المساعد الشخصي الرقمي

مشاهدة النسخة كاملة : لهجتنا الجميله ( العامية السودانية ) ....... دعوة للمعرفة


الصفحات : 1 2 3 [4] 5 6

الباشا
04-10-2012, 08:52 AM
والله يا اخوي الباشا
دي تحتاج وقفة وفحيص ومحيص
وما يقدر عليها الا القوس
احببت ان تكون ذات اتجاهين
تحكي لنا عن الزمن الزين
وتكون من ضمن ما يبحث عنه هذا البوست

البيوت المو بيوت ضيق
الشاعر محمد العبيد سيد احمد

يـَاحِــلـِـيــلْ زَمَـــنْ الـبـُـيــُـوتْ الـمُــو بـُـيـُــوتْ ضِــيــق
وحـِــيــشَـــانـَّــا الــــمَــبـَــرْدَحـَـــــة مَــاهـَــا مـِـحـِّــيــق
لـَــقـَــادِيــبـْـنـَـا الـمَــبـَـلـَّــطــَــه خـَــــاتـِـى شـِــقـِّــيــــق
مَـــضَـــلـَّــلـَـــه بــِالـــفــِــلـَـــقْ مَـا فــِـيــهَــا رقـْــريـــق
والــمـِــرقْ مَــرْقــَــاً سُـــنـُــط ْوسَـاويــنـْـلـُــو أرْنـِـيـــق
والـطـِّـيـــرْ فـُـوقـْـنـَـا عَــشْــعَــشْ فـِـى الــسَّــبـَــالـِـيــق
رَاصِّــيــــــنْ الــقـُــدَاحـِـــى صُــفـُــــوفْ مَــعـَـــالـِــيـــق
وبـَـرَنـْــدَاتـْــنـَــا الــكـَـــرَارقْ ....... بــِالــشَّـــبـَـاريـــق
زَمَـــنْ الــنـَّـاسْ حـِــنـَـيـْــنــِـيــنْ .... مَــافـِـى فــِـرِّيـــق
لا جَـــفـَــا لا غـَــلـَــط ْ........ لا حَــتـَّـى نـِــقـْـــنـِــيـــق
لابـْــســِـيـــنْ ..... الــشَّـــمَــامـِــيـــرْ والــعـَــــرَاريــــق
وسَــايـْــقــِـيــنْ الــسَّــوَاقـِـى وعـِـيـــشْــنـَـا مـِــتــِّــيـــق
تـَــسْــمَـــع لاتـِـحـِــتْ ............. دَقْ الــمَــدَاقــِــيــــق
يـَـجَـــى أحْــمَـــدْ لـلــفـَـطـُــورْ شَــايــِـلـُّـو أبـَـاسـِـــيـــق
مَــالـِـى الــشَّــبـَـكـِـى قــَـشْ وقــَـالـِـعْــلـُــو أشْــمــِـيـــق
يـَــفـَـسِّـــخْ ويـَـمْــشـِـى مَــالـِـى جـُــيـُــوبــُــو دِفـِّـــيـــق
ويـَــجْــــدَعْ مُـــنـْــجَــــلـُــو الــمَــا حَـــــامْ كـَــتـَــاريــق
تـَجــِـيــبـْـلـُـو أمْ زيــنْ حـِـريــفْ ويـَـفـِـكـَّـبـُـو الــرِّيـــق
ويـَاحَــلاةْ الـنـُّـومَــه وكـْـــتْ الـضُّــــلْ يـَجـِـى أرْتـِــيــق

هذا منقول من شبكة ومنتديات كريمة
لكم الود


مافى شك أنه الشاعر سنجك حتى النخاع
بس يا جماعه والله حرام الواحد يقرأ شعر بالسلاله والجمال والرقى والحنين والشجن والحس العالى والوصف الذى لا يوصف
ويطلع أنه أول مره يسمع بالشاعر ده .... وطبعاً ده حصل لى برضو لما سمعت بالخبر المؤلم والمحزن لوفاة الشاعر الكبير محمد سالم حميد ( رحمه الله )
فدحين يا عمر يا خوى قبل ما أخش و افسر الجزء القليل جداً من الكلمات العرفتها ... عاوز نبذة عن هذا الشاعر وأين وُلِد وأين يعيش حالياً وماهو انتاجه من هذه الدرر ؟ وهل له دواوين وماهى أجمل قصائده ؟ يعنى تعريف شامل عن الشاعر الجميل ده . وبعدين عاوز أعرف أيه سر الملكه الشعريه والحس المرهف الذى يولد هذا الإبداع عند أهلنا الشوايقه ... بصراحة شعر الشوايقه فيه حنين و شجن لو قسم على العالم كله كان الشر إنتهى ... ورونى أيه السر ؟؟

عمر جبريل
04-10-2012, 07:42 PM
مافى شك أنه الشاعر سنجك حتى النخاع
بس يا جماعه والله حرام الواحد يقرأ شعر بالسلاله والجمال والرقى والحنين والشجن والحس العالى والوصف الذى لا يوصف
ويطلع أنه أول مره يسمع بالشاعر ده .... وطبعاً ده حصل لى برضو لما سمعت بالخبر المؤلم والمحزن لوفاة الشاعر الكبير محمد سالم حميد ( رحمه الله )
فدحين يا عمر يا خوى قبل ما أخش و افسر الجزء القليل جداً من الكلمات العرفتها ... عاوز نبذة عن هذا الشاعر وأين وُلِد وأين يعيش حالياً وماهو انتاجه من هذه الدرر ؟ وهل له دواوين وماهى أجمل قصائده ؟ يعنى تعريف شامل عن الشاعر الجميل ده . وبعدين عاوز أعرف أيه سر الملكه الشعريه والحس المرهف الذى يولد هذا الإبداع عند أهلنا الشوايقه ... بصراحة شعر الشوايقه فيه حنين و شجن لو قسم على العالم كله كان الشر إنتهى ... ورونى أيه السر ؟؟

اخوي الباشا الكبير
مريت علي كلامك السمح دا وبجيك راجع تب عشان اديك المفيد
بس هسع الشغل علي داير فزع والرد علي قامه مثلك يحتاج الي وقفة
لك ودي

عمر جبريل
04-11-2012, 06:42 AM
اخوي الباشا لك ولجميم الاخوة هذا الرابط
http://www.tawtheegonline.com/vb/forumdisplay.php?f=802

معليش فتلنا البوست شوية واظن فتلة جميلة وحلوة
عندنا في منتدي البركل نسمي مثل هذه التحولات فتل يعني الانتقال بالبوست من مجراه
لك ودي الي ان آتيك بسيرة شاعرنا محمد العبيد (( ود العبيد ))

الباشا
04-11-2012, 09:00 AM
يلا يا جماعة ..........
مش معقول يكون البوست بينى وبين أخوى عمر جبريل
كدا الواحد شويه ويطنقر ....


وديل كلمات الشاعر ود العبيد

الــــمَــبـَــرْدَحـَـــــة
لـَــقـَــادِيــبْ
الـــفــِــلـَـــقْ
رقـْــريـــق
أرْنـِـيـــق
عَــشْــعَــشْ
الــسَّــبـَــالـِـيــق
الــقـُــدَاحـِـــى
مَــعـَـــالـِــيـــق
الــكـَـــرَارقْ
الــشَّـــبـَـاريـــق
نـِــقـْـــنـِــيـــق
الــشَّـــمَــامـِــيـــرْ
مـِــتــِّــيـــق
الــمَــدَاقــِــيــــق
أبـَـاسـِـــيـــق
أشْــمــِـيـــق
دِفـِّـــيـــق
مُـــنـْــجَـــل
كـَــتـَــاريــق
حـِـريــفْ
يـَـفـِـكـَّـ الــرِّيـــق
أرْتـِــيــق

بركلاويه
04-12-2012, 09:02 PM
العنقريب مكون من أجزاء هي:



1/ المروق وتشكل ضلعي المستطيل الطولية


2/ الوسائد وتشكل العرضين


3/السدي وبالفصيح السداة وتسمى (المصارين) وهي نسج الحبال بالطول


4/اللحمي وبالفصيح تسمى اللحم وهي نسج الحبال بالعرض


5/ الحمار وهي حبال تلف في المروق علي بعد شبرين من الوسادة الأمامية وفائدتها ان فيها ينسج السدي تجاه الوسادة الخلفية وفيها ينظم الكراب أو (الشنَّاط) تجاه الوسادة الأمامية


6/ الشنَّط أو الكراب ومهمته سد اللحم والسدى إذا ارتخت بفعل الزمن


http://img104.herosh.com/2011/03/10/859570626.png (http://www.herosh.com/)




المرجع :منتديات البركل

بركلاويه
04-12-2012, 09:21 PM
يلا يا جماعة ..........
مش معقول يكون البوست بينى وبين أخوى عمر جبريل
كدا الواحد شويه ويطنقر ....


وديل كلمات الشاعر ود العبيد

الــــمَــبـَــرْدَحـَـــــة
لـَــقـَــادِيــبْ
الـــفــِــلـَـــقْ
رقـْــريـــق
أرْنـِـيـــق
عَــشْــعَــشْ
الــسَّــبـَــالـِـيــق
الــقـُــدَاحـِـــى
مَــعـَـــالـِــيـــق
الــكـَـــرَارقْ
الــشَّـــبـَـاريـــق
نـِــقـْـــنـِــيـــق
الــشَّـــمَــامـِــيـــرْ
مـِــتــِّــيـــق
الــمَــدَاقــِــيــــق
أبـَـاسـِـــيـــق
أشْــمــِـيـــق
دِفـِّـــيـــق
مُـــنـْــجَـــل
كـَــتـَــاريــق
حـِـريــفْ
يـَـفـِـكـَّـ الــرِّيـــق

أرْتـِــيــق



الــــمَــبـَــرْدَحـَـــــة ....... الواسعة
لـَــقـَــادِيــبْ ....... برندات او رواكيب
الـــفــِــلـَـــقْ ..... جمع فلقة وهي المستخرجة من النخل تستخدم لسقف البيوت
رقـْــريـــق ..... ممكن من امتلاء العيون بالدمع او من الرقراق
أرْنـِـيـــق ....... هو عود قوي يوضع في وسط الغرفة او الراكوبة ليحميها من السقوط
عَــشْــعَــشْ ........ بنى عشه وسكن فيه او عشعش في رأسه الهم
الــسَّــبـَــالـِـيــق ........ تمر من خلالها المطر من السقف للأرض
الــقـُــدَاحـِـــى ...... اطباق للكل من الخشب
مَــعـَـــالـِــيـــق ........ جمع معلاق يعلق فيها الاطعمة من الكدايس
الــكـَـــرَارقْ ....... هي الرواكيب سريعة الصنع
الــشَّـــبـَـاريـــق ........ ؟؟؟؟؟؟؟؟؟؟؟؟؟؟؟
نـِــقـْـــنـِــيـــق ............ النقة زي نقة الحريم (الكلام الكتير)
الــشَّـــمَــامـِــيـــرْ ........ جع شمارة هي الخرقة القميص البالي المتسخ
مـِــتــِّــيـــق......... ورق القصب في طور الصبا في حجم قبضة اليد
كما قال الشاعر ( الله فوقا النايره قارسيق الصغيره ضميره متيق )
الــمَــدَاقــِــيــــق ؟؟؟؟؟؟؟؟؟؟؟؟
أبـَـاسـِـــيـــق ............. حبال
أشْــمــِـيـــق ........ ليف التمر
دِفـِّـــيـــق ........ ثمر التمر قبل الاستواء
مُـــنـْــجَـــل ........ أداة لحش البرسيم
كـَــتـَــاريــق ؟؟؟؟؟؟؟؟؟؟؟؟
حـِـريــفْ ......... قراصة
يـَـفـِـك الــرِّيـــق .......... وجبه صباحية سريعة قبل الفطار

أرْتـِــيــق ........ ضل الضحى

عمر جبريل
04-14-2012, 06:33 AM
الــــمَــبـَــرْدَحـَـــــة ....... الواسعة
لـَــقـَــادِيــبْ ....... برندات او رواكيب
الـــفــِــلـَـــقْ ..... جمع فلقة وهي المستخرجة من النخل تستخدم لسقف البيوت
رقـْــريـــق ..... ممكن من امتلاء العيون بالدمع او من الرقراق
أرْنـِـيـــق ....... هو عود قوي يوضع في وسط الغرفة او الراكوبة ليحميها من السقوط
عَــشْــعَــشْ ........ بنى عشه وسكن فيه او عشعش في رأسه الهم
الــسَّــبـَــالـِـيــق ........ تمر من خلالها المطر من السقف للأرض
الــقـُــدَاحـِـــى ...... اطباق للكل من الخشب
مَــعـَـــالـِــيـــق ........ جمع معلاق يعلق فيها الاطعمة من الكدايس
الــكـَـــرَارقْ ....... هي الرواكيب سريعة الصنع
الــشَّـــبـَـاريـــق ........ ؟؟؟؟؟؟؟؟؟؟؟؟؟؟؟
نـِــقـْـــنـِــيـــق ............ النقة زي نقة الحريم (الكلام الكتير)
الــشَّـــمَــامـِــيـــرْ ........ جع شمارة هي الخرقة القميص البالي المتسخ
مـِــتــِّــيـــق......... ورق القصب في طور الصبا في حجم قبضة اليد
كما قال الشاعر ( الله فوقا النايره قارسيق الصغيره ضميره متيق )
الــمَــدَاقــِــيــــق ؟؟؟؟؟؟؟؟؟؟؟؟
أبـَـاسـِـــيـــق ............. حبال
أشْــمــِـيـــق ........ ليف التمر
دِفـِّـــيـــق ........ ثمر التمر قبل الاستواء
مُـــنـْــجَـــل ........ أداة لحش البرسيم
كـَــتـَــاريــق ؟؟؟؟؟؟؟؟؟؟؟؟
حـِـريــفْ ......... قراصة
يـَـفـِـك الــرِّيـــق .......... وجبه صباحية سريعة قبل الفطار

أرْتـِــيــق ........ ضل الضحى


الشباريق : هنا يعني بها انها لها ممرات هوائية اي كانها قائمة علي اعمدة سواء اكانت مبنية من الطوب الاخضر الني او الاحمر يعني راكوبة مكلفة مشي كلام
مداقيق : المدقاق الذي يدق به العيش او خلافه في التقاة
الكتاريق : هنا نوع من الفخر بانه لم يستخدم منجله في حش الحشائش التي تنبت دائما علي الجداول والطرقات بطريقة عشوائية وهذه دائماً يحشها الناس الما عندهم ملك او ارضهم صغيرة وغير مزروعة وهذا الشخص زارع ارضه ويحش منها ما بيحش قش الكتاريق يعني

قوس قزح
04-14-2012, 09:21 AM
استاذنا الباشا ، عمر جبريل ، بركلاوية
ربنا يديكم العافية

صراحة اثريتو البوست ، برغم غيابنا وكثير من الاعضاء ، لكن ان شاء الله ظروف وتعدي ونجيكم بي تقلنا

واصلو وما تقيفوا

الباشا
04-14-2012, 09:36 AM
العنقريب مكون من أجزاء هي:



1/ المروق وتشكل ضلعي المستطيل الطولية


2/ الوسائد وتشكل العرضين


3/السدي وبالفصيح السداة وتسمى (المصارين) وهي نسج الحبال بالطول


4/اللحمي وبالفصيح تسمى اللحم وهي نسج الحبال بالعرض


5/ الحمار وهي حبال تلف في المروق علي بعد شبرين من الوسادة الأمامية وفائدتها ان فيها ينسج السدي تجاه الوسادة الخلفية وفيها ينظم الكراب أو (الشنَّاط) تجاه الوسادة الأمامية


6/ الشنَّط أو الكراب ومهمته سد اللحم والسدى إذا ارتخت بفعل الزمن


http://img104.herosh.com/2011/03/10/859570626.png (http://www.herosh.com/)




المرجع :منتديات البركل



تماااااااااام التمام

معلومات جديده لنج على الكثيرين والماشافو العنقريب " الهباب " بصفة خاصة

المرق
هو فعلاً المرق فى الجزيره

الوسائد
جمع ومفردها الوساده ودى كمان نعرفها تمام ... وأزيدكم من الشعر بيت ، الوساده دى فى بعض الأحيان ، بتبقى خطيييره للغاية بمعنى لو حصلت شكله يعنى مشكله كدا واللا كدا ... الوساده دى بتبقى عكاز عديييل وضربتها تودى فى ستين داهيه .... ويا ما ودت مستخدمها وراء القضبان .. صدقونى بتكلم جد

السدى
فعلاً هو السدى وهى وضع الحبال بالطول يعنى من الوساده للوساده التانيه ....

اللحمه
بلهجة ناس الجزيره أو اللحمى بالسنجك هى فعلاً نسج الحبال من المرق للمرق التنى يعى بالعرض

الحمار
ده يا بركلاويه عندنا ليه اسم بس والله ناسيه بس بالتأكيد اسمنا غير ... على وزن جده غير

الشَنّْاطْ
هى الحبال من الحمار القالت عليه البركلاويه للوساده الأماميه وده فعلاً يستخدم فى شد الوسار لما ترتخى الحبال


معلومات مفيده يديك العافيه يا بركلاويه

الباشا
04-16-2012, 03:01 PM
الكنيف :

الكُرْ : دي انا عارفها لكن والله ناسيها

الترتار :

القهبونه : دي عليك حل طلاسمها يا باشا


الكونيه :

المقا :

اللَبّْاب :



ديل يا عمر عاوزات مراجعه شوية وبالجد إجتهدت شديد فيهم

الكنيف :
هو زريبه منعزله ويختوا فيها البهائم المريضه عشان ما تعادى البهايم الصحيحه .

الكُرْ :
دى زريبه صنغبوته يتعمل ليها ضلاله ويختوا فيها البهم البيرضع منعزل عشان ما يرضع اللبن فى ضرعات البهائم ويبيت الشفع بايتين القوى

الترتار :
عندنا ترتار ليها معنيين ، ترتاره للعب وهى حديد عجلات البسكليته ونعمل ليها حديده معكوفه و تدفها قدامك والترتار التانى هو المنطقه الموازيه للبحر يعنى بين القيف والمويه ودى فى بعض الاحيان بيكون فيها إنحدار ... فالواحد بيجى نازل مترتر فيها لو ما عمل حسابو بيتكامل المويه .

القهبونه :
أحل ليك طلاسمها يا عمر :
القهبونه هى السموم ، يعنى الهواء الحار بتاع نصت نهار يعنى مع وجود الهواء وبتيار قوى لكن سخن سخانه تلفح فى الوش ، أها دى القهبونه


الكونيه :
برضو ليها علاقه بالبحر والبحر يعنى النيل وطبعاً العندنا هو النيل الازرق وده طبعاً التيار فيه قوى شديد خاصة فى الدميره ، اها التيارات القوية دى مرات بتعمل حاجه اسمها الشومه وهى تيار دائرى خطيير جداً إن شال الزول بيغطس حجروا ... الشومه دى بتكون حفره عميقه جداً بالقرب من الشاطى ولما ينزل البحر تلقاها مليانه مويه وسمك وغريقه جداً .

المقا :
دى مزرعه أو جرف خاص غالباً بزراعة البطيخ يعنى لما ينزل البحر بيخلف وراهو منطقه رمليه من فوق وطينية من تحت ودى بنقول عليها المقا ولانها خصبة شديد بنزرع فيها بس البطيخ والشمام والعجور فقط لاغير

اللَبّْاب :
هو سير جلدى أو حبل بنثبت بيه السرج على الحمار .

الباشا
04-17-2012, 09:04 AM
المديده

الشَعِيتْ

الشعفوفه

الشَرَىَ

الحسكنيت

أم دلدوم

الهجيمه

المودر

الضهبان

السايح

الباشا
04-21-2012, 03:56 PM
المديده
المديده هى نوع من انواع العصيده والعصيده نوع من انواع الكسره والمديده سائله ودائماً سخنه وملهلبه ولكن استخدام الكلمه له معنى آخر يقول ليك " المديده حرقتنى " و يفرد يده فى وضع الشحده ويحركها يميناً ويساراً " غربال " وهذا يعنى التسخين واحد بيحرش واحد على خلق مشكله أو شكله أو عمته أو مضاربه يعنى الدعوة لخلق فتنه .

الشَعِيتْ
من الشعاته وهى قريبه من الشعاثه وتمت لها بصلة وهو الشخص الأشعث الأغبر
والشعيت هنا نطلقها على الشخص كثير المشاكل ، ذو الخلق الضيق الذى يتمشكل مع أى شخص ويبحث عن الخصومات وغالباً ما يتجاهله الناس ويبتعدوا عنه

الشعفوفه
الشعفوفه هى الهواء الشديد مع هطول الامطار الغزيرة ، يعنى تنزل الامطار مصحوبه بتيار هواء قوى جداً قد يطيح بالأخضر واليابس وما ذكرته عن الشعيت
ينطبق على النساء اللآئى يبحثن عن المشاكل مع الآخرين وهى ضيقة الخلق غير محموده فى قومها وجيرانها

الشَرَىَ

الشرى هو نوع من الشعرات أو البرعم المتناهى الصغر والموجود غالباً فى البامية الخضراء أو موجود فى قنقر العيش بعد أن يجف ، والشرى مؤذى لليد ومؤذى للجسم ، يجعلك تحك مكان تلامسه مع الجسم حتى تدميه ، وكذلك نطلقها الشخص الشعيت والمرأة الشعفوفه

الحسكنيت
هو نبات من فئة الشوكيات ، والحسكنيت خفيف الوزن بعد أن يجف ويتجمع فى شكل تكويرى وله شوك بالضبط فى شكل السهم ، وتحمله الرياح لخفة وزنه وايضاً مؤذى للجسم .....

أم دلدوم
لا أدرى من أين اتتنا هذه الكلمه ولكنها اشتم فيها رائحة الغرب ، الدلدوم يعنى الشى المكور وأم دلدلوم هى تكويرة كف اليد واستخدامها آداة للضرب وبصفة خاصة الضربه الفجائية على الظهر .....

الهجيمه
الهجيمه مشتقه من الهجمه وهى الاعتداء ... والهجيمه نستخدمها ككلمة تعنى البهتان والإدعاء الباطل

المودر
هى من الودار وهى الفقدان عندما يقال للشخص مودر ... يعنى فاقد الاتجاهات أو فاقد الرشد أو مضيع الطاسه

الضهبان

هو الذى ضل طريقه .... أو الذى يتكلم فى غير موضع الكلام أو فى غير موضوعه .... يعنى مودر برضو

السايح

من السياحه وهذه فى الغالب تطلق على الدراويش الذين يهيمون فى الارض سواء بقصد أو بإنجذاب ... والسايح نطلقها على الاطفال كثيرى التواجد فى الشارع والذى يغيب طويلاً عن البيت .....


والله أعلم

الباشا
04-22-2012, 08:44 AM
الدُفاس

الكترابه

المُطْرق

المَضَبْب

الكريزه

الدرقه

الحداثه

الشِعْبَه

الخزرانه

القرجه

الباشا
04-23-2012, 10:51 AM
وينك يا عمر جبريل ؟

فى إنتظارك .... أدينا طَلّْه :SnipeR (69):

أبو إيثار
04-23-2012, 11:27 AM
كما قال الشاعر ( الله فوقا النايره قارسيق الصغيره ضميره متيق )

نقول تور يقولو أحلبو ؟؟؟

خلينا نفهم ديلك كمان تجيبو لينا نضمي تاني ,,



والله صراحة ياعمي بوست حلو جنس حلا بس مامتل راجل المرا

الباشا
04-23-2012, 12:23 PM
حلو جنس حلا بس مامتل راجل المرا

المبارك ..... الحق زولك :SnipeR (88):

يا أبو إيثار ..... مالك ياخوى ؟

الجو عندكم بدأ يسخن واللا الحكاية شنو ؟

ما بلاش السيره دى .... خلينا كدا حلوين أحسن :wink2:

المبارك ابراهيم
04-23-2012, 06:00 PM
الدُفاس
الله أعلم


الكترابه
تقال للشيء الكثير

المُطْرق
فرع صغير من لعوت أو كترأو أي شجرة

المَضَبْب
العكاز يُضبب بجلد ضنب التور

الكريزه
الله أعلم

الدرقه
تطلق علي أي ضلع من أضلاع الغرفة

الحداثه
عِصية صغيرونه يلوح بها الشخص أثناء حديثه

الشِعْبَه
عود شجرة لها قرينات تستخدم في الرواكيب

الخزرانه
هي عصا كالمطرق من الخيزران لتأديب الصغار


القرجه
عصا غليظة للدواس والحرامية وقتل الكلاب



هذا ما قدرت عليه ولو لقينا المرور نلعب الصقرية يا أخي نحنا قدركم عشان تجيبوا إمتحان صعب زي ده!!

الباشا
04-24-2012, 11:04 AM
هذا ما قدرت عليه ولو لقينا المرور نلعب الصقرية يا أخي نحنا قدركم عشان تجيبوا إمتحان صعب زي ده!!

سبحان الله .....

كأنى شركت ليك بالكلمات دى يا المبارك

ياخى من زماااان وما طليت على البوست ده

مع أنك من الاشخاص الكنت معول عليهم كتير

( معول دى مع انها فصحى لكنها مستخدمه عندنا ؟)

بس والله ما صدقت إنك يا المبارك ما بتعرف

الدفاس والكترابه والكريزه

ومعانى أخرى غير الذكرتيها للدرقه والشعبه

يا نونو إنت يا شهاده بريطانيه مسلميه :SnipeR (1):

نخلى عمر جبريل السنجك يجيك ويوريك كلمات ناس الجزيره

وساعتها حنصادر منك الباسبورت بتاع ولاية الجزيره

ويمكن نصدر فورمان نفيك لهجليج أو جنوب النيل الأزرق

تشوف ليك باسبورت مع الحلو وعقار :vampire:

المبارك ابراهيم
04-24-2012, 09:55 PM
سبحان الله .....


كأنى شركت ليك بالكلمات دى يا المبارك

ياخى من زماااان وما طليت على البوست ده

مع أنك من الاشخاص الكنت معول عليهم كتير

( معول دى مع انها فصحى لكنها مستخدمه عندنا ؟)

بس والله ما صدقت إنك يا المبارك ما بتعرف

الدفاس والكترابه والكريزه

ومعانى أخرى غير الذكرتيها للدرقه والشعبه

يا نونو إنت يا شهاده بريطانيه مسلميه :sniper (1):

نخلى عمر جبريل السنجك يجيك ويوريك كلمات ناس الجزيره

وساعتها حنصادر منك الباسبورت بتاع ولاية الجزيره

ويمكن نصدر فورمان نفيك لهجليج أو جنوب النيل الأزرق

تشوف ليك باسبورت مع الحلو وعقار :vampire:


أولا آآآآآآآآآآآآآآآآآآسف فعلا علي الطولة من هذا البوست الرائع زي سيدو.
ثانيا معول دي من عاول البلح ده عاول والفول ده عاول معتت يعني!!!!
ثالثا الدفاس والكترابة والكريزة الدفاس دي أوعي تكون قاصد دواس الباقيات رسل لي صاحبنا ود جبريل
رابعا يا أخي تقول لي الذكرتيها أنا مرا هوووووووووووووي يا الباشا بوديك الدقسات.
خامسا زول مولود في بيت قصب كيف تصادروا جوازو عجب عجب
سادسا أما النفي أكتر من الفيهو نحنا ده !!
صدقني لو مشيت لي ناس الحلو وعقار أكان عينوني وزير إعلام إتصل عليهم وأنا جاهز
مساء الخير يا زول يا جميل بس تاني ما تقول لي الذكرتيها!!

المبارك ابراهيم
04-24-2012, 10:38 PM
الموضوع شيق وداير أكتب لكن خايف تكون في كلمات معادة المهم هاكم الحبة دي.

الزمبـــــارة
القرقـــــــار
القلوبيــــــة
الحمًـــــــــاي
الدكًـــــــــــة
أم جلاجــــل
أبو غليــــلة
البـــــــــــودة
أم رشيرش
أم قينبــــور
..............

الباشا
04-25-2012, 09:00 AM
[size=6][color=red]الدفاس والكترابة والكريزة الدفاس دي أوعي تكون قاصد ......
يا أخي تقول لي الذكرتيها أنا مرا
هوووووووووووووي يا الباشا بوديك الدقسات.



حلوه (الذكرتيها ) دى :oo5o.com (32)::oo5o.com (32): .... مش جايز يكون نقح على عرق المحس أو أهلنا الدناقله
يا هلوه إنتى يا جميله إنتى .....

تعرف يا المبارك ... فى ناس ربنا خلقهم عشان تحبهم الناس

وإنت واحد منهم ..... وربنا يديم عليك هذه النعمه

الدُفاس ياخى من الدفس ... يعنى الزحمه .. ومافى زحمه اكتر من زحمة الشكْلَه
الدُفاس يعنى المصارعه ممكن تكون جماعية أو فرديه بس فيها عكاكيز ولقطى ويمكن رشة دم :SnipeR (38):

الكترابه ..... يعنى العجه أو الغبار المتطاير وخاصة لما تجى عربية المفتش فى الجزيره طايره والعجاج وراها لعنان السماء ... أها اهلك المزارعيه و تعبيراً عما يجيش بنفوسهم ومن كترت حبهم فى المفتش أول تعبير يطلع منهم .... الكترابة ال ....... وما بتموها خوفاً على مصالحهم طبعاً ...

الكريزه ... دى العصايا الفيها نص دايره من فوق وبتكون دائماً أنيقه وشكلها جميل مع التوب الساكوبيس والمركوب الفاشرى اللحمر الخفيف والعمه المقنطره يعنى لباس العُمَدْ ونُظار الخط زمااااان يا المبارك ..... يعنى عاوز تقول لى ما متذكرهم :bleh:؟؟

الباشا
04-25-2012, 09:08 AM
.

الزمبـــــارة
القرقـــــــار
القلوبيــــــة
الحمًـــــــــاي
الدكًـــــــــــة
أم جلاجــــل
أبو غليــــلة
البـــــــــــودة
أم رشيرش
أم قينبــــور
..............




ومالو .... الإعاده فيها التذكير ... ما يجراش حاجه يعنى ....

المهم مشاركتكم الانيقه دى ..... يا هلوه إنتى ..... يا مسيبه إنتى ...

كل الكلمات تمام ماعدا أبو غليــــــــــله والبـــــــــودة .... أول مره أسمع بيهم

يلا يا شباب .... وينكم ؟؟؟؟

طولت الغيبه يا عمر جبريل ... وينك ؟؟؟

المبارك ابراهيم
04-25-2012, 09:52 AM
وهاااااااااااكم دي كمان!

الــــــــــرًبيت
الـــــــــــوَدَكْ
أم ماجنــــيب
أبو زعيفـــة
المَخَاضــــــة
الكُــــــــــــدُرْ
العَـنْقَــــــــرة
ود أب توشة
المَحــــــويت
البرمندي أو المرمندي
,,,,,,,,,,,,,,,,,,,,,

عمر جبريل
04-25-2012, 10:42 AM
ومالو .... الإعاده فيها التذكير ... ما يجراش حاجه يعنى ....

المهم مشاركتكم الانيقه دى ..... يا هلوه إنتى ..... يا مسيبه إنتى ...

كل الكلمات تمام ماعدا أبو غليــــــــــله والبـــــــــودة .... أول مره أسمع بيهم

يلا يا شباب .... وينكم ؟؟؟؟

طولت الغيبه يا عمر جبريل ... وينك ؟؟؟

تسأل منكن العافية والخير يا شباب
سلم اخي الباشا وكمان المبارك دا
شركت له بي صارقيل والا عيشاية مقد والا عيش ريف
جا جاري كدي
طبعاً انت عارف اخي الباشا اليومين ديل العمرة وتعرف جده مع العمرة
عشان كدي انشغلنا شوية
لكم تحياتي والي ان اعود

عمر جبريل
04-25-2012, 10:47 AM
الموضوع شيق وداير أكتب لكن خايف تكون في كلمات معادة المهم هاكم الحبة دي.

الزمبـــــارة
القرقـــــــار
القلوبيــــــة
الحمًـــــــــاي
الدكًـــــــــــة
أم جلاجــــل
أبو غليــــلة
البـــــــــــودة
أم رشيرش
أم قينبــــور
..............


اخي المبارك لك الود والتقدير
اول شئ جيتاً جيت
شنو ما في خيارات ؟
انا غايتو بجاوب البودة لي الباشا
البوده دي يا الباشا طبعاً هي نبته ضارة جداً تنبت وسط الطماطم الاخضر وهي مضرة جداً جداً وطول الوقت تلقانا نبحث عنها والعجيبة شكلها بنفسجي جميل جداً
لك ودي انا مستعجل شوي

المبارك ابراهيم
04-25-2012, 10:57 AM
اخي المبارك لك الود والتقدير
اول شئ جيتاً جيت
شنو ما في خيارات ؟
انا غايتو بجاوب البودة لي الباشا
البوده دي يا الباشا طبعاً هي نبته ضارة جداً تنبت وسط الطماطم الاخضر وهي مضرة جداً جداً وطول الوقت تلقانا نبحث عنها والعجيبة شكلها بنفسجي جميل جداً
لك ودي انا مستعجل شوي


برافو أخي عمر جبريل بالفعل لاتسمح البودة بنمو أي زراعة حولها هي كالمبيد تماما رغم زهرتها البنفسجية الجذابة.
أما أبو غليلة هو أبو سرجين عندما يكبر ينشره علي الأرض غذاء جيد للجِمال ليست له زهرة كالتَبَر صاحب الزهرة البيضاء الجميلة وكلآهما علف للجمال

يلاك يا الوغل من ديم رفـــــــــــــاعة نقوم
إت لحمك كمـــــــــل وأنا عيني جافية النوم
للحلة أم غفر لي قعـــــــــــــادنا مافي لزوم
بدور تبر البراري وحسك الحصي المردوم

عمر جبريل
04-25-2012, 11:57 AM
برافو أخي عمر جبريل بالفعل لاتسمح البودة بنمو أي زراعة حولها هي كالمبيد تماما رغم زهرتها البنفسجية الجذابة.
أما أبو غليلة هو أبو سرجين عندما يكبر ينشره علي الأرض غذاء جيد للجِمال ليست له زهرة كالتَبَر صاحب الزهرة البيضاء الجميلة وكلآهما علف للجمال

يلاك يا الوغل من ديم رفـــــــــــــاعة نقوم
إت لحمك كمـــــــــل وأنا عيني جافية النوم
للحلة أم غفر لي قعـــــــــــــادنا مافي لزوم
بدور تبر البراري وحسك الحصي المردوم
يا استاذنا المبارك
ابو غليلة دا يكون عندنا الحسكنيت والا شنو ؟
اشرح هده الكلمة :
نحنا طبعاً من اراد ان يعرف الكلمات العامية ان يكثر من قراءة الشعر وخاصة شعر المدايح النبوية وخاصة حاج الماحي يرحمهم الله
بدور تبر البراري وحسك الحصي المردوم
لك تحياتي

المبارك ابراهيم
04-25-2012, 01:44 PM
يا استاذنا المبارك
ابو غليلة دا يكون عندنا الحسكنيت والا شنو ؟
اشرح هده الكلمة :
نحنا طبعاً من اراد ان يعرف الكلمات العامية ان يكثر من قراءة الشعر وخاصة شعر المدايح النبوية وخاصة حاج الماحي يرحمهم الله
بدور تبر البراري وحسك الحصي المردوم
لك تحياتي


سلالالالالالالالالام ناس جده ومرحب بيك ياغالي
الحسك كما ورد في كتاب المعاني:


الحسك :


هو حمص الأمير ، وهو أضراس العجوز ، وعرمط وحماض الأسد ، وهو : شكوهج وهذه الكلمة تعريب االفارسية شكوهنج ، وتدل على ثبات وحسكه - حمص الجبل - أضراس الكلاب .
المعجم: الأعشاب .
الحَسَكُ :
الحَسَكُ : نباتٌ من الفصيلة الرُّطْرِيطِيَّة له ثمرةٌ خشِنة تتعلَّق بأَصوافِ الغنَم وأَوبار الإِبل .
ومنه حَسَكُ السَّعْدانِ .
ويُقال : كأَنَّ جَنْبَه على حَسَكِ السَّعْدان :
.
و _ من الحديد : ما يُعمل على مثال الحَسَك ، كان يُلْقى حول العَسْكر ويُبَثّ في مذاهب الخيل فينشَب في حوافرها .
المعجم: المعجم الوسيط -

الباشا
04-25-2012, 01:59 PM
مجموعة المبارك كاملة

الزمبـــــارة
القرقـــــــار
القلوبيــــــة
الحمًـــــــــاي
الدكًـــــــــــة
أم جلاجــــل
أبو غليــــلة
البـــــــــــودة
تم شرحهم .............

أم رشيرش
أم قينبــــور
الــــــــــرًبيت
الـــــــــــوَدَكْ
أم ماجنــــيب
أبو زعيفـــة
المَخَاضــــــة
الكُــــــــــــدُرْ
العَـنْقَــــــــرة
ود أب توشة
المَحــــــويت
البرمندي أو المرمندي

عمر جبريل
04-25-2012, 05:50 PM
مجموعة المبارك كاملة

الزمبـــــارة
الدكًـــــــــــة
أم جلاجــــل
أبو غليــــلة
البـــــــــــودة
تم شرحهم .............

الــــــــــرًبيت
الـــــــــــوَدَكْ
المَخَاضــــــة
الكُــــــــــــدُرْ
العَـنْقَــــــــرة
البرمندي أو المرمندي

الزمبـــــارة : دي عبارة عن صفارة ولكن معمولة من القصب بتاع الذرة او من القنا يتم تجويفها بطريقة معينة وتخريمها وعمل لها مكان للنفخ وتطليع الصوت .
الدكًـــــــــــة : هذه حفرة الساونا عند النسوان او بنيان ارتفاع حوالي متر من الارض كحماية للحيط حق البيت وتلقي العجايز قاعدين عليهو في الصباح وطاحين الحنك .
أم جلاجــــل : ام جلاجل دي ما عارفها لا تبقي فضيحتنا بي ام جلاجل .

الــــــــــرًبيت : دي ما يتبقي من غلي الشحم والشخت حق الغنم في الضحية بعد ما يطلعوا منه الودك بعدين البي يبقي يسموه الربيت .
الـــــــــــوَدَكْ : الودك هو الدهن الذي يتم جمعه من غلي الشحوم حقت الغنم واستخلاصه منه وزمان كان يقوم مقام اللحم في الحالات الحركة كان يسخنوه من جديد ويطبخوا عليه اي طبخة .
المَخَاضــــــة : المخاضة هذه اظنها القشطة او ما يخرج من خض اللبن الرايب وبعد تسخينها يخرج منها السمن البلدي .
الكُــــــــــــدُرْ : الكدر دا عند الحمير عندما يتم قطع اظافرها بطريقة خطأ يتسبب لها في عرج بعد ورم الحافر حقها .
العَـنْقَــــــــرة : الرقبة العريضة يعني زول رقبتو عريضة وباين عرضها .
البرمندي أو المرمندي : هذا هو الوتد الذي يربط فيه الحيوانات من غنم وحمير وحصين .
لكم تحياتي

المبارك ابراهيم
04-25-2012, 07:59 PM
الزمبـــــارة : دي عبارة عن صفارة ولكن معمولة من القصب بتاع الذرة او من القنا يتم تجويفها بطريقة معينة وتخريمها وعمل لها مكان للنفخ وتطليع الصوت .
الدكًـــــــــــة : هذه حفرة الساونا عند النسوان او بنيان ارتفاع حوالي متر من الارض كحماية للحيط حق البيت وتلقي العجايز قاعدين عليهو في الصباح وطاحين الحنك .
أم جلاجــــل : ام جلاجل دي ما عارفها لا تبقي فضيحتنا بي ام جلاجل .

الــــــــــرًبيت : دي ما يتبقي من غلي الشحم والشخت حق الغنم في الضحية بعد ما يطلعوا منه الودك بعدين البي يبقي يسموه الربيت .
الـــــــــــوَدَكْ : الودك هو الدهن الذي يتم جمعه من غلي الشحوم حقت الغنم واستخلاصه منه وزمان كان يقوم مقام اللحم في الحالات الحركة كان يسخنوه من جديد ويطبخوا عليه اي طبخة .
المَخَاضــــــة : المخاضة هذه اظنها القشطة او ما يخرج من خض اللبن الرايب وبعد تسخينها يخرج منها السمن البلدي .
الكُــــــــــــدُرْ : الكدر دا عند الحمير عندما يتم قطع اظافرها بطريقة خطأ يتسبب لها في عرج بعد ورم الحافر حقها .
العَـنْقَــــــــرة : الرقبة العريضة يعني زول رقبتو عريضة وباين عرضها .
البرمندي أو المرمندي : هذا هو الوتد الذي يربط فيه الحيوانات من غنم وحمير وحصين .
لكم تحياتي


ياسلالالالالالالالالالالام عليك يا عمر جبريل إنت مبدع وشرح وافي جدا
الزمبارة وصف في غاية الدقة ومكان النفخ في الزمبارة يسمي النًطاق أي الذي ينطق لك حسب النفخ
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
الدكة أول مرة أعرف الدكة بأنها حفرة الدخان (الأولاد هنا ولا هناك)!!!! الدكة يا حبيب هي تجمع قصب الحواشة بعد سكبه بصورة فنية دآئرية قبل ترحيلة للقرية ووضعه في الحيشان جمع حوش.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,
أما أم جلاجل نبته مرة جدا لاتأكلها إلا الجِمال كل الحيوانات لا تستطيع مدغها
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,
أما الربيت والودك والكدر والعنقرة والبرمندي الإجابة 100% شكرا علي هذا الإنجاز.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,
أما المخاضة هي مكان بالترعة تعارف عليه الناس بأنه ليس عميقا (يعني ما بتغرًق الناس) لكي يعبروا للجهة الأخري.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,
تحياتي ياغالي
,,,,,,,,,,,,,,,,,,,

الباشا
04-26-2012, 03:59 PM
خ
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
الدكة أول مرة أعرف الدكة بأنها حفرة الدخان (الأولاد هنا ولا هناك)!!!! الدكة يا حبيب هي تجمع قصب الحواشة بعد سكبه بصورة فنية دآئرية قبل ترحيلة للقرية ووضعه في الحيشان جمع حوش.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,
أما أم جلاجل نبته مرة جدا لاتأكلها إلا الجِمال كل الحيوانات لا تستطيع مدغها

,,,,,,,,,,,,,,,,,,,

برضو يا المبارك الدكة عندنا هى مكان تجمع البهائم ...... إما داخل الزريبه أو فى مكان تجمع كل بهائم القرية الصباح قبل ما الراعى يطلع بيهم الخلا ... برضو بنسميها الدكه .

أم جلاجل دى عندنا ليها اسم بس ناسيه ..... لكن عندنا نبته مره شديد اسمها الموليته .... ومش عارف إذا كانت هى أم جلاجل واللا مشتركه معاها فى المروريه .

عاجز عن تقديرى لكم يا النبارك ( يا حليلك يا عمده دى كانت ساحته - عربى شرق قاموسه يحير عون الشريف قاسم ذااااتو ) وأشكرك يا عمورى على مشاركاتك القيمه و الحلوه دى

المبارك ابراهيم
04-28-2012, 05:38 PM
أم جلاجل دى عندنا ليها اسم بس ناسيه ..... لكن عندنا نبته مره شديد اسمها الموليته .... ومش عارف إذا كانت هى أم جلاجل واللا مشتركه معاها فى المروريه .


الموليتة بالفعل هي نبته مرررررة وتعامل عندنا معاملة المرارة تغسل جيدا وتفرم بشكل كبير ثم يقطع لها البصل والدكوة وشوية سكرا حاجة ما بتخصل يأكلها الكل وخاصة النساء.

الباشا
04-29-2012, 03:15 PM
بصراحه مانى باللحيل على تلفزيون السودان وبرامجه العجيبه
قبل يومين مريت بالريموت على القنوات وتوقفت بالصدفه على برنامج شعر
وعجبنى شاعر برضو لاول مره اسمع بيه لكنه فظيع أسمه

بشرى إبراهيم

( حأجيب ليكم نبذه عنه ) بعد ما تحلو لى طلاسمو
وهو طبعاً شاعر بطانه وهى منطقه معروفه بثرائها فى الشعر

القصيده كما سمعتها من صاحبها تدل على أنه عائش فى عالم تانى
زول فى حياتو ما سمع بعيد ميلاد إلا لما جاء الجامعه ... فعلاً غريبه

وهاكم القصيده والطلاسم الفيها ....


وانا من زمنا خدو مشلخ
وهى من ازمانا خدها ساده
اتعجبت سماحا مواتر
طبقات عالية وكلها ساده
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضروا
قتلها خير
قتلها خييييييييييييير
ودخل فى اضافرى
تقصدى ايه بى عيد ميلاده؟
ايا ربى اتولدت يا دابا؟
يبقى الاعياد سوها زيادة؟
امكن ولدت وانا ما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟
وبعزموا الحلال كالعاده
بس قتلها خير وانا جاييكم
وعديلة وزين
والشهر الجاى
مرق مركوبى من السحارة
داقاهو المطرة قبل شهرين
ونَكّْت طاقيتى من العضاضة
سليتلى ثماد رقعتها زين
سديريتى ابوى مسويها لبد
فرتقت اللبده مرقتها طين
عراقى مغزوز فى الكوكار
كان سوهو وقاية وكت فازعين
سروال مدفون فى رهل العيش
ملفوف محشور بين شوالين
لميتن واديتن شطفة
شريتن فووووق فى زريبت الزين
والزين بقراتو مكوفرات تب
مدغن طاقيتى هرنها زييييييين
شافتن السرة بت الهراف
طردتن وجابتن لتاف
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب
وصتنى الحلة رجال وعوين
وصتنى ام نوفل لى كركار
كان تلقى ودك جيب لى رطلين
وقروشى حلف صرة وبى خيت
وصتنى حليمة بت العجبين

سروال لى محمد ورطلين بن
بنبيعلنا شي ونديك بعدين
وصانى الهابر لى مركوب
مخلوفة وسرج وكرباجين
عنقريب وموسر بى حبال قد
تيبار ومسلة وابريق طين
والناس بتوصى وغبيانة
والناس غبيانة وبتوصى
وانا ظرفى مكدر زى الطين
وبتوصى وزى بايعلى بعير
وانا بايع تيسى وعيش كيلتين
والتيس اعور ما جابلو سعر
والعيش بتاب ومسوس وشييييييييييييييييين
تتسود ختوة هالسفرة
انا ماشى لواجب اقوم بالدين؟؟؟؟
وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات
شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه



فهمتوا حاجه ؟؟؟؟؟ !!!

طيب الفاهم يفهمنا ... وينوبو ثواب يشرح لينا

الباشا
04-30-2012, 09:05 AM
كما وعدتكم دى نبذة مبسطه عن

الشاعر بشرى ابراهيم عبدالله

من مواليد قريقس عام 1977 .. ودى قريه من قرى البطانه والمابيعرف البطانه وموقعها الجغرافى يبقى شهاده عربيه
مراحله التعليمية متوسطة خشم القربة ، الثانوي حلفا الجديدة ، جامعة الجزيرة هندسة حاسوب وقريبا جامعة النيلين ( اداب لغة عربية ).
بداياته الشعريه تحديدا كانت عام 97 ميلادية وأول ابيات شعر كتبها كانت ..
يا الماشي البلد بديك ليهو وصية
بشرى الموت ختاهو
اتلحتو بنية
الشافعة القبيل خليتها منقة ونية
نجضت قلبي وقلتهو قلية
لديه مشروع ديوان وكانت فكرته اولا الذهاب بشعره حتى يسلك الطريق القويم وينال حظه من الجمهور لكن في الفترة المضت قام بتسجيل شريط كاسيت بعنوان ( ام شوايل) وهذا اتجاه وجدقبولا وايضا سهل الهضم لدى الجميع .لانو مفردات شعره فيها مصطلحات صعبه . فاز في برنامج نجوم الغد واحرز المركز الاول وبعدها كان له دور في الاسابيع الثقافية في عامين متوالييين واحرز المركز الاول وايضا فى جائزة سباق المبدعين احرز المركز الاول .. وبرنامج سحر القوافي وكرم فيه من رئيس الجمهورية وذلك عندما قرأ قصيدة عيد ميلاد النشوره بطلاسمها فوق .. و سوق عكاظ نال فيها الدرجة الاولي . يصف نفسه أنه ( محظوظ ) وبرضو ( شويطين ) وبيقول أنه البطانة مليانه فرسان اجلاء ويصف نفسه أنه من جيل النت والنتيته وهو ورفاقه ساهموا عبر النت توصيل مايمكن من شعر البطانة ولهم صفحة عبر الاسفير اسمها( بطانة الخير ) .
بيصف شعر البطانة بأنه شعر مؤدب وشعراء البطانة تاجهم العفة وشعر البطانة يكاد تفيض بما فيها من إبداع يصدر عن صدق و يعبر عن هموم المجتمعات السودانية ، تعبيرا أصيلا . ذلك جهد و جهاد.
- سُؤل عن قصيدة عيد الميلاد وهل لها واقع ام خيال؟؟
فاجاب بان هذا سؤال كثيرا مايواجهه والواقع فقط في بدايتها في العزيمة ولكن اذا انا تخيل اني جاي بكامل هندامه الافرنجي وعيد ميلاد في احياء الخرطوم الراقية مااظن يكون للقصيدة مدى .. واعترف بانها البوابة لشهرته لاختلاطها في بيئتين واصبحت مرغوبة في المحافل والمهرجانات.
الشاعر اغترب في المملكة العربية السعودية لمدة سبعة اشهر وبعد ذلك قرر العودة ورصيده من غربته قصيدة اليكم منها هذا النموذج :
السيتوها فيْ بعد المكانا العالية
ضاقت الواسعة مسخت علي الحالية
اوهمتونا بي بقة شلتت بالية
اغريتونا بكروشا ملانا بزاليا
الشككني في نفسي واحار سؤالي
انا يا الليلة ماشفت لي طرحة تلألي
ماشفت القدل لافح تويبوا العالي
والاسكيرتوا الا تشوفوا فوق بنغالي

من اهم اهدافه ان يصل بشعر البطانة لكل سوداني اولا ولعل في قصيدتة بوش الخزين ادخلت الدوبيت في الشعر العامودي ولهذا وجدت الدوبيت لايجد قبولا عند البعض وهذه عن تجارب. ومن هواياته انه مرضان كرة قدم وهلالابي علي السكين و دايما بفتخر بنفسه انه عربي وزول بطانة وديما شابح حسه ولابس توب ناس الشرق و حاويه

نوارة البركل
04-30-2012, 09:50 AM
وهاكم القصيده والطلاسم الفيها ....


