتة مستنجدا اما الضان لا يرفع صوتة الا لولده ولو هجم الذئب

وعليه فهؤلاء القوم

لم يستنجدوا بغيرهم حتى فنوا عن اخرهم...يضرب مدحا للشجاعة

شطوره طبعا انا مووش:SnipeR (69)::SnipeR (69):

عمرابى
12-27-2010, 07:45 PM
موت الضان .......


للشيخ بابكر بدرى (ماتو موت الضان)

الماعز اذا لحقة ضرر يرفع صوتة مستنجدا اما الضان لا يرفع صوتة الا لولده ولو هجم الذئب

وعليه فهؤلاء القوم

لم يستنجدوا بغيرهم حتى فنوا عن اخرهم...يضرب مدحا للشجاعة


شطوره طبعا انا مووش:sniper (69)::sniper (69):

ماك هينة والله
باقى الطير الفى الباقير
وأدب المدائح
وأدب الكلاب فى تونس

مسعولين من الخير
وين أبو أيمن؟

عثمان جرا
12-28-2010, 09:38 PM
مرفأ بديع ..
وسباحة عكس عقارب الزمن ..
والى ذلك الزمن الجميل ..
زمن الدفء..
زمن الحن ..
زمن الحب الحقيقى ..
والمودة المتأصلة فى تركيبة الانسان آنذاك..
ذلك زمان مضى ..
فهل من عودة ..؟؟

المبارك ابراهيم
02-15-2011, 10:10 AM
عندما تمد إيدك للنار وتسحبها بسرعة وتبكي أبوك أو جدك يقولك ود الكنجس وإلي يومنا هذا تستخدم هذه الكلمة يوم الجمعة كنت معزوما مع أحد أقاربي عنده بنت صغيرة جات تشرب الشاي وهو حار رمت الكباية وصرخت أبوها قال ليها بت الكنجس قلت ليهو إنت الكنجس دي معناها شنو؟؟ قال لي والله ماعارفها. فيا أخوي شيكو حليت لينا بت أم زقدة دايرنك تبحث لينا عن ود أو بت الكنجس نريد أن نعرف الكنجس ده شنو؟؟؟
تخريمة
قلت أسبقكم علي عمي قوقل إمكن أجد المعني لقيت الكنجس هو مطار سدني الدولي يعرف( بمطار كنجس فورد سميث الدولي)

العمده
02-15-2011, 11:30 AM
أبوها قال ليها بت الكنجس قلت ليهو إنت الكنجس دي معناها شنو؟؟ قال لي والله ماعارفها. فيا أخوي شيكو حليت لينا بت أم زقدة دايرنك تبحث لينا عن ود أو بت الكنجس نريد أن نعرف الكنجس ده شنو؟؟؟



دا أُوردو ولا عربى ؟؟؟

من أين تأتون بكلمات هيك ؟؟

غايتو يٌخيل لى زيها وزى " ود المره "

شوف الباشا يشرحها لينا :SnipeR (37):

شيكو
02-15-2011, 01:06 PM
عندما تمد إيدك للنار وتسحبها بسرعة وتبكي أبوك أو جدك يقولك ود الكنجس وإلي يومنا هذا تستخدم هذه الكلمة يوم الجمعة كنت معزوما مع أحد أقاربي عنده بنت صغيرة جات تشرب الشاي وهو حار رمت الكباية وصرخت أبوها قال ليها بت الكنجس قلت ليهو إنت الكنجس دي معناها شنو؟؟ قال لي والله ماعارفها. فيا أخوي شيكو حليت لينا بت أم زقدة دايرنك تبحث لينا عن ود أو بت الكنجس نريد أن نعرف الكنجس ده شنو؟؟؟
تخريمة
قلت أسبقكم علي عمي قوقل إمكن أجد المعني لقيت الكنجس هو مطار سدني الدولي يعرف( بمطار كنجس فورد سميث الدولي)



ياغالي ود الكنجس هو ود الملوك
وأصلها كلمة انجليزية
kings
ههههههه
بالغت ياخي
وهو أنا استدليت بيك عشان أعرف بت أم زقده دي شنو؟
وانت الوريتني ليها
تجيبني لي جنس ده؟
وحات الجودلية الجاها الظار ولبست الطاقية
أول مرة أسمع بيها أسه

المبارك ابراهيم
02-15-2011, 01:14 PM
دا أُوردو ولا عربى ؟؟؟

من أين تأتون بكلمات هيك ؟؟

غايتو يٌخيل لى زيها وزى " ود المره "

شوف الباشا يشرحها لينا :sniper (37):
العمدة أخوي صدقني ما بتكون بعيدة من هذا المعني لأن هذه الكلمة يقولوها لك عند الخوف والله أعلم.

المبارك ابراهيم
02-15-2011, 01:18 PM
ياغالي ود الكنجس هو ود الملوك

وأصلها كلمة انجليزية
kings
ههههههه
بالغت ياخي
وهو أنا استدليت بيك عشان أعرف بت أم زقده دي شنو؟
وانت الوريتني ليها
تجيبني لي جنس ده؟
وحات الجودلية الجاها الظار ولبست الطاقية

أول مرة أسمع بيها أسه


ههههااي يا أخوي شيكو ود الملوك عدييييل كده أنا عندي إحساس ود الكنجس دي يكون الفأر الكبير البسموهو ( الجقر)
لأن الجقر هباش وكت يدخل البيت يقلب الدنيا كلها وأقل عصرة ( يسيك)

المبارك ابراهيم
02-15-2011, 01:19 PM
وما زلنا في إنتظار الخبير الباشا علي قناة الأخبار.

بركلاويه
02-21-2011, 09:09 AM
..... UP ......
:SnipeR (69):
:SnipeR (69):
:SnipeR (69):

عمرابى
02-21-2011, 01:40 PM
من الأسماء المندثرة والتى لا يعرفها معظم شباب اليوم

الواوِر
السندقيقة
فيها جوائز وكدة رايكم شنو؟

الباشا
02-21-2011, 04:00 PM
أنا ما من شلتكم أنا مش فى لجنة الألفية التالتة
دايرين ناس قوس قزح والباشا ..وبقية العقد الفريد

كدى شوف لينا الطير فى الباقير



قلت كيف يا عمرابى .... ألألفية التالتة ؟؟


عينى فى عينك كده ...... :sadwalk:



وبعدين يا عمنا :sly: .... ( حلوه عمنا دى مش كدا )



القوس ده من براعم الألفية الرابعه ... قول لى كيف ؟



لانه بصراحه سابق عصرو ... الله يديه الصحه والعافيه



سعلتنى من كلام الطير فى الباقير .... ؟



طيب خليك معاى شويه .......



الله يخلى محرك البحث ( Google ) ما خلا زول جاهل ... إلا الجاهل



قعدت أفتش فى تفسير لكلام الطير فى الباقير



واكتشفت أنه كل الحكماء والعلماء والبروفسيرات غلب حمارهم



صدق يا عمرابى حلتنا ( مسقط راسى يعنى ) تبعد بالظبط 10 كيلو من الباقير الورانى ( طبعاً وأكيد فى باقير قدامى )



وقروا معاى اولاد من الباقير لكن للأسف ما إتذكرت أسعلهم من حكاية الطير البيتكلم ده لو كنت عارف إنك حتسعل ... كنت سعلتهم ههههههه



وأكيييييد كلام سااااكت ( على قول السودانيين البليغ ) ، طالما مافى واحد من اولاد الباقير سرد لينا حكايتو مع الطير حتى ولو من باب الفشيييير يبقى فعلاً وبالفكاكه كدا " كلام ساااكت "



بس الذ وأهضم ( ع قول أهلنا الحلوين الشوام ) تفسير هو ما وجدته فى منتدى سودانيز او لاين



واليك التفسير



نقلا عن التيار الصادرة اليوم الاحد
بقلم : الصفر البارد
كلام الباقير في الطير
تعود الناس على مقولة ( كلام الطير في الباقير ) لكن لأنه كلام طير في الباقير ممكن يبقى "مشقلب" ويصبح ( كلام الباقير في الطير ) لأنه الطير زاتو عنده رائي في الباقير .. وحتى (الطير بقى عنده رأي يا مولاي) .. . ما لو طيب .. تماشيا مع طلبات حقوق الإنسان وحقه المشروع في ممارسة الحرية عليه قررنا ان يكون للطير حق في حرية التعبير والنقاش في الميزانية كما عجبكم .. دا زاتو لو الطير وافق .. مش ممكن الطير يرفع فينا قضية .. ويقدم بلاغ لي " اوباما " ويتهمنا إننا حقرنا بيهم واستهزاءنا بيه.. وطلعنا عبارة ( كلام الطير في الباقير ) عشان نسخر من الطير وهضمنا حقوقه .. وبعدين من زمان الطير دا مظلوم حقيقتا .. مافي ( شافع ) عمل ليه " نبلة" إلا كتل ليه كم طيرة .. وما في "صقر" إلا هاجم الطيور .. وما في صياد شايل ليه بندقية ( خرطوش ) إلا رش الطير .. والطير كرهنا فيه الفنان حمد الريح .. وتعالوا نراجع أغاني الفنان الأستاذ حمد الريح ومعظم القصائد التي تغنى لا تخلوا من سيرة نوع من أنواع الطيور أو إشارة إلي الطير بشكل عام .. طبعا دي براها بتجيب لينا الهواء مع الطير .. دا لو كنا نفقه لغة الطيور .. والمصيبة أي زول عايز يعمل فيها تفتيحة وشفت .. تلاقيه يقول للزول التاني ( أنت قايلني طيرة ولا شنو ) .. اها العبارة دي براها بتجيب لينا كتاحة في منظمات حقوق الطيور .. ولا العجب المرحوم الشاعر صلاح احمد إبراهيم لمن قال للطير المهاجر ( وكان تعب منك جناح في السرعة زيد )... لييييه يا اااخي مافي رحمة ولا رأفة بالطير المسكين دا .. بس يموت ليك فطيس عشان يصل للحبيبة .. دي قمة الانتهاك لحقوق الطير .. ولا حقارة السودانيين في الطيران ( يقول ليك سودان طير) .. هسع عليكم الله شفتوا ليكم طيرة أثناء الاقلاع (طااخ تقع) ولا بتهبط مدشدشة .. دي حقارة من الشعب في حق الطير ولا يحوز ... بصراحة لو كانا في زمن سيدنا سليمان .. كان حقنا راح .. كان الطيور دي جابت خبرنا وشكتنا لي الله عبر سيدنا سليمان .. بالله لو الطير بالسودان اجتمع وقابلوا جمال حسن سعيد الممثل .. بالله ما كان يرسلوا معاهو رسالة للمواطن السوداني ويقلوا ليه ( يا خلف الله ما عذبتنا ) ... لكن دا كله هين .. الخوف من حركات الطيور الانفصالية .. النوع ألبجي طاير عابر لأجواء السودانية ولا يهبط ويجيب لينا أنفلونزا الطيور ويخلي طيورنا تنقرض وتموت فطيس .. وكل دا هين سمعنا تحت تحت من " جدادنا" الموجود في القفص انه في إشاعة .. والإشاعة دي قوية طالعة الأيام دي انه الطيور تخطط لطلب تقرير المصير .. اها دي نعالجها كيف ! ! ! .. أوع ينط زول ويعمل لي فيها انه سياسي محنك .. ويقول لي نوقع معاهم اتفاقية ( فرع الشجرة المكسور ) .. ولا اتفاقية (برج قفص الحمام) .. ولا اتفاقية ( البيضة المبذرة ) ودا كله هيييين الخوف بعد الاتفاقية الطير يقول عايز قسمة الثروة .. اها اكيد راح يطالب بمشروع الجزيرة لأنه فيه لهط للطير .. ولا اخ اخ اخ نسيت .. ما فضل فيه حواشة متعااافية .. ولا يقول عايز قسمة السلطة .. طيب دا نحلها كيف .. بسيييطة نديهم وزارة الزراعة "ويلهفوا " حتى بلح الشمالية في حويصلاتهم .. ولاني بكره طير ( السنبر ) عارفه بجي يعمل لينا غلغلة وينسلخ من الاتفاقية لأنه عايز كوموا برا هوا .. ونشوف بكرة الاتفاق الإطاري لوثيقة معاهدة سلام السنبر ...





أها رايك شنو يا عمرابى مش برضو تفسير مهضوم ؟

المبارك ابراهيم
03-05-2011, 05:50 PM
يا جَنا شيل البروة دي خُتها في الكآجة وجيب لي الكَسيْدة يا جماعة فاهمين حاجة ؟؟
دايرين واحد نجيض يتبرع أو واحدة نجيضة تتبرع تقولوا لينا الكلام ده معناه شنو؟؟؟
والعنده لغة مشابة يقولها لينا عشان نستفيد.

على السيد
03-05-2011, 09:54 PM
يا جَنا شيل البروة دي خُتها في الكآجة وجيب لي الكَسيْدة يا جماعة فاهمين حاجة ؟؟
دايرين واحد نجيض يتبرع أو واحدة نجيضة تتبرع تقولوا لينا الكلام ده معناه شنو؟؟؟
والعنده لغة مشابة يقولها لينا عشان نستفيد.


يا ود إبراهيم
عليك الله إتكلم معانا بالعربى
هو ده ملاح شنو ؟؟؟؟؟

أجمل تحايا لك يا غالى : مبارك ابراهيم
والله ليك وحشه
وناس السمك بيسألو منك
كل يوم يقولوا لينا وين الظريف داك ...

أبو عبارات

شيكو
03-05-2011, 10:18 PM
طبعا يا المبارك رجعت حركة ورا وسألت العاجبة
قالت لي ياولدي حليل أيام زمان
وجنس الكلام ده مابعرفوهو الا أولاد البلد النجاض
وشيل البروة ختها في الكاجا
معناتا شيل الصويبونه الصغنتوتة دي وختها في طشت الغسيل ولا حوض الغسيل
طبعا عملنا مواكبة لبعض المفردات لزوم القيافات وكده
مع تحيات العاجبة شخصيا

العمده
03-06-2011, 12:44 AM
وناس السمك بيسألو منك
كل يوم يقولوا لينا وين الظريف داك ...





