المساعد الشخصي الرقمي

مشاهدة النسخة كاملة : لهجتنا الجميله ( العامية السودانية ) ....... دعوة للمعرفة


الصفحات : [1] 2 3 4 5 6

الباشا
05-17-2009, 07:29 PM
لاحظت خلال العقد الأخير هذا ( يعنى العشرة الأوائل من الألفية الثالثة التى بدأت فى عام 2000 الميلادى ) أنه كتير من الشباب نسوا اللهجة العامية السودانية تماماً إما بفعل التربية خارج نطاق الوطن الأم سوداننا الحبيب أو بسبب العيشه فى المدن ومحاولة التنصل من جذور القرية وإكتساب ثقافات جديده تفرضها الحالات الاجتماعية فى البيت والشارع والمدرسة والكلية ثم الحياة العملية ... كلها ظروف حياتية أبعدت الناس عن لهجتهم الأصلية ( العامية السودانيه ) ..... وطبعاً معروف أنه السودان من أكبر الدول الأفريقية والعربيه حجماً من حيث المساحة الجغرافية ولذا تعيش فيه وتتعايش مجموعة كبيره مختلفة فى السنحة واللهجه ( لولا تتدخل الشرطى العالمى وأذنابه اليهود الذين يجاهدون ليل نهار لزرع الفتنه والفرقه لحاجتهم لخيرات هذا البلد البترول لاحفاد الخنازير واليورتيوم لاحفاد خنازير الخنازير ) ... ولكن كل هذه المجموعات المختلفة تربطها اللهجة السودانيه التى يتعامل بها 95% من السودانيين وهنالك القليل الذى ما زال مرتبط بلهجته المحليه بسبب الجهل والتقوقع وعدم الاختلاط بالآخرين لأى سبب كان ...

وحنى نتمكن من معرفة هذا القاموس الثرى بالمعانى والذى يرتبط ارتباطاً وثيقاً باللغة العربيه الفصحى فى كثير من تركيبات كلامته ...... وكما ستلاحظون فيما بعد أن هنالك الكثير من الكلمات العربية الفصحى التى تغير بعض حروفها كما هو فى معظم الدول العربيه بما فيها المملكة العربية السعودية نفسها .... ( مثلاً لدينا كسودانيين مشكله عويصه فى نطق الغين والقاف ... ولدى السعوديين مشكلة عويصة أيضاً فى نطق الضاد و الظاء ولدى المصريين مشكلة فى نطق القاف والجيم . ولدى سكان الخليج العربى مشكله فى نطق الكاف وحتى الألف نفسه كالبحرينيين والعراقيين فالألف عندهم ينطق واو وهكذا .....) وهنالك بعض الكلمات العربية الفصحى التى تستخدمها بعض الدول ولكنها تظهر كما لو أنها لهجة محلية .... وأكبر مثل على ذلك كلمة زول ..... فلو فتحت القاموس العصرى صفحة 383 لوجدت تفسير كلمة زول أنها تعنى شخص Person /Man/Fellow .. ولكن كل الناس تعتبرها من اللهجات السودانية ......

إذاً.... كان لابد من فتح قاموس اللهجة العامية السودانية وإعادة قراءته وتفسيره للذين لايعرفونه من أخوتنا العرب أو لإعادة التذكير به لمن فاتتهم حياة القرية والبداوة الجميله اللذيذة النقيه ....

أطلب من الكل الدخول ومحاولة شرح بعض الكلمات التى سأورد منها عشرون كلمه فى كل مره .... كما أرجو من الجميع تحضير قائمة بعشرين كلمة أخرى تطرح للشرح والتفسير والاجتهاد فى ذكر سبب تغييرها بقدر الإمكان .........

واليكم العشرين كلمة الاولى من اللهجة العامية السودانيه

التكل
القرقريبه

الطايوق

الدوكه

الدلقان

الريكه

الدانه

الطرقه

الشيطه

الدرابه

الجبنه

القلايه

القلوة

الفندك

الشرقرق

الليفه

الوقايه

التفل

الهبود

(البكرى - التنى - التلتاوى - البركه ) لانهم مرتبطين ببعض

mohsenco
06-03-2009, 05:07 PM
السلام عليكم

أولادنا ناس الشهادة العربية
كتير من المرات بتلقوا كلام وما بتفهموه
ومرات ما بتلقوا زول تسعلوه
وكان شفتوا عمكم فدياس سمى حجوته حجوة أم ضبيبينه
السعال هنا أم ضبيبينه دي شنو؟ ولا تلقاكم الحجوه زاااااته ما سمعتوا بيها ولا عارفين معناته شنو

أها عايزين هنا نوريكم كلام أعمامكم ديل ناس عمكم فدياس
وناس عمكم الباشا وعمكم القوس وعمكم ود المنابير وعمكم أبوإيثار وعمكم أبوسيده
وغيرهم من أعمامكم الحلوين ديل وأي سعال في كلام حبوباتنا ولا جدودنا الذكرنا أساميهم ديل
تجوا تسعلوا منو هنا

يلا نقول بسم الله ونبدأ بي حجوه معناها شنو

أبو إيثار
06-03-2009, 05:21 PM
السلام عليكم

أولادنا ناس الشهادة العربية
كتير من المرات بتلقوا كلام وما بتفهموه
ومرات ما بتلقوا زول تسعلوه
وكان شفتوا عمكم فدياس سمى حجوته حجوة أم ضبيبينه
السعال هنا أم ضبيبينه دي شنو؟ ولا تلقاكم الحجوه زاااااته ما سمعتوا بيها ولا عارفين معناته شنو

أها عايزين هنا نوريكم كلام أعمامكم ديل ناس عمكم فدياس
وناس عمكم الباشا وعمكم القوس وعمكم ود المنابير وعمكم أبوإيثار وعمكم أبوسيده
وغيرهم من أعمامكم الحلوين ديل وأي سعال في كلام حبوباتنا ولا جدودنا الذكرنا أساميهم ديل
تجوا تسعلوا منو هنا

يلا نقول بسم الله ونبدأ بي حجوه معناها شنو



والله بعرفك لمن تغيب بتجيب معاك المطر
شكراً أيها الحاضر الغائب ,,,,
موضوعك حيوي ومهم ويلا ورينا قواميسك ياعم .

بس ماتطول :SnipeR (40):

سحر القلوب
06-03-2009, 05:36 PM
كرسي ..... في الصف الأول كمان :SnipeR (80):


حجوة عارفاها ( حالتي ما متدهورة للدرجة دي :SnipeR (3): )

لكن أم ضبيبينة دي ما حصل لي الشرف والله !!!!!!

سؤال بالجنبة كده :
القرجة شنو ؟؟؟؟؟
غايتو أنا إستنتجت إنها حاجة زي البسطونة ؟؟؟ حاجة بيضربوا بيها ؟؟؟ صاح ؟؟؟



بالمناسبة :

ممنوع الضحك علينا في البوست ده :SnipeR (40):

سحر القلوب
06-03-2009, 05:55 PM
تاني جيتك :

مسدار أبو السرة ؟؟؟؟؟
مسدار يعني شنو ؟؟؟
وأبو السرة ده منو ؟؟؟

ما زال الضحك ممنوعا :SnipeR (40):

mohsenco
06-03-2009, 06:04 PM
والله بعرفك لمن تغيب بتجيب معاك المطر
شكراً أيها الحاضر الغائب ,,,,
موضوعك حيوي ومهم ويلا ورينا قواميسك ياعم .

بس ماتطول :sniper (40):

الرائع أبو العسوله
ريحه الدعاش تنفحنا بي طلتكم ومنكم الغيث وبكم تحمل السحب أفراحها

لكن كنت متوقعك تشرح لي وليداتنا ديل الحجوه معاناه شنو
لكن ما مشكله بورطت في الكبيره

mohsenco
06-03-2009, 06:35 PM
كرسي ..... في الصف الأول كمان :SnipeR (80):


حجوة عارفاها ( حالتي ما متدهورة للدرجة دي :SnipeR (3): )

SnipeR (40):


أول بالتبادي منوره المنتدى والذي أكتمل بدره بإنضمامك يا دكتوره

وتاني بالتبادي كراسي ما معانا أكان عندك بنبر جيبيه وتعالي
وتالتا بالتبادي هو من ناحيه الحاله متدهوره مدهوره لأنه لو سعلت أسي من المشلعيب ما بتعرفيه
أها نجي لي قصه عمك فدياس
باللول كدي الحجوه يا أبنائي الأعزاء هي القصة التي تنسج من الخيال
ودائماً ما كانت الحجوه تنسب للحبوبات لأنهن كانن بيحجننا ونحنه صغار
والله نص عمركم ضايع لو حبوباتكم ما حجوكم حجوه قبل النوم (محدثه طبعاً)
لأنه زمان كان قبل النوم ده بيبدأ من المغرب نجي جارين لي حبوبه عشان
تحكي لين القصص والقصص كتييييييره ولو عايزين نفرد ليها مساحه
إلا عمكم القوس ده يقوم جاري لأنه ح تاخد مساحه سيرفر الإستضافه ده كله


لكن أم ضبيبينة دي ما حصل لي الشرف والله !!!!!!

SnipeR (40):

أم ضبيبينه دي يا ستي قال ليك كان في إتنين أصحاب بيلعبوا مع بعض
أها واحد فيهم دخلت في عينه قمله بتعرفي القمله ولا أشرحه :blush-anim-cl:
المهم قام الأول قال لأخوه عيني دخلت فيها قمله أخوه قال ليه نان الناس بيقولوا قمله
أخوه بيقول ليه بيقولوا شنو
1- نان بيقولوا قمله
2- بيقولوا شنو
1- نان بيقولوا قمله
2- بيقولوا شنو
وأستمروا هكذا في سرد العبارتين ديل وأظنهم للليله ما وقفوا
والضبيبينه هي تصغير للضبانه (الذبابه) ويقصد بها هنا الذبابه التي تحوم حول الأذن
لا تنفك تنوني وتنوني وإنتي تناحيها بي يدك وتستمر في المنونا لحدي ما تزهجك

أها تم ربط الأحجيه وتصرف الصبيين وتكررارهم الكلام بتصرف الضبانه
ومن يومها صارت حجوه أم ضبيبينه


سؤال بالجنبة كده :
القرجة شنو ؟؟؟؟؟
غايتو أنا إستنتجت إنها حاجة زي البسطونة ؟؟؟ حاجة بيضربوا بيها ؟؟؟ صاح ؟؟؟
SnipeR (40):


إستنتاجك صحيح بنسبه 100% والقرجة هي عصا قصيرة محدودبه وناشفه نشاف عدوك
ما زي البسطونه لأنه بتكون لينه

كوني بمليون عافيه يا دكتوره

بركلاويه
06-04-2009, 01:27 AM
أها عايزين هنا نوريكم كلام أعمامكم ديل ناس عمكم فدياس
وناس عمكم الباشا وعمكم القوس وعمكم ود المنابير وعمكم أبوإيثار وعمكم أبوسيده
وغيرهم من أعمامكم الحلوين ديل وأي سعال في كلام حبوباتنا ولا جدودنا الذكرنا أساميهم ديل
تجوا تسعلوا منو هنا

يلا نقول بسم الله ونبدأ بي حجوه معناها شنو

اهم حاجة قبل ماندخل في الموضوع ...
الجماعة البقوا اعمام ديل محتجين:SnipeR (49): ... وأول واحد صاحبك المعـَلم بالأحمر ده
قال ليك قارن الصوره بى كلامك دا:004:

الباشا
06-04-2009, 03:04 AM
أووووووووووووووووووه يا محسن

ذكرتنا احلى الليالى مع حبوباتنا

بس والله يا دكتوره طلعتى كلمة حنكوشه دى ذاتها خشنه عليك
قلتى لى ما بتعرفى " القرجه " ؟؟؟ شكلك كدا دايرة ليك كبعه بيها فوق الدقنوس

يا محسن

ياخوى ... حجيوة أم ضبيبينه دى عندى فى الجزيره ماها كدى ....

علّول ما نجى نرقد ... تجى حبوبه تتبنا ... أيوه تتبنا
تلقانا مفنقلين العيونات فى العرش ... وشغالين فليع بالبراطيش
عشان نهجس ... لازم حبوبه تقعد حدانا وتحكى لينا حجيوة أم ضبيبنه

حبوبه : احجيكم حجيوة أم ضبيبينه ؟؟؟؟
ودخالى : آيييى يا حبوبه
حبوبه : خلّى آيييى

حبوبه : احجيكم حجيوة أم ضبيبينه ؟؟؟؟
ودخالتى : ما التشك ( لقب ودخالى البزعلوا شديد ) قال ليك آييى
حبوبه : خلّى ما التشك قال ليك آييى

حبوبه : احجيكم حجيوة أم ضبيبينه ؟؟؟؟
انا : يا حبوبه الدفان ( لقب ودخالتى البيقهروا ) ما قال ليك آييى
حبوبه : خلّى ما الدفان قال ليك آييى

حبوبه : احجيكم حجيوة أم ضبيبينه ؟؟؟؟
التشك : يا حبوبه قولى للدفان يبطل عبط
حبوبه : خلّى قولى للدفان يبطل عبط

حبوبه : احجيكم حجيوة أم ضبيبينه ؟؟؟؟
....... : ......................

وتستمر الحجيوه لما ننخمد كلنا ... ومرات نلقى حبوبه متلببانا كلنا فى حضنها الدافى للصباح

قوس قزح
06-04-2009, 03:17 AM
محسن الله يجازيك بالخير

لميتني معاهم العجايز المكركبين ديل ، ناس عمك الباشا وابوسيدة وابوايثار عجوز غابرين ( بالمناسبة صورتو المعلقي دي مصورا سنة 1978 ) ولو ما مصدقني اقرا في ( ضهر الصورة ) وابو سيدة ده ما عندو فرق من ابوي .. ود المنابير الا ساوي ليهو باروكة .. انا بالمناسبة اول دفعة امتحنت شهادة عربية ما تغشكم ( الدقن ) دي ولا اسع قاعد اضحك على حجوة ( ام ايه دي ) صدقني حتى ما قادر انطقا .. انتو بتجيبو الكلام ده من وين .. انا حاجزلي كرسي قدام جم صاحبتي سحر ومنكم نستفيد .. والماعندو كبير يشوف ليهو كبير

شكرا بابا محسن

الباشا
06-04-2009, 03:31 AM
شكرا بابا محسن
الحق يا محسن
وهات معاك البزازه
الواد لا تفوتو الرضعه

سحر القلوب
06-04-2009, 10:44 AM
قوس قزح ... الباشا الكبير
ضحكتوني ضحك ( يجازي محنكم http://www.alcampus.com/forum/images/smilies/campus%20(30).gif )

والله يا محسن أنا عرفت كلمة ( أعمامكم دي حتجيب ليك الهوا البارد )

البركلاوية : زولك المعلم بالأحمر ده لو جاب عشرة محامين وستين قاضي عشان يقنعنا بالصورة دي ...... حرّم ما نقتنع ..... الفوتشوب قاعد يعمل في شنو :0005:

الباشا : إنت هسي شفتني في قمة ( الخوشنة :011: ) ... ما شفتني زمن الحنكشة بالجد ... أنا عانيت معاناة !!!!! دي براااها حكاية
والله قاعدة أقرا في حجوة أم ضبيبنة حقيتك وأضحك بشكل


محسن : ألحق ترجم سريع ( الدقنوس ) شنو ؟؟؟ :SnipeR (78):

سحر القلوب
06-04-2009, 10:54 AM
أول بالتبادي منوره المنتدى والذي أكتمل بدره بإنضمامك يا دكتوره

وتاني بالتبادي كراسي ما معانا أكان عندك بنبر جيبيه وتعالي
وتالتا بالتبادي هو من ناحيه الحاله متدهوره مدهوره لأنه لو سعلت أسي من المشلعيب ما بتعرفيه

المنتدى منور بوجودكم يا محسن .. تسلم والله

أها عشان ( حقارتك دي ) أنا حأحكي ليك قصتي مع المشلعيب :

الوكت داك كنت شهادة عربية جديدة لنج ... كنت زي سوداني في بلاد الصين الشعبية !!!!
المهم يا سيدي .. كنت حايمة مع خالتي في زيارة للجيران وبعدها علقت ليها قلت ليها :
( شفتي المكرمية بتاعتهم جميلة كيف ؟؟ )
خالتي سكتت وما علقت ...
بعد أيام كانت بتسألني عن حبال صوفية ومعاها حاجات تانية .. قلت ليها ديل : ماما بتعمل بيهم مكرميات جميلة جدا

أها خالتي قامت علي ... إنت يا بت .. شنو ماساكاني مكرمية ومكرميات !!! هي شنو المكرمية دي ؟؟؟
أها أنا أشيل وأشرح بيدي وكرعيني ... ياخي الحاجة المعلقة في السقف دي .. ياخي الحاجة البختوها فوق دي ... ياخي ما ممكن تكوني ما عارفاها .... ياخي ....
في النهاية لما لقينا كل واحدة ( تغني على ليلاها ) ... خمخمنا عفيشاتنا ومشينا على ( ماما ) .. وبغيظ شديد خالتي قالت ليها : بتك دي واقعانا المكرميات ... هي شنو المكرميات دي ؟؟؟

ضحكت ماما أولا .. ثم قالت :



















المشلعيب :0005:

زينوبة
06-04-2009, 11:04 AM
غايتو يا عمو محسن بالغتا في اعمامكم دي ,, الود فدياس دة ما تشوف فصاحتو دي دة يا دوبو بيكون دخل ال26 (اكبر مني بي 6 سنة يعني) شفتو كيف؟؟؟:oo5o.com (27):
والله دي معلومة جديدة عن حجوة ام ضبيبينة ,,, انا حجوة كنتا عارفاها والضبان برضو بعرفو كويس بس مناسبة القصة ما عارفاها ,,,, والقرجة دي برضو ما كنتا عارفاها,,,
سحر القلوب ما بتعرفي الدقنوس بالغتي عاملة دقنوسك الكبير دة :0005: ,,, الدقنوس والله اعلم هو الراس والراس من ورا كمان العنقرة يعني اها دي قولي ما بتعرفيها كمان ,,,
طبعا انا ما عايشتا اي واحدة من حبوباتي او جدودي الله يرحمهم ,, بس بعرف كتير ,,
بيقولو :
(شناتك دي ,,تشبهي الكودي )....
مااااااااااااااا أو من هو الكودي,,,

فدياس
06-04-2009, 11:07 AM
أولاد الشهادة العربية ديل ناس فدياس



والله يا عمو محسن البلد دي نهائي ما بندس فيها سر !!
عرفتني كيفن شهادة عربية !!:SnipeR (57):

عمار
06-04-2009, 11:51 AM
ههههههههههههههههه

والله ابدعتوا في البوست ده ...:011:


لكن يا سحر القلوب شكلك عايزة كورس مكثف وطاااااااااااااااااااارئ

من قوله تيت ...








و جاييكم اكيد ...



اعمامنا اصحاب الخبرة ..














عشان نستفسر :0005:

أبو إيثار
06-04-2009, 12:01 PM
اهم حاجة قبل ماندخل في الموضوع ...
الجماعة البقوا اعمام ديل محتجين:SnipeR (49): ... وأول واحد صاحبك المعـَلم بالأحمر ده
قال ليك قارن الصوره بى كلامك دا::


والله العظيم أنا ماعارف تاني أسوي شنو
صورة وبالعافية خليتونا نجيبها برغم إنو عملت لي حظر جوي وبحري وبري في البيت
طبعاً مع ( أم إيثار ) والغالية ( إيثار ) قالوا لي بسحروك والكلام التاني وطبعاً قلت ليها
حبك أكبر وأكبر من الكلمات والصور :FONT]


[font="times new roman"]محسن الله يجازيك بالخير

لميتني معاهم العجايز المكركبين ديل ، ناس عمك الباشا وابوسيدة وابوايثار عجوز غابرين ( بالمناسبة صورتو المعلقي دي مصورا سنة 1978 ) ولو ما مصدقني اقرا في ( ضهر الصورة ) وابو سيدة ده ما عندو فرق من ابوي .. ود المنابير الا ساوي ليهو باروكة .. انا بالمناسبة اول دفعة امتحنت شهادة عربية ما تغشكم ( الدقن ) دي ولا اسع قاعد اضحك على حجوة ( ام ايه دي ) صدقني حتى ما قادر انطقا .. انتو بتجيبو الكلام ده من وين .. انا حاجزلي كرسي قدام جم صاحبتي سحر ومنكم نستفيد .. والماعندو كبير يشوف ليهو كبير

شكرا بابا محسن




والله أنا عارفك إنت الوحيد المتضرر من وجود صورتي في المنتدي كان عمنا الباشا عارف مقامو وماداسي عمرو ربنا يديه الصحة والعافية طبعاً المصيبة زمان أيام بداياتنا مع المنتديات
ناس كتير فكروني قدر الجماعة ديل والغايبين الله يذكرهم بالخير وقالوا الموية تكضب الغطّاس والحمدلله كلهم شافوني ومنهم إت ياعجوز وبالله ماقلت لي لحظة الشوفة وكانت من أجمل لحظات حياتي والله برغم حبي ليك ذكرتني لحظتها بالمرحوم أبوي وكنت غدوتي ومازلت وستظل


قوس قزح ... الباشا الكبير
ضحكتوني ضحك ( يجازي محنكم http://www.alcampus.com/forum/images/smilies/campus%20(30).gif )

والله يا محسن أنا عرفت كلمة ( أعمامكم دي حتجيب ليك الهوا البارد )

البركلاوية : زولك المعلم بالأحمر ده لو جاب عشرة محامين وستين قاضي عشان يقنعنا بالصورة دي ...... حرّم ما نقتنع ..... الفوتشوب قاعد يعمل في شنو

الباشا : إنت هسي شفتني في قمة ( الخوشنة :011: ) ... ما شفتني زمن الحنكشة بالجد ... أنا عانيت معاناة !!!!! دي براااها حكاية
والله قاعدة أقرا في حجوة أم ضبيبنة حقيتك وأضحك بشكل


محسن : ألحق ترجم سريع ( الدقنوس ) شنو ؟؟؟ :SnipeR (78):




والله ياقوس لقيت ليك رفيق وكان الشهادة العربية قلت لناس أبوي ماعايزها وده السبب الخلاني ماأقرا جامعة زاتو.

عمار حبة
06-04-2009, 12:26 PM
انتو يا اخوانا الشكل شنو..
محسنكو دا جنو مشاكل..:SnipeR (89):

زى سحر
اخيتى دى فى ناس كُتااااااااااار
لية ماجوا يسألوا..

بعدين انتو محسنكو وينو هو زااااتو..؟

الباشا
06-04-2009, 12:58 PM
البركلاوية : زولك المعلم بالأحمر ده لو جاب عشرة محامين وستين قاضي عشان يقنعنا بالصورة دي ...... حرّم ما نقتنع .....

الباشا : إنت هسي شفتني في قمة ( الخوشنة :011: ) ... ما شفتني زمن الحنكشة بالجد ...

محسن : ألحق ترجم سريع ( الدقنوس ) شنو ؟؟؟ :SnipeR (78):[/RIGHT]

لا لا لا .... كدا انا سحبت كلمة حنكوشه

الكتلل .... الدكتوره بى حرااااما .... والله إنتى يتفات ليك بلد ... بس جدعه وعفيت منك
قلتى لى المكرميه ؟؟؟ ..... صدقى دى حناكيش الخليج ما بيعرفوها ....

عمك عنده قرجه (مضببه ) ... كبعتها فوق دقنوس الدكتوره يقلبها ست شاى :oo5o.com (27):

غلوطيه صغيره ع الماشى

عمى طوييييييييييييييييييييييييييييييل وما بيلحق الكعكول

يطلع شنو ؟؟؟

سحر القلوب
06-04-2009, 03:45 PM
عمى طوييييييييييييييييييييييييييييييل وما بيلحق الكعكول

يطلع شنو ؟؟؟

سلام ٌ قولا ً من رب رحيم !!!!
بسم الله !!! ده شنو يا جماعة !!!!

أنا منهج سنة أولى ما تميتو .... تقوم تدوني منهج سنة تانية :SnipeR (11):




كوكتيل : ياخي بتبالغ !! والله أنا تلميذة نجيبة ومستواي عالي عدييييل :0005:
علا ّ بس دايرة لي حبة دروس تقوية وكده
هسي إنت عارف بوست عمك خضر بتاع يا ريتني بت ... فهمتو كلو بصمتو ما عدا كلمة واحدة ( اللدايات ) شنو ؟؟؟؟


عمار حبة : أيوة كده ... إددييييييللو
الناس كلها إتدسدست وعملت روحها فاهمة وناقشة .... علا ّ بس زولتك المسكينة دي جات بكل أريحية وطيبة نفس وتلقائية وإعترفت :SnipeR (78):


زينوبة وفدياس : يا جماعة إنتو من زمن الشهادة عربية صغاااار ؟؟؟ لكن لقيتكم ناس قدام بشكل :0005:

بركلاويه
06-04-2009, 06:43 PM
سحر القلوب ...
شفتي صاحبك المعلم بالأحمر طول الليل مانام....
يتمتم ساكت ...:SnipeR (46):
وحكاية الصورة دي اصلها عاملا ليهو ( ارتكارية )
انتى على حس انك دكتوره ( ارتكارية دي يعني النقة الكتيرة بالتلفون )
انتى عارفاهو من زمن الاخضر ... صاحبك بحب الحنكشة والتزويق ...
بس كمان
يا سحر المشلعيب ده اول مره اسمعبو
نحنا عندنا اسمو المُـعْـلاق
بعدين يا محسن ... يا شقى الحال الليلة اتصلت ليك على السودان
وعندي حبوبة(ن) عمرها 95 سنة جبت ليك منها كم مفردة على حد قول (ناس الشهادة العربية) ناس سحر
وكم شيتاً قديم كدي ...على حد قول المخشوشنة (زينوبة):011:
وخليها تجي هنا هي مشت وين (يمشى صوفا )
انت بالمناسبة دى ...
مشى صوفك يعني شنو؟؟؟
اي نسيت جيت اسأل عمو ابو ايثار عن المروبنات يعني شنو.؟
وانت ي االعامل فيها عمرك 17 ما تعاين لى كدي ... برضك ماك عارفا:SnipeR (25):

سحر القلوب
06-04-2009, 07:45 PM
يا جماعة ......

البوست ده نوهائيا ً ما ماشي كويس

( نوهائيا ً دي مقصودة يا أبو سيدة ... أوعك تجي ناطي )

الناس شغالة فيني إمتحانات من غير زول يديني المنهج أصلا ً !!!!!!

والله يا البركلاوية ... وكت شفتك إسمك منور في آخر مشاركة جيت جارية جري على البوست .. إتعشمت فيك خير .. قلت أكيد جات تديني معاني للكلام الحايم ده

جيت لقيتك إنت زاتك شغالة فيني إمتحانات :SnipeR (40):


مشلعيب :

والله يا البركلاوية وما ليك علي حلفان ... لما ( صاحبك باللون الأحمر داك ) ... لما جيت لقيت الصورة معلقة تحت إسمو .. في البداية ما فهمت هي معلقة ليه :SnipeR (46):
تاني بعد شوية .. قلت أوعى يكون ( عمك ) ده صاحب الصورة !!!!!
صدقيني كان نفسي أقول ليهو ( حاول مرة أخرى ... ولما تحاول مرة أخرى أعملها معقولة شوية عشان تتبلع :011: )





هووووي وقد أعذر من أنذر ..... أشرحووووووو .....

وإلا .......