وانا من زمنا خدو مشلخ
وهى من ازمانا خدها ساده
اتعجبت سماحا مواتر
طبقات عالية وكلها ساده
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضروا
قتلها خير
قتلها خييييييييييييير
ودخل فى اضافرى
تقصدى ايه بى عيد ميلاده؟
ايا ربى اتولدت يا دابا؟
يبقى الاعياد سوها زيادة؟
امكن ولدت وانا ما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟
وبعزموا الحلال كالعاده
بس قتلها خير وانا جاييكم
وعديلة وزين
والشهر الجاى
مرق مركوبى من السحارة
داقاهو المطرة قبل شهرين
ونَكّْت طاقيتى من العضاضة
سليتلى ثماد رقعتها زين
سديريتى ابوى مسويها لبد
فرتقت اللبده مرقتها طين
عراقى مغزوز فى الكوكار
كان سوهو وقاية وكت فازعين
سروال مدفون فى رهل العيش
ملفوف محشور بين شوالين
لميتن واديتن شطفة
شريتن فووووق فى زريبت الزين
والزين بقراتو مكوفرات تب
مدغن طاقيتى هرنها زييييييين
شافتن السرة بت الهراف
طردتن وجابتن لتاف
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب
وصتنى الحلة رجال وعوين
وصتنى ام نوفل لى كركار
كان تلقى ودك جيب لى رطلين
وقروشى حلف صرة وبى خيت
وصتنى حليمة بت العجبين

سروال لى محمد ورطلين بن
بنبيعلنا شي ونديك بعدين
وصانى الهابر لى مركوب
مخلوفة وسرج وكرباجين
عنقريب وموسر بى حبال قد
تيبار ومسلة وابريق طين
والناس بتوصى وغبيانة
والناس غبيانة وبتوصى
وانا ظرفى مكدر زى الطين
وبتوصى وزى بايعلى بعير
وانا بايع تيسى وعيش كيلتين
والتيس اعور ما جابلو سعر
والعيش بتاب ومسوس وشييييييييييييييييين
تتسود ختوة هالسفرة
انا ماشى لواجب اقوم بالدين؟؟؟؟
وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات
شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه



فهمتوا حاجه ؟؟؟؟؟ !!!

طيب الفاهم يفهمنا ... وينوبو ثواب يشرح لينا




وانا من زمنا خدو مشلخ
وهى من ازمانا خدها ساده
اتعجبت سماحا مواتر **** ؟؟؟؟؟
طبقات عالية وكلها ساده ****** ؟؟؟؟
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضروا
قتلها خير
قتلها خييييييييييييير
ودخل فى اضافرى ( هذه تعني شدة الخجل )
تقصدى ايه بى عيد ميلاده؟
ايا ربى اتولدت يا دابا؟ ( هذه تعني اليوم أو دا الحين على قول السعوديين )
يبقى الاعياد سوها زيادة؟
امكن ولدت وانا ما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟ ( الغناء عن طريق الدلوكة المصنوعة من الزير والجلد )
وبعزموا الحلال كالعاده ( الحلال الحلل المجاورة مثال حلة حمد .. حلة السواراب الخ ... )
بس قتلها خير وانا جاييكم
وعديلة وزين
والشهر الجاى
مرق مركوبى من السحارة ( اخرجت مركوبى المصنوع من جلد الاصلة من السحارة شنطة كبيرة قديمة بدل الدولاب )
داقاهو المطرة قبل شهرين
ونَكّْت طاقيتى من العضاضة ( اخرجت طاقيتى من ؟؟؟؟؟؟؟؟؟؟؟؟؟؟؟؟؟؟؟؟؟؟؟ )
سليتلى ثماد رقعتها زين ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
سديريتى ابوى مسويها لبد ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
فرتقت اللبده مرقتها طين ( قطعت اللبدة وطلعت السديرية وهى تشبه الطين من شدة الوساخة )
عراقى مغزوز فى الكوكار ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
كان سوهو وقاية وكت فازعين ( استخدموهو مسند يوضع على الراس ايام يكونو في عمل مع الجيران )
سروال مدفون فى رهل العيش ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
ملفوف محشور بين شوالين ( موضوع بين شوالين بلح عيش ..... )
لميتن واديتن شطفة ( جمعتهن وغسلتهن )
شريتن فووووق فى زريبت الزين ( نشرتهن فوق مكان راكوبة بقرات الزين ))
والزين بقراتو مكوفرات تب ( جوعانات للآخر )
مدغن طاقيتى هرنها زييييييين ( اكلن الطاقية مزقنها حتة حتة )
شافتن السرة بت الهراف ( وجدتن السرة )
طردتن وجابتن لتاف ( هشتن واحضرتن ليهو مقطعات )
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب (خرجت ووجهى مكشر على الاخر )
وصتنى الحلة رجال وعوين ( رجال واطفال )
وصتنى ام نوفل لى كركار ( الدهن المصنوع من الودك وزيت السمسم )
كان تلقى ودك جيب لى رطلين ( الشحم من الخرفان )
وقروشى حلف صرة وبى خيت ( يعني قروشها جاهزة ومربوطة في قطعة قماش بي خيط )
وصتنى حليمة بت العجبين

سروال لى محمد ورطلين بن
بنبيعلنا شي ونديك بعدين ( بنبيع لينا خروف ولا شوال عيش وبنعطيك لمن ترجع )
وصانى الهابر لى مركوب
مخلوفة وسرج وكرباجين ( ؟؟؟؟؟ ما يوضع على الحصان او الحمار ليركب عليه وسوطين من الجلد )
عنقريب وموسر بى حبال قد ( ؟؟؟؟؟؟؟؟؟؟؟؟ )
تيبار ومسلة وابريق طين ( ؟؟؟؟؟؟؟؟؟ ابرة طويلة يخيط بها الشوالات ابريق للوضوء من الطين )
والناس بتوصى وغبيانة ( ما عارفة الحاصل شنو)
والناس غبيانة وبتوصى
وانا ظرفى مكدر زى الطين ( ظر فو صعب شديد )
وبتوصى وزى بايعلى بعير ( بايع ليهو بعير )
وانا بايع تيسى وعيش كيلتين ( باع ليهو غنماية وكيلتين عيش )
والتيس اعور ما جابلو سعر
والعيش بتاب ومسوس وشييييييييييييييييين ( ملآن وساخةوما نظيف وقديم )
تتسود ختوة هالسفرة ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
انا ماشى لواجب اقوم بالدين؟؟؟؟
وركبت الباص مخلاتي دفس ( مخلاية من القماش بدل الشنطة مدفوسة وما مرتبة )



محاولة متواضعة يالباشا
دا الفهمناهو
علشان ما نرجع بخفي حنين

المبارك ابراهيم
04-30-2012, 02:28 PM
يا أخوي الباشا إنت نايم فوق إضنينك حميد قلت ما سمعت بيهو بشري قلت ما سمعت بيهو بس مكجر فوق حساباتك دي وقاعد
بشري هو ونضال الحاج كانوا بقدموا برنامج جميل ( ريحة البن) وكله إبداع ومعظم أشعار البرنامج كانت من البطانة. أهو النوارة ما قصرت.

الباشا
04-30-2012, 04:37 PM
نضال الحاج

. أهو النوارة ما قصرت.

إت يا المبارك خاتى جبنتك وعصايتك وقاعد حارس لى تلفزيون السودان ؟؟

سمعت بروضه الحاج لانها كانت منافسة قويه إن لم تكن الأقوى

فى برنامج اماراتى اسمه " شاعر المليون " وكانت تستحق المركز الاول

بس العين بصيرة والإتصالات قصيره والكوسة كتيره والله المستعان

لكن نضال دى يطرشنى ما سمعت بيها ولا بأخونا ود البطانه دا

بس لما عترت فيه ... شعرو عجبنى شديد والعجب " بوش الخزين "

دورت عليها لما لقيتها وناوى انزلها ليكم بس بعد ما نشوف حكاية عيد الميلاد دى

الحقيقة " نوارة البركل " ما قصرت أبداً

نويت أرد عليها بس كنت منتظر حد يجى ويصحح ليها بدلاً عنى

أصلوا الجماعه ديل ما بحب أزعلهم .... ناس عزاز على من زمااااان

وأشيل وأعاين ل عمر جبريل خيها يجى ينجدها ... لكن الظاهر عليه سافر البركل

وعلى بال ما يجى عمر ..... آخد لى غميده وأجيكم

فتكم بعافيه

الباشا
05-01-2012, 09:48 AM
اتعجبت سماحا مواتر **** ؟؟؟؟؟
طبقات عالية وكلها ساده ****** ؟؟؟؟

يا ربى بدقوا الدلوكة؟؟؟؟؟؟؟؟؟ ( الغناء عن طريق الدلوكة المصنوعة من الزير والجلد )

وبعزموا الحلال كالعاده ( الحلال الحلل المجاورة مثال حلة حمد .. حلة السواراب الخ ... )

مرق مركوبى من السحارة ( اخرجت مركوبى المصنوع من جلد الاصلة من السحارة شنطة كبيرة قديمة بدل الدولاب )

ونَكّْت طاقيتى من العضاضة ( اخرجت طاقيتى من ؟؟؟؟؟؟؟؟؟؟؟؟؟؟؟؟؟؟؟؟؟؟؟ )

سليتلى ثماد رقعتها زين ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
سديريتى ابوى مسويها لبد ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
فرتقت اللبده مرقتها طين ( قطعت اللبدة وطلعت السديرية وهى تشبه الطين من شدة الوساخة )
عراقى مغزوز فى الكوكار ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )

كان سوهو وقاية وكت فازعين ( استخدموهو مسند يوضع على الراس ايام يكونو في عمل مع الجيران )

سروال مدفون فى رهل العيش ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )
ملفوف محشور بين شوالين ( موضوع بين شوالين بلح عيش ..... )
لميتن واديتن شطفة ( جمعتهن وغسلتهن )
شريتن فووووق فى زريبت الزين ( نشرتهن فوق مكان راكوبة بقرات الزين ))

مدغن طاقيتى هرنها زييييييين ( اكلن الطاقية مزقنها حتة حتة )

شافتن السرة بت الهراف ( وجدتن السرة )
طردتن وجابتن لتاف ( هشتن واحضرتن ليهو مقطعات )

مرقت ووشى مطوطو تب (خرجت ووجهى مكشر على الاخر )

وصتنى ام نوفل لى كركار ( الدهن المصنوع من الودك وزيت السمسم )
كان تلقى ودك جيب لى رطلين ( الشحم من الخرفان )

وقروشى حلف صرة وبى خيت ( يعني قروشها جاهزة ومربوطة في قطعة قماش بي خيط )

بنبيعلنا شي ونديك بعدين ( بنبيع لينا خروف ولا شوال عيش وبنعطيك لمن ترجع )

مخلوفة وسرج وكرباجين ( ؟؟؟؟؟ ما يوضع على الحصان او الحمار ليركب عليه وسوطين من الجلد )

عنقريب وموسر بى حبال قد ( ؟؟؟؟؟؟؟؟؟؟؟؟ )

تيبار ومسلة وابريق طين ( ؟؟؟؟؟؟؟؟؟ ابرة طويلة يخيط بها الشوالات ابريق للوضوء من الطين )

والناس بتوصى وغبيانة ( ما عارفة الحاصل شنو)

وانا ظرفى مكدر زى الطين ( ظر فو صعب شديد )
وبتوصى وزى بايعلى بعير ( بايع ليهو بعير )

وانا بايع تيسى وعيش كيلتين ( باع ليهو غنماية وكيلتين عيش )

والعيش بتاب ومسوس وشييييييين ( ملآن وساخةوما نظيف وقديم )

تتسود ختوة هالسفرة ( ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ )

وركبت الباص مخلاتي دفس ( مخلاية من القماش بدل الشنطة مدفوسة وما مرتبة )

[/right]


[font=entbah][size=6]محاولة متواضعة يالباشا
دا الفهمناهو
علشان ما نرجع بخفي حنين



والله يا النواره ماقصرتى طب ... يديك العافيه

بينى وبينك .... زول البطانه ده بدأ كوييييس

طبعاً جامعى مثقف بدأ براندوك ذى بتاع ولدك الحنين

وختمها بطلاسم إنتى معلمه عليها باستفهامات (؟؟؟؟؟؟؟؟؟؟؟؟؟)

وفعلاً معاك حق ..... صدقينى مع إنى زول جزيره وقريب من منطقتهم

لكن كتير من الكلمات ما بعرفها وخاصه بعض من الإنتى خاته عليهم استفهام

الحكايه دايره ليها زول بطانه كاااارب يفسر لينا الطلاسم دى


وكان عمر جبريل خيك وصل برضو بيحاول


بالجد ما قصرتى يا النوارة يديك الف عافيه

وراجع ليك طبعاً

الباشا
05-01-2012, 03:54 PM
ودى كمان قصيده إسمها سلامات
برضو مليانه طلاسم ......


يالملكه ماك متزعمه
ياساريه فى الزمن النحل
ياضل على البلدات رمى
يالكادحه من أجل الوليد
شان راسو إصبح فى السما
ويالفوقا ماف غير الله شئ
وحتى الله زاتو معظما
والجنه أيه تصبح معاك
أرخص وأقل من مقدما
ودايساها بين كرعيك حبت
فى قاع مدايسك مرغمه
ويايمه شوق قطع حشاى
واوجعة الدمع الهما
إشتقتا لى مطر الخريف
وكتين حفايرو إحزما
وبهيمنا فر تال التبر
أماتو واردات الضما
كوعتا فوق العنقريب
بتشرف العيش اللتيب
والعفرا تتقاطا الرحل
منظر دواخلى يأزما
مرصوص متل عقد الكنار
منضوم على جيد السما
إتحكرتى فوق بنبر حطب
قهوة ضحا وجلسة لما
خيلانى وأعمامى الكبار
خالاتى والجد العمى
ونسه وصراحه وقرقراب
متفائله بالضل الرما
والتايا بت عوض الكريم
المالكا قلبى مقسما
منصره فى طرف الصعيف
نادتنى هيي أصبحتو كيف ؟؟
بيناتنا شاشاق الحطب
همساً دقاق مو همهمه
قالولكن
الليله أمى مكرمه
طرزتا ماراعيت كبير
عاد تايا كيف ؟؟ وإنشاالله خير!!
قاتلى شديده وإلا عيب
وسط الرجال بتناغما
وتب قبلت ماشفتا غير
كفلاً رطن كاجر الطريحه محشمه
إلا إمى واضيعة رجاك
من ولدك الطشطش عما
أنداح تبع زخم المدن
ضيّع بداوتو وحطما
وسلام من البلد السجم
سموها يمه العاصمه
ويايمه ولدك ضاع خلاص
تايه مبارى العولمه
ماياهو ضرغام الرجال
الكان قبيلتو معظما
وياحليلو روبك والسمن
ياحليل لذايذ الأطعمه
ضوّق لسانى طعم جديد
بيرغر .. وجامبو المفرمه
ومعدتى ذاتا إطوطوت
ما أظن عصيدتك تهضما
خدعتنى كندشة الوهم
حمام وريحه وهندمه
راجيانى فوق النار أقع ؟؟
وأنا هالشمس مابلزما !!
دايرانى فوق دلوكه أهز ؟؟
راجيانى أسل سيفى وأرز ؟؟
وألعب مع التوم ود حمد
صقريه درقه محكمه !!
وأنا داك بقيت سيد الرقيص
مرات قرد ..مرات كتيفتى أبرما
دايرانى بى سوط العنج
أركز مع السر وادما؟؟
إنفره سروالى البجر
أربط بتينتى وأحزما
شبال من التايا وأهز
طاقيتى شنقا وأقرما
وفوق ضهرى داداب العنج
وأصفاحى نازفات الدما
أيمه ولدك ضاع زمان
زمان
وحكايتو بقيت مؤلمه
باريت لؤى وقصى ومى
وين تانى كاكوم وادما !!
ضهرى الممسح بتلصف
راقد لحايفو منعمه
ما أظنو بتحمل لبع
والخرشه ماأظن بلزما
سروالى ماياهو القبيل
سديريتى جكه مجضمه
حاجات مجبصه كلها
وطاقيتى كاوبوى وإنما
والكاوى قلبى وشاوى شى
كان شفتى واحدى مقرضمه
لابسه البناطلين زينا
والله ماتفرزيها تب
كان فارده شنبه تبرما !!!
لكنو مهما الزول بعد
حكايتو القبيل مابهدما
جاييك وشايل بقجتى
جواها ورقه مختمه
أياهو حلمك وجبتو ليك
داك جمه ريقى من الظما
بتمنى من الله الكريم
إمد أيامك وإقدما
وتحجى فى كل عام إهل
وتعودى سالمه وغانمه
يايمه
وتعودى سالمه وغانمه

قوس قزح
05-02-2012, 10:40 AM
شيخنا الباشا
امدك الله بالصحة والعافية


شكلك كده يا باشا صاقط سودان .. وعدم متابعتك للقنوات السودانية خلتك بعيد عن الساحة الثقافية السودانية ، بالمناسبة في شعرا جميلين جدا امثال بشرى البطانة ونضال حسن الحاج وغيرهم من شعراء الشباب ، كدي راجع نفسك وتابع قنواتنا ، سيبك من السياسة ، بس في برامج والله قمة الروعة ..
بشرى البطانة من شعراء الشباب المميزين وزي ما قال ليك ود ابراهيم قدم برنامج لمدة تلاتين يوم مع نضال الحاج في شهر رمضان اسمو ريحة البن وكان برنامج رائع جدا ، ومع انو لغتو معقدة شوية وجايي من بيئة البطانة الا انو يعتبر شاعر متميز وله مستقبل زاهر في هذا المجال ..
صراحة نوارة البركل ما قصرت واغلب اجاباتا اجابات صحيحة واتمنى ان تكمل باقي القصيدة .. الفكرة الجديدة موفقة بأن تكون الكلمات الصعبة من داخل مواضيع وقصائد شعرية .. بس المشكلة في الطول .. فلازم يكون في استراتيجية كأن تفصل القصيدة الى عدة مقاطع حتى يسهل المرور عليها كلها ..
عموما البوست اصبح رائع وكامل الدسم اتمنى ان يستمر على هذا المنوال ..


تقبل احترامي وتحياتي

الباشا
05-02-2012, 12:50 PM
[font=fanan][size=6]شكلك كده يا باشا صاقط سودان ..
كدي راجع نفسك وتابع قنواتنا ، سيبك من السياسة ..
بشرى ... قدم برنامج لمدة تلاتين يوم مع نضال الحاج في شهر رمضان
.
نوارة البركل ما قصرت واغلب اجاباتا صحيحة واتمنى ان تكمل باقي القصيدة ..
الفكرة الجديدة موفقة بأن تكون الكلمات الصعبة من داخل مواضيع وقصائد شعرية .. بس المشكلة في الطول .. فلازم يكون في استراتيجية كأن تفصل القصيدة الى عدة مقاطع حتى يسهل المرور عليها كلها ..

..
[/align]
[color=darkolivegreen]

[center]أيه ده يا قوس .....
يا أخى مالك على ؟ صدقنى لو فى 10 فى السودان كله بيحبوا السودان ... أكون إن شاء الله فى أول القائمه
بس تقول لى القنوات السودانيه والهبل الفيها دا ... أقول ليك أنت صاح 100 % ... يا خى والله قمة التخلف فى قنواتنا دى
والسبب بسيط ليس فى عدم الماده ولكنه فى التوجه الإعلامى العام للبلد ... لا توجد سياسه اعلاميه قوميه ... الموجود هو توجه دوله بأفكار وبطريقة معينه ولا يسمح فيها للمبدعين بالاشتراك بأى نوع من الإبداع ... يعنى يخيل ليهم أنه الماده الهم بيفرضوها على القنوات هى الماده المحببه لكل السودانيين ... معقوله بس ؟؟ اليوم كله نحن مع فرقة سلاح المهندسين واللا شوية الأرزقية الشايلين الطارات وعاملين مداح ديل ..... واللا البرامج السمجه التى إن وجد الضيف الفاهم يتوهك المذيع بالاسئله الغبيه .. أو العكس ... واللا العالم العامله فيها سياسيين وكل مؤهلاته أنه مركب دقينه وحافظ ليه تعبيرين تلاته وجايى يطنطط بيهم علينا .... والمصيبه أنه فى الزمن المفروض فيه إذاعة أغنية تلقى برنامج سمج يجيب للمشاهد الضغط وفى الزمن المفروض يكون فيه برنامج ثقافى يجيبوا ليك فنان من عينة " محمود عبدالعزيز " قال أيه ده فنان الشباب .... شباب أيه ؟ ده حواء الطقطاقه شباب وثوريه ووطنيه أكتر منه ... يا قوس إنت عارف لسانى .. ما تخلينى أسرح وبعدين نشكل تهديد على الكل .

شوف يا حبيب أخوك واضح وصريح فى رمضان ... ولما القى وقت أحب اشوف المسلسلات وخاصة لكتاب معينيين ومخرجين معينين وكمان ممثلين معينيين وعندى القابليه اتابعهم من حلقة 1 حتى 35 إذا لزم الامر ... وبعدين يا أخى الواحد صايم طول اليوم ... أجى بعد الفطور أقعد عشان أعكنن مزاجى ... ليه ؟ التلفزيون بقى فيه آلاف القنوات ... شنو البيخلينى اقعد أصاقر المتخلفين بتاعين قنواتنا ديل ؟؟ ..... خليهم يطوروا نفسهم شويه وليك على أكسر الريموت كنترول.

معاك انه النواره ما قصرت .... لكن الكلمات هى نفسها صعبه عشان كدا لو تلاحظ فى ردى عليها إقتبست الجزء العاوز تعديلات أو شرح والشى الشرحتو كويس ما أقتبستو ..... وفعلاً كنت منتظر عمر جبريل أو أى شخص عنده فكره عن لهجة منطقة البطانه وبعدين أعقب وراهو ... بس مافى حد تبرع .
أما موضوع تجزئة القصائد الشعريه فمعاك مليون الميه و عندى خطة للبوست إن شاء الله تكون خطة ناجزه وخطيره ...

وشكراً يا حبيب على الإطراء للبوست

قوس قزح
05-02-2012, 08:48 PM
حبيبنا الباشا
متعك الله بالصحة والعافية


ما داير انحرف بالبوست عن مسارو الجميل ده ، والهدف النبيل الذي يتبناه ، وهو اعادة ما اندثر من تراث وتذكير الاجيال الجديدة بلغة اجدادنا وحبوباتنا التي ما عاد لها مكان وسط هذه الهيصة الما مفهومة واللغات والمفاهيم التي تعددت وتنوعت بمناسبة وبدون مناسبة ، لكن كمان ما دايرك تفهمني غلط ، انا لم ولن اشكك ابدا في سودانيتك وحبك للسودان واهل السودان ، وهذا البوست هو دليل انتمائك وفخرك بناس السودان وتراث السودان ، كل الذي قصدته انك ما متابع وما عندك شغلة بالقنوات السودانية التي تعددت وتنوعت ومع انها ممجوجة ومسيسة الا انها ايضا لا تخلو من البرامج الجميلة التي تستحق المتابعة .. هذا كل الذي قصدته ..
البوست كما اسلفت ومن خلال متابعتنا اصبح قبلة لكل الزوار وكل من يبحثون عن التراث فهو يعتبر بوست اساسي وورقة رابحة في المنتدى لذا لابد من الاهتمام به وتطويره حتى يسهل متابعته ، وكما كنا وما زلنا ننادى ونناشد ان يتفاعل الاخوة الاعضاء مع هذا البوست ويدلوا بآرائهم ومشاركتهم حتى نجعل من البوست ندوة اثيرية يستفيد مها الجميع ..
للبطانة لغتها الخاصة المستوحاة من بيئتها الصحراوية الرعوية ومافي شك هي لغة صعبة وقليلون من يفهموها ، وكنت اتمنى ان يكون الاخ ابو عبير موجود في هذا البوست فهو ( عربي ) من أهل تلك الديار العامرة بأهلها .. فكثير من كلمات اهل البطانة لاتفهم الا من داخل صياغتها ومع ذلك فهي لغة محبوبة لأهل السودان حيث انها مرتبطة بالحماس والفخر والفروسية والكرم والشجاعة وغيرها من موروثات اهل السودان التي نعتز بها ..
ومواصلة لما بدأته نوارة البركل اساهم في شرح جزء من كلمات القصيدة الرائعة التي نالت الجوائز في عدد من المناسبات




اتعجبت سماحا مواتر : اتعجب من سماحة البت ، وهي سماحة متواترة
طبقات عالية وكلها ساده : اهل البت من الناس الكبار اسياد البلد الليهن مكانة
ونَكّْت طاقيتى من العضاضة : دي والله انا برضو ما عرفتها (وطالما ما قال ( نكت ) معناها كانت محشورة وسط عدد من الاشياء فالعضاضة ممكن تكون شنطة حديد او ما شابه ذلك
سليتلى ثماد رقعتها زين :السماد ابرة بس حجمها كبير يعني زي الميبر .. ترقيع الشي هو سد الاماكن المخرومة يعني زي جبة الدراويش وكده
سديريتى ابوى مسويها لبد :السديرية طبعا معروفة .. اللبدة هي ما يوضع على ظهر الحمار او الحصان يعني زي الوسادة
عراقى مغزوز فى الكوكار : الكوكار دي ما عرفتها
سروال مدفون فى رهل العيش :ممكن يكون مخزن العيش بدليل انها كانت محشورة بين شوالين
عنقريب وموسر بى حبال قد : عنقريب منسوج بي حبل القد .. وعلى ما اعتقد القد مصنوع من الجلد ، لأنو انا شفت عناقريب العرب الرحالة منسوجة بي حبال مصنوعة من الجلود
تيبار ومسلة وابريق طين :التيبار هو اكبر من الابرة شوية
تتسود ختوة هالسفرة : زي بس ربنا يسهل السفرة دي !
مخلاتي دفس :المخلاية زي شنطة البنات بس مصنوعة من الشعر .. يعني مليانة فل
كدوسي وحقتي وعود سكين : الكدوس هو الغليون .. والحقة حقت التمباك .. وعود سكين يعني سكين
بجيبو الحكامات : الحكامات هن الغنايات خاصة البيسيرن ويدقن الدلوكة
ام خرفان صر : خرفان بس ما معاهن حاجة
مدققين كمين شوالات عيش : يعني كم شوالات عيش ودوها الطاحونة عشان يعملوها دقيق
انا بنزل حربي ومتعكز :زول فارس وشايل عكازو
وادارق اصقر في الدارات : الصقرية واحدة من لعبات البطانة زي الفي شرق السودان ، درقة وسيف وتمثيل للقتال
خراب حفلا ت :يعني زول صعلوق بتاع مشاكل
وامسك صوتي المدهون قطران واركز واندق : الصوط هو صوت العنج وغالبا ما يطوع بمادة القطران التي تعالج بها الابل من الجرب .. وعادة الجلد في الحفلات ايضا من عادات البطانة والركوز هو الثبات في الدارة للجلد
شان السمحات ما يقولن ضيفنا قريزن ساكت : يعني زول تعبان ساكت وجبان
ووصل وسعل لامن جيتن : يعني وصل وسأل لاحدي ما عرف البيت
وهداك البيت يرقش لوحات :هداك يعني ذاك .. أهو داك البيت ظهر وهو مزخرف بالافراح
وصل ولقيت البيت مزرود لاحدو بنات سمحات: يعني مليان فل بنات زي القشطة


هذا والله اعلم

الباشا
05-03-2012, 10:04 AM
كل الذي قصدته انك ما متابع وما عندك شغلة بالقنوات السودانية ... ممجوجة ومسيسة

كنت اتمنى ان يكون الاخ ابو عبير موجود في هذا البوست .. كلمات اهل البطانة ..... مرتبطة بالحماس والفخر والفروسية والكرم والشجاعة وغيرها من موروثات اهل السودان التي نعتز بها ..

[color=blue]اتعجبت سماحا مواتر : اتعجب من سماحة البت ، وهي سماحة متواترة

ونَكّْت طاقيتى من العضاضة : دي والله انا برضو ما عرفتها (وطالما ما قال ( نكت ) معناها كانت محشورة وسط عدد من الاشياء فالعضاضة ممكن تكون شنطة حديد او ما شابه ذلك

سليتلى ثماد رقعتها زين :السماد ابرة بس حجمها كبير يعني زي الميبر .. ترقيع الشي هو سد الاماكن المخرومة يعني زي جبة الدراويش وكده

عراقى مغزوز فى الكوكار : الكوكار دي ما عرفتها

سروال مدفون فى رهل العيش :ممكن يكون مخزن العيش بدليل انها كانت محشورة بين شوالين

تيبار ومسلة وابريق طين :التيبار هو اكبر من الابرة شوية

تتسود ختوة هالسفرة : زي بس ربنا يسهل السفرة دي !

مخلاتي دفس :المخلاية زي شنطة البنات بس مصنوعة من الشعر .. يعني مليانة فل

بجيبو الحكامات : الحكامات هن الغنايات خاصة البيسيرن ويدقن الدلوكة


انا بنزل حربي ومتعكز :زول فارس وشايل عكازو

وادارق اصقر في الدارات : الصقرية واحدة من لعبات البطانة زي الفي شرق السودان ، درقة وسيف وتمثيل للقتال

خراب حفلا ت :يعني زول صعلوق بتاع مشاكل

شان السمحات ما يقولن ضيفنا قريزن ساكت : يعني زول تعبان ساكت وجبان

وهداك البيت يرقش لوحات :هداك يعني ذاك .. أهو داك البيت ظهر وهو مزخرف بالافراح
وصل ولقيت البيت مزرود لاحدو بنات سمحات: يعني مليان فل بنات زي القشطة


هذا والله اعلم

..... إنت اللقشطه يا قوس

شوف يا صاحبى .... عمرى مافهمتك إنت بالذات غلط ... ولما رديت حبيت أوضح وجهة نظرى فى القنوات السودانيه وبس ... صدقنى دا كان هدفى ..

أما أبو عبير سيبو علىّ .... اليوم أخليه يجيك طاير ويحل لينا الطلاسم دى..

طبعاً لاحظت إنى اقتبست جزء من تفسيرك لكلمات القصيده .... وديل تفسيرك ليهم مش ميه ميه ... أما القدرت تفسره كويس لم اقتبسه طبعاً

البوست رائع بمشاركات الناس وبالتفاعل معه ... وذى ما إتفقنا حأعمل ليه استرتيجية تعجبك وتعجب الكل إن شاء الله ...

لكن والله متعشم الناس تدخل وتتفاعل بدون أى حساسيات ... بمعنى بلاش حكاية لو دخلت حيقولوا على عروب أو عجوز أو قديم ومش راندوك أو لو غلطت العالم تضحك على أو تتريق فينى أو يودونى " بوست الدقسات " .... أو الباشا ما بيشاركنا مواضيعنا ... مش حنشارك معاهو ... أو الباشا اسلوبه ما عاجبنى أو أى نواقص من هذا القبيل ..... كدا صاح واللا انا ما غلطان ....

طيب عشان تثبتوا عكس كلامى دا هيا تعالوا وشاركونا يا مبدعي المرافىء

الباشا
05-05-2012, 08:44 AM
حسب توجيهات السيد مدير عام المبدعين إليكم الكلمات المش لاقين ليها تفسير ميه ميه
فى بعض منها معروف بالنسبه لى زى التيبار وهو عندنا فى الجزيره الزير الكبير شديد
البيختوه إما فى الجوامع / المساجد أو السبيل أو المزيره الكبيره حقت الديوان


ونَكّْت من العضاضة
سليتلى ثماد
مغزوز فى الكوكار
رهل العيش
تتسود ختوة هالسفرة
مخلاتي دفس
الحكامات
بنزل حربي ومتعكز
وادارق اصقر في الدارات
خراب حفلا ت
قريزن ساكت
يرقش لوحات
مزرود لاحدو

قوس قزح
05-05-2012, 10:18 AM
حبيبنا الباشا
متعك الله بالصحة والعافية

فعلا كده تمام .. كل ما كانن الكلمات شويي .. كل ما كانت المهمة سهلة .. وشكرا لك على هذا الاطراء اللذيذ .. انا مقتنع انو اغلب ترجمتي لما تحته خط احمر كانت صحيحة وان كانت مختصرة .. وحاوسع ليك شوية .. يمكن فعلا كلمة التيبار خطأ وانا خمنتها ساكت .. وافتكرتها ( الميبر ) وهو اصغر من المسلي واكبر من الابرة ..


ونَكّْت من العضاضة : صراحة العضاضة بالضبط ما عرفت معناها شنو .. ولكنها حاجة تقريبا زي الشنطة او السحارة ، او اي شي توضع فيهو الاشياء .. اما النكت هو البحث عن شي بجهد وسط عدد من الاشياء .. يعني الراجل ده مرق الحاجات الموجودة في العضاضة عشان يلقى مركوبو .. يعني ممكن تكون بمعنى ( يبحت ) اي يبحث بشدة وسط عدد من الاشياء .. يعني زي البيبحث عن ابرة في كوم قشة .. ( نَكتْ ) بفتح النون وتشديد التاء تختلف من ( نِكِتْ ) بكسر النون والكاف وتسكين التاء .. حيث الاخيرة هي ما يتبقى من ( الاشميق ) الغير صالح لفتل الحبل .. والاشميق حسب القاموس الشايقي هو ( ليف النخلة ) وهذا غالبا ما يصنع منه الحبال
سليتلى ثماد : السل هو اخراج شي من شي .. يعني زي سل الشوكة من الجسم او سل السكين من الجفير .. الترقيع طبعا معروفة وهو زي التلتيق او سد الفتحات بقطعة قماش .. زي الرقع التلقاها في جبب الدراويش .. يبقى من صياغ الكلام ( الثماد حاجة بيخطو بيها .. اما ابرة كبيرة او ميبر اومسلي )
مغزوز فى الكوكار : دي صراحة ما عرفتها ممكن تكون الكرقة او ما شابه ذلك
رهل العيش : من صياغ الكلام اما مخزن للعيش ، او مجموعة من شوالات العيش في مكان واحد .. او كوم من شوالات العيش ..
تتسود ختوة هالسفرة : انا يتخيلي كان مفروض تكون تتسهل خطوة هالسفرة ، لأنو الصياغ في شكل دعاء .. ودايما الانسان لمان يكون متردد في سفرة او خايف من شي بيقول ( بلا ربنا يسهل السفرة دي ) اما هو فأظنه قصد انو دي سفرة ظاهر عليها ما موفقة لكثرة الطلبات من الناس والحالة المزرية الهو فيها
مخلاتي دفس : زي ما قلت قبل ده المخلاية عبارة عن وعاء مصنوعة من الشعر ( يعني زي شنطة اليد بس كبيرة شوية ) ودايما بتكون معلقة في السرج تحفظ فيها ( الزوادة ) والاشياء المتعلقة بالسفر .. وبيجيبو فيها الاغراض من السوق ودايما لونا اسود وبتكون مزينة ومزخرفة .. وزي ما قال الشاعر محمد بادي في وصف بنات الجامعة ( كتوفن ما بقول عكفة سروج لكن بشوف فوقن مخالي ) الدفس : الحشر او الضغط بشدة .. يعني تشيّل الحاجة غصبا عنها .. زي الواحد لمان يبقى ماشي اجازة يدفس الشنط دفس اي يحملها فوق طاقتها .. والراجل ده مخلايتو مدفوس دفس اي مليانة فل وما فيها مجال تاني تشيل ..
الحكامات : هذه الكلمة موجودة في غرب السودان وهن ( السيارات ) وليس بمعنى العربيات .. يعني النسوان البيسيرن مع الدلوكة وينشدن ( البنينة ) تعرف البنينة .. يا بنينة هييي
بنزل حربي ومتعكز : عربي البطانة دايما بيعتز بي فروسيتو .. يقولك زول حربي ، يعني متمثل بالمحارب في شكلو وكلامو ولبسو .. متعكز ، يعني متركز على عكازو .. او شايل عكازو .. عشان يسوي شنو ؟؟ التفسير طوالي في الفقرة الجايي
وادارق اصقر في الدارات : ادارق جايي من اللعب بالدرقة والدرقة هي ما يحمي من ضربة السيف او غيره وهي مصنوعة من الجلد او الحديد ، اصقر جايي من الصقرية .. والصقرية هي لعبة بادية تجدها غالبا عند الجعلية وهي قريبة من ( العرضة ) وهي القفز العالي مع الايقاع .. يعني الراجل ده حينزل حربي في الدارة بي عكازو ودرقتو ويبدا في لعبة الصقرية ليدلل على فروسيته ويجذب اليه قلوب البنات ..
خراب حفلا ت : الزول خراب الحفلات معروف .. يا ما صعلوك يا اما سكران ، يا اما ماب يرضى الخمج او واحد شاغل اختو .. المهم زول ماب يخاف وعندو استعداد يخرب اي حفلة
قريزن ساكت : كلمة قريزن في حدي ذاتا ما عرفتها .. لكن من الصياغ زي ( اضيني ) او زول هايف او لاقيمة له فهو حب يظهر بهذا المظهر الحربي حتى لايظنن فيهو البنات هذا الظن .. يعني ماهو زولا ( هويّن )
يرقش لوحات : دي واضحة .. يرقش يعني يلمع يلالي .. لوحات : يعني زخارف .. يعني البيت مزين بأنوار الزينة وظاهر انو بيت فرح .. من بعيد تعرفو
مزرود لاحدو : الشي المزرود يعني مليان فل .. تختلف من زرد الحبل في الرقبة لأجل الخنق .. مزرود لاحدو يعني ملان بي اركانو مافيهو محل فاضي

ان شاء الله يبقى اقنعتك

الباشا
05-05-2012, 02:26 PM
[/font][/size]

ونَكّْت من العضاضة : صراحة العضاضة بالضبط ما عرفت معناها شنو . ( نَكتْ ) بفتح النون وتشديد التاء تختلف من ( نِكِتْ ) بكسر النون والكاف وتسكين التاء .. حيث الاخيرة هي ما يتبقى من ( الاشميق ) الغير صالح لفتل الحبل .. والاشميق حسب القاموس الشايقي هو ( ليف النخلة ) وهذا غالبا ما يصنع منه الحبال
سليتلى ثماد :[/color]
مغزوز فى الكوكار : دي صراحة ما عرفتها
رهل العيش :
تتسود ختوة هالسفرة : ا


[size=6]الحكامات : هذه الكلمة موجودة في غرب السودان وهن ( السيارات ) وينشدن ( البنينة ) تعرف البنينة .. يا بنينة هييي

بنزل حربي ومتعكز :
وادارق اصقر في الدارات :

خراب حفلا ت :
قريزن ساكت :

[font=Times New Roman][color=blue]يرقش لوحات :
مزرود لاحدو : ا

[/align]ان شاء الله يبقى اقنعتك

أقنعتنى .... إلى حد كبير يا قوس

بس الشهاده لله إجتهدت إجتهاد والله لما كيفتنى

فى بعض الكلمات باعترافك ما قدرت عليها وشكلى انشغلت شويه ونسيت موضوع أبو عبير بس مش حأسيبو

لازم يجى يقول لينا العضاضة و الرهل والثماد والكوكار والقريزن يعنوا شنو ؟

شخصياً و لاواحده من الكلمات دى مرت على قبل كده

وبعدين تعال هنا إنت الفونت بتاع فنان ده ألدغ واللا شنو ؟

ياخوى ( الثاء ) واقعه عنده وعامله zero ليه ؟ واللا يمكن كومبيوترى هو الألدغ :surrender:

ياخى انت زول رائع نادر المتلك ... الله يديك العافيه ويخليك لينا

الباشا
05-07-2012, 09:10 AM
نوع من التغيير شويه

كنت بفتش فى موضوع عن الامثال السودانيه

فلقيت واحد من اخوانا العرب منزل أمثال سودانيه عن الكومبيوتر

يعنى ( منقووووووووووووووله )

عجبتنى شديد قلت اشرككم معاى فيها وفعلاً ظريفه للغايه :

خزن ملفاتك على قدر ذاكرتك.
ضنب الماوس أعوج.
أ بعد عن الفيروس وغنيلو .
فلاشك حصانك .. إن صنته صانك .
كل واحد يعمل إيميل على السيرفر البريحو .
الفايروس جاك يا تارك النورتون .
خوة الكى بورد الحدها البورد.
اللي جهازو ما فيو فايروول ما يرمي الناس بالطروجان .
سيد الرايحه بفتش خشم قوقل .
هذا الويندوز من ذاك الدوز .
الديسك اللي يتعبك فرمته .
يا هارد ما دخلك فيروس .
كل هارديسك بما فيه ينضح .
الإنترنت كان ما فيه شق ما بقول طق .
النورتون شكروه قال داك كاسبر سكاي .
الهكر ما بهددوه بالاختراق .
الجاية من الشبكة يتحملا اللابتوب .
الما شفتو في الفيستا بخلعك .
قلبي على اللابتوب وقلب اللابتوب على الإنتل .
الضايق الفيروس بيخاف من دخول الفلاش .
جو بساعدوه على تصليح كمبيوتره دس الباسويرد ..
سيد الرايحة بفتش خشم قوقل .
مايكروسوفت تجقلب والشكر لليونكس .
طابعة الليزر عين الشمس .
حلم البنتيوم 2 في الاكس بي .
سمح الغناء في الميديا بلير .
الماشاف الكمبيوتر بخلعو الأتاري.

قوس قزح
05-07-2012, 10:22 AM
والله ياباشا مبالغة عديل .. الزول ده أظنو سطلتو كانت قوية خلاص .. واكتر وحدة عجبتني ( الماشاف الكمبيوتر بخلعو الأتاري ) مع انها كلها على مقاس الامثال والحكم السودانية .. اسع دي ما عبقرية عديل ..

شكرا على هذه الاستراحة اللذيذة

الباشا
05-07-2012, 10:34 AM
الزول ده أظنو سطلتو كانت قوية خلاص ...... اسع دي ما عبقرية عديل ..



فعلاً خرافيه فى أمثال بالغ فيها عديييل زى

فلاشك حصانك .. إن صنته صانك .

الفايروس جاك يا تارك النورتون .

الهكر ما بهددوه بالاختراق .

سيد الرايحة بفتش خشم قوقل .

سمح الغناء في الميديا بلير .


ديل لما قريتم ... قلت قطع شك دا لافيها

المبارك ابراهيم
05-07-2012, 11:13 AM
الليلة أم سااااااااكت:

أم قِرِيفة

أم بيلول

أم ما جنِيِب

أم مالبينة

أمم تِــــــفًة

أم تكشو

أم قِــضيَة

أم قُـــرنبع

أم شعيفة

أم جُرْكُم
,,,,,,,,,,,,,

الباشا
05-07-2012, 11:51 AM
الليلة أم سااااااااكت:






يا مرحبتين باللمات


أم قِرِيفة

.... جلا

أم بيلول

دى اللهى طائر البومه ودا طبعاً طائر العرب تتشاءم منه فى الوقت اللى الاوربيين بيتفاءلوا بيه .... سبحان الله

أم ما جنِيِب

.... جلا

أم مالبينة

نوع من النباتات بيقوم فى الخريف ... لون اخضر زاهى ... ولما تقطع فرعها تطلع ليك ماده زى اللبن بس ما تحاول تضوقها ... لانها مره زى الحنضل

أمم تِــــــفًة

البنت الشعرة كتير ومنكوش ... يعنى مهمله وغير مرتبه .... يقول عليها أم تفه .... او زمان فى الفترة بين المشاط والتسريح كانت البنت التسرح شعرها وما تمشطه يقولوا عليها أم تفه حتى لو كانت مسرحه آخر صيحات الموضه وخاته كل كريمات ايف سان لوران

أم تكشو

الملوخية الناشفه .. وخاصة ملوخية الخلا ... يعنى الملوخية القايمة بروس

أم قِــضيَة

.... جلا

أم قُـــرنبع

هى نوع من الحشرات اسود اللون .... ضخمه كدا ومخيفه ... كنا نخاف منها عديييل

أم شعيفة

دى ملاح الويكة الأورديحى ... يعنى لافيه لحم ولا حتى شرموط ... تجيك سايله كدا زى السلسيون

أم جُرْكُم

..... جلا

جلا .... دى كلمه كنا نستخدمها زمان لما نجى نلعب البلى ... او السيجه .... وتقال لما تكون ما عارف الحاجه أو ما عاوز تشارك أو ما عندك معلومه كافيه تقولها

المبارك ابراهيم
05-07-2012, 01:53 PM
يا مرحبتين باللمات


أم قِرِيفة

.... جلا

أم بيلول

دى اللهى طائر البومه ودا طبعاً طائر العرب تتشاءم منه فى الوقت اللى الاوربيين بيتفاءلوا بيه .... سبحان الله

أم ما جنِيِب

.... جلا

أم مالبينة

نوع من النباتات بيقوم فى الخريف ... لون اخضر زاهى ... ولما تقطع فرعها تطلع ليك ماده زى اللبن بس ما تحاول تضوقها ... لانها مره زى الحنضل

أمم تِــــــفًة

البنت الشعرة كتير ومنكوش ... يعنى مهمله وغير مرتبه .... يقول عليها أم تفه .... او زمان فى الفترة بين المشاط والتسريح كانت البنت التسرح شعرها وما تمشطه يقولوا عليها أم تفه حتى لو كانت مسرحه آخر صيحات الموضه وخاته كل كريمات ايف سان لوران

أم تكشو

الملوخية الناشفه .. وخاصة ملوخية الخلا ... يعنى الملوخية القايمة بروس

أم قِــضيَة

.... جلا

أم قُـــرنبع

هى نوع من الحشرات اسود اللون .... ضخمه كدا ومخيفه ... كنا نخاف منها عديييل

أم شعيفة

دى ملاح الويكة الأورديحى ... يعنى لافيه لحم ولا حتى شرموط ... تجيك سايله كدا زى السلسيون

أم جُرْكُم

..... جلا

جلا .... دى كلمه كنا نستخدمها زمان لما نجى نلعب البلى ... او السيجه .... وتقال لما تكون ما عارف الحاجه أو ما عاوز تشارك أو ما عندك معلومه كافيه تقولها


ياسلالام عليك يارقي ما قصرت بس نشوف الجليتهم ديل منو الممكن يحلهم!!!

الباشا
05-07-2012, 04:48 PM
ياسلالام عليك ياراقي ما قصرت بس نشوف الجليتهم ديل منو الممكن يحلهم!!!

واحده من الجليتهم الظاهر ما قريت التشكيل كويس

أم قِضيَه

أظنك تقصد البنيات الوسخانات ... العيونهم مليانه قضا ... والقضا ده يا ناس الشهاده والعمل الطيب ... افرازات من العيون لما تكون العيون وجعانه وبتتكون ماده شبيهه بالصديد حول العين يصل لمرحلة قفلها تماماً ... خاصة لما الشافع أو الشافعه تصحى من النوم ... يا لطيف !!! عيونها ما يفكها إلا موية الشاى الحارة .... ياهو واللا مو ياهو يا المبارك أخوى ؟؟!!