غايتو أنا بشيل الكلام دا صُره فى خيت وبعرف محل أمش :SnipeR (23):

قال كسيده قال

عبد الواحد محمد
03-06-2011, 08:55 AM
والله غايتو جنس خرف وتخريف بهنا
جمعية الرجال الكبار دي متلمة هنا مالها اليوم ؟؟

=======
البروة دي عرفناها الصابونة الصغيرة
اما الكاجا فنحن في الغرة نعرفها بانها الجزء الاعلى
من الجزء الاسفل ذو الشكل المستدير اسفل الهرم المخروطي
من الدردر او القطية ويستخدم مثل الرف
اما الكسيدة هذه فهذا ابداع مباركي ابراهيمي
ولو العمدة ما عرفوا فمن اين لنا بمخرف اكبر ليعرفه ؟؟؟؟

منتظرين يا احباب

العمده
03-06-2011, 09:01 AM
اما الكسيدة هذه فهذا ابداع مباركي ابراهيمي
ولو العمدة ما عرفوا فمن اين لنا بمخرف اكبر ليعرفه ؟؟؟؟




ومن قال إنى لا أعرفها ؟؟؟؟؟؟؟

هى مرتبة من القصب ( مبارك أشرح أكتر ولا لا ؟ )

المبارك ابراهيم
03-06-2011, 09:26 AM
يا ود إبراهيم

عليك الله إتكلم معانا بالعربى
هو ده ملاح شنو ؟؟؟؟؟

أجمل تحايا لك يا غالى : مبارك ابراهيم
والله ليك وحشه
وناس السمك بيسألو منك
كل يوم يقولوا لينا وين الظريف داك ...


أبو عبارات


علي السيد ياغالي
دي لغة هيروغلوفية
مشتاقين لي السمك وطش البوش
حرااام عليك إنت وعمرابي كاتلين الجدادة وخامين بيضها!!!
,,,,,,,,,,,,,,,,,,,,,,,,,,,,,,,,,,,,,,,,
إنت داير لي الفتنة مع العمدة
هو أنا شفت حاجة ( عمرابي وعلي السيد وكوكتيل)
بعدين ظريف أنا ولا إنت يالسايق الفيات!!!!
,,,,,,,,,,,,,,,,,,,,,,,,,,,,,,,,,,,,,,,,,,,,,,,
ما حصلت لي الهايس ؟؟؟
,,,,,,,,,,,,,,,,,,,,,,,,,
ياعمرابي أنا ما قلت لي علي السيد ده برمي مكنات كبيرة .
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,

المبارك ابراهيم
03-06-2011, 09:31 AM
طبعا يا المبارك رجعت حركة ورا وسألت العاجبة

قالت لي ياولدي حليل أيام زمان
وجنس الكلام ده مابعرفوهو الا أولاد البلد النجاض
وشيل البروة ختها في الكاجا
معناتا شيل الصويبونه الصغنتوتة دي وختها في طشت الغسيل ولا حوض الغسيل
طبعا عملنا مواكبة لبعض المفردات لزوم القيافات وكده

مع تحيات العاجبة شخصيا


شيكو الجميل صابونة صغنتوتة ومواكبة جيل الألفية التالتة والعاجبة خالتي ما قصرت
الكاجا والكسيدة ياريس ما تمشي عمك قوقل.

المبارك ابراهيم
03-06-2011, 09:33 AM
غايتو أنا بشيل الكلام دا صُره فى خيت وبعرف محل أمش :sniper (23):


قال كسيده قال


تذكرتك علي تعال أمشي وصلوا وتعال. عالم عجيب!!!!
كاجا قال.

المبارك ابراهيم
03-06-2011, 09:40 AM
والله غايتو جنس خرف وتخريف بهنا
جمعية الرجال الكبار دي متلمة هنا مالها اليوم ؟؟

=======
البروة دي عرفناها الصابونة الصغيرة
اما الكاجا فنحن في الغرة نعرفها بانها الجزء الاعلى
من الجزء الاسفل ذو الشكل المستدير اسفل الهرم المخروطي
من الدردر او القطية ويستخدم مثل الرف
اما الكسيدة هذه فهذا ابداع مباركي ابراهيمي
ولو العمدة ما عرفوا فمن اين لنا بمخرف اكبر ليعرفه ؟؟؟؟

منتظرين يا احباب

ما أكثر المخرفين حين تعدهم ولكنهم في الملمات قليل.
شكرا يا عبد الواحد كونك تحل الكاجا دي وبهذا الوصف تأخذ الدرجة الكاملة للكاجا بس أشرح لي الجماعة ديل ( الدردر) لو ماكتبت جمبه القطية لما عرفوه!!
كدي النشوف صاحبي إمكن يحل الكسيدة.
أسعدني مرورك ياغالي وألف حمدا لله بالسلامة وبعودتك.

المبارك ابراهيم
03-06-2011, 09:45 AM
ومن قال إنى لا أعرفها ؟؟؟؟؟؟؟



هى مرتبة من القصب ( مبارك أشرح أكتر ولا لا ؟ )


ما قصرت ياعمدة الكسيدة هي تصنع من القصب في شكل مربع تخدم ثلاثة أغراض .

* الأولي يقفل بها باب بيت القصب ليلا أو عندما يخرج منه أهله.
*الثانية تستخدم كمصلاية سجادة يصلي عليها
* الثالثة مرتبة ينام عليها
وإجابة صحيحة ياعمدة جزاك الله خيرا.

بركلاويه
03-26-2011, 01:08 AM
up
...............

بركلاويه
03-26-2011, 01:15 AM
up
........

الباشا
03-26-2011, 09:53 AM
شكراً لكل الذين عقبوا فى غيابى
وأخص بالذكر أخى المبارك ودإبراهيم
المسجل غياب هذه الأيام

وشكراً بركلاويه لرفع الموضوع

ونواصل بعد الفاصل

الباشا
03-26-2011, 10:10 AM
قلت اجي اتجدع بيهن علي الجماعة تربية الرياض والبندر

علا لقيتكم يا الباشا والمبارك عليكم جنس قُدم هههههههههه


اها هاكم ديل ونشوف عرفتكم

الكُنُش
الكنتوش
الخُمارة
القلابة
النجامة
الكجامة
المسلة
الفازقية
التاية
الشاية
الاربل
الكوديق
الكشمبير
اللداية
الجاغوص
الباطوس
الدير
المُطالة
الكُلّيقة
الكرنق
الكدمبس
الكَرَب
الكاويقة
السندقيقة



بجيكم راجع



شكرا يا القريشابى الجعلى على إثراء البوست فى غيابى

وفعلاً هنالك اختلاف فى اللهجات بين منطقه وأخرى ولو تلاحظ علمت بوستك باللون الاحمر على بعض الكلمات المستخدمه عند اهلنا الجعليين وليست مستخدمه فى الجزيره المرويه بصفة عامه

وده الهدف من هذا البوست ... أن نتذكر اولاً لهجتنا الحميميه الرائعه الجميله وأن نحاول معرفة لهجات أخرى وكنت أتمنى أن لو أثرى هذا البوست إخوه من الذين يتحدثون لهجات أخرى غير العربيه كالنوبيه الشمالية والغربيه والدنقلاويه والفور والهوسه ولهجة البجا والهدندوه والدينكا والنوير ( قبل إنفصال البلد ) وبرضو ما يضر لو تعلمناها الآن فمصيرهم العوده لنا ولو بعد حين ... وكل اللهجات الحيه والجميله والمنطوقه

بلدنا أحلى ما فيها تنوع ثقافاتها ولهجاتها وتعايشها الجميل مع بعض حتى ولو فرقتنا السياسه


وبعدين تعال هنا ناس الرياض مالوم ؟؟

90% منهم إن لم يكن 99%

خلطه من خارج البندر

الباشا
03-26-2011, 10:33 AM
كدى شوفوا ديل


الخرتايه

الدوايه

الشنتاله

التبروقه

التكه

المحويب

المخلايه

اللباب

الملود

الحكاكه

الكراب

السدايه

المرق

المدقاق

النعلات

الدلقان

الجعران

الجقر

أم بلول

البرجوب

نوارة البركل
03-26-2011, 03:15 PM
كدى شوفوا ديل



الخرتايه
كيس من القماش المتين يجلب فيه الأغراض

الدوايه
تشبه المحبرة يكتب منها على اللوح

الشنتاله
دي عايزة قوقل

التبروقه
هي المصلاية وتصنع من السعف وشكلها دائري

التكه
شريط طويل من القماش

المحويب
لو كانت المحريب كان قلت ليك عشبة يُحضروها من الغرب ويشرب في الشمالية

المخلايه
تشبه الخرتاية لكنها مصنوعة من الصوف

اللباب
نبتة متسلقة وتحمل ازهار بيضاء او وردية اللون

الملود
دي الا من قوقل

الحكاكه
دي ممكن تكون مثل الليفة تستعمل لغسل العدة
الكراب
الجهة من العنقريب منها يمك شد الحبال وعندنا
في الشمالية تسمى الشناط
السدايه
نبتة تسمى عندنا الحلَفا
تنبت في الصحراء

المرق
تحمل كثير من المعاني لا بد من تشكيلها

المدقاق
آلة للحفر وخاصة الاشياء الصغيرة

النعلات
هي الجزم والشباشب وعندنا تسمى البراطيش

الدلقان
قطعة قديمة من القماش

الجعران
حشرة سوداء شكلها قبيح

الجقر
وهو الفأر

أم بلول
ممكن استعين بشيكو


البرجوب
مرض يصيب الكبار والصغار وهو حبوب تظهر على جسم الانسان


http://www.al-wed.com/pic/7468.gif

الباشا الكبير مرحبتين حبابك واليوم السعيد الليلة لي لهجتنا العامية جابك .. ما اشتقنا ليها يا باشا منو الغير بزودنا بيها نرجو عدم الغياب وكذلك نرجو رجوع الديوان

بركلاويه
03-26-2011, 04:00 PM
http://www.al-wed.com/pic/7468.gif


الباشا الكبير مرحبتين حبابك واليوم السعيد الليلة لي لهجتنا العامية جابك .. ما اشتقنا ليها يا باشا منو الغير بزودنا بيها نرجو عدم الغياب وكذلك نرجو رجوع الديوان


كدى شوفوا ديل

كدى شوفوا ديل








الخرتايه

كيس من القماش المتين يجلب فيه الأغراض






الدوايه

تشبه المحبرة يكتب منها على اللوح






الشنتاله

دي عايزة قوقل






التبروقه

هي المصلاية وتصنع من السعف وشكلها دائري






التكه

شريط طويل من القماش






المحويب

لو كانت المحريب كان قلت ليك عشبة يُحضروها من الغرب ويشرب في الشمالية



المخلايه
تشبه الخرتاية لكنها مصنوعة من الصوف







اللباب

نبتة متسلقة وتحمل ازهار بيضاء او وردية اللون



الملود
دي الا من قوقل







الحكاكه

دي ممكن تكون مثل الليفة تستعمل لغسل العدة
الكراب
الجهة من العنقريب منها يمك شد الحبال وعندنا
في الشمالية تسمى الشناط
السدايه
نبتة تسمى عندنا الحلَفا
تنبت في الصحراء







المرق

تحمل كثير من المعاني لا بد من تشكيلها






المدقاق

آلة للحفر وخاصة الاشياء الصغيرة






النعلات

هي الجزم والشباشب وعندنا تسمى البراطيش






الدلقان

قطعة قديمة من القماش






الجعران

حشرة سوداء شكلها قبيح






الجقر

وهو الفأر






أم بلول

ممكن استعين بشيكو







البرجوب

مرض يصيب الكبار والصغار وهو حبوب تظهر على جسم الانسان












الخرتايه

كيس من القماش المتين يجلب فيه الأغراض



10/10



الدوايه
تشبه المحبرة يكتب منها على اللوح



10/10






الشنتاله
دي عايزة قوقل









هههههههاي




التبروقه
هي المصلاية وتصنع من السعف وشكلها دائري


10/10




التكه
شريط طويل من القماش




والله اول مرة اسمع بيها نتمنى ليك النجاح




المحويب
لو كانت المحريب كان قلت ليك عشبة يُحضروها من الغرب ويشرب في الشمالية
هههههاي 0/10 في تصوري




المخلايه

تشبه الخرتاية لكنها مصنوعة من الصوف


10/10








اللباب
نبتة متسلقة وتحمل ازهار بيضاء او وردية اللون




ده غلط داك اسمو اللبلاب



الملود
دي الا من قوقل




صح قوقليها سريع



الحكاكه
دي ممكن تكون مثل الليفة تستعمل لغسل العدة
دي بالغتي فيها 0/10



الكراب

الجهة من العنقريب منها يمكن شد الحبال وعندنا
في الشمالية تسمى الشناط







10/10


السدايه
نبتة تسمى عندنا الحلَفا
تنبت في الصحراء




0/10 يخيل لى غلط



المرق
تحمل كثير من المعاني لا بد من تشكيلها




المَرَق ... المِرِق:vampire: أو زول خرج خروج نهائي:SnipeR (75):



المدقاق
آلة للحفر وخاصة الاشياء الصغيرة




5/10



النعلات
هي الجزم والشباشب وعندنا تسمى البراطيش




البراطيش ضحكتني شديد غايتو يا نوارة انتى حبوبة عديل



الدلقان
قطعة قديمة من القماش


10/10





الجعران
حشرة سوداء شكلها قبيح




إيه الأرف ده :SnipeR (11):



الجقر
وهو الفأر




Tom and Jarry



أم بلول
ممكن استعين بشيكو




ود خالتي العاجبة قصدك؟؟؟








البرجوب
مرض يصيب الكبار والصغار وهو حبوب تظهر على جسم الانسان




نوارة انتي قصدك البرجوك صح ؟؟؟




النسبة المئوية للحبيبة نوارة حوالى 40%
اوعي عبودي يسمع النتيجة دي :harhar1::tears:

الباشا
03-26-2011, 04:24 PM
الخرتايه



كيس من القماش المتين يجلب فيه الأغراض



الدوايه

تشبه المحبرة يكتب منها على اللوح




الشنتاله


دي عايزة قوقل













التبروقه

هي المصلاية وتصنع من السعف وشكلها دائري







التكه

شريط طويل من القماش





المحويب

لو كانت المحريب كان قلت ليك عشبة يُحضروها من الغرب ويشرب في الشمالية







المخلايه

تشبه الخرتاية لكنها مصنوعة من الصوف





[/CENTER]




اللباب

نبتة متسلقة وتحمل ازهار بيضاء او وردية اللون





الملود

دي الا من قوقل





الحكاكه

دي ممكن تكون مثل الليفة تستعمل لغسل العدة






الكراب

الجهة من العنقريب منها يمكن شد الحبال وعندنا

في الشمالية تسمى الشناط








السدايه

نبتة تسمى عندنا الحلَفا

تنبت في الصحراء







المرق

تحمل كثير من المعاني لا بد من تشكيلها





المدقاق

آلة للحفر وخاصة الاشياء الصغيرة





النعلات

هي الجزم والشباشب وعندنا تسمى البراطيش





الدلقان

قطعة قديمة من القماش








الجعران
حشرة سوداء شكلها قبيح
[/CENTER]



الجقر

وهو الفأر





أم بلول

ممكن استعين بشيكو








[/CENTER]




البرجوب

مرض يصيب الكبار والصغار وهو حبوب تظهر على جسم الانسان






النسبة المئوية للحبيبة نوارة حوالى 40%

اوعي عبودي يسمع النتيجة دي :harhar1::tears:




بنات الزعيم ...... يديكم الصحه والعافيه

بقرأ فى ردودكم وبضحك لما بكركر

والغريبه أنه النسبه 40 % كانت صحيحه جداً

بس والله إجتهاد خرافى يا العاجبه

قلت لى النعلات هى البراطيش ؟؟ ماقصرتى يا النواره والله

برضو البراطيش دى كنا زمان بنسمى بيها ملاح الاسود البيعملوهو لينا فى الداخليات والكرهنا اكل الاسود لى هسع ... سموهو مسقعه ما نفع سموهو سلطة اسود مانفع وسموهو الفرنسيين اسماء تتاكل أكل بس هو لا .... وده كلو ما شفع للبراطيش :essen:

أما حكاية البرجوب فوالله حكايه

شايف البركلاويه قالت البرجوك :oo5o.com (2):

وطبعاً دى أول مره اسمع حكاية البرجوك دى .... واكيد سنجكاويه 100%

بس ناس الجزيره بيقولوا عليه البرجم وهو الجدرى الكاذب بلغة سيبويه
وفى الخليج يقولوا عليه العنقز

يديكم العافيه ........