حأسقط :dunno:

mohsenco
06-04-2009, 11:27 PM
تاني جيتك :

مسدار أبو السرة ؟؟؟؟؟
مسدار يعني شنو ؟؟؟
وأبو السرة ده منو ؟؟؟

ما زال الضحك ممنوعا :sniper (40):

يا دكتوره باقي ليك إنتي لمن قريتي طب أدوكي الشهادة دي في تلاته يوم
إنتي هناك قريتي سته سنه وعندنا هنا إن شاء الله الكريم على العشرة الأولى تكوني كملتي السمتسر الأول طولي بالك شويه

أها نجي لي سعالك اللزيز ده
كلمة المُسدار مشتقة من الفعل سدر بمعني ذهب‎ ‎او ورد ، وتحتمل هذه الكلمة عدة معاني ‏مرتبطة بالاشتقاق الذي ذكرناه ، فالمسدار في‎ ‎البطانة يعني المرعى أو ‏المورد الذي تتجه اليه الإبل
وهو يطلق عليه في الإصطلاح شعر الرباعيات
وأكيد سمعتي بي شعر الرباعيات زي قصيدة رباعيات عمر الخيام ورباعيات صلاح جاهين وغيرهم من شعراء الرباعيات
من أشهر مواطنه البرنامج الشهير للأستاذ محمد الفاتح يوسف أبوعاقلة وكان يقدم في إذاعة ودمدني إسمه دوبيت ومساديت
وكانت مقدمة البرنامج جميلة جداً عبارة عن دوبيت مطلعه
الناس في العروض ما تقيسه بي تيبانه
ما يقرك لباسم والعروض عريانه
ديل حراز زي التكنو أمانه
زي إبل الرحيل شايله السقى وعطشانه

ومن أشهر شعراء المسادير جدنا الحردلو وجدنا عوض الكريم أبوسن وعمنا الصادق أبو آمنه وجدنا ود ضحويه ومن المعاصرين عبد الله ود شوراني الذي تتم إستضافته كثيراً في برنامج شوارد في التلفزيون القومي وهو الذي قال
غاب نجــــــــم النَطِح* والحر علينا إشتدَ‎
ضَيـَّـقـْنـــــا وقِصــــــر لَيلُو ونهــــارُوْ إمتدَّ‎
نَظِرة‎ ‎المنـــــــــــُّو للقانون بِقيـــت إتحدَّى‎
فتحـــت عنــــــدي منطقـــة‎ ‎الغُنا الإنســَدَّ‎

أما أبو السره فلا أعرفه ولكن أعتقد أن إرتباط هذين الكلمتين أتى من قصيدة لشاعرنا الكبير القدال
والتي أسماها مسدار أبو السره وغنتها مجموعة عقد الجلاد والتي يقول مطلعها
أُمّاتِي القِبيلْ

بي حِنّهنْ لجّـنّي

كَرفة وقَلدة

كيف شوق اللّبن رَجّني

حُزناً جاني في مَيْع الصِّبا يلَجِّني

أطلعْ مِنِّي يا جلدي المِنمِّل جِنيِّ

واطلعْ مِنِّي يا حُزناً بِقى مكَجِّني

mohsenco
06-04-2009, 11:39 PM
اهم حاجة قبل ماندخل في الموضوع ...
الجماعة البقوا اعمام ديل محتجين:sniper (49): ... وأول واحد صاحبك المعـَلم بالأحمر ده
قال ليك قارن الصوره بى كلامك دا:004:

أهلاً بقائد الأسطول نور المسدار علقت مسدار دي
الزول ده أنا عاينته للصوره وكنته متوكد إنه ما معاهم
لكن تقولي شنو للتلفونات البتجي نص الليل
وفعلاً الصوره تؤكد إنه مواليد 82 بالميلادي يا القوس ما هجري
لكن قلته أقلقله شويه وأخليه يقدم إعتراض بعد إثبات المستندات الرسميه
وعايزين صوره من شهادة الميلاد تؤكد إنه الصوره دي كانت قبل شهرين

سحر القلوب
06-04-2009, 11:54 PM
محسن : من علمني حرفا ً صرت ُ له عبدا ً :)

الله يديك العافية بالجد ... موضوع المسدار ده كان متعبني بالجد وهسي يادوب وقع لي
لكن بصراحة الأمثلة الجبتها ما فهمت معانيها تمام ( لقدام تشرحها ) :in_love:

بركلاويه
06-05-2009, 12:05 AM
الحقي يا سحر ...
لمن جيتي كان عندنا واحد اسمو فتح العليم الله يجازي محنو ...
كان غايب وسبب غيابو ده خلي بقولو ليكي بيني وبينك ...
الا الليله رجع ورش الموقع كلام ...
وفي موضوع القضية حقتو لقيتو كاتب مثل قال امو قالتو ...
وقال ما عارفو مثل ولا امو هي القالتو :omg:
على العموم
قال
كراع البقر جيابه
عمرك سمعتيبو ...
لكن الشقية زينوبه ديك تكون عارفاهو
انا سمعتبو لكن ما بعرف علاقة البقر بالكراع شنو؟

بعدين يا عمو الباشا
الفزوره حقتك دي

عمى طوييييييييييييييييييييييييييييييل وما بيلحق الكعكول
كلمة الكعكول هي يا ها تعني الكعنكول حق الصمغ؟؟ ( الصمغ العربي يا ناس الشهاده العربية):SnipeR (9):

الباشا
06-05-2009, 02:18 AM
شفتي صاحبك المعلم بالأحمر طول الليل مانام....
يتمتم ساكت ...:sniper (46):
وحكاية الصورة دي اصلها عاملا ليهو ( ارتكارية )
انتى على حس انك دكتوره ( ارتكارية دي يعني النقة الكتيرة بالتلفون )
انتى عارفاهو من زمن الاخضر ... صاحبك بحب الحنكشة والتزويق ...
بس كمان
يا سحر المشلعيب ده اول مره اسمعبو
نحنا عندنا اسمو المُـعْـلاق
بعدين يا محسن ... يا شقى الحال الليلة اتصلت ليك على السودان
وعندي حبوبة(ن) عمرها 95 سنة اتزويدته ليك بى كم .. مفردة على حد قول (ناس الشهادة العربية) ناس سحر
وكم شيتاً قديم كدي ...على حد قول المخشوشنة (زينوبة):011:
وخليها تجي هنا هي مشت وين (يمشى صوفا )
انت بالمناسبة دى ...
مشى صوفك يعني شنو؟؟؟
اي نسيت جيت اسأل عمو ابو ايثار عن المروبنات يعني شنو.؟
وانت العامل فيها عمرك 17 ما تعاين لى كدي ... برضك ماك عارفا:sniper (25):


الناس شغالة فيني إمتحانات من غير زول يديني المنهج أصلا ً !!!!!!

والله يا البركلاوية وما ليك علي حلفان ... لما ( صاحبك باللون الأحمر داك ) ... لما جيت لقيت الصورة معلقة تحت إسمو .. في البداية ما فهمت هي معلقة ليه :sniper (46):
تاني بعد شوية .. قلت أوعى يكون ( عمك ) ده صاحب الصورة !!!!!
صدقيني كان نفسي أقول ليهو ( حاول مرة أخرى ... ولما تحاول مرة أخرى أعملها معقولة شوية عشان تتبلع :011: )



هووووووى يا حرووووووم

صاحبى ده إنتن مالكن معاهو
هسع عليكم البزورو .... سموا بالرحمن وقولوا ما شاء الله ... عيوناتكن بااااردى .... ركزوا فى الصوره وقولن صلاتكن على أبو فاطنه .... فى صوره فى المنتدى ده كلو أحلى من صورة أبو إيثار ... عرفنا القوس غيران من وسامتو !!! ورشاقتو .... إنتن مالكن معاهو ؟؟؟ ... اقول ليكم حاجه ابو إيثار ده كل ما يمشى مع القوس فى حته ... ياكل الجو عليه .. كل الجو وكان مغالطنى ... امشو أسألوا ناس السوق .... ... وبعدين تعالن هنا ..... وفى ضمتكن الاصغر منو فيهم ... وايش جاب لجاب .... لمن صاحبى كان فى المتوسط ... ناس خلصوا الجامعه ده إذا ما كانوا متزوجين ...

وبعدين تعالى هنا يا دكتوره .... إنتى مالك بتتغابى فينى العرفه ... قايلانى عجوز ذى أخوكن ... يا حليل أيام النيلين ...

شوفن إنتن أخير ليكن تفكن درب صاحبى ده

وقد أعذر من أنذر

قوس قزح
06-05-2009, 02:51 AM
الحق يا محسن
وهات معاك البزازه
الواد لا تفوتو الرضعه

شوف يا جدو .. انا عارف نفسي ماني صغير .. بعدم دخلت في بداية ( التلاتينيات) لكن انت بالنسبة لي تعتبر ( جدو) اما ابو ايثار الغاشكن بي صورتو المزورة دي .. انا بس عاد مو شفتو اكثر من عشرة مرات وجاني ومشيت ليهو وعارف حقيقتو تمام .. حتى مرتو قالتو انت لمان تصاحب ما تصاحب ناس قدرك !! قال ليها الانسان ماب يقيسوهو بي عمرو وصراحة في دي كان صادق جدا .. لأنو ما زالت روحو شباب ويتمتع بحيوية الشباب ، بعدين ياباشا يغيرو من شنو .... ههههههههه ضحكتني والله .. والله فعلا الما عارف يقول عدس !!!

sabrielseedah
06-05-2009, 06:12 AM
سلامات للجميع هنا....
ولمن نجيكم...
شنو لامين في سحر القلوب
ضحك كده... عموما لمن نجي بمهله

سحر القلوب
06-05-2009, 08:05 AM
[color="red"]كراع البقر جيابه
[/COLO

أنا مما شفت البتاعة دي بهناك .... حسيت إنها حتقع فوق راسي http://www.alcampus.com/forum/images/smilies/campus%20(24).gif


شوفن إنتن أخير ليكن تفكن درب صاحبى ده

وقد أعذر من أنذر


ألحققققققي يا البركلاوية .... صاحبنا ( ذو اللون الأحمر والصورة الأصغر ) إستعان بــ ( قوات صديقة )

يكون من شنو ؟؟؟ الرجاء الإختيار من ثلاثة إجابات :
1 - إتجرس
2- دق جرس ( بكسر الجيم )
3- إتجرس عديييييييييل http://www.maravi-alebda.com/vb/images/smilies/SnipeR%20(43).gif




وبعدين تعالى هنا يا دكتوره .... إنتى مالك بتتغابى فينى العرفه ... قايلانى عجوز ذى أخوكن ... يا حليل أيام النيلين ...

الزول ده إتجرس والا أنا ما بشوف ؟؟؟؟
إنتي يا البركلاوية :
تفتكري الرجال ديل متجرسين من حكاية العمر لشنو :4f7c50bc2e7eee3c450


مشلعيب حنين :
النيلين يا باشا .. تسكن بين حنايا القلب وربوع النفس .. هناك إلتقيتكم .. إلتقيتهم ... هناك عرفت كل الجميلين :love:

سحر القلوب
06-05-2009, 08:22 AM
.. والله فعلا الما عارف يقول عدس !!!

والله ما تتخيل إصرارك على ( إنكار الحقائق ) عاجبني كيف :SnipeR (7):


شنو لامين في سحر القلوب
ضحك كده... عموما لمن نجي بمهله

شفت كيف عاملين فيني عليك الله !!!!
مسكيييييينة أنا .... ياااا حليلي http://www.maravi-alebda.com/vb/images/smilies/oo5o.com%20(12).gif

البعد الخامس
06-05-2009, 11:18 AM
والله يا سحر القلوب الناس ديل سوك حيطه قصيره

وانا الكلام دا ما برضاهوا ليك .

يابركلاويه ما سمعتى بى المثل

البقول كراع البقره جيابه ؟؟؟؟

سحر القلوب بتعرفى السرع

بضم السين .

بركلاويه
06-05-2009, 11:44 AM
سحر القلوب حبيبتي
والله اني قد احببتك سابقا ما يكفي لحب كل البشر
والآن
احبك
بقدرما
اعطيت من قلب :oo5o.com (11):
وبقدر مساحة المشاعر من كل مشاعري
حبيت اقول صباح الخير
لكن
في بالى كلام فتح العليم
كراع البقر جيابه
يعني لقيتو يبقالى ينطبق عليكي ...
http://www.geocities.com/mohdelsayed56/36_2_21.gif
بمعنى !!
الساساق:SnipeR (67): على المكان ( الليييييلة انتى بتعرفي الساساق )
يعني يرتبط الشخص بالمكان يروح ويجي يجي ويروح
يا ربى الناس الصغار ديل ناس محسنكو رايم شنو؟
http://www.geocities.com/mohdelsayed56/36_2_20.gif

البعد الخامس
06-05-2009, 12:13 PM
بركلاويه إزيك .. مشتاقين والله

اجتهاد ما كعب لكن دا ما المعنى المقصود

من المثل .

سحر القلوب
06-05-2009, 12:16 PM
\
سحر القلوب بتعرفى السرع

بضم السين .

هسي دي حالتك واقف معايا :busted_red:


سحر القلوب حبيبتي
والله اني قد احببتك سابقا ما يكفي لحب كل البشر
والآن
احبك
بقدرما
اعطيت من قلبوبقدر مساحة المشاعر من كل مشاعري

أحبك ِ الذي أحببتني فيه




[COLOR="Magenta"]حبيت اقول صباح الخير

صباح الورد :oo5o.com (25):





في بالى كلام فتح العليم
[COLOR="Blue"]كراع البقر جيابه
يعني لقيتو يبقالى ينطبق عليكي ...

بمعنى !!
الساساق على المكان ( الليييييلة انتى بتعرفي الساساق )
يعني يرتبط الشخص بالمكان يروح ويجي يجي ويروح


قصدك شنو ؟؟؟ :crazy:

بالمناسبة : بعرف الساساق

يا ربي يكون قصدك : مفروض يكتبو في عنوان البوست ده ( درس خصوصي لسحر القلوب :SnipeR (63): )

البعد الخامس
06-05-2009, 12:19 PM
سحر القلوب

ما تنطى من الموضوع نحن فى إنتظار الاجابه

بركلاويه
06-05-2009, 12:20 PM
بركلاويه إزيك .. مشتاقين والله

اجتهاد ما كعب لكن دا ما المعنى المقصود

من المثل .
بعدنا الخامس
تحياتنا وشكرا على الاشواق
قلت شنو:sweatdrop:
ده ما المعنى؟؟؟؟
الحقني بيهو ...
قبال سحر القلوب تشمت فيني
الليييله
قال عملت فيها عارفة ...
والدكتوره الليلة الجمعة واصلا زهجانه تقوم تتفشى فيني :SnipeR (63):

سحر القلوب
06-05-2009, 12:27 PM
بعدنا الخامس
تحياتنا وشكرا على الاشواق
قلت شنو:sweatdrop:
ده ما المعنى؟؟؟؟
الحقني بيهو ...
قبال سحر القلوب تشمت فيني
الليييله
قال عملت فيها عارفة ...
والدكتوره الليلة الجمعة واصلا زهجانه تقوم تتفشى فيني :




واااااااااااااااااااااااااااااااع :SnipeR (63):

( ياخي لي ستين سنة ما قلت واااع دي هههههههههههه )

ضحكت لإني فعلا ً كنت ناوية أشمت فيك جنس شماتة ... بس إتأخرت في الرد عشان مشيت أفتش أيقونات شماتة .. جيت لقيتك فعلا متوقعة شماتي :SnipeR (63):


يجازي محنكم ... يا جماعة ... تبكونا بجهة وتضحكونا بجهة

سحر القلوب
06-05-2009, 12:32 PM
سحر القلوب

ما تنطى من الموضوع نحن فى إنتظار الاجابه


إنت ياخوي فاهم البوست ده بالمعكوس والا شنو ؟؟؟؟ :sweatdrop:

أنا بشرحوا لي .... مش بيسألوني !!!!

محسن : إنت فين يا محسن ؟؟؟؟ :tv:

الباشا
06-05-2009, 01:22 PM
واااااااااااااااااااااااااااااااع :SnipeR (63):

( ياخي لي ستين سنة ما قلت واااع دي هههههههههههه )


بااااااااس قبضتك يا دكتوره

تتذكرى أب جقادو وشلتوا

أهاااا ديل ناس وااااااااااااااع ذاتم

صدقى ...... يا دكتوره حننتينى والله

كدى اول حاجه مدبرسه مالك ؟؟ .... الشغل كتر عليكم ؟ واللا مشتاقه للأهل ؟؟؟ ... ديل بالظبط الحالتين البيعكننوا مزاج عمك .... غير كدا طاء و ظاء :oo5o.com (32): .......

بركلاويه

ود عمى " البعد الخامس " كلامو صاح .... الساسيقى دى شغل شوايقه ... أما كراع البقر جيابه ده شغل اهل العوض .. عرب الجزيره ده شغلنا نحن يعنى ... فالبقر معروف بانه حيوان على نيته .... أهباااااال وداقى الطناش ..... البقره تسوى الغلط وينهروها ... يدقوها ... يطردوها .... ولا يهمهما .... ترجع تانى تسوى الدايره تسويه .... أو مثلاً تاكل زرع الناس بالليل وتهرب بفعلتها ... أها الزول البيسوى الغلط وينفد بجلدوا من العقاب ( She make it) ... نهددو ونقول ليه " كراع البقر جيابه " ... بمعنى بكره يا هبله أو يا أهبل حتكرر نفس الغلطه ... بس يا ويلك

وأى ورطه يا سحر القلوب .. عمك جاهز بس ترسلى الاتعاب ... يعنى هو انتو براكم التاكلوها ولعه :4f7c50bc2e7eee3c450

سحر القلوب
06-05-2009, 01:58 PM
كدى اول حاجه مدبرسه مالك ؟؟ .... الشغل كتر عليكم ؟ واللا مشتاقه للأهل ؟؟؟ ... ديل بالظبط الحالتين البيعكننوا مزاج عمك .... غير كدا طاء و ظاء

والله يا باشا ... كتبت كلام كتير في الثرثرة بهناك ... لما جيت أرسلو قام ضاع
المهم ... ببساطة كده ... عندنا طفل تعبان وعيان شديد مرقد معانا في المستشفى ... الحكاية طويلة وعندها تشعبات كتيرة ... لكن الطفل ده بالجد مدخلني في نفسيات
تعرف يا باشا : من الصعب جدا ً تتعامل مع أرواح البشر ( غايتو بس كانت غلطة )
غايتو يا باشا من هسي خليك عارف ... الطفل ده لو مات أنا حأفتح ليكم بيت بكاااااااء عدييييييييل في المنتدى




بااااااااس قبضتك يا دكتوره

تتذكرى أب جقادو وشلتوا

أهاااا ديل ناس وااااااااااااااع ذاتم


كانت أيام جميلة وما بتتنسى :)



ده شغل اهل العوض .. عرب الجزيره ده شغلنا نحن يعنى ... فالبقر معروف بانه حيوان على نيته .... أهباااااال وداقى الطناش ..... البقره تسوى الغلط وينهروها ... يدقوها ... يطردوها .... ولا يهمهما .... ترجع تانى تسوى الدايره تسويه .... أو مثلاً تاكل زرع الناس بالليل وتهرب بفعلتها ... أها الزول البيسوى الغلط وينفد بجلدوا من العقاب ( She make it) ... نهددو ونقول ليه " كراع البقر جيابه " ... بمعنى بكره يا هبله أو يا أهبل حتكرر نفس الغلطه ... بس يا ويلك


البركلاوية : إنتي كنتي قصدك إنو أنا هبلة :SnipeR (40):


والله يا باشا بالجد تشكر على الشرح الوافي ده والله يديك العافية ... كلام جميل بالجد

الباشا
06-05-2009, 03:03 PM
عندنا طفل تعبان وعيان شديد مرقد معانا في المستشفى ... الحكاية طويلة وعندها تشعبات كتيرة ... لكن الطفل ده بالجد مدخلني في نفسيات
تعرف يا باشا : من الصعب جدا ً تتعامل مع أرواح البشر ( غايتو بس كانت غلطة )
غايتو يا باشا من هسي خليك عارف ... الطفل ده لو مات أنا حأفتح ليكم بيت بكاااااااء عدييييييييل في المنتدى
[/center][/size]




هذا ينم عن سمو خلق الدكتوره " سحر القلوب " التى تهتم بمريضها حتى اثناء حياتها الخاصه .. ربنا يبارك لها فى جهودها ... ويجعله فى ميزان حسناتها وأن يجزيها عن مرضاها طيب الجزاء وأن ينولها مرادها فى الدنيا والآخره .... فادعوا معى لشفاء هذا الطفل الذى لانعرف اسمه ولا حتى جنسيته ولا حتى أين يرقد أو ماذا يعانى سوى المرض الذى أقلق زميلتكم " سحر القلوب "

أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..
أذهب البأس رب الناس ، اشف و أنت الشافي ، لا شفاء إلا شفاؤك ، شفاءً لا يغادر سقماً ..

أذهب البأس رب الناس ، بيدك الشفاء ، لا كاشف له إلا أنت .. يارب العالمين

لا إله الا الله الحليم الكريم .. لا اله الا الله العلي العظيم ..
لا إله الا الله الحليم الكريم .. لا اله الا الله العلي العظيم ..
لا إله الا الله رب السماوات السبع و رب العرش العظيم ..
لا إله الا الله رب السماوات السبع و رب العرش العظيم ..
لا إله الا الله الحليم الكريم .. لا اله الا الله العلي العظيم ..
لا إله الا الله رب السماوات السبع و رب العرش العظيم ..
لا إله الا الله الحليم الكريم .. لا اله الا الله العلي العظيم ..

لا إله إلا الله وحده لا شريك له .. له الملك .. و له الحمد و هو على كل شئ قدير
اللهم اني أسألك من عظيم لطفك وكرمك و سترك الجميل
أن تشفي الطفل " مريض الدكتوره سحر القلوب "
وأن تمده بالصحة و العافية وان ترفع عنه وتشفيه
حتى يكون فرداً عاملاً ومفيداً للمجتمع الاسلامى
لا ملجأ و لا منجا منك إلا إليك .. إنك على كل شيء قدير ..



آآآآآآآآآآآآآآآآآآآآآآآآآمين يا رب

شكراً بركلاويه

الباشا
06-05-2009, 03:06 PM
[font="times new roman"][size="5"]البركلاوية : إنتي كنتي قصدك إنو أنا [color="magenta"]هبلة :sniper (40):



حاشاك يا دكتوره من الهبل

وإنما الشرح حكم عااااد


مشيهااا بأااااااا

البعد الخامس
06-05-2009, 03:14 PM
إنت ياخوي فاهم البوست ده بالمعكوس والا شنو ؟؟؟؟ :sweatdrop:

أنا بشرحوا لي .... مش بيسألوني !!!!

محسن : إنت فين يا محسن ؟؟؟؟ :tv:


أى استاذ وطريقته فى الشرح

اها انا طريقتى بتاعت الاسئله

إذا ما بتنفع معاك عشان نستمر فيها

طوالى .

الطفل مكتس بيك يا دكتوره

تلقى الاجر من ربنا إن شاء الله

وربنا يكتب ليهو السلامه

البعد الخامس
06-05-2009, 03:15 PM
البركلاوية : إنتي كنتي قصدك إنو أنا هبلة

حاااااااااااااااااشااااااااااااااااااااك

انتى متحسسه مالك ؟؟؟؟

يا دكتوره

سحر القلوب
06-05-2009, 11:54 PM
مشيهااا بأااااااا



ههههههه .... والله أبدا ً يا باشا ... لكن بالجد لقيتها فرصة ... قلت أدلع حبتين على البركلاوية وكمان يمكن تجر ليها زعل زي البوست بتاع البعد الخامس الرافعو في ( فتح العليم ) :harhar1:



البركلاوية : إنتي كنتي قصدك إنو أنا هبلة

حاااااااااااااااااشااااااااااااااااااااك

انتى متحسسه مالك ؟؟؟؟

يا دكتوره

أب سنينة بيضحك على أب سنينتين :cool:


إذا ما بتنفع معاك عشان نستمر فيها

طوالى .

:SnipeR (85):

mohsenco
06-06-2009, 01:56 AM
أووووووووووووووووووه يا محسن

ذكرتنا احلى الليالى مع حبوباتنا

بس والله يا دكتوره طلعتى كلمة حنكوشه دى ذاتها خشنه عليك
قلتى لى ما بتعرفى " القرجه " ؟؟؟ شكلك كدا دايرة ليك كبعه بيها فوق الدقنوس

يا محسن

ياخوى ... حجيوة أم ضبيبينه دى عندى فى الجزيره ماها كدى ....

علّول ما نجى نرقد ... تجى حبوبه تتبنا ... أيوه تتبنا
تلقانا مفنقلين العيونات فى العرش ... وشغالين فليع بالبراطيش
عشان نهجس ... لازم حبوبه تقعد حدانا وتحكى لينا حجيوة أم ضبيبنه

حبوبه : احجيكم حجيوة أم ضبيبينه ؟؟؟؟
ودخالى : آيييى يا حبوبه
حبوبه : خلّى آيييى

حبوبه : احجيكم حجيوة أم ضبيبينه ؟؟؟؟
ودخالتى : ما التشك ( لقب ودخالى البزعلوا شديد ) قال ليك آييى
حبوبه : خلّى ما التشك قال ليك آييى

حبوبه : احجيكم حجيوة أم ضبيبينه ؟؟؟؟
انا : يا حبوبه الدفان ( لقب ودخالتى البيقهروا ) ما قال ليك آييى
حبوبه : خلّى ما الدفان قال ليك آييى

حبوبه : احجيكم حجيوة أم ضبيبينه ؟؟؟؟
التشك : يا حبوبه قولى للدفان يبطل عبط
حبوبه : خلّى قولى للدفان يبطل عبط

حبوبه : احجيكم حجيوة أم ضبيبينه ؟؟؟؟
....... : ......................

وتستمر الحجيوه لما ننخمد كلنا ... ومرات نلقى حبوبه متلببانا كلنا فى حضنها الدافى للصباح

أول هاجه أزيك يا هفيف يا شفيف يا رائع يا بارع

أشواقنا ليك ما ليها حد
أها يا الحبيب هنا عرفنا ود خالتك إسمه التشك
وود خالتك إسمه الدفان إنت كان إسمك منو ؟

الله يديك العافيه لكن تعال يا غالي الجزيرة وين ؟

mohsenco
06-06-2009, 02:04 AM
محسن الله يجازيك بالخير

لميتني معاهم العجايز المكركبين ديل ، ناس عمك الباشا وابوسيدة وابوايثار عجوز غابرين ( بالمناسبة صورتو المعلقي دي مصورا سنة 1978 ) ولو ما مصدقني اقرا في ( ضهر الصورة ) وابو سيدة ده ما عندو فرق من ابوي .. ود المنابير الا ساوي ليهو باروكة .. انا بالمناسبة اول دفعة امتحنت شهادة عربية ما تغشكم ( الدقن ) دي ولا اسع قاعد اضحك على حجوة ( ام ايه دي ) صدقني حتى ما قادر انطقا .. انتو بتجيبو الكلام ده من وين .. انا حاجزلي كرسي قدام جم صاحبتي سحر ومنكم نستفيد .. والماعندو كبير يشوف ليهو كبير

شكرا بابا محسن

معليش يا إبني معليش ما مقصوده كانت غلطه مطبعيه
لكن سبحان الله إسمك أنكتب براه قدر ما أمسحه يجي راجع
بعدين أول شهاده عربيه إنته عارفه كانت سنه كم
والله الظاهر عليك ناسي إنه البوست ده دكشنري بمساعده عمك قوقل
أول سوداني دخل السعودية سنه 1950 والمصيبه ولده كان في تانيه ثانوي
يعني سنه 53 إمتحن الشهادة ودخل الجامعة كأول دفعة من الشهادة العربية
أها إنته كنته معاهم ولا نخلي زول الصوره في حاله

وبعدين يا حلوين ما قلنا كراسي مافي العنده بنبر يجيبه معاه الما عنده الثباته بتجيبه
بس لو سمحتوا عراريق وطواقي ما معانا

الباشا
06-06-2009, 02:06 AM
أول هاجه أزيك يا هفيف يا شفيف يا رائع يا بارع

أشواقنا ليك ما ليها حد
أها يا الحبيب هنا عرفنا ود خالتك إسمه التشك
وود خالتك إسمه الدفان إنت كان إسمك منو ؟

الله يديك العافيه لكن تعال يا غالي الجزيرة وين ؟

برضو ود الباشا

ماهى الحكايه وراثه برضو :SnipeR (82):


الجزيره قريييييب من الخرتوم

سمعت بى حاجه اسمها العوج الدرب

وهسى الجماعه قلعوا واطاتنا عينك عينك ... وسموها " جياد "

طلتك يا محسن ذى هلال رمضان .. وين الحى بيك ؟

يديك الف عافيه

mohsenco
06-06-2009, 02:06 AM
الحق يا محسن
وهات معاك البزازه
الواد لا تفوتو الرضعه

حااااااااااااااااادل يا عمو

ههههاك

http://www6.mashy.com/uploads/VJ/gb/VJgbDk9V_uSVFL8wbub6mA/Untitled-8.jpg

الباشا
06-06-2009, 02:33 AM
حااااااااااااااااادل يا عمو

ههههاك

http://www6.mashy.com/uploads/VJ/gb/VJgbDk9V_uSVFL8wbub6mA/Untitled-8.jpg

ههههههههههههههههههههههههههههههههههه

دى صوره واحده من الألبوم

والباقى بلاش منه :SnipeR (29):

عندنا عيال صغار هنا

ما بيستحلموا جنس الشنا دى

لكن ما بزازا .... وماهن طراطيم !!!