يعنى الباقى ليكم

أم قِرِيفة

أم ما جنِيِب

أم جُرْكُم

يلا عاد ..... ما تقصروا

يقصر الملح ... إن شاء الله

المبارك ابراهيم
05-07-2012, 05:27 PM
واحده من الجليتهم الظاهر ما قريت التشكيل كويس


أم قِضيَه

أظنك تقصد البنيات الوسخانات ... العيونهم مليانه قضا ... والقضا ده يا ناس الشهاده والعمل الطيب ... افرازات من العيون لما تكون العيون وجعانه وبتتكون ماده شبيهه بالصديد حول العين يصل لمرحلة قفلها تماماً ... خاصة لما الشافع أو الشافعه تصحى من النوم ... يا لطيف !!! عيونها ما يفكها إلا موية الشاى الحارة .... ياهو واللا مو ياهو يا المبارك أخوى ؟؟!!

يعنى الباقى ليكم

أم قِرِيفة

أم ما جنِيِب

أم جُرْكُم

يلا عاد ..... ما تقصروا

يقصر الملح ... إن شاء الله


أم قِضيًة يا حبيب نوع من ( الحمي ) وحبوباتنا زمان يقولوا يا أبو ريا من أم قضية وهي حمي تترك ألم بالعيون والقضية هي كما شرحتها شرحك الوافي الكافي. تسلم ياغالي.

عمر جبريل
05-07-2012, 06:09 PM
إت يا المبارك خاتى جبنتك وعصايتك وقاعد حارس لى تلفزيون السودان ؟؟


سمعت بروضه الحاج لانها كانت منافسة قويه إن لم تكن الأقوى

فى برنامج اماراتى اسمه " شاعر المليون " وكانت تستحق المركز الاول

بس العين بصيرة والإتصالات قصيره والكوسة كتيره والله المستعان

لكن نضال دى يطرشنى ما سمعت بيها ولا بأخونا ود البطانه دا

بس لما عترت فيه ... شعرو عجبنى شديد والعجب " بوش الخزين "

دورت عليها لما لقيتها وناوى انزلها ليكم بس بعد ما نشوف حكاية عيد الميلاد دى

الحقيقة " نوارة البركل " ما قصرت أبداً

نويت أرد عليها بس كنت منتظر حد يجى ويصحح ليها بدلاً عنى

أصلوا الجماعه ديل ما بحب أزعلهم .... ناس عزاز على من زمااااان

وأشيل وأعاين ل عمر جبريل خيها يجى ينجدها ... لكن الظاهر عليه سافر البركل

وعلى بال ما يجى عمر ..... آخد لى غميده وأجيكم


فتكم بعافيه

اول يا بادي السلام عليكم ورحمة الله وبركاته
ووحشتوني وحشة عجيبة
هسع انا داخل من كنبيوتر المكتب عشان اسلم عليكن
لاني عندي مشكلة في الكمبيوتر بس معلق من افتحو يشتغل ري استارت ري استارت ري استارت ازهج اقفلوا واقوم انوم
حيرني زاتو شغال بس ( الكانديكة ) .
كنت داير احصل الشئ الجميل الفاتني دا لكن نسوي شنو مع المكتوب براهو الواهب العطاي
الي ان نلتقي بعد ان يقف سيل الري استارت حقي دا بجيكن بي مخلاتي .
لكم ودي وتحياتي

المبارك ابراهيم
05-07-2012, 06:28 PM
اول يا بادي السلام عليكم ورحمة الله وبركاته
ووحشتوني وحشة عجيبة
هسع انا داخل من كنبيوتر المكتب عشان اسلم عليكن
لاني عندي مشكلة في الكمبيوتر بس معلق من افتحو يشتغل ري استارت ري استارت ري استارت ازهج اقفلوا واقوم انوم
حيرني زاتو شغال بس ( الكانديكة ) .
كنت داير احصل الشئ الجميل الفاتني دا لكن نسوي شنو مع المكتوب براهو الواهب العطاي
الي ان نلتقي بعد ان يقف سيل الري استارت حقي دا بجيكن بي مخلاتي .
لكم ودي وتحياتي


ود جبريل يا أخي بالغت
مشيت (العِدْ) ولا شنو؟؟؟
والله أنا قلت الزول ده أخد ليهو (خَترة) ولا شنو؟؟
نسأل الله أن يحل أسرك وتعود لينا بالسلامة وفي إنتظار الروائع.

الباشا
05-08-2012, 09:04 AM
لاني عندي مشكلة في الكمبيوتر بس معلق من افتحو يشتغل ري استارت ري استارت ري استارت ازهج اقفلوا واقوم انوم
حيرني زاتو شغال بس ( الكانديكة ) .
كنت داير احصل الشئ الجميل الفاتني دا لكن نسوي شنو مع المكتوب براهو الواهب العطاي



الزعيم ود الزعامه كلها ..... ده إسمو كلام ؟

ما شاء الله وتبارك الله ..... زول عنده متل العندك ... يحتار فى كومبيوتر يفتح كيف ؟؟

ده اسمو كلام يا مشرفنا العام ؟؟؟

تخلى صاحبى يسمع فى الكانديكه ويغنى مع وردى وانتى ساكته تعاينى فيه ؟

اقولك يا أبو عمير ..... أفرك ليك كمين يوم شمالاً والمسأله محلوله بإذن الله

وحتلحق الفاتك كله والجايات اكتر من الرايحات بإذن الله

ويديك الف عافيه

الباشا
05-08-2012, 09:24 AM
[quote=المبارك ابراهيم;93415]ود جبريل يا أخي بالغت
والله أنا قلت الزول ده أخد ليهو (خَترة) ولا شنو؟؟


الختره حتكون شمالاً يا المبارك ....

يصلحوا ليه الكومبيوتر وبالمره يملا مخلايتو تمر ....ويرجع لينا بالسلامه إن شاء الله

تبوك برضو فيها تمر .... مش برضو حيمر بالمدينه ؟ وهو فى أحلى من تمر المدينه ؟

الباشا
05-09-2012, 09:23 AM
أمس كتبت فى حكاية الأمثال دى بس المشاركه طارت وين مش عارف ؟؟
أكيد أمثال الكومبيوتر دى من راس واحد سودانى عبقرى وعشان أرسخ الفائده
حأذكر المثل الأصلى المستمد منه الأمثال التكنلوجية دى وأشرحه

وعلى قول القوس شويه شويه ...


خزن ملفاتك على قدر ذاكرتك.
مد رجليك على قدر لحافك .
ويُضرب المثل لينصح به الشخص المتطلع اكثر من اللازم ... الفشخار يعنى


ضنب الماوس أعوج.
ديل الكلب عمرو ما ينعدل .
ويضرب المثل للشخص العنيد المكابر والبيصر على الخطأ ...


أ بعد عن الفيروس وغنيلو .
أبعد عن الشر وغنيلو .
ويضرب المثل للباحث عن السلامه ...


فلاشك حصانك .. إن صنته صانك .
لسانك حصانك إن صنتو صانك وإن هنتو هانك.
ويضرب المثل نصيحه للناس البتفلت بلسانها ... الناس البتطلع كلمات سيئة لأذية الناس


كل واحد يعمل إيميل على السيرفر البريحو .
كل واحد بينوم على الجنب البيريحو .
يضرب المثل للقناعه بما يفعله الانسان ... يعنى سوى البيريحك وسيبك من البيريح الناس

الفايروس جاك يا تارك النورتون .
جالك الموت يا تارك الصلاة .
يضرب المثل للشخص غير العابىء بعواقب الامور .. ولما يقع .. الناس تقول ليه المثل ده



خوة الكى بورد الحدها البورد.
خوة اللعوت تتلاقه يوم الموت .
يضرب المثل للأخوان أو القرايب البيكون مابينهم علاقات اجتماعية جيده .. ولا يجمعهم شى غيرالموت


اللي جهازو ما فيو فايروول ما يرمي الناس بالطروجان .
البيتو من قزاز ما يجدع الناس بالحجار .
يضرب المثل للشخص الكلو عيوب ... وشغال ينبش فى عيوب الناس


سيد الرايحه بفتش خشم قوقل .
سيد الرايحه فتح خشم البقره .
يضرب المثل للضايعه منه حاجه ومايخلى محل ما يبحث فيه دون جدوى


هذا الويندوز من ذاك الدوز .
هذا الشبل من ذاك الأسد .
يضرب المثل للولد الهميم المتربى كويس وأبوه أو أهله ذوى سمعه ممتازه

الباقى المره الجايه :

عمر جبريل
05-09-2012, 06:43 PM
ود جبريل يا أخي بالغت
مشيت (العِدْ) ولا شنو؟؟؟
والله أنا قلت الزول ده أخد ليهو (خَترة) ولا شنو؟؟
نسأل الله أن يحل أسرك وتعود لينا بالسلامة وفي إنتظار الروائع.

تسلم يا غالي يا حبيب
انتو البالغتو والله فتوني جنس فوته
الواحد كان جري زي الحجر في الفلعة ما يحصلكن
اليومين ديل اي زول يقولوا ليهومشيت وين يقول مشيت الدهب
اسعيتي انا اكان لقيت مشي الضهب ما كان اخير
جزاك الله خير وشاكر لك سؤالك عني
ربنا يجمعنا بكم في ساعة خير

عمر جبريل
05-09-2012, 06:49 PM
الزعيم ود الزعامه كلها ..... ده إسمو كلام ؟


ما شاء الله وتبارك الله ..... زول عنده متل العندك ... يحتار فى كومبيوتر يفتح كيف ؟؟

ده اسمو كلام يا مشرفنا العام ؟؟؟

تخلى صاحبى يسمع فى الكانديكه ويغنى مع وردى وانتى ساكته تعاينى فيه ؟

اقولك يا أبو عمير ..... أفرك ليك كمين يوم شمالاً والمسأله محلوله بإذن الله

وحتلحق الفاتك كله والجايات اكتر من الرايحات بإذن الله


ويديك الف عافيه

سلمت وسلم من تحب يا من نحب
لك ودي واشكرك علي هذا التقدير
مع ابداعاتكم دي الواحد يحاول يركب الصعب عشان ما تفوتو ولا حلقة من هذا الجمال
والله شوقي الي الشمال لا يبرح فكري ولا لحظة
وتقصيري في اهل الشمال وتلومي فيهم يجعلني افرح لسعة صدر اهل الشمال
والله متلومين فيك لوم الجبال يا حبيب الي القلب
وقالوا بعد ما في الكرعين تبقي قي الوشي
وخايفين تبقي في الوشي
عزائي ان تعذرني اخي الباشا الي ان نلتقي
لك ودي وتحياتي

عمر جبريل
05-09-2012, 06:51 PM
واحده من الجليتهم الظاهر ما قريت التشكيل كويس



أم قِضيَه

أظنك تقصد البنيات الوسخانات ... العيونهم مليانه قضا ... والقضا ده يا ناس الشهاده والعمل الطيب ... افرازات من العيون لما تكون العيون وجعانه وبتتكون ماده شبيهه بالصديد حول العين يصل لمرحلة قفلها تماماً ... خاصة لما الشافع أو الشافعه تصحى من النوم ... يا لطيف !!! عيونها ما يفكها إلا موية الشاى الحارة .... ياهو واللا مو ياهو يا المبارك أخوى ؟؟!!

يعنى الباقى ليكم

أم قِرِيفة

أم ما جنِيِب

أم جُرْكُم

يلا عاد ..... ما تقصروا

يقصر الملح ... إن شاء الله

المودر يفتح خشم القوقل
ان مالقيت في خشم القوقل افتح خشم الياهوو
لك ودي

الباشا
05-10-2012, 03:38 PM
المودر يفتح خشم القوقل
ان مالقيت في خشم القوقل افتح خشم الياهوو


وين عاد يا ود الزعيم ....

ديل لا ينفع فيهم قوقل ولا ياهو ولا إنفستا و لا حتى وكيبيديا ذاااااتها

ده شغل بطانه ساااكت .... ناس وكيبيديا ديل ما سمعوا بيهم سمع ...

مافى غير أبو عبير التقلان علينا ده ......

ما فاضل غير نشد الرحال منها نحضر زواج بت ود المنابير ومنها نشوف حكاية أبو عبير

بس ما فى اليد حيله ... مافى طريقة طب

المبارك ابراهيم
05-11-2012, 10:14 AM
واحده من الجليتهم الظاهر ما قريت التشكيل كويس


أم قِضيَه

أظنك تقصد البنيات الوسخانات ... العيونهم مليانه قضا ... والقضا ده يا ناس الشهاده والعمل الطيب ... افرازات من العيون لما تكون العيون وجعانه وبتتكون ماده شبيهه بالصديد حول العين يصل لمرحلة قفلها تماماً ... خاصة لما الشافع أو الشافعه تصحى من النوم ... يا لطيف !!! عيونها ما يفكها إلا موية الشاى الحارة .... ياهو واللا مو ياهو يا المبارك أخوى ؟؟!!

يعنى الباقى ليكم

أم قِرِيفة

أم ما جنِيِب

أم جُرْكُم

يلا عاد ..... ما تقصروا

يقصر الملح ... إن شاء الله



قلتو لي ما لقيتوها في القوقل ولا الياهووو
,,,,,,,,,,,,,,,,,,,,,,,,,,,,,,,,,,,,,,,,,,,,
طيب يا أحبابنا:
1 / أم قِريفة ( وعندنا مثل يقول أم قريفة الفي بيتها ضيفة)
هي حشرة تحرس أبواب العقارب والفئران ريحتها (عفنة جدا ) إذا مسكتها بي يدك وتسمي خادم العقرب عندما كنا صغار نبحث عن العقرب والفئران لنقتلها في أيام الخريف نصب لها الماء لتخرج من الأجحار أول ما نصب الماء تخرج هذه أم قريفة خادم العقرب وهذا يوحي بأن بالداخل شيء ما وعلينا أن ننتظره لنقتله فكنا أصدقاء المزارع كالسمبر وطير البقر.

2 / أم ماجنيب :
وهي (دبيبة) ثعبان صغير نسميها أحيانا (المريضانة) ولكن عضتها قاتله الخارج من عضتها كتب له عمر جديد.

3 / أم جركم :
هي أكبر أنواع الجراد لونها بيجي ياناس الشهادة العربية دائما تجدها علي فروع (اللعوت) الأشجار اللعوت ده عندنا في الجزيرة وهي تتحرك في مجموعات كبيرة وإذا نزلت في مزرعة تبيدها في ساعات.
.................................................. .......................

الباشا
05-12-2012, 10:37 AM
1 / أم قِريفة
هي حشرة تحرس أبواب العقارب والفئران ريحتها (عفنة جدا )

2 / أم ماجنيب :
وهي (دبيبة) ثعبان صغير نسميها أحيانا (المريضانة) .

3 / أم جركم :
هي أكبر أنواع الجراد .


يديك الف عافية يا المبارك

أم قريفه
دى نحن بنسميها أبو الدرداق ( وريحته عفنه لانه بيدردق أشياء معفنه ) أو الجعران أو الخنفس يا الخنافس وفعلاً تلقاهو دائماً بالقرب من العقارب

أم ماجنيب
دى جديده علىّ أول مره أسمع بيها

أم جركم
دى نحن بنسميها الكدم وعلى قولك إذا وقعت فى الزراعه تبيدها فى ساعات


أشكرك يا المبارك على إثرائك البوست ومنتظر منك الأكثر

الباشا
05-12-2012, 04:45 PM
نواصل فى أمثال التقنيه ........

الديسك اللي يتعبك فرمته .
الباب البيجيك منه الريح سدو واستريح.

يا هارد ما دخلك فيروس .
يا دار ما دخلك شر.

كل هارديسك بما فيه ينضح .
كل إناء بما فيه ينضح أو الفيك بدر بيه أو الفى قلبوا حرقص براهو بيرقص.

الإنترنت كان ما فيه شق ما بقول طق .
مافى شق بلا طق .

النورتون شكروه قال داك كاسبر سكاي .
بخيت شكروهو قال داااك هلال تانى .

الهكر ما بهددوه بالاختراق .
الحوت ما بيهددوه بالغرق.

الجاية من الشبكة يتحملا اللابتوب .
الجايه من الريح يتحملها البلاط.

الما شفتو في الفيستا بخلعك .
الما بيعرف يتبخر بيحرق توبو ....

قلبي على اللابتوب وقلب اللابتوب على الإنتل .
قلبى على جناى وقلب جناى على حجر.

الضايق الفيروس بيخاف من دخول الفلاش .
الضايق قرصة الدبيب بيخاف من جر الحبل.

جو بساعدوه على تصليح كمبيوتره دس الباسويرد ..
جو يساعدوه فى دفن ابوهو .. دسّ المحافير .

سيد الرايحة بفتش خشم قوقل .
سيد الرايحه يفتح خشم البقره .

مايكروسوفت تجقلب والشكر لليونكس .
الخيل تجقلب والشكر لى حماد

طابعة الليزر عين الشمس .
النسيب عين شمس.

حلم البنتيوم 2 في الاكس بي .
حلم الجيعان عيش

سمح الغناء في الميديا بلير .
سمح الغنا فوق خشم سيدو

المبارك ابراهيم
05-12-2012, 06:07 PM
الليلة أبو ساااااااكت!!!

أبو رِيش
أبو درًاشات
أبو كُضُوم
أبو فهقة
أبو الرُقيع
أبو الحُصًين
أبو السًعن
أبو سِلِيطية
أبو القنفذ
أبو الجِندي
,,,,,,,,,,

الباشا
05-13-2012, 09:00 AM
الليلة أبو ساااااااكت!!!


أبو سِلِيطية



المبارك .... المبروك

يديك ويعليك ويطرح البركه فيك ويخلى ليك عيالك وعيالهم ...

كلهم تمااااام إلا أبو سِلِيطيه دا ... وديتو كدى كدى ... غلبنى

حاولت من خلال كلمة سليط ..... ما جا فى بالى غير السلطه وكمان اللسان السليط

برضو مافى فايده ....

فى إنتظار الحبايب .... وبعدين نعقب





تخريمه

أبو ريش دا جبتو من وين ؟؟

ده إسم جد الوالده يديها الصحه والعافيه

ومثبت فى جواز سفرها .... يعنى رسمى

المبارك ابراهيم
05-13-2012, 09:43 AM
المبارك .... المبروك

يديك ويعليك ويطرح البركه فيك ويخلى ليك عيالك وعيالهم ...

كلهم تمااااام إلا أبو سِلِيطيه دا ... وديتو كدى كدى ... غلبنى

حاولت من خلال كلمة سليط ..... ما جا فى بالى غير السلطه وكمان اللسان السليط

برضو مافى فايده ....

فى إنتظار الحبايب .... وبعدين نعقب





تخريمه

أبو ريش دا جبتو من وين ؟؟

ده إسم جد الوالده يديها الصحه والعافيه

ومثبت فى جواز سفرها .... يعنى رسمى


ما سمعت الجماعة بقولوا (الفي الجحر السليطية جاااااااتو)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,
أبو ريش ده يا عم (النمل أبو ريش) نمل بيطير وعضتو حاااارة الظاهر عليهو جدكم ده كان خطير!!
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,

عمر جبريل
05-13-2012, 10:25 AM
[quote=المبارك ابراهيم;93559]ما سمعت الجماعة بقولوا (الفي الجحر السليطية جاااااااتو)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,
أبو ريش ده يا عم (النمل أبو ريش) نمل بيطير وعضتو حاااارة الظاهر عليهو جدكم ده كان خطير!!
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,[/qu
هههها ياالمبارك
نحن زاتنا جدنا ابو ريش ومن زعماء المنطقة ومن اهل الاطيان
يا ربي برضو يكون عضتو حاري زي النمل ابو ريش
انا طول الوقت اقول في قاسم مشترك بيننا يا الباشا
عشان كدي لازم تمشي تفتش في جدكن دا اصلو من وين
باقي لي يكون ترايتو من عندنا
لك تحياتي

الباشا
05-13-2012, 12:15 PM
الفي الجحر السليطية جاااااااتو

الظاهر عليهو جدكم ده كان خطير!!


لا .... ما سمعت بالسليطيه دى أبداً ولحدى الآن ما عرفتها

جدى كان راجل صالح .... يعنى بركه زيك كدا ...

وعمرو ما قرص ليه زول ... والقرصات انواع ذى ما انت عارف

المبارك ابراهيم
05-13-2012, 12:43 PM
[quote=المبارك ابراهيم;93559]ما سمعت الجماعة بقولوا (الفي الجحر السليطية جاااااااتو)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,
أبو ريش ده يا عم (النمل أبو ريش) نمل بيطير وعضتو حاااارة الظاهر عليهو جدكم ده كان خطير!!
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,[/qu
هههها ياالمبارك
نحن زاتنا جدنا ابو ريش ومن زعماء المنطقة ومن اهل الاطيان
يا ربي برضو يكون عضتو حاري زي النمل ابو ريش
انا طول الوقت اقول في قاسم مشترك بيننا يا الباشا
عشان كدي لازم تمشي تفتش في جدكن دا اصلو من وين
باقي لي يكون ترايتو من عندنا
لك تحياتي

يا ود جبريل الزول ده قريبك أمسك فيهو قوي!!!
ههههههههاااي أصلو أبوريش بعرف بعضو!!!!

المبارك ابراهيم
05-13-2012, 12:49 PM
لا .... ما سمعت بالسليطيه دى أبداً ولحدى الآن ما عرفتها



جدى كان راجل صالح .... يعنى بركه زيك كدا ...


وعمرو ما قرص ليه زول ... والقرصات انواع ذى ما انت عارف



أكيد أبو سليطية عنده أسم تاني عندكم.
ناس تقول من فصيلة القطط البرية وتقول عليه كديس أبوسليطية
ناس تطلق عليه صبرة
وناس تطلق عليه البو
وهو إذا (زردهو بيدخل في أي جحر حقو ولا ما حقو المهم صاحب الجحر يتفاجأ لديه زائر مقتحم عليه بيته)
قال القرصات أنواع قال!!!
,,,,,,,,,,,,,,,,,,,,,,,,,,,

الباشا
05-13-2012, 01:43 PM
أبو ريش ده يا عم (النمل أبو ريش)عضتو حاااارة الظاهر عليهو جدكم ده كان خطير!!
,,[/qu

نحن زاتنا جدنا ابو ريش ومن زعماء المنطقة ومن اهل الاطيان
انا طول الوقت اقول في قاسم مشترك بيننا يا الباشا
عشان كدي لازم تمشي تفتش في جدكن دا اصلو من وين
باقي لي يكون ترايتو من عندنا


كدى يا ود الزعيم ..... جبت لينا كلمه جديده لنج بس باين عليها مهمة للغايه

وهى كلمة " ترايتو "
ومن صياغ الحديث تعنى " تربو " بلهجة ناس الجزيره وتعنى أيضاً أصله وفصلوا

أما حكاية أنه فى قاسم مشترك دى ما فيها شك يا عمر ... صدقنى كان فى شى عجيب يجذبنى للوالد رحمة الله علية بهيئته وخضرة الشوايقه الناعمه ولفة عمتوا والملفحة الجميله الانيقه ... لانه كتير من أهلنا فيهم شبهه خاصة الخضره الناعمه وملامح الوجه ونفس طريقة اللبس .... وماتنسى أنه كان صديق شخصى لاولاد الشريف الهندى خاصة المرحوم الشريف حسين الهندى وزين العابدين الشريف الهندى وبقية اسرتهم ..... وديل برضو من أندينا على قول اهلنا المحس ..... وبالمناسبه لو رجعت لبوست أهلى العسيلات تلقى أنه جدنا الكبير اللهو حمد بن رافع هو من بنى مدينة أبو حمد فى شمال السودان ومنها انطلقت 19 بطناً من بطون الأشراف لتغطى منطقة الشماليه والغرب ووسط السودان ....

الباشا
05-13-2012, 02:01 PM
أكيد أبو سليطية عنده أسم تاني عندكم.
ناس تقول من فصيلة القطط البرية وتقول عليه كديس أبوسليطية
ناس تطلق عليه صبرة
وناس تطلق عليه البو

قال القرصات أنواع قال!!!


أيواااا الصبره دى بنعرفها ....... وعلى ما عتقد برضو بنطلقها على أبو العفين اللهو شكل الكدايس .... او برضو بنسميها كديسة الخلا وهى نوع من القطط غير الاليفه ..
أما البو دى بنطلقها على نوع من اشكال التحنيط ينعى بنرجع لأصلنا الفرعونى فى شمال الوادى ... فبنقوم نجيب جلد العتود أو السخله لما نضبحها أو تفطس منها وليها .. اها بنقوم نحشى جلد العتود او السخله ونكون ما يشبه الشى المحنط وده بنخدع بيه الضان أو المعيز لما نجى نحلبها ... طبعاً معروف غريزة الامومه فى الحيوانات وهى بتدر اللبن لصغارها بغزارة ولكن إذا ما شافتو قدامها بتدس اللبن ... أها نقوم نجيب البو ده نختو قدام امو وتقوم تدر لينا اللبن .... نحلبوا وندس المومياء ( حلوه المومياء دى ) لليوم التانى لحدى ما البهيمه تغرز ......

تذكرت أيضاً أنه عندنا فى الجزيره اللبوات ( جمع أب .... وليس لبوه وشتان ) بيكونوا حارين شويه خاصة المزارع لما يجى من الخلا فى الحرايه ديك ويجى عرقان عاوز ليه بس عنقريب يتمدد علية وكوز مويه من الزير ساقط ... ويقوم ياكل ليه لقيمه ويرتاح شويه ويرجع للحواشه فى الضهريه ... أها الشفع ما يحلى ليهم تقديم الطلبات فى الوكت ده بالذات ... فيقوم الاب من زهجو وتعبوا ينهر الشافع بمجرد سماع كلمة ... يابا أنا داير .... قبل ما يكملها تجية كلمة .. اريتك بالبو ... طير من قدامى تطير ما ترك ....

كان ما فهمتو كلامى ده خلوا المبارك يديكم قريصه ..... من النوع إياها ....

المبارك ابراهيم
05-13-2012, 05:39 PM
كتبت بواسطة الباشا
أما البو دى بنطلقها على نوع من اشكال التحنيط ينعى بنرجع لأصلنا الفرعونى فى شمال الوادى ... فبنقوم نجيب جلد العتود أو السخله لما نضبحها أو تفطس منها وليها .. اها بنقوم نحشى جلد العتود او السخله ونكون ما يشبه الشى المحنط وده بنخدع بيه الضان أو المعيز لما نجى نحلبها ... طبعاً معروف غريزة الامومه فى الحيوانات وهى بتدر اللبن لصغارها بغزارة ولكن إذا ما شافتو قدامها بتدس اللبن ... أها نقوم نجيب البو ده نختو قدام امو وتقوم تدر لينا اللبن .... نحلبوا وندس المومياء ( حلوه المومياء دى ) لليوم التانى لحدى ما البهيمه تغرز ......

يا حبيبنا ولد الغنماية أو العجل ولد البقرة البحشوهو بالقش ده إسمة (العبـــــــــــــــــــــــــــــــــوب)!!!
تسلم ياغالي علي الشرح الوافي ولا عدمناك يارب.

قوس قزح
05-13-2012, 06:41 PM
الليام دي جزيرة ساكت ،، الله يديك العافية يا مبارك ، خليتو للبوست طعم تاني ، وياما السودان ده فيهو المحن ، بعدين يا عمر جبريل دايرين لينا بوليس سري يبحث ورا الباشا ده ، الزول ده انا ذاتي حاسي انو من اندينا ، اسع ظهر ابو ريش ، قول واحد .. وشوية شوية تلقانا لحم وعضم .. ( اما الترايي ) فهي الارض التريانة يعني كانت شربانة قبل كم يوم واصبحت في منطقة وسط بين ناشفة وما ناشفة ، وكما قال الشاعر قوس قزح ( شافع هناك شايلو عود قاعد يحفـّر في التره )

واصلو مشواركم

الباشا
05-14-2012, 08:29 AM
يا حبيبنا ولد الغنماية أو العجل ولد البقرة البحشوهو بالقش ده إسمة (العبـــــــــــــــــــــــــــــــــوب)!!!


صاح كلامك يا المبارك

وبرضو بنقول عليه البو ....

ماهى تركيبة الحروف متشابهه ...

يا جماعة وين ناس الجزيره ... مافى زول يجى يقول حاجه

الباشا
05-14-2012, 08:39 AM
بعدين يا عمر جبريل دايرين لينا بوليس سري يبحث ورا الباشا ده ، الزول ده انا ذاتي حاسي انو من اندينا ، اسع ظهر ابو ريش ، قول واحد ..
وشوية شوية تلقانا لحم وعضم .. ( اما الترايي ) فهي الارض التريانة يعني كانت شربانة قبل كم يوم واصبحت في منطقة وسط بين ناشفة وما ناشفة ، وكما قال الشاعر قوس قزح ( شافع هناك شايلو عود قاعد يحفـّر في التره )



يا القوس ... الإحساس بالانتماء أهم بكتير ... إن ما كنت من أنديكم .. فأنا من أنديكم .. ما تنسى أنه فينى عرق بديرية دهمشيه وهم من أصول الشوايقه كما قيل لنا
أما التريه فعندنا هى نفس الاسم .... خاصة المنطقه البعيد شويه من البحر لما تكون رويانه بسبب المياه الجوفيه ....

البوست ماشى كويس ... بس والله أتمنى مشاركة الكل خاصه ... المتكلمين بلهجة غرب السودان وشرقة وأقصى شماله ويا ليت ناس البطانه يجوا يشاركونا كمان ...

المبارك ابراهيم
05-14-2012, 09:04 AM
وهاااااكم دول كمان.

الشَابورة
البـــرقان
الإسكيف
الدًقــداق
البِرْبيــط
الكُـــرنك
الديــداب
المُسكاب
الوَرَتــاب
الضَنَــاب
,,,,,,,,,

قوس قزح
05-14-2012, 10:45 AM
والله يا ود ابراهيم حكايتك حكاية .. انت متأكد انو دي ماها رطانة .. غايتو مع اني من حناكيش الزمن ده .. لكن نحاول البنقدر عليهو

الشَابورة : هي المطرة الخفيفة ، يعني زي الرزاز كده .. وفي السعودية نوع من انواع الكعك
البـــرقان : الله أعلم
الإسكيف : الله اعلم
الدًقــداق : هو الارض الغيرمستوية يعني زي السرابات الخفيفة وغالبا بيكون في الارض الفيها حصحاص ودي بتتعب العربيات تعب شديد خلاص
البِرْبيــط : الله أعلم
الكُـــرنك : الله أعلم
الديــداب : والله دي سمعتها عند الشاعر ود بادي لكن ماني عارف معناها بالضبط شنو
المُسكاب : الله اعلم
الوَرَتــاب : دي ساهلة .. هو القصب الناشف مربط في شكل حزم
الضَنَــاب : هو عبارة حبل او قماش ما بين السرج وضنب الحمار بغرض تثبيت السرج


ده الشي القدرنا عليهو يالمبارك يجي شيخ الباشا يكمل
عاطر تحياتي

الباشا
05-14-2012, 11:26 AM
أبو رِيش
ذى ما قال المبارك ... ده نوع من النمل ليه أجنحه بيطير ومزاجه يرك على الشفع وقرصتو حاره حروريه فظيعه ... طبعاً هو بيقرص كل الناس لكن الاطفال لما يقرصهم بيجرسهم صاح ... عشان كدا يتخيل ليك ما بيقرص إلا الشفع ...

أبو درًاشات
سبق شرحها بالداخل ولكن مافى مانع من الشرح مرة أخرى ... الدراشات يعنى الكرعين الكبار الزول البيمشى ويكوش ... ذى البيدرش ليه فى دريش ... والدريش هو العيش لما يطحنوه فى المرحاكه ... والمرحاكة هى حجر كبير يختوا فيه العيش ويجيبوا حجر تانى صغير و يخلوا العيش بين الاتنين وهاك يا هرس ... ده اسمو العجين والدريش هو اول مره من العجين .

أبو كُضُوم
برضو سبق شرحها ومافى مانع نكرر .... الكضوم هى الجضوم والجضوم هى الخدود المربربه ... يعنى الشافع لما يكون سمييين ليه كليوات بتطلع كضيمات ... حلاة جضيمن ...

أبو فهقة
الفهقه هى الرقبه المتينه ... الرقبه السمينه العاتيه ... اللى السيف ما يدليها ...

أبو الرُقيع
هو الوطواط ... وده مزاجه يسكن فى الزنكى وخاصه فى الداخليات ... وعليه ريحه ولا أيف سانت لوران .... حاجه مقرفه جد ... وبعدين ما يطلع الا بالليل وكمان لما يجى طالع يخلع الواحد وعضته فى بعض الاحيان مسعره يعنى فيها 21 حقنه ... كلب عدييييل

أبو الحُصًين
ده طبعاً الثعلب ... والثعلب عموماً غير معروف ... عندنا فى الجزيره لانه ليس مناخ معيشة مناسبه ليه وحتى زماااان كان فى الغابات الكثيفه على النيل دلوقت البنى آدميين ما لاقين يسكنوا ناهيك عن الثعالب .... برضو كنا نطلق هذا اللقب على الزول الغشاش .

أبو السًعن
نوع من الطيور ... اسمه بالضبط ما بعرفوا لكن حاجه كده كرعينها طواااال و منقاره تحته حاجه زى السعن ... بيجى فى الخريف غالباً ... طبعاً الدنيا اتمسخت والطيور ذاتها بطلت تجى السودان ... من كترت ما البركه راحت منه ...

أبو سِلِيطية
ده الوحيد الغلبنى والمبارك ما قصر شرحه شرح وافى ... وهو نوع من الثعابين


أبو القنفذ
حيوان له شوك ... يخوف بيه اعتى كلب او كديس او اى حيوان مفترس .... اسمه فى اللغه العربيه القنفذ برضو ... لكن كسودانيين دائماً عندنا عداوه مع النقاط ... النقطه نطير ابوها وننطق الكلمه بدونها وده بنقول عليه القنفد او أبو القنفد ...

أبو الجِندي
نوع من اشكال الجراد ... مشيه نط وبس ... وباليل يقعد يصفر طول الليل خاصة فى الخريف

الباشا
05-14-2012, 12:22 PM
[align=justify]
والله يا ود ابراهيم حكايتك حكاية .. انت متأكد انو دي ماها رطانة .. غايتو مع اني من حناكيش الزمن ده .. لكن نحاول البنقدر عليهو

الشَابورة : [color=darkorchid] وفي السعودية نوع من انواع الكعك
البـــرقان : الله أعلم
الإسكيف : الله اعلم

البِرْبيــط : الله أعلم
الكُـــرنك : الله أعلم
الديــداب : والله دي سمعتها عند الشاعر ود بادي لكن ماني عارف معناها بالضبط شنو
المُسكاب : الله اعلم

ده الشي القدرنا عليهو يالمبارك يجي شيخ الباشا يكمل[
ع

صدق يا القوس أبداً ما قصرت ...
المبارك ده الظاهر عليه رطانى ونحن ما عارفين ... حكاية الجزيره دى متخفى وراها بس
حلوه تفسيرك للشابوره .... قلت لى كيف ؟؟ نوع من الكعك :SnipeR (29): ... هو الكعك ده ذاتو شنو ؟

البرقان ....
عندنا فى الحواشات شارع داخلى بيجى بيه المفتش حق الزراعه للتفتيش وهو طريق ضيق بين الحواشات ودائماً المزارعين يفكو فيه المويه عشان عربية المفتش الموريس ماينر تغطس فى الطين ويجو المزارعين يدحلسوا للمفتش يمرقوا ليه العربيه وضحكتين تلاته اخونا يمشى .... هو مشروع الجزيره باظ من شويه ؟؟!!

الإسكيف
ده طريق فوق ضهر الترعه وبرضو لسعادة المفتش عشان لو البرقان مليان مويه يطلع الاسكيف وبرضو العربات الطالعه من البلد على المدن بتمشى بيه

البربيط
دى رطانه عديييييل يا المبارك حتى تركيبة حروفها مستمده من الرطانه ... ياهو واللا مو ياهو يا القوس ؟

الكرنك
دى بعرفها فى اللوارى اللهو العمود البيربط العجلات مع الماكينه وهو البيمشى العربيه ... يقول ليك العربية وحلت فى الطين لما كسرت الكرنك .... تفسير تانى ما بعرفوا ليها

الديداب ....
هى الحركة المستمره او صوت الارجل ومشتقه منها الكلمه العسكريه يا عبدالواحد .... الديدبان وممكن تجى تشرحها مع الكلمات العسكريه الاخرى الطلبتها منك ....

المسكاب
دى بقى يا المبارك بالغت فيها عدييييل كدا:SnipeR (51): .... والله حسب علمى هى مرتبطه بالمريسه :SnipeR (93): ارتباط شديد .... وخاصه فى الكنابى ... لكن تفل العجين برضو الناس تقول عليه مسكاب وده بيدوهو للبهائم تاكلوا

أها يا القوس إنت رايك شنو على بال مايجى المبارك وعبدالواحد ؟؟

المبارك ابراهيم
05-14-2012, 01:12 PM
والله يا ود ابراهيم حكايتك حكاية .. انت متأكد انو دي ماها رطانة .. غايتو مع اني من حناكيش الزمن ده .. لكن نحاول البنقدر عليهو

الشَابورة : هي المطرة الخفيفة ، يعني زي الرزاز كده .. وفي السعودية نوع من انواع الكعك
البـــرقان : الله أعلم
الإسكيف : الله اعلم
الدًقــداق : هو الارض الغيرمستوية يعني زي السرابات الخفيفة وغالبا بيكون في الارض الفيها حصحاص ودي بتتعب العربيات تعب شديد خلاص
البِرْبيــط : الله أعلم
الكُـــرنك : الله أعلم
الديــداب : والله دي سمعتها عند الشاعر ود بادي لكن ماني عارف معناها بالضبط شنو
المُسكاب : الله اعلم
الوَرَتــاب : دي ساهلة .. هو القصب الناشف مربط في شكل حزم
الضَنَــاب : هو عبارة حبل او قماش ما بين السرج وضنب الحمار بغرض تثبيت السرج


ده الشي القدرنا عليهو يالمبارك يجي شيخ الباشا يكمل

عاطر تحياتي


ما قصرت الله يعطيك العافية ثلاثة من عشرة:
الدقداق
الورتاب
الضناب
تسلم ياغالي خلينا نشوف سعادة البروف.
,,,,,,,,,,,,,,,,,,,,,,,,,,,,,,,,,,,,,,,,,,,,,

المبارك ابراهيم
05-14-2012, 01:29 PM
صدق يا القوس أبداً ما قصرت ...

المبارك ده الظاهر عليه رطانى ونحن ما عارفين ... حكاية الجزيره دى متخفى وراها بس
حلوه تفسيرك للشابوره .... قلت لى كيف ؟؟ نوع من الكعك :sniper (29): ... هو الكعك ده ذاتو شنو ؟

البرقان ....
عندنا فى الحواشات شارع داخلى بيجى بيه المفتش حق الزراعه للتفتيش وهو طريق ضيق بين الحواشات ودائماً المزارعين يفكو فيه المويه عشان عربية المفتش الموريس ماينر تغطس فى الطين ويجو المزارعين يدحلسوا للمفتش يمرقوا ليه العربيه وضحكتين تلاته اخونا يمشى .... هو مشروع الجزيره باظ من شويه ؟؟!!

الإسكيف
ده طريق فوق ضهر الترعه وبرضو لسعادة المفتش عشان لو البرقان مليان مويه يطلع الاسكيف وبرضو العربات الطالعه من البلد على المدن بتمشى بيه

البربيط
دى رطانه عديييييل يا المبارك حتى تركيبة حروفها مستمده من الرطانه ... ياهو واللا مو ياهو يا القوس ؟

الكرنك
دى بعرفها فى اللوارى اللهو العمود البيربط العجلات مع الماكينه وهو البيمشى العربيه ... يقول ليك العربية وحلت فى الطين لما كسرت الكرنك .... تفسير تانى ما بعرفوا ليها

الديداب ....
هى الحركة المستمره او صوت الارجل ومشتقه منها الكلمه العسكريه يا عبدالواحد .... الديدبان وممكن تجى تشرحها مع الكلمات العسكريه الاخرى الطلبتها منك ....

المسكاب
دى بقى يا المبارك بالغت فيها عدييييل كدا:sniper (51): .... والله حسب علمى هى مرتبطه بالمريسه :sniper (93): ارتباط شديد .... وخاصه فى الكنابى ... لكن تفل العجين برضو الناس تقول عليه مسكاب وده بيدوهو للبهائم تاكلوا


أها يا القوس إنت رايك شنو على بال مايجى المبارك وعبدالواحد ؟؟



هههههاي ضحكتوني والله قلتوا لي الشابورة كيك هههاي
الشابورة هي الحواشة أو المزرعة (المشوبرة ) غير متساوية يعني ما مستطيلة مرات تكون في شكل مثلث أو في أشكل غير منتظمة وهي ما تبقي من تقسيم المشروع ودائما تلقاها في الآخر (حواشة شابورة. ) الله يشوبر عدوكم.
.................................................. ...............................................

أنا قلت الكُرنك بضم الكاف وليس الكَرنك بفتح الكاف
الكُرنك هو فصل دراسي من المواد المحلية من قصب وبوص وشعب وغيره لحين بناء الفصل الجديد بالطوب الأحمر يعني غرفة من القش.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,

أما البربيط هو مرتبط بالكرنك فالكرنك يبني من البربيط والبربيط هو نبات ينمو بالترع والمصارف والمستنقعات عليه قندول يشبه قندول الدخن بعد النضج
يتطاير القندول في الهواء يرسل أجسام كالفراشات خفيفة تطير في الهواء
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,
لكن يا الباشا عجبتني في المسكاب!!!
,,,,,,,,,,,,,,,,,,,,,,,,,,,,,,,,,,,,,,,,,,
أما بقية الإجابات إكسلانت يا بروف
,,,,,,,,,,,,,,,,,,,,,,,,,,,,,,,,,,,,
إلي اللقاء في عشرة أخري إذا ربنا مد في الآجال.
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,

قوس قزح
05-14-2012, 01:31 PM
والله يا باشا ( عفارم عليك ) انت استاذ عديل في العامية وشرحك سلس ومسلي والماب يفهم بعد ده عمرو ماب يفهم ... كيفتني جبنة ، بالنسبة ( للبرقان والاسكيف ) اذا كان شرحك صاح نحن عندنا اسمها ( درب الترك ) وده طريق وسيع شاقي السواقي على طول حد المديرية الشمالية وكان مخصص فقط للمفتش التركي لمان يكون عندو زيارة للمناطق .. الكرنك .. انا قريتا الكـُرنـُك ، عشان كده ما عرفتها ، اما كرنك العربية فهو معروف كما تفضلت بالشرح .. البربيط .. يبقالي معناها ( الخرخير ) والخرخرة هي لما الواحد ما يعترف بالهزيمة ويبدا يخلق في الاعذار ..

مجرد محاولات

قوس قزح
05-14-2012, 01:41 PM
هاكم العشرة ديل :
1- البربخ
2- اللبقة
3- الحِشِك
4- البعو
5- الحنقوق
6- الصارقيل
7- الكتقة
8- الحيبي
9- السوني
10- البروندي
11- الشعقوقة

المبارك ابراهيم
05-14-2012, 01:55 PM
هاكم العشرة ديل :
1- البربخ
باص
2- اللبقة
طينة كبيرة بيقفلوا بيها موية الجدول
3- الحِشِك
باص
4- البعو
باص
5- الحنقوق
باص
6- الصارقيل
طعم لصيد الأسماك مثل صغار الثعابين
7- الكتقة
باص
8- الحيبي
باص
9- السوني
(ساونا ياربي)
10- البروندي
ده يكون البرمندي حقنا البربطوا فيهو الحيوانات (شاية)
11- الشعقوقة
باص


ثلاثة بي ثلاثة والله يعيننا قال مبارك من الرطانة هسي البرطن منو يا الباشا هسة دي ما رطانه عيني عينك.

الباشا
05-14-2012, 02:00 PM
هههههاي ضحكتوني والله قلتوا لي الشابورة كيك هههاي
الشابورة هي الحواشة أو المزرعة (المشوبرة ) ودائما تلقاها في الآخر (حواشة شابورة. ) الله يشوبر عدوكم.



الكُرنك هو فصل دراسي من المواد المحلية من قصب وبوص وشعب وغيره لحين بناء الفصل الجديد بالطوب الأحمر يعني غرفة من القش.


أما البربيط هو مرتبط بالكرنك فالكرنك يبني من البربيط والبربيط هو نبات ينمو بالترع والمصارف والمستنقعات عليه قندول يشبه قندول الدخن بعد النضج

لكن يا الباشا عجبتني في المسكاب!!!



المبارك .... إت زول خطيييييير

الشابوره
دى عندنا بنقول ليها المشتوله .... وعلى قولك دائماً آخر بيت تُمامت عدد يعنى ... ودى بتكون بسبب وجود قريه او مبانى جنب الحواشات والنوع ده من الحواشات سيدها بيكون قنعان منها وخاتيها للمشاكل ... الزول الدايرو معاهو يمرر ليه بهايمو ترعى فيها ... لكن الزول المقاشرو ... الله قال بى قولوا كان ساى بهيمتوا هوبت ناحية الكعكه دى :SnipeR (40): ....

الكورنوك ....
صدق لو كتبتها كدا ... جايز كنت اتذكرتها .... فعلاً الكورنك عندنا بيت نعملوا للعمال فى الخلا خاصة ايام المسور ... يعنى ايام الحصاد أما حكاية فصول المدارس دى إلا كان عندكم ... ياه يا المبارك بقولك انت خطيييير ومن زمن الكسره :SnipeR (61):

البربيط
ده أكيد عندنا ليه اسم ... لانه من وصفك اتذكرت النبته دى ... بس مش عارف بالضبط امسها ايه ؟

قلت لى كيفتك فى المسكاب .... هيق هيق
عندنا يا القوس المريسه دى تكتر ايام الحصاد ... العمال بيجو للجنى سواء كان قطن او عيش ... وطبعاً شغل تمام بالنهار وبالليل عينك ماتشوف النور ... سكر وهجيج لقريب الصبح ... وبعد ده يجوك الصباح ذى العفاريت ... ستات المريسه بعد ما يصفوا المريسه بيرموا باقى الخماره بره ... وهى غذاء رئيسى للبهائم وتعال شوف البهيمه المياكله المسكاب ده ... تلقاها ماشه أم صحيفه .... يعنى بالجنب .. مافاضل ليها الا تشحدك سفه :clap::SnipeR (29):

الباشا
05-14-2012, 02:15 PM
1- البربخ
2- اللبقة
3- الحِشِك
4- البعو
5- الحنقوق
6- الصارقيل
7- الكتقة
8- الحيبي
9- السوني
10- البروندي
11- الشعقوقة


البربخ
..... جلا

اللبقه
.... صاح يا المبارك

الحشك
ده التمر التعبان ... ودى فى المثل العربى الفصيح ... " أحشك وسوء كيله "

البعو
مرت على فى البوست ده ... بس صفيتها


الحنقوق
شلخه من سعف النخيل .... ودى عندنا يا المبارك عند ناس البحر مش فى الضهره

الصارقيل صاح برضو يا المبارك

الكتقه
برضو مرت على فى البوست ده ... بس صفيتها هى الاخرى

والباقى .... جلا عدييييل يا القوس

المبارك .... القوس ده برضو رطانى على قولك

الباشا
05-14-2012, 02:25 PM
بالنسبة ( للبرقان والاسكيف ) اذا كان شرحك صاح نحن عندنا اسمها ( درب الترك ) وده طريق وسيع شاقي السواقي على طول حد المديرية الشمالية وكان مخصص فقط للمفتش التركي لمان يكون عندو زيارة للمناطق ..
البربيط .. يبقالي معناها ( الخرخير ) والخرخرة هي لما الواحد ما يعترف بالهزيمة ويبدا يخلق في الاعذار ..



لا حول الله .... من زمن الاتراك الدرب ده موجود ؟؟

أها يا القوس البربيط طلعت حاجه تانيه اها النبته دى عندكم اسمها شنو ؟

.... إنت قصدك البطبطه .... ودى عندنا هى الخرخره خاصة فى لعب البلى ...

وكمان عندما البرطمه .... الزول البيدرن الكلام او يقول كلام ساكت على قول السودانيين

واحد مصرى مره سألنى ... يعنى أيه كلام ساكت ؟ تركب إزاى بأااا ؟

سكت ما عرفت اقول ليه شنو ؟

قوس قزح
05-15-2012, 11:01 AM
الاعزاء والاحباب شيخ الباشا ، والمبروك المبارك


الشوايقة ديل فيهم شي من الرطانة ودي حقيقة ، كتير جدا من الكلمات النوبية داخلة في لعة الشوايقة عشان كده بتكون غريبة على الناس .. لكن برضكم ما قصرتو .. والله يا باشا ( درب الترك ) لايوم الليلي موجود وطبعا اصبح طريق عام للناس ..