قصدت ما اشرح لحدى ما يجى شيكو ود خالتكم

يمكن يطلع حبوبه زيكم كدا ... او يعمل لينا فيها ود قاردن سيتى :harhar1:

نوارة البركل
03-26-2011, 05:05 PM
تصدقى يا بركلاوية محمد واشرف لحدى هسع بيضحكوا

http://www.m.v90v.com/data/thumbnails/12/smile2.gif

http://www.m.v90v.com/data/media/12/Smile_Face1.gif

الباشا
03-27-2011, 10:43 AM
وين شيكو يا جماعه ؟؟

مسجل غياب اليومين دى

الباشا
03-29-2011, 12:44 PM
الشرح مع مراعاة فارق اللهجات



الخرتايه


هى كيس من القماش يتم خياطته بأى كيفية المهم يستوعب أى شى يوضع جوه الخرتايه .... تحضرنى طرفه شهيره ... يقول ليك زمان لما بدأ التعليم فى السودان . شيخ القبيله لمّ العيال من المزارع والمراعى وجابهم دخلهم المدارس ... انتهى الموسم وبدأ موسم هجرة البهايم ... كعادة الرعاة ... واحد من التلاميذ جاء شايل ( شنطة الكتب وهى من القماش طبعاً ) ورماها قدام النظر وقال ليه ؛ فندى ... فندى أنا قنع هاك خرتايتك . ( قنع يعنى هاك استقالتى )


الدوايه


الدوايه هى المحبره ... وهى باشكال مختلفه ممكن تكون من الزجاج أو الفخار المهم تستوعب الحبر الخاص بالكتابه على الألواح وللعم الحبر دايماً صناعة محليه ... عباره عن مويه وسَكَنْ ( ماده سوداء فى قعر الحله ) ومادة حجار البطاريه مع صمغ مهروس .... يعنى اليابانيين اكيد أخدوا فكرة الحبر من السودانيين ... وخدوها بلوشى كمان



الشنتاله


الشنتاله دى تعبير محلى وجايز حتى ناس الجزيره يختلفوا فى استخدامها ... على كل فى منطقتنا بنطلقها على الهدمه القديمه يعنى قريبه من كلمة الشلاتيت ... وغالباً يستخدمها الصغار فى وصف ملابسهم القديمه



التبروقه


التبروقه هى نسج من السعف دائرية الشكل تستخدم للصلاة لشخص الواحد وطبعاً فى منها شكل مخروم فى النص لاستخدام النساء أظنه يدعى النطع ... والله أعلم



التكه


التكه هى شريط من القماش يتم إدخاله فى مجرى أعلى السروال الذى يلبسه الرجال غالباً ويعقد عقدتين ... احداهما داخليه سايبه فى النص والتانيه محكمه فى الطرف .. يستخدم كحزام حتى لا يسقط السروال من خصر مرتديه ....



المحويب


هو حبل إما من صوف أو قماش أو سعف يستخدم لربط أرجل البقرة أو الناقه عندما يراد حلب البهيمة لاستخراج اللبن أو الحليب بلغة الخليج .... وطبعاً هنالك فرق كبييييير بين اللبن والحليب فى الخليج ... فاللبن يعنى الروب او الحليب الرايب ... والحليب تعنى اللبن الصافى الغير مخمر أو مخدود .... فإذا قلت عاوز شاى بلبن فى قهوه فى جده ... ربما يستدعوا لك أحد من مستشفى التجانى الماحى للمساعده ...



المخلايه



هى كيس من الشعر .... مزركش بعدة ألوان يستخدم زماااان فى حمل الاشياء من السوق أو لعلف البهائم وخاصة الحصين والحمير ... واليوم أصبحت المخلاية موضه من الشمط التى يحملنها النساء بمختلف الأعمار ...


اللباب


هو حزام طويل من الجلد أو حبل طويل لربط السرج على ظهر الحمار أو الحصان أو الجمل أو الثيران فى بعض المناطق ... النهم هو حزام لثبيت حمل ما على ظهور الدواب ....



الملود


هى آله مصنوعه من الحديد فى شكل هلال وموصله بيد من الخشب تستخدم فى تقطيع الحشائش أو البناتات ولها استخدام آخر فى عواسة الكسره ( اللقمه ) وليست الكسره الرهيفه




الحكاكه


هذه مرتبطه بالملود فى معظم الأحيان فهى آله من الحيد فى شكل السكين ترتبط فى التكه وتسخدم لتنظيف الملود من الطين العالق بها عند استخدامها فى حش النباتات



الكراب


هو فى الغالب ذلك الجزء من نسيج العنقريب ( السرير ) فى المقدمه ومصنوع غالباً من حبال السعف ... وهو اختراع سودانى بحت على ما أظن ... وسمى الكراب لكرب أو شد نسيج النقريب عندما يرتخى



السدايه


هى العقده التى التى تربط نسيج العنقريب بعضه ببعض على الأطراف وبالقرب من المرق



المرق


بكسر الميم والراء وتسكين القاف ..... هو عود من سيقان الشجر أو فروعه يستخدم إما فى العناقريب وهى القوائم بالاجناب أو يستخدم فى عرش المنازل وهو الذى يحمل بقية الخشب فى عرش البيوت والمرق يطلق على الشخص الذى يتحمل مسئولية الآخرين




المدقاق


هو اله خشبية فى شكل الحرف الامجليزى T يستخدم فى الخبط على قناديل الذرة العيش يعنى لفصل حبة العيش من البرتاب أو فصل القمح فى السنبله المهم هو الة للدق .... وبرضو كمان هو نوع من الشلوخ خاصه بالرجال فى منطقة الجزيره ويقال عليه مدقاق ود بدر نسبة لشيخ الطريقة الصوفيه فى ام ضبان ...



النعلات


الكلمه لا تعنى القديم من الأحذيه فكل ما يلبس فى الرجل جديد أو قديم شبشب كان أم شبط أم جزمه يدعى فى الجزيره بالنعلات ... وهى الحذاء بصفة عامه




الدلقان


هو الخرقه أو القديم الثياب .... الأثمال يعنى بلغة سيبويه .. وفى الجزيره تنطق النساء كلمة دلقان للتوب إذا كان قديم ... " النلفح لى دلقان امشى بيه الدكان " ...... هاا بت أدينى دلقان توبى ده النختو فوق راسى ... الباب بيدق




الجعران


الخنفساء أو البيتل beetle وطبعاً معروف البيتل اشهر فرقه موسيقيه فى الثمانينات من القرن الماضى ومشهوره فى جميع انحاء العالم .... أما جعرانه ده فاوسخ حشرات الدنيا .... يسكن الجحور ويكور الفضلات يلعب بيها فوت بول .... والله أعلم




الجقر


هو أخونا جيرى بس على كبير شويه .... الفار الكبير يسمى الجقر والعاوز يشوف الجقر بالجد بالجد يجى عندنا فى كورنيش جده .... وكل من يسكن جده يمكن أن يحكى لك المطارده العكسيه بين القط والفار فى كورنيش جده .... الكديس من يشوف الجقر يعض ذيله فى اسنانه ويقول يا فكيك ...



أم بلول


الله يرحمك يا الباشا الكبير ( والدى عليه رحمة الله ) ... كان يسخر من اشخاص معينين ... فعندما يراهم يعنى لهم ( أم بلول هللت وبجناحها ضللت ) ... وأم بلول هى البومه .. طير شكل عيونه مخيف ومرتبط بالنحس ... يعنى زمان البيشوف أم بلول أو البومه يعقد يومه كله فى البيت ما يمرق يشوف الشارع .... فالناس تؤمن بالنحس والسحر بشكل خرافى .... مع انه فى الغرب يتفاءلوا بيها .. سبحان الله




البرجوب



البرجوب هو طين البحر عندما يجف ... وعادة ما يكون فى الخيران والجروف وأكيد ناس الشماليه عندهم ليه اسم تانى ... البرجوب طبعاً طين جاف ليه استخدام غريب ... فى كتير من النساء يتوحموا عليه ... وحاجه شفتها بعينى . نساء حوامل يوصونا نجيب ليهم برجوب .. يقعدن يقرقشوا فيه زى التسالى .. ونحن نتفرج مستغربين .. ياربى الحريم ديل مجانين وللا شنو ؟؟ وحتى اليوم لم أجد تفسير ومافى زول شرح لى ليه الحوامل بيتوحموا على الطين ؟؟؟

الباشا
03-29-2011, 05:03 PM
وكمان عشرين تانيه

قرقريبه

دوكه

ريكه

دنقل

شتم
كَرى

الدمجه

التنده

النديهه

البكان

اللبه

الدربس

البلم

كرناف

طرقه

عيضه

حرف

ألمى

دلاهه

دبلوس


تخريمة حاده

يا جماعه ليه مافى زبائن ؟؟؟

كلكم أهل العوض .... وللا ... من ناس المنشيه ؟؟؟

الباشا
04-02-2011, 02:04 PM
العيد مبارك عليكم

بركلاويه
04-02-2011, 07:17 PM
وكمان عشرين تانيه





تخريمة حاده

يا جماعه ليه مافى زبائن ؟؟؟


كلكم أهل العوض .... وللا ... من ناس المنشيه ؟؟؟


قرقريبه
البعوسو بيها الكسرة

دوكه
الصاج

ريكه

دنقل
قطعة من الطوب الاحمر

شتم
نوع من انواع الطبول(قوس قزح)
هو ما تعلقه النساء في شعورهن (بركلاوية)
كَرى
النوم تعال بكريك بالدوم

الدمجه
كتلة من الشئ

التنده
اعلى الشئ خاصة في اللواري
بجي الخريف واللواري بتقيف

النديهه
الدعاء وخاصة دعاء الصالحين
ودي اسأل فيها ابو حراز

البكان
المكان بعد ابدال الميم الى باء

اللبه
لب الشئ بطنه
او
سلسل تلبسه النساء زمان

الدربس
0/10
البلم
البلادة

كرناف
كعرنوف عندنا وكعد عند ناس القوس
المتبقى من جريدة النخل او الدوم بعد قطعها
ههههه

طرقه
طرقة كسرة اي واحدة

عيضه
0/10

حرف
قراصة او طرف الشئ

ألمى
الموية حبيبتي المويه
المية اولاد بمبة

دلاهه
عوير

دبلوس
0/10


مريخ /هلالhttp://www.marafi-alebda.com/vb/images/ehdaa_smilies/oh.gif
يا شماتة ابلة ظاظا فيا http://www.marafi-alebda.com/vb/images/ehdaa_smilies/banana.gif

الباشا
04-04-2011, 06:04 PM
قرقريبه



البعوسو بيها الكسرة

دوكه
الصاج

ريكه

دنقل
قطعة من الطوب الاحمر

شتم
نوع من انواع الطبول(قوس قزح)
هو ما تعلقه النساء في شعورهن (بركلاوية)
كَرى
النوم تعال بكريك بالدوم

الدمجه
كتلة من الشئ

التنده
اعلى الشئ خاصة في اللواري
بجي الخريف واللواري بتقيف

النديهه
الدعاء وخاصة دعاء الصالحين
ودي اسأل فيها ابو حراز

البكان
المكان بعد ابدال الميم الى باء

اللبه
لب الشئ بطنه
او
سلسل تلبسه النساء زمان

الدربس
0/10
البلم
البلادة

كرناف
كعرنوف عندنا وكعد عند ناس القوس
المتبقى من جريدة النخل او الدوم بعد قطعها
ههههه

طرقه
طرقة كسرة اي واحدة

عيضه
0/10

حرف
قراصة او طرف الشئ

ألمى
الموية حبيبتي المويه
المية اولاد بمبة

دلاهه
عوير

دبلوس
0/10


مريخ /هلالhttp://www.marafi-alebda.com/vb/images/ehdaa_smilies/oh.gif

يا شماتة ابلة ظاظا فيا http://www.marafi-alebda.com/vb/images/ehdaa_smilies/banana.gif




بركلاويه .... طلعتى خطييييره زى خيتك ... النواره

كدا سنجكاويتكم مشكوك فى أمرها :icon18:

البتعرفوهو ناس الجزيره ما يقدروا عليه

ماشاء الله ..... عينى باااااارده




برضو تخريمة

يا ناااااس ياهووووو

وينكم ؟؟؟؟

كدا .... حأعيد النظر

نوارة البركل
04-04-2011, 06:58 PM
بركلاويه .... طلعتى خطييييره زى خيتك ... النواره






بالجد يا بركلاوية طلعتي خطيرة لكن انا اشك في انك استعنتي بي صديق ولا ما كدا يا القوس

الباشا
04-05-2011, 11:03 AM
[/center]



بالجد يا بركلاوية طلعتي خطيرة لكن انا اشك في انك استعنتي بي صديق ولا ما كدا يا القوس


إنتى يا النوارة نسيتى التقييم ... يعنى بركلاويه جابت كم من 100؟

بعدين القوس ده لحدى الليلى لما بنضم معاهو أحس كأنو مندلى من كريمى عشيه

سنين الغربه دى كلها ما غيرتو ..... أصلى made in japan:0069:

نوارة البركل
04-05-2011, 12:16 PM
إنتى يا النوارة نسيتى التقييم ... يعنى بركلاويه جابت كم من 100؟


بعدين القوس ده لحدى الليلى لما بنضم معاهو أحس كأنو مندلى من كريمى عشيه


سنين الغربه دى كلها ما غيرتو ..... أصلى made in japan:0069:


:oo5o.com (11): استاذنا الباشا :oo5o.com (11):
ابلة ظاظا جايالها والورق في التصحيح
والنتيجة اسفل الصفحة
لك تحيتي وحبي في الله
:spiteful:المنتدى طلع كلوا شهادة عربية بس انا واخيتي لينا الله وعيشة السوق :spiteful:

الباشا
04-05-2011, 12:41 PM
المنتدى طلع كلوا شهادة عربية


تعرفى يا نواره .... أجمل حاجه فى الدنيا دى أنه الانسان يتصالح مع نفسه ويكون بسيط .... والرجوع للأصل جزء من التصالح مع النفس والبساطه ... يعنى التمسك بقشور الأمور خاصه فى الكلام واللبس .... ومحاولة التملص من العادات والتقاليد بتورى أصل البنى آدم ونوع تربيته وحرص اهله على تمسكهم بالحس الاقليمى والوطنى وبالتالى الابناء يرثون ما يغرسه الاباء فى أنفسهم ... بس فى بعض الاحيان الانسان تجبروا ظروف منها مثلاً الهجره .... يمكن تغير فى عاداته وتقاليده لكنها لاتمنعه من المحافظه على اصله وجذوره وأساسه ....
لما فكرت فى البوست ده كان فى ذهنى ناس الشهاده العربيه ديل... وما شابههم ( وإن كان لى تحفظ فى التعبير ده .... لكن ماعلينا دلوقت ) والناس الأبعدتهم الظروف لمعرفة أصول اللهجة السودانيه .... وكما ذكرت عدة مرات أمنيتى أن اتعلم اللهجات الاخرى بما فيها الرطانه .... لكن ليس كل ما يتمناه الإنسان يمكن إداركه .... وما زلت محاولاً الوصول لغايتى ولن أتوقف .....