ابو سيده
06-06-2009, 03:24 AM
غياب يومين بس أجى ألقى الدنيا جايطه كدى سويتونى عم وأنا لسع فى سن
العشرين بعدين ما تقولوا كبير علشان الإسم هى سيده وبس ولسع 11 شهر
جبتها وأنا هسع يا دوب فى الجامعه يعنى قبل سنتين كدا كنت شهادة عربيه
والصورة الشايفنها دى الطاقية ما تحتها صلعة يعنى ما زى عمة عمنا الباشا
أنا ما عايز أقول التحتها شنو إنتوا براكم عارفين لكن الطاقية نظام الجلابية وكدا
يعنى أنا لسع صغير وما قدركم
وكمان حنكوش لا شفت
السعن
ولا مشيت الجنابية
ولا دخلت القاطوع
ولا فلعت بالكركتى
ولا ركبت الإسناك
ولا قرعت الإنقاية
ياربى أُختنا سحر رأيها شنو ؟؟؟؟؟؟؟

نوارة البركل
06-06-2009, 10:28 AM
غياب يومين بس أجى ألقى الدنيا جايطه كدى سويتونى عم وأنا لسع فى سن
العشرين بعدين ما تقولوا كبير علشان الإسم هى سيده وبس ولسع 11 شهر
جبتها وأنا هسع يا دوب فى الجامعه يعنى قبل سنتين كدا كنت شهادة عربيه
والصورة الشايفنها دى الطاقية ما تحتها صلعة يعنى ما زى عمة عمنا الباشا
أنا ما عايز أقول التحتها شنو إنتوا براكم عارفين لكن الطاقية نظام الجلابية وكدا
يعنى أنا لسع صغير وما قدركم
وكمان حنكوش لا شفت
السعن
ولا مشيت الجنابية
ولا دخلت القاطوع
ولا فلعت بالكركتى
ولا ركبت الإسناك
ولا قرعت الإنقاية
ياربى أُختنا سحر رأيها شنو ؟؟؟؟؟؟؟
يا عمنا ابو سيدة انا غايتو مصدقه كلامك دا لأنك الصورة دى أخدتها قبل تلاتة شهور لكن كونك تكون عارف المصطلحات دي كلها خليتنى أشك فى كلام العشرينات دى لأنو أنا اكبر منك وعرفت جزء منهن والباقى ما عرفته . السعن يخشو بيه اللبن عشان تطلع القشطة ومنها يطلع السمن ، القاطوع حاجة تشبه الغرفة ، الكركتى طين البحر ، الاسناك شنو يا ابوسيدة ؟ الأنقاية الأحواض التى يزرع فيها أى شئ مثل البرسيم . والله أختك سحر ماتعرف واحد فيهم دى زى ما قال الباشا حنكوشة شوية عليها

سحر القلوب
06-06-2009, 08:02 PM
يا عمنا ابو سيدة انا غايتو مصدقه كلامك دا لأنك الصورة دى أخدتها قبل تلاتة شهور لكن كونك تكون عارف المصطلحات دي كلها خليتنى أشك فى كلام العشرينات دى لأنو أنا اكبر منك وعرفت جزء منهن والباقى ما عرفته . السعن يخشو بيه اللبن عشان تطلع القشطة ومنها يطلع السمن ، القاطوع حاجة تشبه الغرفة ، الكركتى طين البحر ، الاسناك شنو يا ابوسيدة ؟ الأنقاية الأحواض التى يزرع فيها أى شئ مثل البرسيم . والله أختك سحر ماتعرف واحد فيهم دى زى ما قال الباشا حنكوشة شوية عليها

واحد : القطيعة حرام :SnipeR (40):

إتنين : أنا كنت جاية ألبس ليك وش البت المفتحة وناقشة الشغلانة كلها :santa_1:

لكن الشهادة لله يا نوارة البركل ... أنا كنت قايلة أبوسيدة قاعد يهظر معايا وقطع ليهو كلمات من ( دقنوسه ) ... شفتني كيف يا باشا مع دقنوسه دي :0005:

لما جيتي وشرحتيها .... قلت أججججي الموضوع طلع بالجد !!!!!!!!

الباشا
06-06-2009, 08:37 PM
أنا لسع فى سن العشرين
أنا هسع يا دوب فى الجامعه
يعنى قبل سنتين كدا كنت شهادة عربيه
الطاقية ما تحتها صلعة يعنى ما زى عمة عمنا الباشا

يعنى أنا لسع صغير وما قدركم ....وكمان حنكوش



الحقنا يا محسيييييييييييييييين

طلب مستعحل واحد بزااااازة تاااااانية وصلححححححححها

وده لانه ........ حنكوش

هات معاك كااااافوله

ومريله .... ومناديل معطره

الباشا
06-06-2009, 08:41 PM
وكمان حنكوش
لا شفت السعن
ولا مشيت الجنابية
ولا دخلت القاطوع
ولا فلعت بالكركتى
ولا ركبت الإسناك
ولا قرعت الإنقاية
ياربى أُختنا سحر رأيها شنو ؟؟؟؟؟؟؟


آآآآآل ...... حنكوش ..... آآآآآآآآآل

دكتوره ....... فسرى

واى كلمه صاح بجائزه

كيتاً فى الحناكيش

mohsenco
06-07-2009, 03:15 AM
غايتو يا عمو محسن بالغتا في اعمامكم دي ,, الود فدياس دة ما تشوف فصاحتو دي دة يا دوبو بيكون دخل ال26 (اكبر مني بي 6 سنة يعني) شفتو كيف؟؟؟:oo5o.com (27):
والله دي معلومة جديدة عن حجوة ام ضبيبينة ,,, انا حجوة كنتا عارفاها والضبان برضو بعرفو كويس بس مناسبة القصة ما عارفاها ,,,, والقرجة دي برضو ما كنتا عارفاها,,,
سحر القلوب ما بتعرفي الدقنوس بالغتي عاملة دقنوسك الكبير دة :0005: ,,, الدقنوس والله اعلم هو الراس والراس من ورا كمان العنقرة يعني اها دي قولي ما بتعرفيها كمان ,,,
طبعا انا ما عايشتا اي واحدة من حبوباتي او جدودي الله يرحمهم ,, بس بعرف كتير ,,
بيقولو :
(شناتك دي ,,تشبهي الكودي )....
مااااااااااااااا أو من هو الكودي,,,

أقبض الإعتراف فضيله براك قلتي فدياس أكبر منك بي سته سنه
وسته سنه حقت الحريم يعني نضرب في تسعه كده زينوبه يكون عمرك الحقيقي
تلاته وأربعيييييين ناقص تمنتاشر زايد سته وتلاتين بقت ستمايه نطرح منها القاسم العشري
تبقه سته وستين نضيف ليها فرق عمر حريمي يبقى عمرك يا ست البنات سبعه وخمسين

أها نجي لي سعالك اللزيز ده (كيتاً عليك يا بركلاويه)

قلتي لي شناه الكودي بس ما يكون نبزوك بيها لو نبزوك بيها مع عمرك ده واطتك أصبحت
الكود يا راقيه واحد ماهو شايقي كان عايش في قرى الشايقيه
وكان زول متفلقص عامل فيها متعولم وأي كلمه عايز يعرف الكود بتاعة
مثلاً يقول ليهم الطياره دي كوده 55 والدواء ده ماعنده كود ما تستعملوه
أها الناس من كتر فلقصه ومسكته في الكود دي لقبوه بالكود
والفلقصه في الفاضي عليه شنه تقطع الخميرة
أها واحده من خالاتنا عايز تنهر ولده قالت لو أمش تشبه الكودي وطبعاً هي قاصده الكود
لكن نعملكم شنو آآآآآآآآ الشايقيه مع الجرجرة البلا سبب دي
ومن يومه داك بقت مثل

mohsenco
06-07-2009, 03:21 AM
والله يا عمو محسن البلد دي نهائي ما بندس فيها سر !!
عرفتني كيفن شهادة عربية !!:sniper (57):

عرفتك دفعة قوس قزح عشان كده إتوقعتك تكون شهاده عربيه
لكن قالوا لي إنته أكبر من زينوبه بي سته سنه
والكلام ده كان سنه سته وستين قبل الإستقلال
أعمل ليك معادلة زي حقت زينوبه ولا تعترف بالعمر الحقيقي
والشهاده العربيه دي عربيه كارو ولا عربيه مصفحه

mohsenco
06-07-2009, 03:25 AM
ههههههههههههههههه

والله ابدعتوا في البوست ده ...:011:


لكن يا سحر القلوب شكلك عايزة كورس مكثف وطاااااااااااااااااااارئ

من قوله تيت ...








و جاييكم اكيد ...



اعمامنا اصحاب الخبرة ..














عشان نستفسر :0005:


كوكتيل يا رائع
أستفسر لامن الإستسسفار زاته يقول بس
وماله أعمامك كلهم متلمين هنا للترجمة
خصوصاً أبو قميص أحمر الأختفى داك تعرفه منو ؟
والله تعرفه أديك دكشنري أصلي

mohsenco
06-07-2009, 03:32 AM
والله العظيم أنا ماعارف تاني أسوي شنو
صورة وبالعافية خليتونا نجيبها برغم إنو عملت لي حظر جوي وبحري وبري في البيت
طبعاً مع ( أم إيثار ) والغالية ( إيثار ) قالوا لي بسحروك والكلام التاني وطبعاً قلت ليها
حبك أكبر وأكبر من الكلمات والصور
[/size][/color]

كنته بداري من الناس وخايفه عليه من العين



والله أنا عارفك إنت الوحيد المتضرر من وجود صورتي في المنتدي كان عمنا الباشا عارف مقامو وماداسي عمرو ربنا يديه الصحة والعافية طبعاً المصيبة زمان أيام بداياتنا مع المنتديات
ناس كتير فكروني قدر الجماعة ديل والغايبين الله يذكرهم بالخير وقالوا الموية تكضب الغطّاس والحمدلله كلهم شافوني ومنهم إت ياعجوز وبالله ماقلت لي لحظة الشوفة وكانت من أجمل لحظات حياتي والله برغم حبي ليك ذكرتني لحظتها بالمرحوم أبوي وكنت غدوتي ومازلت وستظل



ستظل شعباً صامداً صامداً رغم الحروووووووووووووب
نفديك يا وطن يا وطن يا وطن بالروح والدم نفيدك يا وطن يا وطن



والله ياقوس لقيت ليك رفيق وكان الشهادة العربية قلت لناس أبوي ماعايزها وده السبب الخلاني ماأقرا جامعة زاتو.

أحسن ليك هن القروا سو شنو؟

mohsenco
06-07-2009, 03:43 AM
انتو يا اخوانا الشكل شنو..
محسنكو دا جنو مشاكل..:sniper (89):

زى سحر
اخيتى دى فى ناس كُتااااااااااار
لية ماجوا يسألوا..

بعدين انتو محسنكو وينو هو زااااتو..؟

أهلاً عمار حبه زاته جا بي جاي
يا مرحبا يا مرحبا منور الدار
لكن أنا ما بتاع مشاكل أنا زول حقاني وبنصف المظلوم
وكان بتسعل مني أنا قاااااااااااااااعد زي غفير الترعة
ولو عندك أي أستسسفار والله الكلمة دي قلبتني عديل كده
أتفضل ونا في وأعمامك الحلوين في برضوا

فتح العليم
06-07-2009, 11:15 PM
هههههههههههه

محسن معليش جيت متأخر ومن قريت الموضوع اتذكرت امى قبل شوية

دخلت اتشيكت وهاك يا اخر ريحة وتلميعة للشوذ (ماشى اتحاد الفنانين)...

اها امى سألتنى ماشى وين؟؟؟؟

بحكم اللطافة البنا قلت ليها عليك الله ياحجة كدة كيف ماعريس عريس

اخدت ليها ضحكة وقالت لى اى اى اليومين دى شايفاك جايب ليك فاسطين جديد

اها سألتها عن فاسطين دى وعرفتها انت عرفت معناها؟؟؟؟؟

أبو أيمن
06-08-2009, 11:46 AM
سلام يا أهل الدار....عجبتني داركم جيت إتزود منها وفي تعبير عاجبني داير أسأل منو ...عااد مابعرفو يكون مرّ في الصفحات السابقة والله لا؟؟؟؟

يجيك واحد زعلان ويقولك :
هووووووي (أرعى بي وتدك )!!!!! يعني شنو؟؟؟؟

عمار
06-10-2009, 06:57 PM
الدكشنري وين ياجماعة .. :SnipeR (59):





راجياك مفردات تقيـــــــــــــــــــــــلة ..


:SnipeR (26):

الباشا
06-10-2009, 08:15 PM
سلام يا أهل الدار....عجبتني داركم جيت إتزود منها وفي تعبير عاجبني داير أسأل منو ...عااد مابعرفو يكون مرّ في الصفحات السابقة والله لا؟؟؟؟

يجيك واحد زعلان ويقولك :
هووووووي (أرعى بي وتدك )!!!!! يعني شنو؟؟؟؟

أبو أيمن يديك العافيه

فى الجزيره المرويه بنقول " أرعى بى قيدك "

أول مره اسمع " وتدك " دى مع انه شكلها قريب من بعض

انتظرنى بجيك راجع كان ما لقيت زول فسر ليك

mohsenco
06-11-2009, 03:12 AM
غلوطيه صغيره ع الماشى

عمى طوييييييييييييييييييييييييييييييل وما بيلحق الكعكول

يطلع شنو ؟؟؟

شكراً يا جميل يا ساده

أول حاجه القلوتيه زاته شنو؟
ما تنسى معانا ناس الشهاده الأربيه

القلوتيه يا أحبابي الصغار هي الفزوره والفزوره هي السؤال في شكل مسرحيه ولكن القلوتيه تنقصها المسرحيه فاااااهمين ----- فاهميييييين

وعمك الطويل ده الدرب والدرب هو الشارع بالعربي كده

الباشا
06-11-2009, 01:01 PM
أول حاجه القلوتيه زاته شنو؟
ما تنسى معانا ناس الشهاده الأربيه

القلوتيه يا أحبابي الصغار هي الفزوره والفزوره هي السؤال في شكل مسرحيه ولكن القلوتيه تنقصها المسرحيه فاااااهمين ----- فاهميييييين

وعمك الطويل ده الدرب والدرب هو الشارع بالعربي كده

واااااهـــ ...... جماأة بتوإين سهاده أربيه ده .... ما يأرف غلوتيه ذاااتو يأنى سنو ؟؟
كلام أجيييييب ....

على كدا يا محسن إيدى على إيدك ... خلينا نلحق العالم دى قبل ما يفوت الفوات وامخاخهم تتشبع بناس " ستارأكاديمى " الغلوطيه تبقى نصف مسرحيه ..... وحلنى بأااا على بال ما يفهموا المسرحيه .....

والله المستعان


بمناسبه ستار أكاديمى وقنوات التلفزيون العجيبه
فى قناة بتعرض غلوطيه أو فزوره ليها 6 شهور بالضبط ومافى زوووول قِدر حلّ الفزوره دى أيه رأيكم اقولها ليكم وجائزه فى القناة دى وصلت $$$$$ نص مليون دولار $$$$ !!!!!
تصوروا ولحاااااادى الآن كل امخاخ أبو عربوا فشلوا تمام فى حلها واليكم الفزوره :

جزيره خضراء سماها حمراء
سكانها عبيد ومفتاحها من حديد

واليحلها يتصل بالتلفزيونات إياهـــا على رقم 909090909
وقبل الاتصال لازم تشحن جوالك إما بخمسمائة ريال ( اجرة الاتصال المحتمل)
أو يكون عندك تلفون خط أدتوا ليك الشركه البتشتغل فيها لزوم العمل ومآرب أُخرى !!!!!
وأبقوا آآآبلونى لو فزتوا بالجائزه

mohsenco
06-12-2009, 01:09 AM
سلام ٌ قولا ً من رب رحيم !!!!
بسم الله !!!

هسي إنت عارف بوست عمك خضر بتاع يا ريتني بت ... فهمتو كلو بصمتو ما عدا كلمة واحدة ( اللدايات ) شنو ؟؟؟؟





أتفضلي يا دكتوره بس كل كلمة تعرفيها تمشي تتقرضمي بيها في المستشفى بكره

شوفي الصورة دي
شايفه الحجار المختوتات فيها حله التنجر دي
بس هي دي اللدايات
وإن شاء الله الغنمايه تاكل عشاك الليله
http://www10.0zz0.com/2008/12/05/18/717356388.jpg

mohsenco
06-12-2009, 01:20 AM
بس كمان
يا سحر [COLOR="green"]المشلعيب ده اول مره اسمعبو
نحنا عندنا اسمو المُـعْـلاق


كان متل ده إيا هو المشلعيب وإن واحد تاني تكونوا بتعلقوا في رأس البيت

http://tbn2.google.com/images?q=tbn:eROOd6bZtfPlTM:http://abdooosha.jeeran.com/photos/1851173_lm.jpg

الباشا
06-12-2009, 02:16 AM
أنا غايتو ما قاعد أتداخل
والله كلمتك دي ما عرفته ليها علاقه إلا بالدخوليه

أهااا يا دكتوره

محسن جاب كلمه جديده

لقطتها ليك من بوست كله مشاكل

الله يكفينا شر المشاكل

سحر القلوب
06-12-2009, 11:26 AM
أهااا يا دكتوره

محسن جاب كلمه جديده

لقطتها ليك من بوست كله مشاكل

الله يكفينا شر المشاكل

كدي لمني في بوست المشاكل ده .. بعدين نشوف الترجمة ( ياخي الزول خرمان لشكلة عديييل :SnipeR (3): )

محسن : تخيل أنا ما كنت قايلة مهاراتك التدريسية قيمة للدرجة دي ( طيب بيقولوا عليك كده ليه :oo5o.com (18): )

mohsenco
06-13-2009, 01:31 AM
كدي لمني في بوست المشاكل ده .. بعدين نشوف الترجمة ( ياخي الزول خرمان لشكلة عديييل :SnipeR (3): )

محسن : تخيل أنا ما كنت قايلة مهاراتك التدريسية قيمة للدرجة دي ( طيب بيقولوا عليك كده ليه :oo5o.com (18): )

أهلاً يا دكتوره أها اليوم الجمعة الكديسه كانت كيف
وأنا أصلاً ما أرفض ليك طلب وطالما عندك المديده حرقتني هاك ده بوست الظلم الواقع علي

http://www.maravi-alebda.com/vb/showthread.php?t=454

أما بالنسبه للمهارات التدريسيه وحقيقه ما هزل
من أمتع المهن إلى نفسي ولكن لم تسعفني الظروف للإستمرار بها فإشتغلتها فتره 5 سنه فقط
مركز دراسات الحاسب الآلي جامعة الجزيرة مدرس للغة البرمجة #C لعام واحد
مدرب حاسب آلي بالمركز السعودي البريطاني بالرياض لمده سنتين
مدرب شبكات بمعهد سيتا في الرياض لمده سنتين

أها دي سيره ذاتيه مختصره أجي أستلم الوظيفه متين

نوارة البركل
06-13-2009, 01:17 PM
هههههههههههه

محسن معليش جيت متأخر ومن قريت الموضوع اتذكرت امى قبل شوية

دخلت اتشيكت وهاك يا اخر ريحة وتلميعة للشوذ (ماشى اتحاد الفنانين)...

اها امى سألتنى ماشى وين؟؟؟؟

بحكم اللطافة البنا قلت ليها عليك الله ياحجة كدة كيف ماعريس عريس

اخدت ليها ضحكة وقالت لى اى اى اليومين دى شايفاك جايب ليك فاسطين جديد

اها سألتها عن فاسطين دى وعرفتها انت عرفت معناها؟؟؟؟؟
انا بوريك معناها شنو
يعنى اليومين ديل قايمات ليك رويشات جداد
يعنى تقصد بعد ماريشك الكان منفوش داك اتلحس بالشاكوش
بدا يقوم ليك ريش من جديد يعنى اعمل حسابك ما يبقى
فاس طين (طين بحر هش )خايفة عليك
يا وليدى تتشوكش تانى:SnipeR (81):

نوارة البركل
06-13-2009, 01:27 PM
سلام يا أهل الدار....عجبتني داركم جيت إتزود منها وفي تعبير عاجبني داير أسأل منو ...عااد مابعرفو يكون مرّ في الصفحات السابقة والله لا؟؟؟؟

يجيك واحد زعلان ويقولك :
هووووووي (أرعى بي وتدك )!!!!! يعني شنو؟؟؟؟
اها يا ابو ايمن ما دام جيت وشايل معاك زوادتك الدار بتعجبك وما بتمرق منها تب لكن والله العبارة دى سمعتها عند امى لكن بس بعرف لما يقولوها لينا معنا بس نخلى الشى البنسوى فيه لكن انا زاتى عايزة اعرف معناها شنو بس بدل وتد عندنا قيد يلا يالباشا اسعفنا بالمعنى قبل الأولاد ما يسألونا

أبو أيمن
06-13-2009, 08:21 PM
[

بمناسبه ستار أكاديمى وقنوات التلفزيون العجيبه
فى قناة بتعرض غلوطيه أو فزوره ليها 6 شهور بالضبط ومافى زوووول قِدر حلّ الفزوره دى أيه رأيكم اقولها ليكم وجائزه فى القناة دى وصلت $$$$$ نص مليون دولار $$$$ !!!!!
تصوروا ولحاااااادى الآن كل امخاخ أبو عربوا فشلوا تمام فى حلها واليكم الفزوره :

جزيره خضراء سماها حمراء
سكانها عبيد ومفتاحها من حديد

واليحلها يتصل بالتلفزيونات إياهـــا على رقم 909090909
وقبل الاتصال لازم تشحن جوالك إما بخمسمائة ريال ( اجرة الاتصال المحتمل)
أو يكون عندك تلفون خط أدتوا ليك الشركه البتشتغل فيها لزوم العمل ومآرب أُخرى !!!!!
وأبقوا آآآبلونى لو فزتوا بالجائزه [/center]



بي صحك يالباشا....يعني هسع نحلها هنا والله نتصل.....شكلي زي العرفتها معرفةً طشاش كدي... أول شي اسرك بيها قبل أمشي إتعاور علي القنوات ويضحكو علي.....الشي دي لاتكون البطيخة...إنبقا غلط خلو في سرك....

أبو أيمن
06-13-2009, 08:28 PM
اها يا ابو ايمن ما دام جيت وشايل معاك زوادتك الدار بتعجبك وما بتمرق منها تب لكن والله العبارة دى سمعتها عند امى لكن بس بعرف لما يقولوها لينا معنا بس نخلى الشى البنسوى فيه لكن انا زاتى عايزة اعرف معناها شنو بس بدل وتد عندنا قيد يلا يالباشا اسعفنا بالمعنى قبل الأولاد ما يسألونا

نوارة بلدنا ....سلام مربع
طبعاً الوتد هو عبارة عن عود صغير يجي طولو زراع كدا....يُنْجر من الأمام ليصير حاداً ويُغرس في الأرض ويربط به الحيوان.... والشبه بينه وبين القيد هو تحديد الحركة.....أها حلينالك نصف السؤال...يالله شدي حيلك وكملي الباقي .

الباشا
06-13-2009, 08:58 PM
بي صحك يالباشا....يعني هسع نحلها هنا والله نتصل.....شكلي زي العرفتها معرفةً طشاش كدي... أول شي اسرك بيها قبل أمشي إتعاور علي القنوات ويضحكو علي.....الشي دي لاتكون البطيخة...إنبقا غلط خلو في سرك....

أبو أيمن

فى رأى صاااااااااااح ... بس يمكن عند ناس الفضائيات غلط والله اعلم

عبى جوالين واعمل ذى أخونا ده ... وأتصل :SnipeR (74):

وففتى ففتى

نوارة البركل
06-13-2009, 09:01 PM
نوارة بلدنا ....سلام مربع
طبعاً الوتد هو عبارة عن عود صغير يجي طولو زراع كدا....يُنْجر من الأمام ليصير حاداً ويُغرس في الأرض ويربط به الحيوان.... والشبه بينه وبين القيد هو تحديد الحركة.....أها حلينالك نصف السؤال...يالله شدي حيلك وكملي الباقي .
ابو ايمن مساء الفل والورد والياسمين
يا ايمن انت ما خليت لى النص الصعب من السؤال
لكن ما مشكلة ولوما حليتو صاح بستعين بى صديقى وهو الباشا
بقى يا ايمن معناهو يا ولد هوى ماتتعد حدودك
خليك فى محل الصغار واتادب مع الناس
الكبار ولا السوط حياب ضهرك
استعين بى صديق ولا لا؟

أبو أيمن
06-14-2009, 06:08 PM
ابو ايمن مساء الفل والورد والياسمين
يا ايمن انت ما خليت لى النص الصعب من السؤال
لكن ما مشكلة ولوما حليتو صاح بستعين بى صديقى وهو الباشا
بقى يا ايمن معناهو يا ولد هوى ماتتعد حدودك
خليك فى محل الصغار واتادب مع الناس
الكبار ولا السوط حياب ضهرك
استعين بى صديق ولا لا؟



تمام يانوارة البركل.....
(بوصيكم عليه الفايت الحدود واسو )....
والمعنى يعني خليك في حدودك وابعد من الخطوط الحمراء,,,

أبو أيمن
06-14-2009, 06:13 PM
زمان يادكشنري كان الحبوبات يفزرنلنا ...ومن ضمن الفوازير:


(حبوبتي كشكشينا شالت نعليها وقالت مشينا )....

ما هي هذه الشالت نعليها وقالت مشينا.

فندي فندي فندي...

اوع تقول لى بصصوكي

انا عرفتها براي





كركعوبة العشر

بس يا ابو ايمن يا اخوي
ما معنى كلمة كركعوبة على وزن فعللوله

سحر القلوب
06-21-2009, 08:13 PM
نفسي مرة أخش البوست ده أفهم حاجة ؟؟؟؟؟

أينعم أنا غبت شوية كده ,,, لكن يا جماعة ما أجي ألقاكم قلبتوهو ( هيروغليفي ) ؟؟؟؟


أبو أيمن : شنو ؟؟؟؟؟؟ ( ومط شفتيه بغباء واضح :oo5o.com (38): )



أقول قولي هذا ثم أقول جملتي المعهودة ......


محسن ... إنت فين يا محسن :SnipeR (57):

أبو أيمن
06-22-2009, 07:22 PM
زمان يادكشنري كان الحبوبات يفزرنلنا ...ومن ضمن الفوازير:


(حبوبتي كشكشينا شالت نعليها وقالت مشينا )....

ما هي هذه الشالت نعليها وقالت مشينا.

فندي فندي فندي...

اوع تقول لى بصصوكي

انا عرفتها براي





كركعوبة العشر

بس يا ابو ايمن يا اخوي
ما معنى كلمة كركعوبة على وزن فعللوله


حيّاك الله يابركلاوية
إجابة مية في المية

بس لخبتيني... انا قلت مين التلميذ الشقي الحيدخلي في عيني دا

وكلمة كركعوبة غالباً ماتستخدم مع المنقة والدوم وهي باقي الثمار بعد (كدّها )....الجزء الصلب من الثمرة.....

بركلاويه
06-22-2009, 09:46 PM
حيّاك الله يابركلاوية
إجابة مية في المية

بس لخبتيني... انا قلت مين التلميذ الشقي الحيدخلي في عيني دا

وكلمة كركعوبة غالباً ماتستخدم مع المنقة والدوم وهي باقي الثمار بعد (كدّها )....الجزء الصلب من الثمرة.....