1- البربخ : هو الممر المائي بين الجدول الرئيسي والجدول الفرعي وغالبا ما يكون من الفخار ( زي البرمة الصغيرة كده ) ومرات بيكون منحوت من جذوع النخل ويقفل ويفتح ( بالاشميق وهو ليف النخل والطين ) ومرات نقوم نسرق الموية ونعمل فيه فتحة صغيرة زي العملية الما مقصودة .
2- اللبقة : صحيح هي حاجز من الطين اما في الجدول الفرعي او بين الحوض والحوض
3- الحِشِك : هو ما يتبقى من الشي بعد أخذ المادة المفيدة منه ، يعني قريب من التفل .. ود بيعرفنو الحريم البيعملن الريحة
4- البعو : هو ما بداخل الدومة .. يعني بذرة الدومة وكنا بنطلعو من داخل الدومة بعد كسرها بالحجر ونلعب بيهو عدد من اللعبات وهو صلب وقوي جدا
5- الحنقوق : يعني اجابة الباشا فيها 90% صاح لكن الحنقوق في العموم هي المقشاشة المصنوعة من حنقوق او سرح العرجون او نبات الحلفا
6- الصارقيل : الصارقيل صاح وهو عبارة عن حشرات في شكل الثعابين الصغيرة تكون متخفية داخل الطين وبيستعمل كطعم لأصياد السمك
7- الكتقة : هي باب الزريبة وعادة مصنوعة من اعواد متشابكة مع بعض في شكل مربعات صغيرة
8- الحيبي : هي الارض الطينية الخصبة الهشة خالص وان مسكت في هدومك تاني ماب تمرق ودايما بتكون موجودة في طريق العربات حيث تفاعل العجلات مع هذه التربة الطينية الخصبة
9- السوني : هو نوع من الحجرالجيري كالذي يصنع منه الاسمنت وهو سهل النحت ويمكن تشكيله لأي شكل ياما لعبنا بيهو وصنعنا منو عربيات وحمير وجمال
10- البروندي : البروندي كما قال حاج المبارك وهو عبارة عن ( وتد ) مصنوع من الحديد يربط فيه الحمير والحصين بواسطة الحبل
11- الشعقوقة : هي نوع من الجراد ، لونها اخضر .. وكرعيها طوال ، تجدها فوق الاشجار .. وكمان بنمسيها الطهارة وكنا بنخاف منها خوف شديد مع انها مسالمة ومسكينة ، بس شكلها يخوف ..

ولسع ياما راجايكم رطانة

الباشا
05-15-2012, 03:52 PM
( درب الترك ) لايوم الليلي موجود وطبعا اصبح طريق عام للناس ..

دى يا عمر دلاله على الاصاله ....

1- البربخ : هو الممر المائي بين الجدول الرئيسي والجدول الفرعي

]دى كلمة عربية فصحى وطبيه كمان وتحمل نفس المعنى وهو ممر مائى .... وبرضو تقول لى رطانه ؟؟؟

2- اللبقة : صحيح هي حاجز من الطين اما في الجدول الفرعي او بين الحوض والحوض

دى عندنا فى الحواشات مستخدمة وبشده ... خاصة فى مواسم مسك المويه ...

3- الحِشِك : هو ما يتبقى من الشي بعد أخذ المادة المفيدة منه ، يعني قريب من التفل ..

عندنا استخدام قريب منها .. وهى انحشار بقايا الطعام بين الاسنان ... يقول ليك اسنانى اتحشكن بلب التسالى مثلاً .... أو اتحشنن وبرضو فى كلمه هى الحشن بس استخدامها طفولى خالص

4- البعو : هو ما بداخل الدومة .. يعني بذرة الدومة .... وهو صلب وقوي جدا

دى ما عندنا لانه الدوم ما بيقوم عندنا لكن بنشتريه من الخرتوم .. ونكد الدمه ونرميها ... مرات نستخدمها فى عمل كرة الشراب ... ....

5- الحنقوق : يعني اجابة الباشا فيها 90% صاح لكن الحنقوق في العموم هي المقشاشة المصنوعة من حنقوق او سرح العرجون او نبات الحلفا

هى المقشاشة دى مصنوعه من الحنقوق وهو تقطيع سعف النخيل الى سقف طوليه ... وكمان بصفه دقيقه هو الجزء القوى جداً من سعفة الخله


6- الصارقيل : الصارقيل صاح وهو عبارة عن حشرات في شكل الثعابين الصغيرة تكون متخفية داخل الطين وبيستعمل كطعم لأصياد السمك

نفس الاستخدام هى نوع من الديدان تستخدم لصيد السمك ....

7- الكتقة : هي باب الزريبة وعادة مصنوعة من اعواد متشابكة مع بعض في شكل مربعات صغيرة

لا اتذكر اى اسم لباب الزريبه غير باب الزريبه .

8- الحيبي : هي الارض الطينية الخصبة الهشة خالص وان مسكت في هدومك تاني ماب تمرق ودايما بتكون موجودة في طريق العربات حيث تفاعل العجلات مع هذه التربة الطينية الخصبة

على ما أظن نحن نسميها الحقبه ... وهى الارض التى تحجز المياه ودائماً طينه لوك ... .

9- السوني : هو نوع من الحجرالجيري كالذي يصنع منه الاسمنت وهو سهل النحت ويمكن تشكيله لأي شكل ياما لعبنا بيهو وصنعنا منو عربيات وحمير وجمال

عندنا حجر بنقول عليه الساسويه .. وطبعاً ارض الجزيره طينيه شديدة اللزوجه ومافى اى منطقه جيريه بتظهر عندنا ... عشان كدا الكلمه غير معروفه عندنا ولا حتى شبيه ليها

10- البروندي : البروندي كما قال حاج المبارك وهو عبارة عن ( وتد ) مصنوع من الحديد يربط فيه الحمير والحصين بواسطة الحبل

هو ذى ما قال المبارك نسميه عندنا فى شمال الجزيره او المنطقه المتاخمه للخرتوم بنقول عليه البربندى ... ناس جنوب الجزيره يقولوا عليه البرمندى أو احياناً البربندى .

11- الشعقوقة : هي نوع من الجراد ، لونها اخضر .. وكرعيها طوال ، تجدها فوق الاشجار .. وكمان بنمسيها الطهارة وكنا بنخاف منها خوف شديد مع انها مسالمة ومسكينة ، بس شكلها يخوف ..

دى نحن بنسميها حبوبه الطهاره .... وفعلاً ليها قصص وحكاوى ويقول ليك هى فى الاصل كانت طهارة فعملت ليها كارثه ربنا سخطها فى شكل جراده ... حتى فيها جزء يقول ليك دى موسها الكانت بتطهر بيها ... والله يالقوس كنا بنخاف منها موت ... من نشوفها فى الشجره نعض العراريق وهات يا فكيك ... وان لحق قبضها زول كبير وخوفنا بيها ... يخيل لى ... يخيل أيه !! ده الشرشره بتحصل عدييييل :SnipeR (79):

ولسع ياما راجايكم رطانة


وفى إنتظار أحلى رطانه

ويديك الف عافيه يا مديرنا العام وكل الأعوام الجايه

عبد الواحد محمد
05-15-2012, 06:21 PM
انت عارف يا باشا ويا قوس حبوبة الطهارة دي فعلا حشرة شكلها مخيف جدا وفي بعض كتب العرب يسمونها ابو سكين ..
وقد تفتقت عقلية احد المخرجين الغربيين بالاستفادة من شكلها بادخالها في فيلم تعملقت فيه الحشرات بسبب كارثة تلوث فصارت احجامها كبيرة جدا
والطهارة او ام طهارة من يومها شكلها يجنن ناهيك عن كونها تتعملق وتتعولق ..
ياااخ كانت حكاية مخيفة بجد ..
نحنا غايتو في الخريف بتجنن لينا الشفع جن لهسه ..
)))))))))))))))
لكن بتعرفوا ام صرفة ؟؟

المبارك ابراهيم
05-15-2012, 06:22 PM
حبااااااااااااااابكم تاني وتالت يا حلوين
سعدت بحبوبة الطاهرة وهكذا نسميها كما قال الباشا في الجزيرة
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,
جااااااااااكم
,,,,,,,,,,,,,,

الكِشْكة
الكُشنة
الكار
الكركار
المَلٌود
الحكًاكة
التًقدة
القًدُوم
الحِبِن
أب نِيني
,,,,,,,,,

الباشا
05-16-2012, 08:32 AM
لكن بتعرفوا ام صرفة ؟؟

بس كدا ... أم صرفه يا عبدالواحد ؟؟

ياخى انا أشيل وأعاين وأتاوق ... أقول الزول العسكرى المعتق ده يجينى طاير بى بقشة كلمات ( دورت لى جراب العساكر عشان اعرف اسمو ما لقيت )

إنت بالذات يخيل لى قاموس لهجه عسكريه .... أما إنك قاموس لهجه أهلنا فى الغرب فدى ما دايره ليها سعال

دحين ياخوى سيبك من أم صرفه ... دى ناس الشهادة العربيه بيعرفوها ... مش كدا يا .... مش انتو قلتو لى قريتوها وشفتوها فى الانترنت ... وكمان بتعمل شات فى الفيس بوك .... ياها ذاتها ... وكمان بتظهر فى الخريف ... ايوه ايوه ياها اليرقه والشرنقه وبعدين تبقى ابو الدقيق ... الله عليكم

عبدالواحد .... مش حأقبل بأقل من 100 كلمه عسكرية ويجى خمسه الف كلمه من غربنا الجميل

الباشا
05-16-2012, 09:05 AM
[size=6][color=blue]جااااااااااكم
( كان الله أداكم ) مش كدا يا المبارك


الكِشْكة
أها ... Ok... بعرفها طب
الكُشنة
ودى كمان .... جوعتنى ياخ
الكار
ودى برضو ... لعب البنيات
الكركار
الله ... الله يا حليل زمن الكركار
المَلٌود
ايوه ..... آثارها لسه فى إيدينا
الحكًاكة
دى فى التكه .... واللا البيجدعوها فى التقنت ؟
التًقدة

قلت كيف ..... التقده ؟ :zip:
القًدُوم
يا جماعه ... المبارك فى راسه حاجه غير الخشم

الحِبِن
ok

أب نِيني

دى عاوزه طبيب بيطرى ... مش كدا برضو




مش عارف أشكرك كيف يا المبارك ....

كلمات من القاموس التقيل .... المعتق ..... يا رائع إنت

قوس قزح
05-16-2012, 09:24 AM
القدوم : من فصيلة الفاس والفرار وهو يستعمل في النجارة .. وبرضو ممكن يكون الخشم ( الواحد لمان يزعل يقولولو مالك ماد قدومك او كازومك كدي ) اما الكشكة والتقدة واب نيني ديل اول مرة اسمع بيهم .. باقي الحاجات زي صاحبي الباشا ok

تسلم يا مبارك وعندي عشرة جاهزات

عبد الواحد محمد
05-16-2012, 10:00 AM
الكنتين
برنجي
كنجي
دوبجي
سروجي
الفهامة
بلتون
بلك
صنف
كوديا
سلاحليك ..؟
حسب الطلب يا باشا من القاموس العسكري ..
وجاييك مع قاموس الغرب

الباشا
05-16-2012, 10:08 AM
اما الكشكة والتقدة واب نيني ديل اول مرة اسمع بيهم .. باقي الحاجات زي صاحبي الباشا ok

تسلم يا مبارك وعندي عشرة جاهزات

تسلم يا القوس ... أرجا العشره ديل شويه ...

لما نشوف جكة الناس ... وكمان قاموس عبدالواحد العسكرى

بالمناسبه يا عبد الواحد ... معروف طبعاً قاموس العساكر فيه حاجات تحت تحت :surrender: ... فظيييييعه

برضو أدينا منها شويه بعد ما تغلفها بورق سلوفان .... عشان ما تضرس ناس الشهاده ....:SnipeR (51):

الكشكه

يا قوس .... فى معنى متأكد منه شديد ومعنى تانى حأقولوا ويجى المبارك يصححنى واللا يغالطنى أو يغلطنى

الكشكه المتأكد منها هى الغبشه الشديده لما مدرشه ...يقول ليك الشافع ده مكشك ... يعنى مغبش و مع الوسخ لما جسمه يبقى زى المبرد

أما الكشك التانى ده ... يخيل لى مرتبط بالمريسه برضو ....

أما

أب نينى

فدا مرض بيصيب البهائم غنم أو ضان فى الغالب ... يخليها تقنت وتئن و تسهل وحالتها تبقى حاله وفى النهايه يا إما تتكل على الله أو يلحقوها بالبطرى أو فى بعض الاحيان ... يضبحوها ودى طبعاً بيعملوها الجزارين الما بيخافوا الله .... بس الكويس انه غير معدى للبنى آدم وإلا كان نص الجزيره راح فيها من كترت تفشى المرض ده بالذات وسط البهائم ..

الباشا
05-16-2012, 10:14 AM
الكنتين
حسب الطلب يا باشا من القاموس العسكري ..
وجاييك مع قاموس الغرب

الله .... الله

ده الكلام ....

يا قوس بصفتك المدير العام

أى زول ما يجى بى هنا ... توقع عليه شرط جزائى

ومنتظرين التفسير يا جماعه ... وبعدين نشوف قاموس أهلنا فى الغرب

المبارك ابراهيم
05-16-2012, 10:43 AM
مش عارف أشكرك كيف يا المبارك ....



كلمات من القاموس التقيل .... المعتق ..... يا رائع إنت


صفقولوا والله تستاهل وسام النيلين
صباح الفل والياسمين ياغالي.

المبارك ابراهيم
05-16-2012, 10:50 AM
تسلم يا القوس ... أرجا العشره ديل شويه ...


لما نشوف جكة الناس ... وكمان قاموس عبدالواحد العسكرى

بالمناسبه يا عبد الواحد ... معروف طبعاً قاموس العساكر فيه حاجات تحت تحت :surrender: ... فظيييييعه

برضو أدينا منها شويه بعد ما تغلفها بورق سلوفان .... عشان ما تضرس ناس الشهاده ....:sniper (51):

الكشكه

يا قوس .... فى معنى متأكد منه شديد ومعنى تانى حأقولوا ويجى المبارك يصححنى واللا يغالطنى أو يغلطنى

الكشكه المتأكد منها هى الغبشه الشديده لما مدرشه ...يقول ليك الشافع ده مكشك ... يعنى مغبش و مع الوسخ لما جسمه يبقى زى المبرد

أما الكشك التانى ده ... يخيل لى مرتبط بالمريسه برضو ....

أما

أب نينى


فدا مرض بيصيب البهائم غنم أو ضان فى الغالب ... يخليها تقنت وتئن و تسهل وحالتها تبقى حاله وفى النهايه يا إما تتكل على الله أو يلحقوها بالبطرى أو فى بعض الاحيان ... يضبحوها ودى طبعاً بيعملوها الجزارين الما بيخافوا الله .... بس الكويس انه غير معدى للبنى آدم وإلا كان نص الجزيره راح فيها من كترت تفشى المرض ده بالذات وسط البهائم ..


ياسلالالالالالام عليك شرح كافي وافي مافي كلام ما يخرش المية.

التقدة : عادة تصنع من الحديد أو الصفيح أو الألمونيوم أكبر من قبضة اليد تستعمل في قطع سنابل الذرة (قناديل العيش) أيام الحصاد.

المبارك ابراهيم
05-16-2012, 10:54 AM
الكنتين
برنجي
كنجي
دوبجي
سروجي
الفهامة
بلتون
بلك
صنف
كوديا
سلاحليك ..؟
حسب الطلب يا باشا من القاموس العسكري ..
وجاييك مع قاموس الغرب

حلفت عليك ولا وآحده ما عرفتها (صفر من عشرة)
دحين الكنتين ما إياهو الدكيكين!!!

الباشا
05-16-2012, 11:41 AM
تستاهل وسام النيلين


دا إنت اللى تستاهل أوسمة الكون كله ... يا المبارك

كدا البوست بقى ليه أهمية قصوى ....

بس يا مبارك لو الناس كلها ... تشارك يكون تحقق الهدف

ياخى نفسى أعرف جميع لهجات قبائلنا ومناطقنا

فيها إثراء ... ومعانى ... وجرس .... وموسيقى ... بالجد تطربنى

وبعدين لما اقعد افسر ... بحس انى برجع لطفولتى ... ولقريتى .... ولبلدى ..

لأهلى ... لناسى ... لاصحابى ... أصحاب طفولتى ...

وأصحابى بالذات .... ياخى الغربه أخدتنا نسينا حتى اللهجه السودانيه

حتى اللهجه المتكلمه حالياً ... لسانا اتعوج ... من كتر اكل كبسه الجداد ... وشراب الشاى اللماصه دا

صدقنى نفسياً برتاح ... لما افضفض هنا

الباشا
05-16-2012, 12:13 PM
حلفت عليك ولا وآحده ما عرفتها (صفر من عشرة)
دحين الكنتين ما إياهو الدكيكين!!!

إت يا المبارك ما دخلت الكديت فى الثانوى ؟

أتذكر لما دخلت حنتوب الثانويه ... زماااان وما تسألونى بتين ؟ .... أول يوم فى المدرسة جاء الصول " عم حسن " الله يرحمه حياً كان أم ميتاً .... دوّر الطابور حق المدرسة 21 فصل وتقريباً بين 900 إلى 1000 طالب فى المدرسة .... كل دفعه خمسه فصول وسنه أولى كانت 6 فصول ..... على ما أذكر .... بعد ما فصول السناير دخلوا الفصول حجزونا نحن ناس سنه أولى .... جاء المدرسين وعلى رأسهم الناظر الاستاذ العظيم / عبدالباقى محمد .... الله يرحمه حياً كان أم ميتاً وكوكبه من الأساتذه على رأسهم الشاعر الكبير ... المرحوم / الهادى آدم .... شاعر أغداً القاك التى غنتها أم كلثوم .... والأستاذ الفاضل / عبدالعزيز التوم ... كنا نسميه " البمبل شوك " ودا كان تيوتر داخلينا وهو مؤلف كتاب الأحياء الذى درسة كل طلاب الثانوى فى تلك الفترة وحتى تاريخ تغيير المناهج فى عهد نميرى ....

المهم بعد الترحاب وشوية كلمات من هنا وهناك ... وقف الصول وقال يا أولاد الداير يدخل الكديت يجى بى جاى ..... ورررر الجماعه كلهم صفوا يمين ... حوالى 297 طالب من دفعه فيها 300 طالب ... طبعاً الباقى 3 ... واحد فيهم ماشى بعكازات ... والتانى نضارتو قعر كبايه .... أما التالت فكان العبد لله ..... عاين لى الصول وقال لى إت ما شديييييد وسمين ذى العتود .... مالك ميابى الكديت ؟ .... والله ما كضبت عليه ... على طول قلت ليه ما بريد العسكريه سااااكت ... وتانى خلاص سجلت فى الكشافه وهى ذى الكديت ... قال لى خلاص يا ولدى على كيفك ..

زمن جميل .....

عبد الواحد محمد
05-16-2012, 06:11 PM
حلفت عليك ولا وآحده ما عرفتها (صفر من عشرة)
دحين الكنتين ما إياهو الدكيكين!!!



الكنتين = فعلا الكنتين هو دكان في الحاميات العسكرية ولكن كنتين الجندي هو ماعون
أو اناء من الالومونيوم مستطيل الشكل لديه يد مثلثة الشكل وكثير من الثلاجات يوضع هذا الماعون داخلها في الفريزر للتلج
برنجي = البرنجي هو الاول ..برنجي بلك تعني البلك او السرية الاولى( البلك بضم التاء ) وتعني سرية
كنجي = هو التاني وكنجي بلك تعني البلك او السرية الثانية
دوبجي =الدوبجي هو الجندي العامل بالمطبخ او السفرة مع الطباخين
سروجي= السروجي هو الجندي الذي يخيط الجلود والاحذية الجلدية ..
الفهامة= هي مسمار في منتصف طاقية الحديد لو لبست الطاقية بدون الغطاء
الداخلي لطاقية الحديد فان هذا المسمار يتسبب في جنانك خاصة اذا كنت حالق صلعة
ويخليك تفهم فعلا ويستعمل في الجزاءات وطوابير الذنب ..
بلتون = فصيلة ( 33 فرد )( ثلاثة اصناف او جماعات )
بلك= سرية ( ثلاثة فصائل )
صنف =جماعة ( احد عشر فردا )
كوديا = شجيرة صغيرة
سلاحليك ..؟ معدة خشبية يوضع عليها سلاح الحرس ( القرقول)

الباشا
05-17-2012, 11:59 AM
الكنتين
برنجي
كنجي
دوبجي
سروجي
الفهامة
بلتون
بلك
صنف
كوديا
سلاحليك




الكنتين
دى جديده لنج حسب القاموس العسكرى ...

لكن الكنتين حق المبارك بعرفوا طبعاً وده دكيكين صغير دائماً مرتبط بأماكن التجمعات الوقتيه .. يعنى ذى المدارس .. الجامعات ... المعاهد .... معسكرتن الجيش .... المصانع .... يعنى دكان لا يفتح طول الوقت إنما مرتبط بوجود فئة معين من الناس وفى الغالب بضاعته حاجات مستهلكه وقتيه .. أهمها السجائر ... والحاجه البارده .... والحلويات ... و الطحنية وشوية خردوات معنكشه ....

برنجى ....
غير انها نوع من أشهر أنواع السجائر فى السودان ومن أسؤا ما صنعته البشريه من دخان ... إلا أنه استخدامها العسكرى يخليها مبلوعه حبتين وأظن كلمة برنجى دى شكلها ذى التركى ... وهى كلمه مستخدمة عند الابهات زمان يقول ليك ولدى طلع برنجى ... يعنى طلع الاول على فصلوا

كنجى .... جديده على اول مره اسمع بيها

دوبجى كذلك اول مره

سروجى
دى معروفه ... حتى هنا فى السعوديه السروجى هو الشخص الذى يتعامل مع الادوات الجلديه بصفه عامه ... أحزمه ... جزم ... سروج اى شى يدخل فى تصنيعه الجلد يسمى سروجى ..... وأحياناً النقلتى يقال عليه أيضاً سروجى ...

أما الفهامه
دى .... والله حكايتها حكايه ... قلت لى يا جنابو فى نص الراس .... ماهو ده المجنن بوبى ذااااااااتو ... وأنا أقول العسكور ديل مرات عندهم حركات مش مفهومه ... أتارى الحكايه فيها فهامه ...... بينى وبينك يا عبدالواحد محتاجين كم طاقيه حديد بدون بطانه لكل أعضاء المجلس الوطنى والحزب الوطنى وكل موظف حكومه جمهورية السودان الغير ديمقراطيه .... أى والله ونوقفهم كلهم فى الشمس ونلبسهم الطواقى .....

بلتون
دى كلمه نستخدمها عاميه تعنى الكتره يقول ديل جايين بلتون يعنى شله كتااااار بس المحيرنى ليه 33 شخص ؟؟؟ ليه ما يكونوا 30 أو 40 إشمعنى 33 حقوا يا عبدالواحد تبحث لينا فى الموضوع ده اكيد وراهو سر عسكرى !!

بلك ..
البلك برضو ليها استخدام عام وهى مجموعة المنازل .... والبلك أيضاً نوع من الطوب الاسمنتى .... أما البلك ابو 99 جندى برضو جديده وليه البلك 3 فصائل ليه ما يبقوا خمسه ... سبعه ... يعنى لازم 99 والكماله البلك أمين على ما أظن ..... والله يا العساكر ليكم أسرار

صنف ...
أووووووو ..... دى بقااا حقت الحشاشين وأخوانا فى شمال الوادى اكتر ناس يستعملوا التعبير ده يقول ليك تجارة الصنف .... يعنى تجارة الحشيش وعندنا نقول عليه البنقو حمانا الله واياكم من شرورو وبلاويه ..... المصاريه بيبيعوا الحاجات دى بوزنه معينه فأحد الاوزان إسمها " القرش " .. يقول ليك مره واحد شحاد مدّ يدوا لمسطول قال ليه حسنه لله يا بيه ... أدينى قرش ... المسطول رد عليه قال ليه هات عشره جنيه ....

كوديا ....
دى استخدامها العام يعنى المغفل وبرضو كمان ستات الظار فى مصر اسمهم الكوديا .... أما الكوديه العسكريه دى والله اول مره اسمع بيها

سلاحليك .....
هى كلمه تركيه بحته فعلاً تعنى مكان السلاح الخاص بالحراسات .... ومستخدمه فى الافلام والمسلسلات كتير جداً


قاموس رائع يا عبدالواحد ..... أكيد لسه ياما فى الجراب يا جنابو ..... الكيس حق العساكر مش برضو اسمو جراب واللا عندكم ليه اسم تانى ؟

المبارك ابراهيم
05-19-2012, 11:00 AM
وين العشرة بتاعت صاحبنا ؟؟؟
,,,,,,,,,,,,,,,,,,,,,,,,,,,,,,,,

الباشا
05-19-2012, 11:07 AM
[size=6][color=red]
الكِشْكة
الكُشنة
الكار
الكركار
المَلٌود
الحكًاكة
التًقدة
القًدُوم
الحِبِن
أب نِيني



ديل لسه ما أخدوا حقهم فى التفسير يا المبارك

فى إنتظارك ......

الباشا
05-19-2012, 11:10 AM
وين العشرة بتاعت صاحبنا ؟؟؟
,,,,,,,,,,,,,,,,,,,,,,,,,,,,,,,,



ياتو عشره ؟

كلماتك يا المبارك واللا عبدالواحد واللا القوس ؟

والآ إنت عندك واحدات جداد ؟

قوس قزح
05-20-2012, 08:59 AM
ياتو عشره ؟



كلماتك يا المبارك واللا عبدالواحد واللا القوس ؟


والآ إنت عندك واحدات جداد ؟


شيخ المبارك قاصد عشرة القوس ، ويالله هاكم :

1- الكركعوبة
2- العَكش
3- الفدايي
4- القيروانة
5- السبروق
6- الداشكوك
7- الحمّيرية
8- الميبر
9- كودن شبر
10- ام ضريسي

المبارك ابراهيم
05-20-2012, 09:12 AM
شيخ المبارك قاصد عشرة القوس ، ويالله هاكم :

1- الكركعوبة
2- العَكش
3- الفدايي
4- القيروانة
5- السبروق
6- الداشكوك
7- الحمّيرية
8- الميبر
9- كودن شبر
10- ام ضريسي


الكركعوبة دي أعتقد حاجة كده بتمشي حالها مكركبة (زي العربية بتاعت يا القوس)
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,
القيروانة أعتقد دي نحنا بنقول ليها القيربانة وهي الصفيحة أو التنكة بلغة أهل الخليج
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,
أم ضريسي نحنا بنقول ليها الضريسة وهي نبتة منشرة علي الأرض تنتج شوك في شكل دائري يجنن الحفيانين ويمسك في الأحذية
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
الباقي الله أعلم
,,,,,,,,,,,,,,,

قوس قزح
05-20-2012, 11:17 AM
ود ابراهيم يا اخوي ما قصرت طب ( اتنين من عشرة ) صاقط بامتياز

يالله يا شيخنا الباشا

المبارك ابراهيم
05-20-2012, 02:08 PM
ود ابراهيم يا اخوي ما قصرت طب ( اتنين من عشرة ) صاقط بامتياز



يالله يا شيخنا الباشا


وأهلنا بقولوا الطيش عند ربه بيعيش.
كتير الفشفاش علي أم الفضل
.........................................

الباشا
05-20-2012, 03:07 PM
1- الكركعوبة

الكركعوبه عندنا معناها الشى القديم والناشف .... أو الشخص العجوووووز المكركب .... أو ثمرة النباتات الناشفه فى فرعها نسميها كركعوبه

2- العَكش

قريبه من الكركعوبه وهى الحاجه المعنكشه ..... أو أجزاء النبات الموجوده مع الثمره .... يعنى ذى التمر وتلقى معاهو باقى السبيطة وشويه عيدان وقش

3- الفدايي

اكيد دى بالشايقى أما الفدايه عندنا هى العوض أو الشى الذى يفدى شى آخر ... والفدايه هى كمان نوع من الحلى الذهبيه ... والله أعلم

4- القيروانة
نحن برضو نقول ليها القيروانه وهى نصف الصفيحه الاسفل وتستخدم فى جلب المياه وحفظها أو السقايه فى بعض الاحيان

5- السبروق
نوع من النبات من فصيله الجرجير والملوخيه ويفرك مع الويكه ويطلع ملاح عجب مع القراصه أو الكسره كله ماشى يا حلاتو

6- الداشكوك
لا والله يا قوس هدى سنجك كح .... قدر ما حاولت اجد ليها حاج شبيهه ... مافيش فايده

7- الحمّيرية
نوع من الحشرات لونها أحمر وناسى نحن كنا بنقول ليها شنو .... وفى ذبابه مزعجه برضو كنا نسميها ذى كلمة الحماريه وهى فقط تتابع الحمير وفى بعض الاحيان نقول ليها ضبانة الحمير

8- الميبر
هو ذى المسله ... بس الميبر له يد صغيره من الخشب وطوله أقل من المسله .... ويستخدم لخرق الجلد عند الخياطه ...
وأهم استخدام للميبر هو خياطة الكفر لما نجى نلعب الكره فى ميدان التراب طبعاً

9- كودن شبر
دى حاجه قصيره ... واى شى قصير نحن نقول ليه الشبر بس الكودن دى ما بعرفها .... بس عندنا المكودن الحاجه اللابده ... يعنى متضارى

10- ام ضريسي
هى كما قال المبارك الضريسه وهى نبات شوكى ينتج كرات شوكيه تنتشر بفعل الهواء ... ولما نجرى حفايه ونطأ فيها ... مصيبه طعنتها حاره حروريه شديده

الباشا
05-20-2012, 03:09 PM
[size=6][color=red]
الكِشْكة
الكُشنة
الكار
الكركار
المَلٌود
الحكًاكة
التًقدة
القًدُوم
الحِبِن
أب نِيني



ديل لسه ما أخدوا حقهم فى التفسير يا المبارك

فى إنتظارك ......


ماتاكلنا حنك يا المبارك .... راجين التفسير

قوس قزح
05-20-2012, 07:14 PM
والله يا صاحبي الباشا اجتهدت اجتهاد شديد خلاص لامن قربت تنجح ، مرات تقرب للمعنى وتاني تزوغ منو .. اها النخت النقط فوق الحروف :

1- الكركعوبة : كركعوبة الدوم حُقتا : بندق البارود قـُحتا : لاكت السفة وبلعتا : تظهر اكبر من حبوبتا : وتنقطع البطن الجابتا .. هي المادة الصلبة داخل الثمرة ودايما مرتبطة بالدوم والمنقة .. يعني بعد ما تمص المنقايي والله تكد الدومي البتفضل هي الكركعوبة
2- العَكش : هو ( حلق ) حبوباتنا الزمان .. طبعا من الدهب الخالص في شكل دائرة نصف قطرها 3سم او اكتر حسب البحبحة

http://t3.gstatic.com/images?q=tbn:ANd9GcSJvG95rWsY5nNwbDYQhn4c2GWOBlofl 8JtT7FbKx72sHlg9W3_CeOBc78mDA


3- الفدايي : هو برضو نوع من ( الحلق ) اقل بكتير من العكش وغالبا في شكل هلال وهو ايضا من الدهب الخالص
4- القيروانة : عندنا هي الصفيحة على العموم او التنكة زي ما قال استاذنا المبارك ( يعني ما نص صفيحة يا باشا )
5- السبروق : هو ورق نبات البامية او الويكي .. ود بيخلطوهو مع الباميا ولسان الطيرمع القراصة الحارة وعينك ما تشوف الا النور
6- الداشكوك : هو نوع من السمك راسو مفلطح وليهو شنبات طوال
7- الحمّيرية : هي القمرية
8- الميبر : اكبر من الابرة واصغر من المسلي وشرح الباشا كان ضافي جدا
9- كودن شبر : وقيل انها كون شبر وليست كودن شبر كما نطلق عليها نحن ، وقد جاءت في شعر المرحوم الشاعر حميد : جايي داقشي المغربيي .. سمسونايتك زمزميي .. كون شبر ، طوريي منجل .. وهي عبارة عن قفة متوسطة الحجم ما فيها اضنين ، تستعمل في الزراعة لنقل الترابة الجافة لعمل اللبقة او سد الكركية .. وطبعا دي ذاتا عاوزة تفسير
10- ام ضريسي : زي ما قلتو انت والمبارك وشقي الحال يقع فيها


يديكم ألف عافية

الباشا
05-21-2012, 09:13 AM
1- الكركعوبة : هي المادة الصلبة داخل الثمرة ودايما مرتبطة بالدوم والمنقة .. يعني بعد ما تمص المنقايي والله تكد الدومي البتفضل هي الكركعوبة
2- العَكش : هو ( حلق ) حبوباتنا الزمان .
[/color][/font][/size]
3- الفدايي : هو برضو نوع من ( الحلق )
4- القيروانة : عندنا هي الصفيحة
5- السبروق : هو ورق نبات البامية او الويكي ..
6- الداشكوك : هو نوع من السمك
7- الحمّيرية : هي القمرية
9- كودن شبر : هي قفة متوسطة الحجم ما فيها اضنين ، تستعمل في الزراعة لنقل الترابة الجافة لعمل اللبقة او سد الكركية
[/align]

يديك العافيه يا القوس

فعلاً الكركعوبه عندنا هى ذى تفسرى بالضبط لانه الدوم عندنا نادر ... والمنجه بعد مصها المتبقى بنقول ليه العضم ...

العكش بتفسيرك ما عندنا ... ولو ما تخونى الذاكره العكش دى هى الفدايه عندنا على ما اظن

القيروانه هى نصف الصفيحه عندنا ... لان الصفيحه الكامله لانقول لها غير الصفيحه

صاح السبروق هو ورق الباميه وعندنا استخدامه قليل جداً ....

الداكشوك عندنا اسمه الكنكيج

القمريه هى القمريه ولا نعرف لها غير هذا الاسم

كودن شبر دى عندنا بنسميها القفيفه .... تصغير قفه يعنى


ويديك الف عافيه


وينك يا المبارك

المبارك ابراهيم
05-21-2012, 10:14 AM
ديل لسه ما أخدوا حقهم فى التفسير يا المبارك


فى إنتظارك ......



ماتاكلنا حنك يا المبارك .... راجين التفسير


لا يفتي ومالك في المدينة
إنت زول شرًاح علي وزن فعال
أنا الموقع أدناه المبارك ود إبراهيم
لقد أوكلت السيد الباشا بشرح الكلمات أعلاه
وإذا صعبت عليك أي كلمة وروني ليها وأقيفوا فرًاجة

المبارك ابراهيم
05-21-2012, 10:23 AM
يديك العافيه يا القوس


فعلاً الكركعوبه عندنا هى ذى تفسرى بالضبط لانه الدوم عندنا نادر ... والمنجه بعد مصها المتبقى بنقول ليه العضم ...

العكش بتفسيرك ما عندنا ... ولو ما تخونى الذاكره العكش دى هى الفدايه عندنا على ما اظن

القيروانه هى نصف الصفيحه عندنا ... لان الصفيحه الكامله لانقول لها غير الصفيحه

صاح السبروق هو ورق الباميه وعندنا استخدامه قليل جداً ....

الداكشوك عندنا اسمه الكنكيج

القمريه هى القمريه ولا نعرف لها غير هذا الاسم

كودن شبر دى عندنا بنسميها القفيفه .... تصغير قفه يعنى


ويديك الف عافيه



وينك يا المبارك



العكش عندنا (الخُرُس)
الداكشوك عندنا فعلا الكنكيج أو البلبوط (التامبيرا بت أعم الحوت يوم عرسك ضبحوا ليك بلبوط)
السبروق تذكرته فعلا هو ملاح بورق البامية وإضافة لسان الطير ولسان الطير في رواية أخري أسمة (الجرجور بتعطيش الجيمين)

قوس قزح
05-21-2012, 10:47 AM
وهاكم العشرة ديل كمان ، بعد ده قاموسنا قرب يكمل .. وين باقي الناس يا خلق الله
1- الدفـِّيق
2- الهرود
3 - الصفـّوري
4 - اب راس
5 - العفنون
6 - الشخلوب
7 - الكـُشِّج
8 - القفوزة
9 - الشـِّلخة
10- الكـُرِيق وليس ( الكوريق )

المبارك ابراهيم
05-21-2012, 11:10 AM
وهاكم العشرة ديل كمان ، بعد ده قاموسنا قرب يكمل .. وين باقي الناس يا خلق الله
1- الدفـِّيق
2- الهرود
3 - الصفـّوري
4 - اب راس
5 - العفنون
6 - الشخلوب
7 - الكـُشِّج
8 - القفوزة
9 - الشـِّلخة
10- الكـُرِيق وليس ( الكوريق )




المرة الفاتت إتنين من عشرة المرة دي إتنين من عشرة ذاتها ما لامين فيها وبرضو تقولوا ما رطانة!!!
الهرود عندنا الشيء الكثير عندما تجيب حاجة كتيرة أمك تقول ليك الهرودل تضيف لها لآما في الآخر.
الشلخة أو الشُلخة هي فرع صغير من القندول سنبلة العيش .

قوس قزح
05-21-2012, 12:35 PM
هاردلك يا مبارك نـُص من عشرة مع الرحمة

وخيرا في غيرا

الباشا
05-21-2012, 01:15 PM
لا يفتي ومالك في المدينة
إنت زول شرًاح علي وزن فعال
أنا الموقع أدناه المبارك ود إبراهيم
لقد أوكلت السيد الباشا بشرح الكلمات أعلاه
وإذا صعبت عليك أي كلمة وروني ليها وأقيفوا فرًاجة

[size=6]
الكِشْكة
الكُشنة
الكار
الكركار
المَلٌود
الحكًاكة
التًقدة
القًدُوم
الحِبِن
أب نِيني




ما قلنا ....ماتاكلنا حنك يا المبارك .... ما سمعت بالمثل [color="darkgreen"]" سمح الغنا فوق خشم سيدو

المبارك ابراهيم
05-21-2012, 01:31 PM
ما قلنا ....ماتاكلنا حنك يا المبارك .... ما سمعت بالمثل " سمح الغنا فوق خشم سيدو


هههههااااي
يا أخي خشم دي كبيرة خليها خِشِيم
سمح القول في خشيم سيدو
ما سمعت بالخشيم فلة وراضي بي جٌلًة
هو إنت بتتأكل ؟؟؟
إنت ما زي حنضل القيزان الله يخارجنا ههههاي

الباشا
05-21-2012, 01:58 PM
سمح القول في خشيم سيدو
ما سمعت بالخشيم فلة وراضي بي جٌلًة



قلت كيف ؟ .... خشيم !

بذمتك ده كلام ؟ ..... حالتى قايل إن قلت خشيم تزعل على

وتقول الباشا ده خرف واللا شنو ؟ أتاريك إنت المخرف .... الخشيم دى ما ليها بروتوكول إستخدام

نخاف نستخدمها .... تجى الهيئة تعتقل المدير العام ..... ونحن ما ناقصين غياب ...

ومن وين جبت الخشيم فله وأنا راضى بى جله ؟ .... يا زول هووى مالك ؟ كان متحسس خلينا نسوى ليك محايه واللا بخره

المبارك ابراهيم
05-21-2012, 02:06 PM
قلت كيف ؟ .... خشيم !

بذمتك ده كلام ؟ ..... حالتى قايل إن قلت خشيم تزعل على

وتقول الباشا ده خرف واللا شنو ؟ أتاريك إنت المخرف .... الخشيم دى ما ليها بروتوكول إستخدام

نخاف نستخدمها .... تجى الهيئة تعتقل المدير العام ..... ونحن ما ناقصين غياب ...


ومن وين جبت الخشيم فله وأنا راضى بى جله ؟ .... يا زول هووى مالك ؟ كان متحسس خلينا نسوى ليك محايه واللا بخره


متحسس ومتجرس سوي عوسك الداير تسويهو سويهو بخرة محاية خروج وعودة خروج نهائي!!
الخشيم فلة وراضي بي جلة دي رمية كاااربة من رميات ناس الحقيبة وبعدها بقولوا الليلة هوي ياليلة ليلة وليل هوي يا تومي الأذي يا الله.

أشرح الأتي:
الخشيم فلة:
عُوسك:
جُلًة:
تومي:
,,,,,,,,,,,,,,,

الباشا
05-21-2012, 02:45 PM
1- الدفـِّيق
الدفيفيق الدابو نى ... يا البسيتمو بتكوينى كى
الدفيق ده أول التمر .... ياهو مالا مو ياهو

2- الهرود
برضو نوع تمر بس ما بعرف وصفوا

3 - الصفـّوري
ده البلح لما يكون اصفر ويجيك حلو ومرات حامض ومر

4 - اب راس
أكيد برضو ده نوع من التمر بس هو شنو ما بعرف

5 - العفنون
أيه يا قوس كان ما رطانه ع قول المبارك تبقى برضو تبع التمر

6 - الشخلوب
ده الرغوة حقت اللبن

7 - الكـُشِّج
دى رطانه راسها عدييييل يا المبارك

8 - القفوزة
إلا كان جراده بتنطط

9 - الشـِّلخة
حزمة النبات ..... عندنا فى موسم زراعة القطن بنسميها الشلخ

10- الكـُرِيق وليس ( الكوريق )

هو الكوريق ذااااااتو شنو:oo5o.com (27): ؟

الباشا
05-21-2012, 03:08 PM
[size=6]أشرح الأتي:
الخشيم فلة:
عُوسك:
جُلًة:
تومي:



[color="red"]الخشيم : تصغير خَشُم ..... وهو ما يحمل البراطيم وكمان ممنوع من الصرف

فله : لها معنيين أحدهما الورده الجميله والآخر هو غطا قزازة البيتسى كولا إنت عاوز ياتو فيهم ؟

عوسك : من عاس وعاس الشىْ يعنى عكاهو ... ساطو .... والعواسه ايضاً لها عدة استخدامات منها عواسة الكسره الللقم والرهيفه ... والعواسه التانيه هى اللخبطة والقطيعه ونقل الكلام البيجيب الغلط


الجله : هى كوره من الحديد الصلب ... وكنا نلعب بيها البلى يعنى الضراب

وتومى : يعنى ذى خوة القوس ..... اخوك والأقرب ليك من أخوانك هو تومك .... كان نزلت انت قبلوا تعمل عليه الكبير أوى .... وكان جيت بعدو تسوق فيها وتعمل نفسك الصغبوتى المدلع


برضو يا المبارك ما تاكلنا حنك ..... وين العشره

مانى عاتقك .... وحأبقى ليك فى تولا

قوس قزح
05-21-2012, 03:51 PM
يا سلام عليكي يا باشا والله استحقيت ( الشلوخ ) عديل .. شغلك تمام ونجيض ، وصدقني آمنت بي ثقافتك العامية ، وممكن بعد ده نطلع كتاب عديل ينافس القاموس ذاتو .. ولامن اجيك اوريك الصاح من الغلط

ربنا يديك ألف عافية

الباشا
05-21-2012, 04:32 PM
يا سلام عليكي يا باشا والله استحقيت ( الشلوخ ) عديل .. شغلك تمام ونجيض ، وصدقني آمنت بي ثقافتك العامية ، وممكن بعد ده نطلع كتاب عديل ينافس القاموس ذاتو .. ولامن اجيك اوريك الصاح من الغلط

ربنا يديك ألف عافية

لسه يا حبيب ... البوست ده لسه فى بدايتو

وليك على نكملوا ونعمل منو كتاب ...... وكل من اشترك حيكون ليه نصيب

مش فلوس :SnipeR (57): .... الفلوس تطير ما ترك

المهم الحق المعنوى فى مثل عمل وطنى ذى ده

ليت كل الشباب يشتركوا فى هذا القاموس

المبارك ابراهيم
05-21-2012, 05:31 PM
الخشيم : تصغير خَشُم ..... وهو ما يحمل البراطيم وكمان ممنوع من الصرف

فله : لها معنيين أحدهما الورده الجميله والآخر هو غطا قزازة البيتسى كولا إنت عاوز ياتو فيهم ؟

عوسك : من عاس وعاس الشىْ يعنى عكاهو ... ساطو .... والعواسه ايضاً لها عدة استخدامات منها عواسة الكسره الللقم والرهيفه ... والعواسه التانيه هى اللخبطة والقطيعه ونقل الكلام البيجيب الغلط


الجله : هى كوره من الحديد الصلب ... وكنا نلعب بيها البلى يعنى الضراب

وتومى : يعنى ذى خوة القوس ..... اخوك والأقرب ليك من أخوانك هو تومك .... كان نزلت انت قبلوا تعمل عليه الكبير أوى .... وكان جيت بعدو تسوق فيها وتعمل نفسك الصغبوتى المدلع


برضو يا المبارك ما تاكلنا حنك ..... وين العشره

مانى عاتقك .... وحأبقى ليك فى تولا



صاااااااح يا أمير إجابات مكتملة .
أما فلة الإتنين ما دايرهم فله بمعني وردة وفلة غطاء القزازة بتاعت الببسي كلو ما المقصود
المقصود التشبيه ما بين خشم البنية والفلة بتاعت قزازة الببسي وأنا بحب الببسي وبكره الكولا.

عبد الواحد محمد
05-22-2012, 10:15 AM
من قاموس الغرب :
الدندور
الدقج
الكور
ام جكاكي ( بتعطيش الجيم نتعطيشا سودانيا ))
المغلاتي
دام سورو
اب دنقا( بكسر الباء وتسكين النون)
ابوندقيل
اب رورو ..
بجا بجا ..

الباشا
05-22-2012, 10:44 AM
الدندور
الدقج
الكور
ام جكاكي ( بتعطيش الجيم نتعطيشا سودانيا ))
المغلاتي
دام سورو
اب دنقا( بكسر الباء وتسكين النون)
ابوندقيل
اب رورو ..
بجا بجا ..

ده الكلام .....

تسلم يا عبدالواحد

من ناحيتى وحاتك ما عرفت غير كلمه وااااااحده ويمكن تطلع غلط كمان

الكور

وهى زريبه صغيره لحبس البهم .... يعنى صغار الغنم أو النعاج


أما كلمة أبو ندقيل

عندنا كلمة قريبه منها وهى كلمة الدانقيل ... وهو الطوب الأحمر

ويديك الف عافيه يا جنابو

بس كمان راجين منك الكتيييييييييير

الباشا
05-22-2012, 04:29 PM
طيب يا المبارك .... وكت أبيت تجى تفسر
مافى مشكله نيابة عنك أقوم بالمهمة اللذيذة دى

الكِشْكة
كما شرحت قبل كده الكشك هو العبسه يعنى تراكم الوسخ على جلد الشفع من كتر اللعب فى التراب .... و المعنى التانى للكشك هو باقى العجين أو اللماصه نديها البهايم وكمان الكشك عند أهل المريسه يعنى برضوا باقى العيش بعد الخمارة ....

الكُشنة

الكشنه هى قلى البصل فوق الزيت وناتج العمليه على شوية بهارات وشطيطه وملحه يطلع هو الكشنه وطبعاً الخلطة دى تستخدم فى الغالب مع ملاح التقليه وأى ملاح آخر .... طبعاً ريحة البصل المقلى خاصة فى التقليه تقعد ولا عطور ايف سانت لوران .... 24 ساعه كااااامله

الكار
الكار هى لعبة كنا نلعبها زمان .. مجموعة من عضم اللالوب بعد مصه أو البعر القوى أو البلى أو أى شى مدور وقوى ممكن مسكه ... وطريقة لعب الكار هى وضع هذه المواد على الأرض وإختيار واحده منهم تكون الضراب .... يرمى اللاعب الضراب الى أعلى وبسرعه وقبل إلتقاطه يتناول كميه ويلحق الضراب قبل ما يقع الارض ويستلمه من الهواء بشرط ان لا تقع أى فرده من المواد الملعوب بها ... توضع الحصيله على جنب ويستمر اللعب حتى تقل الكميه ومن ثم تحيد فِردْ بعينها ويجبر اللاعب على التقاطها بشرط ان لايلمس أى فرده لم يتم اختيارها ... وهكذا

الكركار
هو خلط الزيت مع الودك بطريقه معينه ليكون أحلى كريم لاستخدامات النساء وغالباً المتزوجات .... ويستعمل لتطويل الشعر وكدا واللا مش كدا يا ناس كريم ديانا والبريل كريم وشامبو كلين

المَلٌود
الملود إذا كانت بيد طويله فهى آداء لقص العشب الطفيلى فى الحواشات .... وإذا كانت بيد قصيره فهى لحش العشب فى الجروف أو لعواسة الكسره

الحكًاكة
الملود لما تتملى طين بنجيب آله حاده من الحديد ونحك بيها الطين من الملود ودى هى الحكاكه

التًقدة
كما شرحها المبارك سابقاً فى آله حاده من الحديد وبحجم اليد أو فرامة الخضره أحياناً ودى لقطع سنابل العيش ... طبعاً ما عرفتها لاننا لانطلق عليها التقده ولكن فى منطقتنا نسميها القطاعه وبس

القًدُوم
غير خشم البنى آدم ويسمى قدوم خاصة لما يكون مطرم زعلان يعنى يقول لك شوف مادى قدومه كيف ؟ أما المعنى الآخر فهو آله حاده تستخدم فى نجر كرعين العناقريب وتنضيف الفروع الصغيره من اى عود يود البنى آدم استخدامه ... عصا مثلاً مرق راكوبه أى حاجه عاوزه بربحه ...