فإنتى وخيتك وكل الاسره الكريمه لكم منى كل التقدير والمحبه ...

نوارة البركل
04-05-2011, 01:29 PM
قرقريبه

البعوسو بيها الكسرة
طلعتي شطورة
10/10

دوكه
الصاج
10/10

ريكه
0/10

دنقل
قطعة من الطوب الاحمر
0/10 عندنا ضانقيل

شتم
نوع من انواع الطبول(قوس قزح)
هو ما تعلقه النساء في شعورهن (بركلاوية)
القوس 10/10
بركلاوية 0/10
كَرى
النوم تعال بكريك بالدوم
10/10

الدمجه
كتلة من الشئ
0/10 نستعين بشيكو

التنده
اعلى الشئ خاصة في اللواري
بجي الخريف واللواري بتقيف
10/10

النديهه
الدعاء وخاصة دعاء الصالحين
ودي اسأل فيها ابو حراز
10/10

البكان
المكان بعد ابدال الميم الى باء
10/10

اللبه
لب الشئ بطنه
او
سلسل تلبسه النساء زمان
10/10

الدربس
0/10
0/10 نستعين بصديق
البلم
البلادة
القلم ما بزيل بلم 10/10

كرناف
كعرنوف عندنا وكعد عند ناس القوس
المتبقى من جريدة النخل او الدوم بعد قطعها
ههههه
10/10

طرقه
طرقة كسرة اي واحدة
10/10

عيضه
0/10
0/10

حرف
قراصة او طرف الشئ
10/10

ألمى
الموية حبيبتي المويه
المية اولاد بمبة
10/10

دلاهه
عوير
10/10

دبلوس
0/ 10
0/10

مريخ /هلالhttp://www.marafi-alebda.com/vb/images/ehdaa_smilies/oh.gif
10/ 10

يا شماتة ابلة ظاظا فيا http://www.marafi-alebda.com/vb/images/ehdaa_smilies/banana.gif



النتيجة النهائية نجاح
130/ 210
الباشا ورينا النسبة المئوية الصحيحة كم .. والاجابات النموذجية والامتحان الجايى ركز فيهو على الشمالية علشان ما عندهم دروس خصوصية ولا كورسات

اشرف السر
04-05-2011, 04:57 PM
الباشا

خالص التهانئ والتبريكات بالبوست الدسم والغني بالجميل والمفيد
بس ياخي 13 صفحة كتيرات..
قدر ما حاولت احصر المفردات المذكورة هنا.. عشان ما اكرر في مشاركاتي.. لقيت البوست كبير
اقترح عليك انو تلم كل المفردات المذكورة في المشاركة الاولى ويتم تحديثها دوريا عشان ما نكرر ما تم ذكره


خالص التحايا

عبد الواحد محمد
04-05-2011, 08:40 PM
الكلجوية
والبجا بجا
وربي الذي حلف بالضحى
والليل اذا سجى
من يتعرفهما فهو انسان شاطر
وليهو هدية ...
وكل سنة طيبيبن طيبيبن
فما زال العيد مستمرا

بركلاويه
04-05-2011, 09:17 PM
الكلجوية
والبجا بجا
وربي الذي حلف بالضحى
والليل اذا سجى
من يتعرفهما فهو انسان شاطر
وليهو هدية ...
وكل سنة طيبيبن طيبيبن
فما زال العيد مستمرا

استاذي يسعد مساك ... طبعا عمنا الباشا هنا مش حيكون شهادة عربية فحسب
بل تربية عمارات ومنشية وشعيرية
اتصلت بصديقتي الكردفانية الجميلة الرائعة غالية
التي اسميت ابنة أخي التي تبلغ الآن من عمرها الثامنة عليها
وساعدتني
فقد حكيت لها انه استاذي والهدية
فكيف بتلميذة تنجح بإمتياز عند استاذها وتنال هديته
فأجابت لا والله انك تستحقين
وكانت الاجابة
فأين الهدية ؟؟؟؟؟؟؟
الكلجوية كما يسميها اهلنا في كردفان
طائر اسودمع بياض في صدره
:0069:

عبد الواحد محمد
04-05-2011, 09:58 PM
استاذي يسعد مساك ... طبعا عمنا الباشا هنا مش حيكون شهادة عربية فحسب
بل تربية عمارات ومنشية وشعيرية
اتصلت بصديقتي الكردفانية الجميلة الرائعة غالية
التي اسميت ابنة أخي التي تبلغ الآن من عمرها الثامنة
وساعدتني
فقد حكيت لها انه استاذي والهدية
فكيف بتلميذة تنجح بإمتياز عند استاذها وتنال هديته
فأجابت لا والله انك تستحقين
وكانت الاجابة
فأين الهدية ؟؟؟؟؟؟؟
الكلجوية كما يسميها اهلنا في كردفان
طائر اسودمع بياض في صدره
:0069:



بركلاوية تطلب الهدية
======
مليون سلام وتحية
لبت البركل الكردفانية
فانبثاق الطير في الافق البهية
تطل معه طيور الكلجو المسماة بالسمبرية
ونعم ماقلت
فسواد ببياض في الصدر تلك هي الغلوتية
اما البجا بجا
فاكملي يا شقيقتي الابية
لآتيك بالهدية
وان رضيت بالنصف
فقولي تحية
وليك الفين سلام
وللباشا الانيق مثلها واضعافا
ولمن نمر عليهو هناك في الديوان كمان
وما زال العيد مستمرا

بركلاويه
04-05-2011, 10:17 PM
بركلاوية تطلب الهدية
اما البجا بجا
فاكملي يا شقيقتي الابية
لآتيك بالهدية
وان رضيت بالنصف
فقولي تحية
وما زال العيد مستمرا
فلا زال البحث جاريا :SnipeR (95):فكردفانيتي الحبيبة

طلعت تربية خرطوم الفيل :cocktail:

وسوف نأتيك بالخبر الأكيد

قوس قزح
04-05-2011, 11:16 PM
كدي خلو عمنا القوس يديكم خمسة كلمات شايقية كاملة الدسم .. بس ان شاء الله ما يبقى قالوها قبل ده :

1- العرموص
2- الحِشِنـْكِرِتْ
3- الفرناغة
4- الكستبانة ( يقوليك والله انا احشرك في كستبانة )
5- القحف
6- المروبنات


( بركلاوية ما معانا عشان كاشفة الحكاية )

الباشا
04-06-2011, 10:25 AM
النتيجة النهائية نجاح

130/ 210

الباشا ورينا النسبة المئوية الصحيحة كم .. والاجابات النموذجية والامتحان الجايى ركز فيهو على الشمالية علشان ما عندهم دروس خصوصية ولا كورسات



مشكوووره على التقييم يا نواره بس شايفك زدتى العبار كوزين ( كوزين مفردها كوز .... وكوز هنا غير الكوز هناك ) النواره ... مالك علينا دايره تودينا وراء الشمس ..... اول تبادى العدد 20 مش 21 تانياً فى 3 انتى زدتيهم لخيتك ضنيتك قايلاهم صاح وهم غلط ... يعنى بعد ده كلو خيتك جابت 50% وده انجاز إعجاز على قول اخوانا الفوق :SnipeR (91): ...
وبعدين يا النواره عمك عربى جزيره ... وكلمات الشماليه دى انا ذاتى بكوس فيها ... فالدور عليكى انتى تتوسطى لينا عند صاحبى عمر جبريل وللا المريخابى أحمد جبريل يدونا من قاموس السناجك شويه ... ويديكم الف عافيه بيت الزعيم .... والله بحبكم

الباشا
04-06-2011, 10:40 AM
قدر ما حاولت احصر المفردات المذكورة هنا.. عشان ما اكرر في مشاركاتي.. لقيت البوست كبير
اقترح عليك انو تلم كل المفردات المذكورة في المشاركة الاولى ويتم تحديثها دوريا عشان ما نكرر ما تم ذكره


يا سلاااااااااام الليله عمك مبسوط ومنشكح (خليجيه ... من عاشر قوماً ) ...... اشرف نيش شخصياً بى جاى .. مرحبتين حبابك

اشرف حبيبنا ... سيبك من الصفحات الفاتت ... انت بس اهرش الدقنوس وطلع لينا إن شاء الله 10 كلمات من اى قاموس حتى ولو قاموس الكاميرات والاستديوهات انت بس هات . والتكرار ما يضر على الاقل تذكير .. صدقنى مشاركتك دى اسعدتنى ويا ليت اشوفك كتير بى جاى يا رائع

الباشا
04-06-2011, 11:11 AM
الكلجوية
والبجا بجا
من يتعرفهما
ليهو هدية ...


وانا اقول البوست ده الليله مالو باققى وملعلع ومنور كدى
أتارى الحبايب كلهم مجمعين عندى ... دايره ليها عمبلوك عاتى .. بس جاييى
قلت لى الكلوجيه والبجا بجا

تعرف الكلوجيه دى لما قريتها ضحكت وقلت والله اهلنا الخليجيين ديل ما خاتين علينا ... طبعاً كلمة كلجه فى السعوديه بالذات تعنى الأعجمى يعنى يقول ليك ده كلجه يعنى ... أربى نهى ... نو أراابك ... ماكو ماكو ...

أما البجا بجا فوديتها لأهلنا البجه فى شرق السودان ... فقلت اكيد واحد منهم جايى يعمل عمره نتوكل على الله ونمشى نقابلوا فى المينا يمكن يكون جاييى بسنبك وللا حاجه

عبدالواحد .... اقول ليك بصراحه والله اكتر لهجه محببه لنفسى هى لهجة اهلنا ناس الغرب ... ياخى حنينه وتحس فيها الاصاله والطيبه وخاصه لما يغنيها عبدالرحمن عبدالله .. هذا العملاق الذى اعشقه شوف شوف بس اسماء اغانيه
ست الفريق
رويحة الهاوى
جانى بريدو
طبيق العسل
شوف جمال البقاره ورقصتم مع النقاره
تومى طرينا

وكتيييير وجميل

دحين يا عبدالواحد ياخوى دايرك من الليله كل فتره كدا اجدعنا بى كم كلمه اقلاها 10 وبلاش البخل ده كلمتين تانى ما بنقبلهم طب

ويديك الف عافيه يا جنابو

الباشا
04-06-2011, 11:24 AM
استاذي يسعد مساك ... طبعا عمنا الباشا هنا مش حيكون شهادة عربية فحسب

بل تربية عمارات ومنشية وشعيرية

وكانت الاجابة
فأين الهدية ؟؟؟؟؟؟؟
الكلجوية كما يسميها اهلنا في كردفان
طائر اسودمع بياض في صدره

:0069:


يا ليت لو طلعت تربية عمارات .... ده انا طلعت كلجه عديييل كدى

وبعدين انتى كدى يا بركلاويه يادوبك تستحقى 5 % من الجايزه لانك اجبتى بالاستعانه بصديق على النص ... والنص ذاتو مشكوك فيه .. يعنى شنو طير اسود مع ابيض ما الطير معظمه اسود بى ابيض وحتى ولو فرضنا اجابتك نص صاح يبقى حسب العرف والتقاليد الصديق ليه 90% من الجايزه حسب المجهود وإنتى تاخدى 10 % ولما نضرب ال 10 فى نص يطلع الناتج 5% ... فهمتى حاجه ؟؟ ... ولا أنا ....

المره الجايه عاوزين من قاموس الشماليه ... وخليك بعيد من السنجكاوى ... لاننا استعنا بخبرات معتقه .. مش كدا برضو يا عمر جبريل ؟

الباشا
04-06-2011, 11:53 AM
1- العرموص
2- الحِشِنـْكِرِتْ
3- الفرناغة
4- الكستبانة ( يقوليك والله انا احشرك في كستبانة )
5- القحف
6- المروبنات





( بركلاوية ما معانا عشان كاشفة الحكاية )





صدقنى يا القوس لو تسيب البركلاويه معانا برضو حتجيب 50 % هههههههههههههه

هى خلاص خدت على الخمسين ... وبعدين ما قلت ليكم مشكوك فى سنجكاويتها ... يعنى انت ما مصدقنى طيب أسأل النواره كدا

نخش فى المسابقة تووووش

1- العرموص

العرموص ده مو ود عم القرموط ؟ .... اللهو نوع من السمك
ويخيل لى برضو ليه علاقة بالنخيل ... بس ياتو حته فى النخله .. النواره أدرى ... ولاحظ إنى ما جبت سيرة البركلاويه

2- الحِشِنـْكِرِتْ

والله مش لو شكلتها !! أظنك لو جبت مفك وفكتيها حرف حرف ... أشك فى أنه الحروف دى ذاتها جايبها من تايوان واللا الإكوادور ... ياخوى قعدت دقيقتين بس عشان اقراها ..... انحشرت فى حلقى ولحدى هسع ما قادر انطقها ... الله يديك العافيه يا عسل إنت

3- الفرناغة

لا بأاااا .. دى بعرفها تمااام وهى نوع من التراب النااااااعم زمان اللوارى كانت لما تغرز فيها يقعدوا المساعديه يدقوا صاجات لما اللورى يمرق منها وتكون طلعت روحهم قبليها ..

4- الكستبانة

ودى كمان أظن بعرفها لانه خالى كان ترزى

5- القحف

انا كنت فاكر الكلمه دى تبع ناس الجزيره وشرق النيل اتاريها كلمه انترسودانى ... بالمناسبه عندنا فى ديرتنا ... ( حلوه ديرتنا دى ) ... قريه اسمهما ( أم قحف ) ما عارف إذا سمعتوا بيها وللا لا ... على كل الماشى أم ضبان وجهة العسيلات بيمر بأم قحف دى ...