ابو ايمن يا أخوي
تسلم ويسلم أيمن من كل شر ان شاء الله
شوف ...
صاح بلا جايزه:cake: ماب تنفع ...
ما تطنش وتطلعنى من المولد بلا حمص:msn-wink:

قوس قزح
06-22-2009, 11:51 PM
جدودنا الاعزاء .. ابو ايمن ومحسن

والله ما شاء الله عليكم .. فعلا الماعندو كبير يشتريلو كبير ان شاء الله من الحراج

يقولك والله اديك بنية ألحقك ( أمات طه ) دايرين نعرف أمات طه ديل شنو ؟؟ )
وبعدين يقولك ( أأدبك أدب الكلاب في تونس ) الحصل شنو للكلاب في تونس ؟؟

بعدين يا ابو ايمن ارجوك أملا ( عرموس المدماك داك )

فما هو العرموس وما هو المدماك

سلام لامن أجيكم

أبو أيمن
06-24-2009, 07:12 PM
جدودنا الاعزاء .. ابو ايمن ومحسن

والله ما شاء الله عليكم .. فعلا الماعندو كبير يشتريلو كبير ان شاء الله من الحراج

يقولك والله اديك بنية ألحقك ( أمات طه ) دايرين نعرف أمات طه ديل شنو ؟؟ )
وبعدين يقولك ( أأدبك أدب الكلاب في تونس ) الحصل شنو للكلاب في تونس ؟؟

بعدين يا ابو ايمن ارجوك أملا ( عرموس المدماك داك )

فما هو العرموس وما هو المدماك

سلام لامن أجيكم


غايتو فعلاً لحقتني أمات طه..... لأني أقول فيها زمني كلو وماخطر بيبالي أسأل من الحريم ديل....بس هن لايبقن (التومات ):SnipeR (14)::SnipeR (14):

وكلاب تونس خارج مياهنا الإقليمية......كمان في وحدي زيها (يقولك أوصلك فاس الماوراها ناس )...

أما المدماك ( فهو يعادل السريقة في الجالوص )....
العرموس هي المسافات بين الطوب أحياناً يكو البناء تعبان ومايعبيها (مونة) ويخلي العراميس فاضية
ويجي الخريف واللواي تقيف.....
الباقي نخليهو لي محسن....

أبو أيمن
06-24-2009, 07:18 PM
ابو ايمن يا أخوي
تسلم ويسلم أيمن من كل شر ان شاء الله
شوف ...
صاح بلا جايزه:cake: ماب تنفع ...
ما تطنش وتطلعنى من المولد بلا حمص:msn-wink:


الله يسلمك من كل بلاء يابركلاوية....
مافي طناش.... نحن نحفز الشطار...هذا شعارنا.....بس( صبرأً يبل الآبري).......
هو الآبري دا بلو ساهل والله صعب؟؟؟.....مالو إختاروه في نواحي الصبر؟؟؟.....كدي افيدننا تكسبن خير يابنات حواء...ودا طبعاً عرض مافيه جائزة....

بركلاويه
08-27-2009, 12:34 AM
أبو أيمن ..... محسن افتقدناكم

رمضان مبارك عليكم

أبو ايمن الحق زينوبة بتسأل عن معنى السحارة

mohsenco
09-02-2009, 12:18 AM
أبو أيمن ..... محسن افتقدناكم

رمضان مبارك عليكم

أبو ايمن الحق زينوبة بتسأل عن معنى السحارة

والله صحي البيت محروس وستو تكوس

ما قصرته يا أبو أيمن ومعليش ح أبدا معاكم من الآخر وبعد كده برجع ورا ورا

وورا ورا دي على وزن دودو بي اللوري (دور بي يا تيتي دور بي) دي آخر غنيه كانت في حفله أبوإيثار

المهم يا حلوين عمكم محسن جاء راجع وإن شاء الله رمضان مبارك عليكم كلكم
ويا دكتور قاعد إن شاء الله بس عندي لفه حقت شغل كده لمده إسبوع عايز ألف لي عشرين حله كده وبجي راجع

المهم سعال زينوبه يا ست البيت عن السحارة
والسحارة هي (الفضيه أو الحافله) دولاب من الخشب تحفظ فيه العده
والأشياء الثمينه لحبوباتنا الله يديهن العافيه

http://t3.gstatic.com/images?q=tbn:GSJTu3jCZ45U1M:http://ec1.images-amazon.com/images/I/51dbxSF3B-L._AA180_.jpg

بركلاويه
09-02-2009, 12:31 AM
.... نحن نحفز الشطار...هذا شعارنا.....بس( صبرأً يبل الآبري).......
هو الآبري دا بلو ساهل والله صعب؟؟؟.....مالو إختاروه في نواحي الصبر؟؟؟.....كدي افيدننا تكسبن خير يابنات حواء...ودا طبعاً عرض مافيه جائزة....

السؤال ده موجه لـــ ( فدياس )

فدياس
09-02-2009, 12:52 PM
السؤال ده موجه لـــ ( فدياس )

بركلاوية ..
الآبري بلو ساهل طبعاً لكن لمن ياخد وقت في الموية طعمو ونكهتو بتكون الروعة ذاتا ..
يعني ممكن الآبري ينبلا خمسة دقايق حتلاحظي الطعم واللون ما زي لمن الآبري ينبلا من الصباح الطعم بكون مختلف واللون بكون مختلف وكلما زادت فترت بل الآبري كلما زاد الطعم روعة !!
وجهة نظر برضو !!
حاجة برة النص ..
أمبارح شوربتكم كانت شوربة شنو ؟!:nosweat:

بركلاويه
09-02-2009, 02:22 PM
بركلاوية ..
الآبري بلو ساهل طبعاً لكن لمن ياخد وقت في الموية طعمو ونكهتو بتكون الروعة ذاتا ..
يعني ممكن الآبري ينبلا خمسة دقايق حتلاحظي الطعم واللون ما زي لمن الآبري ينبلا من الصباح الطعم بكون مختلف واللون بكون مختلف وكلما زادت فترت بل الآبري كلما زاد الطعم روعة !!
وجهة نظر برضو !!
حاجة برة النص ..
أمبارح شوربتكم كانت شوربة شنو ؟!:nosweat:

فدياس ...
تحياتي وامنياتي الطيبة ...
الحلومر وليس الآبري فعلا بلو ما ساهل بالجد وزي ما قلت كلما اتبل كلما كان الطعم غير ... واللون غير ...
لكن كمان الناس عملت منو شماعة للأمور الحياتية .. تلقى الواحد منتظرنو بالساعات ويجي بى كل برود يقول ليك ( صبرا يبل الآبري مافي ) وبعدي الجماعة المنتظرين يصابوا بي شئ من الوجوم
وشئ من الاندهاش ... ويقعدو يفكروا في بل الآبري والمدة الزمنية وهلما جرا ...
شوف يا سيدى
الآبري هو الآبري الابيض ما عايز زمن ولا حاجة ... وده المقصود بي بل الآبري
والإنتا بتقصدو هو الحلو مر ... يا سيدي صلح معلومتك :stop: .. وهنا مقصود عدم الصبر على بل الآبري الذي لا يستغرق دقائق او قول ثواني

والله يجيبك يا أبو أيمن ...


خارج النص
شوربتنا كانت شوربة لحمة ما قلنا ليك اللحمة حمرناها

عمرابى
09-28-2009, 01:19 PM
الأعزاء بالمنتدى أسمحوا لى أن أنقل لكم هذه اللوحة التى شكلها الشاعر
محمد العبيد سيد أحمد
والتى تتحدث عن الزمن الجميل


يا حليل زمن البيوت المو بيوت ضيق=
وحيشانا المبردحة ماها محيق=
لقاديبنا المبلطة خاتى شقيق=
مضللة بالفلق ما فيها رقريق=
والمرق مرقا سنط وساوينلو أرنيق=
والطير فوقنا عشعش فى السباليق=
راصين القداحى صفوف معاليق=
وبرنداتنا الكرارق بالشباريق=
زمن الناس حنينين مافى فريق=
لا جفا لا غلط لا حتى نقنيق=
لابسين الشمامير والعراريق=
وسايقين السواقى وعيشنا متيق=
تسمع لا تحت دق المداقيق=
يجى احمد للفطور شايلو اباسيق=
مالى الشبكى قش وقالعلو اشميق=
يفسخ ويمشى مالى جيوبو دفيق=
ويجدع منجلو الما حام كتاريق=
تجيبلو ام زين حريف ويفكبو الريق=
ويا حلاة النومة وكت الضل يجى ارتيق=

بركلاويه
09-28-2009, 01:36 PM
الأعزاء بالمنتدى أسمحوا لى أن أنقل لكم هذه اللوحة التى شكلها الشاعر محمد العبيد سيد أحمد
والتى تتحدث عن الزمن الجميل:
يا حليل زمن البيوت المو بيوت ضيق
وحيشانا المبردحة ماها محيق
لقاديبنا المبلطة خاتى شقيق
مضللة بالفلق ما فيها رقريق
والمرق مرقا سنط وساوينلو أرنيق
والطير فوقنا عشعش فى السباليق
راصين القداحى صفوف معاليق
وبرنداتنا الكرارق بالشباريق
زمن الناس حنينين مافى فريق
لا جفا لا غلط لا حتى نقنيق
لابسين الشمامير والعراريق
وسايقين السواقى وعيشنا متيق
تسمع لا تحت دق المداقيق
يجى احمد للفطور شايلو اباسيق
مالى الشبكى قش وقالعلو اشميق
يفسخ ويمشى مالى جيوبو دفيق
ويجدع منجلو الما حام كتاريق
تجيبلو ام زين حريف ويفكبو الريق
ويا حلاة النومة وكت الضل يجى ارتيق


عمرابي اخي العزيز
تسلم على هذا الجمال ... فهي لوحة فنان تشكيلى بكل ألوان الطيف
وقمة في الجمال ... برغم المفردة الموغل في القدم التى تكاد تكون اندثرت
فهلا شرحت لنا المفردات حتى يستقيم المعنى ...

لقاديبنا
أرنيق
صفوف معاليق
بالشباريق
الشمامير
متيق
اباسيق
كتاريق
ارتيق

عمرابى
09-28-2009, 02:19 PM
العزيزة بركلاوية لك التحية وأنتى دائما تعطينا الدافع للكتابة عبر هذا المنتدى الذى ولد بأسنانه
أما عن معانى الكلمات فهى:

*اللقاديب جمع لقدابة وهو البرندة أو الصالة
*المعاليق جمع معلاق ده حبوباتنا كان بختو فوقه اللحمة والحاجات الدايرين يحفضوها بعيد عن متناول الكديسة
*المتيق ريش القصب بعد قبه وتربيطه فى شكل حزم صغيرة
*أباسيق جمع أبسيقة وهى حبل الاشميق بعدما يصل تقريبا 100 متر بيلفو ويسموا ابسيقة
*الأرتيق ضل الضحى
الأرنيق عود بيغزوه فى الواطة ويثبتوا بيهو المرق
باقى الحاجات دى دايرة استعانة بصديقتخريمة:
اسه يا بركلاوية فى ضمتك ما بتعرفى الحاجات دى؟

بركلاويه
09-28-2009, 08:20 PM
العزيزة بركلاوية لك التحية وأنتى دائما تعطينا الدافع للكتابة عبر هذا المنتدى الذى ولد بأسنانه
أما عن معانى الكلمات فهى:

*اللقاديب جمع لقدابة وهو البرندة أو الصالة
*المعاليق جمع معلاق ده حبوباتنا كان بختو فوقه اللحمة والحاجات الدايرين يحفضوها بعيد عن متناول الكديسة
*المتيق ريش القصب بعد قبه وتربيطه فى شكل حزم صغيرة
*أباسيق جمع أبسيقة وهى حبل الاشميق بعدما يصل تقريبا 100 متر بيلفو ويسموا ابسيقة
*الأرتيق ضل الضحى
الأرنيق عود بيغزوه فى الواطة ويثبتوا بيهو المرق
باقى الحاجات دى دايرة استعانة بصديقتخريمة:
اسه يا بركلاوية فى ضمتك ما بتعرفى الحاجات دى؟



عمرابي ...
يا هووووي:SnipeR (85):
عملت فيها مقددا ... وينو باقي الحاجات :oo5o.com (12):... وما قلت بتاع تراث وشايقي ...
الاستعانة بى صديق ؟؟؟؟
من وين اجيب الصديق ؟؟؟
قوس قزح :santa_1: جارنا كان بستعين بيهو إلا ده تربية لندن
لازم تغتس وتجيب لى باقي الحاجات ... وعلى كدا حتى القلتهن دايرات مراجعة
الله يجيبك يا أبو أيمن انت ياك سيد الحوبات دي

ديل ما عرفتهن
بالشباريق
الشمامير
كتاريق





*المعاليق جمع معلاق ده حبوباتنا كان بختو فوقه اللحمة والحاجات الدايرين يحفضوها بعيد عن متناول الكديسة

زينوبة ما تسمعك ... أصلا عندها غرام مع الكدايس

عليك الله يا عمرابي
ذي الكديسة دي برفعو منها الحاجات ...

http://up2.m5zn.com/photo/2009/3/26/01/atzkri7k4.gif/gif
انت من زمن برفعو الحاجات من الكدايس ...
هي الحاجات بقو يدوها الكدايس
على العموم عشان حفظ ملكية الاعضاء الكديسة دي حقت العضو كوكتيل



تخريمة:
اسه يا بركلاوية فى ضمتك ما بتعرفى الحاجات دى؟



اسع فى ضمتك دي معناها شنو؟؟
لكن ما دام انها حليفة يا عمرابي حسب احساسي بيها
فى ضمتى ما عرفتهن

عمرابى
09-29-2009, 11:19 AM
عمرابي ...
يا هووووي:sniper (85):
عملت فيها مقددا ... وينو باقي الحاجات :oo5o.com (12):... وما قلت بتاع تراث وشايقي ...
الاستعانة بى صديق ؟؟؟؟
من وين اجيب الصديق ؟؟؟
قوس قزح :santa_1: جارنا كان بستعين بيهو إلا ده تربية لندن
لازم تغتس وتجيب لى باقي الحاجات ... وعلى كدا حتى القلتهن دايرات مراجعة
الله يجيبك يا أبو أيمن انت ياك سيد الحوبات دي

ديل ما عرفتهن
بالشباريق
الشمامير
كتاريق





زينوبة ما تسمعك ... أصلا عندها غرام مع الكدايس

عليك الله يا عمرابي
ذي الكديسة دي برفعو منها الحاجات ...

http://up2.m5zn.com/photo/2009/3/26/01/atzkri7k4.gif/gif
انت من زمن برفعو الحاجات من الكدايس ...
هي الحاجات بقو يدوها الكدايس
على العموم عشان حفظ ملكية الاعضاء الكديسة دي حقت العضو كوكتيل


اسع فى ضمتك دي معناها شنو؟؟
لكن ما دام انها حليفة يا عمرابي حسب احساسي بيها
فى ضمتى ما عرفتهن


بركلاوية انتى مالك شيالة حس كدى؟
كتاريق جمع كتريقة وهى الراكوبة
باقى الحاجات فى عقاب اليوم ده بجيبها ليك
ما تشيلى حسى لى الله وخلقو.[/cell][/table1][/align]

بركلاويه
09-29-2009, 02:47 PM
بركلاوية انتى مالك شيالة حس كدى؟
كتاريق جمع كتريقة وهى الراكوبة
باقى الحاجات فى عقاب اليوم ده بجيبها ليك
ما تشيلى حسى لى الله وخلقو.[/CELL][/TABLE1][/ALIGN]


الله يديني الصبر أول حاجة :sad:
تاني حاجة كتاريق دي غلط مستحيل تكون راكوبة
وانا استعنت بي صديق وقال الكتاريق هي قش ملقط من اماكن مختلفة زي من فوق الجداول أو من نضافة البرسيم مع الناس
بعدين يا استاذ
اشك في معنى أباسيق جمع أبسيقة وهى حبل الاشميق بعدما يصل تقريبا 100 متر بيلفو ويسموا ابسيقة
هو يا داب شايل اشميقو وماشي يفتل على حسب كلام الشاعر
يجى احمد للفطور شايلو اباسيق
مالى الشبكى قش وقالعلو اشميق

طلعت ما بتعرف حاجة وبقيت تايواني متشيقن ساكت :SnipeR (29):
جيب باقي الحاجات :oo5o.com (20):

عمرابى
09-29-2009, 05:23 PM
الله يديني الصبر أول حاجة :sad:
تاني حاجة كتاريق دي غلط مستحيل تكون راكوبة
وانا استعنت بي صديق وقال الكتاريق هي قش ملقط من اماكن مختلفة زي من فوق الجداول أو من نضافة البرسيم مع الناس
بعدين يا استاذ
اشك في معنى أباسيق جمع أبسيقة وهى حبل الاشميق بعدما يصل تقريبا 100 متر بيلفو ويسموا ابسيقة
هو يا داب شايل اشميقو وماشي يفتل على حسب كلام الشاعر
يجى احمد للفطور شايلو اباسيق
مالى الشبكى قش وقالعلو اشميق

طلعت ما بتعرف حاجة وبقيت تايواني متشيقن ساكت :sniper (29):
جيب باقي الحاجات :oo5o.com (20):

والله يا بركلاوية انتى صعبة خلاث
انا اسه قلت اقوم اقشر بالجماعة ديل لكن شكلك كدة ما دار تدينى فرقة

طيب شوفى يا ستى بالنسبة للكتاريق هى فعلا الراكوبة لكن راكوبة معمولة عشوائى يعنى من القش الملقط الوراك ليهو الصديق ده, ما زى رواكيب الزمن ده
اما بالنسبة للأبسيقة فهى فعلا الحبل حق الاشميق
وفى القصيدة قال
يجى احمد للفطور شايلو اباسيق
(مكتملة الصنع)
مالى الشبكة قش وقالعلو اشميق
(قالع الاشميق عشان يفتل ابسيقة تانى)
(يفتل) دى بتعرفيها واللا برضه دايرة شرح
تورتى نفسى يا بركلاوية
باقى الحاجات عليك الله خليهن اجيبن ليك باكر

بركلاويه
09-29-2009, 06:12 PM
والله يا بركلاوية انتى صعبة خلاث
انا اسه قلت اقوم اقشر بالجماعة ديل لكن شكلك كدة ما دار تدينى فرقة



تقشر بى منو ...
ما قلنا حاجة
جيب الحاجات سريع وكمان صاح وتكون متأكد وبعدين تعال أقشر
ياخي انا ألصديق الوحيد الممكن استعين بيهو وأخوي ابو ايمن لايمكن الوصول اليه حاليا


طيب شوفى يا ستى بالنسبة للكتاريق هى فعلا الراكوبة لكن راكوبة معمولة عشوائى يعنى من القش الملقط الوراك ليهو الصديق ده, ما زى رواكيب الزمن ده


ويجدع منجلو الما حام كتاريق

يا عمرابي
يسعد لي مساك
المنجل بحوم بالرواكيب كيفن عليك الله اشرح لي بس؟؟؟
عمري ما سمعت بى منجل حايم بالرواكيب دي :06:




تورتى نفسى يا بركلاوية

تورتى الكلمة دي انا قريتا نورني
بعدين اكتشفت انها تورتي واستعنت بي صديق عرفت اني قومت ليك نفسك
ما مشكلة ... باقي شوية واطلع ليك من ملف أمن الدولة ده


والله يجيبك يا باكر

المبدع
09-30-2009, 10:58 PM
يا بركلاوية الزول دا اديهو نفس ,,

الكتريقا هي فعلا الراكوبة التعبانه ,, وحام كتاريق يعني استراح من ضل الى ضل ,, ولكن احمد منجله كان عكس ذلك ..
ابسيقه هي الحبل بالفعل ولكن تتفاوت الاطوال , ليس بالضرورة مئة متر والمعروف ان قياسها يتم بالباع ,, واللا ايه ياقوس ؟؟؟
وكان يحمله احمد ,, ربما يحتاج للبرم ,, او عايز يكسرو حبال للبهائم ,,
اما الشمامير فهي الملابس القديمة البالية ومازالت تحت الاستخدام ( للحوجه )

اخشى اني اكون عقدت الامور وتقوم البركلاوية تنط في حلقي ,,,
التحية لك يا استاذة ولك ياعمرابي كل التقدير وانت تهتم بالتراث الشعبي , اوصيك ان تاخذ رقم تلفون عبد الملطلب الفحل او على الاقل قريبك عوض احمدان ,,,

عمرابى
10-01-2009, 10:30 AM
تقشر بى منو ...
ما قلنا حاجة
جيب الحاجات سريع وكمان صاح وتكون متأكد وبعدين تعال أقشر
ياخي انا ألصديق الوحيد الممكن استعين بيهو وأخوي ابو ايمن لايمكن الوصول اليه حاليا

]

ويجدع منجلو الما حام كتاريق

يا عمرابي
يسعد لي مساك
المنجل بحوم بالرواكيب كيفن عليك الله اشرح لي بس؟؟؟
عمري ما سمعت بى منجل حايم بالرواكيب دي :06:

[align=center]
)
تورتى الكلمة دي انا قريتا نورني
بعدين اكتشفت انها تورتي واستعنت بي صديق عرفت اني قومت ليك نفسك
ما مشكلة ... باقي شوية واطلع ليك من ملف أمن الدولة ده


والله يجيبك يا باكر
الله يجيبك يا أبو أيمن عشان بركلاوية دى تقتنع

عمرك ما سمعتى بىمنجل حايم بالرواكيب . طيب سمعتى حايم وين قبل كدى؟
هو أصلا المنجل ما بيحوم لكن ده كناية عن انو احمد ده زول عملى جدا وما بيتسكع من راكوبة لى راكوبة
(يعنى المقصود احمد ما المنجل)
بالنسبة للشمامير اخونا المبدع الله يديهو العافية حلانى منها
باقى الشباريق بنلقاها ليك بس اصبرى شوية

عمرابى
10-01-2009, 10:38 AM
يا بركلاوية الزول دا اديهو نفس ,,

الكتريقا هي فعلا الراكوبة التعبانه ,, وحام كتاريق يعني استراح من ضل الى ضل ,, ولكن احمد منجله كان عكس ذلك ..
ابسيقه هي الحبل بالفعل ولكن تتفاوت الاطوال , ليس بالضرورة مئة متر والمعروف ان قياسها يتم بالباع ,, واللا ايه ياقوس ؟؟؟
وكان يحمله احمد ,, ربما يحتاج للبرم ,, او عايز يكسرو حبال للبهائم ,,
اما الشمامير فهي الملابس القديمة البالية ومازالت تحت الاستخدام ( للحوجه )

اخشى اني اكون عقدت الامور وتقوم البركلاوية تنط في حلقي ,,,
التحية لك يا استاذة ولك ياعمرابي كل التقدير وانت تهتم بالتراث الشعبي , اوصيك ان تاخذ رقم تلفون عبد الملطلب الفحل او على الاقل قريبك عوض احمدان ,,,

ينصر دينك يا المبدع والله الليلة ريحتنى راحة شديدة خلاص
تلفون عوض احمدان معاى الليلة بجيب منو الحاجة الباقية انشاء الله

عمرابى
10-05-2009, 12:12 PM
الرائعة بركلاوية
أول حاجة أهنيك على طريقتك فى اثراء الحوار والتى ان دلت انما تدل على روحك الابداعية
(نظام رشوة وكدة....)
وبشكرك لأنك خليتينى بى سبب الحاجات دى خليتينى ابحث وأعرف حاجات كتيرة عن تراثنا
ولو الله مد فى العمر بجتهد انها كلها تنزل فى المرافئ
نرجع للكلمة الباقية (الشباريق)
الشباريق دى قالوا الفتحات الكانت بتكون فى البرندات زمان بدون شبابيك
انشاء الله كدى تكونى ارتحتى
أحححححححححححححححح (يادووب الواحد اخد نفسو)

بركلاويه
10-05-2009, 11:16 PM
الرائعة بركلاوية
أول حاجة أهنيك على طريقتك فى اثراء الحوار والتى ان دلت انما تدل على روحك الابداعية
(نظام رشوة وكدة....)
وبشكرك لأنك خليتينى بى سبب الحاجات دى خليتينى ابحث وأعرف حاجات كتيرة عن تراثنا
ولو الله مد فى العمر بجتهد انها كلها تنزل فى المرافئ
نرجع للكلمة الباقية (الشباريق)
الشباريق دى قالوا الفتحات الكانت بتكون فى البرندات زمان بدون شبابيك
انشاء الله كدى تكونى ارتحتى
أحححححححححححححححح (يادووب الواحد اخد نفسو)


عمرابي يا جميل
والله الذي لا غيره
اني اسمتعت جدا بهذا البوست ...
وصدقني كثير من هذه المفردات ضائع على وتمنيت ان تكون هذه القصيدة معلقة حتى
اتناول مفرداتها معك
انت انسان راقي جدا
واظنك لو ما مساعدة المبدع كنت طفشت جزاهو الله خير
ولكني جد سعيدة بحضورك المميز جدا
ولعلني طلبت مساعدة من الدمام ابو ايمن
ولكن مرجعي في المفردات هذه عندو امتحانات

لك شكري اخي

والتعب والعذاب ده كلو:SnipeR (79):
والشباريق تطلع الفتحات الكانت بتكون فى البرندات زمان بدون شبابيك:SnipeR (15):

قايتو أهلنا ديل ناس بعقدو الامور بشكل
اسع مالا الشبابيك سوت شنو؟؟

عمرابي
شكرا على اثراء معلوماتي
وشكرا على طولت بالك
واذهب وانت حر


أي نسيت مافي حاجة زي دي تاني

عمرابى
10-06-2009, 04:33 PM
عمرابي يا جميل
والله الذي لا غيره
اني اسمتعت جدا بهذا البوست ...
وصدقني كثير من هذه المفردات ضائع على وتمنيت ان تكون هذه القصيدة معلقة حتى
اتناول مفرداتها معك
انت انسان راقي جدا
واظنك لو ما مساعدة المبدع كنت طفشت جزاهو الله خير
ولكني جد سعيدة بحضورك المميز جدا
ولعلني طلبت مساعدة من الدمام ابو ايمن
ولكن مرجعي في المفردات هذه عندو امتحانات

لك شكري اخي

والتعب والعذاب ده كلو:sniper (79):
والشباريق تطلع الفتحات الكانت بتكون فى البرندات زمان بدون شبابيك:sniper (15):

قايتو أهلنا ديل ناس بعقدو الامور بشكل
اسع مالا الشبابيك سوت شنو؟؟

عمرابي
شكرا على اثراء معلوماتي
وشكرا على طولت بالك
واذهب وانت حر


أي نسيت مافي حاجة زي دي تاني

الرايعة زى روعة بلدنا(بركلاوية)
والله انا استفدت من هذا الحوار الممتع معك والأخ العزيز (المبدع) فايدة عظمى
وحأديك بعض معانى المفردات الطلعت بيها وأنا ابحث عن معنى (الشباريق)

وياريت لو نجعل هذا البوست لفك طلاسم لهجاتنا السودانية القديمة حتى نساهم فى الحفاظ على تراثنا وهاك الحصيلة الطلعت بيها:الكتقة:
باب من الخشب بمسامات مفتحة يستعمل فى الزريبة(أوعى تكونى ما بتعرفى الزريبة؟)
التتقة:
قطعة من الخشب لتثبيت رجل العنقريب عندما يكون بها فضاء
الكوريق(بالتشديد على الراء)أو الكفريق:
القصب الناشف الجاف
التتق:ميقات زمنى ويقال أنه الساعة 12.الكتنوق:بنبونة البصل(وهى ورقة قوية تخزن من بطن البصلة)الكبديق:
الطبق.
الدانقة:البرندة أو الصالةالقاطوع:مخزن سرى مبنى داخل الأوضة
القاقوح:مؤخرة القادوس عندما يتكسر ولى عودة انشاء الله
وفى انتظار ناس المبدع وأبو أيمن للتصحيح أو اضافة معانى جديدة

أبو أيمن
10-06-2009, 06:10 PM
والله يابركلاوية طلقتوا ضهري.....ودابكن جيتوني في القاطر...
سمعتك تكورك وامعتصماه وجيت أجري واناهد قتا الحاصل شنو

اها يالعمرابي أنا إن شاء الله معاك طوالي في البوست دا....
عاد مالي مولقيتلي بيت وسط العمارات ديل....أخلي وامشي وين...
تحياتي لي بركلاوية التي خلقت من هذا البوست منعطف مهم للولوج إلى تلك الطلاسم القديمة وفكها حتى إنكان نستعين بالأصدقاء...
هسع في كلمات تحتها خط يبدو أنها تحتاج لفك طلاسمها لبعض الناس رغم سهولتها.... وما أظنها تحتاج لصديق....ودا عربون مشاركة وجس نبط .

أبو أيمن
10-06-2009, 07:17 PM
وهاكم دي مقشرة منقولة من شبكة حضرموت العربية :


يسلم لي خال فاطنة
ليكم بلالي،البدرج العاطلة

الناظمة اسمهاام فاطنة(فاطمة تنطق بالنون مكان الميم في الريف السوداني) وهي تدعو الله ان يحفظ اخوها ذخرا لهاو لأبنتها فاطنه.
ليكم بلالي: جملة إعتراضية تكثر في الشعر الشعبي السوداني، كناية عن ان الممدوح يرفع المعاناة عن الآخرين، وترتبط المعاناة في كثير من صور الشعر الشعبي السوداني بالجفاف و العطش. بلالي: لعلها من بل الريق. العاطلة: البهيمة المكسورة الرجل وعندما يحصل ذلك فإن صاحبها يوثق الرجل المكسورة بجبيرة ويساعد البهيمة في رفق على المشي وقد انتقل هذا التشبية من عالم الحيوان إلى عالم الانسان و يعني ان خال فاطنة الذي يرفع المعاناة عن البهيمة المصابة يشد ايضا من ازر من لا ولي له ولا يملك وسيلة يكسب بها قوتة.