الحِبِن
هو الورم فى اجزاء معينه من الجسم وبيكون نتيجه لجرح كبير فى مكان ما من الجسم وتأثيره يعمل حبن فى الابط أو بين الأرجل .....

أب نِيني
سبق شرحة شرح وافى فى احد مشاركاتى وهو مرض يصيب البهائم وخاصة الغنم



شكراً يا المبارك

منتظرين منك عشره بشرح أو بدون شرح كله حلو من يدك

المبارك ابراهيم
05-22-2012, 07:45 PM
طيب يا المبارك .... وكت أبيت تجى تفسر

مافى مشكله نيابة عنك أقوم بالمهمة اللذيذة دى

الكِشْكة
كما شرحت قبل كده الكشك هو العبسه يعنى تراكم الوسخ على جلد الشفع من كتر اللعب فى التراب .... و المعنى التانى للكشك هو باقى العجين أو اللماصه نديها البهايم وكمان الكشك عند أهل المريسه يعنى برضوا باقى العيش بعد الخمارة ....

الكُشنة

الكشنه هى قلى البصل فوق الزيت وناتج العمليه على شوية بهارات وشطيطه وملحه يطلع هو الكشنه وطبعاً الخلطة دى تستخدم فى الغالب مع ملاح التقليه وأى ملاح آخر .... طبعاً ريحة البصل المقلى خاصة فى التقليه تقعد ولا عطور ايف سانت لوران .... 24 ساعه كااااامله

الكار
الكار هى لعبة كنا نلعبها زمان .. مجموعة من عضم اللالوب بعد مصه أو البعر القوى أو البلى أو أى شى مدور وقوى ممكن مسكه ... وطريقة لعب الكار هى وضع هذه المواد على الأرض وإختيار واحده منهم تكون الضراب .... يرمى اللاعب الضراب الى أعلى وبسرعه وقبل إلتقاطه يتناول كميه ويلحق الضراب قبل ما يقع الارض ويستلمه من الهواء بشرط ان لا تقع أى فرده من المواد الملعوب بها ... توضع الحصيله على جنب ويستمر اللعب حتى تقل الكميه ومن ثم تحيد فِردْ بعينها ويجبر اللاعب على التقاطها بشرط ان لايلمس أى فرده لم يتم اختيارها ... وهكذا

الكركار
هو خلط الزيت مع الودك بطريقه معينه ليكون أحلى كريم لاستخدامات النساء وغالباً المتزوجات .... ويستعمل لتطويل الشعر وكدا واللا مش كدا يا ناس كريم ديانا والبريل كريم وشامبو كلين

المَلٌود
الملود إذا كانت بيد طويله فهى آداء لقص العشب الطفيلى فى الحواشات .... وإذا كانت بيد قصيره فهى لحش العشب فى الجروف أو لعواسة الكسره

الحكًاكة
الملود لما تتملى طين بنجيب آله حاده من الحديد ونحك بيها الطين من الملود ودى هى الحكاكه

التًقدة
كما شرحها المبارك سابقاً فى آله حاده من الحديد وبحجم اليد أو فرامة الخضره أحياناً ودى لقطع سنابل العيش ... طبعاً ما عرفتها لاننا لانطلق عليها التقده ولكن فى منطقتنا نسميها القطاعه وبس

القًدُوم
غير خشم البنى آدم ويسمى قدوم خاصة لما يكون مطرم زعلان يعنى يقول لك شوف مادى قدومه كيف ؟ أما المعنى الآخر فهو آله حاده تستخدم فى نجر كرعين العناقريب وتنضيف الفروع الصغيره من اى عود يود البنى آدم استخدامه ... عصا مثلاً مرق راكوبه أى حاجه عاوزه بربحه ...

الحِبِن
هو الورم فى اجزاء معينه من الجسم وبيكون نتيجه لجرح كبير فى مكان ما من الجسم وتأثيره يعمل حبن فى الابط أو بين الأرجل .....

أب نِيني
سبق شرحة شرح وافى فى احد مشاركاتى وهو مرض يصيب البهائم وخاصة الغنم



شكراً يا المبارك


منتظرين منك عشره بشرح أو بدون شرح كله حلو من يدك


والله ما قصرت تب آبوضراع ربنا يحفظك لينا
وأوعدك بإذن الله بعشرة أخري ومن هسه الشرح عليك أنا اليومين دي مشغول!!!
صيف ومكيفات وصيانة ومشاكل دعواتك.

الباشا
05-23-2012, 08:43 AM
وأوعدك بإذن الله بعشرة أخري
دعواتك.

ندعو لك من القلب

بالتوفيق والصلاح والنجاح

وفى إنتظار العشره

ويديك الف عافيه يا المبارك ....يا ود إبراهيم

الباشا
05-23-2012, 08:55 AM
اللوكْدُمّه

البَرْوَه

العَنْبَجَه

الطروره

الدَانه

الترتاره

الدوّايه

الخَتْرَه

الصعيد

السافل

الضَهَرَه

المسور


يلا يا شباب .... ما أجمل لهجتنا العامية السودانيه !

وما أثراها ومأ أغناها بالعديد من الكلمات وبكل اللهجات

قوس قزح
05-23-2012, 11:25 AM
دي من الكلمات الداتري التي عفا عليها الزمن .. وينك يا سحر القلوب .. تعالي شوفي العجب وانتي المعلاق ما عارفاه .. غايتو باغلت عديل في اللوكدمة دي حتى كتابتا مشكلة


اللوكْدُمّه : ومن مشتقاتا ( اللكدة ) وهي عبارة عن جسم هندسي اقرب للدائرة ، في الجسم ممكن تكون زي الورمة الكبيرة .. اللكدمة دائما صلبة .. لقدمة طين مثلا .. لكدة جير .. يعني شوية طين يابس متماسك مع بعضو البعض لو فلقوك بيهو بيشق راسك

البَرْوَه : هي باقي الصابونة بعد ما تنسهك وتكون خلاص على نهاية

العَنْبَجَه : يقولك مليت الحوض لامن عنبج .. اي طفح .. يعني تملا الحاجة لامن تطفح

الطروره : لها عدة معاني منها هي البت البومة .. والمعنى التاني مجموعة من القرع تلاتة اربعة قرعات مثبتة مع بعض بواسطة الجريد والحبل وتستعمل في السباحة ، خاصة للناس الماب يعرفو العوم .. وزمان ونحن صغار علمونا بيها العوم .. تنبطح فوقو ويالله تبدا ( تطلبش ) لامن تتعلم ..

الدَانه : في الاصل هي الكورية .. وحديثا هي الطلقة القنبلة

الترتاره : دي ياما لعبنا بيها .. حديدة في شكل دائرة غالبا ما تكون قعر برميل او جردل او صحن .. تصنع معاها السواقة من علب الصلصلة .. ونعمل فيها الولاد سواقين وترتارتي غلبت ترتارتك ومرات نزين السواقة بي فروع النيم او سعف الجريد ، وكل ما كانت الترتارة كبيرة كلما انت بقيت سيد الموقف

الدوّايه : طريت لوحي وطريت قلم الدواية .. الدواية دايما مرتبطة بالخلوة واللوح والقرآن .. وهي حبر ناس زمان .. تصنع المادة السوداء من السكن يشيلوهو من تحت الصاج ، شعر المعزي ، الصمغ ، الموية .. تترك لبعض الوقت حتى تتفاعل مع بعضها البعض حتى تصير حبرا .. والدواية في حد ذاتا اما فتيل .. او برطمانيات الدهان الزمان

الخَتْرَه : يقولك والله بانتلي خترة .. اي سفرة صغيرة كدي

الصعيد : زمان نحن كنا بنقول للخرطوم الصعيد .. الصعيد في العموم هو الارض المرتفعة وعندنا في السودان معناه الخلا

السافل : السافل عكس الصعيد يعني حاجة منخفضة وغالبا دي الوديان والخيران

الضَهَرَه : دي ما عرفتها

المسور : عارف معناها لكن ما قادر اوصلو .. المسور متعلق بالزراعة .. يقولك فلان سايق المسور .. يتخيلي هو دورة زراعية مرتبطة بارتفاع وانخاض النيل

عبد الواحد محمد
05-23-2012, 11:48 AM
من قاموس الغرب :
الدندور = قلب شجرة الدليب يشبه عرجون النخل ( ولا الدليب ذاتو في ناس ما عارفينو )؟؟
الدقج= ( هو الهالوق) وهو جزر شجرة الدليب في بداية نموه يحفر ويستخرج ثم يسلق ويؤكل ويتكون من فصين دائما يكونان غير متساويين فعندما تقسمها لا بد ان يكون احدهما اكبر من الآخر وفي الحكايات البلدية :اراد احدهم ان يتزوج بامراة ثانية فقالت له :انا ما عايزة قسمة الدقجاية او الهالوقاية دي وتعني عدم المساواة والعدل بين الزوجتين ..
الكور: هو ثمرة الدليب وهي ثمرة كبيرة مثل ثمرة جوز الهند الا ان لونها اصفر وهنالك منطقة قرب ابو جبيهة تسمى ملم الكور لكثرة اشجار الدليب بها ..
ام جكاكي ( بتعطيش الجيم تعطيشا سودانيا )) = بلغة البقارة هو الترزي وتعتبر من المهن المستهجنة لديهم ولا ادري ما السبب وفي القصص و الروايات :-ارد احدهم ان يحتج لرفضهم تزويجه بنت عمه فقال : والله لو ما عرستو لي بت عمي دي امشي اشتغل ام جكاكي واجيب ليكو ( ليكم ) فضيحة وسط القبايل
المغلاتي = اي (المغلاطي ) وايضا بلغة البقارةهو المحامي لانه يغالط كثيرا بالمحاكم فهم لا يعرفونه الا بهذه الصفة
دام سورو= عند الفور هو نوع من الكسرة الجافة وتسمى ايضا (خميس طويرة )
اب دنقا( بكسر الباء وتسكين النون)= نوع من الحشرات الطائرة لديه مفصل حاد بين رقيته وراسه يستعمله للدفاع والعض ( يقال : اب دنقا بخمشمو مالوا بعضي برقبتو )؟؟ كناية عن الشخص يعكس الامور ويلخبطها مع علمه بالصحيح..
ابوندقيل هو نوع من الضب يعتبرونه ساما ..
اب رورو .. هو طائر يشبه ابو الرهيو ( طائر البقر الابيض ) الا ان له سواد على بطنه واجنحته ..
بجا بجا ا
بجا بجا هو طائر ابو الرهيو الابيض ( طائر البقر )
مع تحياتي اخ الباشا والمبارك والقوس
تحية كردفانية خاصة

الباشا
05-23-2012, 02:56 PM
من قاموس الغرب :
الدندور
قلب شجرة الدليب يشبه عرجون النخل ( ولا الدليب ذاتو في ناس ما عارفينو )؟؟

على قولك الدليب يا عبدالواحد ما سمعنا بيه إلا عند وردى الله يرحمة ( ضل الدليب أريح سكن )

الدقج
( هو الهالوق) وهو جزر شجرة الدليب في بداية نموه يحفر ويستخرج ثم يسلق ويؤكل ويتكون من فصين دائما يكونان غير متساويين فعندما تقسمها لا بد ان يكون احدهما اكبر من الآخر وفي الحكايات البلدية :اراد احدهم ان يتزوج بامراة ثانية فقالت له :انا ما عايزة قسمة الدقجاية او الهالوقاية دي وتعني عدم المساواة والعدل بين الزوجتين ..

سبحان الله ربنا سبحانه وتعالى قال فى سورة النساء (فَإِنْ خِفْتُمْ أَلاَّ تَعْدِلُواْ فَوَاحِدَةً) النساء 3
مع أنه فى الآية 129 يقول (وَلَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ) النساء 129


الكور
هو ثمرة الدليب وهي ثمرة كبيرة مثل ثمرة جوز الهند الا ان لونها اصفر وهنالك منطقة قرب ابو جبيهة تسمى ملم الكور لكثرة اشجار الدليب بها ..

وين لتفسيرى ... بعيد شديد ... الكور فى السعوديه لها معنى عنصرى بغيض ما عارف الناس ديل جابوهو من وين

ام جكاكي ( بتعطيش الجيم تعطيشا سودانيا ))
بلغة البقارة هو الترزي وتعتبر من المهن المستهجنة لديهم ولا ادري ما السبب وفي القصص و الروايات :-ارد احدهم ان يحتج لرفضهم تزويجه بنت عمه فقال : والله لو ما عرستو لي بت عمي دي امشي اشتغل ام جكاكي واجيب ليكو ( ليكم ) فضيحة وسط القبايل

والله يا عبدالواحد بنعرف جناح أم جكو ...... وهى طبعاً جلابيه انصاريه يدها تدخل فيل بحالو ... كان اتذكرتها كان عرفت على الاقل من وين جات تسمية جناح ام جكو دى

المغلاتي
اي (المغلاطي ) وايضا بلغة البقارةهو المحامي لانه يغالط كثيرا بالمحاكم فهم لا يعرفونه الا بهذه الصفة

دى بااااالغتو فيها عدييل ... هو فى زولل غالاط اكتر من المحامين ... العديل يعوجوهو وبالقانون والأعوج يعدلوهو وبرضو بالقانون ..... الله يكفينا شرهم مع الاعتذار يا الافوكاتات العندنا

دام سورو
عند الفور هو نوع من الكسرة الجافة وتسمى ايضا (خميس طويرة )

عندنا ليها اسم الكسره الناشفه دى بس طاير لى ..... المبارك ؟ وينك

اب دنقا( بكسر الباء وتسكين النون)
نوع من الحشرات الطائرة لديه مفصل حاد بين رقيته وراسه يستعمله للدفاع والعض ( يقال : اب دنقا بخمشمو مالوا بعضي برقبتو )؟؟ كناية عن الشخص يعكس الامور ويلخبطها مع علمه بالصحيح..

دى نحن نقول عليها الكدندارة على ما أعتقد ... بس مش متأكد

ابوندقيل
هو نوع من الضب يعتبرونه ساما ..

هو بالله فى ضب سام .... شكل الضب غير ما يكون سام يخوف ... بس الضب فى السعودية أو الورل سعره ممكن يصل بين 2 -3 مليون جنية .... أى والله 600- 700 ريال سعودى .... ودا يعتبر من الوجبات المفضله خاصه للبدو

اب رورو
هو طائر يشبه ابو الرهيو ( طائر البقر الابيض ) الا ان له سواد على بطنه واجنحته ..

ده نحن بنقول عليه السمبر .... زماااان زمن الدنيا بخير كان يجى فى الخريف مع زيادة البحر .... دلوقت خلاص اتمحت البركة لا فى سمبر ولا غيرو بيجى السودان .... هو الناس ذاتها لاقيه تاكل ؟؟؟؟؟؟؟؟


بجا بجا
طائر ابو الرهيو الابيض ( طائر البقر )

ده بنقول عليه طير الرهو .... وهو ذى السمبر بيجى كمان من بلاد بعيده .... وكنا نخاطبه نقول ليه يا طير الرهو عيش ابوى ما لبن ؟؟؟

الباشا
05-23-2012, 03:02 PM
دي من الكلمات الداتري التي عفا عليها الزمن .. وينك يا سحر القلوب .. تعالي شوفي العجب وانتي المعلاق ما عارفاه .. غايتو باغلت عديل في اللوكدمة دي حتى كتابتا مشكلة


اللوكْدُمّه : ومن مشتقاتا ( اللكدة ) وهي عبارة عن جسم هندسي اقرب للدائرة ، في الجسم ممكن تكون زي الورمة الكبيرة .. اللكدمة دائما صلبة .. لقدمة طين مثلا .. لكدة جير .. يعني شوية طين يابس متماسك مع بعضو البعض لو فلقوك بيهو بيشق راسك

البَرْوَه : هي باقي الصابونة بعد ما تنسهك وتكون خلاص على نهاية

العَنْبَجَه : يقولك مليت الحوض لامن عنبج .. اي طفح .. يعني تملا الحاجة لامن تطفح

الطروره : لها عدة معاني منها هي البت البومة .. والمعنى التاني مجموعة من القرع تلاتة اربعة قرعات مثبتة مع بعض بواسطة الجريد والحبل وتستعمل في السباحة ، خاصة للناس الماب يعرفو العوم .. وزمان ونحن صغار علمونا بيها العوم .. تنبطح فوقو ويالله تبدا ( تطلبش ) لامن تتعلم ..

الدَانه : في الاصل هي الكورية .. وحديثا هي الطلقة القنبلة

الترتاره : دي ياما لعبنا بيها .. حديدة في شكل دائرة غالبا ما تكون قعر برميل او جردل او صحن .. تصنع معاها السواقة من علب الصلصلة .. ونعمل فيها الولاد سواقين وترتارتي غلبت ترتارتك ومرات نزين السواقة بي فروع النيم او سعف الجريد ، وكل ما كانت الترتارة كبيرة كلما انت بقيت سيد الموقف

الدوّايه : طريت لوحي وطريت قلم الدواية .. الدواية دايما مرتبطة بالخلوة واللوح والقرآن .. وهي حبر ناس زمان .. تصنع المادة السوداء من السكن يشيلوهو من تحت الصاج ، شعر المعزي ، الصمغ ، الموية .. تترك لبعض الوقت حتى تتفاعل مع بعضها البعض حتى تصير حبرا .. والدواية في حد ذاتا اما فتيل .. او برطمانيات الدهان الزمان

الخَتْرَه : يقولك والله بانتلي خترة .. اي سفرة صغيرة كدي

الصعيد : زمان نحن كنا بنقول للخرطوم الصعيد .. الصعيد في العموم هو الارض المرتفعة وعندنا في السودان معناه الخلا

السافل : السافل عكس الصعيد يعني حاجة منخفضة وغالبا دي الوديان والخيران

الضَهَرَه : دي ما عرفتها

المسور : عارف معناها لكن ما قادر اوصلو .. المسور متعلق بالزراعة .. يقولك فلان سايق المسور .. يتخيلي هو دورة زراعية مرتبطة بارتفاع وانخاض النيل



ما شاء الله ولا أروع يا كبير السناجك

ليك على نديك جنسية أهل العوض ومعاها بقرتين وغنمايتن و نعجه وااااحده

برجع ليك تانى .... فى كلمات قليله دايره تعقيب بسيط

يديكم يا القوس ويا عبدالواحد ويا المبارك الف عافيه

الباشا
05-23-2012, 05:36 PM
اللوكْدُمّه :
من مشتقاتا ( اللكدة ) وهي عبارة عن جسم هندسي اقرب للدائرة ، في الجسم ممكن تكون زي الورمة الكبيرة .. اللكدمة دائما صلبة .. لقدمة طين مثلا .. لكدة جير .. يعني شوية طين يابس متماسك مع بعضو البعض لو فلقوك بيهو بيشق راسك

يعنى حاجه مدردمه ..... مكوره ..... خاصة فى الاكل لما الشافع يحشى خشمو وجضيماتو يتنفخوا بالأكل ... يقولوا ليه ماتسوى لوكدومه فى خشمك آآجنا

البَرْوَه :
هي باقي الصابونة بعد ما تنسهك وتكون خلاص على نهاية

ميه ميه ....... ولا فراخ الجمعيه

العَنْبَجَه :
يقولك مليت الحوض لامن عنبج .. اي طفح .. يعني تملا الحاجة لامن تطفح

قررررربت ..... بس دى يا سيدى عباره عن عيدان من الخيزران وترص لتكون العنبجه ... يعنى ذى برش الصلاه ... طبعاً الخيزران مجوف عشان كدا لو ختيت العنبجه على المويه تطفو .... نستخدمها للعوم لما البحر يكون دميره

الطروره :
لها عدة معاني منها هي البت البومة .. والمعنى التاني مجموعة من القرع تلاتة اربعة قرعات مثبتة مع بعض بواسطة الجريد والحبل وتستعمل في السباحة ، خاصة للناس الماب يعرفو العوم .. وزمان ونحن صغار علمونا بيها العوم .. تنبطح فوقو ويالله تبدا ( تطلبش ) لامن تتعلم ..

الدَانه :
في الاصل هي الكورية .. وحديثا هي الطلقة القنبلة

فعلاً التفسير العسكرى هى الطلقه مش كدا يا عبدالواحد .... لكن الدانه الانا بقصدها هى القرعه البيشربوا بيها المريسه زمان

الترتاره :
دي ياما لعبنا بيها .. حديدة في شكل دائرة غالبا ما تكون قعر برميل او جردل او صحن .. تصنع معاها السواقة من علب الصلصلة .. ونعمل فيها الولاد سواقين وترتارتي غلبت ترتارتك ومرات نزين السواقة بي فروع النيم او سعف الجريد ، وكل ما كانت الترتارة كبيرة كلما انت بقيت سيد الموقف

عشره على عشره ...... بلا كشره

الدوّايه :
طريت لوحي وطريت قلم الدواية .. الدواية دايما مرتبطة بالخلوة واللوح والقرآن .. وهي حبر ناس زمان .. تصنع المادة السوداء من السكن يشيلوهو من تحت الصاج ، شعر المعزي ، الصمغ ، الموية .. تترك لبعض الوقت حتى تتفاعل مع بعضها البعض حتى تصير حبرا .. والدواية في حد ذاتا اما فتيل .. او برطمانيات الدهان الزمان

يديك العافيه ... هى بذاتها .... عشان كدا العلم بيها ما بروح من المخ مش تقولى بيك وباركر

الخَتْرَه :
يقولك والله بانتلي خترة .. اي سفرة صغيرة كدي

برضه مظبوط .... بس الختره عندنا هى السفر لغرض الرزق يعنى فيها تقصر المده وفيها تطول

الصعيد :
زمان نحن كنا بنقول للخرطوم الصعيد .. الصعيد في العموم هو الارض المرتفعة وعندنا في السودان معناه الخلا

عندنا اتجاه البحر هو الاصل .... فلو كنت داخل الجزيره ومتجه فى سفرك عكس اتجاه البحر تبقى ماشى الصعيد او طالع


السافل :
السافل عكس الصعيد يعني حاجة منخفضة وغالبا دي الوديان والخيران

فعلاً عكس الصعيد .... فلو متجه فى سفرك فى اتجاه البحر تبقى ماشى السافل او نازل


الضَهَرَه :
دي ما عرفتها

أنا أعرفك ليها .... فلو كنت فى البحر واتجهت داخل الجزيره تبقى ماشى الضهره يعنى الخلا

المسور :
عارف معناها لكن ما قادر اوصلو .. المسور متعلق بالزراعة .. يقولك فلان سايق المسور .. يتخيلي هو دورة زراعية مرتبطة بارتفاع وانخاض النيل

فعلاً متعلق بالزراعه ... وهو الحصاد وفى بعض الاحيان يبقى زمن الحصاد



مش بقولك تستاهل تبقى من أهل العوض !!:SnipeR (101):

المبارك ابراهيم
05-23-2012, 07:12 PM
اللوكْدُمّه :

من مشتقاتا ( اللكدة ) وهي عبارة عن جسم هندسي اقرب للدائرة ، في الجسم ممكن تكون زي الورمة الكبيرة .. اللكدمة دائما صلبة .. لقدمة طين مثلا .. لكدة جير .. يعني شوية طين يابس متماسك مع بعضو البعض لو فلقوك بيهو بيشق راسك

يعنى حاجه مدردمه ..... مكوره ..... خاصة فى الاكل لما الشافع يحشى خشمو وجضيماتو يتنفخوا بالأكل ... يقولوا ليه ماتسوى لوكدومه فى خشمك آآجنا

البَرْوَه :
هي باقي الصابونة بعد ما تنسهك وتكون خلاص على نهاية

ميه ميه ....... ولا فراخ الجمعيه

العَنْبَجَه :
يقولك مليت الحوض لامن عنبج .. اي طفح .. يعني تملا الحاجة لامن تطفح

قررررربت ..... بس دى يا سيدى عباره عن عيدان من الخيزران وترص لتكون العنبجه ... يعنى ذى برش الصلاه ... طبعاً الخيزران مجوف عشان كدا لو ختيت العنبجه على المويه تطفو .... نستخدمها للعوم لما البحر يكون دميره

الطروره :
لها عدة معاني منها هي البت البومة .. والمعنى التاني مجموعة من القرع تلاتة اربعة قرعات مثبتة مع بعض بواسطة الجريد والحبل وتستعمل في السباحة ، خاصة للناس الماب يعرفو العوم .. وزمان ونحن صغار علمونا بيها العوم .. تنبطح فوقو ويالله تبدا ( تطلبش ) لامن تتعلم ..

الدَانه :
في الاصل هي الكورية .. وحديثا هي الطلقة القنبلة

فعلاً التفسير العسكرى هى الطلقه مش كدا يا عبدالواحد .... لكن الدانه الانا بقصدها هى القرعه البيشربوا بيها المريسه زمان

الترتاره :
دي ياما لعبنا بيها .. حديدة في شكل دائرة غالبا ما تكون قعر برميل او جردل او صحن .. تصنع معاها السواقة من علب الصلصلة .. ونعمل فيها الولاد سواقين وترتارتي غلبت ترتارتك ومرات نزين السواقة بي فروع النيم او سعف الجريد ، وكل ما كانت الترتارة كبيرة كلما انت بقيت سيد الموقف

عشره على عشره ...... بلا كشره

الدوّايه :
طريت لوحي وطريت قلم الدواية .. الدواية دايما مرتبطة بالخلوة واللوح والقرآن .. وهي حبر ناس زمان .. تصنع المادة السوداء من السكن يشيلوهو من تحت الصاج ، شعر المعزي ، الصمغ ، الموية .. تترك لبعض الوقت حتى تتفاعل مع بعضها البعض حتى تصير حبرا .. والدواية في حد ذاتا اما فتيل .. او برطمانيات الدهان الزمان

يديك العافيه ... هى بذاتها .... عشان كدا العلم بيها ما بروح من المخ مش تقولى بيك وباركر

الخَتْرَه :
يقولك والله بانتلي خترة .. اي سفرة صغيرة كدي

برضه مظبوط .... بس الختره عندنا هى السفر لغرض الرزق يعنى فيها تقصر المده وفيها تطول

الصعيد :
زمان نحن كنا بنقول للخرطوم الصعيد .. الصعيد في العموم هو الارض المرتفعة وعندنا في السودان معناه الخلا

عندنا اتجاه البحر هو الاصل .... فلو كنت داخل الجزيره ومتجه فى سفرك عكس اتجاه البحر تبقى ماشى الصعيد او طالع


السافل :
السافل عكس الصعيد يعني حاجة منخفضة وغالبا دي الوديان والخيران

فعلاً عكس الصعيد .... فلو متجه فى سفرك فى اتجاه البحر تبقى ماشى السافل او نازل


الضَهَرَه :
دي ما عرفتها

أنا أعرفك ليها .... فلو كنت فى البحر واتجهت داخل الجزيره تبقى ماشى الضهره يعنى الخلا

المسور :
عارف معناها لكن ما قادر اوصلو .. المسور متعلق بالزراعة .. يقولك فلان سايق المسور .. يتخيلي هو دورة زراعية مرتبطة بارتفاع وانخاض النيل

فعلاً متعلق بالزراعه ... وهو الحصاد وفى بعض الاحيان يبقى زمن الحصاد



مش بقولك تستاهل تبقى من أهل العوض !!:sniper (101):



إنتو كده عشرة علي عشرة بس الضَهرة ياشباب هي:
البِلدات (الكمندوب) الأرض التي تروي بالمطر وليست بالري الصناعي.

الباشا
05-24-2012, 10:27 AM
إنتو كده عشرة علي عشرة بس الضَهرة ياشباب هي:
البِلدات (الكمندوب) الأرض التي تروي بالمطر وليست بالري الصناعي.


تمام يا المبارك .... يديك الف عافيه

دا التفسير عندكم طبعاً - منطقة شمال الجزيره جهة مدنى والمسلميه

أما عندنا فى جنوب الجزيره منطقة المسيد والسديرات المتاخمة للبحر والخرتوم

نقول الضهره هى الخلا أو لو كنت متجه من البحر ناحية الارض المرويه فى الجزيره

نقول طالع الحواشات أو طالع الضهرة

أما حكاية الكمندوب دى والله أول مره أسمع بيها

الباشا
05-24-2012, 02:00 PM
عشرة أم درمانية ع الطاير
مهداة لصلاح الغول


تكنجه

يتمتخ

ملسلس

النفاج

حُسُوّه

دقلاش

روغ

شايه

كمُوزه

فشّاره

صلاح سيدأحمد الغول
05-24-2012, 02:20 PM
عشرة أم درمانية ع الطاير
مهداة لصلاح الغول


تكنجه

يتمتخ

ملسلس

النفاج

حُسُوّه

دقلاش

روغ

شايه

كمُوزه

فشّاره

النَّفاج بعرفو ..
الطّاقه .. مدخل بينك وبين الجيران
قبل وفاة والدنا يرحمه الله، حلف علينا أن يظل النّفّاجان
بيننا وبين جارينا مفتوحين وإلى الأبد وكذلك فعلَت والدتُنا،
لها وله ولوالديكم الرَّحمه ولا يزال النَّفّاجان كما هما فُرجتين
في قلوبنا وقلوب جيراننا يرى كُلٌّ مِنّا نصاعة بياض الآخر التي
لا تجرأُ ولا تستطيع أنْ تُبدّلها الأيام ولا السّنين
أمّا باقي الكلمات أعتقِد أنّي سمعتَ أغلبها من أفراد فرقَة الأكروبات
السّودانيّة بعد عودتِهم من الصّين

الباشا
05-24-2012, 02:59 PM
النَّفاج بعرفو ..
الطّاقه .. مدخل بينك وبين الجيران
[
أمّا باقي الكلمات أعتقِد أنّي سمعتَ أغلبها من أفراد فرقَة الأكروبات
السّودانيّة بعد عودتِهم من الصّين


أكيد. دى. أم درمان.الجنب شنغهاي.

صلاح سيدأحمد الغول
05-24-2012, 03:14 PM
أكيد. دى. أم درمان.الجنب شنغهاي.
إنتَ قايله يا باشا ما قرَّبَت مِن شنغهاي؟
أكان شمالاً كِده فاتت الوادي .. خليناها واقفه عند الحاره (11)
إمتدت كِده للحارات البعد ال(200) وغرباً أظنّها وصلت العين
الحَمِئه أها دى شنغهاي بعيده مِنَّها؟

قوس قزح
05-24-2012, 07:06 PM
والله يا باشا لكن بالغت عديل !! صلاح الغول شنو البيعرف ليك الرطانة دي .. ده يا خوي ود المصارين البيض .. ده اسألو من الايسكريم .. الباسطة .. الدندرمة .. البيبسي .. البازوكة .. واشياء الحناكيش دي .. فشارة شنو .. وبرامة شنو !! ده نوع الكلمات دي بتضرسو وتعمل ليهو غثيان .. ( يا سكان البرج العادي سلام )

الباشا
05-26-2012, 09:38 AM
النَّفاج بعرفو ..
الطّاقه .. مدخل بينك وبين الجيران
[
أمّا باقي الكلمات أعتقِد أنّي سمعتَ أغلبها من أفراد فرقَة الأكروبات
السّودانيّة بعد عودتِهم من الصّين


( أكيد. دى. أم درمان.الجنب شنغهاي. )

طبعاً واضح الرد كان من موبايل ... جوال .... محمول ... سيل ...... تلفون .... تانى شنو ؟
مليون اسم وكل بلد ليها مسمى ....

المهم يا صلاح الغول

ياخى معقول راجل ام درمانى وعاصمى وحنكوش على قول القوس زتفوت عليك كلمات ذى ملسلس ودقلاش وفشاره

الحروف بترشح نفسها يا صلاح .....

كان كدى النكسف فى عدد الكلمات ..... طيب ناس الشهاده والعمل الطيب نعمل فيهم شنو

يعنى نفتح فصل تعليم اللهجه واللا نجبر الوزارة لادخالها ضمن المناهج السودانية

الجيل ده والاجيال الجايه لازم تعرف تراثنا ده .... ده شى مهم والله


ويديك الف عافيه يا شاعرنا وحبيبنا ود الغول

الباشا
05-26-2012, 10:23 AM
والله يا باشا لكن بالغت عديل !! صلاح الغول شنو البيعرف ليك الرطانة دي .. ده يا خوي ود المصارين البيض
فشارة شنو .. وبرامة شنو !! ده نوع الكلمات دي بتضرسو


طيب يا القوس اخوى

إذا كان ده الشاعر الهمام صلاح الغول ... ود ام درمان ما عرف لينا الكلمات دى ... أها الحل شنو ؟

فشاره دى .... كمان صعبه ؟؟

عندنا عربتين مرسيدس .... واربعة كرولات للعيال ..... وعزبه فى كافورى ..... وواحده فى البلد

واحده ساكنه فى الحاره 11 فى بيت جالوص منَكّْسْ ( اوعى إنت ذات تقول لى منَكّْسْ دى مابعرفها )

بتقول الكلام ده لجاراتها .......

واللا تلقاها لابسه معنكشه دهب .... ولو تفحصتو تلقاهو قشره مشترياهو من السوق الشعبى ....

أها مره ذى دى نقول عليها شنو غير إنها فشّْاره يعنى هجّْاصه .... يعنى ستين كذابه

الباشا
05-26-2012, 01:12 PM
عشرة أم درمانية ع الطاير



تكنجه

يتمتخ

ملسلس

النفاج

حُسُوّه

دقلاش

روغ

شايه

كمُوزه

فشّاره



يلا يا شباب ...

حبيبنا صلاح الغول ما عرف غير النفاج

وكمان عرفتو المره الفشاره ......

عاوزين نفتح ليكم نفاجات لدخول عالم التراث السودانى

المبارك ابراهيم
05-26-2012, 02:27 PM
عشرة أم درمانية ع الطاير




تكنجه
الله أعلم

يتمتخ
يمشي بترهل ينكاش

ملسلس
الله أعلم

النفاج
مخرج لجحر الفأر غير الجحر الرئيسي

حُسُوّه
نوع من أنواع المريسة أخف تأثيرا

دقلاش
أنا الدقلاش أنا أب عينا تقول منقاش

روغ
الله أعلم

شايه
برمندي / مرمندي / دقل تربط فية المواشي

كمُوزه
الله أعلم

فشّاره
إمكن تكون قشارة كرجاكة



يلا يا شباب ...

حبيبنا صلاح الغول ما عرف غير النفاج

وكمان عرفتو المره الفشاره ......

عاوزين نفتح ليكم نفاجات لدخول عالم التراث السودانى


ده القدرنا عليه الباقي تموا خيال.

الباشا
05-26-2012, 02:41 PM
ده القدرنا عليه الباقي تموا خيال.

]المبارك ... مالك مستعجل كدى ؟؟


إنت كدا قدرت على واحده بس وهى :

فشّاره
إمكن تكون قشارة كرجاكة

وده اسم مرادف وليس تفسير

ودى ذااااتها فيها إنَّ ويمكن إنَّتين

كدى حاول مره تانيه عشان المره دى فيها :present:

الباشا
05-27-2012, 08:43 AM
( يا سكان البرج العادي سلام )


وسلام مربع ..... كمان

الباشا
05-28-2012, 09:44 AM
تكنجه

التكنجه عند الامدرمانيين تعنى الدلع على الآخر ... الشخص المتأنق جداً .... البنت المتمكيجه على الآخر .... السيده المرتاحه التى حولها الخدم والحشم والتى تأمر وتنهى .... برضو متكنجه ..... الشايفه نفسها والشايف نفسه ... وطالع فيها متكنج ... وهلم جرا

يتمتخ

الإرتياح على الآخر .... الروقان ... وارث ياكل ويشرب وينوم ... متخه يعنى ..... كمان البنت الكسلانه الما بتدخل المطبخ وعاوزه تنوم وبس يقال عليها متخه برضو ... الشاب اليصحية ابوه او امه يقوم شويه ويرجع ينوم ..... متخه

مِلَسْلِسْ

لزج .... ملزق ..... السوائل التى تعلق باليد وملساء ولزجه .... الجلسرين ملسلس ..... الفازلين ملسلس ..... الزيوت عامة ملسلسه ..... دهن المسك ملسلس .....

النفاج

كما قال اخونا صلاح الغول ... النفاج هو باب بين الجيران ... باب مفتوح وبدون قفل فى كثير من الاحيان ... يدل على النفس الطيبه والاريحية والثقة العالية والمحبه التى لايوجد مثيل لها فى الدنيا بين الجيران إلا فى بلدنا الحبيبه السودان .... حتى ولو كانوا غريبين من بعض لم يجمعهم شى فى الدنيا غير هذا التجاور .... حتى ولومن ديانه مختلفه والعاوز اثبات يزور المسالمه .... النفاج يعنى العشره يعنى ان هاتين الاسرتين اصبحوا كالاهل حتى ولو لم تربطهم صلة الدم .... النفاج يعنى الانفتاح على الآخر بكل الثقة والمحبة والمسئوليه ...

حُسُوّه

الحسوه يعنى العكارة ... وهى كسرة الذرة بعد عجنها بالماء و تبقى رقيقه ويمكن اضافة سكر ليها وهى غذاء ممتاز للامهات المرضعات ... ده كان زمان طبعاً ..... والحسوه فى الجزيره كما قال المبارك هى برضو اسم للمريسه وهو النوع الخفيف من المريسه الذى يشبع ولا يسكر ....

دقلاش

الدقلاش هو الطفل المدلل .... الطفل المكلبظ يعنى سمين ومدرفن ... وطبعوا حلو .. لايبكى كثيراً و الناس كلها تحبه وتدلعوا ...

روغ

الروغ هو الشخص المراوغ ... الكذاب ... المنافق الذى لايؤمن جانبه

شايه

الشايه هى الحلقة فى البربندى أو المربندى أو الوتد الحديدى الذى يغرس فى الارض لتثبيت الدواب من الحركة ... الشايه هى الحلقة التى يربط فيها الحبل وهى حلقة من الحديد الصلب تدخل فى فتحة البربندى العليا ....

كمُوزه

الكموزه هى التمبشه ... الكريشه يعنى ... وهى كرش من نوع معين ... كرش ملمومه ... يعنى مش مترهله ... تليليجه يعنى ....

فشّاره

المره الفشاره أو الراجل الفشار ... هم الذين يدعون ملكية ما ليس عندهم .... أو يبالغوا فى عرض أشيائهم .... أو الذين يقولون الكلام الكبار ولا ينفذون أو يفعلون به ... يعنى الشخص الهجاص ... ابو كلام كتيييير ورغى كله بلا طعم وبلا فائده وبلا ثمره .....

الباشا
05-28-2012, 10:24 AM
كمان عشرة جديده لنج



ناجوضه

كَلَسْ

دُرُمْبال

حَسّْابْ

الجضْماره

القرقور

الغنغورة

الشَبَشَه

اَلْضّْراب

المِيسْ

الباشا
05-28-2012, 11:48 AM
وكمان عشرة خاصة جداً جداً

ترحيباً بأخونا وحبيبنا

" أبو ساره السبيعى "

كونه أبو ساره دى عندى تسوى كتير

وكونه سبيعى تعنى لى أكثر

السبيعيه قبيله مشهوره جداً فى جميع أنحاء المملكه

ولهم جذور فى كل دول المنطقه

أفضل يجى أبو ساره يحكى ليكم عن هذه القبيله


وكهديه من بوستنا الجميل ... اللهجه العامية السودانية

وهى للمعلوميه تكاد تشبه اللغة العربية الفصحى

والدليل أنه قاموس مكه أو لهجة الحجاز فيها الكثير من اللهجه السودانيه


ودى الكلمات :

كوركورة

طل + وايق

ابرشمك

هات يدك

تعال اطفح + طافوحلي+ اتسمم

برسيل

جافيه

مخمج

مدخدخ+ مضخضخ

عساك اللسنة

اللون القاحوطي

عبد الواحد محمد
05-28-2012, 11:58 AM
كمان عشرة جديده لنج



ناجوضه

كَلَسْ

دُرُمْبال

حَسّْابْ

الجضْماره

القرقور= هو بيت القوقعة الرخوة يوضب ليلعب به السورو واحيانا يصنع من الحديد في المدن ..

الغنغورة

الشَبَشَه= العنكبوت الكبيرة

اَلْضّْراب = (الطقاش ) وهو الذي يلعب به الشخص ليكسب البلي ( حكم تشق اللين ) وتكس يرجع ..

المِيسْ ( يعتبر مثل المنزل في الالعاب فهو عبارة عن دائرة كبيرة تنتهي عندها العاب المطاردة عادة فمن يرجع الى الميس سالما فهو الذي يكسب)
اما الباقيات غلبني عدييييييل كدا ..

الباشا
05-28-2012, 12:28 PM
القرقور= هو بيت القوقعة الرخوة يوضب ليلعب به السورو واحيانا يصنع من الحديد في المدن ..
الشَبَشَه= العنكبوت الكبيرة
اَلْضّْراب = (الطقاش ) وهو الذي يلعب به الشخص ليكسب البلي ( حكم تشق اللين ) وتكس يرجع ..
المِيسْ ( يعتبر مثل المنزل في الالعاب فهو عبارة عن دائرة كبيرة تنتهي عندها العاب المطاردة عادة فمن يرجع الى الميس سالما فهو الذي يكسب)
اما الباقيات غلبني عدييييييل كدا ..

مظبوط يا عبدالواحد ....شرح تمام

أضيف .... القرقور القوقعه التى توجد فى ترع الرى فى الجزيره ... وهى بيت للسمك الصغير .. الصير يعنى ... وكمان مرتع وملاذ للبلهاريسيا

4 من 10 يا جنابو


رايك شنو فى قاموس اهل مكه ده ؟

الباشا
05-29-2012, 09:49 AM
وينكم ؟؟؟
عبدالواحد عرف 4 ...


ناجوضه

كَلَسْ

دُرُمْبال

حَسّْابْ

الجضْماره

القرقور

الغنغورة

الشَبَشَه

اَلْضّْراب

المِيسْ

الباشا
05-29-2012, 01:23 PM
وقاموس مكة المكرمة ساهل ياجماعة وينكم ؟؟


كوركورة

طل + وايق

ابرشمك

هات يدك

تعال اطفح + طافوحلي+ اتسمم

برسيل

جافيه

مخمج

مدخدخ+ مضخضخ

عساك اللسنة

اللون القاحوطي

زكريا درار بدوى
05-29-2012, 10:17 PM
الباشا الله يديك العافيه لقد افدتنا كثيرا بهذه المفردات التى كادت ان تندثر ،،، لكن عندى سؤال ماظنى واحد يعرفوا غيرك انت وعبد الواحد محمد ،، فانت بسعة مداركك فى لهجتنا الجميله ،، وعبد الواحد بصفته العسكريه والثقافيه الملتى سيستم ، المجال مفتوح للجميع طبعا ، احيانا فى قتلى الحروب ،، او فى موتى البحار ،،، يكون الميت لايسعه اللحد فيحفر له حفرة فقط !!! ما اسم هذه الحفرة فى لهجتنا السودانيه .........

الباشا
05-30-2012, 08:44 AM
احيانا فى قتلى الحروب ،، او فى موتى البحار ،،، يكون الميت لايسعه اللحد فيحفر له حفرة فقط !!! ما اسم هذه الحفرة فى لهجتنا السودانيه .........

ود درار

أولاً مرحب بيك فى هذه الساحه الرحبه ويديك الف عافيه

سألتنى سؤال حيرنى كثيراً ....

دفن قتلى الحروب حأخليه لجنابو عبدالواحد ... هو أدرى

أما دفن الزول البيغرق فى البحر ....

ومع إنى من مواليد ضفاف النيل الازرق ... بس ماحصل غرق لينا زول ودفناهو فى حفره

إما نلحق ننشلوا من شواطى قريتنا وحصل قليل .... فبنقوم ندفنوا عادى

أو يشيلوا البحر ( وهذا هو التعبير المستخدم ) يعنى يمشى مع التيار ونفشل فى العثور عليه

وإذا حصل وانتشلنا جثة غريق من البحر ندفنوا برضو عادى ......

على ما أظن بنسمي القبر ( الشاهد ) أو ( البيان ) ومش متأكد خالص

بس والله سؤالك يستحق البحث ... وسأجد لك إجابه إن شاء الله

وأشكرك مرة تانيه على المداخله ... بس توعدنى ما تنقطع وهات اسئلتك كلها ...

الباشا
05-30-2012, 09:40 AM
[size="6"]

ناجوضه

الناجوضه مشتقه من النجضى وهى الاستواء .... بس هنا استخدامها ايحائى ... الناجوضه نقولها للزول ( مره أو راجل ) الكلامو كتيييير وحار فى نفس الوقت وخاصة النوع داك من الحريم الرداحه النقّاقه ...

كَلَسْ

الرجل الشهم .... الضكر ... أخو الأخوان ... الكريم نسميه الكلس

دُرُمْبال

الكلمه مشتقه من دربل والدربله هى المشى غير المتزن ... الشخص الذى يتطوح فى مشيه بس ما يكون سكران ... النوع ده نسميه الدرمبال


حَسّْابْ

هو ذلك الرجل الذى يحفظ الانساب ... ودائماً يكون مرجع للناس ... ودائماً يستشار فى قضايا الانساب ويطلب بكثره للشهاده فى المحاكم لحب الناس له وثقتهم فيه و تصديقهم لما يقول بشرط أن لا يخطىء فى نسب أو يخلط الانساب وممكن تكون مره برضو وتسمى الحسّْابه ...

الجضْماره

هى اسم الحمى .... السخونه .... الورده الحاره البتجى بهضربتها حمانا الله وإياكم


القرقور

عندنا فى الجزيره القرقور هى القوقعه التى توجد فى ترع الرى فى الجزيره ... وهى بيت للسمك الصغير .. الصير يعنى ... وكمان مرتع وملاذ للبلهاريسيا

الغنغورة

زماااااان تطلق على القرعه التى تستخدم فى لَمْ الوسخ .... أو نقف موية المطر وغالباً تكون مكسره وحالتها حاله ... برضو بعد اختفاء القرع بقت تطلق على أى إناء للم الوساخه خاصة نقف البياره ....

الشَبَشَه

كما قال عبدالواحد هى العنكبوت الكبير

اَلْضّْراب

كما ذكر جنابو هو (الطقاش ) وهو الذي يلعب به الشخص ليكسب البلي ( حكم تشق اللين ) وتكس يرجع ..

المِيسْ

وهو يعتبر مثل المنزل في الالعاب فهو عبارة عن دائرة كبيرة تنتهي عندها العاب المطاردة عادة أو المثلث الذى يوضع فيه البلى عند اللعب

الباشا
05-30-2012, 09:48 AM
بإذنه تعالى .... سأغيب لمدة أسبوع تقريباً

أدعوا لى بالتوفيـــق والنجـــــــاح


ما أوصيكم .... بمتابعة هذا البوست


وحق الرد مكفول للكل ....طبعاً

المبارك ابراهيم
06-04-2012, 09:14 AM
بإذنه تعالى .... سأغيب لمدة أسبوع تقريباً

أدعوا لى بالتوفيـــق والنجـــــــاح


ما أوصيكم .... بمتابعة هذا البوست



وحق الرد مكفول للكل ....طبعاً


تمشي وتجي بالسلامة يا حمادة مع السلامة.
أوعي تكون الحسابات لحست مخك ورجعوك تقرأ تاني؟؟؟
كل تمنياتنا بالعودة بالسلامة وأبشر بالخير البوست ده لازم كل يوم يكون فووووووووووووووق بإذن الله.

زكريا درار بدوى
06-04-2012, 02:45 PM
بإذنه تعالى .... سأغيب لمدة أسبوع تقريباً

أدعوا لى بالتوفيـــق والنجـــــــاح


ما أوصيكم .... بمتابعة هذا البوست


وحق الرد مكفول للكل ....طبعاً


الباشا تمشى وتجى بالسلامه انشاء الله ،،، نحنا منتظرنك ياغالى ،،،

لامن الباشا يجى ،،،،، ورونى معانى الكلمات دى ....