6- المروبنات

ودى مصنوعه من المشمش وللا القرع ؟؟ ... وبتتأكل مع القشطه وللا ممكن تتلهط حافه كدا ؟

بركلاويه
04-06-2011, 12:57 PM
صدقنى يا القوس لو تسيب البركلاويه معانا برضو حتجيب 50 % هههههههههههههه


هى خلاص خدت على الخمسين ... وبعدين ما قلت ليكم مشكوك فى سنجكاويتها ... يعنى انت ما مصدقنى طيب أسأل النواره كدا

نخش فى المسابقة تووووش

1- العرموص

العرموص ده مو ود عم القرموط ؟ .... اللهو نوع من السمك
ويخيل لى برضو ليه علاقة بالنخيل ... بس ياتو حته فى النخله .. النواره أدرى ... ولاحظ إنى ما جبت سيرة
Zero
البركلاويه

2- الحِشِنـْكِرِتْ

والله مش لو شكلتها !! أظنك لو جبت مفك وفكتيها حرف حرف ... أشك فى أنه الحروف دى ذاتها جايبها من تايوان واللا الإكوادور ... ياخوى قعدت دقيقتين بس عشان اقراها ..... انحشرت فى حلقى ولحدى هسع ما قادر انطقها ... الله يديك العافيه يا عسل إنت
Zero

3- الفرناغة

لا بأاااا .. دى بعرفها تمااام وهى نوع من التراب النااااااعم زمان اللوارى كانت لما تغرز فيها يقعدوا المساعديه يدقوا صاجات لما اللورى يمرق منها وتكون طلعت روحهم قبليها ..
10/10

4- الكستبانة

ودى كمان أظن بعرفها لانه خالى كان ترزى
10/10

5- القحف

انا كنت فاكر الكلمه دى تبع ناس الجزيره وشرق النيل اتاريها كلمه انترسودانى ... بالمناسبه عندنا فى ديرتنا ... ( حلوه ديرتنا دى ) ... قريه اسمهما ( أم قحف ) ما عارف إذا سمعتوا بيها وللا لا ... على كل الماشى أم ضبان وجهة العسيلات بيمر بأم قحف دى ...
Zero
ولازلنا لم نعرف ما هو القحف :stop::SnipeR (91):

6- المروبنات


ودى مصنوعه من المشمش وللا القرع ؟؟ ... وبتتأكل مع القشطه وللا ممكن تتلهط حافه كدا ؟
Zero




مدرسة حي العرب شرق
لم ينجح أحد :003::003::SnipeR (59):

نتمنى لهم التوفيق في الايام المقبلة ان شاء الله

الباشا
04-06-2011, 01:22 PM
مدرسة حي العرب شرق

لم ينجح أحد :003::003::SnipeR (59):


نتمنى لهم التوفيق في الايام المقبلة ان شاء الله


على الأقل أخير من مدرسة كريمة شرق :SnipeR (69):

لأنى ناجح وجبت 60% وبيقولوا ال 60 اكتر من ال 50 وللا عندك شك فى دى كمان :SnipeR (101):

و لما اقول أم قحف قريه عندنا يبقى أكيد عارف القحف شنو مش كدا برضو يا جماعة الخير

واتحداك خشى انتى بدون مساعدة صديق .... وهادى صلعتى كان تجيبى الخمسين ماركتك المسجله دى :SnipeR (59):

قوس قزح
04-06-2011, 03:02 PM
شيخ الباشا ، ياخي ما تخلي الغتاتة والمزاوغة دي .. انت القحف ده ما تقول معناه عديل ، شنو قاعد تلف وتدور .. اللون البيجي ده ماب يعجبنيش يا أ سود يا ابيض ، عموما نحن بنعتبر لااسع عندك اتنين صاح لامن تفصل لينا في موضوع القحف ده ، لكن بالغت عديل في المروبنات دي ، عارف ذكرتني حكاية حصلت في مستشفى كريمة ايام الزمن زين وقبل كده حكيتا في واحدة من بوستات الاخ عبد الواحد :
قريب من مدينة كريمة هنالك منطقة صغيرة اسمها ( الدّتي) وهذه الدتي لها حكاية غريبة مع امرأة من المنطقة التي قبلها والتي عادة ما تمر عليها وهي في طريقها الى سوق كريمة ( طبعا عن طريق الباصات ) عندما يمر البص بهذه المنطقة تصاب المرأة بحالة غريبة ، حيث تغطي وجهها بثوبها وتبدأ ترجف وتعرق وتعطس الى ان تتخطى منطقة الدّتي وبعداك تتشهد وتستغفر وترجع لي حالتا الطبيعية ، والحكاية دي انا شفتها بي عيني ، كان معانا في مستشفي كريمة طبيب من منطقة الفاشر على ما اظن، اسمو ( صالح امبدي ) جات المرة دي تشكيلو : قالتو يا دكتور( انا عندي حساسية من الدّّّّتي ) قاليها بسيطة تاني ما تاكليها !!! افتكر الدتي نبات بينما هي منطقة ..
القصة دي ما عندها فرق من حكايتك مع المروبنات ، ولمان تعرف معناها حتموت من الضحك ( طبعا على نفسك )

تحياتي يا جميل

الباشا
04-06-2011, 04:13 PM
المروبنات دى يا قوس افتكرتها من فصيلة المربيات وهى على ما أظن حاجة حلوه زيك كدا تصنع إما من البلح الجاييى من كريمه أو تفاح الباوقه أو برتقال يافا أو قرع ود العباس 10 بقرش و 50 هواده وفى الحقيقة هى 100 هواده لكن بركلاويه حكمت بال 50 قلنا خلاص مالو خمسين خمسين .....

وبالأبيض والأسود نقول عن القحف يا ساده يا كرام أنه عندنا له عدة تفسيرات

إما شِرمه أو كسره أو حته من زير أو قله أو كنتوش ( بتعرف الكنتوش ياقوس ) أو برمه أو أى اناء يصنع من الفخار ( وللعلم بس البرمه غير الزير )

أو آخر الزير إذا كان فارغ أو شبه فارغ وأدخلت فيه الكوز:SnipeR (76): وسمعت صوت الكوز بيطرقع نقول وصل القحف

وبرضو بنقول على قشرة النخره أو الشى الجاف اليطلع من النخرة ( لامواخذه )... برضو قحفه

ودى بنطلقها على الزول البخيل يقول ليك ده والله قحفة نخرتوا ما يتبرع بيها

أها شنو ليك ؟ بالله ما أخير من ...... :SnipeR (25):

قوس قزح
04-06-2011, 07:55 PM
ايوه كده عجبـتني .. !! غايتو جننت القحف جن ، وما اظن تاني في زول بينساهو ، وبي كده استحقيت ال50% بكل جدارة .. اها نشوف لا باكر انبقى مافي زول عرف الباقات ، بجي اوري معناهن ونضيف كلمات جديدة ..

لقد اثريت البوست ، ربنا يديك ألف عافية

عبد الواحد محمد
04-06-2011, 10:06 PM
ونسيت قحف البطيخ كمان يا باشا
وهو ان تاكل البطيخة حتى تترك قشرتها لتشبه قحف الزير
ثم تنظر بها الى الشمس
فاذا لم لم يظهر لك ضوء الشمس من خلال القحف
فاذن انت لم تاكلها جيدا فتعيد
الكرة وهكذا حتى تبين لك عين الشمس ..
شنو بالله دي عليكم الله يا قوس ويا باشا ؟؟ ما قوية ؟؟؟؟
العرموص دا شغل بنيايين وكدا وهو يعني الفتحة بين
المدماك والمدماك الذي يليله او الفتحة بين الطوبة واختها
ولمن اتثقفنا شوية سميناهو الجوينت..
الكلجوية هي السمبرية
والبجا بجا هو توأمها ذلك الابيض
كليا ويسمى باابي الرهيو او طائر البقر
وهذه التسمية دارفورية ومعروف عن البجا بجا انه طائر
كسول ينتظر السمبر ليبني بيتا ويقوم هو
بتشليع بيت السمبر ليبني بيته
ويبدو انه ضعيف النظر اذ انه يحط على ظهر البقر لتقوم
الابقار باثارة الجراد والحشرات اثناء
مشيها فيراها هو فيقوم بالتقاطها
وكنا صغارا نغني للسمبر او الكلجو مع قدوم الخريف
كلجو كلاجة
عين الداجة
تلدي متين
تلدي خريف
سنة البتيخ
والكلجوية او السمبرية ومعها ابو الرهيو او
البجا بجا من الطيور المهاجرة اذ
انها تقطع مسافات طويلة جدا
لتاتي الى السودان ويقال انها
تروح الى الحبشة ثم تعود الى السودان
وتعشق اشجارالهجليج والنيم
حيث يبنى اعشاشها فيهما

قوس قزح
04-06-2011, 11:54 PM
والله يا عبد الواحد قوية وقوية جدا ، لكن اذا كان اكل البطيخ بقى بالليل ، الواحد يسوي شنو !! ينتظر باكر لامن الشمس تشرق ويتأكد من اكلو ليها ؟؟ غايتو انا اول مرة اسمع بي قحف البطيخ ولله في خلقه شئون ..
اجابتك للعرموص اجابة صحيحة 100 % وغالبا هو الفتحة بين الطوبة والطوبة لاجل ان تملأ بالاسمنت او الطين لتماسك البناء ..
شرح رائع وممتع للكلوجية والبجا بجا ومنكم نستفيد يا شيخ عبد الواحد ..
باقي لينا المروبنات والحشنكرت .. ( وينك يا نوارة )

مع خالص تحياتي

نوارة البركل
04-09-2011, 01:30 PM
كدي خلو عمنا القوس يديكم خمسة كلمات شايقية كاملة الدسم .. بس ان شاء الله ما يبقى قالوها قبل ده :

1- العرموص
جاوبوهـا
2- الحِشِنـْكِرِتْ
على قول الباشا لو شكلتها بالفرنسى الكلمة دى ما سمعنا بيها
3- الفرناغة
الاجابة صحيحة
4- الكستبانة ( يقوليك والله انا احشرك في كستبانة )
الاجابة صحيحة
5- القحف
الاجابة صحيحة
6- المروبنات
دي اجابتها عندي حيضان البرسيم عندما يتم تسويتها ( الحيضان مروبنات يعنى جاهزات للزراعة )



( بركلاوية ما معانا عشان كاشفة الحكاية )


قوس قزح ما فى زول غيرك محن الباشا ( محن يعنى حيروا )

الباشا
04-09-2011, 01:48 PM
وبي كده استحقيت ال50% بكل جدارة .. اها نشوف لا باكر انبقى مافي زول عرف الباقات ، بجي اوري معناهن ونضيف كلمات جديدة ..




ياقوس حرام عليك تساوينى بالبركلاويه ... 50 % دى ماركه مسجله ليها فلازم تدى اخوك 10 % بونص عشان تكمل 60 % كيتاً فيها بس

شايف عبدالواحد لقط واحده وهى العرموص ... اول مره اسمع بيها .... بس كربها تمام الله يديه العافيه



اجابتك للعرموص اجابة صحيحة 100 %

باقي لينا المروبنات والحشنكرت .. ( وينك يا نوارة )





قلت لى كيف ؟؟؟ عاوز النواره تشرح المروبنات والحشنكرت

يخيل لى والله أعلم انه الكلمتين ديل قالهم شاينيز سنجك



وأهو رد النوارة

2- الحِشِنـْكِرِتْ
على قول الباشا لو شكلتها بالفرنسى الكلمة دى ما سمعنا بيها



يعنى ياقوس الحشنكرت دى إلا ندور عليها فى الشانزليزيه أو حوارى بكين

بركلاويه
04-09-2011, 07:26 PM
ياقوس حرام عليك تساوينى بالبركلاويه ... 50 % دى ماركه مسجله ليها فلازم تدى اخوك 10 % بونص عشان تكمل 60 % كيتاً فيها بس


شايف عبدالواحد لقط واحده وهى العرموص ... اول مره اسمع بيها .... بس كربها تمام الله يديه العافيه





قلت لى كيف ؟؟؟ عاوز النواره تشرح المروبنات والحشنكرت

يخيل لى والله أعلم انه الكلمتين ديل قالهم شاينيز سنجك



وأهو رد النوارة

2- الحِشِنـْكِرِتْ
على قول الباشا لو شكلتها بالفرنسى الكلمة دى ما سمعنا بيها



يعنى ياقوس الحشنكرت دى إلا ندور عليها فى الشانزليزيه أو حوارى بكين










الباشا + والنواره = مرور بالعافية
الباشا طلع فعلا باشا بس باشا معاصر ( شعيرية )
نوارة بت البركل الحنكوشة فضحتينا فضيحة ... 50% يعني رسوب الله يرحم ايام زمان

اتصلوا تلفون عشان اغششكم اجابة الحشنكرت يا عااااالم يا .........:oo5o.com (27):
اما استاذي عبد الواحد ابو 1% نتمنى له النجاح في المرات القادمة
بمدرسة النجاح لم ينجح احد:SnipeR (14):
بس:SnipeR (46):

الباشا
04-10-2011, 09:27 AM
نوارة بت البركل الحنكوشة فضحتينا فضيحة ... 50%
اتصلوا تلفون عشان اغششكم اجابة الحشنكرت يا عااااالم يا .........:oo5o.com (27):






2- الحِشِنـْكِرِتْ




( بركلاوية ما معانا )





إنتو يا جماعه كلام القوس ده مكتوب بالصينى ؟؟

مش قال البركلاويه دى ما معانا !!

وطيب .... هسع الجابك هنا شنو ؟؟؟

نواره قولى لخيتك دى أختينا كدى كدى

خلينا نشوف آخرة الحِشِنـْكِرِتْ دى وين

فكر معانا يا عبدالواحد

بركلاويه
04-10-2011, 11:39 AM
إنتو يا جماعه كلام القوس ده مكتوب بالصينى ؟؟


مش قال البركلاويه دى ما معانا !!

وطيب .... هسع الجابك هنا شنو ؟؟؟

نواره قولى لخيتك دى أختينا كدى كدى

خلينا نشوف آخرة الحِشِنـْكِرِتْ دى وين


فكر معانا يا عبدالواحد


فعلا عالم حناكيش ...
ممنوع الاتصال بصديق :icon28:... امس استاذ عبد الواحد كان بكلم في القوس :SnipeR (97):
يعني موضوعكم ضارب مخستق ...
واوعكم تقوقلوها ... لأنو عمكم قوقل لسه ما لحق يعرف حاجة :SnipeR (43):

الباشا
04-10-2011, 01:28 PM
فعلا عالم حناكيش ...





:SnipeR (43):


شوف يا سعادة الريس .. نحن نشجب ونستنكر .. وحنعتصم فى ميدان ام دفسوا

:SnipeR (11)::SnipeR (11)::SnipeR (11):

إذا ما جبت الدورية وطلعت الناس المشاغبين ديل بره ... مش انت اصدرت امر ؟!