اب كريق في اللجج
سدر حبس الفجج
عشميق حبل الوجج
انا اخوي مقلام الحجج

اب كريق:التمساح، اللجج:مفردها لجة وتعني الماء العميق. سدر:صدر،اي نهض بصدره كناية عن تصدر مواجهة الخطر اي ليس هناك من يواجه الخطر قبله. حبس:منع. الفجج:الأمكنة كناية عن كل الجهات مهما بعدت المسافه. العشميق: المادة النسيجية التي تغلف ساق النخلة وتصنع منها الحبال في السودان. حبل الوجج: الذي يضفر ضفرا من هذه المادة. مقلام الحجج:من يبطل اي حجة او ذريعة مدعاه.

ياخريف الرتوع
اب شقة قمر السبوع
فوق بيته بسند الجوع
ويا قشاش الدموع

خريف الرتوع: الكثير المطر بحيث ترتع في حشائشه البهائم. اب شقة قمر السبوع:القمر يكمل يومه السابع ويشق السحاب ليطل من بينها، يسند الجوع: اي ان الجائع يجد سندا لسد رمقه في بيت خال فاطنة وهو كناية عن الكرم. قشاش الدموع: الذي يهون على المنكوبين و يمسح دموعهم.

يسلم لي خال فاطنه.......
Alhysser--------------------------------------------------------------------------------

تخريمة لبركلاوية والقوس :
يبدو أني لدي مشكلة في الرسائل الصادرة فقد رديت على رسالتين للقوس يبدو انها لم تصل لأني لم أجد لها اثراً في الرسائل الصادرة :
رقم جوالي الجديد بعد سرقة الأول :
0556845567

عمرابى
10-07-2009, 12:15 PM
وهاكم دي مقشرة منقولة من شبكة حضرموت العربية :


يسلم لي خال فاطنة
ليكم بلالي،البدرج العاطلة

الناظمة اسمهاام فاطنة(فاطمة تنطق بالنون مكان الميم في الريف السوداني) وهي تدعو الله ان يحفظ اخوها ذخرا لهاو لأبنتها فاطنه.
ليكم بلالي: جملة إعتراضية تكثر في الشعر الشعبي السوداني، كناية عن ان الممدوح يرفع المعاناة عن الآخرين، وترتبط المعاناة في كثير من صور الشعر الشعبي السوداني بالجفاف و العطش. بلالي: لعلها من بل الريق. العاطلة: البهيمة المكسورة الرجل وعندما يحصل ذلك فإن صاحبها يوثق الرجل المكسورة بجبيرة ويساعد البهيمة في رفق على المشي وقد انتقل هذا التشبية من عالم الحيوان إلى عالم الانسان و يعني ان خال فاطنة الذي يرفع المعاناة عن البهيمة المصابة يشد ايضا من ازر من لا ولي له ولا يملك وسيلة يكسب بها قوتة.

اب كريق في اللجج
سدر حبس الفجج
عشميق حبل الوجج
انا اخوي مقلام الحجج

اب كريق:التمساح، اللجج:مفردها لجة وتعني الماء العميق. سدر:صدر،اي نهض بصدره كناية عن تصدر مواجهة الخطر اي ليس هناك من يواجه الخطر قبله. حبس:منع. الفجج:الأمكنة كناية عن كل الجهات مهما بعدت المسافه. العشميق: المادة النسيجية التي تغلف ساق النخلة وتصنع منها الحبال في السودان. حبل الوجج: الذي يضفر ضفرا من هذه المادة. مقلام الحجج:من يبطل اي حجة او ذريعة مدعاه.

ياخريف الرتوع
اب شقة قمر السبوع
فوق بيته بسند الجوع
ويا قشاش الدموع

خريف الرتوع: الكثير المطر بحيث ترتع في حشائشه البهائم. اب شقة قمر السبوع:القمر يكمل يومه السابع ويشق السحاب ليطل من بينها، يسند الجوع: اي ان الجائع يجد سندا لسد رمقه في بيت خال فاطنة وهو كناية عن الكرم. قشاش الدموع: الذي يهون على المنكوبين و يمسح دموعهم.

يسلم لي خال فاطنه.......
alhysser--------------------------------------------------------------------------------

تخريمة لبركلاوية والقوس :
يبدو أني لدي مشكلة في الرسائل الصادرة فقد رديت على رسالتين للقوس يبدو انها لم تصل لأني لم أجد لها اثراً في الرسائل الصادرة :
رقم جوالي الجديد بعد سرقة الأول :
0556845567

هلا بأبى أيمن
والله البوست منور بى طلتك البهية وراجنك من زمااااااااااااان (وبركة الجيت)
انت عارف يا أبو أيمن انا بسمع فى الغنية دى مما قمت من الكابلى لكن والله أول مرة
استوعبها كاملة كدة .
يديك العافية وفى انتظار المزيد

بركلاويه
10-07-2009, 12:37 PM
استاذي ابو ايمن

ايا من حضر مراسم الاحتفال
فقد اذدانت نواصينا ... وبدأ رحيق الحرف يقطر ذهبا ورطبا جنيا
اخي ابو أيمن لك جمال الحصيلة واناقة السياق
ولنا حجز الكنبة الامامية
في هذا الرواق واللوح والدواية
وشيخ رقيق وقور مثلك ... مهذب امامه يكون الكلام ...

الاستاذ عمرابي ... يا استاذي وشيخي الجليل ابو ايمن... قبل ايام زي ما شفت قشر بي قشرة شديدة
قمت قلت ده ياهو الزول البفتش فيهو
الا القى ليك القبة فيها نص فكي :oo5o.com (39):
قلت شئ ولا العدم وذي ما شفت النهير والكواريك والشكية لى الله :SnipeR (90):
وما خلى لي كيم اتكى عليهو ...:SnipeR (101):
اها اسع داير اشاوركم ؟؟؟
البوست ده حقو اسمو يتغير ويبقى اشمل من كده
عشان يبقى مرجع للجايين من الانجال ونخلف ليهم ورث ثقافي اصلو
ناس الواطة والنخل بقن موضة قديمة
والحق بقى علم
ولا رايكم شنو ؟؟؟
يلا اختارو الاسم .....

أبو أيمن
10-07-2009, 05:38 PM
ياسلام ياروعة مسك (الرسن )تعرفيلو ماشاء الله....دلفت بالبوست وختيتيه في مجرى الترات والآن تسويلو في
( التباب ).....
ماعندي أي مانع ولكم أن تختاروا الإسم الذي يتناسب مع طبيعة البوست التراثية ليعرّف به ويدخله من يدخله وهوعارف إلى أين يسير.كأن يكون مثلاً (قصاصات تراثية ) أو(أوراق من التراث ) أو غيرها من الأسماء...ونتمنى التوفيق لهذالبوست الذي سيكون كنزاً ثقافياً للأجيال وخاصة جيل هذا الزمن......تحياتي
وكمان هناك كلمتين بين مزدوجين يدورن الشرح كدا خفاف وفتح شهية:
الرسن

التِباب

عمرابى
10-07-2009, 06:57 PM
الأعزاء بركلاوية وأبو أيمن
لكم التحية وأنتم تهتمون بنقل التراث للأجيال
وبالمناسبة الجيل الجديد حتى الموجود بالقرية اندثرت عنده هذه الكلمات القديمة

يعنى اضرب ليكم مثل قبل فترة مشيت البلد وعندى بت خالتى متربية وقاعدة هناك
دايرة تجيب لى الشاى قلت ليها مهمجى بى شوية سكر وحاتكم ما عرفت (مهمجى )يعنى شنو
(دحين يا بركلاوية بتعرفيها) و(دحين)دى ذاتها انا خايفك تكونى ما بتعرفيها

انا أثنى على الاسم الذى اختاره أبو أيمن(أوراق من التراث)
وبالتوفيق انشاء الله

بركلاويه
10-07-2009, 11:01 PM
[FONT="Comic Sans MS"]
تخريمة لبركلاوية والقوس :
يبدو أني لدي مشكلة في الرسائل الصادرة فقد رديت على رسالتين للقوس يبدو انها لم تصل لأني لم أجد لها اثراً في الرسائل الصادرة :
رقم جوالي الجديد بعد سرقة الأول :
[COLOR="Indigo"][SIZE="6"]0556845567

حفظ رسائل في الصادر يتم تفعيلة من لوحة تحكمكم
بمعني ... هذا خيار متروك لك انت
والطريقة الدخول على لوحة التحكم الخاص بكم
تعديل الخيارات
وعمل علامة صح على الخيار
حفظ نسخة من الرسائل المرسلة في مجلد صندوق الصادر تلقائيا.
وحفظ كافة الملف من نهاية الصفحة

ولك تحياتي اخي ابو ايمن
أي خدمات من العين دي قبل دي:SnipeR (30):

قوس قزح
10-08-2009, 12:23 AM
الاعزاء .. ابوايمن .. عمرابي .. بركلاوية
لكم جميعكم التحية والاحترام
متابعين معاكم بي كل استمتاع وانا ما حبيت ادخل في شي ما متأكد منو ( لكن يا عمرابي ) عشان ما يشيلو حالي وانا شايقي على السكين .. مرة مرة كنت بغشش البركلاوية عشان كدي جاتك في رقبتك لأنو وراها ضهر .. وانت راجل جميل ولذيذ ودمك خفيف .. اها اسع جاك القاموس ذاتو اخونا ابو ايمن .. ده تحلف تقول جد الشوايقة ذاتن .. ما شاء الله عليهو ( دقنوسو ) ده ملان ملي من جنس الكلام ده .. اها انت وهو دايرنكن تستلمو البوست ده وتنجضوهو لينا نجاض قبورة بس تعملو ليهو طريقه معينة يمشي عليها.. ابو ايمن حيكون السواق وانت المساعد ونحن بنرمي الصاجات ..

يالله اتوكلو على بركة الله

ماهو الدقنوس
وماذا تعني نجاض قبورة

قوس قزح
10-08-2009, 12:33 AM
الرسن: الرسن هو عبارة عن حبل مصنوع من الشعر يستعمل غالبا للجمال
التِباب : متعلق بالبرش .. هو عبارة عن برواز يكون في عرضي البرش وغالبا ما يكون ملون بي لون بنفسجي

هذا والله اعلم

أبو أيمن
10-08-2009, 10:51 AM
الرسن: الرسن هو عبارة عن حبل مصنوع من الشعر يستعمل غالبا للجمال
التِباب : متعلق بالبرش .. هو عبارة عن برواز يكون في عرضي البرش وغالبا ما يكون ملون بي لون بنفسجي

هذا والله اعلم



إجابة صحيحة 100% يالقوس.... ترى الكمين سنة غربة دي مانستك....
إنت لكن دقنوس دي هي دنقوس والله دقنوس....والله فعل الغربة شال في واحد فينا وقدم حرف وأخر الثاني.....على العموم هي تطلق على الراس والمؤخرة منه خصوصاً...والله أعلم

أبو أيمن
10-08-2009, 10:59 AM
يالله اتوكلو على بركة الله


وماذا تعني نجاض قبورة


من وين قلعتها دي يالقوس....
طبعاً هذه تستخدم بكثرة (نجمت ليك نجام قبورة ).... أو نجاض قبورة....
يمكن يكون إستخدامها يومي والمعنى لها عام......نشوف مرئيات الجماعة فيها شنو؟؟؟؟

أبو أيمن
10-08-2009, 11:19 AM
الساقية يا إخوتي من أساسيات التراث ...
يقولون الدعاء مخ العبادة....ويمكن تكون الساقية مخ التراث....وعليه إليكم أدناه معلوما عنها لزيادة المعرفة :-

الساقية :
حديثنا هنا عن ( الآلة ) الساقية التي تستخدم في الري ، فهي من ابرز الآثار التي ورثت من العهود النوبية القديمة ، وظلت الساقية معلما بارزا ، وتمثل الوسيلة الزراعية الوحيدة في كثير من مناطق السودان ، كما بقيت معروفة في جميع البلاد التي عاش فيها النوبيون على طول حوض النيل ، وظلت الساقية الآلة الرافعة للمياه في مساحة واسعة من وادي النيل ، من صعيد مصر حتى المناطق الوسطى من السودان ، تتناقل صناعتها الأجيال ، محتفظة بهيكلها وأجزائها القديمة وبأسمائها النوبية حتى عهد قريب .
ويقول الدكتور أبو سليم في كتابه الساقية } وساقية النوبة أنواع الساقية المتوسطة ، وتسمى في لهجة النوبة ( كلي ) من لهجة الدناقلة ، والساقية الصغرى ( كلتود ) أو ( كلسوت ) ، أما الساقية المتوسطة فهي المنتشرة عموما ، والساقية الصغرى مهمتها توصيل المياه إلى الساقية الكبرى . ويقول الدكتور سليم في وصف الساقية المتوسطة في منطقة السكوت والمحس حيث تختلف مسمياتها عنها في منطقة دنقلا وما بعدها حتى أواسط السودان { .
ولما ظهرت الماكينات الزراعية الكبرى والصغرى ، طغت على الساقية وحلت محلها ، فصارت تختفي رويدا رويدا حتى خفته صوتها ، ذلك الصوت الرخيم والموسيقى التي كانت تصحبها أغاني ( الاورتيه : جمع اورتي وهو سائق الساقية ) . والتي كانت تملأ جنبات النيل شرقا وغربا .
أجزاء الساقية :
وفيما يلي نورد بعض أسماء أجزاء الساقية بأسمائها المعروفة في منطقة دنقلا ، بادئين بالأجزاء الأساسية والتي يعتمد عليها جهاز الساقية .
· الحلقة الكبرى : والمعروفة في لغة النوبة بـ ( أرقدي ) . وهي الترس الأكبر الذي تحركه الأبقار بواسطة ( التكم ) وبالتالي تتحرك بقية أجزاء الساقية الأخرى . والحلقة الكبرى تتكون من أجزاء عدة منها ( التوندي ) و ( النوامق ) جمع نامقة ، و( السندقيق ) ومفردها ( سندقيقة ) وهي التروس المركبة في ( النوامق ) وبواسطتها تتحرك الحلقة القلب ثم التوريق ثم دولاب المياه ( العطفة ) .
· المشق : بكسر الشين المشددة ، وهو العمود الرئيسي الذي تثبت فيه الحلقة الكبرى أو محور الارتكاز الذي تدور بواسطته الحلقة الكبرى ، وترتكز قاعدته على قطعة خشبية سميكة تسمى ( الكديس ) ويثبت رأسه في ( الديو ) . وعدد سندقيق الحلقة الكبرى ( 40 ) سندقيقة كل واحدة من سندقيق الحلقة الكبرى تقابلها واحدة من سندقيق الحلقة الصغرى بنظام دقيق فإذا أختل هذا النظام توقفت الساقية .
· الديو : وهو العمود المستطيل الممتد أفقيا فوق المشق ، ويثبت فيه الجزء الأعلى من المشق ، ويثبت الديو على عمودين أحدهما يسمى ( البقدوق ) والآخر يسمى ( بقدوكري ) .
· التكم : وهو عود له فرعان يثبت جزعه في المشق وينسج ما بين الفرعين بالحبال ليجلس عليه ( الأورتي ) ويمتد من التكم حبل غليظ يسمى الأرس ويربط في ( الإسلام ) الذي يوضع على أكتاف الأبقار وبواسطته تتحرك كل أجزاء الساقية .
· الحلقة الصغرى : أو ( الحليقة ) وهي على نمط الحلقة الكبرى ، وهي الترس الأصغر الذي يتحرك بواسطة الترس الأكبر ( الحلقة الكبرى ) ، وبواسطة الحليقة يتحرك ( التوريق ) .
· التوريق : وهو العمود الرئيسي والذي يشبه ( عمود طوالي ) في السيارات ، وبواسطته يتحرك دولاب المياه ( العطفة ) .
· القور : وهو العمود الذي يرتكز عليه التوريق .
· العطفة : أو دولاب المياه ، والذي يحمل ( الألس والقواديس ) ومن أجزاء العطفة ( الفاشوق والترنتريق ) .
· الألس والقواديس : الألس حبل غليظ تثبت عليه القواديس . والقواديس الجرة الصغيرة من الفخار يربط في الألس بطريقة فنية لا يعرفها إلا المزارع المتخصص في أعمال الساقية .
· الأرقوق : في العادة تدار الساقية بواسطة أثنين من الأبقار وفي بعض الحالات تدار بواسطة ثور واحد ويطلق عليه ( ثور الارقوق ) أي المنفرد ، ويكون من الثيران القوية عادة .
· الصمد والترابلة : الصمد هو رئيس مجموعة المزارعين المنضوين تحت ساقية واحدة ، أي رئيس العمال الزراعيين ، وهم الذين يطلق عليهم أسم ( الترابلة ) ، ومن مميزات الصمد أن يكون أكبر سنا وأكثر خبرة بأعمال الساقية واكثر نصيبا في أراضي الساقية في بعض الحالات ، وهو المسؤول عن كل ما يتعلق بالساقية من صيانة وتوزيع الأعمال على المزارعين كما أنه المسؤول لدى السلطات المحلية في ما يتعلق بالساقية .
أغاني الساقية أو حدى الأورتيه
يروي أهلنا كثير من أغاني الساقية والتي كان يتغنى بها الأورتيه وهم يحثون ثيرانهم على سرعة الحركة ، مثله مثل شعر الهزج عند العرب , الذي يترنمون به على ظهور ابلهم .
ولم يقتصر الغناء عند المزارعين على أغاني الساقية فقط بل ، هناك الأغاني التي يترنمون بها أثناء حفر ( البوقة ) و ( دق العيش في التقايات ) .
ومن أغاني الأورتيه :
ينشد أحدهم ممن أخذه الملل من العمل في الساقية فيقول :
بلا أم طـــيره بوج لـــي طمبل شن ودانــــي
يجينــــــي عبيــــدا شــــــمارتو عرقــــــاني
يقـــــول لــي : يا علـــي ســـرب الداخلانـي
أســـــاري اللــيل وأصــبح فـــــي مكانـــــي
إن شاء الله خيار عودك في التيار الصبحاني
وأخر يقول :
لا تعـــاينـــــي ليهــــــم يا ســميحـــــة
الشكــــر خـتنـو لـــي أهـــل النصيحـة
البعدلـو أم قـور حقيقــة أم قـور مليحـة
وكــت ساقــة اتختن قواديسـة المليحــة
مـــتل زراق الــعروس عند الطليحـــة
الساقية عند الصوفية :
والساقية في الشعر الصوفي لها شأن أخر ، فالساقية عندهم ليست تلك التي تصنع أجزاؤها من الخشب . فالساقية في الشعر الصوفي يرتقون بها إلى مراقي عليا ويحلقون بها في سماء رمزية الشعر الصوفي .
ساقية دفع الله ... من شعر ود القرشي
ساقيـــة دفــع الله حراسـة أهل الله
بديت باســــم الله ثنيت رســــول الله
ساقيـة دفــع الله مويتهـا ســر الله
حيضانـة قول يا باهـي دنوت من أهل اللـه
تور البقر ما بسوقه عالي الهمم فاشوقة
عزم التوبة السبلوقة والاستغفار ماروقه
الجدع والسوقان وريقة حمل الأذى كوديقه
صوت القرآن توريقه والأوراد سندقيقه
قواديسها الألفية وألسها خيوطو قوية
تيرابهــا الأعمال وزرعها الأفعــال
نظيفه من القش الاستغفار يا هو الحش

عمر جبريل
10-08-2009, 01:20 PM
يا شباب لكم التحية
ماعندي وقت لكن هاكم دي لامن ارجع

ــــــــــــــــــــــــــــــــــــــــــــــــــ ــــ
يا قاامره اقلبي السنسني الحمره **** وشوفي ابوي انا الراجهو كل صباح
سلام

عمرابى
10-08-2009, 04:51 PM
الاعزاء .. ابوايمن .. عمرابي .. بركلاوية
لكم جميعكم التحية والاحترام
متابعين معاكم بي كل استمتاع وانا ما حبيت ادخل في شي ما متأكد منو ( لكن يا عمرابي ) عشان ما يشيلو حالي وانا شايقي على السكين .. مرة مرة كنت بغشش البركلاوية عشان كدي جاتك في رقبتك لأنو وراها ضهر .. وانت راجل جميل ولذيذ ودمك خفيف .. اها اسع جاك القاموس ذاتو اخونا ابو ايمن .. ده تحلف تقول جد الشوايقة ذاتن .. ما شاء الله عليهو ( دقنوسو ) ده ملان ملي من جنس الكلام ده .. اها انت وهو دايرنكن تستلمو البوست ده وتنجضوهو لينا نجاض قبورة بس تعملو ليهو طريقه معينة يمشي عليها.. ابو ايمن حيكون السواق وانت المساعد ونحن بنرمي الصاجات ..

يالله اتوكلو على بركة الله

ماهو الدقنوس
وماذا تعني نجاض قبورة

خلاص يا مدير انا لبست لبس خمسة حق المساعدية وجيتكم
بس الله يكتر الوحل عشان ما تمرقو من ضهرنا وتبقوا رامين الصاجات.
الدقنوس طبعا سواقنا قالها اسه سموها(الفقهة)
لكن نجاض قبورة دى دايرة استعانة بصديق
هاكم حاجة خفيفة كدى
الساسوية
البتق(بضم الباء وكسر التاء)

أبو أيمن
10-08-2009, 08:00 PM
جبنالكم القصيدة مقشرة ودابا طالعة من غرفة العمليات....
كبير الجراحين عبد الجليل وداعة (ود العوتيب ).....
يا حليل زمن البيوت المو بيوت ضيق
وحيشانا المبردحة ماها محيق ( مبردحة من البراح أي الوساع ـ المحيقة من المحقة وهي قلة الشيء ومنها الصفة ممحوق ..لقاديبنا المبلطة خاتى شقيق ( لقاديبنا جمع لقدابة و تعني الصالة الواسعة ـ خاتي شقيق يعني ليس بها تشققات ..مضللة بالفلق ما فيها رقريق ( الفلق هي جزوع النخل بعد تهذيبها الى حجم أقل واستخدامها كأعمدة لعرش الغرف المنزلية ومفردها فلقة ..والمرق مرقا سنط وساوينلو أرنيق ( المرق هو العود القطري الذي يتوسط عرش السقف ليحمل باقي الاخشاب السقفية .والطير فوقنا عشعش فى السباليق ( عشعش بمعني استقر اي بنى عُشا ـ السبلوقة تلك الاسطوانة او قطع الصفيح التي تصرف مياه الامطار من أعلى سقف المنزل .راصين القداحى صفوف معاليق ( القداحي هي أواني خشبية دائرية كبيرة كانت تعلق في السابق بمصفوفة كمكان لحفظ بعض المتعلقات المنزلية ـ والمعاليق مفردها معلاق ويعني أداة التعليق .وبرنداتنا الكرارق بالشباريق ( كرارق ـ هي الرواكيب وتعني عريشة بلغة اليوم والشباريق أسمال الجوالات البالية ,زمن الناس حنينين مافى فريق ( الحن معروف ـ فريق أي تفرقة وشتات ,,
لا جفا لا غلط لا حتى نقنيق (الجفا هو البعاد ـ النقنيق أتت من الاسم النقة وتعني الطنطنة أي التلويح بعدم الرضا بصوت خافت ..لابسين الشمامير والعراريق ( الشمارة هي أسمال الملابس البالية ـ أي العراريق والجلاليب القديمة التي تلبس عند العمل .وسايقين السواقى وعيشنا متيق ( سايقين هنا تعني زارعين برارينا وعيشنا أي الذرة ( المُقُد ) يادوب نبات في مرحلة قبل خروج القندول ,,تسمع لا تحت دق المداقيق ( المداقيق هي في شكل شاكوش خشبي يضرب به جريد النحل ويحيله الى فتات سعف ومن ثم يفتل ليصبح حبلا ..يجى احمد للفطور شايلو اباسيق
مالى الشبكى قش وقالعلو اشميق ( الشبكة تصنع من سعف النخيل كوعاء يحمل فيه عشب غذاء للاغنام وقالعوا اشميق أي جمع من جزوع النخل لفائف من لحاء النخل تصنع منه الحبال .يفسخ ويمشى مالى جيوبو دفيق ( يفسخ يعني يقشر ـ دفيق ـ هو ثمار التمر وهو أخضر ويجدع منجلو الما حام كتاريق ( يجدع ـ يرمي ـ منجلو مضاف ضمير الى مُنجل والمنُجل أداة حديدية لقطع الحشائش والقش و يقطع بها الكثير ..والكتاريق هي المنازل القديمة والمهجورة تجيبلو ام زين حريف ويفكبو الريق ( يعني تأتي له أم زين وهو اسم أمه أو زوجه ( حريف ) قطعة من خبز القراصة ـ فك الريق هو الافطار أي أول وجبة صباحية ويا حلاة النومة وكت الضل يجى ارتيق ( ارتيق هو ظل الحائط في اول الضحي

نفعني الله واياكم بهدي كتابه وسنة نبيه محمد صلي الله عليه وسلم ..

أبو أيمن
10-10-2009, 05:57 PM
الأعزاء بركلاوية وأبو أيمن
لكم التحية وأنتم تهتمون بنقل التراث للأجيال
وبالمناسبة الجيل الجديد حتى الموجود بالقرية اندثرت عنده هذه الكلمات القديمة

يعنى اضرب ليكم مثل قبل فترة مشيت البلد وعندى بت خالتى متربية وقاعدة هناك
دايرة تجيب لى الشاى قلت ليها مهمجى بى شوية سكر وحاتكم ما عرفت (مهمجى )يعنى شنو
(دحين يا بركلاوية بتعرفيها) و(دحين)دى ذاتها انا خايفك تكونى ما بتعرفيها

انا أثنى على الاسم الذى اختاره أبو أيمن(أوراق من التراث)
وبالتوفيق انشاء الله


طبعاً ياعمرابي الشئ الممهمج هو الشئ غير كامل الإتقان... ومهمجي الشاي يعني خليه لاهو حلو لاهو مسيخ حاجة كدا ممهمجة (نص نص ).....
وبالمناسبة كلمة دحين دي رغم إنها إستفهامية في لهجتنا إلاّ أنها موجودة عند أهل الخليج وتستخدم ظرف زمان ويضاف لها ألف ولام فتصير( دا الحين)... بمعنى (الآن )...

أبو أيمن
10-10-2009, 06:00 PM
خلاص يا مدير انا لبست لبس خمسة حق المساعدية وجيتكم
بس الله يكتر الوحل عشان ما تمرقو من ضهرنا وتبقوا رامين الصاجات.
الدقنوس طبعا سواقنا قالها اسه سموها(الفقهة)
لكن نجاض قبورة دى دايرة استعانة بصديق
هاكم حاجة خفيفة كدى
الساسوية
البتق(بضم الباء وكسر التاء)


الساسوي: قطعة زجاج مكسور وجمعها ساسو .

البتق : القصب بعد حصادة تنمو جذوره ويطلق عليها البُتق.

أبو أيمن
10-12-2009, 11:39 AM
يا شباب لكم التحية
ماعندي وقت لكن هاكم دي لامن ارجع

ــــــــــــــــــــــــــــــــــــــــــــــــــ ــــ
يا قاامره اقلبي السنسني الحمره **** وشوفي ابوي انا الراجهو كل صباح
سلام


تحياتي لك عزيزي عمر وأنت تنعم علينا بالمرور في دهاليز التراث....

السنسني : هي طرقة الكسرة وتقلب على جنبها الآخر فوق الصاج عندما يحمر لونها دليل النجاض...أرجو أن أكون قد وفقت....