الدندهيب
الكدّيق
الجمبقلى
الحشك
النـِـكـِت
تور الواطه
المحفضه
الشرو
الوكاى
الدقنى

قوس قزح
06-04-2012, 06:19 PM
الاخ زكريا .. سلامات ومنور البوست ،

انت ذكرت استاذنا الباشا وحبيبنا عبد الواحد .. وافو عليك نسيت عمك القوس ، وصدقني لاشيخ الباشا ولا حاج عبد الواحد حيعرفو رطانة الشايقيي دي دي ماب يقدرلها غير عمك القوس .. والنقول بسم الله :

الدندهيب: وفي رواية أخرى هو ( الدقل ) ودي بالمناسبة لغة نوبية اختلطت بالشايقية .. والدقل هو الكالون لباب الحوش المصنوع من الخشب ، ومفتاح هذا الكالون اسمو ( الكشر ) يقوليك اقفل الباب وخت الكشر فوق الدقل او الدندهيب
الكدّيق : هو عملية قطع العيش ( والكادق ) اناء من الفخار او قرعة لتخمير اللبن
الجمبقلى : ونحن في منطقتنا بنقول ( البنجقلي ) بشقلبة الحروف .. وهو الشاي المسيخ المافيهو سكر ويشربوهو غالبا بالتمر
الحشك : دي مرت قبل كده .. وهي الحاجة الدراشة الما مسحونة كويس
النـِـكـِت : هو راس طرقة الاشميق ودايما بتكون قوية ولا تصلح للفتل
تور الواطه : كنا بنقول ليهو ( ابليس ) وهو عبارة عن حشرة صغيرة شكلها زي ابو القدح ، يدفن نفسو في الواطة بطريقة ذكية والحفرة بتاعتو تكون عبارة عن مصيدة للحشرات ، عشان تصطادو تبل ليك خيت وتنزلو في الحفرة ، يجيك البوم متعلق فيهو
المحفضه : ذكرتني حبوبتي .. وهي عبارة عن جزلان الحبوبات مصنوعة من الجلد وفيها سير طويل ايضا مصنوع من الجلد وتكون معلقة في الرقبة لاحدي قريب الكرعين
الشرو : مرتبط بالدقل وهي الفتحة البيدخل فيها المزلاج الخارج من الدقل
الوكاى : على ما اعتقد هي فتحة القربة او السعن البتطلع منها الموية او اللبن يعني زي الماسورة
الدقنى : اكل يا ولد تاكل الدغني .. الدقني هب الواطة


اها آ زكريا لقيتني كيفن ؟؟
سلام يا جميل

المبارك ابراهيم
06-04-2012, 06:24 PM
الباشا تمشى وتجى بالسلامه انشاء الله ،،، نحنا منتظرنك ياغالى ،،،

لامن الباشا يجى ،،،،، ورونى معانى الكلمات دى ....

الدندهيب
الكدّيق
الجمبقلى
الحشك
النـِـكـِت
تور الواطه
المحفضه
الشرو
الوكاى
الدقنى



مساك الله بالخير يا زكريا أنا عرفت الأتنين المكتوبات بالأحمر وبس يعني إتنين من عشرة ساااااااقط!!!
المحفضة بتاعت الحبوبات بختن فيها القروش يلبسوها في الرقبة مصنوعة من الجلد وليها (دير طويل)
الوكاي حبل يربط به الشوال أو المخلاية من الدُبارة أو القطن . والباقي الله أعلم أها قصرت معاك قالوا الكحة ولا صمت الخشم.

زكريا درار بدوى
06-04-2012, 07:55 PM
مساك الله بالخير يا زكريا أنا عرفت الأتنين المكتوبات بالأحمر وبس يعني إتنين من عشرة ساااااااقط!!!
المحفضة بتاعت الحبوبات بختن فيها القروش يلبسوها في الرقبة مصنوعة من الجلد وليها (دير طويل)
الوكاي حبل يربط به الشوال أو المخلاية من الدُبارة أو القطن . والباقي الله أعلم أها قصرت معاك قالوا الكحة ولا صمت الخشم.

ما الخلق الالم من جمرة خلى العين بلا وكاى
والزول الزمان ياحليلو ما اندروش صبح غناى
والعايش معاك ده يمة ساكت لا قلب لا راى
الكلمات للحاج محمد سرالختم .

تسلم الحبيب المبارك ابراهيم ،، تب ماقصرت !! لكن لسه فيك الخير !!! زود شوبه عشان الباشا ما يجى يضحك علينا ،، يقول الناس ديل خلوا المنتدى بلا وكاى !!!هههههههههههههه
الوكاى ايضا هو الحبل البربطوا بو القربه !! كان اجبتا واحده تانيه بتمشى سنه ثالثه ،، وتاخد الباقيات ملحق .....

الباشا
06-13-2012, 10:55 AM
أبشر بالخير
البوست ده
لازم كل يوم يكون فووووووووووووووق



ده كلام يا المبارك ؟!
القوس ..... عبدالواحد .... ود درار
دى وصيتى ليكم ؟!
تسعة أيام زول يهوب فيكم بى جاى مافى ؟


قالو فى المثل " الما دارك ما عاتبك " .... ياهو واللا مو ياهو

وانا زول لواااام ... بس كان عشمى كبير

ونقول معليش ... الجايات اكتر من الرايحات

بس كمان عاوز حق عرب

وانتو عاد بتعرفوا حق العرب هنا بالذات

ضبيحه كل يوم لمدة 3 أيام

بس بدل الضبيحه

20 كلمة كل يوم
ولمدة 3 أسابيع

ويكون المبدعين كلهم شاركوا فى وليمة حق العرب

الباشا
06-14-2012, 11:53 AM
شوية كلمات ساااااهله للتسخين




الكَيْلُون


الكَرْتَجَه


الشعَفُوفَه


الكِتِيتيحَه


الدَرْفُون


الضُقُلْ


الهَبْوُد


الرِمِيضَه


الضَقِلْ


الرِهَابْ

قوس قزح
06-14-2012, 10:55 PM
حبيبنا الباشا .. الف حمد لله على السلامة .. والله المحل من غيرك ماب يندخل .. وانا الايام الفاتت كانت مقفلي معاي وما قادر اكتب ولا كلمة .. لكن بعد ما جيت .. فرحة رجوعك بس كفى .. يالله بسم الله نجرب حظنا..

الكَيْلُون : هو قفل الباب مصنوع من الحديد وعندو مفتاح
الكَرْتَجَه : دي ما عرفتها
الشعَفُوفَه : لو ختينا فوق كل فا نقطة تبقى الشعقوقة وقد سبق شرحها .. ودي يبقالي أكلة زي الكول والمرس والله اعلم
الكِتِيتيحَه : تصغير الكتاحة والكتاحة تراب متحركة نتيجة لتغيرات الطقس وهي العدو الاول للعيون ..
الدَرْفُون : الدريفين الدابو ني .. الرخُص .. يعني ياداب الزول في اول عمرو .. حاجة صغيرونة كده
الضُقُلْ : يبقالي هو الجضل .. وهو باقي الشدرة الفي الواطة بعد ما يقطعوها ..
الهَبْوُد : خلاص الفحم لمان تكمل نارو وفي طريقو يبقى رماد
الرِمِيضَه : الرملة الحارة
الضَقِلْ : اه .. ذكرتني ايام زمان .. وياما ضقلنا .. طبعا هو لعب بالكورة حتى لو كانت كورة شراب .. ويعتمد على الحرفنة والتركيز .. والمدة التي تطل فيها الكورة تنقز مابين القدم والفراغ دون ان تسقط .. ويبدا العد والحريف مرات يفوت المية
الرِهَابْ : الحاجة البتنشاف طشاش طشاش يعني معالما ما ظاهرة لدرجة انك تميزا ..

اها قصرت معاك

الباشا
06-16-2012, 11:14 AM
اها قصرت معاك




حاشاك من التقصير .... أرمى تكالك على رب العباد ...

والفرج قريب بإذن الله ...... بكل مشاعرى معك ....

معليش .... إنت عارفنى ما بلوم أى زول ساكت



الكَيْلُون : هو قفل الباب مصنوع من الحديد وعندو مفتاح

وممكن يكون من الخشب برضو ... كان زمان عندنا الابواب تصنع من جزوع الشجر وقفلها اللهو " الكيلون " برضو يتم تصنيعوا من نفس الجزع وهو عباره عن مربع اعلاه به خشبه مسننه من جزءها الاسفل ويد طويله مسننه فى آخرها ولكن من الجهة الأعلى والية عمل الكيلون هى عندما تخرج هذه اليد فتسقد هذه السنن على بعضها وتتماسك ولا ترجع هذه اليد غلآ بالمفتاح الخشبى الكبير المعلق فى مكان معين يعرفونه اهل البيت .

الكَرْتَجَه : دي ما عرفتها
الكرتجه هى عملية فتح هذه الكيلون إذا لم يتم العثور على المفتاح ، بأن تكون الحاجه قد تركت شى مهم فى الدار وما عايزه الشفع يجوا وراها يفتحوا ويخربوا الدنيا فتقوم مغيره مكان المفتاح .... يجو الاولاد ويقعدوا يكرتجوا أى بمعنى يهزوا اليد الطويله محاولين فك الأسنان من بعضها ودى تاخد وقت لكن فى النهايه لايتم فتح الباب الا بتسلل احد الشفع لداخل البيت من الطاقه ورفع السنن من الداخل ليتم فتح هذا الباب الرهيب

الشعَفُوفَه : لو ختينا فوق كل فا نقطة تبقى الشعقوقة وقد سبق شرحها .. ودي يبقالي أكلة زي الكول والمرس والله اعلم

الشعفوفه يا قوس هى الهواء القوى جداً مع نزول المطر بشده ... دى من قوتها بترمى البيوت فى كثير من الاحيان ولو وجدت طفل خارج المنزل فى ذلك الوقت ممكن ترميه فى مكان بعيد او بركة مويه ويروح فيها ... عشان كده الاسر بتكون حريصه على الاولاد فى زمن الشعفوفة دى ...

الكِتِيتيحَه : تصغير الكتاحة والكتاحة تراب متحركة نتيجة لتغيرات الطقس وهي العدو الاول للعيون ..

شرحك مظبوط ميه ميه

الدَرْفُون : الدريفين الدابو ني .. الرخُص .. يعني ياداب الزول في اول عمرو .. حاجة صغيرونة كده

صاح .. وأزيد انه الطفل الصغير المبغبغ يعنى السمين وقصير

الضُقُلْ : يبقالي هو الجضل .. وهو باقي الشدرة الفي الواطة بعد ما يقطعوها ..

أو هو باقى البناتات القويه جداً فى الواطه ... سواء شجرة أو ساق قطن .... المهم هذا الضقل خطير يعنى لو تعترت فيه ممكن يعورك .... عشان كدا برضو الزول القصير ولتيت وملصق على الواطه بنسميه مجازاً الضقل ...

الهَبْوُد : خلاص الفحم لمان تكمل نارو وفي طريقو يبقى رماد

الهبود عندنا فى الجزيره هو الرماد بصفه عامه ولكن نطلقه بصفه خاصه على بقايا احتراق ورق القصب او سيقان القصب حق العيش الذره يعنى .... وده البنصنع منه الويكاب

الرِمِيضَه : الرملة الحارة

مش بالضرورة الرمله ... ولكننا نطلقها على الارض الحارة ... التراب الحار .... الارض الصخريه الحاره .... يعنى اى مكان تطأه الرجل ويصعب المشى فيه حافياً هى رميضه

الضَقِلْ : اه .. ذكرتني ايام زمان .. وياما ضقلنا .. طبعا هو لعب بالكورة حتى لو كانت كورة شراب .. ويعتمد على الحرفنة والتركيز .. والمدة التي تطل فيها الكورة تنقز مابين القدم والفراغ دون ان تسقط .. ويبدا العد والحريف مرات يفوت المية

شرح وافى يا قوس يديك العافيه

الرِهَابْ : الحاجة البتنشاف طشاش طشاش يعني معالما ما ظاهرة لدرجة انك تميزا

الرهاب هو السراب ... وهى ظاهره علمية .. عندما يكون الجو حار جداً جداً وتكون ماشى فى منطقه خلويه فترى أمامك ما يشبه البركه من المياه الصافيه ..... وهى فى الواقع انخداع نظرى لذرات المياه العالقه فى الجو لتكون هذا المنظر الخادع ... السراب أو باللهجه العامية السودانية الجميله ( الرهاب ) وطبعاً هنالك أمثال تطبق لهذه الخيال الخادع ... يقول ليك
" ما تدفق مويتك على الرهاب "
بمعنى أن لا تنخدع وانت فى الصحراء أو فى الخلا وتكون معك مويه بسيطه أو معكره فترى ذلك الرهاب وتتيقن بأنه بركة من المياه الصافيه .. تقوم تدفق مويتك على أمل أن تملأ قربتك أو تيرمسك بهذا الماء المخادع وتكون قد فقدت ككل شى وتعرض نفسك للمهالك والمخاطر

ويديك الف عافيه يا القوس ... ما قصرت طب

صلاح سيدأحمد الغول
06-16-2012, 12:29 PM
وانتَ مافي كُنّا راجِن يوم تجينا
ولمّا جيتنا زادتْ الأشواق علينا

حبيبنا سيد الديوان الجميل و نسطاس لهجتنا العاميّة الجميله
حمداً وشُكراً لله على سلامة عودتك وإنَّ لها ولكم لَعَبَقٌ أعاد
للمرافي أطيَب عطرها وأروعِ سِحرِها

الباشا
06-16-2012, 04:39 PM
وانتَ مافي كُنّا راجِن يوم تجينا
ولمّا جيتنا زادتْ الأشواق علينا






وانتَ الخير كله يا رائد وقائد مرافينا
وجودك هنا دليل محبة ... نسأل الله أن يديمها علينا

الله يسلمك يا شيخ صلاح
وينك ووين أراضيك ؟ طولت ما طليت علينا

ويديك الف عافيه

عبد الواحد محمد
06-16-2012, 06:24 PM
الباشا ورفقائه من جمعية الكبار ..
( قوس قزح -ود ابراهيم -صلاح الغول - ابو عبير - ود الحسن -وامير مايسترو واخرين ..)
كدي بالله انا الليلة داخل هنا عايز اعرف لنفسي بالله الحاجات دي عاملة لي قلاقل وما لقيت ليها اجوبة فعايز توروني ليها :
اول حاجة : حجوة ام ضبيبينة ( اصل الحكاية وفصلها )
نمرة اتنين :-انا عارف كوعي لكن بوعي دا وين ؟؟( آآآي انا زول ما عارف كوعي من بوعي ) بل انكر تماما ان لي عضوا يسمى البوع ..
نمرة تلاتة ما تاخدني في دوكة ( ولا توكة ما عارف غايتو ..)
بالله سريع عشان اناروحي محرقاني من الحاجات دي وقدر ما سالت الحواليني ادوني خرتومية اجابة ..

الباشا
06-17-2012, 09:09 AM
جمعية الكبار ..
( قوس قزح -ود ابراهيم -صلاح الغول - ابو عبير - ود الحسن -وامير مايسترو واخرين ..)
الحاجات دي عاملة لي قلاقل وما لقيت ليها اجوبة فعايز توروني ليها :



كدى باللول أحسب لى متوسط أعمار الجماعة ديل ..... عندى غرض وراء الموضوع ده

نجى لاستفساراتك !!

اول حاجة : حجوة ام ضبيبينة ( اصل الحكاية وفصلها )

طيب يا عبدالواحد أجيك لحجوة أم ضبيبينة دى ....
حقيقى فتشت وسألت وما لقيت أى تفسير غير الحقولوا ليك ده

الضبيبينه هى تصغير ضبانه والضبانه هى الذبابه أو النحله ... وكلاهما ذو طنين مزعج ومتكرر ... الحجوة دى كنا صغار مغرمين بيها شديد ... حبوبتك تقول ليك أها يا فلان ... أحجيك بحجوة أم ضبيبينه ... تقول آآآآى ترد عليك : خلى آآآآى ... أحجيك بحجوة أم ضبيبينه إنت ترد ... أيوه يا حبوبه ... ترد عليك خلى أيوه يا حبوبه ..... أحجيك بحجوة أم ضبيبينه ... تقفل معاك وتسكت إنت ...ترد عليك ... خلى سكتّْ .... أحجيك ...... وهكذا لما تزهج و..... تشخر ... تغطيك الحبوبه وتدعو ليك ... فالمغذى من الحكاية هى التكرار الممل اليخلى الطفل يتابع ويتسلل النعاس لعويناته

نمرة اتنين :-انا عارف كوعي لكن بوعي دا وين ؟؟( آآآي انا زول ما عارف كوعي من بوعي ) بل انكر تماما ان لي عضوا يسمى البوع ..

البوع يا شيخ عبدالواحد هو العضم البعد الإبهام فى الرِّجل ... ( تصحيح )
يعنى الحريم ما عندهمش بوع .... هم اصلاً كدا كدا مش محتاجين يعرفوا كوعهم من بوعهم ... ماهم عارفين كل شى ... الله يبارك لهم ... ويدينا خيرهم . و يكفينا :SnipeR (90): ..... و المثل دا يُضْرَب للجهل الشديد بالاشياء ...

نمرة تلاتة ما تاخدني في دوكة ( ولا توكة ما عارف غايتو ..)

الدوكه عندنا فى الجزيره هى محل عواسة الكسرة اللقمة .. يعنى صاج الحديد الكبير الغريق البيعملوا بيه الدبليبه او كسرة الفقرا .... والدواك برضو نوع من البرك البيكون أطرافها طينية خادعة ذى الرمال المتحركة ( عمك قوقل قال كدا ) .... الفرغانه البتوحل العربات .... بمجرد من الشخص يضع رجله فيها تبتلعه ويروح فطيس ...
فى كلا الحالتين لما يقول ليك ماتاخدنى فى دوكه يعنى لاترمى بى الى التهلكه .... حلوه التهلكه دى

أها روحك بردت ... واللا لسه عاوز تفسير ناس الخرتوم ؟؟

كدى شوف العجايز الفوق ديل يمكن عندهم تفسيراً كتر

الباشا
06-18-2012, 09:26 AM
أولاً عاوز انتهج نهج جديد ... بس ليه علاقة وثيقة بلهجتنا العامية السودانية الجميله .....

ومنتظر همتكم ومساعدتكم ......

فكرت أمس فى تعريفكم بالقبائل السودانية ولهجاتهم الحلوه ...

مش عار ف ليه فكرت فى القبيله دى بالذات عشان أبدأ بيها وهى

قبيلة الرباطاب

تنتمي قبيله الاشراف الرباطاب إلى قبيلة الجعليين الكبرى، فهم جعليون عباسيون قرشيون.
والجد الجامع لقبيلة الرباطاب هو الشريف / رباط أبو شملة، الجعلي العباسي الهاشمي القرشي.
ونسبه وهو:
رباط أبو شملة، بن ضياب، بن غانم، بن ‏حميدان، بن ‏صبح، بن ‏مسمار، بن سرار، بن حسن كردم، بن أبي الديس، بن ‏قضاعة، بن عبد الله حرقان، بن ‏مسروق، بن أحمد اليماني، بن إبراهيم جعل (جد الجعليين)، بن إدريس، بن قيس، بن يمن، بن ‏عدي، بن قصاص، بن كرب، بن محمد الهاطل، بن أحمد الياطل، بن ذي الكلاع، بن سعد، بن ‏الفضل، بن ‏العباس، بن الإمام ‏محمد الكامل، بن الإمام علي السجاد، بن حبر ‏الأمة عبد الله، بن ‏العباس، عم رسول الله صلى الله عليه وسلّم.
تمتد أرض الرباطاب وديارهم من حلة المشاخية غرب ابي حمد بنحو خمسين كيلو متر حتى الشلال الخامس، حيث بلدة العبيدية، ولهم تواجد مقدر في جنوب العبيدية. وهم أهل هجرة لمدينة أمدرمان من القديم.
وتعتبر منطقة الرباطاب أكثر يسراً وسهولة من ديار المناصير. من حيث التربة وتوفر سبل العيش.
ومع كل ذلك الإمتداد فإن مناطق وحواضر (أبي حمد، ومقرات) تعتبر بمثابة المركز، والعاصمة، التي تمثل العمق الرباطابي.
والرباطاب معروفون بسرعة الخاطر والبديهة الحاضرة والذكاء، حتى صاروا مضرباً للمثل في دقة الوصف والتشبيه، وصار اسم الرباطاب محطاً لكثير من الطرائف والنكات المستوحاة من قدرتهم على التعبير في الوصف والتشبيه.
وبالإضافة للصفات الآنفة الذكر فقد اشتهر الرباطاب بالشجاعة.
فقد شهد لهم التاريخ بمواجهتهم للجيش الانجليزي المار بالنيل والمتجه لنجدة الهالك (غردون باشا) حيث هزموا ذلك الجيش هزيمة منكرة، وقتلوا قائده (سندرس) فلم يفلت من ذلك الجيش إلا القليل النادر.

مصدر المعلومات:
كتاب: الأساس في أنساب بني العباس
الشريف/ حسني بن أحمد العباسي/ وهو نقيب الأشراف العباسيين في العالم.



القبيله دى كما تم ذكره .... معروفين بخفة الدم والذكاء الحاد وسرعة البديهة .... والمساخه كمان :icon15: وطبعاً بارعين فى القاء النكته والقفشه السريعه ودى دليل ذكاء حاد طبعاً .... مع بحثى حول هذه القبيله قدرت القط ليكم بعض الكلمات الكانت غريبه على .... وبعضها القليل مرّ على ... والكلمات هى


كركجم

شبدق أو شبديق

منديره

قنعن

داقرون

جناييت

مقلال

قرجم

ربوب

منصات


يلا الما رباطابى .... يشوف ليه صاحب رباطابى

الباشا
06-19-2012, 01:33 PM
وين الناس يا شباب

مافيش رباطاب ؟؟؟

طيب مافيش أصحاب رباطاب ؟؟

قفشة

رباطاب قاعدين ... مرّ عليهم واحد رباطابى راكب حمار
تعداهم وما سلم عليهم
واحد سأل التانى ... مالو عمك ؟ ما بيسلم ؟
رد التانى .... يمكن رافع القزاز ..

الباشا
06-20-2012, 11:30 AM
كركجم


الكركجم عن الرباطاب هو الشخص البخيل أو المنعزل وعندنا فى الجزيره نقول عليه " الجلده أو المضبب أو كوهين " وطبعاً الفئة دى من الناس دائماً ما يكونوا إما منعزلين خالص أو منفتحين خالص يعنى حاجه فى النص ماكو ( ماكو دى كويتية - عراقية - بحرينيه ) .....


شبدق أو شبديق

الشبدق أو الشبديق هو نوع من قوالب الطوب او الطابوق وده طبعاً كان زمان يستخدم فى بناء بيوت الجالوص .... دلوقت الحكاية بقى فيها طوب أحمر مصانع و بلوكات اسمنتية ... يعنى تطورت الشغله وبقى بناء البيوت من الطابوق شى من الماضى

منديره

المنديره هى الراية أو العلم وعندنا فى الجزيره نقول علية البيرق ... وللعلم بيرق هى كلمة عربية فصحى اكتشفتها أو تحققت من معناها عندما كنت استمع لمسابقات الشعر فى تلفزيونات الامارات وخاصة تلك المنافسة القوية التى ظهرت فيها بنتنا الشاعرة الفطحل روضه الحاج ( يعنى ايه فطحل وهل تجوز تسمية النساء بها ) كأقوى مرشح لنيل " البيرق " والملايين ولكن ضعف التصويت لصالحها كان السبب فى فقدان هذه الجائزه ولكنها كسبت قلوب الملايين فى جميع انحاء العالم العربى والحمد لله

قنعن

يعنى أجلس أو جلس أو أقعد أو انفجخ أو الزم الجابره والجابره هى الواطه - الارض يعنى أو قمعز بالليبى المهم هى حالة الجلوس

داقرون

الداقرون عند الرباطاب هى العنز او الغنماية التى ليست لها قرون وعندنا فى الجزيره ليها اسم بس ناسيه ... إنما متذكر الغنماية بدون إضنين أو إضنيها مقطعات نقول عليها الكرتا


جناييت

الجانييت نوع من الابل بس والله ما لحقت اعرف ياتو نوع من الابل والعارف يقول لينا يا رباطاب

مقلال

المقلال هو الوديان أو مجرى السيول التى يجف منها الماء فى غير اوقات الخريف وطبعاً فى الجزيره ما عندنا وديان لانه الدنيا كلها محروته ومرتبه وتسقى بالرى الصناعى والمطر إذا جاء فهو محبوس فى السرابات وداخل الحواشات .... انما فى منطقة شرق النيل فهنالك أوديه بس بنقول عليه الوادى كما هو فى اللغة العربية الفصحى


قرجم

القرجمه هى الصياح بالصوت العالى ..... وفى الجزيره نقول عليها اللعلعه أو الحسوس أو الكواريك

ربوب

الكلمه دى برضو عند ناس الجزيره موجوده ومقرونه بكلمه اخرى هى الخبوب .... يقول ليك دا شغل خبوب وربوب فالخبوب عندما هو الطين المتعفن أو الاكل التى يتم عجنه بالايدى .... والربوب هو أيضاً يعطى نفس المعنى إلا الربوب مشتق من الربه وهى العجنه او الخلطه او الاختلاط

منصات

المنصات هو الطفل المدلل ... المدلع الذى يستجاب لكل مطالبه ويقلب الدنيا إذا لم يتم ذلك ... أو الذى لا يحترم الكبار ويطلق الالفاظ النابيه على الكبار والصغار .... وهو صعب المراس ودائماً ما تكون وراءه أم جاهله باصول التربية الصحيحه أو عندها دسته مش قادرة تسيطر عليهم

صلاح سيدأحمد الغول
06-20-2012, 11:55 AM
حبيبنا الباشا ياخي ربّنا يقويك ويزيدك محبّةً وعلما
وواصِل بعون الله

الباشا
06-20-2012, 12:58 PM
حبيبنا الباشا ياخي ربّنا يقويك ويزيدك محبّةً وعلما
وواصِل بعون الله




الحبيب الغالى ...... صلاح

هذه محاولة منى لتوثيق هذا التراث الغنى وكنت أتمنى من كل قلبى أن يشاركنى الجميع فى تجميع هذا التراث والتوثيق له باسم هذا المنتدى .... فقد بدأ فى تقليدنا الكثيرين من المنتديات فى ذلك .... كما ذكر لى الأخ الحبيب عمر عثمان " القوس الأكبر " .... عاوزين نسبق الاخرين فى حجم وكمية الكلمات والمعانى وتنوعها بين قبائل السودان العريقه ...
فهنالك أكثر من 300 لهجه منها لهجات البجا و التجرية والبداويت البني عامر والهدندوة والحلنقة والبشاريين والأمرارواللهجات النوبية في شمال السودان الدنقلاوية والحلفاوية - المحس وأهلنا وحبيايبنا الشوايقه بلهجتهم الحانيه الحنينه ولهجات غرب السودان ومنها الجور والفلاتة، والهاوسا والزغاوة والفور والداجو والمساليت والحمر والمعالية والرزيقات . و لهجة الجعليين ومنهم الرباطاب والبقارة والشكرية ولهجات وسط السودان ناس الجزيره والخرتوم وأم درمان وحتى لهجة الراندوك الجديده حقت الشباب ..... وغيرهم كثير .... كنت أتمنى أن أجد قاموس لكل اللهجات وبكافة السنة القبائل منها معرفه ومنها توثيق ولكن أجد نفسى فى الغالب الأعم وحيداً فى تحضير الكلمات وشرحها .... عدد الأعضاء ليس قليل ولكن المتفاعلين والمشاركين فى البوست لا يتعدوا العشرة أشخاص حتى البعض منهم يطلع كثيراً ويشارك قليلاً .....

وشكراً على مشاركاتك أنت شخصياً فى هذا التوثيق

عبد الواحد محمد
06-20-2012, 04:35 PM
كدى باللول أحسب لى متوسط أعمار الجماعة ديل ..... عندى غرض وراء الموضوع ده

نجى لاستفساراتك !!

اول حاجة : حجوة ام ضبيبينة ( اصل الحكاية وفصلها )

طيب يا عبدالواحد أجيك لحجوة أم ضبيبينة دى ....
حقيقى فتشت وسألت وما لقيت أى تفسير غير الحقولوا ليك ده

الضبيبينه هى تصغير ضبانه والضبانه هى الذبابه أو النحله ... وكلاهما ذو طنين مزعج ومتكرر ... الحجوة دى كنا صغار مغرمين بيها شديد ... حبوبتك تقول ليك أها يا فلان ... أحجيك بحجوة أم ضبيبينه ... تقول آآآآى ترد عليك : خلى آآآآى ... أحجيك بحجوة أم ضبيبينه إنت ترد ... أيوه يا حبوبه ... ترد عليك خلى أيوه يا حبوبه ..... أحجيك بحجوة أم ضبيبينه ... تقفل معاك وتسكت إنت ...ترد عليك ... خلى سكتّْ .... أحجيك ...... وهكذا لما تزهج و..... تشخر ... تغطيك الحبوبه وتدعو ليك ... فالمغذى من الحكاية هى التكرار الممل اليخلى الطفل يتابع ويتسلل النعاس لعويناته

نمرة اتنين :-انا عارف كوعي لكن بوعي دا وين ؟؟( آآآي انا زول ما عارف كوعي من بوعي ) بل انكر تماما ان لي عضوا يسمى البوع ..

البوع يا شيخ عبدالواحد هو العضم البعد الإبهام عند الرجال ... والرجال فقط يعنى الحريم ما عندهمش بوع .... هم اصلاً كدا كدا مش محتاجين يعرفوا كوعهم من بوعهم ... ماهم عارفين كل شى ... الله يبارك لهم ... ويدينا خيرهم . و يكفينا :sniper (90): ..... و المثل دا يُضْرَب للجهل الشديد بالاشياء ...

نمرة تلاتة ما تاخدني في دوكة ( ولا توكة ما عارف غايتو ..)

الدوكه عندنا فى الجزيره هى محل عواسة الكسرة اللقمة .. يعنى صاج الحديد الكبير الغريق البيعملوا بيه الدبليبه او كسرة الفقرا .... والدواك برضو نوع من البرك البيكون أطرافها طينية خادعة ذى الرمال المتحركة ( عمك قوقل قال كدا ) .... الفرغانه البتوحل العربات .... بمجرد من الشخص يضع رجله فيها تبتلعه ويروح فطيس ...
فى كلا الحالتين لما يقول ليك ماتاخدنى فى دوكه يعنى لاترمى بى الى التهلكه .... حلوه التهلكه دى

أها روحك بردت ... واللا لسه عاوز تفسير ناس الخرتوم ؟؟

كدى شوف العجايز الفوق ديل يمكن عندهم تفسيراً كتر






روحي بردت تب يا باشا ..:d
لكن طلعت باشا بصحيح
بس بالنسبة للبوع دا هل ما عندو اسم في اللغة العربية ؟؟؟
الفصحى اذ لم ترد هذه التسمية على حسب علمي الا عندنا هنا في السودان ..

الباشا
06-20-2012, 04:57 PM
لكن طلعت باشا بصحيح
بس بالنسبة للبوع دا هل ما عندو اسم في اللغة العربية ؟؟؟
الفصحى اذ لم ترد هذه التسمية على حسب علمي الا عندنا هنا في السودان ..


أفوو يا جنابو !! إنت كان عندك شك فى باشويتى

لا دى فيها حق عرب .... وحأخلى المبارك يحكم بينا ويحدد لى حقى عندك

البوع ليست كلم سودانية وإنما كلمه عربيه فصحى والمثل شائع فى كل البلاد العربيه كما عرفت والتفسير واحد ، وكلمة تالته نحن بنستعملها كتير ووردت فى صفحة من صفحات هذا البوست وهى كلمة الكرسوع ونحن بنقول ليها الكراسع ... ونصف بيها المره أم سويقات المشاية والبتبرم الحله تشيل خبر دى توديه للتانيه يعنى مره لخباطه وتحقيراً ليها بيسموها أم كراسع ....

التفسير العربى / الخليجى

الفرق بين البُوع، والكُوع، والكُرسوع عند بعض أهل الخليج

هنالك تداخل معاني الكلمات الثلاثه ، فكثيراً ما نسمع قولهم في البليد: ما يُفَرّق بين كوعه وكرسوعه، أو كوعه من كرسوعه أو بوعه من كوعه، أو نحو ذلك من الأساليب. وقد فرقت بينها المعاجم اللغويَّة كالمعجم الوسيط؛ إذ ورد فيه: "البُوع: عَظْمٌ يلي إبهام الرِّجل. جمع أبواع".
و"الكُوعُ: طرف الزَّنْد الذي يلي الإبهام. جمع أَكْوَاع".
و"الكُرْسُوعُ: طرف الزَّند الذي يلي الخِنصر، وهو الناتئ عند الرُّسْغ... وكُرْسُوع القدم مَفْصِلها من الساق" جمع كراسيع.
يتبيَّن أنَّ (البوع) هو العظم الذي بعد إبهام الرِّجل، أمَّا (الكُوع) و(الكُرسُوع) فهما عظمان عند مفصل الكفَّ فالذي يلي الخنصر يُقال له: الكُرسوع، والذي يلي الإبهام يُقال له الكُوع فهما عظمان بارزان في آخر الذراع قبل اليد.

عبد الواحد محمد
06-20-2012, 05:05 PM
أفوو يا جنابو !! إنت كان عندك شك فى باشويتى

لا دى فيها حق عرب .... وحأخلى المبارك يحكم بينا ويحدد لى حقى عندك

البوع ليست كلم سودانية وإنما كلمه عربيه فصحى والمثل شائع فى كل البلاد العربيه كما عرفت والتفسير واحد ، وكلمة تالته نحن بنستعملها كتير ووردت فى صفحة من صفحات هذا البوست وهى كلمة الكرسوع ونحن بنقول ليها الكراسع ... ونصف بيها المره أم سويقات المشاية والبتبرم الحله تشيل خبر دى توديه للتانيه يعنى مره لخباطه وتحقيراً ليها بيسموها أم كراسع ....

التفسير العربى / الخليجى

الفرق بين البُوع، والكُوع، والكُرسوع عند بعض أهل الخليج

هنالك تداخل معاني الكلمات الثلاثه ، فكثيراً ما نسمع قولهم في البليد: ما يُفَرّق بين كوعه وكرسوعه، أو كوعه من كرسوعه أو بوعه من كوعه، أو نحو ذلك من الأساليب. وقد فرقت بينها المعاجم اللغويَّة كالمعجم الوسيط؛ إذ ورد فيه: "البُوع: عَظْمٌ يلي إبهام الرِّجل. جمع أبواع".
و"الكُوعُ: طرف الزَّنْد الذي يلي الإبهام. جمع أَكْوَاع".
و"الكُرْسُوعُ: طرف الزَّند الذي يلي الخِنصر، وهو الناتئ عند الرُّسْغ... وكُرْسُوع القدم مَفْصِلها من الساق" جمع كراسيع.
يتبيَّن أنَّ (البوع) هو العظم الذي بعد إبهام الرِّجل، أمَّا (الكُوع) و(الكُرسُوع) فهما عظمان عند مفصل الكفَّ فالذي يلي الخنصر يُقال له: الكُرسوع، والذي يلي الإبهام يُقال له الكُوع فهما عظمان بارزان في آخر الذراع قبل اليد.
[/center]


والله اوفيت وكفيت يا باشا ..
فانت رجل موسوعة بحق ..
افدتني وافدت غيري بالطبع ... افادك الله ..
كل الود واشكرك بكل كوع وبوع وكرسوع مني..

الباشا
06-21-2012, 12:41 PM
كل الود واشكرك بكل كوع وبوع وكرسوع مني..




طيب وين حق العرب يا جنابو ؟؟؟؟

عاوز تاكلنى حنك واللا شنو :essen: ؟؟

مش مشكله أرسل حقوا حديده

الباشا
06-21-2012, 03:21 PM
السلام عليكم

أولادنا ناس الشهادة العربية
كتير من المرات بتلقوا كلام وما بتفهموه
ومرات ما بتلقوا زول تسعلوه
وكان شفتوا عمكم فدياس سمى حجوته حجوة أم ضبيبينه
السعال هنا أم ضبيبينه دي شنو؟ ولا تلقاكم الحجوه زاااااته ما سمعتوا بيها ولا عارفين معناته شنو

أها عايزين هنا نوريكم كلام أعمامكم ديل ناس عمكم فدياس
وناس عمكم الباشا وعمكم القوس وعمكم ود المنابير وعمكم أبوإيثار وعمكم أبوسيده
وغيرهم من أعمامكم الحلوين ديل وأي سعال في كلام حبوباتنا ولا جدودنا الذكرنا أساميهم ديل
تجوا تسعلوا منو هنا

يلا نقول بسم الله ونبدأ بي حجوه معناها شنو




دى يا عبدالواحد كانت المشاركة رقم (2) فى البوست ده يوم 6/3/2009 من أخونا الله يطراهو بالخير محسنكو وهو شخصيه محنكة فى مجال المنتديات ... له مشاركات عديده فى عدة منتديات ورجل حبيب وصديق .... بس ليه فتره طويله مسجل غياب هنا



أووووووووووووووووووه يا محسن

ذكرتنا احلى الليالى مع حبوباتنا

يا محسن

ياخوى ... حجيوة أم ضبيبينه دى عندى فى الجزيره ماها كدى ....

علّول ما نجى نرقد ... تجى حبوبه تتبنا ... أيوه تتبنا
تلقانا مفنقلين العيونات فى العرش ... وشغالين فليع بالبراطيش
عشان نهجس ... لازم حبوبه تقعد حدانا وتحكى لينا حجيوة أم ضبيبنه

حبوبه : احجيكم حجيوة أم ضبيبينه ؟؟؟؟
ودخالى : آيييى يا حبوبه
حبوبه : خلّى آيييى

حبوبه : احجيكم حجيوة أم ضبيبينه ؟؟؟؟
ودخالتى : ما التشك ( لقب ودخالى البزعلوا شديد ) قال ليك آييى
حبوبه : خلّى ما التشك قال ليك آييى

حبوبه : احجيكم حجيوة أم ضبيبينه ؟؟؟؟
انا : يا حبوبه الدفان ( لقب ودخالتى البيقهروا ) ما قال ليك آييى
حبوبه : خلّى ما الدفان قال ليك آييى

حبوبه : احجيكم حجيوة أم ضبيبينه ؟؟؟؟
التشك : يا حبوبه قولى للدفان يبطل عبط
حبوبه : خلّى قولى للدفان يبطل عبط

حبوبه : احجيكم حجيوة أم ضبيبينه ؟؟؟؟
....... : ......................

وتستمر الحجيوه لما ننخمد كلنا ... ومرات نلقى حبوبه متلببانا كلنا فى حضنها الدافى للصباح



وده كان ردى عليه برقم (9) يوم 6/4/2009 يعنى قبل 3 سنين ودقداقه


والتاريخ يعيد نفسة يا عبد الواحد

الباشا
06-27-2012, 09:33 AM
السلام عليكم ....

غبت أيام لأسباب طارئة.....
وجيت ما لقيت فى زول عقبنى بى جاى

مالكم يا ناس المرافى ..... وينكم ؟ فى شنو ؟؟

غداً إن شاء الله نستأنف ....

قوس قزح
06-27-2012, 10:08 AM
أهلا بعودة الحبيب الغالي باشا المنتدى وحمد لله على السلامة
من تغيب والله يا باشا المحل ده يبقالنا غريب غريب وما عارفين نقول فيهو شنو
عدت وسوف يعود كل شي ان شاء الله
تحياتي

الباشا
06-27-2012, 02:51 PM
المحل ده يبقالنا غريب غريب وما عارفين نقول فيهو شنو




أهلين بالقوس الأكبر مديرنا

والله نفسى الإحساس ده يكون غير موجود إطلاقاً عند المبدعين كلهم

صدقونى البوست ده مهم كتوثيق للهجتنا العامية السودانيه

وبالمناسبة السيد قوقل ناوى يعمل توثيق للهجات ونحن ببساطة رواد فى هذا المجال بمعنى انه كل الناس النشأوا بوست اللهجه فى منتدياتهم أتوا بعدنا ..... وأى بوست فى اى منتدى أُنشىء بعد 2009/05/17 بهذا الشكل هو مبنى أو أساسه هذا البوست يعنى ممكن ببساطه نسمح بيه لتوثيق قوقل حسب شروطنا والتصفح غير طبعاً ... شخصياً ما عندى فكرة عن استفادة الناس او المواقع من الانترنت يعنى مدخولات الانترنت ... وأظن من المهم عليكم كإدارة البحث فى الموضوع ده فإذا الموضوع بيعود بفائده لما لا ؟؟؟
معاى إنت يا القوس ؟؟!

يبقى يا جماعه وجودى وعدم وجودى المفروض ما يؤثر فى سير البوست ده

ده بوست المنتدى وليس بوست الباشا

عبد الواحد محمد
06-27-2012, 06:26 PM
الباشا :
حبابك والله فقدناك ..
انت عارف المشكلة موش كسل ولا تجاهل للبوست .
لكن المشكلة في عدم العرفة ..
المام الناس بالمصطلحات بالمناسبة امر نادر ولا
يتوفر لدى الكثيرين ولهذا تراهم يقرأون فقط ولا يدلون بدلوهم ..
والمشكلة الاساتذة بس ثلات يمكن ..
المهم البوست ما يقيف والبركة فيك وود المبارك والقوس ..
اما انا وجاري وجار جاري ( الكاشف يعني) فيمكن مقلين بعض الشئ ..
لك بالغ الود والتقدير ..

الباشا
06-28-2012, 11:18 AM
دائماً ما أبحث فى قوقل عن معلومه أحبها أن تكون مكتمله أو مسأله فقهية أو قانونية أو إقتصادية ومصرفيه بصفة خاصة ... فيقودنى بحثى لجوانب أخرى أرى فيها معلومه مفيده ، فاليوم كنت ابحث عن صله قوية بين اللهجة العامية السودانيه والكلمات التى ترد فى أشعار العرب ولها صله بلهجتنا ، طبعاً السبب هو ما كتبته بالامس عن عدم مشاركة الكثيرين فى هذا البوست وملاحظتى أن معظم المبدعين فى مرافى الابداع من الذين واللاتى يقرضون أو يقرضن الشعر ( حلوه يقرضون ويقرضن دى ) فطرأت فى بالى فكرة الربط هذه ... سبحان الله أو ما طلع لى من عمنا قوقل هذا البحث الجميل من موقع سودانى هو " سودانايل " وبقلم الباحث الأستاذ / عبدالمنعم عجب ... وعن من من الشعراء ؟؟ أنه أبو الطيب المتنبى شخصياً ... فرحت غاية الفرح أن أجد لهجتى السودانية العامية فى شعر هذا الشاعر الخرافى الذى أرى أنه أشعر شعراء العرب قاطبة منذ العصر الجاهلى وربما يكون كذلك حتى يرث الله الارض وما عليها .... حقيقى عجبنى البحث وإن كان مختصر ولكنه بالتأكيد ذو فائده ... لا أطيل عليكم ... فإليكم البحث :