التنفيذ يا ريئس ...... التنفيذ يا رئيس .... التنفيذ يا رئيس

الاستاذه دى حمتنا نفكر ..... ودى جريمه يعاقب عليها مجلس حقوق المفكرين:SnipeR (1):

عبد الواحد محمد
04-10-2011, 10:25 PM
سافكر قليلا في هذا الحشنكرت
ثم سآتيكم بالخبر اليقين من جهينة نفسه
واليوم انا تعب بعض الشئ
ولكن في الغد ان شاء الله ساتي ومعي بعض غريب الكلم
يستعصى حتى على غلاة المخرفين ناهيك عن ناس بركلاوية
==========
يلا يا اخوان
ختمنا بالتحلية دي
تاني مافي داعي للشمام بعد المنقة
ولا بيقولو شنو ؟؟؟

الباشا
04-11-2011, 04:02 PM
سافكر قليلا في هذا الحشنكرت


في الغد ان شاء الله ساتي ومعي بعض غريب الكلم
يستعصى حتى على غلاة المخرفين ناهيك عن ناس بركلاوية
==========


فى الانتظار....

هات الغرائب وتعال بس

الباشا
04-12-2011, 10:46 AM
وعلى بال ما يجى القوس يحل لينا معضلة الحِشِنـْكِرِتْ


هاكم العشره ديل


الرِهَابْ

الرماضه

العجاجه

الكشحه

الحسكنيت

الضريسه

الموليته

أم تكشو

الدقوقه

الحنبك


وراجعين بإذن الله

الباشا
04-13-2011, 10:49 AM
وينك يا الحِشِنـْكِرِتْ



وينك يا قوسنا ؟؟

عبدالواحد .... وعدتنا بكم كلمه ... وينك ؟

بركلاويه
04-13-2011, 11:34 AM
وينك يا الحِشِنـْكِرِتْ




وينك يا قوسنا ؟؟





صباح الحِشِنـْكِرِتْ اقصد صباح الخير
خلاص قلنا الزيادي قصدي الرووب؟؟؟؟:011::SnipeR (98):
تدفع كم ؟؟؟:SnipeR (25):

الباشا
04-13-2011, 03:04 PM
صباح الحِشِنـْكِرِتْ اقصد صباح الخير


خلاص قلنا الزيادي قصدي الرووب؟؟؟؟:011:
تدفع كم ؟؟؟:


دنيا آخر زمن بس

أستاذه ... ما تسمع كلام الناظر

هو الريس مش قال :

( بركلاوية ما معانا )

لا بندفع ولا بندفع ... عينا للبلوشى ... نكع ليه ؟؟؟

الباشا
04-18-2011, 11:04 AM
وعلى بال ما يجى القوس يحل لينا معضلة الحِشِنـْكِرِتْ



هاكم العشره ديل


الرِهَابْ

الرماضه

العجاجه

الكشحه

الحسكنيت

الضريسه

الموليته

أم تكشو

الدقوقه

الحنبك






ومالو ..... نعيد تااااانى

وبرضو فى إنتظار القوس يحل لينا معضلة الحِشِنـْكِرِتْ

نوارة البركل
04-18-2011, 02:28 PM
وعلى بال ما يجى القوس يحل لينا معضلة الحِشِنـْكِرِتْ
الحشنكرت دي يا باشا ما حصلتش في الشمالية



هاكم العشره ديل
القحة ولا صمة الخشم نحاول


الرِهَابْ
الشئ البعيد جداً جداً ولا يمكن رؤيته بوضوح

الرماضه
دي ما معانا

العجاجه
التراب الناعمة الناتجة عن الهواء الشديد

الكشحه
خمشة تراب تاخذها بيدك وترمي بها بعيد في الهواء

الحسكنيت
عشب يقوم لوحده في الخلاء

الضريسه
نبات متطفل يقوم وسط البرسيم ويحمل شوك صغير مؤلم

الموليته
كلمة اكيد من الجزيرة

أم تكشو
كلمة اكيد من الجزيرة

الدقوقه
مجموعة بهارات مخلوطة ومدقوقة

الحنبك
شجرة بها ثمرة صغيرة أصغر من النبق



وراجعين بإذن الله


انا عارفة نفسي راسبة لكن برضو احسن من الهروب ومن الامتحان والبدائل والملاحق يا بركلاوية

الباشا
04-18-2011, 05:21 PM
http://www.marafi-alebda.com/vb/mravi/misc/quotes/quot-bot-left.gif

القحة ولا صمة الخشم نحاول
صحه ... صحه

الرِهَابْ
الشئ البعيد جداً جداً ولا يمكن رؤيته بوضوح
معقول بس يا نواره .. ولا حتى بنضارة معظمه ؟؟؟


الرماضه
دي ما معانا

معاك حق .... دى ماركة مسجله للجزيره

العجاجه
التراب الناعمة الناتجة عن الهواء الشديد
يعنى ...... دقت فى العرضه بس دخلت قون... ونديك تفسير كامل فيما بعد


الكشحه
خمشة تراب تاخذها بيدك وترمي بها بعيد في الهواء
برضو مش بطال ... بس انا قاصد حاجه تانيه

الحسكنيت
عشب يقوم لوحده في الخلاء
أها دى من عينة الحشنكرت حقت القوس


الضريسه
نبات متطفل يقوم وسط البرسيم ويحمل شوك صغير مؤلم
حلوه متطفل دى ..... ميه ميه

الموليته
كلمة اكيد من الجزيرة
ماركة مسجله للجزيره وناس البحر كمان


أم تكشو
كلمة اكيد من الجزيرة

ودى كمان برضو جزيره


الدقوقه
مجموعة بهارات مخلوطة ومدقوقة
ابداً ما اتخيلتك تجيبيها صاح ... بس كمان عندى تفسير اشمل


الحنبك
شجرة بها ثمرة صغيرة أصغر من النبق

لا دى عاوزه تفسير اكتر ... كدا ما ينفع



انا عارفة نفسي راسبة لكن برضو احسن من الهروب ومن الامتحان والبدائل والملاحق يا بركلاوية


يلا يا بركلاويه قيمى خيتك

مجامله يوك

بركلاويه
04-18-2011, 07:03 PM
انا عارفة نفسي راســــــبة لكن برضو احسن من الهروب ومن الامتحان والبدائل والملاحق يا بركلاوية



تصدقى كان احسن الهروب
http://dc06.arabsh.com/i/01065/qzwjz6q1au8j.jpg
والبدائل
والملاحق


أول مرة اشوف لى رسوب بى امتياز
الله يستر على الاجيال القادمة

http://forum.roytk.com/storeimg/img_1288391590_968.jpg

نوارة البركل
04-20-2011, 03:27 PM
http://forum.roytk.com/storeimg/img_1288391590_968.jpg

والله العظيم ضحكتينى
وضحكتي عبودى نمبر ون ونمبر تو
هسع تأتينا جهينة بالخبر اليقين
كلها كلمات جزائرية باعتراف الباشا نفسه

عبد الواحد محمد
04-20-2011, 05:42 PM
وعلى بال ما يجى القوس يحل لينا معضلة الحِشِنـْكِرِتْ



هاكم العشره ديل


الرِهَابْ= السراب


الرماضه = الرمضاء ( الرمال الحارة)


العجاجه = الغبار او الكتاحة


الكشحه

الحسكنيت =(عشب شوكي من فصيلة النجيليات


الضريسه= عشب شوكي زاحف


الموليته = عشب مر الطعم يستعمل كسلطة بالدكوة


أم تكشو =ملاح الخدرة المجففة


الدقوقه = ملاح التقلية


الحنبك = ثمار الطندب



وراجعين بإذن الله








ونحن ايضا راجعون باذن الله

قوس قزح
04-20-2011, 07:38 PM
آسف والله يا جماعة خليتكن معلقين في المروبنات وخشومكن مليانة حشنكرت ..
اذكر ونحن صغار لمان يكون الفطور بي ملاح تقلية فاهم والقراصة مردومة فوق الصحن وصحن البصل والشطة يشهيك الاكل ونقول بسم الله نبدا .. اول حاجة يقولا ابوي : يا ولادي خلو بالكم من الحشنكرت ؟؟
الحشنكرت : هي العضام الدقيقة جدا البتكون موجودة في الملاح والله الطبيخ نتيجة عدم التكسير الجيد للحمة او يكون الساطور ما سنين ، تقوم العضام تندشدش وينتج عنه الحشنكرت ..
المروبنات : وفي رواية اخرى ( الكشمبيرات ) : هي عبارة عن تلاتة عصايات مثبتة بي حلقة من فوق تجعلها توسع وتضيع ، يعني زي السيبة بتاعة الكاميرا .. ودي بيعلقوا فيها السعن ، اما لأجل خش اللبن او ابتغاء المويةالباااااااردة


عالم حناكيش

الباشا
04-22-2011, 09:18 PM
الحشنكرت : هي العضام الدقيقة جدا البتكون موجودة في الملاح والله الطبيخ نتيجة عدم التكسير الجيد للحمة او يكون الساطور ما سنين ، تقوم العضام تندشدش وينتج عنه الحشنكرت ..

المروبنات : وفي رواية اخرى ( الكشمبيرات ) : هي عبارة عن تلاتة عصايات مثبتة بي حلقة من فوق تجعلها توسع وتضيع ، يعني زي السيبة بتاعة الكاميرا .. ودي بيعلقوا فيها السعن ، اما لأجل خش اللبن او ابتغاء المويةالباااااااردة



عالم حناكيش


على كل يا قوس شوف حناكيش السناجك وين ؟؟؟


http://dc06.arabsh.com/i/01065/qzwjz6q1au8j.jpg

نحن بره ..... نحن ناس جزيره سااااااى


الحشنكرت حقتكم ده ذكرتنى بكلمة كراك باللغه الانجليزيه

يعنى لو الواحد ركز شويه ومع النطق كان ممكن يحل اللغز ده

وبعدين ايه حكاية الكشمبيرات دى ؟؟ قصدك هى تعنى المروبنات !!!
بقت عليك حكاية ( وفسر الماء ..... )

يديك العافية يا قوس

الباشا
04-22-2011, 09:28 PM
http://forum.roytk.com/storeimg/img_1288391590_968.jpg


كلها كلمات جزائرية




منو القال ليك كلمات جزائريه ؟؟؟؟؟؟

دى كلمات ليبيه من عينة دار دار ... وزنقه زنقه

www.youtube.com/results?search_query=%D8%B9%D8%B1%D8%B3+%D8%AE%D9% 84%D9%8A%D8%AC%D9%89+%D8%B2%D9%86%D9%82%D9%87+&aq=f (http://www.youtube.com/results?search_query=%D8%B9%D8%B1%D8%B3+%D8%AE%D9% 84%D9%8A%D8%AC%D9%89+%D8%B2%D9%86%D9%82%D9%87+&aq=f)

الباشا
04-22-2011, 09:34 PM
الدقوقه = ملاح التقلية


ونحن ايضا راجعون باذن الله



كله ميه ميه يا عبدالواحد ما عدا الدقوقه

جايز عندكم كده ... بس سبحان الله النوارة كانت اقرب للإجابه

الدقوقه عندنا هى خلطة بهارات بنستعملها لما ناكل كسره لقمه حاااااااره بطماطم

أها البهارات البنختها بنسميها دقوقه وغالباً شطه مع الملح مع شوية شمار وتوم وبصل

الباشا
04-25-2011, 02:43 PM
فى تعبيرات سودانيه لا يوجد لها مثيل فى اللغة العربيه ولا حتى فى اللهجات المنبثقة من العربية ( حلوه المنبثقة دى مش كدا ؟)

كتير منها مستخدم باستمرار خاصه عن الجنس الناعم .... فعاوز اعرف معناها ومتى تستخدم


سجم خشمك

الله قال بى قولك

كر على

البلالى والردا على

يقطعك يحتحتك

واااا شريرى

ووووب منك

شديتك فوق ود حسونه

الرماد كالنى

الجنا المسخوت ده

ديل عشره بس والباقى عاوزنه منكم


وكما تلاحظوا معظمها نسائيه ...... مش كدا وبس عندنا فى عرفنا عيب الاولاد يقولوا التعابير دى لانها خاصه بالنساء ولكن كتير ما نسمعهم يرددوها وحتى الآن

بركلاويه
04-25-2011, 03:43 PM
فى تعبيرات سودانيه لا يوجد لها مثيل فى اللغة العربيه ولا حتى فى اللهجات المنبثقة من العربية ( حلوه المنبثقة دى مش كدا ؟)


كتير منها مستخدم باستمرار خاصه عن الجنس الناعم .... فعاوز اعرف معناها ومتى تستخدم


سجم خشمك

الله قال بى قولك

كر على

البلالى والردا على

يقطعك يحتحتك

واااا شريرى

ووووب منك

شديتك فوق ود حسونه

الرماد كالنى

الجنا المسخوت ده

ديل عشره بس والباقى عاوزنه منكم


وكما تلاحظوا معظمها نسائيه ...... مش كدا وبس عندنا فى عرفنا عيب الاولاد يقولوا التعابير دى لانها خاصه بالنساء ولكن كتير ما نسمعهم يرددوها وحتى الآن



كُر علي

والمنبثقة

ديل اكتر اتنين عجبوني
والباقي ما قاعده استخدمو
شوف نوارة ( الحنكوشة)
قايتو كم مره سمعتها بتقول لــ بتها الوحيدة
الله قال بى قولِك:SnipeR (40): ( لو اتأخرتي)
والكلام الفوق ده ( انبثق من عبارة كر علي):SnipeR (72)::SnipeR (72):
لكن يا استاذ الباشا ما بسألك ديل جبتهم من وين؟؟؟
بالله عليك الدكتوره سارة بتعرف فيهم وحده؟؟؟:a575f059f95cc9160e9

نوارة البركل
05-02-2011, 03:52 PM
فى تعبيرات سودانيه لا يوجد لها مثيل فى اللغة العربيه ولا حتى فى اللهجات المنبثقة من العربية ( حلوه المنبثقة دى مش كدا ؟)


كتير منها مستخدم باستمرار خاصه عن الجنس الناعم .... فعاوز اعرف معناها ومتى تستخدم
والله يا الباشا انت موسوعة سودانية عالمية لم ولن تتكرر ولذلك لا بد من التوثيق لك ومنك لكي لا تندثر هذه الكلمات واللهجات
والله كلمات سمعتها كتير جداً .. لكن بعرف القصد منها وبس
وبرضو بنحاول ولو رسبنا


سجم خشمك
انتى قاعدة تشربي في الجبنة ولدك مشى الظلط

الله قال بى قولك
والله يا عبودى اجي القاك ما حفظت سورة النور
الله قال بي قولك

كر على
الجاب ليك الحمى شنو يا ولدي

البلالى والردا على
تقريبا ما سمعت بيها لكن تشبه كر على

يقطعك يحتحتك
ما سمعت بيها لكن تقريباً دعوة شر

واااا شريرى
تقال للزول لما يصيبه مكروه

ووووب منك
تقال لما الطفل يعمل حاج غلط وتتغاظ منو

شديتك فوق ود حسونه
دي تبع ناس الجزيرة جزيرية بحتة

الرماد كالنى
مثلا واحد ولده يسقط في الامتحان ..
الباشا مسؤل من الخير انت الرماد كال حماد مناسبتها شنو