عمرابى
10-12-2009, 10:10 PM
العزيز أبو أيمن لك التحية وأنت تصطحبنا فى فضاءات تراثنا الحبيب

هاك حاجة لزوم المشاركة وكدة:
المجودق

القارسيق

بركلاويه
10-12-2009, 10:56 PM
الكوريق ...
ويقول هذا الرجل سنجك
ماذا يعني؟؟؟؟
اجدها كثيرا عن الشوايقة
وأحيانا مره سنجكاويه

ابو أيمن أمد الله في ايامك وجعلها كلها خير
وأسعدك بأيمن وأم أيمن يا رب

أبو أيمن
10-13-2009, 12:24 PM
العزيز أبو أيمن لك التحية وأنت تصطحبنا فى فضاءات تراثنا الحبيب

هاك حاجة لزوم المشاركة وكدة:
المجودق

القارسيق
سلام يالعمرابي .....مجودق ماسمعتها لكن سمعت بمجوبق....
والشئ المجوبق هوالذي لم يتقن صاحبه صنعته....يقولك (فلان زارعلو زراعةً مجوووبقة )...أي غير مرتبة..... ويقولك فلان جوبق حوض البرسيم (أي أنه لم يحشه بطريقة مرتبة ).... وهكذا..

القارسيقة هي القصبة المورقة شديدة الإخضرار ( ودعت قارسيت الصيف الليلة قامت يالطيف )...
وللمخضرمين المراجعة على هذا الشرح ...

أبو أيمن
10-13-2009, 12:38 PM
الكوريق ...
ويقول هذا الرجل سنجك
ماذا يعني؟؟؟؟
اجدها كثيرا عن الشوايقة
وأحيانا مره سنجكاويه

ابو أيمن أمد الله في ايامك وجعلها كلها خير
وأسعدك بأيمن وأم أيمن يا رب

سلام يابركلاوية نشكرك على إطلالاتك لنا وأنت في خضم مشغولياتك...الله يعينك...
على كل حال عندما يبلغ بك العناء مبلغه تعالي وارتاحي بي شوية تراث...

والكوريق عبارة عن آلة تشبه الملعقة في تصميمها ولكن على كبير جداً...والملعقة لخم الرز....والكوريق لخم التُراب...
السنجك كانت وظيفة عسكرية في عهد التركية السابقة كل سنجك يدير كم عسكري ...
وارتبطت بالشايقية لأن إسماعيل باشا عندما حسّ بمقاومتهم له وأنهم لايريدون العمل في الزراعة حاول بأن يدخلهم معه في الجيش ليسترضيهم ويأمن شرهم وعين منهم السناجك ولذلك إرتبط هذا الإسم بهم....تحياتي .

عمرابى
10-13-2009, 02:01 PM
سلام يالعمرابي .....مجودق ماسمعتها لكن سمعت بمجوبق....
والشئ المجوبق هوالذي لم يتقن صاحبه صنعته....يقولك (فلان زارعلو زراعةً مجوووبقة )...أي غير مرتبة..... ويقولك فلان جوبق حوض البرسيم (أي أنه لم يحشه بطريقة مرتبة ).... وهكذا..

القارسيقة هي القصبة المورقة شديدة الإخضرار ( ودعت قارسيت الصيف الليلة قامت يالطيف )...
وللمخضرمين المراجعة على هذا الشرح ...

أستاذنا أبو أيمن لك التحية والقارسيق فعلا زى ما اتفضلت وشرحت وما باقيلى فى زول يقول بعد قولك.
اما (المجودق) فهى الملح الأحمر
وبارك الله فيها الورتنا(المجوبق)

بركلاويه
10-13-2009, 02:41 PM
سلام يابركلاوية نشكرك على إطلالاتك لنا وأنت في خضم مشغولياتك...الله يعينك...
على كل حال عندما يبلغ بك العناء مبلغه تعالي وارتاحي بي شوية تراث...

والكوريق عبارة عن آلة تشبه الملعقة في تصميمها ولكن على كبير جداً...والملعقة لخم الرز....والكوريق لخم التُراب...
.

ابو ايمن عاد بالغت معاي :msn-wink:
اسع عمرابى يرجع لى سيرتو الأولى ويقول لى حنكوشة انتا بالمناسبة كلمة حناكيش دي مستحدثة
كما الحناكيش ولا كيف ؟؟؟؟:011:
اها نرجع لى كلامي
يا ابو ايمن انت نسيت انو انا بركلاويه
الكوريق بعرفو تماما ياهو بشبه المعلقة على شكل مربع كمان
لكن
انا قصدي الكورّ يق ...
ويديك العافية

فتح العليم
10-13-2009, 02:47 PM
والله يابركلاوية بقيتى للراجل دة فى عزيزتو

أبو أيمن
10-13-2009, 07:31 PM
ابو ايمن عاد بالغت معاي :msn-wink:
اسع عمرابى يرجع لى سيرتو الأولى ويقول لى حنكوشة انتا بالمناسبة كلمة حناكيش دي مستحدثة
كما الحناكيش ولا كيف ؟؟؟؟:011:
اها نرجع لى كلامي
يا ابو ايمن انت نسيت انو انا بركلاويه
الكوريق بعرفو تماما ياهو بشبه المعلقة على شكل مربع كمان
لكن
انا قصدي الكورّ يق ...
ويديك العافية

مانحن قعد نقول ناس البركل ديل ياهن حضرنا.... ونحن بدوهم....ناس البيوت السمحي المبني بالطوب الأحمر والصهاريج فوقا من فوق مابيخلو من الحنكشة....
لكن ماااافي مشكلة:
الكورّيق : عبارة عن أجزاء القصبة الجافة ومفردها كوريقة..... كنّا نجوفها ونصنع منها مزامير ،،،

أها وصل والله يبقالي دايري توصليه للحناكيش...ومازال سؤالك قائماً من أين أتى لفظ حنكوش....

أبو أيمن
10-13-2009, 07:41 PM
والله يابركلاوية بقيتى للراجل دة فى عزيزتو


خلها يافتح العليم ....باقي قعد تجي تقيل عندنا من حر السموم .

عالمابي
10-16-2009, 03:08 PM
الكوريق يابركلاوية هي القصبه الناشفه بتاعت المريق يعملوا الصفارة

انحنا بنقول ليها الكبريق

عمرابى
10-17-2009, 01:01 PM
والله يا ابو ايمن عارف جبت لى صديق استعين بيه فى اكمال النواقص فى الحاجات الكنت جايبا قبل يومين
لقيناه طارت مع المشاركات الطارت فياريت لو تكررها تانى لعموم الفائدة.
ولانعاش الذاكرة هاكم دى:
التتق
التندل

بركلاويه
10-17-2009, 02:52 PM
التندل


قايتو ياعمرابي
طلعت حنكوش ... ساكت كنت شايل حالي :SnipeR (40):
وانا من زمان قاعدة ليك بى ورا الباب ..:SnipeR (83):.
اسع عليك الله التندل دي محتاجة لي ابو ايمن
دي ياخي لو قلتها لى اي شافع بعرفا ...
والتندل ... هو كوم التراب :SnipeR (51):

أبو أيمن
10-17-2009, 06:59 PM
والله يا ابو ايمن عارف جبت لى صديق استعين بيه فى اكمال النواقص فى الحاجات الكنت جايبا قبل يومين
لقيناه طارت مع المشاركات الطارت فياريت لو تكررها تانى لعموم الفائدة.
ولانعاش الذاكرة هاكم دى:
التتق
التندل


التتق : يستخدمه المزارعين كتعبير عن الدوام...أو دورو في القراعي ...إنشاء الله تكونوا القراعي عارفنها؟؟؟إنت يوم 14 دا يعني كان على كل البوستات؟؟؟؟والله مانتبهت يالعمرابي وافتكرت المسألة كلها محصورة في صندوق المرافئ ...إنشاء الله سأعيد كتابة تلك الكلمات .

أبو أيمن
10-17-2009, 07:03 PM
لنخرجكم قليلا من الاطار التقليدي لمسار البوست الى واقع آخر وبرضو في التراث :

اكمل / اكملي الجمل المفيدة التالية :

1 - يستخدم ( وسخ ) الاضان أحيانا كمادة مساعدة في .........


2 - تخلط خُصيلات من شعر البقر مع شوية سكن دوكي مع صمغ لعمل .............


3 - موية مُسار الدوم تساعد في ....................


4 - لبن الحمير يساعد في ............


5 - الخُلال آداة لتسريح الشعر استخدمناها قديما في تسريح الشعر الخنفس في السبعينيات من القرن الماضي ـ لكن للخُلال معنا آخر وهو ................................

عالمابي
10-17-2009, 07:16 PM
ابو ايمن انا بجاوب ليك رقم 4 و5

4/ لبن الحمير في علاج الكتكوت

5/ الخلال يستخدم للسخله الصغيرة لمنعها من الرضاعه من امها

أبو أيمن
10-17-2009, 07:33 PM
ابو ايمن انا بجاوب ليك رقم 4 و5

4/ لبن الحمير في علاج الكتكوت

5/ الخلال يستخدم للسخله الصغيرة لمنعها من الرضاعه من امها


سلام مربع ياعالمابي...
إجابة صحيحة ولك نصف المجموع....أها قصرنا معاك؟؟؟؟
شكراً على المرور المتألق .

ابو عبير
10-17-2009, 08:45 PM
01 يستخدم وسخ الأذان أحياناً كمادة مساعدة في إستخراج الشوكة من الرجل.

ابو عبير
10-17-2009, 08:53 PM
وتراثيات من أرض البطانة

01 ما هي البخصة.
02 ما هي الدوانة
03 ما السلوكة.
04 ما هو المحويب.
05 ما هو العبوب.
06 ما هي الكركعوبة.

ود الصول
10-17-2009, 09:37 PM
نحن .. في زمن .. الابداع الحقيقي..
حقاً تجعلون كل المعاني.. والمصطلحات..
باختلاف الكلمة..
والجملة ..
واللغة..
(حساء ... تتقبله...معدة الاحساس..)

أبو أيمن
10-18-2009, 12:32 PM
01 يستخدم وسخ الأذان أحياناً كمادة مساعدة في إستخراج الشوكة من الرجل.
ابو عبير لك التحية....
كمان إجابتك صحيحة....وباقي بند واحد لفك الشفرة...تحياتي .

نوارة البركل
10-18-2009, 12:58 PM
وتراثيات من أرض البطانة

01 ما هي البخصة.
02 ما هي الدوانة
03 ما السلوكة.
04 ما هو المحويب.
05 ما هو العبوب.
06 ما هي الكركعوبة.

أبو عبير تحياتي وأشواقي انا حاجاوب على اتنين عندنا في الشمال والباقي خلي لي ناس البطانة
3 / السلوكة أداة مصنوعة من الخشب ولها رأس حاد وبمسافة لاتقل عن الشبر توجد خشبة بالعرض توضع عليها الرجل لعملية الحفر ودائماً تستعمل في الجروف
6 / الكركعوبة هي الدومة بعد أكلها يا رب أكون صح

ابو عبير
10-18-2009, 01:15 PM
موية مسار الدوم تساعدفي علاج الرمد في إعتقادي كما عند في أرض البطانة نسخدم موية السعف

ابو عبير
10-18-2009, 01:29 PM
أبو عبير تحياتي وأشواقي انا حاجاوب على اتنين عندنا في الشمال والباقي خلي لي ناس البطانة
3 / السلوكة أداة مصنوعة من الخشب ولها رأس حاد وبمسافة لاتقل عن الشبر توجد خشبة بالعرض توضع عليها الرجل لعملية الحفر ودائماً تستعمل في الجروف
6 / الكركعوبة هي الدومة بعد أكلها يا رب أكون صح

الأخت الغالية نوارة البركل لك التحية والتقدير إجابة السلوكة صحيحة أما بخصوص الكركعوبة فعندنا تطلق على لوزة القطن بعد أن تتفتح وتؤخذ منها بلاقة القطن ... كما أن لها معنى ثاني وهي عبار عن علبة حديد يوضع في داخلها صحى وتستخدم في إبعاد الطير عن حقول الذرة.

عالمابي
10-18-2009, 01:43 PM
ابو عبير تحياتي

1/ البخصه دي حاجه بيختوا فيها اللبن للترويب او تسمى الكادق على ما اعتقد
2/ الدوانه هي محبرة او اله يكتب بها جايه من التدوين
الباقي شيء النوارة جوابت عليه وشي ما عرفتوا

أبو أيمن
10-19-2009, 07:22 PM
الأخت الغالية نوارة البركل لك التحية والتقدير إجابة السلوكة صحيحة أما بخصوص الكركعوبة فعندنا تطلق على لوزة القطن بعد أن تتفتح وتؤخذ منها بلاقة القطن ... كما أن لها معنى ثاني وهي عبار عن علبة حديد يوضع في داخلها صحى وتستخدم في إبعاد الطير عن حقول الذرة.


سلام يا أبوعبير.... الكركعوبة عندنا بالإضافة الى الدومة بعد اكلها كمان المنقة بعد أكلها.

أبو أيمن
10-19-2009, 07:25 PM
موية مسار الدوم تساعدفي علاج الرمد في إعتقادي كما عند في أرض البطانة نسخدم موية السعف


إجابة صحيحة يا أبوعبير فقد إستفدت من تشابه الألفاظ والعادات في السودان ...لك مني ألف تحية .

أبو أيمن
10-19-2009, 07:31 PM
وإليكم هذه الكلمات الخفيفات من قلب التراث :


التِباب

القَديقة

اللسد

الكُشنة

الشّرغرق

ابو عبير
10-19-2009, 07:34 PM
ابو عبير تحياتي

1/ البخصه دي حاجه بيختوا فيها اللبن للترويب او تسمى الكادق على ما اعتقد
2/ الدوانه هي محبرة او اله يكتب بها جايه من التدوين
الباقي شيء النوارة جوابت عليه وشي ما عرفتوا

الأخ العزيز عالمابي لك التحية والتقدير لقد عكست الإجابة

البخصة : عبارة عن قرعة كبيرة يوضع فيها السمن.
الدوانة : هي أيضاً قرعة كبيرة يوضع فيها اللبن للترويب.

شغل الفاخورة وأجب على بقية الإسئلة وخاصة المحويب والعبوب.

عمرابى
10-20-2009, 09:44 PM
وإليكم هذه الكلمات الخفيفات من قلب التراث :


التِباب

القَديقة

اللسد

الكُشنة

الشّرغرق

أيو أيمن انا غايتو باقيلى فى اتنين عرفتهن

اللسد: سيقان القمح البتفضل بعد ما يخشوه
الكشنة:ريحة الطبيخ

عمرابى
10-20-2009, 10:01 PM
بلاد الريد والمحنة
قصيدة للشاعر أحمد سيد أحمد
يغنيها عيسى بروى فيها العديد من المسميات القديمة وهى تذكرنا بماضينا التليد

بلاد الريد والمحنة بيوت الطين القديمى
سلام ليكى يعم يطوفك يحلق فى سماكى ديمى
بعيد عنك يا بلادى مقاصر الغربة اللئيمى
معاى فى البال ما بتغيبى أهيم فيكى مكان تهيمى
صور فى عينى ذكراهن مشاهد حلوى وعظيمى
تشيل من نفسى المآسى بواقىالذكرى الأليمى
أشوف لى جنى بى حمارتو شادها كارب الصريمى
يلكد فيها وينهر ويقشط فيها بى نيمى
وبرضو كمان مابى تمشى هى جكجاكه ومو هميمى
هو لابس عراقى بلدى مكرب لافى العميمى
اشوف تربال ماشى طالع بعد حش عشا البهيمى
وراهو التانى داك يعرج كراعو أظن مو سليمى
وداك شاقق بى هناك طلع بى ناس ود مريمى
وداك من الصباح قايم عجلان شايل كريمى
وداكا يلاقيك باسم كرم فى طبعو صار شيمى
يقولك لا جوة قنب يكتر لك فى العزيمى
وداك يخب ماشى اهلو عشان السما فيهو غيمى
عرش بيتو قديم مشقق على فلقا مو نعيمى
بعيد عنك يا بلادى حياتى انا ما ليها قيمى
داير ارجع لك واضمك واعيش انا فيك لا ديمى
عمنا ابو ايمن لشرح المفردات الصعبة لى ناس بركلاوية

ابو عبير
10-20-2009, 10:56 PM
التباب: يستخدم في السعف
الشرغرق : الشرك (القلابة).
الكشنة : هو ملاح ويكة ولكن بصلتو محروقة.

المبدع
10-20-2009, 11:16 PM
الزعيم عمرابي قصيدة احمد سيد احمد مميزة ,,, نقلت لنا صور جميلة من الواقع
بس انا شايفها واضحة جدا ( اخوك عجوز )
اما في حال استعصت على احدهم مفردة ( نحن جاهزين وممكن نريح عمك شوية )
لكم المودة

أبو أيمن
10-21-2009, 11:05 AM
التباب: يستخدم في السعف
الشرغرق : الشرك (القلابة).
الكشنة : هو ملاح ويكة ولكن بصلتو محروقة.



أبو عبير ماشاء الله عليك تستخدم الإستنتاج في تفسيرك...
والإجابات قريبة جداً من المعنى...
وفعلاً التباب متعلق بالسعف وهو عبارة عن ضفيرة من السعف تلون بالتفتة...ثم يحاط بها البرش كبرواز لحماية أطراف البرش وللزينة معاً...
أما الكشنة هي فعلاً رائحة البصل عندما يوضع عليه اللحمة في الحلة ويساوطوه وتطلع ديك الروائح التي يسيل لها اللعاب...
أمّا الشرغرق إناء يغلى فيه البُن وله صبابة أمامية كالسبلوقة لصب البن في الجَبنة..

يمكن كلمة التفتة تحتاج إلى شرح....إذا إنزنقت فيها قول...والله إستعين بصديق .

عمرابى
10-21-2009, 11:22 AM
وإليكم هذه الكلمات الخفيفات من قلب التراث :




القَديقة



انا غايتو بعرف (البديقة) واللى هى شرك التمساح أو (الفدر) وقد جاء ذكره
فى رد حسن الدابى لعبد الله محمد خير:
كتير قبلك يئن مضروب (بديقة)
تسد عبراته تسمع لى شهيقا

أبو أيمن
10-21-2009, 06:55 PM
انا غايتو بعرف (البديقة) واللى هى شرك التمساح أو (الفدر) وقد جاء ذكره
فى رد حسن الدابى لعبد الله محمد خير:
كتير قبلك يئن مضروب (بديقة)
تسد عبراته تسمع لى شهيقا


القديقة ياعمرابي هي لفة ضفيرة كاملة من السعف...والبرش الكامل محتاج لعدد من القديقات لإكماله.

ابو عبير
10-21-2009, 08:07 PM
أبو عبير ماشاء الله عليك تستخدم الإستنتاج في تفسيرك...
والإجابات قريبة جداً من المعنى...
وفعلاً التباب متعلق بالسعف وهو عبارة عن ضفيرة من السعف تلون بالتفتة...ثم يحاط بها البرش كبرواز لحماية أطراف البرش وللزينة معاً...
أما الكشنة هي فعلاً رائحة البصل عندما يوضع عليه اللحمة في الحلة ويساوطوه وتطلع ديك الروائح التي يسيل لها اللعاب...
أمّا الشرغرق إناء يغلى فيه البُن وله صبابة أمامية كالسبلوقة لصب البن في الجَبنة..

يمكن كلمة التفتة تحتاج إلى شرح....إذا إنزنقت فيها قول...والله إستعين بصديق .

أبو أيمن مساء كل الجمال التفتة هي مجموعة ألوان زي النيلة في منطقتنا وإن شاء الله تكون صاح ... لك كل التحايا

أبو أيمن
10-22-2009, 08:29 PM
أبو أيمن مساء كل الجمال التفتة هي مجموعة ألوان زي النيلة في منطقتنا وإن شاء الله تكون صاح ... لك كل التحايا


تمام يافندم 100% تحياتي .

أبو أيمن
10-22-2009, 08:33 PM
بلاد الريد والمحنة
قصيدة للشاعر أحمد سيد أحمد
يغنيها عيسى بروى فيها العديد من المسميات القديمة وهى تذكرنا بماضينا التليد

بلاد الريد والمحنة بيوت الطين القديمى
سلام ليكى يعم يطوفك يحلق فى سماكى ديمى
بعيد عنك يا بلادى مقاصر الغربة اللئيمى
معاى فى البال ما بتغيبى أهيم فيكى مكان تهيمى
صور فى عينى ذكراهن مشاهد حلوى وعظيمى
تشيل من نفسى المآسى بواقىالذكرى الأليمى
أشوف لى جنى بى حمارتو شادها كارب الصريمى
يلكد فيها وينهر ويقشط فيها بى نيمى
وبرضو كمان مابى تمشى هى جكجاكه ومو هميمى
هو لابس عراقى بلدى مكرب لافى العميمى
اشوف تربال ماشى طالع بعد حش عشا البهيمى
وراهو التانى داك يعرج كراعو أظن مو سليمى
وداك شاقق بى هناك طلع بى ناس ود مريمى
وداك من الصباح قايم عجلان شايل كريمى
وداكا يلاقيك باسم كرم فى طبعو صار شيمى
يقولك لا جوة قنب يكتر لك فى العزيمى
وداك يخب ماشى اهلو عشان السما فيهو غيمى
عرش بيتو قديم مشقق على فلقا مو نعيمى
بعيد عنك يا بلادى حياتى انا ما ليها قيمى
داير ارجع لك واضمك واعيش انا فيك لا ديمى
عمنا ابو ايمن لشرح المفردات الصعبة لى ناس بركلاوية


غااالي والطلب رخيص ياعمرابي وناس بركلاوية يستاهلو كل خير.

عرضناها على احد الإستشاريين فأعطانا التشخيص التالي :

1/ شادها وكارب الصريمي : الصريمي هي عباره عن حبل يربط في فك الحمار أو الحمارة وهو عبارة عن دركسون الحمارة .
2/ يلكد : بمعنى يضرب الحمارة بي كراعو وهو راكب عليها ويكون الضرب في مستوى الكرعين أي في بطن الحمارة ...
3/ ويقشط : أي يضرب الحمارة بي سوط أو عصاية أو أي حاجة
4/جكجاكة ومو هميمي : الجكة وهي نوع من المشى وهو النقيز عند الحمير وموهميمي يعني داراويه تب .الضرب مو هامها .
5/ تربال : مزارع البحر أو من يفلح الأرض
6/ شاقق : الذي لايمشى في الشارع عديل ويختصر المسافات .
7/ شايل كريمي : اي ماشى الى كريمة
8/ شيمى : اي الكرم بقى فيهو طبيعة أو عادة .
9/ لاجوه قنب : أي أدخل البيت وأقعد (قنب أي اجلس ) كناية عن الكرم .
10/ العزيمي : اي العيزومة أو الإلحاح على الضيف .
110/ غيمي : أي غيمة في السماء
12/ فلقا : وهي ساق النخله بعد أن يفلق(بفتح كل الحروف) أي يشقق إلى أنصاف ويوضع لسقف البيوت .
13/ لاديمي : مدى الحياه .

ابو عبير
10-22-2009, 09:22 PM
أبو أيمن لك التحية والتقدير على هذه الإضاءات الجميلة للحنكوشة بركلاوية وكل حناكيش المرافيء ... دمت لنا أخي العزيز.

بركلاويه
10-22-2009, 10:01 PM
غااالي والطلب رخيص ياعمرابي وناس بركلاوية يستاهلو كل خير.

عرضناها على احد الإستشاريين فأعطانا التشخيص التالي :

4/ جكجاكة ومو هميمي : الجكة وهي نوع من المشى وهو النقيز عند الحمير وموهميمي يعني داراويه تب .الضرب مو هامها .
5 .

ابو ايمن

صدقني استمتعت جدا هنا فإنك تحملني بعيدا ...
زمان اول ما مشيت هناك عندكم كانت لازلت القلوب بيضاء كبياض اللبن والسرائر
لاتتوسد الا المحنة ولا تلبس الا ثوب البساطة والطيبة ..
كنت وقتها ... اسمع كثير من الكلمات التى لم تتداول عندنا ...
فـــ لله درك اخي العزيز
بس كمان برضو ماعرفت داراويه لكن ضمنيا عرفتها بمعنى دمها تقيل

عالمابي
10-25-2009, 10:28 AM
يالا يا ابو عبير
1/ المدقاقه


2/ الكرسيق

3/ الانقايه


4/ الشادوف

عمرابى
10-25-2009, 10:47 AM
يالا يا ابو عبير
1/ المدقاقه

3/ الانقايه



المدقاقة: خشبة عريضة من قدام وفيها يد بى ورا يدقوا بيها الوتد
الانقاية: جزء من الأرض تكون مستطيلة الشكل وهى أكبر من الحوض

عالمابي
10-25-2009, 10:54 AM
العمرابي سلام واشواق يا غالي

الاتنين قلت قول فهم

اما اذا ما عرفت الكرسيق والشادوف ياك وقعت وما سميت مع ابو عبير

يديك الف عافية

ابو عبير
10-25-2009, 11:38 AM
يالا يا ابو عبير
1/ المدقاقه
2/ الكرسيق
3/ الانقايه
4/ الشادوف

أخي الغالي عالمابي لك التحية والتقدير وأنت تتحفنا بتلك الكلمات من الزمن الجميل

01 المدقاق في منطقتنا بدون تاء التأنيث هو عبارة عن ألة تصنع من الخشب على شكل تي وبطول 130سم تدق بها الذرة.
02 الكرسيق عبارة عن قصبة لينة تربط به الكليقة (الكليقة مجموعة قصب الذرة) لتقدم علف للبهائم.
03 الإنقاية هي نظام تقسيم أرض الحواشة إلى قطع صغيرة لتسهيل عملية الري وعادة عندنا مساحة الحواشة (3 فدان فتقسم بالعرض إلى 12 قطعة)
04 الشادوق هو عبارة عن وعاء لرفع الماء كما في الساقية.

لك وللأخ أبو أيمن التحية والتقدير.

أبو أيمن
10-25-2009, 08:17 PM
إليكم هذه الصُرة أفتحوها وشوفوا الفيها....مع تحياتي لكم :


انا فى الدرادر ومانى فى الدهاده
والدّنبرو ملا البربخ والدّروه مكسوره
والمويه مبعوجه وانقايه مسروقه
وطورية مدفونه والاربل الرايح
وشقاوتى مصرورة في المرتق المردوم
والمويه محقونه واللبقه بتسرسر
والكوده مدفونه والصبرا بتعاين

ابو عبير
10-25-2009, 09:23 PM
الأخ العزيز أبو أيمن لك التحية قد أكون عرفت بعض الكلمات وهي كالتالي : -

01 الدرادر جمع دردر وهو بيت من الطين إسطواني الشكل.
02 الدروة (الضروة) وهي عبارة عن حائط أو سور لحماية الناس من البرد وقت الشتاء والإستمتاع بأشعة الشمس.
03 الموية مبعوجة أي فتح مياه الري بطريقة مغايرة وإنقاية مسروقة أي غير متساوية الأبعاد.
04 الموية محقونة أي محبوسة.
05 المردوم المدفون.
06 بتسرسر أي بتسرب موية
07 الصبرا نوع من أنواع الدبيب.
إن شاء الله تكون صحيحة ... لك التحية والتقدير

أبو أيمن
10-26-2009, 05:42 PM
الأخ العزيز أبو أيمن لك التحية قد أكون عرفت بعض الكلمات وهي كالتالي : -

01 الدرادر جمع دردر وهو بيت من الطين إسطواني الشكل.
02 الدروة (الضروة) وهي عبارة عن حائط أو سور لحماية الناس من البرد وقت الشتاء والإستمتاع بأشعة الشمس.
03 الموية مبعوجة أي فتح مياه الري بطريقة مغايرة وإنقاية مسروقة أي غير متساوية الأبعاد.
04 الموية محقونة أي محبوسة.
05 المردوم المدفون.
06 بتسرسر أي بتسرب موية
07 الصبرا نوع من أنواع الدبيب.
إن شاء الله تكون صحيحة ... لك التحية والتقدير



تحياتي لك أخي أبو عبير...وأنا أعلم أنّك رجل مجتهد وتتعدى الحدود الجغرافية ولاتؤمن بها رغم الكلمات الغارقة في المحلية فلم يتملكك اليأس وحاولت فيها مستخدماً خبرتك وزخيرتك اللغوية فكانت الإجابة معظمها لانستطيع أن نقول خطأ...ولكن سوف أشرحها لك حسب ماتستخدم في منطقتنا للفائدة العامة....وسيكون شرحي في حدود الكلمات التي وردت في مشاركتك على أمل أن يأتينا من يقوم بشرح الباقي إن وجد.
1- الدرادر تكرار الروحة والجية حتى بلوغ التعب أشده أو التجارب المريرة خلال حياة الإنسان..كأن يقول لك أحد (والله في الدنيا دي إتدردرت جنس درادر مايعلم بها إلاّ الله ) .
2 -الدروة مكان يبنى من الأسمنت أو يكون بتجويف جذع شجرة يُصب فيه الماء لري الحيوانات.
3- الصبرا عندنا هي الثعلب .
أمّا بقية الكلمات فلاغبار عليها....تحياتي لك .