نص البحث :
الدافع الى هذه الدراسة ، دافع لغوي بحت يهدف الى اعادة النظر في تقسيم الفاظ اللغة العربية ، الى فصيح وعامي .هنالك حاجة ملحة الى مراجعة مدلول كلمتي " فصيح" و" عامي" ان الاعتقاد بان الالفاظ التي يتحدثها عامة الناس غير فصيحة ، هو خطا فادح يقع فيه الخاصة والعامة . نظرة سريعة الى امهات معاجم اللغة العربية تكشف ان تقسيم الفاظ اللغة ، السائد الان ، الى فصيح وعامي تقسيم مبني على أوهام كثيرة . ولعل في هذه الدراسة ، وقبلها " الفاظ اللهجة السودانية في لغة القرآن " برهان على ذلك . و لكن سنرجيء الخوض في خلفية وملابسات ودلالات هذا التقسيم التاريخية واللغوية ، الى حلقة قادمة . مع ملاحظة اننا نتحدث هنا عن الفاظ اللغة وليس عن التراكيب النحوية والصرفية .
ويمتليء شعر المتنبي بالكثير من الالفاظ التي تجدها في كلام أهل السودان . وقد رصدت اثناء مطالعاتي لديوانه عددا كبيرا من هذه الكلمات التي نستعملها في لغة الكلام ونسقطها في لغة الكتابة او المخاطبات الرسمية ظنا انها (عامية) . هذه الظاهرة استرعت انتباهي منذ وقت مبكر ، لكن ما شجعني على هذه الدراسة الاستقصائية ما ذكره استاذنا الطيب صالح في احدى مقالاته عن ورود مفردات في شعر المتنبي يستعملها السودانيون في كلامهم . وقد تأملت في سبب ذلك ، فوجدت ان المتنبي من الكوفة بالعراق وهنالك اوجه شبه بين لهجة أهل العراق ولهجة اهل السودان العربية . اي شيء هو ، والامالة في لفظ الضمير أنا الذي ينطق عندهم وعند بعضنا " اني " وغيره ، الى جانب كثير من الالفاظ و الظواهر اللغوية المشتركة التي سيلم القاريء بطرف منها في هذه الدراسة .
- يقول اهل السودان للمرض : عياء . وللمريض عيان .
وقد ورد ذلك عند المتنبي في مطلع قصيدة يمدح فيها شجاع بن محمد الطائي :
عزيز أسي من داؤه الحدق النجل
عياء به مات المحبون من قبل
قال المصطاوي في شرح البيت : العياء : المرض .
وقال ابو البقاء العكبري : " العياء : الداء الذي لا علاج له قد أعيا الاطباء. اما البرقوقي فكرر كلام ابي البقاء ولم يزد عليه
وجاء في لسان العرب لابن منظور : " داء عياء : لا يبرأ منه . وحكي عن الليث ،الداء العياء الذي لا دواء له " .
والعياء ايضا في كلامنا التعب اي الاعياء . تقول : عييت ، اذا تعبت . وفي ذلك يقول صاحب اللسان :
" وحكي الازهري عن الاصمعي : عي فلان ، بالامر اذا عجز عنه . ويقال في المشي : أعييت وأنا عيي . والاعياء : الكلال ، قال : مشييت فاعييت ، وأعيا الرجل في المشي ، فهو معي ."
وفي تهذيب اللغة للازهري : " أعييت اعياء . قال : وتكلمت حتي عييت عيا ."
- شاكل يشاكل شكلة ، ترد في كلام اهل السودان بمعني اشتجر يتشاجر مشاجرة واشتجارا.
وقد وردت عند المتنبي في هذا المعني في قوله :
أفي كل يوم تحت ضبني شويعر
ضعيف يقاويني قصير يطاول
لساني بنطقي صامت عنه عادل
وقلبي بصمتي ضاحك منه هازل
وأتعب من ناداك من لا تجيبه
وأغيظ من عاداك من لا تشاكل
ولكن شراح المتنبي فات عليهم ادراك المعني (السوداني ) الذي قصد اليه المتنبي من لفظ " تشاكل " واضطرهم ذلك الي التصرف في مقصد الشاعر مسايرة لدلالة اللفظ عندهم
فابي البقاء العكبري يقول في شرح البيت : " والمعني ، أتعب من عاداك : اتعب حاسديك بندائه لك من كنت مترفعا عن مجاوبته .. وأغيظ اعدائك من لا يشاكلك ، وأكرمهم اليك من كنت لا تماثله .
اما عبد الرحمن البرقوقي فيحذو حذو العكبري النعل بالنعل ، يقول : " أتعب مناد لك من ناداك فلم تجيبه لانك لا تشفيه بالجواب فيجهد في النداء ، كما ان اغيظ الاعداء لك من عاداك وهو دونك لانك تترفع عن معارضته فلا تشفي منه " .
اخذ كلا الشيخيين " تشاكل " بمعني تماثل وتساوي ، من المشاكلة وهي الموافقة والتطابق . ولا يستقيم المعني الا اذا قلت في شرح البيت : أتعب مناد لك من ناداك ولم ترد عليه ، واغيظ اعدائك من عاداك ( شاكلك ) ولم تعاديه ( تشاكله ) اي تخاصمه وتشتجر معه . .
وعندي ان تشاكل بالمعني ( السوداني ) من أشكل الامر ، اذا التبس ، فهو مشكل و مشكلة
ولكنا نحن نسقط الميم فتصير : شكلة . وهذا كثير في كلامنا . مسبحة تتحول عندنا الي سبحة وهكذا لا نابه لميم مفعلة نسقطها.
لاحظت تسرب كلمة "خناقة " المصرية الينا شيئا فشئيا حتي علي مستوي بعض كتاب القصة .
- نقول في كلامنا : لز ، يلز . اي دفع يدفع . في زحام المواصلات كثيرا ما نسمع : يا اخي ما تلز من فضلك !!
قال المتنبي يصف احدي غارات سيف الدولة علي احدي القبائل :
فلزهم الطراد الي قتال * احد سلاحهم فيه الفرار
مضوا متسابقي الاعضاء فيه * لأرؤسهم بارجلهم عثار
جاء في شرح المرصفاوي للبيت : لزه : دفعه . وجاء في شرح البرقوقي : لزه الي الشيئ : ألجاه اليه وأدناه منه
جاء في لسان العرب : " لز الشيء بالشيء يلزه لزا : ألزمه أياه . قال الليث : اللز ، لزوم الشيء بالشيء بمنزلة لزاز البيت ، وهي الخشبة يلز بها الباب ."
ونقول في كلامنا ايضا ، لزق ( بالكسر ) بمعني لصق او ملاصق : البيت لزق البيت
يقول صاحب اللسان : " لزق الشيء بالشيء يلزق لزوقا : كلصق وألتزق التزاقا . وألزقه ، كألصقه . وهذا لزق هذا ، اي لصيقه ، وقيل اي بجانبه .." !!!
- قد بالفتح في كلامنا ، بمعني ثغر او خرم او شق او فتق .
ولكن لا نستعمل هذه الكلمة في لغة الكتابة والمخاطبات الرسمية ظنا من انها (عامية)
ولكن كما هو معروف ان الكلمة وردت في القران الكريم :
" ان كان قميصه قد من قبل فصدقت وهو من الكاذبين وان كان قميصه قد من دبر فكذبت وهو من الصادقين "- يوسف - الآية 26 ، 27
كما وردت الكلمة في شعر المتنبي :
أيا خدد الله ورد الخدود * وقد قدود الحسان القدود
يدعو علي خدود الحسان وقاماتهن اللدنة التي اسهرته واضنته ، بالتشقق واليباس !!
والبيت به جناس او مجانسة بين القد ،بالفتح ، بمعني القامة وقد بالفتح ايضا ، بمعني شق يشق او فتق يفتق او خرم يخرم او ثقب يثقب
اما القد بالكسر ، في اللهجة السودانية جلد البقر يشقق في شكل سيور وتنسج به العناقريب ويستعمل في اغراض اخري كثيرة كالشد والربط . وهو ايضا هكذا في المعجم
يقول المتنبي في هذا المعني :
وغيظ علي الايام كالنار في الحشا * ولكنه غيظ الاسير علي القد
يقول المصطاوي في شرح البيت : القد : سير من الجلد. ويقول البرقوقي : القد، سير يشد به الاسير .
وردت ايضا في شعر طرفة بن العبد :
وخد كقرطاس الشامي ومشفر * كسبت اليماني قده لم يجرد
ومن القد ، بالكسر ، جاءت القديد وهو الشرموط في كلامنا.
- نقول حِلة (بالكسر ) ، اي قرية والجمع حلال بالفتح . وهي من حل بالمكان يحل حلولا ومحلا في التنزيل : " وانت حل بهذا البلد " . يقول صاحب اللسان : " الحلة (بالكسر ) جماعة بيوت الناس لانها تحل . قال كراع ، هي مائة بيت ، والجمع حلال بالكسر، واحدتها حلة "
يقول المتنبي : ان أعشبت روضة رعيناها * أو ذكرت حلة غزوناه
ويقول في قصيدة اخرى:
في مقلتي رشا تديرهما * بدوية فتنت بها الحلل
الحلل جمع حلة. والمعني ان هذه البدوية الحسناء سارت بذكرها الحلال.
- فريق : بمعنى حي : ناحية من حلة او مدينة او مجموعة بيوت البدو.
والجمع فرقان على غير قياس . وفي اللسان الفريق : طائفة من الناس اكثر من الفرقة . والجمع أفراق . وردت فريق بمعنى حي في شعر المتنبي . يقول في وصف الاسد حين نازله بدر بن عمار :
ما قوبلت عيناه قط الا ظنتا * تحت الدجي نار الفريق حلولا
يقصد ان الشرر يتطاير من عين الاسد كنار فريق (العرب ) ليلا
- القحف في اللهجة السودانية ، بكسر القاف والحاء ، هو قطع وبقايا أواني الفخار المتكسرة مثل الزير والقلة والكنتوش والبرمة الخ . وهو كذلك في المعجم ! جاء في لسان العرب :
" القحف هو القدح والكسرة من القدح . قال الازهري : القحف عند العرب الفلق من فلق القصعة او القدح اذا انثلمت . قال : ورايت اهل النعم اذا جربت ابلهم يجعلون الخضخاض في قحف ويطلون الاجرب بالهناء الذي جعلوه فيه ،قال الازهري : واظنهم شبهوه بقحف الراس فسموه به . قال الجوهري : القحف اناء من خشب علي مثال القحف كانه نصف قدح . "
والقحف في الاصل : " العظم الذي فوق الدماغ من الجمجمة والجمجمة التي فيها الدماغ ، ولايقولون لجميع الجمجمة قحفا الا ان يتكسر منه شيء ، فيقال : للمتكسر قحف ، وان قطعت منه قطعة فهو قحف ايضا .. " - لسان العرب
ونحن نقول لجمجمة الراس قرعوبة . ولعلها من القرعة اي ان شكلها يشبه القرعة وكذلك بقايا البرمة والزير تشبه القرعة في الاستدارة ، فسميت قحف وقد وردت كلمة قحف في هذا المعني في شعر المتنبي اذ يقول :
كأن خيولنا كانت قديما * تسقي في قحوفهم الحليبا
- ذكر الطيب صالح في حديثه عن اللهجة السودانية ، ورود كلمة : "أمات " في شعر المتنبي . قال : " ونحن نقول : أمات ، ولا نقول أمهات وقد قال الشاعر السوداني :
يا طير أن مشيت سلم على الأمات
وقول ليهن وليدكن في الحياة ما مات
ثم استدل بقول المتنبي وهو يصف الخيل :
العارفين بها كما عرفتهم * والراكبين جدودهم أماتها
وليس كل اهل السودان يقولون امات كما اشار الطيب صالح ففي كردفان مثلا يقولون امهات في جمع الام وابهات في جمع الاب
اضافة الي البيت الذي ذكره الطيب صالح وردت كلمة أمات عند المتنبي ببيت اخر :
تظن فراخ الفتخ انك زرتها * باماتها وهي العتاق الصلادم
يقول صاحب لسان العرب - ابن منظور : الجمع من أم ، أمات وأمهات بزيادة هاء . واضاف : " وقال بعضهم : الامهات فيمن يعقل ، والامات بغير هاء فيمن لا يعقل ، فالامهات للناس والامات للبهائم . "
ولكنه اورد عددا من الشواهد الشعرية تخالف هذه القاعدة ومنها بيت شعر لذي الرمة حيث استعمل امهات لغير العاقل ، مما يدل علي ان هذا التفريق لا اساس له .
وانا اري ان الامر لا يعدو اختلاف لهجات . بعض العرب كانت تجمع أم علي أمهات وبعضهم كان يجمعها علي أمات
وقد وردت أمهات في القرآن :
" حرمت عليكم أمهاتكم وبناتكم واخواتكم .." - النساء 23
" الذين يظاهرون منكم من نسائهم ما هن أمهاتهم ان أمهاتهم الا اللائي ولدنهم ." - المجادلة 2
- ينظر الي كلمة نسوان ليس كونها عامية فقط بل ايضا ذات دلالة سالبة في وصف جنس النساء ولكن نسوان مثلها مثل نسوة ونساء ، لا فرق بينها
ففي كل المعاجم ، جمع أمراة هو : نسوة ، نساء ونسوان
وقد وردت " نسوان " في شعر المتنبي في قصيدة يمدح فيها سيف الدولة :
تخليهم النسوان غير فوارك * وهم خلوا النسوان غير طوالق
- يقول اهل السودان في كلامهم شين وشينة للقبيح والقبيحة . ولم اسمعها في كلام غيرهم . ولكنهم لا يكتبونها توهما منهم انها ليست من لغة الكتابة ، علما بانهم يستعملون مشتقاتها في الكتابة : مشين مشينة ، مثل : فعل مشين وظاهرة مشينة . ويقال في القانون اشانة سمعة .
جاء في لسان العرب في معاني كلمة شين : " الشين معروف خلاف الزين : شانه يشينه شينا . قال ابو منصور : والعرب تقول وجه فلان زين اي حسن ذو زين ، ووجه فلان شين اي قبيح ذو شين ... والشين ( ايضا ) العيب .."
ما اروده ابن منظور في اللسان من معاني لكلمة شين هو بالضبط ما عليه اهل السودان .
السمح والشين . فلان ما بسوي الشين ، يعني العيب .
وقد استعمل المتنبي لفظ شين في هذا المعني السوداني في قوله :
وليس مصيرهن اليك شينا * ولا في صونهن لديك عاب
وحيث ان الشيء بالشيء يذكر فانه عندنا كلمة سمح وسمحة بمعني جميل وجميلة اظنها من الكلمات العربية التي لا وجود في هذا المعني الا عند اهل السودان . فالسماحة في المعجم : الجود والكرم والسخاء . رجل سمح وامراة سمحة . والاسماح والمسامحة والتسامح : التساهل واليسر ومنه جاء تعبير الشريعة السمحة . وهي ايضا اللطف والظرف
وعندي ان السماح في لسان اهل السودان ، اشمل وارحب من لفظ الجمال ، فكأن المرأة السمحة عندنا ليست جميلة وحسب بل ان جمالها فاض وسخي عليها حتي شمل كل خصالها . فهي لطيفة وظريفة واريحية وجميلة فهي سمحة . يعني ما سماح جمل طين ساي !
وسمح عندنا في معني جميل لطيف ظريف ، تقابل زين عند اهل الخليج ومليح عند اهل الشام
- في النشرة الجوية بتلفزيون السودان دائما يرددون عبارة : : الغبار العالق !
هنالك كلمة واحدة تكفي لوصف حالة الجو الكدرة وهي كلمة عجاج التي يستعملها اهلنا الغبش المغبرين دائما بتعب الحياة . طبعا لو سالناهم لماذا ليس عجاج لاجابوا بانها عامية !
وقد وردت مفردة العجاج في شعر المتنبي كثيرا .
والعجاج كما جاء معجم لسان العرب والمعاجم الاخري :
" العجاج : الغبار ، وقيل من الغبار ما ثورته الريح واحدته عجاجة "
يقول المتنبي :
لبست لها كدر العجاج كانما * تري غير صاف ان تري الجو صافيا
وقال :
عجاج تعثر العقبان فيه * كأن الجو وعث او غبار
ويقول :
ولا سالكا الا فؤاد عجاجة * ولا واجدا الا لمكرمة طعما
- عندما ضرب التصحر سهول الغرب لم يجد اعلامنا لوصف الجدب الذي ألم بالاقليم غير كلمة جفاف وهي كلمة عامة وهنالك كلمة مخصوصة تصف الحالة وتشخصها تشخيصا دقيقا وهي كلمة ." محل " - بفتح الميم وتسكين الحاء - التي لا يزال يستعملها اهل الاقليم الي اليوم لوصف حالة الجدب والجفاف .
جاء في معجم لسان العرب ومعجم الصحاح وسائر المعاجم : " المحل : الجدب وهو انقطاع المطر ويبس الارض من الكلا . يقال بلد (ماحل ) وزمان (ماحل ) وارض محل . وامحلت الارض وامحل البلد فهو ماحل .
وقد وردت اللفظة ومشتقاتها في شعر المتنبي اكثر من مرة :
يقول :
فما بفقير شام برقك فاقة * ولا في بلاد أنت صيبها محل
ويقول :
بدا وله وعد السحابة بالروي * وصد وفينا غلة البلد الماحل
وقال :
فلما نشفن لقين السياط * بمثل صفا البلد الماحل
- العليق او العلوق او العليقة : في اللهجة السودانية : الاكل المخصص للدواب التي تستعمل في الركوب . في معجم الصحاح : العلوق ما تعلقه الابل ، اي ترعاه . والعليق : القضيم ،وعلقت الابل العضاة تعلق بالضم علقا : اذا تناولتها بافواهها . ويقال علق به علقا اي تعلق به . والمعلاق ما علق به من لحم ونحوه وكل شيء علق به شيء فهو معلاقه . ونحن نقول المعلاق بالضم ، وهو مشلعيب كبير تعلق عليه الآواني .
يقول المتنبي :
يكلفني التهجير في كل مهمة * عليقي مراعيه وزادي ربده
والربد : النعام .
ويقول :
فامسك لا يطال له فيرعي * ولا هو في العليق ولا اللجام
يطال له : من طول يطول للدابة في اللهجة السودانية : تربط الدواب في العادة في المرعي بحبل طويل نسبيا حتي تتمكن من الاكل في اكبر مساحة
- المخلاة او المخلاية والجمع مخالي : شنطة او وعاء من جلد لحمل الاغراض او لتقديم العليق للدواب
يقول المتنبي :
لساحيه علي الاجداث حفش * كايدي الخيل أبصرت المخالي
وهنا يقصد المخالي التي يقدم فيها العلوق للخيل .
ويبدو لي ان العليقة او العليق او العلوق سمي كذلك لانه يعلق في المخالي علي رقبة الدابة
- يقول أبو الطيب المتنبي:
يقول لى الطبيب أكلت شيئا * وداؤك فى شرابك والطعام
وما فى طبه أنى جواد اضر * بجسمه طول الجمام
والجمام بالفتح : الاستجمام . من استجم يستجم استجماما فهو مستجم .
والمعني ان المتنبي يقول ان الذي امرضه الاستجمام والقعود وليس تلوث الاكل والشراب . نحن نقول في كلامنا : ينجم وانجم وتنجم وهو منجم .
وفي لسان العرب : الجمام بالفتح الراحة . وجم الفرس أاجم جما وجماما : ترك فلم يركب . يقال : أجم نفسك يوما او يومين اي ارحها.
-الذين يعرفون الابار الجوفية والعد والمشيش يعرفون كلمة جم او جمام - بفتح الحاء وتشديد الميم . عندما يغيض ماء البير تترك لمدة حتي يجم ماؤها من جديد اي يزداد يقولون : البير جمت . والبير التي لا تجم تهجر وقد ورد هذا المعني في قول المتنبي مادحا سيف الدولة :
فلا غيضت بحارك يا جموما * علي علل الرغائب والدخال
جاء في شرح المصطاوي للبيت: الجموم ،الذي يزداد ماؤه حين بعد حين
وفي اللسان : الجم الكثير من كل شيء . مال جم : كثير . قال تعالى " ويحبون المال حيا جما " . وجم الشيء يجم جموما : كثر . وماء جم : كثير والجموم البئر الكثيرة الماء . وبئر جمة وجموم . قال الازهري : جم الشيء يجم جموما يقال ذلك في الماء والسير "
- يقول المتنبي في وصف الاسد :
ورد اذا ورد البحيرة شاربا * ورد الفرات زئيره والنيلا
ورد الاولي صفة للاسد شبهه بلون الورد لجامع الاحمرار
ورد الثانية من ورد الماء اذا قصده للشرب من ورد يرد ورودا . وأنا وراد اذا وردت . وهي واردة .في الصحاح : " ورد ورودا : حضر . والورد بالكسر خلاف الصدر . والورد بالكسر ايضا يوم الحمى اذا اخذت صاحبها لوقت تقول وردته الحمى فهو مورود . "
وكل هذه المعاني مستعلمة في اللهجة السودانية : نقول البنات وردن البير ، اى ذهبن لجلب الماء . والبهائم وردت الحفير وصدرن اي قفلن راجعات بعد ان شربن . من الصدور و الورود . ونقول الوردة او الوردي بالامالة اي الحمى . والمورود : المحموم
جاء لفظ ورد بمشتقاته في القرآن على هذا النحو :
قال تعالى : " ولما ورد ماء مدين وجد عليه امة من الناس يسقون " – القصص 23
وقال : " وجاءت سيارة فارسلوا واردهم فادلى دلوه " – يوسف 19
والسيارة هم العرب الرحل . في كردفان يقولون عرب سيارة
وقال : " وان منكم الا واردها كان على ربك حتما مقضيا" - مريم 71
وقال : " وبئس الورد المورود " – هود 98
الورد : بالكسر مكان الورود في الصحاح : الورد بالكسر : الجزء، تقول قرأت وردي
يتواصل
المراجع
ديوان المتنبي
ابو البقاء العكبري شرح ديوان المتنبي
عبد الرحمن البرقوقي شرح ديوان المتنبي
المصطاوي شرح ديوان المتنبي
معجم لسان العرب لابن منظور
معجم الصحاح للجوهري

أنتهى النص

صلاح سيدأحمد الغول
06-28-2012, 07:44 PM
واصل يا حبيب
وربّنا يفتَح عليك كمان وكمان
أنا من عُشاق المتني وأحفظ له الكثير
من الأشعار وبهذا البحث الجميل المتفرِّد
أكادى أصدق طُرفة المنلوج القديم
(سألوني عن المتنبي وكان في المهديّة كهربجي)
ممنون لك يا باشا وربّنا يوفِّقك ويتوِّج جهودك
الفخمة الضَّخمة بِسِفر ضَخم ينتَفع بهِ كُل أبناء وطني
يؤكِّد للجميع أصالة ثقافتنا وسماحتنا

قوس قزح
06-28-2012, 09:16 PM
مجهود مقدر يا باشا
وربنا يديك الصحة والعافية

الباشا
06-30-2012, 02:24 PM
أكادى أصدق طُرفة المنلوج القديم
(سألوني عن المتنبي وكان في المهديّة كهربجي)






الله عليك يا صلاح .... ذكرياتك حلوه

المنلوج ده متذكره وكان من ضمن المنلوجات البيحبوها الطلبه ةيطلبوا سمعاها كتير
وعلى ما أذكر هى جزء من منلوج مبنى على قصيده صوفيه مطلعها يقول

يارب بهم وبآلهم عجل بالنصر وبالفرج

اشتدي ازمة تنفرجي قد أذن ليلك بالبلجِ
وظلام الليل له سرجٌُ حتى يغشاه أبو السرجِ
و سحاب الخير له مطر فإذا جاء الإبان تجي
وفوائد مولانا جملٌ لشروح الانفس و المهجِ
ولها أرج محي أبداً فاقصد محيا ذاك الارجِ
فلربما فاض المحيا ببحور الموج مِن اللججِ


فالشباب حوروا بعض ابيات القصيده
وأذكر جزء منها يقول

والماكل ويكه انا بعرفه لانى دارس التكنلوجى
..........
وسألونى مره عن المتنبى ..

فأجبت أن المتنبى كان فى المهدية كهربجى


الكلام ده لايرضى الصفويه ... لكنها منلوجات زماااان

كلنا من عشاق شعر المتنبى وكانت اسهل مقررات الشعر علينا من شعر المتنبى

الله يديك العافيه يا صلاح ....

الباشا
06-30-2012, 02:57 PM
مجهود مقدر



يديك العافيه يا قوسنا الأكبر

بس ما قلت لينا ... انت من عشاق المتنبى واللا جرير ؟

ودى على وزن مرسى وشفيق :SnipeR (59):

الباشا
07-01-2012, 11:14 AM
ما زال البحث يورطنى فى حاجات مضحكه واتردد فى عرضها عليكم

بس دائماً تكون ليها علاقة بلهجتنا الجميلة العامية السودانية ....

حتى ولو كانت راندوك واليكم هذا الراندوك الظريف ده :


الجلك والجلكينة وهو يعني الاب والام، والتفتيحة هو الرجل الفاهم والواعي، يعرف كيف يكب (المكنات والجاكات) اي يكذب (ويحنك الفارات) اي يخدع ويغش المغفلين.. و(الجكس) هى المحبوبة..

والشتات يا فردة يعني نحن مشينا يا صديق او جرينا يا معلم نفس المعنى، والجوكي هو سواق الركشة..

اما الشمار فيعني النميمة والشاكوش يعني رفضا للمحبوب، وخمس لي اي اعطني شئ بسيط، وقال الشاعر يفكوك عكس الهواء اي يرفضوك ،

والقدة هو مثل لشخص كثير الكلام يقولوا فلان قدة ولصقة وصمغ، ويقولوا فلانة شرط للارض او شدة وغسيل عدة اى فتاة جميلة جداً.. وفلان كج وعارض اى رجل يجلب الحظ السيئ،

وفلان بلفان ومقحط، اي شخص بلا نقود. والفلوس هى الشرتيت أو الفلة أو الكنجالات او الضحاكات او التشديرة، وكلها تعني القروش.

ويقولو فلان دا حمام اي زول ضعيف الشخصية، عكسها فلان دا اصلي ومعلم وراسطا وكده(ما انت يا سيف ههه).. تعني زول قوي جداً

والجقلبة والبجبجة والحتحتة كلها أنواع من رقصات الحفلات، وفلان صبن الكيس تعني دساه

وفلان دقس واتلحس، اى خدعوه واكلوا حقوا.. وفلان عمل وهمة في شكل قلبة اى فلان اخترع شيئاً جديداً غير مألوف..

وفلان مستنكح اى زول يغش الناس. والقطع الناشف تعني الرفض والممانعة. وعصلج تعني رفض الامتثال. وفلان عملوا ليه شرحبيل اى شروه،

وعملوا منه زغبير، اى زاغوا منو. والبلف تعني الكمساري. وكلمة دامة تطلق على المرأة او الجكسوية . والمرأة تسمى عندهم الحنان والحاجة والبتاعة..

وفلان هرشناه وكحلناه عروض، اى خوفناه وارهبناه. وجضم الشئ اى اجاده واتقنه، والفطور عندنا اب دقن والعشاء هو عشمانة.. والحفلة هى طربانة

وجرَّ نور أى نظر لمدة طويلة. زول ما ناقش مسطح أي اهبل. وفلان مجنتر او فاطي سطر تعني ليس في كامل قواه العقلية. والصعوط هو الموبايل، وفلان متكل في ترطيبة متشرشح أى مرتاح.

وفلان كسح وفتح وقد سلك رقد صوف، تعني كلها الهروب، والشماسة هم الشرامة


ذى ما قلت جبتو ليكم من موقع اسمه المقرن نت

صلاح سيدأحمد الغول
07-01-2012, 02:40 PM
الشُّكر والامتنان لحبيبنا الباشا .. ياخي واصِل
ما زلتَ تُُثري ذخيرتنا اللّغويّة بالجَديد المُفيد
وأنا شخصيّاً من زمان مستهوياني أشياء
مُعيّنه في حياة الشّمّاشه ونفسي أكون شَمّاشي
ولو ليوم واحد .. الآن بعد أن أحفظ المُفردات
المُهِمّة التي أتحفتنا بها بالجَد ، كِده سَهَلتَ
علي المُهِمّه، سأتقدّم لرابطة أو نقابة الشّمّاشه
لنيل العضويّه المؤقّته .. ما عارف الجماعه ديل
بحتاجو لى واسطه ولا الواحد لازم يكون موالي
ولا كيف ؟

الباشا
07-01-2012, 03:44 PM
من زمان مستهوياني .... حياة الشّمّاشه ونفسي أكون شَمّاشي ولو ليوم واحد ..
كِده سَهَلتَ علي المُهِمّه، سأتقدّم لرابطة أو نقابة الشّمّاشه لنيل العضويّه المؤقّته ..
ما عارف الجماعه ديل بحتاجو لى واسطه ؟



طبعاً واكيد وحتماً ولابد من الواسطه
هو فى حاجه الزمن ده وفى ظل الانقاذ ما تحتاج واسطه
ده إنت لو عاوز تلبس شبشبك ( لا مواخذه يعنى )
لازم توسط رجلك الشمال عشان تسمح ليك تبدأ باليمين

وبعدين إنت فاكر المسأله بالساهل كدا ..يا شيخ صلاح
دى تعتبر من أقوى النقابات على مستوى أفريقيا والشرق الادنى والأوسط والأبعد
أولاً عشان تقدم الطلب لازم تطلع فيش وتشبيه وكرت توصيه وتزكية من ثلاثة جهات منها جهة أمنيه
وتكتب طلب على موقع التواصل الاجتماعى شماشى دوت نت مرفق به رقم بطاقتك الائتمانيه ... أومال أيه ؟!
فاكر المسأله بلوشى يعنى ؟؟؟ وحتى ولو كمان ارفقت معها رقمك السرى طلبك مش مضمون يتقبل

يا عم صلاح بلاش .... بالنظر لمواصفاتك من دلوقت أضمن ليك الرفض
إما إذا كنت مصر ( بضم الميم وكسر الصاد وتسكين الراء ) يبقى المره الجايه نعمل ليك محاوله جاده
بس كله بتمنه :SnipeR (22):

الباشا
07-02-2012, 09:14 AM
المُسْـكَاب


اللُمّْاَصــه


اللقـــــاى

الديــداب


المـاروق



الحنقوق



المُنْتباب


القليبــــه


السَــبيقه

السَفروق



http://blqees.com/smiles/smile_albums/romance/11920257896853.gif

الباشا
07-03-2012, 09:05 AM
كماااان عشرة تانيه




شبشوب


دَهَك

داحوله


تُنْقٌل


قمبر ( قمبر قمبر شيخ الطير )


أبلج


قبوره


الكيجه


مَلُودْحَه


الدحلوب


http://i6.glitter-graphics.org/pub/1648/1648976sknnsysn6s.gif

الباشا
07-04-2012, 09:17 AM
المُسْـكَاب


اللُمّْاَصــه


اللقـــــاى

الديــداب


المـاروق



الحنقوق



المُنْتباب


القليبــــه


السَــبيقه

السَفروق





شبشوب


دَهَك

داحوله


تُنْقٌل


قمبر ( قمبر قمبر شيخ الطير )


أبلج


قبوره


الكيجه


مَلُودْحَه


الدحلوب







صعبين ........ واللا أيه ؟؟

عبد الواحد محمد
07-04-2012, 04:47 PM
السفروق هو عود شجر ينجر على شكل مقوس او شكل كاف
ويستخدم في الصيد البري اذا يقذف به على الطريده فيرديها حالا صريعة..
والحنقوق هو الجزء الصلب من حافة السعفة يجمع وتعمل منه المكانس ..
الباقي باس pass

عبد الواحد محمد
07-04-2012, 04:51 PM
قمبر قمبر شيخ الطيور هو طائر له( قمبور )على راسه وذيل طويل
ويعتبر من اشباه الببغاء ويطير في مجموعات تتكون من ثلاثة الى خمس ..
القبورة هي جرادة صغيرة ..
والدحلوب هو الزير القصير ذو الفم العريض

الباشا
07-04-2012, 05:04 PM
السفروق هو عود شجر ينجر على شكل مقوس او شكل كاف
ويستخدم في الصيد البري اذا يقذف به على الطريده فيرديها حالا صريعة..
والحنقوق هو الجزء الصلب من حافة السعفة يجمع وتعمل منه المكانس ..
الباقي باس pass





قمبر قمبر شيخ الطيور هو طائر له( قمبور )على راسه وذيل طويل
ويعتبر من اشباه الببغاء ويطير في مجموعات تتكون من ثلاثة الى خمس ..
القبورة هي جرادة صغيرة ..
والدحلوب هو الزير القصير ذو الفم العريض



ما قصرت طب يا جنابو .......

تلااااااااااااااااته ونُسْ من عشرين


كدى حاول تانى ............


وينكم يا جماعة ؟

القوس ... صلاح ....

ودإبراهيم (ياخوى إنت زعلان مننا واللا شنو؟ ياسيدى ليك اليرضيك ..آمر...تدلل)

البركلاويه .... الجنون


والجميع .........

يعنى ....... فى كلمات كتيره ساهله

مهيره
07-06-2012, 08:31 PM
قبوره

انا البعرفو انو القبور هو الجراد
وبسمع برضو ب(عذاب قبوره):D
فياربي اسه قبوره دي جراده ولا كيف:icon17:
طيب العذبها شنو ياربي ما تكون كانت بتحب ليها قبور واداها شاكوش ولا شي؟:D
:D
وطبعا باقي الكلمات يخربني ان كان عرفتا وحده فيهن..وقالو القال ما عارف افتي برضو:004:

عندي ليك اقتراح يا عمي الباشا ممكن تنزل لينا الكلمات بي بشيش بي بشيش
يعني كل مره تلاته كلمات مثلا عشان نقدر نتزكرهم ونستوعبهم لانو الكلمات الكتيره تجوط الراس
وانا معااااااااااااااك في البوست ده طوالي والمابنعرفو بنقوقلو لامن نجيب خبرو :D

مهيره
07-06-2012, 09:04 PM
اهن انا حاضيف ليكم شويه انداندي
الانداندي هي رطانه الدناقله
طبعا انا دنقلاويه صناعه تايوان يعني مابعرف ارطن لكن بعرف لي شويه كليمات
قعد اقشر بيهم محل ما امشي
لكن انا ساعيه سعيا حثيثا صادق الوعد مهزلم الابعاع:D
انو اتعلم الرطانه بعد العمر ده:SnipeR (81):
وان شااااااااااااااء الله ربنا يسهل لي واتعلمها
ده تراث اجدادنا لازم نحافظ عليهو:SnipeR (59):

مهيره
07-06-2012, 09:16 PM
كمبووووو= انتو كويسين؟؟؟
سريناقمندو= كيف الحال
خيروو= مع السلامه

الباشا
07-07-2012, 08:58 AM
انا البعرفو انو القبور هو الجراد
وبسمع برضو ب(عذاب قبوره):D
فياربي اسه قبوره دي جراده ولا كيف:icon17:
طيب العذبها شنو ياربي ما تكون كانت بتحب ليها قبور واداها شاكوش ولا شي؟:D
:D
عندي ليك اقتراح يا عمي الباشا ممكن تنزل لينا الكلمات بي بشيش بي بشيش
يعني كل مره تلاته كلمات مثلا عشان نقدر نتزكرهم ونستوعبهم لانو الكلمات الكتيره تجوط الراس
:D


بللول بَدُور أسعلك سُعال ..... إنتى كنتى لابده وين من زمان ؟ يا مهيره يا بت الباشا ؟

أولاً صااااااح ... القبور هو الجراد .... والقبوره هى الجراده مش كدا برضو ؟ وكدا انتى أخدتى 10 من عشرين .... ما فينا زعل يا عبدالواحد ... فاكر القوس لما أدى جنون عشره مشاركات تشجيعيه وأخدت بموجبه الوسام .... فالشى بالشى يذكر ... وعمك استأذن القوس برضو فى العشره دى ... وكمان هو من عنده أداها عشره ... يعنى مهيره كدا تكون أخدت عشرين من عشرين .... ما قلنا مافينا زعل :004::bleh:

نجى لتانى ... إنتى عارفه يا مهيره انه لو قعدنا نديها بالتلاته والاربعه كلمات يكون البوست دة محتاج لسبعه وسبعين سنه عشان يخلص .... وبعدين سلامتك من جوطة الراس فى الحقيقه المعدل هو عشره عشره وافتكر العشره معقوله ... بس مرات العشره تقعد كم يوم وماحد يدخل يفسر وانا عاوز الناس تشارك ... فمرات بنحرق منهم وإيدى بتاكلنى عليهم أروح خاتى عشره إضافيه كيتاً فيهم ... ولو رجعتى شويه فى البوست تلقينى فى مره قفلت معاى رحت منزل ليهم فوق الخمسين كلمه دفعه واحده لما فرقعت راس مديرنا العام ... وأساليه

الباشا
07-07-2012, 09:31 AM
الانداندي هي رطانه الدناقله
طبعا انا دنقلاويه .. تايوان
ساعيه .... انو اتعلم الرطانه بعد العمر دهhttp://www.marafi-alebda.com/vb/images/smilies/SnipeR%20%2881%29.gif
ده تراث اجدادنا لازم نحافظ عليهو http://www.marafi-alebda.com/vb/images/smilies/SnipeR%20%2859%29.gif




كمبووووو= انتو كويسين؟؟؟
سريناقمندو= كيف الحال
خيروو= مع السلامه



من لحظة ما فكرت فى البوست ده وأنا فى راسى اتعلم تلاته أربعه لهجات سودانيه بصفه خاصه .... كنت اتمنى أعرف حلفاوى أو محسى لانى عندى جذور محسيه بس مش رطانيه ... الليهُمْ محس العيلفون وتوتى يعنى مش من أنديهم لكن من عندنا ..... واللهجه التانيه لهجة الدينكا ( ليه ؟ مش عارف :shutup: ) ... واللهجه التالته الإنداندى على قولك يا مهيره ودى أول مره أعرف أنه لهجة الدناقله إسمها الإنداندى ... يابتى الواحد لما ينطق الكلمه ذااااتها ... يحس بلسانه إنعوج ونفسه إنقطع ... الحكايه شنو لازم تحبكوها كدا ؟ فمادام إنتى إنداندى مييد إن تايوان .... يبقى تمام التمام وعز الطلب ... يعنى إنتى تتعلمى من الكبار الحواليك وتعلمينا معاك ... دكووووور ؟ ! ( دى فرنسى ما تفتكريها محسى ) ... نجى للكلمات الإندانديه ( بكررها عشان تلزق ولسانى ينطرح شويه ) ... تقومى تكتبى فى ورقه خارجيه الكلمات العاديه المستخدمه بصفه يوميه وحأديك مثال بعد شويه ... أها تقومى يا ست اللمنتى ليك ( بعدين بعدين أشرح ليك يعنى شنو ست اللمنتى ليك ...كلهم زيك مسطحين لهجة عاميه سودانيه ) تقومى تسألى ماما أو خالاتك الكبار طبعاً لانه الفى عمرك أكيد كلهم ميد إن هونج كونج أو المنطقه الصناعيه بحرى .... وكدا إنتى تتعلمى من الكبار وتعلمينا إنداندى ( صدقى سلكت معاى ونطقتها سااااهله )

الكلمات المطلوبه لتحول إلى الإنداندى :

السلام عليكم
صباح الخير
أهلاً وسهلاً
شكراً جزيلاً
إفتقدناك
عاوز أشرب
عاوز آكل
رحت مشوار
راجع ليكم
عاوز اتعلم

وعشان الحكاية تكون أحلى والواحد يتعلم بسرعه وكنوع من الإختبار تقومى إنتى تلخبطى الكلمات وتمتحنينا فيها وأديك مثال بالتلاته إنداندى حقتك البديتى بيها فوق

كمبووووو= كيف الحال
سريناقمندو= مع السلامه
خيروو= انتو كويسين؟؟؟


كدا بالظبط ........ أها رايكم شنو يا جماعه ؟

مهيره
07-07-2012, 09:55 AM
من لحظة ما فكرت فى البوست ده وأنا فى راسى اتعلم تلاته أربعه لهجات سودانيه بصفه خاصه .... كنت اتمنى أعرف حلفاوى أو محسى لانى عندى جذور محسيه بس مش رطانيه ... الليهُمْ محس العيلفون وتوتى يعنى مش من أنديهم لكن من عندنا ..... واللهجه التانيه لهجة الدينكا ( ليه ؟ مش عارف :shutup: ) ... واللهجه التالته الإنداندى على قولك يا مهيره ودى أول مره أعرف أنه لهجة الدناقله إسمها الإنداندى ... يابتى الواحد لما ينطق الكلمه ذااااتها ... يحس بلسانه إنعوج ونفسه إنقطع ... الحكايه شنو لازم تحبكوها كدا ؟ فمادام إنتى إنداندى مييد إن تايوان .... يبقى تمام التمام وعز الطلب ... يعنى إنتى تتعلمى من الكبار الحواليك وتعلمينا معاك ... دكووووور ؟ ! ( دى فرنسى ما تفتكريها محسى ) ... نجى للكلمات الإندانديه ( بكررها عشان تلزق ولسانى ينطرح شويه ) ... تقومى تكتبى فى ورقه خارجيه الكلمات العاديه المستخدمه بصفه يوميه وحأديك مثال بعد شويه ... أها تقومى يا ست اللمنتى ليك ( بعدين بعدين أشرح ليك يعنى شنو ست اللمنتى ليك ...كلهم زيك مسطحين لهجة عاميه سودانيه ) تقومى تسألى ماما أو خالاتك الكبار طبعاً لانه الفى عمرك أكيد كلهم ميد إن هونج كونج أو المنطقه الصناعيه بحرى .... وكدا إنتى تتعلمى من الكبار وتعلمينا إنداندى ( صدقى سلكت معاى ونطقتها سااااهله )

الكلمات المطلوبه لتحول إلى الإنداندى :

السلام عليكم
صباح الخير
أهلاً وسهلاً
شكراً جزيلاً
إفتقدناك
عاوز أشرب
عاوز آكل
رحت مشوار
راجع ليكم
عاوز اتعلم

وعشان الحكاية تكون أحلى والواحد يتعلم بسرعه وكنوع من الإختبار تقومى إنتى تلخبطى الكلمات وتمتحنينا فيها وأديك مثال بالتلاته إنداندى حقتك البديتى بيها فوق

كمبووووو= كيف الحال
سريناقمندو= مع السلامه
خيروو= انتو كويسين؟؟؟


كدا بالظبط ........ أها رايكم شنو يا جماعه ؟


باللحيييييييييييل داكوووور داكورن شديدن
ومعاها بنجور ولابغي فرنسي وهولاند زااااااتو
انا من ايدك دي لايدك دييييك يا ماي اونكل
انا زييييييييييك كده بحب اتعلم اللهجات واللغات هوايه كده من يومي الكنتا في اللفه:SnipeR (81):
واللفه هنا ظرف زمان وليس مكان يا ناس الكلاكله ماتحمرو لي:D
اها بالنسبه للانداندي انا والله زاتي كنتا دايره لي زول يشجعني
وانا جااااااااهزة جهوزيه تامه بورقتي وقلمي تلميذه مجتهده ومنكربه وقاعده في الصف القدام ورابطه الحزام:D
اهن البوست ده انا خلااااس اتحكرتا واتسمكرتا فوقو تاني علا هو اكان يقوم يفارقني
فراق الطريفي لي جملو الزليفي:D:D

!!!

المبارك ابراهيم
07-07-2012, 01:22 PM
المُسْـكَاب
(المسكاب ده تفل المريسة بعد ما يصفوها)


اللُمّْاَصــه
(اللماصة بتاعت عجين الآبري)


اللقـــــاى

الديــداب
(الديداب طريق ضيق في الحواشات أو الغابة)


المـاروق
(الماروق حاجة كده تتبع للقناديل بتاعت الذرة)



الحنقوق
(الحنقوق ده آخر عود تربط عليه الراكوبة)



المُنْتباب


القليبــــه
(القليبة بتاعت السلك بختوها في الكانون)


السَــبيقه

السَفروق
(السفروق كما ذكرة أخي عبد الواحد وبرضو ملاح)



http://blqees.com/smiles/smile_albums/romance/11920257896853.gif


الما هبشتهن ديل ماني عارفهم إن شاء مرور بس كفانا.

المبارك ابراهيم
07-07-2012, 01:35 PM
كماااان عشرة تانيه




شبشوب
(باص)


دَهَك
(باص)

داحوله
(باص)


تُنْقٌل
(باص)


قمبر ( قمبر قمبر شيخ الطير )
(طائر جميل عليه قنبور قنبوره مع منقارو زي طورية حفر القبور)
(الهدهد)


أبلج
(باص)


قبوره
(كما قال الإخوة بس هي جرادة صغيرة مش الكُدُم)


الكيجه
(الكيجة أو الكاجة هي حزمة من القصب بتكون متعارضة لتربط بها حبال القطية)


مَلُودْحَه
(ملودحة يعني الأرض فيها لدحة قربت تنشف وما نشفت يعني يعني تصبر عليها شوية عشان تحش القش.)


الدحلوب
(الدحلوب علي وزن الدغلوب وهي عبارة عن بُرمة متوسطة الحجم يخمر فيها العجين وتارة يسخن فيها اللبن زي الكتوش)


http://i6.glitter-graphics.org/pub/1648/1648976sknnsysn6s.gif


أنا بكره إسرائيل وبحب الباشا

مهيره
07-07-2012, 02:51 PM
الديــداب
الكلمه دي اسه اتزكرتها هي الطريق البتمشي بيهو البهايم
اظظظظظن كده
وطيب الديدبان ده مش نوع من الزواحف ولا ياهو الدبيب ولاشنو كان؟
غايتو في معلومه حايصه جوه راسي وهي زاتها راسها لافي ما قادره ترسي
ياهو ولا كيف آعمي الباشبزق!!
تعرفو الباشبزق؟؟
حاديكم دليل حميد الله يرحمو قال شنو:
ما شلنا جمرك .. وإنطفا جوانا نارك .. والمطر
جايين بالكتابة .. وضربة الناس المهابة
لو هز نخلك باشبزق
ما غادرت تمرة السبيط
!!!
اها عرفتوهو؟؟

الباشا
07-07-2012, 03:44 PM
الما هبشتهن ديل ماني عارفهم إن شاء مرور بس كفانا.

المبارك ..... والله مشتاقين ووحشتنا الطله الحلوه دى .....
مش بطال يا شيخ المبارك برضو اربعه من عشرة خير وبركه ....
خلينى اشوف ليك العشره التانيه عملت فيها شنو ؟
شكلك والله أعلم هدوا فيك ناس الشهاده والعمل الطيب

الباشا
07-07-2012, 03:49 PM
أنا بكره إسرائيل وبحب الباشا



أيييييييييييييييييييييييييييييييييييييييييييه .......

والباشا هوكمان ... بموت فى ود إبراهيم .. أيييييييييييييييييييييه
التلاته ونس جبتهن يا المبارك الهميم ... أيييييييييييييه

الباشا
07-07-2012, 03:57 PM
الديــداب
الكلمه دي اسه اتزكرتها هي الطريق البتمشي بيهو البهايم
اظظظظظن كده
وطيب الديدبان ده مش نوع من الزواحف ولا ياهو الدبيب ولاشنو كان؟

تعرفو الباشبزق؟؟
حاديكم دليل حميد الله يرحمو قال شنو:
ما شلنا جمرك .. وإنطفا جوانا نارك .. والمطر
جايين بالكتابة .. وضربة الناس المهابة
لو هز نخلك باشبزق
ما غادرت تمرة السبيط
!!!
اها عرفتوهو؟؟





الديداب هو درب ملولو ممشى بالكرعين أو الدواب دائماً يكون شاقى إما زراعه أو نجيله أو ساحه
أما الديدبان ده فسألى منو عمك جنابو عبدالواحد ... أكل ديدبانات لما قال بس ....


الباشبزق دا أظنو كان وظيفه عاليه عند الاتراك ..... البعرفوا أنه بيشفط قهوة تركى كتيييير وبس ... تانى بيسوى شنو مش عارف ....

المبارك ابراهيم
07-07-2012, 05:32 PM
الباشبزق دا أظنو كان وظيفه عاليه عند الاتراك ..... البعرفوا أنه بيشفط قهوة تركى كتيييير وبس ... تانى بيسوى شنو مش عارف ....


الباشبزق // هم الجنود الغير نظاميين في الجيش.

المبارك ابراهيم
07-07-2012, 05:44 PM
الليلة بتطيرواااااا ويييييييين؟؟؟
,,,,,,,,,,,,,,,,,,,,,,,,,,,,,,

الشُرُنْقاقة
,,,,,,,,,,
الشرقانية
,,,,,,,,,,
الشًاروقة
,,,,,,,,,,
الطًايوقة
,,,,,,,,,,
السًافوتة
,,,,,,,,,,
السًفاية
,,,,,,,,,
الأنداية
,,,,,,,,,
الخُرتاية
,,,,,,,,
المِحَاية
,,,,,,,,,
الغوغاية
,,,,,,,,
إحتمال تكون هنالك كلمة كلمتين سبق ذكرهم والله أعلم.
.................................................. ....................

مهيره
07-07-2012, 08:00 PM
الشُرُنْقاقة
كندو؟
الشرقانية
احتمال تكون من الشرقه وذلك عند التعجل في الاكل واللهط بمعدل عالي والكلام في آن واحد
الشًاروقة
كندو؟؟
الطًايوقة
انا بعرف الطايوق غايتو هو النخاع بتاع الخروف وبيكون دهيييين كده وبينضفو بيهو الدوكه الطايوقه دي مرتو يمكن!!
السًافوتة
بعرف الساخوته اي العوه والمنضمه الكتيره البلا طعم يصاحبها صداع شديد للمتلقي!! ..السافوته آبعرفها
السًفاية
يمكن تكون تصغير للسفه ؟؟
الأنداية
الاندايه دي مش محل كرستال البلح ولا كيف؟
الخُرتاية
اييي باللحيل بعرفها شنطه من القماش كنا زمان بنشيلها لمن نمشي الخلوه
المِحَاية
يا شيخ اب عصايه ..اكتب محايه..لحبيب قسايا..ولا ماياها!!
الغوغاية
احتمال تكون من الغوغاء وهم الناس الماعندهم موضوع ولغلاغين في الفاضي ومخهم زاتو فاضي
اليس كذلك؟

ملحوظه :
كندو بالانداندي يعني..انا شن عرفني؟؟؟

الباشا
07-08-2012, 12:45 PM
معليش يا المبارك أخوى
برجع شويه وراء ... اكمل باقى تفسيرك وراجع ليك مع نا س " كندو " ديل


المُسْـكَاب
(المسكاب ده تفل المريسة بعد ما يصفوها)

وأزيد شويه فهو يعتبر غذاء جيد للبهائم وكمان مدر للبن ومش كدا وبس البقره من تاكلو ما بتكون محتاجه " محويب " وما حترفسك لانها بتكون كاجنه حبتين و كمان الغنمايه تنسى جناها فى مافى مش مشكله أحلب وإنت مطمئن ....

اللُمّْاَصــه
(اللماصة بتاعت عجين الآبري)
هى المويه المخلوطه بالعجين يعنى تقدر تقول غسول ماعون العجين أو باقى العجين المتفل وكمان برضو بيدوهو للغنم والبقر تشربو ... بس طبعاً مش ذى المسكاب ... هنا إنت محتاج للمحويب ... والبهم لزوم در اللبن ...

اللقـــــاى
اللقاى يا المبارك هو ماعون نضيييييف يرقش نخته تحت الزير خاصة أيام البحر ما يبقى دميره يعنى أيام الفيضان المويه بتكون متعكره شديد ... ولما نعمل بيها الشاي ما بيظبط معانا يعنى بالتعبير العلمى هو " ترشيح " للمويه العكره من خلال مسامات الزير فتنزل مويه صافيه بنسميها موية اللقاى ... الناس العندهم مرض الكلى " حماكم الله " يشربوا منها والناس كيفيين الشاى ما يشربوهو إلا من تحت اللقاى ....
الديــداب
(الديداب طريق ضيق في الحواشات أو الغابة)
تم شرحه وقلنا أنه طريق ممشى بالكرعين ويكون شاقى زراعه ، نجيله ، ساحه وبرضو ذى ما قالت مهيره ... طريق أو مسار للبهائم والدواب بصفه عامه

المـاروق
(الماروق حاجة كده تتبع للقناديل بتاعت الذرة)

لا .... الماروق عند ناس البحر هو السماد وده مهم جداً للبطيخ ... أحلى بطيخ هو المعمول ليه ماروق وبصفة خاصة السماد الطبيعى والمكون من ( فضلات الطبيعة الحيوانيه والبشريه ) وما تقول لى ييييييع ..... جرب كدا بطيخه ماروق طبيعى organic يعنى وبطيخ سماد مصنع وشوف الفرق ...

الحنقوق
(الحنقوق ده آخر عود تربط عليه الراكوبة)
الحنقوق سبق لعبدالواحد تفسيره وهو طرف سعف النخيل القوى وده يصنع منه المقاشيش


المُنْتباب
المنتباب يا المبارك هو ذى الفاس ... بس بيبقى أكبر فى الحجم وإتجاه السكينه حقتو متعارض بمعنى .... الفاس السكينه فى اتجاه العود ... لكن المنتباب متعارض وعكس اتجاه العود ... يستخدم فى عدة اغراض ممكن تحفر بيه ممكن تبربح بيه شجر أو نبته طويله ...

القليبــــه
(القليبة بتاعت السلك بختوها في الكانون)
القليبه هى بت عم الخُرج ... بس القليبه شكلها ذى الطاقيه ... بس طبعاً كبييييره تستخدم فى حمل الماروق أو الزباله البليسوا بيها بيوت الطين .. تتخت على ضهر الحمار وتملاها بالكوريق ... وانت ماشى وراء الحمار لازم تمسك فى القلبيه ... ليه بقااا ؟ عشان حتتقلب وتشتت الشى الجواها ومن هنا جاء اسمها القليبه ... وكمان لانها سهله عند التفريغ ماعليك الا تمسك جانب واحد - لما تصل البكان - وترفعوا لفوق وتروح قالب الزباله أو الماروق على الارض او البكان ...

السَــبيقه


السبيقه هى المدماك عند البنايين ... بالمناسبه 90 % من بيوت الجزيره بنوها اهلنا الشوايقه وما كان حد يستجرأ وينافسهم فى البنا ... ودى مسأله معروفه تماماً فى الجزيره زمااااان طبعاً لانه دلوقت مافيش بنا بالطين ... كله طوب وأخيراً ظهر البلوكات كمان ...

السَفروق
(السفروق كما ذكرة أخي عبد الواحد وبرضو ملاح)
مظبوط كما ذكر عبدالواحد سابقاً فهو عود معكوف يستخدم لصيد الطيور ... وأزيد بأنه يستخدم لصيد الأرانب أو الغزلان أو تهويش البهائم لتغييير اتجاهها وكمان ملاح أخضر يا حلاتو بالكسره أو القراصه

وجاييك للعشره الاولى الصعبه

الباشا
07-08-2012, 01:48 PM
شبشوب
الشبشوب عند أهل البطانه هو الجمل السريع الحركه .. وباين من الحروف ونطقها أنها صفه لشى يمشى بسرعة ذى إرتدائك شبشب ( دى من عندى ) يعنى بتخيل كدا ، أما سر تسمية الجمل السريع بالشبشوب ..... فأسالوا أهل البطانه هم أدرى ....