الجنا المسخوت ده
يعني تقال للجنا الشقي والذكي والمستهبل

ديل عشره بس والباقى عاوزنه منكم
تابع ونحن معك سنحاول نشوف ناس حبوبة


وكما تلاحظوا معظمها نسائيه ...... مش كدا وبس عندنا فى عرفنا عيب الاولاد يقولوا التعابير دى لانها خاصه بالنساء ولكن كتير ما نسمعهم يرددوها وحتى الآن



فعلا كلها نسائية ولو في راجل قالا حيبقى مسخرة
الباشا الموسوعة شكرا لأنك عملت لينا رفريش
بي هناك القحة ولا صمة الخشم قول لي بركلاوية سيبي الذكاء حقك دا واظهري عديل وكمان عبد الواحد يتاوق ويمرق
وينك يا ناس اظهروا وبانو وعليكم المان

عبد الواحد محمد
05-02-2011, 08:19 PM
ام تقلقل
الجوغان
الكبجن
ام عليا او العليا
القو
ابو الدربان


وجاي راجع

نوارة البركل
05-02-2011, 09:47 PM
ام تقلقل
http://byfiles.storage.live.com/y1pdVjLS_WLf_O12kzBnAXiP1vZ3Z1k0GXabNHDR-BVMye4zxzvRVX0w8_sfHIhfPTQL9DmjU_ofek
الجوغان
http://byfiles.storage.live.com/y1pdVjLS_WLf_O12kzBnAXiP1vZ3Z1k0GXabNHDR-BVMye4zxzvRVX0w8_sfHIhfPTQL9DmjU_ofek
الكبجن
http://byfiles.storage.live.com/y1pdVjLS_WLf_O12kzBnAXiP1vZ3Z1k0GXabNHDR-BVMye4zxzvRVX0w8_sfHIhfPTQL9DmjU_ofek
ام عليا او العليا
http://byfiles.storage.live.com/y1pdVjLS_WLf_O12kzBnAXiP1vZ3Z1k0GXabNHDR-BVMye4zxzvRVX0w8_sfHIhfPTQL9DmjU_ofek
القو
ابو الدربان
http://byfiles.storage.live.com/y1pdVjLS_WLf_O12kzBnAXiP1vZ3Z1k0GXabNHDR-BVMye4zxzvRVX0w8_sfHIhfPTQL9DmjU_ofek


وجاي راجع

http://1.bp.blogspot.com/_cWlyAjsOHUA/STsUmxwgFvI/AAAAAAAAAKQ/w1EpF-aE7KI/s400/question-mark3a.jpg

والله العظيم كلهن فاشريات بحت

الحقني وانجدني يا الباشا
خايفة احلف اقول كلمات عسكرية واطلع كذابة
احسن ليا اصمت والصمت في حرم الجمال في حد ذاته جمال
يا استاذي تعال راجع بي سرعة يحلنا الحلَ بلة

||النادرهـ ~
05-03-2011, 06:14 AM
احم احم

نوارة البركل / ما تبين مسساعدَهـْ منـــي ..؟

<-- انتبهي توافقين لأنِـــي ما عرفت ولا كلمه هههههههه

.........

نوارة البركل
05-03-2011, 08:02 AM
احم احم


نوارة البركل / ما تبين مسساعدَهـْ منـــي ..؟

<-- انتبهي توافقين لأنِـــي ما عرفت ولا كلمه هههههههه


.........




النادرة اخيتي

http://vb.arabseyes.com/uploaded/20755_1186571871.gif

http://www.hutteensc.com/forum/imgcache/18203.imgcache

الباشا
05-03-2011, 11:08 AM
احم احم





نوارة البركل / ما تبين مسساعدَهـْ منـــي ..؟

<-- انتبهي توافقين لأنِـــي ما عرفت ولا كلمه هههههههه


.........


كدى باللول أستأذنكم بالترحيب بهذه الشخصيه المميزه " iiالنادرة ~ " والتى غابت عنا كثيراً لنرحب بعودتها

ما جعلنى ارحب بالنادره هى إهتمامها باللهجه والانسان السودانى فهى من مواطنات المملكه

وتلميذة الاستاذه البركلاويه وصديقة لكل مبدعى المرافى فلها منا كل التحية والتقدير والتجله

طبعاً يا النادرة كل التعبيرات فى المشاركه السابقه لمشاركة المارشال عبدالواحد ( وهذا لقبه عندى إعتباراً من هذا اليوم ) الاخيره هى تعبيرات نسائية سودانيه بحته

أما كلمات أخونا جناب المارشال عبدالواحد وذى ما قالت النواره " فاشريه " بمعنى أنها من لهجات أهل الفاشر

والفاشر دى مدينه من أجمل مدن غرب السودان و هي عاصمة ولاية شمال دارفور ( التى شغلت وما زالت تشغل العالم كله ) فى السودان ،

وتبعد الفاشر عن مدينة نيالا عاصمة جنوب دارفور بحوالى 195 كيلومترا باتجاه الشمال الشرقي.

طبعا النواره ما قدرت تعرف كلمات المارشال ولا حتى عمك الباشا كلمة واحده بس هى القو العرفتها

لانها مستخدمه فى منطقة من مناطق اهلنا العسيلات بشرق النيل جهة الخرطوم بحرى وهى نوع من الحشائش الجافه التى تتجمع وتتكور فى شكل بالون كبير تحمله اخف انواع الرياح .

تعرفى يا النادرة اتمنى تشاركينا بكلمات خاصة بمنطقتكم والتى هى بجوار شمال وادى النيل فى الناحية الشرقية لضفة البحر الاحمر الذى يفصل بين بلدنا السودان ووطنك السعوديه

الباشا
05-03-2011, 02:44 PM
قول لي بركلاوية سيبي الذكاء حقك دا واظهري عديل
وكمان عبد الواحد يتاوق ويمرق

وينك يا ناس اظهروا وبانو وعليكم المان



البركلاويه شكلها كدا بقت من مواطنات شمال المملكة - تبوكيه يعنى - اخدت على ناس النادرة ونست لهجتنا " كُرْ عليها " هو التعبير الوحيد العرفتو ومش عارف إذا كان دا ذكاء وللا زوغان وبينى وبينكم كدا " الاتنين " المارشال عبدالواحد ما ليه فى التعبيرات النسائيه يسمعها بس ويطنشها تماماً ويقول ليك " كلام حريم بس سيبك منهن " :SnipeR (99):

أما بقية الاعضاء .... بالجد مستغرب ليه الاحجام فى دخول البوست السودانى ده

طبعاً يا النواره إنتى شرحتى اسباب استخدام هذه التعبيرات وده جزء من الحل ... العاوزو عمك الباشا هو تفسير الكلمات دى معناها شنو وأيه الأصل فيها ... يعنى مثلا " كـــــر على " دى ماهو الكر وما أصل الكر دى هل هى لغة عربيه أم نوبيه أم سواحيليه مثلاً وهل ممكن يكون ليها جزور تركيه أو أوربيه :SnipeR (78): مثلاً ذى كلمات داندرمه وهى تركيه بحته بس مستخدمه عندنا فى السودان وذى كلمة " لورى " بريطانية بحته الخ ... يعنى زمان سمعت أنه كر ده برضو اسم من اسماء ابليس اللعين يعنى بقول سمع وبس تأكيد مافى

||النادرهـ ~
05-03-2011, 09:58 PM
وحشتوووني والله .. ووحشني هذا البوسست خآصصة :oo5o.com (25):


نوارة البركل / يا هلاَ ومرحبــا فيك :SnipeR (87):

الباشا يا باشا يا كبير .. احترامي لك ولذوقك بالترحيب ..
مو كأنك ذاكر سيرتي الذاتية كامله خخخخخخخ

يعني النوارة ما عرفت معنى الكلمات ، ذكرتوني بلهجة الجنوبين عندنا بالسعودية عني أنا ما بفهمها خاااالص ،
بس توضيحك يالباشا نورني وأكيد نوّر النوارة <- J

وبالنسبة لبعض الكلمات راح أجمع بعضهن وبختبر فيها أول وحده بركلاويه بشوفها تعرف معناها والا لا ..


الباشا / أشوف توقيعك يخوّف ، ايش صاير لك مع الأسد خخخخش

بركلاويه
05-04-2011, 12:26 AM
وحشتوووني والله .. ووحشني هذا البوسست خآصصة :oo5o.com (25):



نوارة البركل / يا هلاَ ومرحبــا فيك :sniper (87):

الباشا يا باشا يا كبير .. احترامي لك ولذوقك بالترحيب ..
مو كأنك ذاكر سيرتي الذاتية كامله خخخخخخخ

يعني النوارة ما عرفت معنى الكلمات ، ذكرتوني بلهجة الجنوبين عندنا بالسعودية عني أنا ما بفهمها خاااالص ،
بس توضيحك يالباشا نورني وأكيد نوّر النوارة <- j

وبالنسبة لبعض الكلمات راح أجمع بعضهن وبختبر فيها أول وحده بركلاويه بشوفها تعرف معناها والا لا ..


الباشا / أشوف توقيعك يخوّف ، ايش صاير لك مع الأسد خخخخش



والله ليك وحشة يا حياتي

والله اني اشتقتك

وانا حاضرة بس انتى تعالي لأنو الجمال بجي معاك

بس فكيني من كلمات الاستاذ عبد والواحد وكمان عمك الباشا دي احسن منها اللغة الفرنسية

الباشا
05-04-2011, 03:49 PM
الباشا / أشوف توقيعك يخوّف ، ايش صاير لك مع الأسد خخخخش


http://forum.roytk.com/storeimg/img_1288391590_968.jpg


هو دا توقيع الباشوات ما هو واضح
الباشا الكبير
فى النص والباشوات الصغار حواليه

http://www.up.7irtny.com//uploads/images/7irtny-3b15a2c4dd.gif (http://www.marafi-alebda.com/vb/showthread.php?t=17&page=14.)

الباشا
05-04-2011, 04:09 PM
وبالنسبة لبعض الكلمات راح أجمع بعضهن
وبختبر فيها أول وحده بركلاويه بشوفها تعرف معناها والا لا ..




فى إنتظار كلماتك يا النادرة ولاحظى أنه عدد كبير من الاعضاء مقيمين فى المملكة والآخرين أكيد سيحاولوا .... عشان كدا بتصور حتكون ساهلة علي المقيمين فى المملكة خاصه البركلاويه لسببين أولاً لانها عايشه فى منطقتكم وثانياً لانها نست اللهجه السودانيه ومش السودانيه وبس حتى السنجكاويه نستها :SnipeR (85):ولولا القوس اظنها ما كان عتبت جبل البركل .. والشاهد النواره .... الله يكون فى عونها بس ... كل الاختبارات واخده كعكعات بالصوانى :SnipeR (63):

قوس قزح
05-05-2011, 12:31 AM
شيخ عبد الواحد المارشال


شكلكم كده في الغرب عندكم قاموس براكم .. والله كلامك ده ما اظن في زول يعرفو غيرك والله يكون من ناسك .. ونحن ما ناسك ما ناسك !!
غايتو انا عرفت ابو الدربان .. ونحن في الشمالية بنقول ليهو ( ابو الضربان ) وهو حيوان نتن الرائحة يشبه ( الصبرة ) تعرفو الصبرة ؟؟ الصبرة هي الثعلب .. اقل منها حجما وله ذيل منفوش ومتخصص اكل دجاج بس خاصة الديك ابو علعول ..


وهاكم الستة ديل :

1- الكتـِّقـة
2- الكـَرْكـَتـّي
3- العـَمَيوقة
4- صوت الكاجنيب
5- اللقـَدابة
6 اللّـوَر


يالله يا نوارة واختها الحنكوشة

نوارة البركل
05-06-2011, 04:29 PM
شيخ عبد الواحد المارشال



شكلكم كده في الغرب عندكم قاموس براكم .. والله كلامك ده ما اظن في زول يعرفو غيرك والله يكون من ناسك .. ونحن ما ناسك ما ناسك !!
غايتو انا عرفت ابو الدربان .. ونحن في الشمالية بنقول ليهو ( ابو الضربان ) وهو حيوان نتن الرائحة يشبه ( الصبرة ) تعرفو الصبرة ؟؟ الصبرة هي الثعلب .. اقل منها حجما وله ذيل منفوش ومتخصص اكل دجاج بس خاصة الديك ابو علعول ..


وهاكم الستة ديل :

1- الكتـِّقـة
والله يا قوس رغم انو الزومة جدعة حجر من البركل
لكن عندكم كلمات اخير منها حقت المارشال
2- الكـَرْكـَتـّي
طين البحر ( النيل ) يوجد في الجرف لما النيل يفيض وينزل
3- العـَمَيوقة
نبات متطفل يقوم مع الزراعة ومتى ما وجد الماء يقوم
4- صوت الكاجنيب
دى برضها من الزومة
5- اللقـَدابة
هى البرندة او الراكوبة
6 اللّـوَر
جدول الماء الكبير



يالله يا نوارة واختها الحنكوشة




:thumbup::thumbup::thumbup:

انت يا قوس قزح :SnipeR (69):مسؤل من الخير عبد الواحد دا مشى وين
خلى لينا الفرنساوي دا وفات فوتة واحدة
اظهر وبان يا مارشال:SnipeR (69): .. عجبتني مارشال:SnipeR (69): دي

الباشا
05-06-2011, 07:29 PM
المارشال



غايتو انا عرفت ابو الدربان .. ونحن في الشمالية بنقول ليهو ( ابو الضربان ) وهو حيوان نتن الرائحة يشبه ( الصبرة ) تعرفو الصبرة ؟؟ الصبرة هي الثعلب .. اقل منها حجما وله ذيل منفوش ومتخصص اكل دجاج بس خاصة الديك ابو علعول ..




تعرف يا قوس ابو الدربان ده كان طلع صاح .... نحن فى الجزيره بنقول عليه " أبو العفين " وبالرغم من نتانتو دى برضو راقى و مغرم بالجداد فعلاً " أو الجضاض " بلغة السناجك :SnipeR (26):









وهاكم الستة ديل :

1- الكتـِّقـة
2- الكـَرْكـَتـّي
3- العـَمَيوقة
4- صوت الكاجنيب
5- اللقـَدابة
6 اللّـوَر
7- السبيقه



يالله يا نوارة واختها الحنكوشة




اللقدابه .... اللقدابه ..... اللقدابه كان ما اخاف الكضب اقول هى هى الطينه الماكنه البختوها البنايين فوق السبيقه ( حلوه السبيقه دى ... حأضيفها للسته ليكونوا سبعه ) ...... والله اعلم

قوس قزح
05-06-2011, 07:33 PM
والله يا نوارة قطعتي مصارينا بالضحك .. اضحك الله دوما سنك
انا خايف المارشال يكون هو ذاتو ما عارف معنى كلماتو ديل !! ده والله مو فرنساوي ده ألماني عديل !!!