عمرابى
10-27-2009, 10:20 AM
إليكم هذه الصُرة أفتحوها وشوفوا الفيها....مع تحياتي لكم :


انا فى الدرادر ومانى فى الدهاده
والدّنبرو ملا البربخ والدّروه مكسوره
والمويه مبعوجه وانقايه مسروقه
وطورية مدفونه والاربل الرايح
وشقاوتى مصرورة في المرتق المردوم
والمويه محقونه واللبقه بتسرسر
والكوده مدفونه والصبرا بتعاين

البربخ:فتحة بتكون فى الجدول الكبير الى الجداول المتفرعة منه ودايما بيقفلوها بى شوالات ودلاقين
الاربل:عود طويل فيه حديدة من تحت فى شكل مستطيل يستخدموا فى مواساة الواطة أشبه بالواسوق لكن الواسوق بيكون فيهو حبل واحد يمسك العود والتانى يمسك الحبل

عمرابى
10-27-2009, 02:01 PM
حاجة كدة للقزقزة:
البخسة
التدى
المحراكة

ابو عبير
10-27-2009, 02:14 PM
حاجة كدة للقزقزة:
البخسة
التدى
المحراكة

البخسة : إناء من القرع لحفظ السمن أو الروب فيه.
المحراكة : حجر لطحن الذرة عليه (رحى) ولكن عندنا حرف الحاء قبل الراء

عالمابي
10-27-2009, 08:21 PM
التدي يا عمرابي


حيطه بينوها جنب الباب بتاع الغرفه زايده شويه من الداخل محل المفتاح على ما اعتقد

وهاك دي يا عمرابي


1/ المقشاشه

2/ الطبطابه

3/ الإشفي

4/ الدباره

5/ الدقل

أبو أيمن
10-28-2009, 09:22 AM
إليكم هذه الصُرة أفتحوها وشوفوا الفيها....مع تحياتي لكم :


انا فى الدرادر ومانى فى الدهاده
والدّنبرو ملا البربخ والدّروه مكسوره
والمويه مبعوجه وانقايه مسروقه
وطورية مدفونه والاربل الرايح
وشقاوتى مصرورة في المرتق المردوم
والمويه محقونه واللبقه بتسرسر
والكوده مدفونه والصبرا بتعاين

وإليكم شرح بعض المفردات في الصُرّة أعلاه :
الدرادر : مشاغل الدنيا ( الشقاوة )
الدهاده : الدهدهة تعنى التاخير ( ترسلك الوالدة وتقولك لاتندهده )
الدنبرو : صغار الضفدعة ( يسبح فى المياة الضحلة )
البربخ : كلمة فصحى عندنا نحن معناها الفتحة البين الجدول الكبير (الجنابية ) والجدول الصغير ( ( القراع )
الدروة : لها عدة معانى منها الحوض الذى تصب فيهو موية الساقى(او المكنة) ومنها تنحدرالى الجدول ... معنى تانى هى الحوض البيسقو فيهو البهائم

مبعوجة : مكسورة ( يبعج الشئ : يحدث فية ثقبا )
الانقاية : قطعة الرض المستطيلة تكون مقسمة الى عدة احواض
الطورية : الة يدوية تستخدم فى حفر الارض
الاربل : برضو الة راسها الامامى قطعة خشب نصف دائرية تستخدم فى رفع (التقانت) وتسوية الأرض قبل الري .
المرتق : سد ترابى لحجز الماء
اللبقة : الفتحة التى تدخل منها الماء الى الحوض من الجدول ويصاحبها سد ترابى يمنع الماء من الذهاب الى الاحواض الاخرى

تسرسر : تسرب الماء
الكودة : مؤخرة جريدة التمرة .
الصبرة : انثى الثعالب

قوس قزح
10-28-2009, 09:35 AM
ابو ايمن الجميل
الله يديك ألف عافية

ترا ما شاء الله الحكاية مشت ، ورجعنا لي العصر الحجري من جديد ، جميل جدا ان نتذكر هذه المسميات التي كادت ان تندثر ، وهذا تاريخ وحضارة سادت في يوم من الايام فلا بد من الاحتفاظ بها للأجيال القادمة ..

كدي اللمشي اجيبلي صرة زي صرتك العجيبة دي
ونتفسح شوية في الناس ديل

لك محبتي واحترامي

نوارة البركل
10-28-2009, 10:53 AM
الأخ عالمابي خلينا نسبق عمرابي ونفسر ليك دى كلام شوايقة عديل
1/ المقشاشه : - يعني المكنسة وهي مصنوعة من السعف بتاع النخل يعني متل المكنسة الكهربائية

2/ الطبطابه : - هي جزء من سبيطة البلح وتكو لينة تقطع وتشق علي تلاتة أجزاء لحدي النصف
ويعمل منها حركة تعطي موسيقة جميلة

3/ الإشفي : - ابرة طويلة يشتغلوا بيها البروش

4/ الدباره : - خيط يستعمل للتنجيد

5/ الدقل : - تقريباً حيطة صغيرة من الطين دي ما متأكدة
شكراً عالمابي على هذه المعلومة
الأخوة الأعزاء من اين أتت كلمة ( زول ) وما معناها ؟
بالمناسبة كلمة زول دي كتب فيها صلاح الغول قصيدة للخليج اللي زعل منو لما صلاح الغول قال ليهو يا زول

عالمابي
10-28-2009, 11:53 AM
والله يا نوارة البركل ابدعتي في الاجابات
بس الدقل ده حق الباب المن وراء البيركبوا فيهو الكشر ابواب زمان بتاعت الخشب

عمرابى
10-28-2009, 02:54 PM
والله يا نوارة البركل ابدعتي في الاجابات
بس الدقل ده حق الباب المن وراء البيركبوا فيهو الكشر ابواب زمان بتاعت الخشب

يا عالمابى اسع عليك الله أصعب (الدقل) واللا (الكشر)
الكشر دى ذاتا دايرة شرح

نوارة البركل
10-28-2009, 05:11 PM
يا عالمابى اسع عليك الله أصعب (الدقل) واللا (الكشر)
الكشر دى ذاتا دايرة شرح
عمرابي يا حنكوش الكشر هو يشبه المفتاح لكنه من الخشب ومحفورة فيه سنون والباب نفسه من الخشب

مظفر
10-28-2009, 05:16 PM
http://s4.turboupload.com/i/00066/x814z1phjz8i.gif

أبو أيمن
10-29-2009, 07:38 PM
[QUOTE=نوارة البركل;18346][u][i][align=center]الأخ عالمابي خلينا نسبق عمرابي ونفسر ليك دى كلام شوايقة عديل
1
3

4[color="blue"]/ الدباره : - خيط يستعمل للتنجيد

[SIZE="6"]يانوارة سلام عليك...
ويبقالي الدُبارة اتخن من خيط التنجيد ويستخدم عادة في خياط الجوالات سواء أكانت ذرة أو تمر أو غيره....والله أعلم .

المبدع
10-30-2009, 06:13 PM
يا نسيماتاً تَكَرْبِتْ ..
شايلة أشواق الجنائنْ
لي جديول حلقو ناشِفْ ..
أو عَرَق تُربال يكادِنْ
في وشي الأفراح بفتِّشْ ..
بين قفا اللّحظات أعاينْ
بين سواقير الفقارى ..
الجاية من تالا المدافِنْ

أبو أيمن
11-01-2009, 10:17 AM
نواصل في المحلية ويالله شدوا حيلكم واقلبوا السنسني الحمرا...وشوفوا معاني الكلمات أدناه :
اللآرجيقة

الجُبُركُلا

يقولك فلان إتكرم من الجماعة

العُصار

العُصّارة

ابو عبير
11-02-2009, 11:01 AM
أبو أيمن الله إديك العافية لقد ذكرتي بقصيدة إليا أبو ماضي التي ذكر فيها الأعاصير بالعصار هو هواء يسير في شكل حلزوني :

زارع الحقل في البكور عيشك الدهر أخضر
أنت في هيكل الزهور فيلسوف مفكر
*****
سيد المنجل الحقير أنت للناس سيد
من ذراعيك للفقير حبة القمح تولد
*****
ماؤك الطاهر الزلال من سواقيك يقطر
كل ما تقتني حلال باسمك الخير يذكر
******
أنت وجه مخلد للجدود المخلدين
مثلهم سوف تلحد طاهر العين والجبين
******
يا بعيدا عن البشر أنت لا تعرف الشرور
تعرف الماء والحجر والأعاصير والزهور.
أما العصارة : كسرة الذرة عندما يضاف إليها كمية من الماء حتى تصير في شكل مشروب.

شيكو
11-02-2009, 11:48 AM
نواصل في المحلية ويالله شدوا حيلكم واقلبوا السنسني الحمرا...وشوفوا معاني الكلمات أدناه :
اللآرجيقة

الجُبُركُلا

يقولك فلان إتكرم من الجماعة

العُصار

العُصّارة

أبو أيمن حبيبي

العصار ده لامن يقوم ويتلوي زي السورو
بنقول:
محمد معانا ماتغشانا
ونضحك لامن ننفنقل علي ضهرنا
ياهو صاح مو كدي؟؟

أبو أيمن
11-02-2009, 06:16 PM
أبو أيمن الله إديك العافية لقد ذكرتي بقصيدة إليا أبو ماضي التي ذكر فيها الأعاصير بالعصار هو هواء يسير في شكل حلزوني :

زارع الحقل في البكور عيشك الدهر أخضر
أنت في هيكل الزهور فيلسوف مفكر
*****
سيد المنجل الحقير أنت للناس سيد
من ذراعيك للفقير حبة القمح تولد
*****
ماؤك الطاهر الزلال من سواقيك يقطر
كل ما تقتني حلال باسمك الخير يذكر
******
أنت وجه مخلد للجدود المخلدين
مثلهم سوف تلحد طاهر العين والجبين
******
يا بعيدا عن البشر أنت لا تعرف الشرور
تعرف الماء والحجر والأعاصير والزهور.
أما العصارة : كسرة الذرة عندما يضاف إليها كمية من الماء حتى تصير في شكل مشروب.


ابو عبير ..سلام مربع وأنت تبحر بنا في عوالم ايليا أبو ماضي...
والعُصار هو كما قلت...
والُعصارة قريب من كلامك وهي عندنا هي القرّاصة من عجين القمح تخبز على الصاج ولكنها بسمك أكبر..ثم ترش عليها دمعة اللحم الضاني مع سلطة وفحل بصل....ياااااه يابوعبير...تاكل صوابعك...على قول المصريين .

أبو أيمن
11-02-2009, 06:19 PM
أبو أيمن حبيبي

العصار ده لامن يقوم ويتلوي زي السورو
بنقول:
محمد معانا ماتغشانا
ونضحك لامن ننفنقل علي ضهرنا
ياهو صاح مو كدي؟؟

وهو كذلك ياشيكو...
وكمان نقولو...نحن حداحيد ندقّ الفضة والحديد!!!!

المبدع
11-02-2009, 07:05 PM
يا نسيماتاً تَكَرْبِتْ ..
شايلة أشواق الجنائنْ
لي جديول حلقو ناشِفْ ..
أو عَرَق تُربال يكادِنْ
في وشي الأفراح بفتِّشْ ..
بين قفا اللّحظات أعاينْ
بين سواقير الفقارى ..
الجاية من تالا المدافِنْ

القول ليك انت يا ابو ايمن ,,
ننتظر شرح هذه المفردات التي وردت في قصيدة حميد ( مناقيش العداله )

ابو عبير
11-02-2009, 07:57 PM
يا نسيماتاً تَكَرْبِتْ ..
شايلة أشواق الجنائنْ
لي جديول حلقو ناشِفْ ..
أو عَرَق تُربال يكادِنْ
في وشي الأفراح بفتِّشْ ..
بين قفا اللّحظات أعاينْ
بين سواقير الفقارى ..
الجاية من تالا المدافِنْ

أخي الغالي المبدع قبل ما يلحقنا ويفزعنا القاموس أبو أيمن حفظه الله نديك راينا
01 تكربت : هو نوع من السير ما بين المشي العادي والجري.
02 يكادن في إعتقادي إنو يسيل أو تتساقط قطراته
03 سوافير الفقاري في إعتقادي الجداول
وينك يا أختي الغالية نوارة قبل ما يجي أبو أيمن

بركلاويه
11-03-2009, 10:32 AM
......UP......

عالمابي
11-03-2009, 11:25 AM
يا جماعة الخير الغربة مسحت راسنا من كلام الحبوبات وحجاهم
بس يا محسن وابو ايمن انحنا ما شهاده عربيه شقاااااااااااااااااااااااوة عربية
لانو مافيها فك ريق
وحبوباتنا واماتنا زمان كان يقولن ليك تعال يا ولد فك الريق
وهسه داير تفكوا لي معناها ياناس الشهاده الحبوبية

أبو أيمن
11-04-2009, 04:51 PM
القول ليك انت يا ابو ايمن ,,
ننتظر شرح هذه المفردات التي وردت في قصيدة حميد ( مناقيش العداله )

الأخ المبدع سلام مربع....الشاعر المبدع حميد كثيراً مايستخدم ألفاظ موغلة في القدم...
والكلمات...
تكربت...لم تستخدم قريباً ولكن إستخدم ما يشابهها فمثلاً يقولك شنو الكترابة القايمي دي...والله يكون الطقس ملبد بالغيوم ويقولك : الدنيا مالا مكتربي كدي....وأحياناً تأتي في لغة الإستغراب والتعجب ..مثلاً تري سيارات متسابقة وعجاجا قايم فتقول باندهاش....الكتراااااب...الحكاية شنو....؟؟؟؟
ومن الشرح والإجتهاد أعلاه تأتي كلمة تكربت في سياق الحِراك....يانسيماتاً تكربت بمعنى تحركت على عجل.
يكادن كلمة قريبة وواضحة وتعني تنظيف الجدول بالطورية مما علق به من حشائش وغيره...
سواقير الفقارى....كلمة ساجور تستخدم دائماً كناية عن الحظ المتعثر وفيما يبدو لي أن كلمة سواقير جمع لساجور وسواقير الفقارى تعني حظوظ الفقراء وحالتهم المتعثرة....والله أعلم .

مظفر
11-04-2009, 09:02 PM
سلااااااااااااام

مشكورين علي البوست الرائع

حسيت انو انا قاعد وسط جدودي وحبوباتي

تسلم يدكم

المبدع
11-05-2009, 10:42 AM
لي جرح نورة النمرتق
العوازل دايرا يفتق
جات تضيق ليها مشق
حلو خل ارقوقو ينتق
يروي شتلاتنا وتعمشق
لاتقوم واطاتنا تشق

حميد جمع كلام الشايقية كله في اشعاره

نوارة البركل
11-05-2009, 11:21 AM
لي جرح نورة النمرتق
العوازل دايرا يفتق
جات تضيق ليها مشق
حلو خل ارقوقو ينتق
يروي شتلاتنا وتعمشق
لاتقوم واطاتنا تشق

حميد جمع كلام الشايقية كله في اشعاره
ألحق يا أبو عبير قبل ما يصل صاحبك
النمرتق : دي تستعمل في قفل الماء الجاري في الجدول يعني نقفل
مشق : تقريبا ً الشق في الأرض
أرقوقو : نخليه لى أبو أيمن
ينتق : يحاول الفكاك الله أعلم
تعمش : يعني تكبر وتعمل العشميق وهو لحاء يصنع منه الحبال
تشق : يعني تتشقق الواطة وهي الأرض

ابو عبير
11-05-2009, 12:11 PM
ألحق يا أبو عبير قبل ما يصل صاحبك
النمرتق : دي تستعمل في قفل الماء الجاري في الجدول يعني نقفل
مشق : تقريبا ً الشق في الأرض
أرقوقو : نخليه لى أبو أيمن
ينتق : يحاول الفكاك الله أعلم
تعمش : يعني تكبر وتعمل العشميق وهو لحاء يصنع منه الحبال
تشق : يعني تتشقق الواطة وهي الأرض

أختي الغالية نوارة البركل لك التحية ولأهلي الشايقية مثلها ... أعتقد إجابتك كلها صحيحة ما عدا
ينتق : يخلع البنات من عروشه وقد ذكرت في القرآن (ونتقنا فوقهم الجبل ....).
تعمش : عندنا بيقول الذرة عمش أي لم تنضج.
وين الحنكوشة بركلاوية.

أبو أيمن
11-05-2009, 04:58 PM
لي جرح نورة النمرتق
العوازل دايرا يفتق
جات تضيق ليها مشق
حلو خل ارقوقو ينتق
يروي شتلاتنا وتعمشق
لاتقوم واطاتنا تشق

حميد جمع كلام الشايقية كله في اشعاره

نوارة ابركل ماقصرت.....
والأرقوق هو التور الذي يدير الساقية لوحده إذ عادة ماتدور الساقية بثورين....عشان كدا الواحد لما يقولك والله أنا سايق أرقوق كناية عن التعب والقيام بالعمل لوحده دون معين...
والمشق هي المسافة بين الأشياء ...مثلاً بين القضيب والقضيب وبين العود والعود.... ويستخدمها الناس أحياناً في طول البال وقصره كأن يقول لك شخص عندما يلاحظ أنّك قد تضايقت من شئ :(مالك مِشّقك ضيق )؟؟؟ كناية عن عدم طول البال... أرجو أن أكون قد وفقت .

شيكو
11-05-2009, 05:07 PM
طبعا أنا في كلام الشايقية ده
شهادة عربية
وكان بقينا علي جنس ده!
الارتيقه قاعدين!!!
والمحس قاعدين!!!
والنشوف اخرتا معاكم!!!!

بركلاويه
11-05-2009, 06:22 PM
أوين الحنكوشة بركلاوية.


نحن هنا فقط لطرح الأسئلة ...
وشايفاك انت ونوارة عمرابي الحنكوش ماشاء الله عليكم

وتسلم يا أبوي ايمن اخوي
وما عدمناك
سؤال ليك
ممكن يوم تجي كلمة يغلبك تفسرا

تحت تحت كده يا نوارة الناس ديل قشرتي بيهم عفيت منك ...:SnipeR (64):

نجي للأسئلة
يقول ليك
موت الضان ...
وأدب المائح ...
وأخوي الكبير كان بقول للشفع بأدبكم
أدب الكلاب في تونس

المبدع
11-05-2009, 09:43 PM
لدي بعض المراجعات ,, بس عايز كل زول فرصة في التفسير ويمكنكم تعديل المداخلات

عمرابى
11-07-2009, 04:17 PM
لي جرح نورة النمرتق
العوازل دايرا يفتق
جات تضيق ليها مشق
حلو خل ارقوقو ينتق
يروي شتلاتنا وتعمشق
لاتقوم واطاتنا تشق

حميد جمع كلام الشايقية كله في اشعاره

التشق: نباتات تكون متشابكة مع بعض


برضو فى مثل يقوليك:
كلام الطير فى الباقير
جا من وين الكلام ده؟

نوارة البركل
11-07-2009, 04:38 PM
نحن هنا فقط لطرح الأسئلة ...
وشايفاك انت ونوارة عمرابي الحنكوش ماشاء الله عليكم

وتسلم يا أبوي ايمن اخوي
وما عدمناك
سؤال ليك
ممكن يوم تجي كلمة يغلبك تفسرا

تحت تحت كده يا نوارة الناس ديل قشرتي بيهم عفيت منك ...:sniper (64):

نجي للأسئلة
يقول ليك
موت الضان ...
وأدب المائح ...
وأخوي الكبير كان بقول للشفع بأدبكم
أدب الكلاب في تونس
طبعاً يا بركلاوية انا ديل عارفاهم نخلي الجماعة هم اليشوفو لينا الحل
عجبتك القشرة يا بركلاوية

أبو أيمن
11-08-2009, 06:09 PM
نحن هنا فقط لطرح الأسئلة ...
وشايفاك انت ونوارة عمرابي الحنكوش ماشاء الله عليكم

وتسلم يا أبوي ايمن اخوي
وما عدمناك
سؤال ليك
ممكن يوم تجي كلمة يغلبك تفسرا

تحت تحت كده يا نوارة الناس ديل قشرتي بيهم عفيت منك ...:sniper (64):

نجي للأسئلة
يقول ليك
موت الضان ...
وأدب المائح ...
وأخوي الكبير كان بقول للشفع بأدبكم
أدب الكلاب في تونس


أقولك الحقيقة انا أعرف استخدمهم في جمل مفيدة بالفطرة (يعني المعنى العام )...لكن قصة المثل مش عارفا....

زي كلمة (تِبْني لِبني ) التي عرفت معناها مؤخراً...يقولك والله امرق من البلد تفتشوني( تِبْني لِبْني) ماتلقوني....
بعد ماتشرحولنا المعاني الدقيقة للعبارات أعلاه كمان شوفوا ماذا تعني (تِبْني لِبْني)؟؟

نوارة البركل
11-08-2009, 06:35 PM
أقولك الحقيقة انا أعرف استخدمهم في جمل مفيدة بالفطرة (يعني المعنى العام )...لكن قصة المثل مش عارفا....

زي كلمة (تِبْني لِبني ) التي عرفت معناها مؤخراً...يقولك والله امرق من البلد تفتشوني( تِبْني لِبْني) ماتلقوني....
بعد ماتشرحولنا المعاني الدقيقة للعبارات أعلاه كمان شوفوا ماذا تعني (تِبْني لِبْني)؟؟

بركلاوية الحقينا ابو ايمن رسب في الامتحان حقك وعايز تفسير وينك

عمرابى
11-10-2009, 10:58 PM
أقولك الحقيقة انا أعرف استخدمهم في جمل مفيدة بالفطرة (يعني المعنى العام )...لكن قصة المثل مش عارفا....

زي كلمة (تِبْني لِبني ) التي عرفت معناها مؤخراً...يقولك والله امرق من البلد تفتشوني( تِبْني لِبْني) ماتلقوني....
بعد ماتشرحولنا المعاني الدقيقة للعبارات أعلاه كمان شوفوا ماذا تعني (تِبْني لِبْني)؟؟

أبو أيمن يا سواقنا
مالك داير تضحك علينا الحناكيش؟

أبو أيمن
11-14-2009, 05:42 PM
أبو أيمن يا سواقنا
مالك داير تضحك علينا الحناكيش؟

نوارة البركل ماااااااا أظنها حنكوشة......
لكن حقيقة هناك بعض العبارات مشتركة بين القبائل ومفهوم معناها العام وكلنا نستخدمها
وقد يكون لها قصة ....عاد القصة دي ما أكضب عليكم قليل جداً من يعرفها....لكن برضنا راجين الخبراء....انا عن نفسي فهي تعتبر بالنسبة لي خااارج المقرر.... مادرسنها تب .
لكن أشوف الناس اخدتلها وقفة....يالله يانوارة نحن قلنا الروب.....أها كمان قلنا الروب دي برضها من العبارات ذات المعنى العام....اها العارفلها معنى مفصل غير معنى التعب والمعاناة والفشل بقولنا.....تحياتي

نوارة البركل
11-14-2009, 07:19 PM
نحن هنا فقط لطرح الأسئلة ...
وشايفاك انت ونوارة عمرابي الحنكوش ماشاء الله عليكم

وتسلم يا أبوي ايمن اخوي
وما عدمناك
سؤال ليك
ممكن يوم تجي كلمة يغلبك تفسرا

تحت تحت كده يا نوارة الناس ديل قشرتي بيهم عفيت منك ...:sniper (64):

نجي للأسئلة
يقول ليك
موت الضان ...
وأدب المائح ...
وأخوي الكبير كان بقول للشفع بأدبكم
أدب الكلاب في تونس
بركلاوية وينك مابنتي أظهري ( ألحقيني ) أبو أيمن قال الروب برضو عايزين الروب

بركلاويه
11-14-2009, 09:38 PM
ماذا تعني (تِبْني لِبْني)؟؟

عني انا (تِبْني لِبْني) :SnipeR (101)::SnipeR (101):دي يبقالى اسم تومات ...:D
رايك شنو يا ابو ايمن ..؟؟؟؟:BeRightBack::BeRightBack:

نوارة البركل
11-15-2009, 09:15 AM
عني انا (تِبْني لِبْني) :sniper (101)::sniper (101):دي يبقالى اسم تومات ...:d
رايك شنو يا ابو ايمن ..؟؟؟؟:berightback::berightback:
بركلاوية يا أخيتي ما صاح ،
تبني جاية من التبن وهو الروس بتاع القمح واللبني هي سيقان القمح
والقصد انو الشخص اختفي فتشوهو بين التبن والسيقان ما لقوهو
هذا يعني تفتيش دقيق جداً
والرأي الأول والأخير عند أبو ايمن

أبو أيمن
11-15-2009, 07:44 PM
بركلاوية يا أخيتي ما صاح ،
تبني جاية من التبن وهو الروس بتاع القمح واللبني هي سيقان القمح
والقصد انو الشخص اختفي فتشوهو بين التبن والسيقان ما لقوهو
هذا يعني تفتيش دقيق جداً
والرأي الأول والأخير عند أبو ايمن


نوارة البركل أنا موعارفك ماك ساهلي....
وكلامك صاح بنسب كبيرة جداً...
لكن يقول العارفون أن المعني العام هو الإختفاء
أمّا تبني فهو الغشاء الذي يحيظ بحبة الذرة أو القمح قبل أن تنضج...
واللبني هي المادة التي تشبه اللبن داخل هذه التبني ...يعني أنها مختفية بداخلها...لذلك فالذي يستخدم هذه العبارة يعني أنّه سوف يبالغ في الإختفاء...مثل إختفاء اللبني داخل التبني .
مبروك لنوارة وهارد لك لبركلاوية ولكن ليس لدرجة الحنكشة ...

عمرابى
11-15-2009, 09:14 PM
بركلاوية يا أخيتي ما صاح ،
تبني جاية من التبن وهو الروس بتاع القمح واللبني هي سيقان القمح
والقصد انو الشخص اختفي فتشوهو بين التبن والسيقان ما لقوهو
هذا يعني تفتيش دقيق جداً
والرأي الأول والأخير عند أبو ايمن

نوارة البركل والله ماك هينى
ساكت قلنا عليك حنكوشة

نوارة البركل
11-17-2009, 11:30 AM
نوارة البركل أنا موعارفك ماك ساهلي....
وكلامك صاح بنسب كبيرة جداً...
لكن يقول العارفون أن المعني العام هو الإختفاء
أمّا تبني فهو الغشاء الذي يحيظ بحبة الذرة أو القمح قبل أن تنضج...
واللبني هي المادة التي تشبه اللبن داخل هذه التبني ...يعني أنها مختفية بداخلها...لذلك فالذي يستخدم هذه العبارة يعني أنّه سوف يبالغ في الإختفاء...مثل إختفاء اللبني داخل التبني .
مبروك لنوارة وهارد لك لبركلاوية ولكن ليس لدرجة الحنكشة ...

بركلاوية أتت جهينة بالخبر اليقين
شكراً أبو أيمن على هذا التوضيح
وشكراً على أنك اخرجتني من قائمة الحناكيش
وشكراً على هذه المعلومات المفيدة
أبو أيمن بركلاوية رمت لينا ( موت الضان ، أدب المدائح وزاقت )
الحقا جيبها راجعة

أبو أيمن
11-18-2009, 05:39 PM
بركلاوية أتت جهينة بالخبر اليقين
شكراً أبو أيمن على هذا التوضيح
وشكراً على أنك اخرجتني من قائمة الحناكيش
وشكراً على هذه المعلومات المفيدة
أبو أيمن بركلاوية رمت لينا ( موت الضان ، أدب المدائح وزاقت )
الحقا جيبها راجعة


وكمان أدب الكلاب في تونس.....
بالمناسبة هي الآن معروضة على مجموعة من الخبراء لفك شفرتها وبرضهم زايغين...

عمرابى
11-18-2009, 10:32 PM
وكمان أدب الكلاب في تونس.....
بالمناسبة هي الآن معروضة على مجموعة من الخبراء لفك شفرتها وبرضهم زايغين...

برضو يا أبو أيمن
كلام الطير فى الباقير
ياريت لو تديها الخبرا ديل

أبو أيمن
11-25-2009, 11:35 AM
برضو يا أبو أيمن
كلام الطير فى الباقير
ياريت لو تديها الخبرا ديل

ياريت ياعمرابي نلقالنا واحد من ناس الباقير ديل نشوف كلام الطير دا عندهم كيفنو !!!!

||النادرهـ ~
03-05-2010, 02:55 PM
الله الله
يسعدني كثير إني أتواجد هنا وأستفيد كثير من هذا البوست ..