دَهَك
برضها كلمة بطانه وتعنى الطحن أو الوطأ ... وهى كمان مرتبطة بالجمال لان الجمال ليها أخفاف ( جمع خف ) مكان وطيتها واضحه وكمان إذا وطت شى تطحنه طحن وكمان لو تلاحظوا فالكلمه قريبه من الدعك والدك ....


داحوله
الكلمه رباطابيه بحته وهى تعنى المره أو السيده أو الحرمه الحركتها تقيله والرباطاب معروفين بخفة الدم عشان كدا المره ام حركتن تقيله دى بدحلوها ( شفتوا كيف ! اها انا فهمتها كدا ) ... والحركه التقيله مش دلاله على السمنه والاكتناز .. بس ممكن تكون عاده أو تقاله وبرضو مس تقالة دم لكنها راسيه ورزينه وماليه مركزها ....



تُنْقٌل
التنقل كما ذكر عبدالواحد هو حوض الماء ممكن يكون من الخشب ممكن يكون من الحديد يمكن يكون بلاستيك المهم حوض كبير يملىء بالماء لشرب البهايم .....



قمبر ( قمبر قمبر شيخ الطير )
(طائر جميل عليه قنبور قنبوره مع منقارو زي طورية حفر القبور)
(الهدهد)
صاح هو ببساطه الهدهد .... والهدهد تم ذكره فى أغنيه الفنان الراحل عبدالدافع عثمان لما غنى لحنتوب الجميله وقال : النيل ليها شامه والهدهد علامه : وفعلاً عمكم له الفخر أنه يكون خريج هذا الصرح التعليمى الخالد وفعلاً الهدهد من الطيور التى لا تفارق اشجار وغابات حنتوب الجميله وكنا نلبس هذا الشعار ونحن فخورين به وما زلنا ....

أبلج
هى صفة الشخص المشرق الوجه ... وجايه من الانبلاج وهو صفه مرادفه للنور وخاصة نور الصباح مش بيقول ليك إنبلاج الصبح ... هى دى الأبلج وطبعاً عكس المكفهر اعاذنا الله واياكم منه ... فرق كبير أنك تصابح وجه أبلج من غيره الدنيا نفسها تنفتح أمامك .. واللا مش كدا ؟؟


قبوره
(كما قال الإخوة بس هي جرادة صغيرة مش الكُدُم)
تم شرحها باسهاب والقبوره عندنا فى الجزيره هى الجراده بشكلها الطبيعى أو الحجم الطبيعى لكن لكما تكون كبيره و ضخمه بنقول عليها كُدُم .... وياما لعبنا بالكدم ... وبالمناسبه فى الخليج الناس بتاكل الجراد بشهيه وبيقولوا عليه " حمام البر المشوى " ووجبه نادره زى وجبة الضب .....


الكيجه
(الكيجة أو الكاجة هي حزمة من القصب بتكون متعارضة لتربط بها حبال القطية)
الكيجه يا المبارك هى الكوجره عندنا فى الجزيره والكلمه دى غرباويه بحته وتعنى الراكوبه البيطبخوا فيها الاكل أيام المناسبات ذى الاعراس والبكيات وحتى الطهور كمان ... وحزمة القصب هى الكُليقه ...


مَلُودْحَه
(ملودحة يعني الأرض فيها لدحة قربت تنشف وما نشفت يعني يعني تصبر عليها شوية عشان تحش القش.)
أديتك فيها نص يا المبارك لانك جبت جزء من المعنى والصحيح أن الملودحه هى شجره لا خضراء ولا هى يابسه يعنى بين بين ... ونوع الشجر ده فى الغالب ينبت فى البيئة الجافه قليلاً وليس صحراويه بحته ... يعنى فى الوديان خاصة فى الفتره النصفيه من الخريفين ... يعنى فترة بين خريف وآخر ... فالشجر مازال فى خضرته لكنه يبدأ يجف بسبب قلة المويه ...

الدحلوب
(الدحلوب علي وزن الدغلوب وهي عبارة عن بُرمة متوسطة الحجم يخمر فيها العجين وتارة يسخن
فيها اللبن زي الكتوش)

مظبوط كلامك وميه ميه يا المبارك

ويديك الف عافيه وتستاهل باقة الورد الحلوه دى


http://i6.glitter-graphics.org/pub/1648/1648976sknnsysn6s.gif

مهيره
07-08-2012, 04:47 PM
كلام سمح باللحيل آعمي الباشا
كده زخيرتنا التراثيه زادت عشرين كلمه
يديك العافيه يا عمي
...
اها يا جماعه الخير
فسرو لينا الونسه دي
بين فلان وفلتكانه:

قالت ليهو : ود الجمد مجمود
قال ليها: بت التصوت بالعود
قالت ليهو : ود التكيتو مليتو
قال ليها: بت التقد البيتو
!!!!

صلاح سيدأحمد الغول
07-08-2012, 09:44 PM
كلام سمح باللحيل آعمي الباشا
كده زخيرتنا التراثيه زادت عشرين كلمه
يديك العافيه يا عمي
...
اها يا جماعه الخير
فسرو لينا الونسه دي
بين فلان وفلتكانه:

قالت ليهو : ود الجمد مجمود
قال ليها: بت التصوت بالعود
قالت ليهو : ود التكيتو مليتو
قال ليها: بت التقد البيتو
!!!!

الكلام ده يا سِتّي مهيره Sounds like Arabic
ولا برضو بى لُغة الأشانتي أقصُد الإنداندي ؟
بعدين يا مهيره لُغة المحَس إسمها شنو؟
وبتختلِف كتير مِن لُغة الدناقله ؟
باقي أنا محسي تايواني جِداً جِداً وحبوبةً كمان

الباشا
07-09-2012, 08:46 AM
كده زخيرتنا التراثيه زادت عشرين كلمه

قالت ليهو : ود الجمد مجمود
قال ليها: بت التصوت بالعود
قالت ليهو : ود التكيتو مليتو
قال ليها: بت التقد البيتو
!!!!



ده إسمو كلام يا مهيره يا بتى ؟؟؟

عشرين كلمه كيف يعنى ؟ البوست ده عاوزين نخليه توثيق للهجه العاميه السودانيه

وحتى الآن ما أحصيت عدد الكلمات الفيه لكن إحتمال يكونوا فاتو خانة الألف كلمه

الحمد لله المشاركات فيه باقى ليها عشرين مشاركه وتكمل الألفيه الأولى

أما المشاهدات فاقتربت من 22000 مشاهده

وده رقم صعب ونادر فى المنتديات ..... ولسه القادم أحلى إن شاء الله

يبقى لازم تمسكى السفير من إيديتو و تتفرغوا كم يوم كدا تفرغ تام

وتغوصوا فى البوست دا - بس مش على حساب الماجستير - يا نطاسه

وبعد ما تشبعوا تَبْ ... ورونى رأيكم شنو بصفه عامه ... المِتِلْكُم يُحترم رأيهم

ويديكم الف عافيه

الباشا
07-09-2012, 08:58 AM
بعدين يا مهيره لُغة المحَس إسمها شنو؟

باقي أنا محسي تايواني جِداً جِداً وحبوبةً كمان


لهجة الدناقله إسمها الإنداندى

ولهجة المحس إسمها (من أندينا) :SnipeR (37):

وبعدين ياخى أيه الجمال والحلاوه دى ؟!

وأنا أقول الزول ده أنا بريدوا كدا ليه ؟

أتريك من أندينا ....... والله أنا فخور بيك يا صلاح

طبعاً تعرف أنه المحس كمان ليهم فرع - بس مش رطانه

وهم محس توتى وبرى والعيلفون والدبيبه

أها من طرف الوالده (الله يطول عمرها ويديها الصحه)

فخور بإنتمائى لمحس العيلفون والدبيبه

الشيخ إدريس ود الأرباب راجل العليفون جدى

والأستاذ القامه المرحوم / أحمد المصطفى من محس الدبيبه و فى الحسبه خالى

( كدى تمعن قوى فى صورة الباشا الفوق دى... مافيها شبه للأستاذ؟( لى طولة العمر) مش بيقولوا كدا )
(وكمان بيقولوا فى المثل الجنا خال ؟ )

ويا أهلاً بكل الناس الحلوين ( المن أندينا )

مهيره
07-09-2012, 04:26 PM
ده إسمو كلام يا مهيره يا بتى ؟؟؟

عشرين كلمه كيف يعنى ؟ البوست ده عاوزين نخليه توثيق للهجه العاميه السودانيه

وحتى الآن ما أحصيت عدد الكلمات الفيه لكن إحتمال يكونوا فاتو خانة الألف كلمه

الحمد لله المشاركات فيه باقى ليها عشرين مشاركه وتكمل الألفيه الأولى

أما المشاهدات فاقتربت من 22000 مشاهده

وده رقم صعب ونادر فى المنتديات ..... ولسه القادم أحلى إن شاء الله

يبقى لازم تمسكى السفير من إيديتو و تتفرغوا كم يوم كدا تفرغ تام

وتغوصوا فى البوست دا - بس مش على حساب الماجستير - يا نطاسه

وبعد ما تشبعوا تَبْ ... ورونى رأيكم شنو بصفه عامه ... المِتِلْكُم يُحترم رأيهم

ويديكم الف عافيه


سلامات ياعمي الباشا
كيفنك..لعلك طيب و الله مشتاقين باقي طولتا ما صادفتك:rose:
الايام دي شغاله محاضرات تقيله الفتره الصباحيه عشان كده ماقعد ألم في ناس فترة الصباح والظهيره
وشكلك منهم لانو ماقعد اشوفك بالمساء موجود
اها والله ياعمي البوست ده فيهو درر وتراث مكثف وداير قعده بمزاج عشان ارجع للصفحات الورا
اسه حاليا انا مركزه معاكم من الصفحتين الاواخر ديل
وان شاء الله بشويه شويه القط كلمات جديده من المشاركات القديمه
لكن البوست رااائع شديد ومفيد وقيم جدا
ربنا يديك العافيه وتوصلو الالفيه المياويه:thumbup1:
اها السفير مابعرفو غاتس وين هو زاتو زول ماهين في المصطلحات التراثيه
وممكن يضيف للصفحه اكان قال بسم الله وقعد:SnipeR (81):

آخر المداد:
تسري النسايم عذبة
وأنا أهيم بلا ملال
وتقودني الآمال في
دنيا المباهج والخيال
وهناك أرقد في الرمال
ولا ارى غير الرمال
!!!

مهيره
07-09-2012, 04:56 PM
الكلام ده يا سِتّي مهيره Sounds like Arabic
ولا برضو بى لُغة الأشانتي أقصُد الإنداندي ؟
بعدين يا مهيره لُغة المحَس إسمها شنو؟
وبتختلِف كتير مِن لُغة الدناقله ؟
باقي أنا محسي تايواني جِداً جِداً وحبوبةً كمان


اهلااااااان استاذنا الغول
(مسكاقرو)..بالمحسي يعني كيف الحال
والله علمي علمك لغه المحس مابعرف اسمها شنو لكن بسمع انها فيها كلمات مشتركه مع الانداندي
لكن والله يا استاذ انا انصحك تحاول تتعلم ولو جزو من رطانتكم لانو الناس لازم تحافظ علي تراثها ما معقول لغه كااااااااااااامله تندثر وتتنتهي بالسهوله دي:no:
و انا شايفه المحس اكتر ناس بيحبو الرطانه حتي شفعهم بيرطنو!!
...
الكلام الفوق ده عندو قصه سمممممحه وطريفه شديد
كدي النشوف اعمامي ديل ان كان مافي زول عرفها حاحكيها ليكم
!!!

آخر المداد:
يا سيِّدَ الشِعرِ المُعبَّقِ بالمخاضاتِ الخصيبةِ
وانتباهاتِ الحروفِ الغافيات
يا مانحَ الصُوَرِ الكئيبةِ لونَها
ألَقَاً وروحاً وانفلات
يا سيَّدَ الكلماتِ
يا ألَقَاً يُحوِّمُ في ضفافِ الناسِ
يمنحُ كُلَّ ما يلقَى شذىً
بالحرفِ يرسِمُ بوصلاتِ الحُبِّ
في كُلِّ الجهاتْ
!!!

بركلاويه
07-09-2012, 05:24 PM
كلام سمح باللحيل آعمي الباشا

كده زخيرتنا التراثيه زادت عشرين كلمه
يديك العافيه يا عمي
...
اها يا جماعه الخير
فسرو لينا الونسه دي
بين فلان وفلتكانه:

قالت ليهو : ود الجمد مجمود
قال ليها: بت التصوت بالعود
قالت ليهو : ود التكيتو مليتو
قال ليها: بت التقد البيتو

!!!!



انا كل يوم احوم بى جاااااي
عشان اعرف المعنى
وينكم ؟؟؟؟
الكلام الفوق ده مدح ولا ذم
الحقوووونا
تحياتي :rose::rose::rose:

الباشا
07-10-2012, 09:09 AM
انا كل يوم احوم بى جاااااي
عشان اعرف المعنى
وينكم ؟؟؟؟
الكلام الفوق ده مدح ولا ذم
الحقوووونا
تحياتي :rose::rose::rose:


مرحبتين حبااااااب بت البركل ... غيبتك طولت علينا بالحيل
دا يا بت الاكارم لاهو مدح راسو عديل
ولاهو ذم راسو عديل

كل ما أقراهو يطلع لى بى معنى مختلف .. حيرنى ذى ما حيرك

بس ضنيتو غزل ونقار ( فى آن واحد) بين مرا وراجل وكت ترضى عنه
تقول ليهو : ود الجمد مجمود
إت الفارس الصلد سليل الفرسان الصامدين

يرد يقول ليها: بت التصوت بالعود
إتى بت الكرم وبيت الاجاويد الفيه الخير والجاهزين لى كُفات الضيفان

ترد تقول ليهو : ود التكيتو مليتو
إت ولد الاجاويد البتكو الضبيحه وبدل الضبيحه الواحده بيسلخوا العشرات

يرد يقول ليها : بت التقد البيتو
إتى مافى بتلك منورانى وواقدا حياتى وماليه بيتى بطلتك وهلتك ونورك


أهااا وكت تطنقر وتمد البوذ شبرين .. تعاين ليه بجنب كدا ...
وتقول ليهو : ود الجمد مجمود
إت يا البخيل يا تقيل الدم ترب اليهود جايب لى الهم

يرد يقول ليها: بت التصوت بالعود
إتى بت المره الصواته خرابة البيوت

ترد تقول ليهو : ود التكيتو مليتو
إت ود الحراميه واللصوص سراقين العيوش

يرد يقول ليها : بت التقد البيتو
إتى فى بتلك يا خرابة البيوت ... خربتى بتى الله لا تاجرك ولا شكرك

شفتى كيف ؟! يا بركلاويه
البت مهيره دى جابت الغزل والعوه ديل من وين ما بعرف ... أسعليها

الباشا
07-10-2012, 02:58 PM
الليلة بتطيرواااااا ويييييييين؟؟؟

المبارك المبروك ...... قاعدييييين ... نطير نمشى وين ونبعد منك

كلو ولا بعدك يا الحبيب .... وشوف بتى مهيره مع أنه جذورها رطانيه

لكن قررت أديها الجنسيه المدنية الجزيريه ومختوم عليها بختم
الهدهد ( الحنتوبى )

,,,,,,,,,,,,,,,,,,,,,,,,,,,,,,

الشُرُنْقاقة
مهيره ؛ بالإنداندى .... كندو؟

ومن عندى نهى نهى بالهندى و بالفلبينى هندى كولام و بالتركى بيلميروم
,,,,,,,,,,
الشرقانية
مهيره ؛ احتمال تكون من الشرقه وذلك عند التعجل في الاكل واللهط بمعدل عالي والكلام في آن واحد

الشرقانى عند ناس الجزيره هو ناحية الشرق وفى بعض المناطق يقول ليك الصعيد وعكسها تماماً السافل يعنى باتجاه البحر أو الغرب
,,,,,,,,,,
الشًاروقة
مهيره ؛ بالإنداندى .... كندو؟

دى بقا أقولها بالاسبانى نو لوسى وبالايطالى قريب من ده نون لوسو وبالإنداندى كندو
,,,,,,,,,,
الطًايوقة
مهيره ؛ انا بعرف الطايوق غايتو هو النخاع بتاع الخروف وبيكون دهيييين كده وبينضفو بيهو الدوكه
الطايوقه دي مرتو يمكن!!

حلوه مرتو دى .....تفسيرك دقّ فى العارضه ... يعنى قررربتى ... الطايوق هو المخ .... مش لما واحد يزعل منك يقول ليك إت يازول مافيك طايوق ..... وفى الغالب يستخدم مخ الغنم او الضان وطبعاً لانه دهنى فيمسح به صاج العواسه حق الكسرة الرهيفه و الطايوقه يا مهيره هى القطعة الصغيره أو الجزء من الطايوق .
,,,,,,,,,,
السًافوتة
مهيره ؛بعرف الساخوته اي العوه والمنضمه الكتيره البلا طعم يصاحبها صداع شديد للمتلقي!! ..السافوته آبعرفها

السافوته هى الريشه أو القشه أو الخيط الذى يبرم ... ويتم ادخاله بغفله فى أضان البنى آدم من باب المزاح ... فيتخلع الشخص المعتدى عليه لحساسية الأذن ويقوم متنفض ... والجماعه يضحكوا عليه ... ومنها الكلام الشائع ...ياخى من تسوى لينا سافوته .... يعنى ما تزعجنا
,,,,,,,,,,
السًفاية
مهيره ؛يمكن تكون تصغير للسفه ؟؟

والله دى بالغتى فيها يا مهيره ....سفة شنو ؟ قصدك ود عمارى التمباك يعنى ... كدا مشيتى بعيد

والسفايه هى الرمله أو التراب الناااااااعم وعندنا فى البحر السفايه هى الرمله البتتكوم جنب حيطان الحيشان من الكتاحه والتراب والعجاج البيقوم ويكنجل الناس داك .... والناس برضو بتستفيد منها فى البنيان برضو ...
,,,,,,,,,
الأنداية
مهيره ؛الاندايه دي مش محل كرستال البلح ولا كيف؟

مافهمت ... كريستال البلح دى جبتيها من وين يا مهيره ..
بس برضو ليها علاقه بالبلح ولا علاقة لها بالإنداندى :showoff: .... الإندايه هى البار بالعنقليزى ودا بيت مطرف بره فى الكنابى بعيد من البلد يصنع فيه الخمور البلديه يعنى ذى المريسه والعرقى خاصة عرقى العيش وعرقى التمر ومن تمغرب الواطه عينك ما تشوف النور ... عشان كدا قلت ليها علاقة بالبلح ....
,,,,,,,,,
الخُرتاية
مهيره ؛اييي باللحيل بعرفها شنطه من القماش كنا زمان بنشيلها لمن نمشي الخلوه

وعند ناس الجزيره الخرتايه هى الكيس الذى يدخل فيه ضرعات البهايم عشان تحمى البهم ما يرضع لبن أمه .. والخرتايه هى الكيس البيلقطوا فيه القطن والخرتايه هى شنطة المدرسه الزمان وتصنع من أى دلاقين مجدوعه فى البيت ... المهم تستوعب لوح الاردواز مافى زول يسألنى من الأردواز ده :stop:
,,,,,,,,
المِحَاية
مهيره ؛يا شيخ اب عصايه ..اكتب محايه..لحبيب قسايا..ولا ماياها!!

ياها ذاااااااااااتا
وأب عصاية ده أنواع ... واحد نصاب وإبن ستين كلب يضحك على الناس بالجن والعفاريت ومحايتو بدل ما تشفى تجيب الامراض ... لكن فى فتوه عن المحايه الصحيحه وهى كتابة الآيات القرآنيه بمداد الزعفران على ورق طاهر ويغسل بماء زمزم أو ماء عادى ويشرب ... وحسب النيه بيجى الشفاء ... والقرآن شفاء للناس
,,,,,,,,,
الغوغاية
مهيره ؛حتمال تكون من الغوغاء وهم الناس الماعندهم موضوع ولغلاغين في الفاضي ومخهم زاتو فاضي اليس كذلك؟

الغوغايه هى آله يدويه قديمه لتنضيف القطن .... بيتخت القطن حق المراتب او المخدات ويجيبوا الاله دى ينفضوا بيها القطن الملبك وهى عامله ذى الوتر البيدقوا بيه الربابه بمعنى سلكه مربوطة فى اطراف عود فى شكل قوس .... وفى بعض الاحيان تستخدم سيخه طويله لنفض القطن وبرضو يطلق عليها الغوغايه .... مش كدا برضو يا المبارك ؟؟؟
,,,,,,,,

و ملحوظه من عند مهيره بتشرح
كندو بالانداندي يعني..انا شن عرفني؟؟؟




ويديكم الف عافيه

مهيره
07-10-2012, 10:01 PM
الأنداية
مهيره ؛الاندايه دي مش محل كرستال البلح ولا كيف؟

مافهمت ... كريستال البلح دى جبتيها من وين يا مهيره ..
بس برضو ليها علاقه بالبلح ولا علاقة لها بالإنداندى نقرتين لعرض الصورة في صفحة مستقلة .... الإندايه هى البار بالعنقليزى ودا بيت مطرف بره فى الكنابى بعيد من البلد يصنع فيه الخمور البلديه يعنى ذى المريسه والعرقى خاصة عرقى العيش وعرقى التمر ومن تمغرب الواطه عينك ما تشوف النور ... عشان كدا قلت ليها علاقة بالبلح ....
العرقي= كريستال البلح
زااااااااااتو
ده اسمو الجديد عشان جماعة الكريستال ديل (المساطيل)عندهم نكات كتيرة فجماعة النكات حبو يلطفو الاسم شوية وسموهو كريستال البلح:d
اها وبمناسبة الجماعة ديل اسمع النكتة دي يا عمي:
قال ليك في مسطول رباطابي
راكب في الطيارة وبردان شديد قال للمضيفة يا بتنا جيبي لي بطانية
المضيفة عايزة تتظارف قالت ليهو بردان يا عمو
قال ليها لا لا عايز اكوي
:d:d:d

مهيره
07-10-2012, 10:58 PM
انا كل يوم احوم بى جاااااي
عشان اعرف المعنى
وينكم ؟؟؟؟
الكلام الفوق ده مدح ولا ذم
الحقوووونا
تحياتي :rose::rose::rose:

ههههه بركلاوية والاستغاثة قلت لي شنو
الحقووونا :011:

اها يا جماعة الكلام ده عندو قصة طريفة لقيتو بالصدفة وانا حايمة في قوقل
وطوااااالي ترستو ليكم:cupidarrow: ...اها اسمعو القصة:
قالوا زماااااااان كان في عروب (جدود أهل العوض) ساكنين ليهم في تكيلات متجاورات وكان فيهم واحد فقير يجاور ليهو واحد أحسن حالا ً منو .. أها في يوم من أيام الشتاء الباردة الفقير قال لمرتو : أعملي لينا مديدة كاربة شرطن تكون بي سمن ..أها قامت الوليه عملت المديدة الكاربة ولكن بدون سمن ...وقالت لأبو وليداتا والله تستاهل السمن لكن يخربنا خراب السواد .. الحبة دي ما عندنا !

قام قال ليها : ما في مشكلة نشوف جيرانا ديل
قالت ليهو : شحدناهم كتير لامن خجلنا ودخلنا في أضافرينا

فكر أبو الوليدات (واسع الحيلة) قليلا ً ثم قال ليها :أنا عندي فكرة ...دسي ليك قزازة في هدومك وأعملي فيها زعلانة منى وأهربي أدسي عندهم (في التكل الفيهو السمن والعسل) وأنا ح أجري وراك بالعصاية وإنتي أملى القزازة بالسمن و أتخارجي ...

وقد كان ... ودسوها في التكل الفيهو السمن حماية ً لها من زوجها (المكـّار ) ...وفتحت صفيحة السمن ووجدته جامدا ً (بفعل الشتاء) فماذا تفعل ؟ فكرت سريعا ً وعملت نفسها وكأنها بتنبذ في زوجها الذي كان يقف خارج التكل متوعدا ً مرغيا ً ومزبدا ً وقالت ليهو (وكان أهل الدار يسمعونها ولكنهم سوف لن يفهموا شئياً ): ود الجمد مجمود (أي وجدت السمن جامدا ً فماذا أفعل؟ !):D
قال ليها : بت التسوط بالعود (أي حركي السمن بالعود)
قالت ليهو : ود التكيتو مليتو (أي حركتا بالعود وتكيت الصفيحة (ميلتها) ومليت القزازة):D
قام قال ليها : بت التقد البيتو (أي قدي التكل وأخرجي راجعة للبيت):D

ورجعوا لبيتهم وأكلو المديدة بسمن جيرانهم (بالشِدة واللِضه ):D
لقيتوهم كيف عليكم الله؟

الباشا
07-11-2012, 09:31 AM
رباطابي
راكب في الطيارة وبردان شديد قال للمضيفة يا بتنا جيبي لي بطانية
المضيفة عايزة تتظارف قالت ليهو بردان يا عمو
قال ليها لا لا عايز اكوي






ما شاء الله عليك يا مهيره .....

الواحد ليه زمن من الابتسامة المريحه والضحكه الصافيه المن الجوه

قلت لى عمك الرباطابى داير يكوى ..... طيب خدك دى

ﺭﺑﺎﻃﺎﺑﻲ ﺑﺘﺎﻉ ﻓﺮﻥ ﺟﺎﻫﻮ واحد مستعجل ﻗﺎﻝ ﻟﻴﻬﻮ ﺍﻟﻌﻴﺶ ﻓﻲ ﺍﻟﻨﺎﺭ ؟
ﺭﺩ ﻟﻴﻬﻮ الرباطابى .... ﻻ ﻳﺎﺧﻮﻱ ﻓﻲ ﺍﻟﺠﻨﺔ ..



وقالت ليهو (وكان أهل الدار يسمعونها ولكنهم سوف لن يفهموا شئياً ): ود الجمد مجمود (أي وجدت السمن جامدا ً فماذا أفعل؟ !):d
قال ليها : بت التسوط بالعود (أي حركي السمن بالعود)
قالت ليهو : ود التكيتو مليتو (أي حركتا بالعود وتكيت الصفيحة (ميلتها) ومليت القزازة):d
قام قال ليها : بت التقد البيتو (أي قدي التكل وأخرجي راجعة للبيت):d




طيب يعنى يا مهيره ... خليتينا نقلب ونفكر ونتخيل و عملنا ليها توم وشمار ومدح وذم
أتارى الحكاية نصبه من نصبات " أهل العوض " .... ألجماعه ديل مكارين ومستهبلين و خطيرين كمان
إنتى عندك فكره مسمى " أهل العوض " دى ذاتها جات من وين ؟؟
هى حكايه قريبه جداً من القدو التكل ديل ...

أصل حكايه " أهل العوض " كما سمعتها من مصادر موثوقه ( شفتى كيف موثوقه دى )
واحد وجيه ( وحلوه وجيه دى كمان ) من ناس الخرتوم 2 .... نمرة 2 يعنى .... ماشى بعربتو فى الشارع ... تعطلت من العربيه ... الراجل وقف حيران ما عارف يتصرف كيف .... اها فى الوقت داك جاء شاب عريبى كدا من ناس الجزيره ماشى .... وطبعاً على قول الجماعه .... زول ملقوف وشوبار .... اها على طول سأل الوجيه ... مالك ياعمى واقف محيّر كدى ؟ ... الراجل عاين ليه من تحت لفوق وبامتعاض قال ليه .. العربيه عطلت ... العريبى الظاهر مدردح وليه فى كل شى ... راح فاتح الكبود وظبط العربيه ودورها .... الراجل إنبسط منه شديد ... دخل ايدو فى جيبو عاوز يديه الفيها النصيب ... العريبى رفض طبعاً لانه مش ممكن ياخد حق مساعده ... الوجيه اتكيف اكتر و حلف عليه إلا يمشى معاهو البيت عشان يكرموا .... أخونا ما صدق نط فى العربيه ... وجاء مع الراجل لبيته فى نمرة 2 ... طبعاً العريبى يشيل ويتلفت ما خلا ركن ما كلحو .... إنحشى مظبوووووط وشفط ليه كباية ليمون بااارده وضرب الشاى المنعنع والكندشه .... أهااا مع السلامه مع السلامه .... بس ياخينا ماعرفت إسمك ؟؟ قال ليه إسمى " العوض "
بعد يومين فكر العوض فى طريقة يرجع للطرطيبه دى تانى .... راح البلد جاب ليه صفيحة سمن بلدى معتبره وجاء دق الباب للجماعه فى نمرة2 ... منو فى الباب ... قال ليهم دا أنا العوض .... استقبلوهو واكرموه بعد الهديه المفتخره دى ... مرت ايام ورجع تانى بكم شوال عيش ... وجرّت الحكايه والعوض بقا قائمقام ... وشوية ناس البلد عرفوا بحكاية بيت نمرة 2 ورستكة العوض .... بقا الجايى الخرتوم كلو لازم يجيب الهديه ويدق الباب .... منو الفى الباب ؟؟؟ وتكررت الاجابه " نحن أهل العوض "

الباشا
07-11-2012, 09:43 AM
عشره سهله جداً


البُقْرَه



المَقَا



التَرَسْ



الميعه


القَنْقَر



الحراز



الطُنْضُبْ



البَرَمْ



الخُرّيم



الزونيه

سفير
07-11-2012, 11:12 AM
هسى يعنى حتما كدى ولازمن ولا بد اتفرجخ فى نص الصفحات دى
واقراها من اولا لى تاليها عشان اخش فى الفورمة واعرف الفى والمافى واجيكم لافى
وانا متل الكدندارة لكة ولحوح وتاتا تاتا بقرى الكلمة واشوف معاها اخواتا
اها قمت كدى من دغشا نسايمو يهبهبن وسرحت فى صفحاتو من الضحك نتحن على صفحاتى
وتشكر كبيرنا يا باشا على المجهود المقدر
علا كلامنا صعيب باللحيل فى الكتابة بى بورد الخواجات دا
عند الكلام عوجة لسان وتنية خشيم يمرق الكلام مليان حنية ونغم .(.وأحيانا بزاق)
لكن عند الكتابة تقعد تفتش لى الفتحة الفوق للالف والكسرة الجنب النفاج
والضمة ....ضمة يمة فى التكل فى الفجرية ساعة الشاى وكت تجيها جارى بردان مشتاق وعارى
(اسى الجاب دا هنا شنو ..ناس فاقده حنان ساى)
اها يا يمة ليك قدر ما تخت ليها من اكسسورات النحو ..وشىء جمع مزكر سالم ..ومفرد سالم المتزكر
برضو تطلع ما يااااها .. فاقده النغم والنمة والجنية.
وحليلك يمه ..ويو
جايكم صادى ارجع اقرى تانى ...واشوف الفاتنى
بس قلت اخت عودى وامتر ارضى واحجز لى بوكان فى قوز الابداع دا
ويسلمو المبدعين
كسرة : كتبت لى كلام حددادى مددادى وقت جيت أنشر قال يا زول جيب البوطاقة وكت مرقتها لقيتو قفل الباب
وطااار الكلام ....عشان كدى اختصرت الرد
(دا كلو اختصار ... والكامل كيفينو)

صلاح سيدأحمد الغول
07-11-2012, 11:19 AM
اهلااااااان استاذنا الغول
(مسكاقرو)..بالمحسي يعني كيف الحال
والله علمي علمك لغه المحس مابعرف اسمها شنو لكن بسمع انها فيها كلمات مشتركه مع الانداندي
لكن والله يا استاذ انا انصحك تحاول تتعلم ولو جزو من رطانتكم لانو الناس لازم تحافظ علي تراثها ما معقول لغه كااااااااااااامله تندثر وتتنتهي بالسهوله دي:no:
و انا شايفه المحس اكتر ناس بيحبو الرطانه حتي شفعهم بيرطنو!!
...
الكلام الفوق ده عندو قصه سمممممحه وطريفه شديد
كدي النشوف اعمامي ديل ان كان مافي زول عرفها حاحكيها ليكم
!!!

آخر المداد:
يا سيِّدَ الشِعرِ المُعبَّقِ بالمخاضاتِ الخصيبةِ
وانتباهاتِ الحروفِ الغافيات
يا مانحَ الصُوَرِ الكئيبةِ لونَها
ألَقَاً وروحاً وانفلات
يا سيَّدَ الكلماتِ
يا ألَقَاً يُحوِّمُ في ضفافِ الناسِ
يمنحُ كُلَّ ما يلقَى شذىً
بالحرفِ يرسِمُ بوصلاتِ الحُبِّ
في كُلِّ الجهاتْ
!!!







ههههه بركلاوية والاستغاثة قلت لي شنو
الحقووونا :011:

اها يا جماعة الكلام ده عندو قصة طريفة لقيتو بالصدفة وانا حايمة في قوقل
وطوااااالي ترستو ليكم ...اها اسمعو القصة:
قالوا زماااااااان كان في عروب (جدود أهل العوض) ساكنين ليهم في تكيلات متجاورات وكان فيهم واحد فقير يجاور ليهو واحد أحسن حالا ً منو .. أها في يوم من أيام الشتاء الباردة الفقير قال لمرتو : أعملي لينا مديدة كاربة شرطن تكون بي سمن ..أها قامت الوليه عملت المديدة الكاربة ولكن بدون سمن ...وقالت لأبو وليداتا والله تستاهل السمن لكن يخربنا خراب السواد .. الحبة دي ما عندنا !

قام قال ليها : ما في مشكلة نشوف جيرانا ديل
قالت ليهو : شحدناهم كتير لامن خجلنا ودخلنا في أضافرينا

فكر أبو الوليدات (واسع الحيلة) قليلا ً ثم قال ليها :أنا عندي فكرة ...دسي ليك قزازة في هدومك وأعملي فيها زعلانة منى وأهربي أدسي عندهم (في التكل الفيهو السمن والعسل) وأنا ح أجري وراك بالعصاية وإنتي أملى القزازة بالسمن و أتخارجي ...

وقد كان ... ودسوها في التكل الفيهو السمن حماية ً لها من زوجها (المكـّار ) ...وفتحت صفيحة السمن ووجدته جامدا ً (بفعل الشتاء) فماذا تفعل ؟ فكرت سريعا ً وعملت نفسها وكأنها بتنبذ في زوجها الذي كان يقف خارج التكل متوعدا ً مرغيا ً ومزبدا ً وقالت ليهو (وكان أهل الدار يسمعونها ولكنهم سوف لن يفهموا شئياً ): ود الجمد مجمود (أي وجدت السمن جامدا ً فماذا أفعل؟ !):D
قال ليها : بت التسوط بالعود (أي حركي السمن بالعود)
قالت ليهو : ود التكيتو مليتو (أي حركتا بالعود وتكيت الصفيحة (ميلتها) ومليت القزازة):D
قام قال ليها : بت التقد البيتو (أي قدي التكل وأخرجي راجعة للبيت):D

ورجعوا لبيتهم وأكلو المديدة بسمن جيرانهم (بالشِدة واللِضه ):D
لقيتوهم كيف عليكم الله؟



مهيييييييره !!!
:182fd25f9b06446ba41:182fd25f9b06446ba41

إنتِ :thumbup1:
لكن يا مهيره الله يجازيك
ضحكتيني لامِن شرقتيني
شكيتِك لى ... يا بِت الباشا

شهادة
_____
حرّكتِ ساكِن الغبطه
والرّوعه والإبداع
بمنتدى مرافئ الإبداع
..

مَرحَى بمَن ابداعُها انسكبا
دُرَّاً نفيسَـاً، لـؤلـؤاً، ذهَبا
سِحراً بِه افتتنتْ مرافينا
ألَقاً سناهُ جلا هُنا الحُجُبـا
لنرى عَوالِمَ ما رأينــاها
ونقولُ مِن إبداعِها عجبا
حقّـاًَ مهيره قد بهرتيـــنا

حمداً لِمَن أعطى ومَن وهَبا
إبداعُ حَــرفٍ لا مثيــلَ لـهُ
دانَََ اليراعُ فــزانََ مـا كتَبا
للِّــــهِّ درُّكِ إيـهي مــولاتي
نَعُمَ العطاءُ وجلَّ مَن وهَبا

مهيره
07-11-2012, 10:19 PM
ما شاء الله عليك يا مهيره .....

الواحد ليه زمن من الابتسامة المريحه والضحكه الصافيه المن الجوه

قلت لى عمك الرباطابى داير يكوى ..... طيب خدك دى

ﺭﺑﺎﻃﺎﺑﻲ ﺑﺘﺎﻉ ﻓﺮﻥ ﺟﺎﻫﻮ واحد مستعجل ﻗﺎﻝ ﻟﻴﻬﻮ ﺍﻟﻌﻴﺶ ﻓﻲ ﺍﻟﻨﺎﺭ ؟
ﺭﺩ ﻟﻴﻬﻮ الرباطابى .... ﻻ ﻳﺎﺧﻮﻱ ﻓﻲ ﺍﻟﺠﻨﺔ ..





طيب يعنى يا مهيره ... خليتينا نقلب ونفكر ونتخيل و عملنا ليها توم وشمار ومدح وذم
أتارى الحكاية نصبه من نصبات " أهل العوض " .... ألجماعه ديل مكارين ومستهبلين و خطيرين كمان
إنتى عندك فكره مسمى " أهل العوض " دى ذاتها جات من وين ؟؟
هى حكايه قريبه جداً من القدو التكل ديل ...

أصل حكايه " أهل العوض " كما سمعتها من مصادر موثوقه ( شفتى كيف موثوقه دى )
واحد وجيه ( وحلوه وجيه دى كمان ) من ناس الخرتوم 2 .... نمرة 2 يعنى .... ماشى بعربتو فى الشارع ... تعطلت من العربيه ... الراجل وقف حيران ما عارف يتصرف كيف .... اها فى الوقت داك جاء شاب عريبى كدا من ناس الجزيره ماشى .... وطبعاً على قول الجماعه .... زول ملقوف وشوبار .... اها على طول سأل الوجيه ... مالك ياعمى واقف محيّر كدى ؟ ... الراجل عاين ليه من تحت لفوق وبامتعاض قال ليه .. العربيه عطلت ... العريبى الظاهر مدردح وليه فى كل شى ... راح فاتح الكبود وظبط العربيه ودورها .... الراجل إنبسط منه شديد ... دخل ايدو فى جيبو عاوز يديه الفيها النصيب ... العريبى رفض طبعاً لانه مش ممكن ياخد حق مساعده ... الوجيه اتكيف اكتر و حلف عليه إلا يمشى معاهو البيت عشان يكرموا .... أخونا ما صدق نط فى العربيه ... وجاء مع الراجل لبيته فى نمرة 2 ... طبعاً العريبى يشيل ويتلفت ما خلا ركن ما كلحو .... إنحشى مظبوووووط وشفط ليه كباية ليمون بااارده وضرب الشاى المنعنع والكندشه .... أهااا مع السلامه مع السلامه .... بس ياخينا ماعرفت إسمك ؟؟ قال ليه إسمى " العوض "
بعد يومين فكر العوض فى طريقة يرجع للطرطيبه دى تانى .... راح البلد جاب ليه صفيحة سمن بلدى معتبره وجاء دق الباب للجماعه فى نمرة2 ... منو فى الباب ... قال ليهم دا أنا العوض .... استقبلوهو واكرموه بعد الهديه المفتخره دى ... مرت ايام ورجع تانى بكم شوال عيش ... وجرّت الحكايه والعوض بقا قائمقام ... وشوية ناس البلد عرفوا بحكاية بيت نمرة 2 ورستكة العوض .... بقا الجايى الخرتوم كلو لازم يجيب الهديه ويدق الباب .... منو الفى الباب ؟؟؟ وتكررت الاجابه " نحن أهل العوض "



والله اول مرة اعرف قصة(اهل العوض )دي
معلومة جديدة
تسلم آعمي
:SnipeR (69)::SnipeR (69):

مهيره
07-11-2012, 10:40 PM
عشره سهله جداً
قدر سهوليتها..سمح..النقرا يسين بعدداك نخش الامتحان:oo5o.com (17):

البُقْرَه


بيق زيرو

المَقَا

ماني خابراهو!!

التَرَسْ


ايي بعرفو الترس ده مش الحاجز البيعملوهو عشان يمنع دخول الموية في ايام المطرة
ولا ماياهو والترسانة بتبقي ليهو شنو؟
الميعه

هههههههه غايتو انا بعرف انو الغنماية بتقول :ميييييييييييييييييييييع:D:D
!!!



القَنْقَر


اييي باللحيل القنقر ياهو الذرة الخضراء المشوية ويا حلات القنقر المشوي:thumbup:

الحراز

الحراز ده نوع من الاشجار البتتزرع في غرب السودان..الحاردلو قال..
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب يا زويل منْ قالْ
إنّك .. تانى لينا متيلْ
تقولى لِى شنو
وتقولى لِى منو

الطُنْضُبْ

الطنضب برضو نوع من انواع الشجر

البَرَمْ

بيغ زيرو
!!



الخُرّيم

يمكن تصغير لي خرم بمعني فتحة؟
!!



الزونيه


الزوينة اظنها يا ها العديلة حبوبتي بتقول فلانة ديك بنيتن زويييييييييييييييينة
يعني بنية راسية وهادية وتسمع الكلام ولا ماكده آعمي؟:SnipeR (69):

مهيره
07-11-2012, 10:52 PM
مهيييييييره !!!
:182fd25f9b06446ba41:182fd25f9b06446ba41

إنتِ :thumbup1:
لكن يا مهيره الله يجازيك
ضحكتيني لامِن شرقتيني
شكيتِك لى ... يا بِت الباشا

شهادة
_____
حرّكتِ ساكِن الغبطه
والرّوعه والإبداع
بمنتدى مرافئ الإبداع
..

مَرحَى بمَن ابداعُها انسكبا
دُرَّاً نفيسَـاً، لـؤلـؤاً، ذهَبا
سِحراً بِه افتتنتْ مرافينا
ألَقاً سناهُ جلا هُنا الحُجُبـا
لنرى عَوالِمَ ما رأينــاها
ونقولُ مِن إبداعِها عجبا
حقّـاًَ مهيره قد بهرتيـــنا

حمداً لِمَن أعطى ومَن وهَبا
إبداعُ حَــرفٍ لا مثيــلَ لـهُ
دانَََ اليراعُ فــزانََ مـا كتَبا
للِّــــهِّ درُّكِ إيـهي مــولاتي
نَعُمَ العطاءُ وجلَّ مَن وهَبا


ان شاء الله دايما ضاحك ومبسوط يا استاذنا العزيز
وطبعا انادايما لمن انت تكتب بخجل وبحتار انو ارد ليك بشنو
لانو ماشاء الله تبارك الله عندك موهبة فذة
ومهما حاولتا اتفنن وااتحرفن في كلامي بلقاهو
ما بييصل ولاااااا يقرب زاتو لمستوي نظمك الفريد
ماشاء الله سبحان من اعطاك هذه الموهبة الرائعة
ودايما بنستمتع بكتاباتك الانيقة وانا من المعجبين جدا بقلمك
كن دااائما هنا

آخر المداد:
والله باكر ياحليلوه
لما اولادنا السمر
يبقو افراحنا البنمسح بيها احزان الزمن
نمشي في كل الدروب الواسعه ديك
والرواكيب الصغيره تبقى اكبر من مدن
!!!

الباشا
07-12-2012, 02:08 PM
قمت ... من دغشا نسايمو يهبهبن وسرحت فى صفحاتو من الضحك نتحن على صفحاتى

جايكم صادى ارجع اقرى تانى ...واشوف الفاتنى
بس قلت اخت عودى وامتر ارضى واحجز لى بوكان فى قوز الابداع دا





سفير يا وليدى ... كلامك حلو وموزون

بس العصفوره قالت لى إنك مبدع فى اللهجات

كنت عاوز اعرف لهجتك من ياتو قبيله

الحكايه مافيها جهويه وقبائل وعنصريه

أبداً الموضوع هو توثيق للتراث ... تراث اللهجه الجميله

" العامية السودانية "

دحين يا وليدى بدورك تشوف اصحابك الرطانه

سيبك من مهيره دى ... طلعت دناقله "يا رسول الله " بس تايونى

مع إنها أخير من حبيبى الغالى صلاح الغول الطلع من أندينا بس طليانى

الباشا
07-12-2012, 02:16 PM
مهيييييييره !!!
:182fd25f9b06446ba41 :182fd25f9b06446ba41

إنتِ :thumbup1:
لكن يا مهيره الله يجازيك
ضحكتيني لامِن شرقتيني
شكيتِك لى ... يا بِت الباشا

شهادة
_____
حرّكتِ ساكِن الغبطه
والرّوعه والإبداع
بمنتدى مرافئ الإبداع



صلاح أخوى ....ها زول ... مالك بتشكى فى بنيتى

هسع عليك الله المنتدى ده ما زاد حلاوه ونشاط

من يوم المبروكه دى ما هلت وجابت معاها زُملاها الحلوين ديل


وبعدين يا مهيره ... لازم تبروزى الشهاده دى لانها من بروفسير مافيش متلو

يعنى تدقى تلاته مسامير جنب بعض ...

واحد تعلقى فيه فيه شهادة بكلاريوس " نبته حبيبة الكل"

والتانى تعلقى فوقه شهادة صلاح الغول دى

والتالت ينتظر الماجستير الحيشرفنا قريب بإذن الله

الباشا
07-12-2012, 02:45 PM
والله اول مرة اعرف قصة(اهل العوض )دي
معلومة جديدة
تسلم آعمي
:SnipeR (69)::SnipeR (69):


طبعاً أهلك ناس ام درمان لما يسمعوا بحاجه زى دى

بيحكوها لما تجيب الزيت

عندنا واحده قريبتنا حلفت بالتقطعها إلا تهب وتأب وتغوص وتجيب قرار الموضوع دا

أصلها مِناسْبَه واحد من " أهل العوض "

بقوا ليها فى تولا ........ وكرهوها عيشتها

اها قالت الإ تعرف الناس ديل و يوروها عملوا شنو والعلاج كيف؟


بينى وبينك لحدى الآن " أهل العوض " مفترشين الصالون عندها ومرستكين

وهى سلمت بالامر الواقع :icon1366:

الباشا
07-12-2012, 02:49 PM
الزوينة اظنها يا ها العديلة حبوبتي بتقول فلانة ديك بنيتن زويييييييييييييييينة
يعني بنية راسية وهادية وتسمع الكلام ولا ماكده آعمي؟:sniper (69):




صدقت حبوبتك مادام إنها قالت كدى

والله إنت الزوييييييييييييييييييييييينه يا المهيره

..... لا كضباً كاضب الزوينه حاجه تانيه خالص

وبجيك وأشرح ليك

الباشا
07-12-2012, 02:57 PM
عشره سهله جداً
قدر سهوليتها..سمح..النقرا يسين بعدداك نخش الامتحانhttp://www.marafi-alebda.com/vb/images/smilies/oo5o.com%20%2817%29.gif

البُقْرَه

بيق زيرو

المَقَا
ماني خابراهو!!

التَرَسْ

ايي بعرفو الترس ده مش الحاجز البيعملوهو عشان يمنع دخول الموية في ايام المطرة
ولا ماياهو والترسانة بتبقي ليهو شنو؟
الميعه
هههههههه غايتو انا بعرف انو الغنماية بتقول :ميييييييييييييييييييييع:d:d
!!!

القَنْقَر


اييي باللحيل القنقر ياهو الذرة الخضراء المشوية ويا حلات القنقر المشوي:thumbup:

الحراز
الحراز ده نوع من الاشجار البتتزرع في غرب السودان..الحاردلو قال..
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب يا زويل منْ قالْ
إنّك .. تانى لينا متيلْ
تقولى لِى شنو
وتقولى لِى منو

الطُنْضُبْ
الطنضب برضو نوع من انواع الشجر

البَرَمْ

بيغ زيرو
!!

الخُرّيم
يمكن تصغير لي خرم بمعني فتحة؟
!!

الزونيه


آخر المداد:
والله باكر ياحليلوه
لما اولادنا السمر
يبقو افراحنا البنمسح بيها احزان الزمن
نمشي في كل الدروب الواسعه ديك
والرواكيب الصغيره تبقى اكبر من مدن
!!!


كدى يا مهيره حاولى تانى

واللا أقول ليك .... ننتظر سفير أو واحد من اصحابى العجايز يجى يشرح

وكان ظروفهم ما سمحت بجيك وعلى قولك ... ياسين كانت عاوزه ليها جكه

وإنتى الظاهر ما جكيتى كويس .... ونتيجتك إتنين ونص من عشره

مع الرأفه والمجامله

ويديك الف عافيه