لكن يا نوارة خذلتيني معقول جايبة 2 من 6 .. ؟ يعني سقوط بي جدارة ، ارجعي راجعي معلوماتك
وين عمنا الباشا الكبير .. برضو زاغ بي وشيهو .. اظنو برضو واقف سلك


اظهر يا باشا

الباشا
05-06-2011, 07:37 PM
:thumbup::thumbup::thumbup:


انت يا قوس قزح :sniper (69):مسؤل من الخير عبد الواحد دا مشى وين
خلى لينا الفرنساوي دا وفات فوتة واحدة

اظهر وبان يا مارشال:sniper (69): .. عجبتني مارشال:sniper (69): دي



فعلاً المارشال رطن لينا بالفرنساوى وزاغ .... قلت لى يا النواره عجبك لقب المارشال .... اها دى عاوزه ليها خروف مظبط ... ولانى سميتو المارشال يبقى الخروف علىّ والسلطه على المارشال والجميع مدعو لحفلة شواء باربى كيو بالعربى فى بحر ابيض .... نفس المكان

بالنسبه لكلمات القوس شكلك كده يا نواره طلعتى حنكوشه أما الحنكوشه المعنيه والله مش عارف حتطلع شنو ؟ ! حتقولوا لى شهاده عربيه ... أزعل منكم .... ناس الشهاده العربيه عندهم قاموس لهجه أحسن من حناكيش السودان واتحدى .....

قوس قزح
05-06-2011, 07:42 PM
سبحان الله يا باشا ، اظن نحن بنكتب في لحظة واحدة .. ودي اجمل لحظة الواحد يكون فيها معاك
بعدين يا باشا يا انت .. السناجك ما ب يقولوا للجداد .. الجضاض .. ياها الجداد ذاتا ما عندنا غيرا .. بس البيض بنقولو جنا الجداد
بعدين اللقدابة غلط 100% ودي من الكلمات الجاوبت عليهم النوارة .. اللقدابة هي الصالة او البرندة في لغة الشوايقة ، اما اللنت قاصدا حقت البنايين والسريقة دي اسمها ( التبانة )


هذا والله اعلم

الباشا
05-06-2011, 07:42 PM
لكن يا نوارة خذلتيني معقول جايبة 2 من 6 .. ؟ يعني سقوط بي جدارة ، ارجعي راجعي معلوماتك
وين عمنا الباشا الكبير .. برضو زاغ بي وشيهو .. اظنو برضو واقف سلك



اظهر يا باشا



هههههههههههههه اوووووووووووووو



والله بضحك وانا قاعد براى فى المكتب

2 من 6 معقول يا النواره أومال الحناكيش حيجيبوا كم ؟؟

انتو عاوزين كورسات مكثفه بين الزومه والبركل ... وبالمطرق :SnipeR (90):

الباشا
05-06-2011, 07:50 PM
سبحان الله يا باشا ، اظن نحن بنكتب في لحظة واحدة .. ودي اجمل لحظة الواحد يكون فيها معاك
بعدين يا باشا يا انت .. السناجك ما ب يقولوا للجداد .. الجضاض .. ياها الجداد ذاتا ما عندنا غيرا .. بس البيض بنقولو جنا الجداد
بعدين اللقدابة غلط 100% ودي من الكلمات الجاوبت عليهم النوارة .. اللقدابة هي الصالة او البرندة في لغة الشوايقة ، اما اللنت قاصدا حقت البنايين والسريقة دي اسمها ( التبانة )



هذا والله اعلم


ياخى كان معانا واحد سنجك اصلوا ما بيقول للجداد غير الجضاض وقعدت اشاغلوا بيها سنين عديده بس الراجل ساب المملكه ورجع السودان اخباره انقطعت منى واتمنى الاقيه تانى .... على كل اسمه خليفه ... بس خليفه ود منو والله ناسى وهسى ساكن فى العزوزاب وين مش عارف ... اما اللقدابه دى اول مره اسمع بيها ... وتفسيرى ليها كان مجرد اجتهاد واهو طلعت احسن من ناس كتيرين :SnipeR (79): وللا مش كدا ؟؟

بركلاويه
05-06-2011, 08:08 PM
http://www.marafi-alebda.com/vb/images/ehdaa_smilies/10.gif

كده يكون احسن الحناكيش ...( باللون المفضل للباشا)

ولى علمك وعلم نوارة يا عاملين فيها مقددنها انتو ( عذرا استاذي على المزح)

فرق شاسع ما بين الزومة والبركل تصدقوا

لمن مشيت الزومة لقيت حاجات كثيرة ما تشبه حقتنا وكان بيعتبروني وقتها متقندفة وشايفة حالى ( حنكوشة يعني http://www.marafi-alebda.com/vb/images/ehdaa_smilies/oh.gif)

واها يانوارة اخدتي الطيش بجدارة http://www.marafi-alebda.com/vb/images/ehdaa_smilies/banana.gifhttp://www.marafi-alebda.com/vb/images/ehdaa_smilies/banana.gifبس استاذي يفضل استاذي الباشاhttp://www.marafi-alebda.com/vb/images/ehdaa_smilies/61.gif

اما الفرنساوي الفاشري حق الزول داك :SnipeR (69):فأنا تبع النادرة صراحة

نوارة البركل
05-07-2011, 12:12 AM
تعرف يا قوس ابو الدربان ده كان طلع صاح .... نحن فى الجزيره بنقول عليه " أبو العفين " وبالرغم من نتانتو دى برضو راقى و مغرم بالجداد فعلاً " أو الجضاض " بلغة السناجك :SnipeR (26):








اللقدابه .... اللقدابه ..... اللقدابه كان ما اخاف الكضب اقول هى هى الطينه الماكنه البختوها البنايين فوق السبيقه ( حلوه السبيقه دى ... حأضيفها للسته ليكونوا سبعه ) ...... والله اعلم


يعني يا عمنا:SnipeR (69): الباشا :SnipeR (69):متشطرين علينا ساي
ولما يجي حق الشمال تسغطوا وبي جدارة
وينك يا ابلة نظيرة تقيمي لينا الباشا
لكن يالباشا السبيقة دي بالغت فيها
تعني عندنا الجنينة
:no::no::oo5o.com (28)::oo5o.com (28):

نوارة البركل
05-07-2011, 12:29 AM
والله يا نوارة قطعتي مصارينا بالضحك .. اضحك الله دوما سنك
انا خايف المارشال يكون هو ذاتو ما عارف معنى كلماتو ديل !! ده والله مو فرنساوي ده ألماني عديل !!!

لكن يا نوارة خذلتيني معقول جايبة 2 من 6 .. ؟ يعني سقوط بي جدارة ، ارجعي راجعي معلوماتك
وين عمنا الباشا الكبير .. برضو زاغ بي وشيهو .. اظنو برضو واقف سلك





وهاكم الستة ديل :


1- الكتـِّقـة
والله يا قوس رغم انو الزومة جدعة حجر من البركل
لكن عندكم كلمات اخير منها حقت المارشال
2- الكـَرْكـَتـّي
طين البحر ( النيل ) يوجد في الجرف لما النيل يفيض وينزل
3- العـَمَيوقة
نبات متطفل يقوم مع الزراعة ومتى ما وجد الماء يقوم
4- صوت الكاجنيب
دى برضها من الزومة
5- اللقـَدابة
هى البرندة او الراكوبة
6 اللّـوَر
جدول الماء الكبير




:icon32:قوس قزح:icon32: قلت لي المارشال احتمال يكون ما عارف كلماتو الفرنساوية دي
هسع بكون بجمع فيهم
يا قوس قزح والله بالجد انتو عندكم كلمات نحنا ما عندنا
وثانيا انا احتج في خطأ :no:في التقييم انا ما ساقطة انا جايبة 3 من 6 :oo5o.com (39):
عندي الكركتي والمعيوقة ( نبات مر مرارة شديدة ويقوم لوحده
والتالتة اللقدابة :oo5o.com (28)::oo5o.com (28):

قوس قزح
05-07-2011, 01:05 AM
غايتو ناس حمباكة بشك ، وكمان تتحايل على التصحيح ، ويرجعوا يعدلوا بعد ما يجمعوا الاوراق ..
العميوقة بلغة الزومة والمعيوقة بلغة البركل .. كانت عندك خطأ واسع يا دوب صححتيها .. النباتات المتطفلة كتيرة جدا .. ولكن هذه العميوقة تتميز بي مرارتا الشديدة لدرجة الغنم ( اعزكم الله) بيقرفو منها ..
كدي بتكون جبتي 3 من 6 .. يعني يا دوب الباص

اما الكتقة : فهي باب الزريبة عبارة عن اعواد مخلفة في بعضها البعض
صوت الكاجنيب : هو جذر اشجار الصنط الصغيرة وهو طويل جدا وذو رائحة نتنة كنا بنلعب بيهو ونحن صغار ( يعني عمليات تحدي ) وهو شبيه بصوت العنج
اللور : دي يشرحوها كيف ؟؟ هو عبارة عن المصب من الجدول الكبير الي الجدول الصغير .. الموية بتجي مندفعة وبتعمل حفرة ، الحفرة دي هي اللور ودايما بيكون فيها باقي موية ، تجي الصباح تلقاها صافية وباردة ، ودي ألذ موية الواحد يشربا .. وقد اشرت الى هذا اللور في واحدة من قصايدي


..............داير إندلاَّ وأصَل طرف الخدار=
دايرلِي قعدة علِي البحر عِنـْدَ العِصِير ومعا الحَمار=
داير أشم ريحة الجروف وإتـْفقـَّـد الشتِل الصُّغار=
وآكـُـل لِي تمراتاً صُفـُرْ يتمقـْرشِـن زيَّ الخِيار=
ومن موية في قعر اللوَرْ أشربلي جغماتاً كـُبار=


والى اللقاء في ستة كلمات من ابو كديس

نوارة البركل
05-07-2011, 01:37 AM
الحمد لله السقطنا ( بالله :SnipeR (69):يا قوس :SnipeR (69):عمرك سمعت زول يقول الحمد لله للسقوط )
انا قلتها لأنها طلعت منك الجمال دا كلو ومنكم نرتقي ومعكم نلتقي
هات من ابو كديس حقك دا ما تخلي صبرة ولا جدادة ( :oo5o.com (7):قال جنا جداد قال :oo5o.com (7):) ..
:SnipeR (101):يا قوس دى بس كنا بنسمعها لما نصل ابو حمد بالقطر ) :SnipeR (101):ياحليلي انا يا بلدنا

الباشا
05-07-2011, 10:36 AM
ما حتتصورا ولن تتخيلوا سعادتى بيكم يا ناس البركل والزومه قدر شنو !! .... والحاصل عندكم ده هو بالظبط العندنا فى الجزيره فمثلاً توجد تعابير وكلمات تختلف عند الناس الساكنه البحر ( وهو ضفاف النيلين الابيض والازرق ) وبين ناس الضهره وهى الجزيره المرويه يعنى من كاب الجداد وانت طالع لحادى قريب المناقل الصعيد يعنى بلغتنا وكمان فى منطقة بنقول عليها الشرق او السافل وهى جهة رفاعة وتمبول وجهة ام ضبان والعسيلات ولحدى ابوقرون بلد صلاح إبن الباديه وضهرتها كمان ناس البطانه ..... فاللهجه تختلف اختلاف كلى .... بس الانا بعرفوا انه الزومه تبعد عن كريمه نص ساعة مشى يعنى فركة كعب .... فليه الاختلاف الشديد ده ؟؟؟ لدرجة تخلى النواره تجيب 2 من 6 والحنكوشه تقعد تعاين من بعيييييد لانه لو حاولت القوس متربص ليها والزيرو حقتوا جااااهزه .... بس على مين ... حناكيش الزمن ده بتاعين نت يفهموها وهى وهى طايره من وكيبيديا او من عمنا قوقل ....

وعلى بال القوس ما يجيب هداياهو

خدو ديل


البرتابه

الشنقاقه

الشِلْخَه

القنقره

التنضبه

الكدنداره

الكدمبس

اللدايه

القليبه

الماريق

وينك يا مارشال ووينكم يا كلكم

نوارة البركل
05-07-2011, 11:28 AM
فعلاً المارشال رطن لينا بالفرنساوى وزاغ .... قلت لى يا النواره عجبك لقب المارشال .... اها دى عاوزه ليها خروف مظبط ... ولانى سميتو المارشال يبقى الخروف علىّ والسلطه على المارشال والجميع مدعو لحفلة شواء باربى كيو بالعربى فى بحر ابيض .... نفس المكان


بالنسبه لكلمات القوس شكلك كده يا نواره طلعتى حنكوشه أما الحنكوشه المعنيه والله مش عارف حتطلع شنو ؟ ! حتقولوا لى شهاده عربيه ... أزعل منكم .... ناس الشهاده العربيه عندهم قاموس لهجه أحسن من حناكيش السودان واتحدى .....


والله يا الباشا مارشال دي عجبتني شديد

http://forum.roytk.com/storeimg/img_1288391590_968.jpg

بس ان شاء الله المارشال عبد الواحد يقبل بيها
بعدين الخروف عليك والسلطة واللوازم الأخرى على القوس
وعليك مننا الخروف دا كلو نعملو ليكم اقاشي على الطريقة المارشالية
بس جيبو لينا الموافقة

الباشا
05-07-2011, 12:16 PM
http://forum.roytk.com/storeimg/img_1288391590_968.jpg


إنتى عارفه يا نواره لما اشوف صورة الخويويجى ابو ضحكه جنان ده بنبسط وكان زعلان والله بضحك .... الله يسعدك يا رب


المارشال عبدالواحد لحدى الآن ما أدانا رأيه فى الاسم .... هو مش بيقولوا السكوت علامة الموافقة يعنى لو المارشال معترض كان رسل لينا صاروخ نقد - جو المهم دلوقت الخروف وتحويله لاقاشى والقوس بينى بينك حيتوصى فى السلطه .... والحشنكرت :SnipeR (99):

ليه ما حاولتى العشره الاخيره دى ؟؟؟

قوس قزح
05-07-2011, 12:20 PM
والله يا باشا ما عندك فرق كبير من المارشال ، اذا هو بيتكلم فرنساوي انت كلامك تايلندي .. غايتو عرفتلي كم واحده كده :
الشِلْخَه : هي الفسيلة ، يعني جزء يقطع من الاصل كالموز والتمر وغيرو
القنقرة : يا ربي دي من قنقر العمدة
الكدنداره : ( ضحكتني ) حشرة سوداء قبيحة ( الخنفسانة)
التنضبه : نوع من الاشجار الظليلة وغالبا هي السدرة او التبلدية
اللدايه : تلات حجار يوهطو فوقوا الحلة
القليبه : شوالة مفتوحة بالطول تستعمل لجلب التراب
الماريق : اذا كنت بتقصد المريق هو ود عم القمح

اللهم نسألك النجاح واقلاها المرور