بصراحه يا " باشا " معاك حق بكلامك .. وهذا الحاصل في كثير من الدول ..
حتى عندنا بالسعودية اختفت كثير من اللهجات البدوية .. ومثل ما قلت بسبب : الظروف الحياتية ..


أنا أتذكر لما كنت أجلس مع جدتي " الله يرحمها " ما كنت أفهم كثير من كلماتها إلا أروح لأمي وتشرح لي .. هذي معناها كذا وكذا ..

أبوي " الباشا " الكلمات اللي كتبتها أبي أحاول أفسر بعض منها والله يستر من تفسيري :nosweat:

الطرقه / يمكن تقصد المطرقة ..؟

الجبنه / هي نفسها " الجبنة " اللي ناكلها ..؟

القلايه / أعتقد إنها الأداة اللي نستخدمه بقلي البطاطا مثلا بالزيت ..


بصراحه هذا اللي قدرت أفهمها أو أحاول فهمها وأكيد إنها غلط :oo5o.com (18):



الباشا / أشكرك على هذا البوست وأكيد لي رجعه للاستفادة :SnipeR (69):

عمار حبة
03-05-2010, 09:31 PM
التكل
المطبخ
القرقريبه
سعفه من الدوم لعواسة الكسره

الطايوق
مادة من عظم ظهر الخروف لمسح الصاج

الدوكه
الصاج

الدلقان
قماش

الريكه
طبق الكسره

الدانه
الا تكون طلقة سلاح غايتو

الطرقه
تكون طرقه الكسره (الجزء المعيوس من الكسرة يعنى زى رغيفه واحده طرقه واحده)

الشيطه
لمن تقنن الحله بقولوا شيطة اللبن

الدرابه
حجر التراب او الطين

الجبنه
القهوة

القلايه
البقلو فيها البن

القلوة
برضو قلاية بن

الفندك
يستعمل لسحن البهارات

الشرقرق
أناء بيد تغلى عليه الجبنه

الليفه
تستخدم كمصفى او للنظافة

الوقايه
مقعد الجبنه أو هو قطعة قماش تضعه النساء على الرأس لحمل الاشياء

التفل
آخر شى فى الشاى او القهوة

الهبود
الرماد

(البكرى - التنى - التلتاوى - البركه ) لانهم مرتبطين ببعض
البكرى دا الفنجان الأول والتنى التانى والتلتاوى التالت والبركة هى متبقى الجبنه...

عمنا الباشا
سلامات واريتك طيب
الشغله دى مافيها جوائز وكدا ..

العاقب مصباح
03-05-2010, 10:09 PM
واليكم العشرين كلمة الاولى من اللهجة العامية السودانيه



التكل المطبخ وكان يُصنع عادة من القش أو الطين

القرقريبه اداة للعواسة (( صناعة الكسرة السودانية)) الكسرة وجبة شعبية سودانية تُصنع من النخيل عادة وأشياء أخرى تتميز بالمتانة والليونة

الطايوق هو الطايوق العادى يُسمى بالمخ يُستخرج من الحيوانات ويُستخدم فى المساعدة على إعداد الدوكة للعواسة والتى سيأتى تعريفها لاحقاً

الدوكه

الدلقان : - قطعة من القماش تعطن فى الزيت وتسى بالمعراكة أيضاً تستخدم فى الدوكة للتنظيف

الريكه :- أداة تُصنع من السعف توضع فيها الكسرة , أستعاضوا عنها بالصينية فى الوقت الحالى , وهنالك مثل يقول (( الصبى ريكة)) بمعنى أن الصبى يستطيع أن يأكل ريكة لوحده

الدانه دى بمعنى الآر بى جى ولا شنو ما عرفتها تب ,,, يا رئيس المخرفين

الطرقه :- هى قطعة الكسرة الواحدة

الشيطه : هى هى الطرقة

الدرابه :- هى الحصا , وغالباً ما تكون من الطين الناشف

الجبنه :- القهوة , أو تكون قاصد أداة تُصنع القهوة

القلايه :- أداة لقلى البُن وتسى بالطوة

القلوة :- بمعنى البن المقلى أو فى مرحلة القلى , وبعض الناس يستمتع براحة القلوة , توجد قلية , وهى حبات الذرة المحروقة ,

الفندك :- أداة لسحن البهارات قديماً , وتستخدم للبن أيضاً

الشرقرق :- أداة للقهوة أيضاً , يُسمى بالمصفى

الليفه :- أداة تصفية القهوة , تُصنع من البلاستيك , أو من الليف .

الوقايه :- أداة توضع فيها آلة الجبنة وهى دائرية الشكل

التفل :- متبقى البن فى الجبنة أو متبقى الشاى

الهبود , الهبود معانيهو كتيرة , فى هبود شاى وهبوت قهوة وهبود نار , وهو بمعنى متبقى ,

(البكرى - التنى - التلتاوى - البركه ) لانهم مرتبطين ببعض :- البكرى أول فنجان فى القهوة أو المرة الأولى , التنى , يشرب بعد تسخينة القهوة فى النار , التلتاوى بعد التسخينة التالتة , البركة , آخر تسيخنة للقهوة .




اها يا الباشا

بعد فطرنا وشرب قهوتنا خلنيا نقوم نمشى لى اهلنا

والله مطعم بس

العاقب مصباح
03-05-2010, 10:12 PM
عمار حبة , ياخى انا من الساعة تسعة شغال ارد ومشغول ألقاك رديت ياخ

الشلاقة ليك شنو

عمار حبة
03-05-2010, 10:41 PM
عمار حبة , ياخى انا من الساعة تسعة شغال ارد ومشغول ألقاك رديت ياخ

الشلاقة ليك شنو

من تسعة..!!!!!:no:
جرجره شديده..

بالمناسبة دى
محرَكَه معناها شنو..؟؟:001:

المبارك ابراهيم
03-05-2010, 11:52 PM
برضو تقولوا الباشا مخرف ده كلام زول مخرف أسأل الله أن يهنؤك بعقلك ويحفظك لنا آمين
بوست توثيقي وسوف تجدنا هنا إن شاء الله.
النادرة شدي حيلك ذاكري هذا البوست جيدا سوف تستفيدين كثيرا.
عمار والعاقب والله ما قصرتو كفيتو ووفيتو شرح مفصل والله فتوا الزوزني لي غادي. حفظكما الله ورعاكما .
أنا عارف أخوي الباشا ذكي عمل ليهم بوست وعارف ناسوا الكبار بيجوا براهم.
لأن الكلام المكتوب ده ما بعرفوهو إلا العمالقة والمخضرمين أمثال عمار والعاقب والبقية تأتي إن شاء الله.

العاقب مصباح
03-06-2010, 12:06 AM
من تسعة..!!!!!:no:
جرجره شديده..

بالمناسبة دى
محرَكَه معناها شنو..؟؟:001:



المحركة دى العملتها انا يا عمار اخوى

والقاك انت بسرعة جيت رصيت كلامك

قالوا فى العجلة من اليابان ياخ

العاقب مصباح
03-06-2010, 12:07 AM
لأن الكلام المكتوب ده ما بعرفوهو إلا العمالقة والمخضرمين أمثال عمار والعاقب والبقية تأتي إن شاء الله.



ياشباب

الزول العارف يعمل نائم

انا وعمار خلاص اتبلبنا

والبتبلبل بيعوم

والممطورة ما بتبالى من الرش :d:d

المبارك ابراهيم
03-06-2010, 12:29 AM
أخونا الباشا ماقصرت في الطرح الجميل وما قصروا الشباب في الشرح وطبعا التصحيح النهائي لازم يكون تحت توقيعك يا معلم وهنا أحاول أن أتذكر شيئا من عاميتنا الجميلة هسه يقولوا ديل مخرفين!!!

# المشلعيب,,

# الكابدلو,,

# التيبار,,

# السباتة,,

# الخدورة,,

# التِيلة,,

# البردعة,,

# الفروة,,

# البرمندي,,

# البرمة,,

# القُلًة,,

# القيربانة أو القيروانة,,

# العتود,,

# البرجوبة,,

# السًلُوكة,,

# الكتاحة,,

# الراكوبة,,

# المُخرز,,

# القِحِف,,

# الشعفوفة,,

,,,,,,, الله يعينكم علي الشرح,,,,,,,,,,,,,,,,,,,,,,,,,,
آها يا الباشا أخوي قصرت معاكم؟؟؟؟؟؟؟؟؟؟؟؟؟؟؟؟؟؟؟
( ود إبراهيم)

المبارك ابراهيم
03-06-2010, 12:34 AM
ياشباب

الزول العارف يعمل نائم

انا وعمار خلاص اتبلبنا

والبتبلبل بيعوم

والممطورة ما بتبالى من الرش :d:d

العاقب أخوي مساك الله بالخير.

الممطورة ما بتبالي من الرشة
والميتة ما بتسمع الصـــــــيحة
,,,,,,,,,,,,,,,,,,,,,,,,,,,,,,,,,,
إنتوعوموا ونحن بنعوم معاكم والله يستر من الكاروشة بتاعت الترعة.

ابتسام
03-06-2010, 01:06 AM
أخونا الباشا ماقصرت في الطرح الجميل وما قصروا الشباب في الشرح وطبعا التصحيح النهائي لازم يكون تحت توقيعك يا معلم وهنا أحاول أن أتذكر شيئا من عاميتنا الجميلة هسه يقولوا ديل مخرفين!!!

# المشلعيب,,=بعلقوه في السقف للاكل ما يخرب

# الكابدلو,,=؟؟؟

# التيبار,,؟؟؟؟؟

# السباتة,,؟؟؟

# الخدورة,,؟؟؟؟؟؟؟؟؟

# التِيلة,,؟؟؟؟

# البردعة,,=البتاعة اللي بيختوها في البتاع(معليش الحمار)

# الفروة,,=للصلاة

# البرمندي,,؟؟؟؟؟

# البرمة,,؟؟؟

# القُلًة,,=الزير الصغير بتاع الموية

# القيربانة أو القيروانة,,

# العتود,,=ولد الغنم

# البرجوبة,,؟؟؟

# السًلُوكة,,؟؟؟؟؟

# الكتاحة,,=الرمال الكثيرة او الهواء

# الراكوبة,,=الراكوبة؟؟هي زاتها

# المُخرز,,=البخيطو ابهو

# القِحِف,,

# الشعفوفة,,

,,,,,,, الله يعينكم علي الشرح,,,,,,,,,,,,,,,,,,,,,,,,,,
آها يا الباشا أخوي قصرت معاكم؟؟؟؟؟؟؟؟؟؟؟؟؟؟؟؟؟؟؟
( ود إبراهيم)



اخد كم من 100

لكن اخير العم الباشا

اسهل

حلم الأماني
03-06-2010, 03:11 PM
أخونا الباشا ماقصرت في الطرح الجميل وما قصروا الشباب في الشرح وطبعا التصحيح النهائي لازم يكون تحت توقيعك يا معلم وهنا أحاول أن أتذكر شيئا من عاميتنا الجميلة هسه يقولوا ديل مخرفين!!!

# الكابدلو,, يصنع من السعف يستعمل لحفظ الأشياء

# السباتة,, فرشة من الحصير

# الخدورة,, ....

# التِيلة,, لعبة شعبية قديمة

# الفروة,, تصنع من الجلد تستعمل للصلاة

# البرمندي,, زي الوتد تربط فيه الماشية

# البرمة,, ......

# القيربانة أو القيروانة,, .......

# البرجوبة,, طين البحر

# السًلُوكة,, عصاية بحفرو بيها للزراعة

# الراكوبة,, ياها ذاتها المظلة بس من القش والقنا

# القِحِف,, ......

# الشعفوفة,, المطرة المصحوبة بالرياح

,,,,,,, الله يعينكم علي الشرح,,,,,,,,,,,,,,,,,,,,,,,,,,
آها يا الباشا أخوي قصرت معاكم؟؟؟؟؟؟؟؟؟؟؟؟؟؟؟؟؟؟؟
( ود إبراهيم)





عمنا الباشا والله طرح قمة في الروعة ...

تسلم ويديك الف عافية يااارب


كدي ورونا ديل ..

الدحلوب :
السعن :
الكليقة :
المحويب :
التبروقة :
السحارة :

روعة النيل
03-06-2010, 04:49 PM
الباشا ,,,
مساحة جميلة للبحث والتنقيب عن لغتنا العامية ,,
واصلوا معنا في هذا البحث القديم في الجديد ..
نحن حضور ومتابعين

المبارك ابراهيم
03-06-2010, 05:38 PM
عمنا الباشا والله طرح قمة في الروعة ...

تسلم ويديك الف عافية يااارب


كدي ورونا ديل ..

الدحلوب :
السعن :
الكليقة :
المحويب :
التبروقة :
السحارة :

الدحلوب: شيء زي القلة أو جزء منها مكسور.
السعن: جلد العتود المدبوغ أصغر من القربة ( حافظة ماء في زمنا هذا)
الكليقة: الحزمة من القصب
المحويب: وفي رواية أخري المحويت حبل تربط به أرجل البقرة الخلفية أثناء حلبها.
التبروقة: تعمل عمل الفروة ولكن التبروقة من السعف والفروة من الفراء جلد الخراف وغيرها
السحارة: صندوق من الخشب له غطاء تحفظ فيه الحبوبات أهم أغراضهن عليها طبلة أصلية.
أتمني أن أكون أجبت الإجابة الصحيحة شكرا حلم الأماني.

المبارك ابراهيم
03-06-2010, 05:47 PM
يا جماعة مسؤلين من الخير أخوي الباشا ده مشي وين؟؟؟؟
الغائب عذره معاه إن شاء الله الداعي خير
يالباشا هوووووووووووووووووووي سامعني وي تعاااااااااااااااال.
الزول ده رمي لينا كلاموا السمح ده وفات خلانا.
أنا خايف يكونوا إختطفوهو ناس الألفية الثالثة أصلي شايفهم اليومين ديل ( حالقين عليهو)

المبارك ابراهيم
03-06-2010, 05:56 PM
اخد كم من 100

لكن اخير العم الباشا

اسهل

إبتسام ما قصرتي الإجابات التي جاوبتيها كلها صحيحة
فقط الراكوبة هي الراكوبة ذاتها تحتاج لإضافة فالراكوبة هي في شكل مظلة أدوات تشييدها حطب (شعب) وقنا وحصير أوقش أو ( بربيط) يوجد في الترع ومصارف المياة نبات أقرب للحصير.

عيون المها (انامل انثى)
03-06-2010, 06:26 PM
حقيقي لهجتنا جميلة وانا بشوف انو اي اب وام دعتهم الظروف لانهم يعيشو بره ارض الوطن لازم يعلمو اولادهم لهجتنا فمن المؤسف انك تلاقي اولاد كبار في الجامعات لايستطيعون التحدث باللهجة العامية ومابعرفو اي حاجة عن موروثاتنا وبيعانو لكي يتواصلو مع اقرانهم .
غايتو انا في حاجات كتيرة عرفتها لانو والدي كان يصر دائما على ارتباطنا بالسودان والارتباط بالموروثات فيه
وفي حاجات ماعرفتها لكن من الاجابات عرفتها
جزيتم خيرا

||النادرهـ ~
03-06-2010, 11:32 PM
:SnipeR (63):


ما شآء الله عليكمْ .. بس إذا تبون الحقيقة في كلمات صعبة ..
بس فرحت لما قرأت : ( الراكوبة ، والسلوكة ) لأني أعرفهم من زمان ،


الباشا والمبارك إبراهيم /
أهم شيء إنكم ما تسوون أمتحان لهذ البوست :sweatdrop:

العمده
03-07-2010, 10:32 AM
[color="magenta"]المحويب :
color]


حلم الامانى

محويب دى فيها نوع من المبالغه عديل كده :SnipeR (49):

العمده
03-07-2010, 10:34 AM
واليكم العشرين كلمة الاولى من اللهجة العامية السودانيه

التكل
القرقريبه

الطايوق

الدوكه

الدلقان

الريكه

الدانه

الطرقه

الشيطه

الدرابه

الجبنه

القلايه

القلوة

الفندك

الشرقرق

الليفه

الوقايه

التفل

الهبود

(البكرى - التنى - التلتاوى - البركه ) لانهم مرتبطين ببعض

الباشا

ياعم الحاجات دى سودانيه ؟؟؟

ياهـ أول مره اسمع بيها ..

مشكورين شباب على الشرح :SnipeR (49):

نوارة البركل
03-07-2010, 11:11 AM
واصل عمنا الباشا ،،
وجزيت خيراً ،، عندنا بكثرة من يحتاج لهذه الثقافة العامية
والله حتى الموجودين في السودان ما بعرفوها
شكراً عمنا الباشا ،، القال الباشا مخرف كذب،،

عمرابى
03-15-2010, 02:23 PM
يأخوانا مسعولين وين عمنا أبو أيمن
شايف فى كمية من المخرفين ظهروا
ياللا ياريت يجوا يوروا ناس الألفية التالتة ديل تراثنا
راجنك يا ود المبارك انت وشلتك

المبارك ابراهيم
03-16-2010, 10:31 AM
يأخوانا مسعولين وين عمنا أبو أيمن
شايف فى كمية من المخرفين ظهروا
ياللا ياريت يجوا يوروا ناس الألفية التالتة ديل تراثنا
راجنك يا ود المبارك انت وشلتك

أنا إتعرفت يا عمرابي شلتي منو ؟؟؟؟؟؟؟؟؟
وراجعلك إن شاء الله.

عمرابى
03-16-2010, 11:30 AM
أنا إتعرفت يا عمرابي شلتي منو ؟؟؟؟؟؟؟؟؟
وراجعلك إن شاء الله.

المبارك ود ابراهيم
أنا ما من شلتكم أنا مش فى لجنة الألفية التالتة
دايرين ناس قوس قزح والباشا ..وبقية العقد الفريد
كدى شوف لينا الطير فى الباقير

الباشا
03-20-2010, 08:52 PM
النادره
عمار حبه
العاقب
تومى يا دفعه " ود ابراهيم "
إبتسام
حلم الأمانى
روعة النيل
عيون المها
زٌمل يا فرده " العمده أبو غسان "
نوارة البركل

أشكركم على متابعة البوست فى غيابى

وما قصرتوا يا شباب .... الشرح ماشاء الله ميه ميه

والله يا ود إبراهيم ياخوى غلبنى النسويه مع ناس الاتصالات ديل
جبت موبايلى كونكت ما نفع جبت موبايلى برودباند ذى الزفت يعنى عالم قاعده تاخد فلوسنا على الفاضى ... قلت النحاول اجرب مع ناس أس تى سى طلعت مواعيدهم مضروبه وحاولت اوسط " الدنقلاوى الخطر " برضو ما نفع .... شى يحير

الليله شلت قرجتى ومشيت علي ناس موبايلى .... عينى يطقن شرر قلت يا فلقتهم يا يسلمونى الترحيل .... مانى مارق منهم إلا بحقى ... أهااا لقيت لى وليدات بلحيل نجاااض اكلونى حنك وعملوا لى تخفيض وطيبوا خاطرى وشرطت عليهم إن الخدمه ما عجبتنى تانى بجيهم صاد اشيل قريشاتى .... اها قالوا ما عندهم مانع طب ... دفعونى الفيها النصيب ... هسع دى ... وجيت صاد البيت ودخلت عليكم

ها ناس كيفنكم نعلكم عافيه
وإن شاء الله ما فى زول ميرود واللا جاتو جضماره

الناس الشاردين من الامتحان ..... هاكم المجموعه التانيه

الباشا
03-20-2010, 09:08 PM
العشرين التانيه

التقنت

أب سته

اب عشرين

الضناب

الملود

الجكاكه ( مع تعطيش الجيم )

الضقل

البروس

الشلخه

الصرايه

الموليته

الدغلوب

القرقور

الشامه ( لا علاقة لها بشام الجسم )

الخلوه

البردعه

المخلايه

الحداثه

الجنابيه

الكنار ( لاعلاقة له بالطيور )


ونشوفكم على خير باذنه تعالى

اللارنجا
03-21-2010, 10:37 AM
الباشا يعجز لساني عن وصف فرحي بهذا البوست
حقاً نحتاج أن نعيد صياغة الجيل القادم ليتشكلوا
بثقافاتنا ولغاتنا بدل ( ويش تبقي وتسلمواا )
فقد إختلط صغارنا بالثقافات الجديدة وأتونا بمفردات
عجزنا عن إدراكها ( راندوك جديد ) بعد أن كنا نحلم بسودان جديد
وتاه الكبار في زحمة حجي الأطفال الصغار وصرنا خليط ينصدم حين يجد عبارات الزمن الجديد

||النادرهـ ~
03-21-2010, 01:10 PM
الناس الشاردين من الامتحان ..... هاكم المجموعه التانيه


الباشا / أنا متأكدهـ إنك ما تقصدني أنا :D


الحمد لله على السلامه .. جيب لك خط وافتح دي اس ال وفك عمرك من موبايلي ..
أنا لما كنت مشغلتها كانت تروح فلوسي وقوقل بالعافيه يفتح :oo5o.com (7):

نوارة البركل
03-21-2010, 01:38 PM
العشرين التانيه

التقنت

أب سته

اب عشرين

الضناب

الملود

الجكاكه ( مع تعطيش الجيم )

الضقل

البروس

الشلخه

الصرايه

الموليته

الدغلوب

القرقور

الشامه ( لا علاقة لها بشام الجسم )

الخلوه

البردعه

المخلايه

الحداثه

الجنابيه

الكنار ( لاعلاقة له بالطيور )


ونشوفكم على خير باذنه تعالى



الباشا يا كبيرنا لما ترجع بالسلامة ترجع معال أيامنا الجميلة
رجوعك بفرحنا واسمع كلام النادرة لأنو غيابك بيزعلنا
يا الباشا كلمات العشرين دول كلهم من الجزيرة بس كم واحد من الشمالية
وهم : -
التقنت : وهو عبار عن جوان الحوض بتاع البرسيم مثلاً ،،
الصرايه : عندنا مكان كان مخصص لنزول السيد علي الميرغني هذا المكان أهلنا بقولوا عليهوا صراية سيدي علي الميرغني ،،
القرقور : نوع من أنواع السمك له رأس أكبر من جسمه ،،
الخلوه : مكان لحفظ القرآن ،،
البردعه : شئ يشبه المسند يوضع على ظهر الحمار ليركب عليه ،،
المخلايه : المخلاية كيس مصنوع من الصوف يحمل على ظهر الحمار لوضع الاشياء داخله ،،
والباقي يجاوبوا عليه ناس الجزيرة ..

شاعر الغبش
03-21-2010, 02:35 PM
العشرين التانيه

التقنت

أب سته

اب عشرين

الضناب

الملود

الجكاكه ( مع تعطيش الجيم )

الضقل

البروس

الشلخه

الصرايه

الموليته

الدغلوب

القرقور

الشامه ( لا علاقة لها بشام الجسم )

الخلوه

البردعه

المخلايه

الحداثه

الجنابيه

الكنار ( لاعلاقة له بالطيور )


ونشوفكم على خير باذنه تعالى




أب ستة / هو جدول فرعي لسقايةالحواشة يتفرع من أب عشرين وأب عشرين يتفرع من الكنار ( بذلك أكون جاوبت أب عشرين والكنار وهي تقسيم جداول الماء حسب حجمها )

الضناب / هو حبل مربوط مع سرج الحمار مشبوك مع زيل الحمار ليثبت السرج من التحرك للأمام وهناك (اللباب) وهو مثل الحزام ( القاش ) يربط في منتصف بطن الحمار لتثبيت السرج أيضا.

الملود / هي أداة لحش القش وتنقسم غلي نوعين ( ملود واقف ) وهي لها عصا طويلة ويستخدمها الفرد للحش واقفا و ( الملود العادي ) له عصا معكوفه وهي أصغر حجما .

الجكاكة / هي عصا طويلة لها رأس من الحديد أشبه بالحربة تستخدم لحفر الأرض بضربة واحده أو ضربتين ثم رمي البذور ( التيراب ) .. وهي تحل محل السلوك أحيانا .


الضقل / هو ( العرش _ بكسر العين والراء ) .. وهو نوع من جذور بعض النباتات الوتدية يكون قوي ومثبت علي الأرض ويظهر عندما نقوم بالحراثه .
وهناك نوع من الضقل يطلق علي العود في لعبة شعبية قديمة تستخدم فيها عصاتان إحداهما طويلة والأخري قصيرة تكون بوضع أفقي في حفرة صغيرة .

البروس / هو النبات الذي ينمو دون تدخل الإنسان ( قام بروس ) يعني مافي زول زرعو .

الشلخه أو الشلخ / هو قلع جزء من العيش النامي في حفرة واحدة حتي لا يقوم ضعيفا .. ويجب ألا يتعدي عدد حبات العيش ( التيراب ) في الحفرة الواحدة الخمس أو الأربع حبات وما زاد عن ذلك ( سفوف ) وعلاج السفوف هو الشلخ .. وعلاج النقصان هو ( الرقاعة )

الموليته / هي نبات ينمو في الخلاء ( مر المذاق ) يغسل بالماء مرات عديدة ويخلط مع البصل والدكوة والشطة الحااااااارة .. ( تأكل وتتشهد ) .. وهو علاج مفيد لمرضي السكري .

الدغلوب / هو حشرات صغيرة توجد في الترعة .. لها حجم شبة دائري وزيل صغير يساعدها في السباحه .. والزول ده مدغلب يعني عندو كرش ومدردم وقصير .. وربما الدغلوب و طور نمو للقعونج ( الضفادع ) والله أعلم .


الماجاوبتهن قطع شك إسمن في الجزيرة شي تاني ...

الباشا
03-21-2010, 11:25 PM
إختلط صغارنا بالثقافات الجديدة وأتونا بمفردات
عجزنا عن إدراكها ( راندوك جديد ) بعد أن كنا نحلم بسودان جديد


اللارنجا

اولاً شكراً ليك يا راقى

وبعدين الاسم ده جبتو من وين ؟؟

أما الراندوك ... طبعاً لغة شبابية

بس ... يا ليت تتحفنا ببعض منه عشان نترجمها بالدارجية السودانيه

على الأقل يمكن نقدر نأثر شويه فى ثقافة عيال اليومين ديل

الباشا
03-21-2010, 11:58 PM
الباشا / أنا متأكدهـ إنك ما تقصدني أنا :d
الحمد لله على السلامه .. جيب لك خط وافتح دي اس ال وفك عمرك من موبايلي ..
أنا لما كنت مشغلتها كانت تروح فلوسي وقوقل بالعافيه يفتح :oo5o.com (7):

أكييييد قاصدك يا النادرة عدييييل كدا

بس انتى عارفه مين الحيمتحنك ؟؟

وبالمناسبه الدرجات حتكون من ضمن درجات التخرج
.
.
.





.
.
.
.
.
.

عزّ الله رٌحتْى وطى ههههههههههههههههههه

الباشا
03-22-2010, 12:21 AM
يا الباشا كلمات العشرين دول كلهم من الجزيرة بس كم واحد من الشمالية
وهم : -
الصرايه : عندنا مكان كان مخصص لنزول السيد علي الميرغني هذا المكان أهلنا بقولوا عليهوا صراية سيدي علي الميرغني ،،
..

نواره

طلعتى سنجكاويه ميه ميه

غريبه السناجك كلهم خت 100

ويموتوا فى سيدى على

إلا انتو ..... سلكتو خط الحريه وراء الزعيم الأزهرى ... طبعاً ناس راقيه

وبالمناسبه دى عندنا حبوبةً لينا جات الصرايه حقت سيدى على فى الخرطوم

صنقرت عند الباب وقالت ليهم

هو يا جنيات أمشو نادوا لى على ود اخوى قولوا ليه عمتك دايراك

( بالجد قصه حقيقه )

يديك العافيه يا نواره ..... قاموسك ميه ميه

وفعلاً كل الكلمات قاموس جزيره

أها .... المره الجايه عاوزين قاموس سنجكاوى

خلينا نجيب خبر ناس ..... بالى بالك :SnipeR (101):

الباشا
03-22-2010, 12:45 AM
الماجاوبتهن قطع شك إسمن في الجزيرة شي تاني ...


واضح يا شاعر المنتدى إنك زول جزيره أصييييييل

بس كلها ..... كلمات جزيره .....

الشامه والبردعه والجنابيه معروفات فى الجزيره

الشامه هى شكل المويه لما تطلع من كبرى الترعه وتعمل تيارات لافه

البردعه هى شكل المخده توضع فوق سرج الحمار

الجنابيه هى مجرى مائى اكبر من أب سته وأقل من أب عشرين